TIMOHTI KAW SHAGUN DAT AI LAIKA LANGAI

1 Timohti 1

¹ Anhte a Hkye hkrang la ai Madu Karai Kasang hte, anhte a myit mada shara rai nga ai Hkristu Yesu a htet da ai hte maren, Hkristu Yesu a kasa rai nga ai, ngai Pawlu gaw, dai makam masham hta nye a kasha majing rai nga ai Timohti hpe ga shana dat nngai. ² Kawa Karai Kasang hte anhte a Madu Hkristu Yesu kaw na chyeju, matsan dum ai hte ngwi pyaw ai gaw, a nga nga u ga law. ³ Sharin shaga ai lam kaga n sharin la lu mu ga mung, makam masham hta jung nga ai Karai Kasang a shadaw shalan ai lam n shabyin ai sha, ⁴ ga law ga la shapraw ai maumawi ga hte n htum hkraw ai ahtik labau gawn ai hku hpe n hkan shachyut mu ga she, nang gaw masha nkau mi hpe daru jet kau na matu, ngai Makedoni mung de sa wa ai shaloi e Ehpesu mare e naw a nga nga na, nang hpe shadut jahkat sa de ai hte maren, naw nga nga u. ⁵ Dai daru jet kau ai ga a chyahtum chyawm gaw, san seng ai kraw lawang hte mai kaja nga ai myit nsam a tsaw ra ai hte, sawt ai n lawm ai makam masham nan, rai nga ai. ⁶ Dai lam hta na nkau mi gaw yit mat wa nna, kaman lila ga hpang de yawng mat wa ma ai; ⁷ shanhte gaw tara sara tai mayu ma ti mung, tinang nan hpa tsun nga ai hte, hpa lam hkap yau nga ai gaw, n chye na nga ma ai. ⁸ Marai langai ngai jep ai tara hpe sun ang ai hku sung nga a yang gaw, jep ai tara gaw mai kaja nga ai, anhte chye nga ga ai: ⁹ rai ti mung, ding hpring ai wa a matu mara jep ai tara tawn da nga ai n re ai sha, n tara ai ni, gumlau gumle re ai ni, tara n hkungga ai ni, yubak galaw ai ni, n chyoi n pra ai ni, ga n seng ai ni, kanu kawa hpe bye kau ai ni, masha sat ai ni; ¹⁰ hpye ai amu galaw ai ni, la shada tam ai ni, masha hpe lagu ai ni, masu magaw ga tsun ai ni, masu dagam ai ni hte san seng ai sharin shaga ai ga hte nhtan shai ai lam kaga naw nga a yang gaw, de a matu mara jep ai tara tawn da nga ai: ¹¹ dai gaw ngai hkam la ai a rawng ai Karai Kasang a hpung shingkang madun ai kabu gara shi ga hte maren rai nga ai. ¹² Ngai hpe kangka re ai wa nawn nna, dai aya hta ngai hpe dang da ai majaw, ngai hpe n-gun shaja ya ai, anhte a Madu Hkristu Yesu hpe nan, ngai shakawn kungdawn nngai. ¹³ Ngai chyawm gaw, shawng e shatan nhkan ai, zingri zingrat ai hte sheng mareng re ai wa rai nga nngai rai ti mung, n chye n chyang ai hte kam sham ai myit n rawng ai sha dai hpe galaw nngai majaw, matsan dum la ai ngai hkrum nngai: ¹⁴ Hkristu Yesu hte seng ai makam masham hte tsaw ra ai hte hpawn, anhte a Madu a chyeju gaw ladat hta lai hkra law htam wa sai. ¹⁵ Yubak kap ai ni hpe hkye hkrang la na matu mara, Hkristu Yesu gaw mungkan ga de du ra ai, nga ai ga gaw, kangka re ai hte gaja wa hkam la ging ai ga rai nga ai. ¹⁶ Dai yubak kap ai ni hta ngai mahtang yubak kaba htum ai wa rai nga nngai rai ti mung, Hkristu Yesu gaw shi a matsan dum ai yawng mayawng, ngai yubak kaba htum ai wa hpe madun dan lu nna, htani htana asak lu la hkra, hpang de shi hpe kam sham na ma ra ai ni a matu mara kumla tai na majaw, ngai hkum nan chyeju lu la ni ai. ¹⁷ Ya, htani htana re ai, n hten n mat chye ai, myi e n mu lu ai Hkawhkam ngu ai, Karai Kasang langai sha kaw, arawng sadang hte hpung shingkang gaw, htani htana prat dingsa e, a nga nga u ga law. Amen. ¹⁸ Ngai sha, Timohti e, nang hta ang nna lakap nga ai myihtoi ga hta hpa nna, makam masham hte mai kaja ai myit nsam rawng nga let, dai kaja ai gasat gala hpe nang gasat nga lu u ga, tawn da sai myihtoi ga hte maren, ndai daru jet kau na ahkang ngai nang hpe ap ya de ai. ¹⁹ Dai lam hte hpe nkau mi shinggan kau nna, makam masham li hta na bunghkup mat ma sai. ²⁰ Shanhte hta Humeni yan Alesandru lawm ma ai rai nna, shan gaw shatan nhkan ga koi gam nga na sharin la mu ga, ngai shan hpe Satan a lata de ap kau ma se ai. 

1 Timohti 2

¹ Dai re ai majaw tara hkungga nna sun ang ai lam amyu myu hpe hkan galaw lu let, anhte ngwi pyaw ai hte sumnung shingdi ai hta hkrung nga lu hkra, shinggyim masha mahkra a matu mara mung, ² hkawhkam ni hte ahkang aya lu ai ni mahkra a matu mara mung, hpyi nem ai, akyu hpyi ai, hpyi htinglu ya ai hte shakawn kungdawn nga u ga, shaje mahkra a shawng e, ngai shadut jahkat dat nngai. ³ Dai gaw anhte a hkye hkrang la ai Madu Karai Kasang a man e mai kaja ai hte sharawng awng ai lam rai nga ai: ⁴ masha yawng mayawng hkye hkrang la ai hkrum lu nna, teng man ai lam a chye chyang ai kaw du lu mu ga, shi ra nga ai. ⁵ Kaning rai nme law, Karai Kasang langai sha rai nga nna, Karai Kasang hte shinggyim masha lapran e, shinggyim masha rai nga ai Hkristu Yesu ngu ai htinglu ya ai wa langai sha mung rai nga ai. ⁶ Shi gaw yawng mayawng a matu mara shi hkum nan hpe gawng malai hkungga di nna ap kau nu ai: ahkying aten du jang she de a sakse pru na ra ai. ⁷ Dai sakse hkam ai hta, ngai gaw tara hkaw ai wa hte kasa rai nga nna, maigan amyu ni a kangka hte teng man ai sharin shaga ai wa ngai rai nga nngai: ning nga ngai tsun nngai gaw, teng man ai ga ngai tsun nga nngai, ngai n masu nngai law. ⁸ Dai re ai majaw, masin pawt ai n lawm nna, ndang kalang n re ai hte, lasha ni gaw chyoi pra ai lata sharawt let, shara sahgu hkan e akyu hpyi nga na hpe, ngai ra nga nngai. ⁹ Numsha ni mung dai hte maren, kara hkri ai, aja arai, pale hte manu dan ai hpun palawng hte n mawn ai sha, sari nang ai hpun palawng hte tem si rai nna shatep nga let, ¹⁰ Karai Kasang hpe naw ku ai numsha ni a mai ang ai hte maren, kaja ai magam bungli hte, tinang hkum hpe mawn sumli nga mu ga. ¹¹ Numsha gaw hkang ai hku ting hkan nna, asim sha sharin la nga u ga. ¹² Numsha gaw sharin shaga nga na hte, lasha hpe up nga na gaw, ngai n hkraw nngai; shi gaw asim sha nga nga u ga. ¹³ Kaning rai nme law, Adam hpe shawng e hpan da nna, dai hpang e she Ewa hpe hpan da nu ai. ¹⁴ Adam chyawm gaw hkalem hkalau ai n hkrum ai sha, dai numsha mahtang hkalem hkalau ai hkrum nna, tara tawt lai ai hta hkrat wa sai. ¹⁵ Rai ti mung, shatep ai hte makam masham, tsaw ra nna chyoi pra ai hku hkan nang nga yang gaw, dai kasha shangai na lam a marang e shi hkye hkrang la ai hkrum na ra ai. 

 

1 Timohti 3

¹ Hpung up aya sharawng ai wa gaw amu kaja tam nga ai, nga ai ga gaw, kangka re ai ga rai nga ai. ² Dai re ai majaw Hpung up wa gaw, mara n kap ai wa, num langai sha lu ai wa, sadi sahka ai, myit gring ai, si si re ai, manam daw ai lam sharawng ai hte sharin shaga maka rawng ai wa, rai lu na rai; ³ chyaru len ai wa hte anu ajin re ai wa mung n re ai sha, sumnung ai, ga law ga la ai myit n rawng ai, ja gumhpraw n tsaw ai hte, ⁴ tinang nta hpe atsawm sha up hkang nga nna, tinang a kashu kasha ni hpe mai ang ai hku hte chye hkang ai wa mung, rai na rai. ⁵ Marai langai ngai tinang a nta hpe n chye hkang a yang gaw, Karai Kasang a Hpung hpe kaning rai lanu lahku lu na rai ta? ⁶ Gumrawng ai myit rawng nna, nat a jeyang ai hku hta n hkrat wa u ga, sape nnan wa hpe mung, hkum rai. ⁷ Shatan nhkan n hkrum nna, nat a dawnggawng hta n hkrup u ga, shinggan masha ni kaw na sakse kaja hkam ang ai wa mung, shi rai nga u ga. ⁸ Dai hte maren hpung tau ni mung, shatep shingdi re ai ni rai lu na rai: ga mashe n rawng ai, tsabyi n lu lai ai hte, n seng ai amyat n marin ai sha, ⁹ dai makam masham a sung htum ai lam hpe, san seng ai myit nsam hta machyu nga ai ni, rai lu na rai. ¹⁰ Shanhte gaw shawng e chyam dinglik yu ai hkam nna, dai hpang e mara n rawng ma yang gaw, hpung tau amu galaw nga mu ga. ¹¹ Dai hte maren numsha ni mung, shatep shingdi rai nna, nlem ai ni n re ai sha, sadi shaka hte lam shagu hta kangka re ai ni, rai lu na rai. ¹² Hpung tau wa mung num langai sha lu nna, tinang a kashu kasha ni hte tinang a kun dinghku hpe atsawm sha hkang lu ai wa rai na ra ai. ¹³ Kaning rai nme law, hpung tau amu atsawm sha gun hpai ai ni gaw, tinang a matu arawng kaja hte, Hkristu Yesu a makam masham lam hta, nden ja ai myit kaba lu la ma ai. ¹⁴ Nang kaw gade n na yang du na, ngai myit mada nga nngai; rai ti mung ngai na na wa naw hkring nga yang, ¹⁵ Karai Kasang a nta e kaning rai arawn alai hkan mai na nang chye lu n ga, ndai lam ngai nang hpe ka dat nngai; dai nta chyawm gaw, hkrung nga ai Karai Kasang a Hpung rai nga nna, teng man ai a sumsai dawnu hte npawt hkridun mung rai nga ai. ¹⁶ Karai Kasang hpe naw ku hkungga ai lam a sung htum ai gaw, kaba la ai lam rai nga ai, nga nna ndang shara n nga ai: Shi gaw hkum shan hta dan pru wa sai, Wenyi hta e ding hpring ai hkrum nu ai; Lamu kasa ni gaw shi hpe mu lu ma nu ai; Maigan ni kaw shi a lam hkaw dan ma nu ai; Mungkan ga gaw shi hpe kam sham ma sai, Hpung shingkang hta shalun ai shi hkrum nu ai. 

 

 

1 Timohti 4

¹ Rai ti mung, htawm hpang prat e nkau mi gaw makam masham lam hta na htak wa nhtawm, masu magaw ga tsun ai hpyi hpun ai ni a marang e ² hkalem hkalau chye ai wenyi ni hte nat a sharin shaga ai lam hpe madat mara na rai nna, shanhte a myit nsam hpri kahtet hte zawn gaba nga ai, nga nna, ³ Wenyi e dan dan leng leng tsun dan nga ai: shanhte gaw hkungran ailam hpe mung, kam sham nga nna teng man ai ga hpe chye nga ai ni, shakawn kungdawn ga hte hkam la mai ai, Karai Kasang hpan tawn da ai ashan hpe mung, jep kau na ma ra ai. ⁴ Karai Kasang hpan tawn da ai ashu ashan nga manga chyawm gaw, mai kaja nga ai rai nna, ⁵ Karai Kasang a mungga hte akyu hpyi ai a gawp e shachyoi shapra nga ai majaw, dai hpe shakawn kungdawn ga hte hkam la a yang gaw, hpa rai ti mung gang kau mai ai n rai. ⁶ Ndai lam hte gaw nang hpu nau ni hpe shadum shahprang nga n yang gaw, nang hkan nang nga ai makam masham a mungga hte mai kaja ai sharin shaga ai lam hta pan kaba wa ai majaw, Hkristu Yesu a amu gun hpai wa kaja, nang rai na ndai. ⁷ N san n seng ai hte gumgai maumawi ga hpe yeng kau u; tara hkungga ai hku hta na hkum shan hpe shakung jahpan nga u: ⁸ kaning rai nme law, hkum hkrang hpe jahpan ai lam gaw akyu loi sha mi nga ai rai ti mung, tara hkungga ai myit gaw lam shagu hta akyu nga ai rai nna, ndai aprat hte rai ti mung, htawm hpang na prat hte rai ti mung, seng ai ga ndat rawng nga ai. ⁹ Dai mungga gaw teng man ai hte gaja wa hkam la ging ai ga rai nga ai; ¹⁰ dai rai nna, shinggyim masha mahkra hte kam sham ai ni hpe grau nna hkye hkrang la ai Madu rai nga ai, a hkrung nga ai Karai Kasang gaw anhte a myit mada shara rai nga ai majaw, anhte amu bungli galaw nna a shaja nga ga ai. ¹¹ Ndai lam hte hpe hkang da nna sharin shaga nga u. ¹² Na a brang ram prat e, nang hpe kadai mung n shatan u ga: tsun ai ga hte mung, arawn alai hte mung, tsaw ra ai hte mung, kam sham nna chyoi pra ai hte mung, kam sham ai ni a matu mara, kasi kamang tai nga u. ¹³ Ngai sa du ai du hkra laika hti yu nna shadum shahprang ai hte sharin shaga ai hta, a shaja nga u. ¹⁴ Hpung salang ni a lata mara da let, myihtoi ga hte nang hpe jaw da nna, nang hta rawng ai maka hpe hkum hprai kau nga u. ¹⁵ Na a kung hpan wa ai nyan masha mahkra a man e dan leng wa u ga, ndai lam hte hpe hkan shachyut nna, dai hta sha a manoi nga u. ¹⁶ Na a hkum hpe mung, na a sharin shaga ai lam hpe mung, a sadi nga u; ndai lam hte hta e a grin nga u: shing rai galaw n yang gaw, na a hkum hpe mung, nang hpe madat mara ai ni hpe mung, nang hkye hkrang la lu na ra ai. 

 

1 Timohti 5

¹ Hpung salang wa hpe hkum da kau u, kawa hpe zawn shi hpe shadum shahprang u; shabrang ni hpe kahpu kanau zawn, ² hpawmi ni hpe kanu zawn, mahkawn ni hpe kajan zawn, san seng ai myit ting hte shadum shahprang nga u. ³ Gaida jan majing rai nga ai gaida jan ni hpe, hkungga lara nga mu. ⁴ Gaida jan langai ngai kasha, shing n rai kashu lu a yang gaw, shanthe gaw tinang a nta na ni hpe tara hkungga ai myit shawng e madun nna, tinang a kanu kawa ni hpe chyeju nhtang jaw na, sharin nga mu ga: dai gaw Karai Kasang a man e sharawng awng ai lam rai nga ai. ⁵ Gaida jan majing ngu ai lik lik rai nga ai gaida jan gaw, Karai Kasang hpe myit mada nga nna, shani shana hpyi nem ai hte akyu hpyi ai hta, nan nan a rai nga ai. ⁶ Tangpyaw sha tam nga ai gaida jan chyawm gaw, naw hkrung nga ninglen chyasi rai nga ai. ⁷ Shanhte gaw mara n kap mu ga, ndai lam hte mung hkang da nga u. ⁸ Marai langai ngai tinang hte seng ai ni hpe n bau ai hta n-ga, tinang a nta na ni hpe n bau ai wa gaw, dai makam masham hpe nyet kau nna, n kam n sham ga ai wa hta grau nna n hkru nga ai. ⁹ Kru shi ning garai n du ai gaida jan gaw, gaida jahpan laika hta garai n lawm u ga; la langai sha lu yu ai jan; ¹⁰ kaja ai bungli galaw yu ai rai nna gumhkawng nga ai jan; kashu kasha hpe lanu lahku yu ai; manam daw yu ai, chyoi pra ai ni a lagaw hpe kashin yu ai, nni nkri hkrum ai ni hpe galaw bau ai hte, kaja ai amu bungli shagu hta azin ayang hkan galaw yu ai rai a yang gaw, gaida jahpan laika hta shang u ga. ¹¹ Dai hta aprat kaji ai gaida jan ni hpe shinggan kau mu: shanhte gaw Hkristu a lam n hkam sharang lu ai shaloi e, hkungran mayu ma ai rai nna, ¹² shawng na ga shaka hpe kau da ma ai majaw, jeyang ai hkrum nga ma sai. ¹³ Dai hta kaga, shanhte gaw nta mi hte nta mi len hkawm let lagawn chye ma ai; lagawn ai hta n-ga, nlem nga nna, n mai tsun ai ga tsun nga ma ai hte, tinang hte n seng ai amu hta hkan bawk lawm ma ai. ¹⁴ Dai rai nna, aprat garai n kaba ai gaida jan ni gaw hkunggran nna, kashu kasha shangai ai hte, kun dinghku hpe yu lajang let, nhtan shai ai ni a matu shatan nhkan ai lam n shapraw u ga, ngai ra nga nngai: ¹⁵ kaning rai nme law, ya e pyi nkau mi gaw lam dam ma ai rai nna, Satan kaw hkan nang ma ai. ¹⁶ Kam sham ai numsha langai ngai kaw gaida jan nga a yang gaw, shi nan shanhte hpe galaw daw nna, dai Hpung hpe hkum shatsang u ga: shing rai dai Hpung gaw gaida jan majing ni hpe galaw daw lu na ma ra ai. ¹⁷ Atsawm sha up nga ai Hpung salang ni hpe hkungga lara shagup na ging nga ai hta, dai mungga hte sharin shaga ai lam hta amu bungli gun hpai ai salang ni hpe, grau nna hkungga lara ging nga ai, dum nga mu. ¹⁸ Kaning rai nme law, Mam kabye ai nga a n-gup hpe ka dagraw ya lu na n rai; bai, Amu bungli galaw ai wa gaw, shi a shabrai hkam ging nga ai, nga nna Chyum Laika tsun nga ai. ¹⁹ Sakse lahkawng masum n nga a yang gaw, Hpung salang wa hpe mara shagun ai lam hta hkum madat lawm et. ²⁰ Shaje ni gaw hkrit kang nga mu ga, mara lu ai ni hpe masha yawng a man e daru sharin kau mu. ²¹ Ndai lam hte hpe myit man n tau ai hte hpa lachyen lahka n re ai sha nang galaw nga n ga, Karai Kasang hte Hkristu Yesu a man e mung, lata la ai lamu kasa ni a man e mung, ngai nang hpe ga daka dat de ai. ²² Kadai wa a ntsa e mung lata alawan hkum mara ya u; masha kaga a yubak hta hkum bawk lawm nga u: tinang dai san seng nga u. ²³ Na a kan akyu byin lu na hte, jahkring jahkra sha machyi wa wa rai ndai majaw, ya kaw nna ntsin n lu ai sha, tsabyi jahku loi loi a lu nga u. ²⁴ Masha nkau mi a yubak gaw dan lang nga ai rai nna, jeyang ai de shawng e sa wa chye ai; nkau mi a chyawm gaw shanhte a hpang e hkan nang nga ai. ²⁵ Dai hte maren dan leng nga ai mai kaja ai amu bungli mung nga nga ai rai nna, shing n re ai mahtang hpe mung, makoi magap da lu ai n rai. 

 

1 Timohti 6

¹ Karai Kasang a mying nsang hte dai sharin shaga ai lam gaw shatan nhkan n hkrum u ga, kandang npu e nga ai mayam ni kadai rai ti mung, tinang a madu ni hpe lam shagu hta hkungga lara di mai ai myit nga nga mu ga. ² Kam sham ai madu lu ai mayam ni gaw, maren hpu nau rai nga ai, nga nna, shanhte hpe n gawn n sawn hkum di mu; dai ngamu ngamai hkam la ai ni gaw, kam sham ai ni hte tsaw ra ging ai ni rai nga ma ai majaw, grau nna shanhte a bungli gun hpai nga mu ga.Ndai lam hte gaw sharin shaga nga nna, shadut jahkat nga u. ³ Marai langai ngai nhtan shai ai sharin shaga ai lam sharin ya nna, anhte a Madu Yesu Hkristu a hkam kaja ai mungga hte tara hkungga ai lam hte bung ai sharin shaga ai lam hpe n awlaw lawm a yang gaw, ⁴ shi gumrawng gumtawng nga ai hte, hpa mung n chye ai sha, ga sumtu hte sha seng ai ga sawk yu ai hte ndang kalang hkat ai lam sha tam nga ai; dai hta na manawn masham ai, zumbru zumbra ai, shatan nhkan ai, n kaja ai hku aleng ai hte, ⁵ n san n seng ai myit rawng nna, teng man ai ga yet mat ai hte, tara hkungga ai lam gaw hpaga amyat sha ai lam sha rai nga ai, nga nna myit nga ai masha a ga law ga la ai lam pru wa ai. ⁶ Gaja wa, tara hkungga ai gaw, myit dik ai hte nawng, amyat kaba rai nga ai: ⁷ kaning rai nme law, ndai mungkan ga de hpa n lawm ai sha, anhte shang wa ga ai rai nna, dai hta na pru wa yang mung, hpa n la wa lu ga ai: ⁸ dai rai nna, lu sha hte hpun palawng lu nga ga yang gaw, anhte dai hte myit dik nga ga. ⁹ Kaning rai nme law, sut su mayu ai ni gaw, hten byak nna shaza kau ai hta, masha ni hpe marit si shangun kau ai gung lau ai hte dawnggawng hta, angawk angak re ai hte sheng mareng re ai myit marin ai lam amyu myu hta, lup mat ma ai. ¹⁰ Gumhpraw marin ai myit chyawm gaw, n hkru n hkra ai amyu myu a ru npawt rai nga ai; nkau mi gaw dai hpe hkan shachyut ma ai majaw, dai makam masham lam hpe yit kau nna, yawn hkyen ai amyu myu hte tinang hkum hpe galun dinggrang kau mu ai. ¹¹ Nang chyawm gaw, Karai Kasang a masha wa e, ndai lam hte hpe koi gam nga u: ding hpring ai, tara hkungga ai, kam sham ai, tsaw ra ai, shakut sharang ai hte sumnung ai myit hpe hkan shachyut ngu u. ¹² Dai makam masham hte seng ai mai kaja ai gasat gala ai hpe a gasat nga u: htani htana na asak hpe magra noi nga u: dai hta e nang hpe shaga la nna, sakse law law ni a man e mai kaja ai sakse nang hkam ya nit dai. ¹³ Anhte a Madu Yesu Hkristu a paw pru ai du hkra, agang chyalang n re ai hte mara n kap ai sha, dai hkang da ai ga hpe nang hkan nang nga u ga, ¹⁴ arai yawng mayawng hpe asak jahkrung ya ai Karai Kasang a man e mung Puntu Pilat a man e mai kaja ai sakse hkam ya ai Hkristu Yesu a man e mung, ngai nang hpe hkang da de ai: ¹⁵ ahkying aten ang wa yang, dai paw pru ai lam hpe, shi madun dan na ra ai. Shi gaw langai sha rai nga ai a rawng ai Daru Magam re ai du, hkawhkam ni a Hkawhkam, madu ni a Madu rai nga ai rai nna, ¹⁶ shi chyu sha htani htana asak a rawng nga ai hte, n dep lu ai nhtoi hta a nga nga ai; masha gade ai mung shi hpe n mu yu ai hte, n mu lu nga ai: shi kaw htani htana arawng sadang hte hpung shingkang a nga nga u ga law. Amen. ¹⁷ Ndai prat e sut gan lu ai ni gaw, gumrawng gumtawng n re ai hte, n grin ai sut gan hpe n shamyet nga ai sha, ngamu ngamai nga na matu, arai yawng mayawng anhte hpe n daw n hta jaw ai Karai Kasang hpe shamyet shanat nga na hte, ¹⁸ shanhte mai kaja ai galaw nga na, mai kaja ai bungli hta sut su let, karan kachyan jaw ai hte, jaw jahproi ai myit rawng nga nna, ¹⁹ asak majing ngu ai asak hpe magra noi lu mu ga, du magang ra ai aprat a matu mara mai kaja ai sut gan npawt tinang dai mahkawng da mu, ngu nna shanhte hpe a hkang nga mu. ²⁰ O, Timohti e, nang hpe ap ya de ai aya hpe, a mahkyu nga u: n san n seng ai baw law ai ga hpe mung, chye chyang ai lam re ai ngu nna, shamying gawm ai nhtan shai ai lam hpe mung, koi kau nga u: ²¹ nkau mi gaw dai lam hpe hkan nang nga nna, dai makam masham lam hpe yit kau ma nu ai. Chyeju gaw nanhte hte rau a nga nga u ga law.