HTESALONI NI KAW SHAGUN DAT AI LAIKA LANGAI

1 Htesaloni 1

¹ Pawlu, Silwanu hte Timohti hte gaw, Kawa Karai Kasang hte Madu Yesu Hkristu hta rai nga ai, Htesaloni masha ni a Hpung hpe, ga shana dat ga ai. Chyeju hte ngwi pyaw ai gaw, nanhte hta e a nga nga ma lit ga law. ² Nanhte mahkra e matu mara anhte tut nawng e Karai Kasang hpe shakawn kungdawn nga nna, anhte a akyu hpyi ai ga hta, nanhte hpe a dum nga ga ai: ³ anhte a Kawa karai Kasang a man e, nanhte a makam masham a bungli mung, tsaw ra ai myit majaw magam shachyen ai mung, anhte a Madu Yesu Hkristu a myit mada ai lam a shakut sharang ai hpe mung, anhte n sim n sa a dum nga ga ai. ⁴ Karai Kasang e tsaw ra nga ai, hpu nau ni e, nanhte a shaga la ai lam hpe anhte chye nga ga ai: ⁵ kaning rai nme law, anhte a kabu gara shi ga gaw, mung sumtu hte sha du ai n rai, n-gun atsam hte, Chyoi pra ai Wenyi hte, maju jung ai grai wa hte, nanhte kaw e du rai wa sai; nanhte hte rau nga yang, nanhte a matu mara anhte kaning rai nga ga ai gaw, nanhte nan chye nga myit dai. ⁶ Nni nkri law law hkrum ti mung, Chyoi pra ai Wenyi a kabu gara ai hte dai mungga hpe hkap la let, nanhte gaw anhte a samnang ai ni mung, dai Madu a samnang ai ni mung, tai nga ma nit dai rai nna, ⁷ Makedoni mung hte Ahkaia mung na kam sham ai ni nlang a kasi kamang tai wa ma nit dai. ⁸ Kaning rai nme law, nanhte kaw na dai Madu a mungga gaw, Makedoni mung hte Ahkaia mung e kajai gumhkawng wa ai sha n-ga, Karai Kasang kaw ang wa ai, nanhte a makam masham gaw, shara shagu hkan e chyam wa sai rai nna, anhte gaw hpa mi tsun shara mung n nga ai. ⁹ Kaning rai nme law, nanhte hpang de anhte a shang wa ai lam kaning rai rai nga ai gaw, shanhte nan anhte a lam tsun kajai ma ai rai nna, nanhte gaw a hkrung nga nna teng man ai Karai Kasang hpe daw jau nga myit ga, gawngngu sumla ni hpe shinggan kau nhtawm, Karai Kasang hpang de kaning rai kayin wa myit dai hte, ¹⁰ sumsing lamu de na shi a Kasha hpe ala nga ai lam, tsun hkat nga ma ai: dai Kasha gaw si mat ai ni kaw na sharawt la nna, du na ra ai pawt sindawng ai hta na anhte hpe mawai la sai Yesu nan rai nga ai. 

1 Htesaloni 2

¹ Kaning rai nme law, hpu nau ni e, nanhte hpang de anhte a shang wa ai lam be be kaman sha n rai nga ai gaw, nanhte nan chye nga myit dai. ² Nanhte chye nga myit dai hte maren, Hpilipi mare hta shawng e nni nkri hte asawng asang hkrum ngut jang, zingri zingrat law law hkrum ti mung, anhte a Karai Kasang shatsam ai a jaw e, Karai Kasang a kabu gara shi ga hpe nanhte kaw tsun dan na, anhte gwi ga ai. ³ Kaning rai nme law, anhte a shadum shahprang ai gaw, lam shadam ai hte, n san n seng ai hte, hkalem hkalau ai hte n re ai sha, ⁴ dai kabu gara shi ga lang ging ai ni ngu ai, Karai Kasang a ahkang hkam ga ai hte maren, masha hpe sharawng awng ai zawn n rai, anhte a kraw lawang hpe manaw yu ai Karai Kasang hpe sharawng awng na zawn, anhte tsun nga ga ai. ⁵ Kaning rai nme law, nanhte chye nga myit dai hte maren, anhte galoi mung a shapyaw ai ga hpe n sung ga ai hte, ka-up nga ai nammak lawhpa n rawng nga ga ai gaw, Karai Kasang nan sakse rai nga ai: ⁶ dai hta kaga, Hkristu a kasa ni rai nga ga ai majaw, nanhte hpe lit shagun mayu yang shagun lu ga ai rai ti mung, nanhte kaw na rai ti mung, masha gale kaw na rai ti mung, masha a hpung shingkang hpe anhte n tam sa ga ai. ⁷ Anhte gaw nanhte kaang e, sumnung nga ai hte, ma masut gaw tinang a ma hpe chyu jaw ai zawn, rai wa sa ga ai. ⁸ Shing rai nanhte hpe nja nhpra nga ga ai majaw, Karai Kasang a gabu gara shi ga sha n rai, anhte a asak hpe pyi nanhte hpe jaw kau na, anhte myit dik nga ga ai; kaning rai nme law, anhte a tsaw ra ai ni nanhte tai wa ma nit dai. ⁹ Dai hta kaga, hpu nau ni e, anhte a amu bungli hte atsu atsam hpe nanhte naw dum nga myit dai: nanhte hta langai mi hpe mung lit n shagun u ga, shani shana bungli galaw let, Karai Kasang a kabu gara shi ga anhte nanhte hpe hkaw dan ga ai. ¹⁰ Kam sham nga ai ni nanhte a man e, anhte kaning rai chyoi pra ai hte ding hpring nna mara n kap ai rai nga ga ai hpe, nanhte mung, Karai Kasang mung, sakse rai nga myit dai. ¹¹ Kaning rai nme law, shi a mung dan hte hpung shingkang kaw nanhte hpe shaga la ai Karai Kasang hte nanhte ging dan let a hkawm nga lu myit ga, ¹² kawa gaw tinang a kasha ni hpe di ai hte maren, langai hte langai hte hpe anhte shadum shahprang nna, shangwi shapyaw ai hte sakse hkam ya ai hpe, nanhte nan chye nga myit dai. ¹³ Dai rai nna, anhte kaw nna na la ai Karai Kasang a mungga hpe nanhte hkam la myit dai shaloi e, masha a ga hpe zawn n rai, gaja wa teng teng rai nga ai hte maren, nanhte kam sham ai ni hta e a shachyen nga ai Karai Kasang a mungga hpe nanhte hta la ma nit dai majaw, anhte mung Karai Kasang hpe n sim n sa shakawn kungdawn a rai nga ga ai. ¹⁴ Kaning rai nme law, hpu nau ni e, Yuda mung na Hkristu Yesu hta e rai nga ai Karai Kasang a Hpung ni a hkan sharau ai ni nanhte mung tai wa ma nit dai rai nna, Yuda mung na ni gaw tinang a amyu masha ni a lata la na nni nkri hkrum ma ai hte maren, nanhte mung nanhte a mung masha ni a lata la na hkrum myit dai: ¹⁵ Yuda ni chyawm gaw dai Madu Yesu hpe sat kau ai hte, myihtoi ni hpe mung, anhte hpe mung, zingri zingrat di mi ai rai nna, Karai Kasang a tsaw ra ai hku n tam ma ai hte, masha yawng mayawng hte nhtan shai nga ma ai: ¹⁶ maigan masha ni hkye hkrang la ai hkrum na matu hkaw tsun dan na, shanhte gaw anhte hpe ban hkum kau mi ai; shing rai shanhte gaw tinang a yubak hpe tut nawng e shalaw jahtam nga nna, dai pawt sindawng ai mung shanhte a ntsa e htum hkra dep nga sai. ¹⁷ Anhte mung, hpu nau ni e, myit masin hte n rai, myi man hte sha tawng marang mi nanhte hte daw hka wa ga ai majaw, nanhte a myi man hpe bai mu lu na, nacying ndawt let anhte grau nna shakut sharang nga ga ai: ¹⁸ Dai re ai majaw, ngai Pawlu nan, nanhte hpang de du na lang lahkawng lang myit lawn ga ai rai ti mung, Satan gaw anhte hpe hkum shadang kau mi ai. ¹⁹ Kaning rai nme law, anhte a Madu Yesu a man e, shi a bai du ai hta, anhte a myit mada shara, kabu gara shara hte gumrawng na janmau gaw, hpa mi rai nga a ta? Nanhte nan dai rai nga myit dai, n rai myit ni? ²⁰ Nanhte gaw anhte a hpung shingkang hte kabu gara shara rai nga myit dai. 

 

1 Htesaloni 3

¹ Dai rai nna, anhte naw n sharang nga lu ga ai majaw, Ahten mare hta e lik lik hti nga na, anhte myit hkut nga ga ai rai nna, ² ndai tsin-yam tsindam a majaw kadai mung shamu shamawt n rai myit ga, nanhte hpe shadaw shalan nna, nanhte a makam masham hpe shangwi shapyaw na matu, ³ Hkristu a kabu gara shi ga hta Karai Kasang a shangun ma rai nga ai anhte a hpu nau Timohti hpe shangun dat gaw ai: tsin-yam tsindam hkrum na matu san da sai ni anhte rai nga ga ai, nanhte nan chye nga myit dai. ⁴ Kaning rai nme law, nanhte hte rau naw nga ai shaloi e, anhte tsin-yam tsindam hkrum na ga ai hpe, anhte nanhte hpe tsun dan magang ga ai rai nna, nanhte chye nga myit dai hte maren, shing rai mung byin wa sai. ⁵ Dai rai nna ngai naw n sharang nga lu nngai majaw, gung lau ai wa gaw nanhte hpe gung lau ai hte anhte a bungli kaman lila tai mat nhten, ngu nna nanhte a makam masham hpe chye lu na, ngai shangun dat we ai. ⁶ Ya chyawm Timohti gaw nanhte kaw na anhte hpang de bai du wa nna, nanhte a makam masham hte tsaw ra ai mung, nanhte tut nawng e anhte hpe atsawm sha a dum nga nna, anhte nanhte hpe hkrum mayu ga ai hte maren, nanhte mung anhte hpe hkrum mayu myit dai lam, anhte hpe kabu gara shi ga wa shana ya mi ai shaloi e, ⁷ hpu nau ni e, anhte a kyin dut ai hte nni nkri yawng hta e, nanhte a makam masham majaw nanhte a lam e, anhte shangwi shapyaw ai hkrum ga ai. ⁸ Kaning rai nme law, nanhte ya e dai Madu hta lahpran tsap nga myit yang gaw, anhte a hkrung nga ga ai. ⁹ Dai hta kaga anhte a Karai Kasang man e nanhte a majaw anhte hkam lu ai kabu gara yawng hpe tau yu yang, anhte nanhte a matu mara Karai Kasang hpe gaw, chyeju kaning rai htang lu na rai ta? ¹⁰ Nanhte a myi man mu lu nna, nanhte a makam masham hta naw ra nga ai hpe shatup shatsup lu u ga, anhte shani shana akyu grai hpyi nga ga ai. ¹¹ Ya nanhte nga ai de anhte sa wa na lam hpe, anhte a Wa Karai Kasang hte anhte a Madu Yesu nan, hkyen lajang nga u ga. ¹² Anhte a Madu Yesu gaw shi a chyoi pra ai ni yawng hte rau bai du wu ai shaloi e, anhte a Wa Karai Kasang a man e nanhte a myit masin hpe chyoi pra ai hta yubak n kap let, shangang jahkang ya u ga, ¹³ anhte nanhte hpe tsaw ra nga ga ai hte maren, nanhte a tsaw ra ai myit gaw shada da hte yawng mayawng a matu, kaba wa nna law htam wa lu hkra, dai Madu shabyin ya u ga. 

 

1 Htesaloni 4

¹ Bai lam mi gaw, hpu nau ni e, nanhte gaw Karai Kasang a man e kaning rai hkawm lu nna shi ra ai hku shadik lu na, anhte kaw na nanhte hkam la ai hte nanhte hkawm yu myit dai hte maren, dai hta e grau nna law htam wa myit ga, Madu Yesu hta anhte nanhte hpe hpyi nem nna shadut jahkat dat ga ai. ² Madu Yesu a ahkaw ahkang hte e kaning re ai hkang da ai ga nanhte hpe ap ya sa ga ai gaw, nanhte nan chye nga myit dai. ³ Kaning rai nme law, nanhte gaw hpye ai amu hpe koi gam nna, Karai Kasang hpe n chye n chyang ai maigan masha ni a ngang kayut ai hte n hkawm ai sha, ⁴ nanhte langai hte langai tinang a hkrang hpe chyoi pra ai hte arawng sadang hta hkang nga nna, ⁵ kadai hpe mung n tawt n lai ai hte, dai lam hta tinang a hpu nau wa hpe n map n maw sha nga myit ga, dai gaw Karai Kasang a myit ra ai hku hte nanhte a shachyoi shapra na lam rai nga ai. ⁶ Anhte shawng e nanhte hpe tsun dan nna sakse hkam ya ma de ai hte maren, Karai Kasng gaw ndai lam yawng hte a matai dawp ai wa rai nga ai. ⁷ Kaning rai nme law, Karai Kasang gaw n san n seng ai hta nanhte hpe shaga la ma nit dai n rai, chyoi pra ai hta shaga la ma nit dai . ⁸ Dai rai nna, n kaw n law re ai wa kadai mung, masha hpe n rai, nanhte hta shi a Chyoi pra ai Wenyi jaw ya ai Karai Kasang hpe n kaw n law di da wu ai. ⁹ Ya, hpu nau shada da tsaw ra ai lam, ngai nanhte hpe ka dat shara n nga ai. Kaning rai nme law, shada da tsaw ra nga na, Karai Kasang a sharin achyin ai ga nanhte nan hkam la ma nit dai rai nna, ¹⁰ Makedoni mung ting hta nga ai hpu nau ni hpe shing rai galaw nga myit dai. Rai ti mung, hpu nau ni e, nanhte dai hta e naw law htam wa nna, ¹¹ sumnung shingdi ai hta myit makun nga let, shinggan de nga ai ni a man e ging ram ai hte hkawm nga lu nna, hpa mung n ra nga hkra, ¹² nanhte hpe shawng e htet da ga ai hte maren, nanhte tinang hte ang ai amu gun hpai nna tinang a lata hte bungli galaw myit ga, anhte nanhte hpe naw shadut jahkat dat ga ai. ¹³ Dai hta kaga, hpu nau ni e, myit mada ai lam n lu ai masha ni zawn anhte yawn hkyen n hkrum myit ga, yup pyaw nga ai ni a lam nanhte n chye ai nga na, anhte n ra ga ai. ¹⁴ Kaning rai nme law, Yesu gaw si mat nna bai rawt wa ai hpe anhte kam nga ga yang gaw, Yesu hta yup pyaw ai ni hpe mung, Karai Kasang gaw shi hte rau woi na ma ru ai. ¹⁵ Ndai gaw dai Madu a mungga hte anhte nanhte hpe tsun dan ga ai: dai Madu bai du sa ai shaloi e, hkrung nga ai hte naw hti ngam nga ai ni anhte gaw, yup pyaw ai ni a numshawn de loi mi pyi shawng magang lu na ga ai n rai. ¹⁶ Dai Madu nan jahtau garu ai hte, lamu kasa agyi a nsen hte, Karai Kasang a pahtau dum ai hte sumsing lamu de na yu wa nna, Hkristu hta e si mat ai ni gaw shawng numshawn e rawt wa lu na ma ra ai : ¹⁷ dai hpang, dai Madu hpe Kaang ganghkau e hkrum na matu, hkrung nga ai hte naw hti ngam nga ai ni anhte gaw, shanhte hte rau sumwi ntsa de shalun la ai hkrum na ra ga ai rai nna, anhte gaw dai Madu hte rau tut nawng e a nga nga na ra ga ai. ¹⁸ Dai re ai majaw, ndai ga hte nanhte shada da shangwi shapyaw hkat nga mu. 

 

1 Htesaloni 5

¹ Rai ti mung, hpu nau ni e, aten hte ahkying ladaw a lam nanhte hpe ka dat shara n nga ai : ² kaning rai nme law, shana na lagu lagut shang ai zawn, dai Madu a shani mung du na ra ai hpe, nanhte nan azin ayang chye nga myit dai. ³ Shanhte gaw, Ngwi pyaw ai hte asan apan rai nga ai, nga nna tsun ma yang gaw, na-um nasin re ai numsha gaw shinggyim machyi hkrum ai zawn, shanhte a ntsa e hten byak wa ai gaw akajawng sha du na ra ai rai nna, shanhte kaning rai mung hprawng wa lu na ma ai n rai. ⁴ Nanhte chyawm gaw, hpu nau ni e, dai shani gaw lagu lagut zawn nanhte hpe dep lu hkra, nanhte nsin hta e lup nga myit dai n rai : ⁵ kaning rai nme law, nanhte nlang hte gaw nhtoi a kashu kasha ni hte shani a kashu kasha ni mung rai nga myit dai. ⁶ Anhte gaw shana hte mung, nsin hte mung, n seng ga ai ; dai re ai majaw masha gale zawn anhte n yup nga ai sha, a maja nga nna htauli htaula rai nga ga : ⁷ kaning rai nme law, yup nga ai ni gaw shana e yup nga ma ai, chyaru nang ai ni mung shana e nang nga ma ai. ⁸ Anhte chyawm gaw shani hte seng ga ai majaw, htauli htaula rai nga nna, makam masham hte tsaw ra ngu ai sinda magap hpe dagap nga ai hte, hkye hkrang la ai de myit mada ai lam ngu ai hpri gup chyawp hpe chyawp nga ga. ⁹ Kaning rai nme law, pawt sindawng na hpe hkam na matu Karai Kasang gaw anhte hpe n san da ai sha, anhte a Madu Yesu Hkristu a marang e hkye hkrang la na chyeju lu la u ga she, anhte hpe san da mi ai : ¹⁰ anhte hprang nga yang rai ti mung, yup nga yang rai ti mung, shi hte rau hkrung nga n ga, shi anhte a matu mara si hkam sai. ¹¹ Dai re ai majaw, nanhte ya e pyi galaw nga myit dai hte maren, shada da shadum shahprang nna shadaw shalan nga mu. ¹² Dai hta kaga, hpu nau ni e, nanhte hta bungli gun hpai nna, dai Madu hta nanhte a ntsa e up nga ai hte, nanhte hpe shadum shahprang nga ai ni hpe a dum nga nna, ¹³ shanhte a amu bungli majaw, tsaw ra ai myit hte shanhte hpe grai wa hkungga lara nga na, anhte nanhte hpe hpyi nem nga ga ai : nanhte mung shada da ngwi pyaw nga mu. ¹⁴ Bai, hpu nau ni e, kajam galam re ai ni hpe shadum shahprang nga mu, myit kaji nga ai ni hpe shalan shabran nga mu, gawng kya ai ni hpe shadaw shangang nga mu, masha yawng hte hpe galu kaba ai myit madun nga mu ; ¹⁵ kadai hpe mung n kaja ai a jaw e n kaja ai hku bai n tai myit ga, sadi sahka nga mu, nanhte shada da hta mung, masha mahkra matu mara mung, tut nawng e mai kaja ai lam hpe hkan shachyut nga mu, ngu nna anhte nanhte hpe shadut jahkat ma de ai. ¹⁶ Tut nawng e kabu gara nga mu: ¹⁷ n sim n sa akyu hpyi nga mu; lam shagu hta shakawn kungdawn nga mu; ¹⁸ kaning rai nme law, dai gaw Hkristu Yesu hta e nanhte a lam Karai Kasang a myit ra ai hku rai nga ai. ¹⁹ Wenyi hpe hkum shanum myit; ²⁰ myihtoi htoi ai lam hpe n kaw n law hkum di myit. ²¹ Lam yawng mayawng hpe chyam dinglik yu nga mu, mai kaja ai hpe mahkyu nga mu. ²² N kaja ai lam baw sumhpa hpe koi gam nga mu. ²³ Ngwi pyaw ai a npawt Karai Kasang nan nanhte hpe hkum dinghkum shachyoi shapra myit ga; anhte a Madu Yesu Hkristu bai du sa ai shaloi e, nanhte a wenyi, myit masin hte hkum hkrang ting gaw, mara n kap hkra pau nga u ga. ²⁴ Nanhte hpe shaga la ai wa gaw kangka nga ai rai nna, ndai lam hpe mung galaw na ru ai. ²⁵ Hpu nau ni e, anhte a matu mara mung akyu hpyi ya mi. ²⁶ Hpu nau ni yawng hte hpe, chyoi pra ai pup hte shakram ya mi. ²⁷ Ndai shagun dat ai laika gaw hpu nau ni yawng hte hpe hti dan shangun myit ga, ngai nanhte hpe dai Madu hta ga daka dat ma de ai. ²⁸ Anhte a Madu Yesu Hkristu a chyeju gaw, nanhte hte rau a nga nga u ga law.