HTESALONI NI KAW SHAGUN DAT AI LAIKA LAHKAWNG

2 Htesaloni 1

¹ Pawlu, Silwanu hte Timohti hte gaw, anhte a Wa Karai Kasang hte Madu Yesu Hkristu hta rai nga ai Htesaloni masha ni a Hpung hpe, ga shana dat ga ai. ² Kawa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e a nga nga ma lit ga law. ³ Hpu nau ni e, nanhte a makam masham gaw kaba la wa nna, nanhte langai hte langai a tsaw ra ai myit gaw shada da e law htam jat wa ai majaw, ging dan nga ai hte maren, nanhte mahkra a matu mara Karai Kasang hpe tut nawng e shakawn kungdawn nga na, anhte ra nga ga ai. ⁴ Dai rai nna nanhte hkam ai zingri zingrat hte nni nkri mahkra hta, nanthe a galu kaba ai myit hte makam masham ai a majaw, Karai Kasang a Hpung ni a man e anhte hkum nan lala, nanhte a jaw e gumrawng kabu nga ga ai. ⁵ Karai Kasang mungdan a matu mara nanhte nni nkri hkrum myit dai majaw, dai mungdan hta nanthe ging dan nga myit ga, dai lam gaw Karai Kasang a ding man ai jeyang ai lam a kumla tai nga ai. ⁶ Kaning rai nme law, dai Madu Yesu gaw sumsing lamu de nna, shi a n-gun rawng ai lamu kasa ni hte rau wan shinglet hte paw pru nna, ⁷ Karai Kasang hpe n chye n chyang ai ni hte, anhte a Madu Yesu Hkristu a kabu gara shi ga n madat mara ni ai hpe matai dawp na shaloi e, ⁸ nanhte hta nni nkri jahkrum ai ni hpe, nni nkri bai nhtang jaw na hte, nni nkri hkrum nga ai ni nanhte gaw, anhte hte rau ban sa ai nhtang jaw na ra ai, Karai Kasang a ding man ai hku rai nga lu ai. ⁹ Yesu gaw shi a chyoi pra ni hta dan hkung nga ai hte, nanhte gaw anhte a sakse ga hpe kam sham nga myit dai majaw, dai shani hta e kam sham nga ai ni mahkra hta shi mau mahka hkrum ai shaloi e, ¹⁰ n madat ai ni gaw dai Madu a myi man hte shi a atsam a hpung shingkang hte, hka wa na htani htana hten nan ai ari ahpri hkrum na ma ra ai. ¹¹ Dai re ai majaw, anhte a Karai Kasang hte Madu Yesu HKristu a chyeju marang e, anhte a Madu Yesu a mying nsang gaw nanhte hta e shagrau ai hkrum lu na hte, nanhte mung shi hta e shagrau ai hkrum lu hkra, ¹² anhte a Karai Kasang a shaga la ai chyeju hpe nanhte hkam ging nga na hte, mai kaja ai marai myit yawng hte kam sham ai hte seng ai magam bungli shagu hpe, tsam mari re ai hte shatsup lu myit ga, anhte nanhte a matu mara tut nawng e akyu a hpyi nga ga ai. 

2 Htesaloni 2

¹ Hpu nau ni e, dai Madu a shani gaw ni magang wa ra ai zawn, nanhte n nawn nna wenyi hte mung, ga sumtu hte mung, anhte a shagun dat ai laika zawn san ai hte mung, nanhte a kraw lawang alawang n shamu n shamawt ai hte, myit gadau gadap n rai myit ga, ² anhte a Madu Yesu HKristu a bai ya wa ai hte anhte shi hte rau zup hpawng nga na lam, anhte nanhte hpe shadum shahprang dat ga ai. ³ Kadai wa mung, nanhte hpe gara hku mung n hkalem kau myit ga. Kaning rai nme law, dai htak bra wa ai gaw shawng e n byin ai hte, n tara ai wa ngu ai hten byak wa ai a kasha garai n paw pru pru gaw, dai nhtoi du na n rai; ⁴ dai wa gaw Karai ngu mangu hte mung, naw ku ai lam yawng mayawng hte mung, nhtan shai nga ai hte tinang dai shagrau la nna, Karai Kasang a naw ku tingnu hta dung nga let, shi hkum nan hpe Karai Kasang shatai da wu ai. ⁵ Nanhte hte rau naw nga ai shaloi e, ndai lam hte ngai nanhte hpe tsun dan ma sa de ai hpe, nanhte n dum nga myit ni? ⁶ Dai wa gaw tinang a ahkying ladaw e dan pru wa u ga, ya e ban hkum nga ai hpe nanhte chye nga myit dai. ⁷ Kaning rai nme law nga yang, n tara ai a sung htum ai lam ya e pyi shachyen nga ai; rai ti mung, ban hkum ai wa naw nga nga nna, yeng kau ai hkrum ai du hkra, naw ban hkum nga na ra ai. ⁸ Yeng kau hkrum ai shaloi e dai n tara ai wa gaw dan pru wa na ra ai: Madu Yesu chyawm gaw shi a n-gup na wenyi hte shi hpe sat kau nna, shi a yu wa ai a dan hkung kama ai hte shaza kau na ru ai. ⁹ Dai n tara ai wa a du sa ai gaw, Satan a shachyen ai n-gun atsam, lamik kumla hte, masu ai mauhpa amyu myu hte, ¹⁰ hten byak ai hkrum na ni a matu mara n teng n man ai hkalem hkalau ai amyu shagu hte, rai na ra ai: shanhte hkye hkrang la ai hkrum na matu, dai teng man ai lam a tsaw ra ai hpe n hkam la ai a jaw e, shing rai hkrum ma ai. ¹¹ Dai re ai majaw teng man ai lam hpe n kam n sham ai sha, n ding n man ai hta sharawng awng ai ni nlang hte gaw, daw dan ai hkrum mu ga, ¹² masu matsa ga hpe kam sham lu hkra, Karai Kasang gaw shanhte a matu mara tsam mari re ai lam shadam ai hpe shangun dat wu ai. ¹³ Rai ti mung, dai Madu e tsaw ra nga ai hpu nau ni e, nanhte a lam Karai Kasang hpe tut nawng e shakawn kungdawn na anhte ra nga ga ai: kaning rai nme law, Wenyi a shachyoi shapra na hte, teng man ai ga hpe kam sham na hta, hkye hkrang la ai hkrum na matu, Karai Kasang gaw shawng npawt kaw nna nanhte hpe lata la ma nit dai. ¹⁴ Anhte a Madu Yesu Hkristu a hpung shingkang hpe lu la lu myit ga, de a matu mung, anhte a kabu gara shi ga hte, shi nanhte hpe shaga la ma nit dai. ¹⁵ Dai re ai majaw, hpu nau ni e, anhte a sumtu ga hte rai ti mung, shagun dat ai laika hte rai ti mung, nanhte hkam la lu myit dai matsun maroi ga hta lahpran tsap nga nna, ting ting di nga mu. ¹⁶ Ya, anhte hpe tsaw ra nga nna, chyeju a jaw e anhte hpe htani htana shangwi shapyaw ai hte, mai kaja ai myit mada shara jaw ai, anhte a Wa Karai Kasang hte anhte a Madu Yesu Hkristu nan, ¹⁷ nanhte a kraw lawang hpe shangwi shapyaw nga nna, mai kaja ai amu bungli hte ga sumtu amyu myu hta, nanhte hpe shangang jahkang nga myit ga law. 

 

2 Htesaloni 3

¹ Bai, lam mi gaw, hpu nau ni e, dai Madu a mungga gaw nanhte hta chyam wa nna hpung shingkang lawm nga ai hte maren, shara shagu hkan e chyam wa nna hpung shingkang lawm lu na hte, ² myit n leng ai hte n hkru n hkra ai masha ni a lata na anhte mawai la ai hkrum lu u ga, anhte a matu mara akyu hpyi ya mi: kaning rai nme law, masha shagu wa makam masham rawng nga ai n rai. ³ Dai Madu chyawm gaw kangka rai nga ai rai nna, shi nanhte hpe shangang jahkang ya nna, n hkru n hkra ai hta na, pau sin na ma rin dai. ⁴ Anhte htet da mada hte hpe nanhte galaw nga nna, naw a galaw nga na ma rin dai, ngu nna dai Madu hta e nanhte a lam anthe myit mu nga ga ai. ⁵ Dai hta kaga, Karai Kasang a tsaw ra ai hte Hkristu a shakut sharang ai hta, dai Madu nan, nanhte a myit masin hpe shalawn nga u ga. ⁶ Bai lam mi, hpu nau ni e, anhte kaw nna hkam la ai matsun maroi ga hte maren n hkan hkawm ai sha, kajam galam re ai hpu nau ni nlang hte kaw na daw hka wa myit ga, dai Madu Yesu Hkristu a mying nsang hte anhte nanhte hpe htet da ga ai. ⁷ Kaning rai nme law, anhte a len ningli kaning rai hkan sharau nga na, nanhte nan chye nga myit dai: anhte gaw nanhte a kaang e kajam galam myit madun ga ai n rai; ⁸ kadai wa a lusha mung anhte be be kaman n sha ai sha, nanhte hta langai mi hpe mung lit n shagun u ga, amu magan hte ru tsang ai hta anhte shani shana bungli galaw nga ga ai. ⁹ Shing rai galaw ai gaw, ahkang n lu ga ai majaw n re ai sha, nanhte hkan sharau lu na len ningli tai ma lit ga she, anhte hkum nan nanhte a matu mara ningli tai sa ga ai. ¹⁰ Kaning rai nme law, nanhte hte rau naw nga nga yang, Amu bungli n galaw mayu ai wa gaw shat mung n sha u ga, ngu nna anhte nanhte hpe htet da ga ai. ¹¹ Nanhte hta lawm nga ai nkau mi gaw, kajam galam nga ai rai nna, hpa amu n galaw ai sha, tinang hte n seng ai hta hkan sharau ai ni rai nga ma ai hpe, anhte na nga ga ai. ¹² Shing rai nga ai ni gaw amu bungli angwi sha galaw nna, tinang a shat sha nga mu ga, ngu nna Madu Yesu Hkristu hta e anhte htet da ai hte shadut jahkat ga ai. ¹³ Nanhte mahtang, hpu nau ni e, mai kaja ai amu galaw na, hkum hki hkum sang nga myit. ¹⁴ Ndai laika hta rawng ai anhte a ga hpe, marai langai ngai n madat mara nga a yang gaw, shing re ai wa hpe matsing nga mu; shi kaya dum u ga shi hte hkum kanawn nga myit. ¹⁵ Rai ti mung, hpyen wa zawn shi hpe hkum nawn mu; hpu nau wa hpe zawn shi hpe shadum shahprang nga mu. ¹⁶ Ya, ngwi pyaw ai a npawt, dai Madu nan, nanhte hpe tut nawng e lam shagu hta ngwi pyaw ai, a jaw nga u ga. Dai Madu gaw nanhte nlang hte rau a nga nga u ga law. ¹⁷ Ngai Pawlu nan nye a lata hte ka da ai shakram ai ga gaw, ngai ka shagun dat ai laika shagu hta, kumla rai nga li ai: ning rai ngai ka da nga nngai. ¹⁸ Anhte a Madu Yesu Hkristu a chyeju gaw, nanhte nlang hte rau a nga nga u ga law.