KOLOSE NI KAW SHAGUN DAT AI LAIKA

Kolose 1

¹ Karai Kasang myit ra ai a majaw Hkristu Yesu a kasa rai nga ai,ngai Pawlu hte hpu nau Timohti gaw, Kolose mare na chyoi pra ai ni hteHkristu hta kangka re ai hpu nau ni kaw, ga shana dat ga ai. ² Anhte aWa Karai Kasang kaw na, chyeju hte ngwi pyaw ai gaw, nanhte hta e a nga nga ma lit ga law, ³ Sumsing lamu hta e nanhte a matu mara mahkawng da ai myit mada ai a marang e, Hkristu Yesu hta nanhte a makam masham hte, chyoi pra ai ni nlang hte gaw tsaw ra ai myit rawng nga myit dai hpe, anhte na yu sa ga ai majaw, ⁴ nanhte a matu tut nawng e akyu hpyi nga yang, anhte a madu Yesu Hkristu a Kawa Karai Kasang hpe, anhte shakawn kungdawn ga ai: ⁵ dai myit mada ai a lam nanhte kaw du dep ai teng man ai kabu gara shi ga a majaw, nanhte shawng e na yu ma nit dai. ⁶ Dai kabu gara shi ga gaw, mungkan ting chyam hkra du dep wa ai hte, nanhte na yu nna Karai Kasang a chyeju hpe teng teng chye chyang lu ai nhtoi kaw nna, nanhte hta asi si nna kaba wa lu ai hte maren, mungkan ting e mung, asi si nna kaba wa lu ai. ⁷ Dai gaw anhte a tsaw ra ai shingdep shingtau wa Epahpra kaw nna nanhte sharin la ma nit dai hte maren rai nga ai; shi gaw Hkristu hta e anhte a matu mara kangka re ai bungli gun hpai ai wa rai nga ai rai nna, ⁸ dai Wenyi hta e nanhte a tsaw ra ai myit gaw, shi anhte hpe mung shadan dan ma ni ai. ⁹ Dai re ai majaw, anhte mung na yu lu ai shani kaw nna, nanhte a matu mara akyu hpyi na, n sin n sa rai nga ai hte: Wenyi hte seng ai hpaji byeng-ya hte nyan amyu myu hta shi a myit mang ai a chye chyang ai lam hte nanhte hpring chyat lu nna, ¹⁰ Karai Kasang a chye chyang ai lam hta asi si nna, kaba wa let tsawm pra ai lam shagu hte kaja ai bungli shagu hta dai Madu a lam tau yu nna ging dan let hkawm nga myit ga mung, ¹¹ shi a hpung shingkang re ai n-gun nga ai hte maren, shakut sharang nna kabu gara ai hte myit galu kaba hkum tsup hkra, n-gun lagaw amyu hte shaja ya ai hkrum myit ga mung, ¹² nhtoi hta rawng nga ai chyoi pra ai ni a sali wunli a daw mi dagraw lu myit ga, nanhte hpe ging dan shangun ai Kawa kaw shakawn kungdawn na rai ti mung, anhte hpyi nem nga ga ai. ¹³ Dai Kawa gaw, nsin a ahkang aya kaw na anhte hpe mawai la nna, shi a tsaw ra ai Kasha a mungdan hta shashawn mi ai: ¹⁴ dai Kasha hte nan htingrai htingrat na lam hte yubak raw dat na akyu anhte lu la sa gaw ai. ¹⁵ Shi gaw myi e n mu lu ai Karai Kasang a hkrang bung sumla rai nga ai hte, hpan da ai arai yawng mayawng hta alat rai nga ai. ¹⁶ Kaning rai nme law, sumsing lamu hte ginding aga hta yawng mayawng hte gaw, mu lu ai hte n mu lu ai hte hpe rai ti mung, hpa hkawhkam tingnyang, munggyi aya, du aya hte ahkang aya hte hpe rai ti mung, shi hta e hpan tawn da nga sai; arai yawng mayawng gaw, shi a jaw e mung, shi a matu mara mung, hpan tawn da nga sai; ¹⁷ Shi gaw yawng mayawng a shawng na rai nga ai hte, yawng mayawng gaw shi a majaw grin nga ai. ¹⁸ Dai Hpung ngu ai hkum hkrang a baw, shi rai nga ai. Shi nan lam shagu hta grau ai nhtung nhka tai wa u ga, shi gaw npawt nhpang hte si mat ai ni kaw na alat ningshawng rai nga ai. ¹⁹ Kaning rai nme law, shi hta e hkum dinghkum rawng nga u ga, Kawa gaw sharawng awng nga ai rai nna, ²⁰ shi a wudang na hkaw ai asai hte mahku mara shatai let, shi a lata e yawng hte hpe shi hkum hte htinglu htinglai ya nga ai: rai sa, sumsing lamu e nga ai hte hpe rai ti mung, ginding aga e nga ai hte hpe rai ti mung, shi a lata hte htinglu htinglai ya nga ai. ²¹ Nanhte mung shawng e tsasam re ai hte, nanhte a n hkru n hkra ai bungli majaw, myit mang hte n dawng n yawt ai ni rai nga myit dai rai ti mung, - sumsing lamu a npu e hpan da mada hte hpe hkaw tsun dan nna, nanhte na yu ai kaba gara shi ga a myit mada ai hta n htak mat ai sha, ²² dai makam masham hta nga nga nna, de a npawt manat let da hpran nga myit yang gaw, chyoi pra nna agang chyalang n kap ai hte mara n rawng ai ni hpe, shi a man e shashawn myit ga, - ²³ shi a si hkam ai a marang e, shi a hkum hkrang na ashan hta e shi ya e nanhte hpe htinglu htinglai ya ma nit dai: dai kabu gara shi ga a gun hpai ai wa ngai Pawlu nan tai wa ni ai. ²⁴ Ya chyawm gaw nanhte a matu mara ngai hkrum ai tsinyam tsindam hta ngai kabu nga ai hte, dai Hpung ngu ai Hkristu a hkum hkrang a matu mara, shi a naw ngam nga ai nni nkri hpe nye a hkum shan hte e ngai jahkum shatsup nga nngai. ²⁵ Moi chyaloi nhkoi prat mi hte prat mi makoi magap da ai sung htum ai lam ngu ai Karai Kasang a mungga hpe jahkum shatsup nga u ga. ²⁶ Karai Kasang gaw nanhte a matu mara ngai hpe jaw da ai aya hte maren, dai Hpung a amu gun hpai ai wa, ngai tai nga nngai. ²⁷ Dai sung htum ai lam chyawm gaw, shi a chyoi pra ai ni hpe ya e shadan dan nu ai; ndai sung htum ai lam a hpung shingkang ngu ai sut gan gaw, maigan masha ni hta hpa rai nga ai gaw, shanhte hpe shadan dan u ga, Karai Kasang gaw ra nga ai: dai gaw, Hkristu gaw nanhte hta e nga ai hpe, hpung shingkang myit mada ai lam ngu ai, rai nga ai. ²⁸ Masha shagu hte hpe Hkristu a man e hkum tsup ai hte shashawn lu u ga, shi a lam anhte hkaw dan nna masha shagu hpe shadum jahprang ai hte, masha shagu hpe hpaji byeng-ya amyu myu hte sharin shaga nga ga ai. ²⁹ Shing rai byin lu hkra, ngai hte tsam mari shachyen ai wa a bungli galaw ai hku hte maren, ngai mung bungli galaw ai hta shaja nga nngai. 

Kolose 2

¹ Kaning rai nme law, nanhte hte Ladoki masha ni a matu mung, nye a myi man n mu yu ai ni yawng a matu mung, Hkristu ngu ai Hkrai Kasang a sung htum ai lam shanhte chye chyang lu hkra, tsaw ra ai myit hte makyit mahkai nna zai byeng-ya ting ngu ai hkum tsup re ai sut gan hpe lu la let ² shanhte a kraw lawang shangwi shapyaw ai hkrum lu mu ga, ngai nde wa shaja nga nngai, nanhte chye nga na, ngai nga na, ngai ra nga nngai: ³ Hkristu hta e chyawm gaw hpaji byeng-ya hte chye chyang ai lam ngu ai sut gan yawng mayawng kyem da nga ai. ⁴ Kadai wa rai ti mung, shalen hkalau ai ga hte nanhte hpe n hkalau u ga, ngai ning nga tsun nga nngai. ⁵ Kaning rai nme law, ngai hkum shing-yan ht e tsan gang nga rai ti mung, nye a Wenyi e ngai nanhte hte rau nga nga nna, nanhte a arawn alai hte Hkristu hta nanhte a makam masham a grin nga ai hpe mu yu nna kabu nga nngai. ⁶ Dai re ai majaw, nanhte gaw Madu Hkristu Yesu hpe hkap hkalum la ai hte maren, shi hta e a hkawm nga mu: ⁷ shi hta e ru jung nna gaw da nga ai hte, nanhte sharin achyin la ai hte maren, nanhte a makam masham hta ngang ngang hkang hkang rai nga let, dai hta e shakawn kungdawn ai hte law htam wa mu. ⁸ Hkristu a hkang ai tara hte n bung ai, mungkan ga a hkang ai tara hte masha a matsun maroi ga hkan ai zai byeng-ya hte lila rai nga ai hkalem hkalau ga hte, kadai mung nanhte hpe n hklau lu u ga, sadi nga mu: ⁹ kaning rai nme law, Hkristu a gawng shingma hta Karai Wa a marai hkum sumhpa a shanu nga ai. ¹⁰ Shi hta e mung nanhte hkum tsup nga myit dai; shi gaw du aya lu ai hte hte ahkang aya lu ai ni yawng mayawng a baw rai nga ai. ¹¹ Hkristu a matu gadoi hkam ai ngu ai, hkum hkrang na ashan hpe sharun kau ai, lata hte n re ai matu gadoi hkam ai hte, nanhte shi hta e hkam ma nit dai: ¹² baptizma hkam ai lam hta nanhte shi hte rau lup wa nna, si mat ai ni kaw na shi hpe hkrung sharawt la ai Karai Kasang a shachyen ai hta, kam sham ai a marang e shi hte rau sharawt la ai mung hkrum ma nit dai. ¹³ Nanhte gaw tara tawt lai nna, nanhte a hkum shan a matu gadooi n hkam ai hte chyasi ni rai nga myit ti mung, shi gaw nanhte hpe shi hte rau jahkrung ya ma nit dai. ¹⁴ Anhte a shut hpyit ai yawng mayawng hte hpe shi raw dat kau ya nna, anhte hte nhtan shai ai htet da ai ga rawng ai, anhte hpe jeyang ai lata jahpan hpe katsut kau ya nu ai; wudang hta e dai hpe dit shakap let shi dai hpe yeng seng kau nu ai. ¹⁵ Du aya hte ahkang aya lu ai hte hpe htawk jahkrat kau nhtawm, shi dai ni hpe leng leng mahtan tawn nna, dai wudang hta shanhte a ntsa e padang nlaw da mu ai. ¹⁶ Dai re ai majaw, shahpa, luhpa hte, poi shani, shata praw shani hte laban nhtoi a lam, kadai mung nanhte hpe n jeyang nga u ga: ¹⁷ dai hte gaw du na ra ai lam a shingna hkrai rai nga ai; dai hkum hkrang chyawm gaw, Hkristu a rai nga ai. ¹⁸ Myit shagyip ngu na lam tam nna, lamu kasa hpe naw ku na htung hte, kadai mung nanhte hpe n hkalem sha u ga; shing re ai wa gaw tinang a man ai mu ai hpe sha machyu nga ai hte, tinang hkum shan a myit hta kaman lila grang wa ai rai nna, dai baw hpe n manat nga ai; ¹⁹ dai baw hta nna, hkum ting gaw hkrihkraw lamyi hte lasa ni hta lanawn ya ai hkrum nna shachyaw nga let, Karai Kasang a kaba w shangun ai hte kaba wa nga ai. ²⁰ Ya, Hkristu hte rau mungkan ga na hkang ai tara hta nna nanhte si mat teng nga myit yang gaw, masha a htet da ai ga hte sharin shaga ai ga hte maren, ²¹ Hkum jum, hkum chyim, hkum hkra myit, nga nna mungkan ga e naw pra nga ai zawn, hpa rai naw madat mara nga myit ta? ²² dai yawng hte gaw asung shang nna, hten mat na sha rai nga ai. ²³ Shing nga ai ga gaw, tinang a myit jasat ai naw ku ai htung hte, myit shagyip ngu ai hte, tinang hkum hpe shadip ai lam tau yu yang, hpaji byeng-ya zawn san nga ti mung, hkum shan a mak kayut ai hpe dang kau na matu, hpa akyu mi mung n rai nga ma lu ai. 

 

Kolose 3

¹ Dai rai nna, nanhte Hkristu hte rau bai rawt nga ai teng myit yang gaw, Hkristu gaw Karai Kasang a hkra maga e dung nga ai shara na ningtsa arai ni hpe a tam nga mu. ² Ga ningtsa arai ni hpe myit hkum manoi myit; ningtsa na arai ni hpe myit manoi nga mu. ³ Kaning rai nme law, nanhte si mat ai ni rai nga myit dai rai nna, nanhte a asak gaw Hkristu hte rau, Karai Kasang hta, kyem da nga ai. ⁴ Anhte a asak ngu ai Hkristu gaw dan pru wa ai shaloi e, anhte mung shi hte rau hpung shingkang hta dan pru na ra ga ai. ⁵ Dai re ai majaw, hpye ai amu, awu asin re ai amu, ngang kayut ai, n hkru n hkra re ai marin marit ai hte, gawng-ngu sumla naw ku ai rai nga ai nammak lawhpa ngu ai, ga ningtsa na nanhte a daw shan ni hpe sat kau mu: ⁶ dai hte a majaw Karai Kasang a pawt sindawng ai gaw du ra ai. ⁷ Dai hte hta nanhte shawng e naw hkrung nga ai shaloi e dai hta e nanhte hkawm nga myit dai. ⁸ Ya chtawm gaw ndai nlang hte hte, masin pawt ai, n-yun bu ai, n hkru n hkra ai, shatan nhkan ai hte ga kinsha hte hpe, nanhte a n-gup na yeng kau mu. ⁹ Shada da masu magaw ga hkum tsun myit: kaning rai nme law, dai gawng shing-yan dingsa hte tinang a arawn alai hpe, nanhte raw kau myit dai rai nna, ¹⁰ hpan tawn da ai wa a hkrang bung sumla hte maren rai nga ai chye chyang ai lam hta ningnan tai wa ai gawng shing-yan ningnan hpe nanhte dagraw nga myit dai: ¹¹ dai gawng shing-yan ningnan hta, Heleni masha hte Yuda masha, matu gadoi hkam ai wa hte matu gadoi n hkam ai wa, karing karang masha, Skuti masha, mayam wa, shanglawt wa ngu ai mi n nga lu ai sha, Hkristu gaw yawng mayawng rai nga nna nlang hte hta a rai nga ai. ¹² Dai re ai majaw, Karai Kasang a lata la ai ni hte, chyoi pra nna tsaw ra hkrum ai ni zawn, matsan dum ai, sumnung ai, mai kaja ai, myit nem ai, myit gyip ai hte myit galu kaba ai dagraw nga nna, ¹³ shada da hkam mana ai hte, mara langai ngai nga yang gaw, shada da raw dat kau hkat nga mu: dai Madu nanhte a mara hpe raw dat kau ya ai hte maren, nanhte mung galaw nga mu. ¹⁴ Dai nlang hte a ntsa e hkum tsup re ai makyit sumri ngu ai tsaw ra ai myit hpe kahtap hpun nga mu. ¹⁵ Nanhte a myit masin hta e mung, Hkristu a ngwi pyaw ai lam a up nga u ga: shing rai hkum hkrang langai sha hte nanhte hpe shaga la ma nit dai; dai hta n-ga chyeju a dum nga mu. ¹⁶ Hkristu a mungga gaw hpaji byeng-ya amyu myu hte nanhte hta n taw n tsang a shanu nga u ga: shakawn kungdawn ga, mahkawn mangoi ga, Wenyi hte seng ai laka ga hte, chyeju hku hkan nna, nanhte shada da sharin shaga nna shadum shahprang nga let, nanhte a kraw lawang hta Karai Kasang hpe mahkawn mangoi nga mu. ¹⁷ Nanhte hpa lam galaw myit yang, mung sumtu hta rai ti mung, magan bungli hta rai ti mung, Madu Yesu a amying nsang hpe gang let, yawng mayawng hte hpe a galaw nga nna, shi a marang e Kawa Karai Kasang hpe shakawn kungdawn nga mu. ¹⁸ Numsha ni e, tinang madu wa a hkang ai hku hkan nga mu: dai gaw dai Madu a man e sut nga ai. ¹⁹ La ni e, madu jan ni hpe tsaw ra nga nna, shanhte hpe kajet kaje hkum rai nga myit. ²⁰ Ma ni e, kanu kawa ni hpe lam shagu hta madat mara nga mu: dai gaw dai Madu a man e sharawng awng ai lam rai nga ai. ²¹ Kanu kawa ni e, nanhte a ma ni myit n kaji u ga, shanhte hpe hkum jahte nga mu. ²² Mayam ni e, nanhte a mungkan Madu ni hpe lam shagu hta madat mara nga mu: myit man pa mayu ai hte masha a myit shapyaw na zawn n re ai sha, myit mang langai sha hte dai Madu hpe hkrit kang nga let madat mara nga mu. ²³ Dai madu a lata na, sali wunli ngu ai shabrai hpe nanhte nhtang hkam la na chye nga myit dai majaw, hpa galaw yang mung, masha a matu galaw ai zawn n rai, ²⁴ dai Madu a matu zawn galaw nga nna, myit masin yawng hte a shaja nga mu: dai Madu Hkristu kaw nanhte yam nga myit dai. ²⁵ N ding n man ai hku galaw ai wa gaw, tinang a n ding n man ai hpe nhtang hkam sha na ra ai rai nna, myi man tau yu ai lam n nga lu ai. 

 

Kolose 4

¹ Madu ni e, nanhte mung sumsing lamu e Madu lu nga myit dai hpe chye nga myit dai majaw, ding man ai hte ging ram ai hku mayam ni hpe marang nga mu. ² Akyu hpyi ai hta shakut sharang rai nga mu, dai hta e a maja nga let shakawn kungdawn nga mu. ³ Hkristu a sung htum ai ga a majaw ngai gyit hkang da ai hkrum rai ti mung, dai sung htum ai ga tsun dan lu u ga, Karai Kasang gaw mung ga a lam anhte a matu mara chyinghka hpaw malang nga na hte, ⁴ dai sung htum ai ga shadan dan na ngai mai tsun ai hte maren, ngai tsun dan lu hkra, anhte a matu mara mung akyu hpyi ya mi. ⁵ Shinggan de nga ai ni a man e hpaji byeng-ya hte hkawm nga nna, ahkying aten hpe lata mari la mu. ⁶ Langai hte langai hpe kaning rai htan lu na chye lu u ga, nanhte a ga hta galoi mung chyeju lawn nga nna, jum hte a shum nga u ga. ⁷ Dai Madu hta e tsaw ra ai hpu nau wa hte kangka re ai shingdep shingtau hte kanawn mayam rai nga ai Tuhkiku gaw, ngai hte seng ai lam yawng mayawng nanhte hpe shana ya na ma rin dai: ⁸ nanhte gaw anhte a lam chye lu nna, nanhte a myit masin hpe shangwi shapyaw ai hkrum lu ma lit ga, ndai lam a majaw nan, ngai shi hpe nanhte hpang de shangun dat se ai. ⁹ Dai hta kaga, nanhte kaw na rai nga ai kangka re ai tsaw ra hpu nau Onesimo hpe mung, ngai shi hte rau shangun dat se ai: shan gaw nang na byin mabyin hte hpe nanhte hpe shana ya na ma rin dai. ¹⁰ Nye a bawng dung manang Aristaku nanhte hpe shakram dat myit dai; Barnaba a kahkri Marku mung nanhte hpe shakram dat myit dai: shi a lam htet da ai ga hpe nanhte hkam la lu myit dai rai nna, shi nanhte kaw sa du yang gaw, shi hpe hkap hkalum la mu; ¹¹ Yustu mying ai Yesu mung nanhte hpe shakram dat myit dai: shanhte gaw matu gadoi hkam ai ni hte seng ma ai rai nna, Karai Kasang a mungdan hta shanhte hkrai sha nye a shingdep shingtau ni rai ma ai hte, nye a matu mara ngwi pyaw ai lam tai wa ma ai. ¹² Nanhte kaw na rai nga ai Hkristu Yesu a mayam Epahpra gaw nanhte hpe shakram dat myit dai: nanhte gaw Karai Kasang a myit mang ai hku nlang hte hta hkum tsup ai hte dinggrin nga let lahpran tsap nga lu myit ga, dai akyu hpyi ai hta shi nanhte a matu mara tut nawng e shingjawng hkat nga ai. ¹³ Kaning rai nme law, nanhte a matu mara mung, Ladoki hte Herapoli e nga ai ni a matu mara mung, shi shari sharat law law hkam nga ai gaw, shi a lam ngai sakse hkam nga nngai. ¹⁴ Tsaw ra ai tsi sara Luka yan Dema gaw nanhte hpe shakram dat myit dai. ¹⁵ Ladoki e nga ai hpu nau ni hte, Numhpa hte shi a nta e shanu ai Hpung hpe shakram ya mi. ¹⁶ Ndai shagun dat ai laika hpe nanhte hti ngut jang, Ladoki a Hpung masha ni hpe hti shangun nna, Ladoki ni kaw shagun ai laika mung nanhte hti yu mu. ¹⁷ Arhkipo hpe mung, Dai Madu hta nang lu la ai daw ai amu hpe shatsup lu n ga sadi nga u, ngu nna shi hpe tsun dan mu. ¹⁸ Ngai Pawlu nan nye a lata hte ndai shakram ai ga ka dat nngai. Nye a hkang hkyihkyang hpe dum nga mu. Chyeju gaw nanhte hte rau a nga nga u ga law.