TIMOHTI KAW SHAGUN DAT AI LAIKA LAHKAWNG

2 Timohti 1

¹ Hkristu Yesu hta e rawng ai asak jaw na lam a ga ndat hte maren, Karai Kasang a myit ra ai hku majaw, Hkristu Yesu a kasa rai nga ai, ngai Pawlu gaw, nye tsaw ra ai ngai Sha Timohti hpe, ga shana dat nngai. ² Kawa Karai Kasang hte anhte a Madu Hkristu Yesu kaw na, chyeju, masan dum ai hte ngwi pyaw ai gaw, a nga nga u ga law. ³ Nye a akyu hpyi ai ga hta nang hpe n sim n sa a dum nga let, ji wa ni kaw nna san seng ai myit hte ngai daw jau nga ai Karai Kasang hpe, ngai shakawn nga nngai; ⁴ na a myiprawi ngai dum nna, nye a kabu gara ai dik wa lu li ga, nang hte hkrum na, shani shana ngai myit ndawt nga nngai: ⁵ nang hta jung ai n sawt ai makam masham hpe mung ngai bai dum nga ai hte, dai gaw na nwoi dwi Lui hte, na nnu Uni yan hta shawng jung nga nna, nang hta e mung a jung nga ai hpe, ngai myit tawng nga nngai. ⁶ Dai re ai majaw, ngai lata mara jaw ai hte, nang hta rawng ai Karai Kasang a chyeju hpe naw wut shagrung ya na, ngai nang hpe shadum dat de ai. ⁷ Kaning rai nme law, Karai Kasang gaw hkrit chye ai myit anhte hpe n jaw mi ai; n-gun lagaw rawng ai myit, tsaw ra chye ai myit, si si nga chye ai myit she jaw mi ai. ⁸ Dai rai nna, anhte a Madu a sakse hkam ai lam hta mung, shi a bawng dung ai wa nye a lam hta mung, nang kaya ai myit n rawng ai sha, Karai Kasang a n-gun lagaw rawng ai hte maren, dai kabu gara shi ga matu mara ru tsang ai rau hkrum nga ga: ⁹ Karai Kasang gaw anhte a arawn alai majaw n rai, shi hkum nan myit hpang da ai hte chyeju a majaw sha, anhte hpe hkye hkrang la nna, chyoi pra ai shaga la ai ga hte shaga da ma ni ai: ¹⁰ dai lam gaw moi chyaloi nhkoi kaw nna, Hkristu Yesu hta e anhte hpe jaw da ma ni ai rai ti mung, anhte a hkye hkrang la ai Madu Hkristu Yesu paw pru ai a majaw, ya e shadan shaleng dat nu ai; shi gaw si hkrung si htan hpe yeng kau da nna, dai kabu gara shi ga hte asak hkrung ai lam mung, n hten n bya re ai lam mung, shadan dat nu ai: ¹¹ dai kabu gara shi ga hta, hkaw dan ai wa mung, kasa hte sara aya mung, ngai hpe dang da ni ai. ¹² Dai rai nna, dai lam a majaw ndai hte ru tsang ai ngai hkrum ti mung, n hkrit n kaya nga nngai; kaning rai nme law, kadai wa hpe ngai kam manoi nga nngai gaw, ngai chye nga ai hte, ngai ap tawn da ai arai hpe, dai nhtoi du hkra, shi mahkyu da ya lu ai, ngu nna ngai myit mu nga nngai. ¹³ Ngai kaw na nang na la sai masan maseng mungga ningli hpe, Hkristu Yesu hte seng ai kam sham nna tsaw ra ai myit hte, gumnoi nga u. ¹⁴ Nang hpe ap ya da ai aya kaja hpe, anhte hta rawng nga ai Chyoi pra ai Wenyi hte, a mahkyu nga u. ¹⁵ Asi a mung na ni nlang hte ngai hpe kau da ma ni ai gaw, nang chye nga ndai; shanhte hta Hpugelu yan Heramoge lawm ma ai. ¹⁶ Dai Madu gaw Onesihpuru a nta masha ni hpe chyeju jaw u ga; kaning rai nme law, shi ngai hpe law law lang shalan shabran ni ai hta n-ga, nye a hkang hkyihkyang majaw n kaya ai sha, ¹⁷ Roma mare de sa du jang, ngai hpe alawan hkan tam jahkrum lu wu ai: ¹⁸ - shi gaw dai shani e, Madu a man e matsan dum ai hkam la lu hkra dai Madu gaw shi hpe chyeju jaw u ga: - Ehpesu mare e mung shi ngai hpe gade wa galaw daw sai gaw, nang atsawm sha chye nga ndai. 

2 Timohti 2

¹ Dai re ai majaw, ngai sha e, Hkristu Yesu hta e rawng ai chyeju hta, n-gun lapyin jat wa lit ga. ² Sakse law law a man e ngai kaw na nang na la sai lam hte hpe, masha kaga hpe sharin achyin chye ai kangka re ai masha hte kaw htawt ap ya u. ³ Hkristu Yesu a hpyen ma kaja zawn, ru tsang jawm hkrum ga. ⁴ Hpyen amu gun hpai ai wa kadai mung, tinang hpe hpyen hpung hta shalawm la ai wa a myit htuk lu hkra, ndai aprat na arai ni hta tinang hkum hpe ahkang abai shangun ma ai n rai. ⁵ Shingjawng ai poi hta shang ai wa mung, tara hte maren n shingjawng yang gaw, nampan shanghkawng daraw lu na n rai. ⁶ Sun hkauna magan shaja ai wa, nsi nai si shawng sha ai gaw, majoi rai nga ai. ⁷ Ngai tsun ai lam myit aru yu u; kaning rai nme law, dai Madu gaw lam shagu hta nang hpe chye chyang ai myit jaw na ra ai. ⁸ Ngai hkaw tsun ai kabu gara shi ga hte maren, si mat ai ni kaw na bai hkrung rawt wa sai, Dawi a aru arat rai nga ai Yesu Hkristu hpe, a dum nga u. ⁹ Dai kabu gara shi ga a jaw e, n hkru ai wa zawn, bawng dung hkra ru tsang hkrum nngai, rai ti mung, Karai Kasang a mungga gaw sharen da hkrum lu ai n rai. ¹⁰ Dai re ai majaw, lata la hkrum ai ni mung, Hkristu Yesu hta na hkye hkrang la ai chyeju hte nawng, htani htana a hpung shingkang hpe hkam la lu mu ga, dai ni a matu mara hkrum mahkrum ngai hkam sharang nga nngai. ¹¹ Da ndai gaw kangka re ai ga rai nga ai: Anhte shi hte rau si sa ga yang gaw, shi hte rau mung hkrung lu na ra ga ai; ¹² anhte shakut sharang ga yang gaw, shi hte rau mung up lu na ra ga ai: shi hpe ndang kau yang gaw, shi mung anhte hpe ndang kau na mi ai: ¹³ anhte kangka n rai lu ti mung, shi gaw kangka rai nga ai; kaning rai nme law, shi gaw shi hkum dai ndang kau lu ai n rai. ¹⁴ Ndai lam ni shanhte hpe shadum shahprang nga u; hpa akyu n shabyin ai hta n-ga, na lu ai ni a myit hpe gale galau shangun ai ga hte gasat ningjet n nga mu ga, Karai Kasang a man e shanhte hpe hkang da u. ¹⁵ Nang chyawm gaw, kaya shara n rawng ai sha, dai teng man ai mungga hpe ding ding chye hpajang ai magam gun hpai wa zawn, Karai Kasang a man e myi man pa lu hkra, na hkum shadan dan na, a shaja nga u. ¹⁶ Kaman lila baw law ai ga hpe koi gam u; dai lam hkan ai ni gaw, n tara ai htung de grau nna shang nan wa ma ai rai nna, ¹⁷ shanhte a ga gaw manggang lahtawp zawn, sha ayai na ra ai: shanhte hta Humenu yan Hpilitu lawm ma ai: ¹⁸ shan gaw, bai hkrung rawt wa ai lam gaw byin ngut sai, nga nna, dai teng man ai lam hta na yit mat wa ma ai hte, nkau mi a kam sham ai lam hpe shabai kau ya ma ai. ¹⁹ Rai ti mung, Dai Madu gaw shi hte seng ai ni hpe chye ginhka ai, nga nna mung, Dai Madu a amying mying ai ni nlang hte gaw, n ding n hpring ai hpe koi gam mu ga, nga nna mung, dazik sakse kap nga ai Karai Kasang a ngang kang ai npawt nhpang gaw, a grin nga ai. ²⁰ Dai hta n-ga, galu kaba ai nta hta, ja wan gumhpraw wan sha, nga ai n rai; hpun hte ga kagam wan mung lawm nga ai; nkau mi gaw arawng a matu, nkau mi gaw arawng a matu n rai. ²¹ Dai re ai majaw, dai ni hta na tinang hkum hpe jasan jaseng kau ai wa rai yang gaw, chyoi pra ai, madu lang ging ai hte, amu kaja shagu a matu hkyen da ai arawng lu ai wan, rai na ra a. ²² Dai rai nna, brang ram a myit kayut ai lam koi gam u: san seng ai myit hte dai Madu hpe shaga gang ai ni hte rau, ding hpring ai, kam sham ai, tsaw ra ai hte ngwi pyaw ai hpe, hkan shachyut nga u. ²³ Angawk angak hte tuk shamak re ai ndang kalang ga gaw, ga law ga la lam sha shapraw nga ai, chye da nga let, dai baw ga hpe koi gam u. ²⁴ Dai Madu a shangun ma chyawm gaw, ga law ga la n mai nga ai sha, yawng mayawng a man e shingdi ai, sharin shaga chye ai hte myit galu kaba rawng nna, ²⁵ nhtan shai ai ni hpe sumnung ai myit hte sharin achyin ya lu na, mai nga ai: shing di yang, teng man ai ga hpe chye chyang lu mu ga, Karai Kasang gaw shanhte hpe gaja wa myit malai lu na chyeju jaw nna, ²⁶ nat a myit hku hkan na, shi a dawnggawng hta rim la hkrum ai ni, bai dum hprang wa dam ma nhten law. 

 

2 Timohti 3

¹Dai hta kaga, hpang jahtum na nhtoi ni hta e, yak la ai aten du na ra ai, chye nga u, ² kaning rai nme law, masha ni gaw, tinang hkum hpe tsaw ra ai ni, gumhpraw marin ai ni, grang dakat ai ni, gumrawng gumtawng re ai ni, shatan nhkan chye ai ni, kanu kawa ga n madat ai ni, chyeju n chye dum ai ni, n chyoi n pra ai ni, ³ nja nhpra myit n rawng ai ni, masin n si hkraw ai ni, nlem chye ai ni, marai n rawng ai ni, myit matse ai ni, kaja lam hpe n dawng ai ni, ⁴ mayun gumlau ai ni, sadi n dung ai ni, myit tsaw myit dap ai ni, Karai Kasang hpe tsaw ra ai hta tinang a pyaw daw lam hpe grau sharawng ai ni, rai na ma ra ai; ⁵ shanhte gaw tara hkungga ai htung hkan ma ti mung, dai hte seng ai hpung dagu hpe nyet kau ai ni rai nga ma ai: shing re ai ni hpe mung koi kau u. ⁶ Shanhte hta na nkau mi gaw, nta ni hta mayun de nna, yubak hta lup mat wa dai hte, ngang kayut ai lam amyu myu hta len mat nna, ⁷ tut nawng e sharin ai hkrum ti mung, teng man ai lam a chye chyang ai de galoi n du lu ai, myit n gring ai numsha ni hpe shang rim la ai ni, rai nga ma ai. ⁸ Yanne yan Yambre gaw Mawshe hpe hkum shadang nga ai zawn, dai ni mung dai teng man ai lam hpe hkum shadang ma ai: shanhte gaw myit hten tsam mat wa nna, kam sham lam hta maju n jung ai masha rai nga ma ai. ⁹ Rai ti mung, dai yan a lam dan leng pru wa ai zawn, ndai ni a ngawk ai lam mung, masha mahkra a man e dan leng wa na ra ai rai nna ya na made hta shanhte n lai lu na ma ai. ¹⁰ Nang mahtang gaw, nye a sharin shaga ai lam, nye a lai len, maw mawn ai hku, kam sham ai lam, myit galu kaba ai, tsaw ra ai, shakut sharang ai, ¹¹ zingri zingrat hkrum ai hte nni nkri hkrum ai lam hta mung: Antioki, Ikoni, Lustra mare hkan e ngai hkrum mahkrum hta mung; zingri zingrat ai ngai gade wa hkrum ni ai hta mung, nang htep lahti hkan nang nit dai: shing rai hkrum ti mung, ngai hkrum ai yawng hta na dai Madu gaw ngai hpe shaw la ni ai. ¹² Gaja wa, Hkristu Yesu hta tara hkungga ai lam hkan nang mayu ai ni nlang hte gaw, zingri zingrat ai hkrum lu na ma ra ai. ¹³ N hkru n hkra ai hte sawt ai masha ni chyawm gaw, hkalem sha nna, hkalem sha ai nhtang hkrum let, n hkru ai lam hta je je kaba wa na ma ra ai. ¹⁴ Nang chyawm gaw, kadai ni kaw na sharin achyin ya ai hkam la nit dai mung, Hkristu Yesu hta kam sham ai a marang e hkye krang la ai hkrum lu hkra, ¹⁵ nang hpe hpaji byeng-ya jaw lu ai chyoi pra ai Chyum laika ni hpe ma kaji prat kaw nna nang chye nga nit dai hpe mung, a dum nga let, nang sharin la nna myit tawng da ai lam ni hta, a grin nga u. ¹⁶ Karai Kasang a masha wa gaw hkum tsup rai wa nna, mai kaja ai magam bungli shagu a matu mara, arai chyip makup lang lu u ga, ¹⁷ Karai Kasang e shung ya ai Chyum laika shagu gaw, sharin shaga ya ai, daru sharin chye ai, mye shading lu ai hte, ding hpring ai lam hta sharin achyin ya na matu, akyu rawng nga ai. 

 

2 Timohti 4

¹ Karai Kasang a man e mung, hkrung nga ai ni hte si ai ni hpe tara dara magang ra ai Hkristu Yesu a man e mung, shi a dan pru na lam hte shi a mungdan a man e mung, ngai nang hpe shadut dat de ai gaw: ² dai mungga hpe hkaw dan nga u; du hkra ladaw ang ai rai ti mung, n ang ai rai ti mung, a shaja nga u; myit galu kaba ai hte, sharin shaga ai hku yawng hkan let, daru jet nga u, yubak madun nga u, shadut jahkat nga u. ³ Kaning rai nme law, htawm hpang na prat e masha ni gaw, masan maseng ai sharin shaga ai lam hpe n madat hkam la lu ai hte, shanhte a ana kaya kaprep nna, tinang a myit kayut ai hku hte maren, tinang a matu mara sara shalaw la nhtawm, ⁴ dai teng man ai ga hpe na layawng kau let, maumawi ga hpang de yit mat wa na ma ra ai. ⁵ Nang chyawm gaw, lam shagu hta htauli htaula nga u; nni nkri hkam sharang nga u; kabu gara shi ga hkaw dan ai sara a amu gun hpai nga u; na a sara aya a amu hpe hkum tsup hkra shatup u. ⁶ Kaning rai nme law, ya e pyi hkungga zawn nawg kau ai ngai hkrum nna, ngai pru lai mat wa na aten du magang ra ai. ⁷ Ngai gaw kaja ai gasat gala gasat ngut se ai: gat shingjawng ai lam htum hkra gat shadu se ai; dai makam masham hpe ngai a manoi nga ni ai: ⁸ ya kaw nna, ding hpring ai tara agyi ngu ai, dai Madu gaw, dai nhtoi hta e ngai hpe ap ya na, ding hpring ai hte seng ai ja janmau gaw, nye a matu mazing da nu ai: ngai hpe sha n rai, shi a dan pru ai lam hpe sharawng awng ai ni nlang hte hpe mung, ap ya na ra ai. ⁹ Ngai hpang de alawan du na tin tin rai u: ¹⁰ kaning rai nme law, Dema gaw ndai mungkan ga hpe tsaw ra ai a majaw, ngai hpe kau da nna, Htesaloni mare de sa mat wa sai; Kareka gaw Galati mung de, Titu gaw Dalamati mung de, sa mat wa ma sai. ¹¹ Luka chyu sha ngai hte rau a nga nga ai. Marku hpe nang hte rau woi sa rit; nye a amu gun hpai na matu shi htuk nga ai: ¹² Tuhkiku hpe chyawm gaw, Ehpesu mare de ngai shangun dat se ai. ¹³ Nang sa wa yang, Troa mare na Karku kaw ngai tawn da ai palawng galu mung, laika ni mung, grau nna shanhpyi laika ni hpe, la sa wa rit. ¹⁴ Janghkam wa Alesandru gaw ngai hpe n kaja ai law law wa galaw ni ai; - shi a arawn alai hte maren dai Madu gaw shi hpe tai htang na ra ai; - ¹⁵ nang mung shi hpe koi kau u: kaning rai nme law, anhte a ga hpe shi grai wa ndang kau yu ma ni ai. ¹⁶ Ngai hpe shawng na mara shawk yu ai lam hta, ngai hpang maga de kadai mung n lawm ai sha, yawng hte gaw ngai hpe jahka kau da ma ai: dai gaw shanhte a ntsa e mara n tai u ga. ¹⁷ Rai ti mung, nye a jaw e dai hkaw dan ai ga hpe dan dan hkaw shahproi lu nna, maigan amyu ni yawng na la lu hkra, dai Madu gaw ngai hpang maga de rau tsap nga nna, ngai hpe n-gun shaja ya ai hte, hkanghkyi a n-gup hta na mawai la ai ngai hkrum ni ai. ¹⁸ Dai madu gaw n hkru n hkra ai lam yawng hta na ngai hpe mawai la nna, shi a sumsing lamu mungdan hkap hkra, hkye hkrang la na ra ai: shi gaw htani htana prat dingsa hpung shingkang a nga nga u ga law Amen. ¹⁹ Priska yan Akula hte Onesihpuru a nta masha ni hpe shakram ya mi. ²⁰ Erastu gaw Korinhtu mare e hti nga ta sai; Trohpimu gaw machyi nna, Melitu mare e ngai tawn da se ai. ²¹ Nshung garai n shang yang du lu hkra, tin tin rai u. Ubulu, Puden, Linu, Klawdia hte hpu nau ni yawng hte gaw, nang hpe shakram dat ma ai. ²² Dai Madu gaw na a Wenyi hte rau a nga nga u ga. Chyeju gaw nanhte hte rau a nga nga u ga law.