HPILIPI NI KAW SHAGUN DAT AI LAIKA

Hpilipi 1

¹ Hkristu a mayam rai nga ai Pawlu yan Timohti gaw, Hpilipi mare e nga nga ai, Hkristu Yesu hta e chyoi pra ai ni nlang hte hte, hpung up ni hte hpung tau ni hpe nawng, ga shana dat ga ai. ² Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e a nga nga ma lit ga law. ³ Shawng nna na nhtoi kaw nna ya du hkra, dai kabu gara shi ga hta nanhte a kanawn mazum ai lam majaw, ⁴ nanhte hpe dum shagu e nye a Karai Kasang hpe ngai shakawn kungdawn nna, ⁵ nye a akyu hpyi mahpyi hta, nanhte mahkra a matu mara galoi mung kabu gara ai myit hte akyu hpyi shachyen nga nngai. ⁶ Dai hta kaga, nanhte hta e mai kaja ai amu galaw hpang ai wa gaw, Yesu Hkristu a nhtoi du ai du hkra dai hpe shatsup shatup na ra ai, ngai myit mu nga nngai. ⁷ Nye a bawng dung ai hta rai ti mung, dai kabu gara shi ga a lam awlaw nna shagrin da ai hta rai ti mung, nanhte nlang hte gaw ngai hte rau chyeju jawm hkam la ai ni rai nga myit dai majaw, nanhte mahkra a lam ngai ning rai myit nga na gaw, ging dan nga ai rai nna, nye a myit masin hta e ngai nanhte hpe sharawng nga nngai. ⁸ Kaning rai nme law, Hkristu Yesu a n-gaw nwai ai hta ngai nanhte nlang hte hpe gade wa nra la nga nngai gaw, Karai Kasang nye a sakse rai nga ai. ⁹ Dai hta kaga, nanhte lam kaga ga hpe chye ginhka lu nna, Hkristu a nhtoi hta san seng ai hte mara n rawng lu ai sha, ¹⁰ Yesu Hkristu a marang e, Karai Kasang a hpung shingkang hte mahkawn mangoi ai lam a matu rai nga ai ding hpring ai a asi hte hpring chyat lu myit ga, ¹¹ nanhte a tsaw ra ai myit gaw chye chyang ai hte myit leng ai yawng hta grau nna jat htam wa na matu ngai a hpyi nga nngai. ¹² Bai, hpu nau ni e, ngai hta byin ai lam hte gaw, dai kabu gara shi ga naw grawng wa na matu byin wa ai rai nga ai, nanhte chye nga na ngai ra nga nngai. ¹³ Dai htingnu na sin langa ting hte kaga, mahkra ni a man e, Hkristu a jaw e ngai bawng dung ai lam, dan leng wa sai: ¹⁴ dai hta kaga, ngai bawng dung ai a marang e, dai Madu hta e hpu nau ni malaw maga gaw, myit maku rawt wa ai hte, Karai Kasang a mungga hpe n hkrit n kang ai sha tsun dan na, grau nna gwi ma ai. ¹⁵ Gaja wa nkau mi gaw, manawn masham nna gasat gala ai hte Hkristu a lam hkaw dan nga ma ai; nkau mi gaw sharawng awng ai myit hte hkaw dan ma ai. ¹⁶ Ngai gaw dai kabu gara shi ga hpe maga na matu, san da ai wa rai nga nngai hpe, shanhte chye nga ma ai rai nna, tsaw ra ai myit hte hkaw dan ma ai: ¹⁷ gale mahtang gaw, san seng ai myit hte n re ai sha, nye a bawng dung ai lam hta tsin-yam tsindam naw jat ya na myit nga ma ai rai nna, zumbru zumbra re ai hte Hkristu a lam kajai gara nga ma ai. ¹⁸ Dai rai taw, kaning law? Sawt ai myit hte rai ti mung, teng man ai myit hte rai ti mung, lam shagu hta e Hkristu gaw kajai gara nga ai rai nna, dai hta e ngai kabu nga nngai. gaja wa, naw a kabu nga na nngai: ¹⁹ kaning rai nme law, nye a myit ndawt ai hte myit mada nga nngai hte maren, hpa lam hta mung ngai kaya kahpa n hkrum ai sha, shawoi na hte maren ya e pyi, hkrung ti mung, si ti mung, nden ja ai myit ting hte Hkristu gaw nye a hkum hkrang hta shagrau ai hkrum lu na hpe, ²⁰ nanhte a akyu hpyi ai hte Yesu Hkristu a Wenyi a lanawn ya ai a marang e, ndai lam mung nye a hkye hkrang la ai lam tai na re ai, ngai chye nga nngai. ²¹ Kaning rai nme law, ngai asak hkrung ai gaw Hkristu nan rai nga ai, si wa yang mung amyat rai nga ai. ²² Rai ti mung, nye a hkum hkrang hta naw hkrung nga yang, nye bungli a asi si wa yang gaw, gara mahtang lata la na ngai n chye nngai. ²³ Lam lahkawng a hpat wat e ngai rai nga nngai: lai nna Hkristu hte rau nga na, ngai ra nga nngai: dai gaw grau kaja nga ai; ²⁴ rai ti mung, ndai hkum hkrang hta ngai naw nga nga na gaw nanhte a matu mara grau akyu rai nga ai. ²⁵ Shing rai ngai myit mu nga nngai rai nna, nanhte hpang de ngai bai du lu na nngai majaw, nye a marang e nanhte a gumrawng shara Hkristu Yesu hta e grau nna jat wa lu u ga, ²⁶ ngai naw a nga nga nna, nanhte a makam masham jat wa ai hte kabu gara lam a jaw e, nanhte nlang hte rau nga nga na nngai, ngai chye nga nngai. ²⁷ Dai hta n-ga, nanhte a arawn alai gaw Hkristu a kabu gara shi ga a lam hte ging dan nga u ga: shing rai jang, ngai du nna nanhte hpe hkrum lu rai ti mung, naw tsan gang nga rai ti mung, Wenyi langai sha hte nanhte lahpran tsap nga nna, myit masin langai sha hte dai kabu gara shi ga a makam masham a lam hkying hkat nga myit dai gaw, ngai nanhte a lam na lu na nngai: ²⁸ dai hta kaga, nanhte gaw hpyen ni hpe hpa mung n hkrit n kang nga myit dai rai nna, dai gaw shanhte a matu hten byak wa na kumla rai wa ti mung, nanhte a matu mara gaw Karai Kasang kaw na hkye hkrang la na kumla rai wa sai; ²⁹ kaning rai nme law, Hkristu hta e kam sham lu na chyeju sha n rai, shi a matu mara nni nkri hkrum na chyeju hpe mung, nanhte hkam la ma nit dai; ³⁰ dai gaw moi shawng e ngai hte e mu lu nna, ya e pyi nye a lam na yu myit dai, ngai hkrum ai gasat gala ai lam hte langai sha rai nga ai. 

Hpilipi 2

¹ Dai re ai majaw, Hkristu hta e shadum shahprang na lam, tsaw ra ai myit hte shangwi shapyaw na lam, wenyi a kanawn mazum ai lam hte, n-gaw nwai nna matsan dum ai lam lama ma nga a yang gaw, ² nanhte myit hkrum mang hkrum langai sha, tsaw ra ai myit langai sha, myit masin langai sha hte myit mang langai sha e hkan nang nga myit dai hta, nye a kabu gara lam hpe shadik shatup nga mu. ³ Ga law ga la ai, kaman lila grang ai hte hpa mung n galaw ai sha, myit nem nga let, langai hte langai tinang a hkum hta manang wa hpe shagrau shaa nga mu. ⁴ Langai hte langai tinang hte seng ai sha n rai, masha gale hte seng ai hpe mung, myit yu nga mu ga. ⁵ Hkristu Yesu hta e rawng ai myit nan, nanhte hta e mung rawng nga myit ga: ⁶ shi gaw Karai Kasang a ahpraw nsam hta pra nga ti mung, Karai Kasang hte maren rai nga na shingjawng kashun ai hku n nawn ai sha, ⁷ tinang dai shagawm kau nna, mayam a ahpraw nsam dagraw let, shinggyim masha hte bung hkra tai wa sai: ⁸ shing rai, masha a gawng shing-yan lang let shi hkum hpe shi shagrit kau nna, si ai du hkra madat mara nga ai.- gaja wa, wudang hta si ai du hkra madat mara nga ai. ⁹ Dai re ai majaw, sumsing lamu lahta tang na dinghta tsang na hte katsan ga na lahput yawng mayawng hte gaw, Yesu a mying nsang hte hput di nna, ¹⁰ Yesu Hkristu gaw Madu rai nga ai, nga nna shinglet yawng mayawng hte gaw, Kawa Karai Kasang a hpung shingkang a matu mara kajai gumhkawng nga mu ga, ¹¹ Karai Kasang gaw shi hpe shagrau nna, amying shingteng yawng mayawng hta, grau ai amying nsang jaw da wu ai, rai nga ai. ¹² Dai rai nna, ngai tsaw ngai ra ai ni e, nanhte galoi mung madat mara myit dai hte maren, ngai rau nga nga yang na zawn sha n re ai sha, naw tsan gang nga yang grau nna, nanhte a hkye hkrang la ai lam hpe hkrit gari ai hte shachyen shatsup nga mu: ¹³ kaning rai nme law, galaw mayu ai myit rai ti mung, galaw lu ai lam rai ti mung, Karai Kasang gaw shi a sharawng awng ai a marang e, nanhte hta shachyen da myit dai. ¹⁴ Hpa lam hpe mung, put ngun nna ndang kalang hkat ai hte, hkum galaw mu: ¹⁵ shing rai yang mara n rawng nna yubak n kap ai sha, ndai ja la nna myit magaw ai prat a kaang e agang chyalang n re ai Karai Kasang a kashu kasha ni nanhte tai wa ai hte, ¹⁶ asak hkrung ya ai mungga hpe lang nga let, shanhte a kaang e mungkan ga a nhtoi zawn nanhte htoi tu nga na myit dai: dai hta kaga, ngai mung kaman lila n gat shingjawng ai hte, kaman lila amu bungli n galaw nngai hpe tau yu yang, Hkristu a nhtoi hta kabu gumrawng shara ngai nga na nngai. ¹⁷ Dai hta n-ga nanhte a makam masham a hkungga hte daw jau ai a ntsa e, ngai hpe dumhpung zawn ru jaw ma ti mung, ngai kabu nga nna, nanhte mahkra hte rau a kabu nga nngai. ¹⁸ Dai hte maren nanhte mung kabu nga nna, ngai hte rau a kabu nga mu. ¹⁹ Nanhte a lam chye lu yang, ngai mung myit pyaw nga lu n ga, nanhte hpang de Timohti hpe alawan shangun dat na, dai Madu Yesu hta e ngai myit mada nga nngai. ²⁰ Kaning rai nme law, ngai hte myit hkrum nna, shi zawn nanhte a lam hpe htep lahti tsang ai masha kaga, langai mi mung ngai n lu nngai. ²¹ Yawng hte gaw Hkristu Yesu hte seng ai hpe n re ai sha, tinang hte seng ai hpe sha tam nga ma ai. ²² Shi chyawm gaw, kasha gaw kawa hpe shadaw ai zawn, dai kabu gara shi ga a lam hta ngai hte rau shakut sharang nga ai majaw, shi a kangka re ai hpe nanhte chye nga myit dai. ²³ Dai rai nna ngai hta kaning rai na ra ai hpe ngai chye ai shaloi jang, dai wa hpe shangun dat na, ngai myit mada nga nngai. ²⁴ Dai hta n-ga, gade wa n na yang, ngai hkum nan sa du na, ngu nna dai Madu hta e myit kam nga nngai. ²⁵ Bai, nye a hpu nau wa, shingdep shingtau wa hte hpyen manang wa ngu ai,nanhte a kasa hte ngai ra ai hku hpajang ai wa, Epahprodi hpe, nanhte hpang de shangun dat na mai nga ai, ngai myit ngut da we ai. ²⁶ Kaning rai nme law, nanhte nlang hte hpe sa hkrum lu na, shi nachying myit ndawt nga ai hte, shi machyi ai hpe nanhte na yu hkrup myit dai majaw, shi grai wa myit ru myit tsang nga ai. ²⁷ Gaja wa shi gaw ganoi noi si hkra machyi kau nu ai; rai ti mung, Karai Kasang gaw shi hpe matsan dum nga ai; shi hpe sha n rai, ngai gaw yawn hkyen ai htap mi hte htap mi n hkrum u ga, ngai hpe mung matsan dum nga ai. ²⁸ Dai re ai majaw, nanhte shi hpe bai hkrum lu yang, nanhte kabu nga lu myit dai hte, nye a yawn hkyen ai mung yawm mat wa u ga, ngai shi hpe tin shapun shangun dat we ai. ²⁹ Dai rai nna kabu gara myit ting hte shi hpe hkap hkalum la nna, shing re ai ni hpe hkungga lara di mu. ³⁰ Kaning rai nme law, nanhte ngai hpe daw jau ai lam hta naw ngam nga ai hpe shatup shatsup lu na matu, shi a asak hpe pyi shi shanaw kau nna, dai Madu a magam bungli majaw, si ai ganoi noi hkrum nga ai. 

 

Hpilipi 3

¹ Dai hta kaga, nye a hpu nau ni e, dai Madu hta kabu gara nga mu, Nanhte hpe lam langai sha bai ka dat dat rai na, nye a matu hki ba na lam n nga ai sha, nanhte a matu akyu byin nga ai. ² Gwi ni hpe makran nga mu; n hkru n nkra ai bungli galaw ai ni hpe makran nga mu; matu gadoi hpyak ai ni hpe makran nga mu. ³ Anhte mahtang, Karai Kasang a Wenyi hte naw ku nna, Hkristu Yesu hta gumrawng nga ai hte, hkum shan hta e n shamyet n shanat ai ni gaw, matu gadoi hkam ai ni majing rai nga ga ai: ⁴ ngai chyawm gaw hkum shan hta pyi shamyet shanat na lam lu ang na nngai. Masha kaga gaw dai hkum shan hta shamyet shanat na lam lu nngai, nga nna myit a yang gaw, ngai grau nna lu ang nngai. ⁵ Ngai gaw matsat ya nhtoi e matu gadoi hkam nngai; Israela amyu, Ben-yamin a aru arat hte, Hebre masha hta na Hebre majing, rai nga nngai: ⁶ Jep ai tara tau yu yang ngai Hparishe rai nga nngai: ngai shakut sharang ai lam tau yu yang, dai Hpung hpe zingri zingrat nngai; jep ai tara na ding hpring ai lam tau yu yang, ngai mara n kap nngai. ⁷ Rai ti mung nye a amyat ngu ai yawng hte gaw, Hkristu a jaw e sum mat ai lam rai nga ai, ngai nawn nga nngai. ⁸ Gaja wa nye a Madu Hkristu Yesu a chye chyang ai lam a chyahtum chyalai re ai a jaw e, yawng mayawng sum mat ai lam a rai nga ai, ngai nawn nga nngai. ⁹ Dai hta n-ga Hkristu hpe ngai lum la lu nna, shi hta grin nga lu na hte, jep ai tara na nye a ding hpring ai n rawng ai sha, Hkristu a makam masham a marang e kam sham ai hte lu la ai Karai Kasang a ding hpring ai rawng nga let, ¹⁰ si mat ai ni a bai rawt wa na lam hta ngai mung dep lu hkra, shi hte shi a bai rawt ai lam a atsam chye lu nna, shi a nni nkri hkrum ai hta kanawn lu na hte, shi a si hkam ai hpe hkan dagraw lu u ga, ¹¹ yawng mayawng hte hpe ngai sum kau nna, shanut shanaw zawn nawn nga nngai. ¹² Shing rai tsun yang, ngai ya e pyi lu la ni ai hte, ya e pyi hkum tsup rai nga ai hpe, ngai n tsun nngai; rai ti mung, dai akyu a lam a matu Hkristu Yesu ngai hpe hkap la ni ai hte maren, dai hpe ngai nan hkap la lu u ga, gat shachyut nngai. ¹³ Hpu nau ni e, dai hpe ngai hkap la lu ni ai, ngai hkum dai n myit nngai: rai ti mung, lam langai sha ngai hkan nngai; ¹⁴ hpang maga na arai hte hpe malap kau nna, man ang ai arai ni hpe chyan la let, Hkristu Yesu hta e Karai Kasang a grau htum ai shaga la ai lam ngu ai kumhpa hpe lu la na, bandung shadaw du hkra ngai gat shachyut nngai. ¹⁵ Dai re ai majaw, hkum tsup nga ai ni anhte nlang hte gaw, dai lam myit nga ga; dai hta kaga, lam langai ngai hta nanhte shai nga myit yang gaw, Karai Kasang gaw dai hpe pyi nanhte hpe madun dan na ma rin dai: ¹⁶ rai ti mung, ya dep madep hte hte maren, dai arawn alai hta anhte hkawm nga ga. ¹⁷ Hpu nau ni e, nanhte hpawm nna nye a samnang ai ni tai nga mu; anhte gaw nanhte a ningli tai ga ai hte maren, dai zawn hkan nang ai ni hpe yu matsing nga mu. ¹⁸ Kaning rai nme law, shawng e ngai nanhte hpe law law lang tsun dan nna, ya e pyi hkrap let nanhte hpe tsun dan nga nngai hte maren, Hkristu a wudang hpe n dawng n yawt ai ni law law wa brang hkawm nga ma ai. ¹⁹ Dai ni a chyahtum ai gaw, hten byak ai rai nga ma lu ai; dai ni a Karai Kasang gaw, tinang a kan rai nga ai hte, tinang a kaya kahpa hta shanhte a gumrawng shara rai nga ma ai; dinghta ga na arai hpe hkrai shanhte myit tsang nga ma ai. ²⁰ Anhte a bu ga chyawm gaw, sumsing lamu hta e rai nga ai; dai yang na Madu Yesu Hkristu ngu ai Hkye hkrang la ai wa hpe, anhte a la nga ga ai. ²¹ Shi gaw arai yawng mayawng hpe tinang a npu e tawn da lu ai atsam shachyen nga ai hte maren, anhte a grit nga ai hkum hkrang hpe ningnan galai nna, shi a hpung shingkang rawng ai hkum hkrang hte bung hkra, shachyaw jahtap na ra ai. 

 

Hpilipi 4

¹ Dai rai nna, ngai tsaw ra ai hte sharawng awng nna, nye a kabu gara shara hte janmau rai nga ai, hpu nau ni e, dai Madu hta shing rai lahpran tsap nga mu, ngai tsaw ra ai ni e. ² Dai Madu hta e myit langai sha rai nga mu ga, Eodia hpe ngai shadut jahkat nngai, Suntuki hpe mung shadut jahkat nngai. ³ Nye a nrum ntau majing e, dai num yan hpe hkap tau la na, ngai nang hpe mung hpyi nngai; shan gaw Klemen hte, asak jahpan laika hta tinang a amying lawm ai nye a shingdep shingtau shaje ni hte, dai kabu gara shi ga hta, ngai hte rau bungli galaw ma ai. ⁴ Dai Madu hta tut nawng e kabu gara nga mu; bai ngai tsun nngai, kabu gara nga mu. ⁵ Masha yawng mayawng nanhte a sumnung ai myit hpe chye wa mu ga. Dai Madu gaw ni magang wa ra ai. ⁶ Hpa lam hta mung myit hkum ru hkum tsang myit; lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu. ⁷ Shaloi chye chyang ai nyan yawng hta grau lai ai Karai Kasang a ngwi pyaw ai gaw, nanhte a myit masin hte nanhte a myit mang ai hpe, Hkristu Yesu hta e bau sin na ra ai. ⁸ Dai hta kaga, hpu nau ni e, hpa teng man ai lam rai ti mung, hpa htuk htap re ai lam rai ti mung, hpa ding hpring ai lam rai ti mung, hpa san seng ai lam rai ti mung, hpa sharawng awng ai lam rai ti mung, hpa shaa ram ai lam rai ti mung, arawng re ai lam lama ma, shakawn kungdawn re ai lam lama rai nga yang gaw, dai lam hte hpe myit ada yu nga mu. ⁹ Ngai kaw e, nanhte sharin la nna hkap la ai hte, na yu nna mu yu ai lam hte hpe, hkan galaw nga mu: shaloi ngwi pyaw ai a npawt Karai Kasang gaw, nanhte hte rau a nga nga na ra ai. ¹⁰ Ya e mung nanhte nye a lam bai rawt tsang wa nga myit dai majaw, ngai dai Madu hta nachying kabu nga nngai; shawng e mung nanhte myit tsang myit dai rai ti mung, nanhte rai lu na n tai myit dai. ¹¹ Shing rai ngai tsun nngai gaw, kadawn nga nngai majaw, ngai tsun nngai n rai: kaning rai nme law, ngai hkrum mahkrum hta myit dik nga u ga, ngai sharin la nngai. ¹² Shagrit kau ai hpe ngai chye nngai, n taw n tsang ai hpe mung ngai chye nngai: lam shagu hte shara shagu hta hkru kat na hte kawsi hpang gara ai rai ti mung, n taw n tsang ai hte kadawn hkrum na hpe rai ti mung, ngai sharin hkrup nngai; ¹³ ngai hpe n-gun lagaw shaja ya ai wa a majaw, lam shagu hpe ngai hkam lu nngai. ¹⁴ Rai ti mung, ngai nni nkri hkrum ai hta ngai hte kanawn mazum ai gaw, nanhte mai kaja ai hku galaw ai rai nga myit dai. ¹⁵ Dai hta kaga, Hpilipi masha ni e, dai kabu gara shi ga hkaw hpang nna, Makedoni mung na pru wa yang, dai galaw jaw ai hte hkam la ai lam hta, nanhte sha n rai yang gaw, Hpung kaga langai mi mung ngai hte kanawn mazum nga ai n re ai hpe, nanhte nan chye nga myit dai: ¹⁶ ngai Htesaloni mare e nga nga yang pyi, nanhte lang lahkawng lang ngai ra ai lam a matu, shagun jaw ni ai. ¹⁷ Shing rai ngai tsun nngai gaw, kumhpaw kumhpa hpe ngai tam nngai n rai, nanhte a akyu a matu mara, law htam wa na asi hpe sha ngai tam nga nngai. ¹⁸ Ya e ngai hpa mung hkum ai hta n-ga, jan hkra lu nga nngai: manam pyaw ai bat hte Karai Kasang a matu htuk htap nna sharawng awng ram ai hkungga ngu ai, nanhte shagun dat ai, Epahprodi a lata na ngai lu la ai kumhpa majaw, ngai hpring chyat nga nngai. ¹⁹ Nye a Karai Kasang chyawm gaw, shi sut gan su nga ai hte maren, Hkristu Yesu hta e hpung shingkang hte nanhte a ra mara hte hpe jahkum shatsup na ma rin dai. ²⁰ Ya, anhte a Wa ngu ai Karai Kasang kaw, htani htana prat dingsa e, hpung shingkang a nga nga u ga law. Amen. ²¹ Hkristu Yesu hta e nga ai chyoi pra ai ni nlang hte hpe shakram dat mu. Ngai hte rau nga ai hpu nau ni gaw nanhte hpe shakram dat ma ai. ²² Chyoi pra ai ni nlang hte gaw nanhte hpe shakram dat ma ai: Kehta hkawhkam a htingnu na ni gaw grau nna shakram dat ma ai. ²³ Madu Yesu Hkristu a chyeju gaw, nanhte a wenyi hte rau a nga nga u ga law.