TITU KAW SHAGUN DAT AI LAIKA

Titu 1

¹ Karai Kasang a lata la ai ni a makam masham hte, tara hkungga lam hte seng ai, teng man ai ga a chye chyang ai hku hte maren, htani htana, asak lu la na myit mada shara chye lu hkra, ² Karai Kasang a mayam hte, Yesu Hkristu a kasa tai nga ai, ngai Pawlu gaw, makam masham lam rau sha hkan ga ai majaw, ngai Sha majing re ai, Titu hpe, ga shana dat nngai. ³ Dai htani htana asak lam, masu magaw n chye ai Karai Kasang gaw, moi chyaloi nhkoi kaw na ga ndat tawn da ti mung, shi madat da ai aten ladaw e sha, tara hkaw dan ai ga hteshapraw dan nna, ⁴ anhte a Hkye hkrang la ai Madu, Karai Kasang a hkang da ai ga hte maren, nye a lata de ap ya ni ai. Kawa Karai Kasang hte, anhte a Hkye hkrang la ai Madu Hkristu Yesu kaw na, chyeju hte ngwi pyaw ai gaw, a nga nga u ga law. ⁵ Ngai nang hpe hkang da ai hte maren, naw ra ai lam ni hpe hkan yu hpajang na hte, mare shagu hta Hpung salang dang da na matu, ngai nang hpe Kreti tsunlawng e jahti da de ai; ⁶ mara n rawng ai wa, num langai sha lu ai wa, kabring kabrawng hte gumlau gumle re ai mara shagun shara n rawng ai, kam sham ai kashu kasha lu ai wa rai yang gaw, dang da mai ai. ⁷ Kaning rai nme law, Hpung up wa gaw, Karai Kasang a kunhting wa zawn, mara n rawng ai wa, mai rai nga ai; tinang myit machyu ai wa, sindawng katawt ai wa, chyaru len ai wa, anu ajin re ai wa, n san n seng ai sut marin ai wa, n mai rai ai sha, ⁸ manam daw ra ai, mai kaja ai lam tsaw ra ai, si si re ai, ding hpring ai, chyoi pra ai, tinang hkum hkang chye ai wa hte, ⁹ masan maseng re ai sharin shaga ai lam e shadum shahprang lu na mung, nhtan shai ai ni hpe shachye shachyang lu na mung, sharin tawn da ai lam hte maren kangka re ai mungga hpe manoi manat ai wa, mai rai nga ai. ¹⁰ Kaning rai nme law, gumlau gumle re ai, kaman lila ga tsun ai hte,hkalem chye ai masha law law nga ma ai; matu gadoi lam hkan ai ni hta grau nna law ma ai; ¹¹ shanhte a n-gup mai matsut nga ai; shanhte gaw n san n seng ai sut matu n mai sharin ai lam sharin shaga ya nna, htinggaw ting ting hpe shabrun kau mu ai. ¹² Shanhte hta na, tinang a amyu myihtoi langai mi gaw, Kreti masha ni tut tut masu, matse labye n hkru, nakru lagawn bu, nga nna jahta ai. ¹³ Dai sakse teng nga ai. Dai rai nna, Yuda maumawi hpe mung, teng man ai lam hpe jahka kau ai masha ni a htet da ai ga hpe mung, n madat la ai sha, ¹⁴ dai makam masham hta san seng nga mu ga, shanhte hpe aja awa daru sharin nga u. ¹⁵ San seng ai ni a matu, yawng mayawng san seng nga ai: n sang n seng ai ni hte n kam n sham ai ni a matu chyawm gaw, hpa mung n san n seng nga ai: shanhte a myit mang hte kraw lawang gaw, n san n seng rai ma lu ai. ¹⁶ Karai Kasang hpe chye chyang ga ai, nga ma ti mung, matsat shabat re ai ni hte n madat mara ai ni rai nga nna, mai kaja ai amu yawng mayawng a matu n htuk ma ai majaw, tinang a arawn alai hte shi hpe nyet kau ma ai. 

Titu 2

¹ Nang chyawm gaw, masan maseng re ai sharin shaga ai lam hte jaw ang ai ga, a tsun nga u: ² dingla ni gaw, myit sharam chye ai, tem si re ai, myit su nna, kam sham ai, tsaw ra ai hte shakut sharang ai hta, kung hpan wa mu ga. ³ Dai hte maren gumgai ni mung, hkungga lara ai lailen madun mai ai hte, shi wawn n htawn ai, chyaru n len ai, mai kaja ai lam sharin achyin chye nna, ⁴ Karai Kasang a mungga gaw shatan nhkan n hkrum u ga, hpawmi ni hpe, tinang madu wa hte tinang kashu kasha ni hpe tsaw ra ai, ⁵ shingdi ai, sari sadang rawng ai, kun dinghku shading chye ai, mai kaja ai myit madun nna, tinang madu wa hkang ai hku hkan ai ni rai lu na matu, len shalet chye ai gumgai ni rai nga mu ga. ⁶ Dai hta maren shabrang ni mung si si rai nga mu ga, shadum shahprang nga u; ⁷ lam shagu hta kaja reng ai magam bungli a ningli nang hkum nan madun dan u: ⁸ nhtan shai ai wa gaw kaya hkrum nna, anhte a lam hpa mara n shagun lu u ga, na a sharin shaga ai lam hta, n sun n ang ai ga n nang ai, si si re ai hte kadai ndang shara n rawng ai, san seng ai mungga madun dan u. ⁹ Mayam ni gaw, anhte a hkye hkrang la ai Madu Karai Kasang a sharin shaga mungga hpe, lam magup hta mawn sumli nga lu na matu, lam shagu hta tinang ni a madu npu e taw nga nna, shanhte kaw myi man pa lu hkra ga nhkap n tsun ai hte, ¹⁰ masun la ai hku n hkan ai sha, lam yawng mayawng hta kaja reng ai kangka re ai myit madun dan nga mu ga, shanhte hpe shadum shahrpang nga u. ¹¹ Kaning rai nme law, a rawng ai myit mada ai lam ngu ai, galu kaba htum ai Karai Kasang hte anhte a hkye hkrang la ai MaduHkristu Yesu a hpung shingkang a dan pru na lam a la nga let; ¹² tara n hkungga ai myit hte mungkan ga hpe marin marit ai lam koi kau nhtawm, ndai prat e si si re ai hte ding hpring nna tara hkungga ai lam hkan nang lu hkra, ¹³ anhte hpe sharin ya na matu, Karai Kasang a chyeju gaw dan pru wa sai rai nna, masha yawng hpe hkye hkrang la ai lam hpaw wa sai: ¹⁴ dai Hkristu Yesu gaw, tara tawt lai ai mara yawng hta na anhte hpe hkrang shaw la nna, shi hkum nan a matu, san da ai hte kaja reng ai magam bungli shagu hkan shachyut ai amyu hpe jasan jaseng lu hkra, anhte a matu mara shi hkum dai hpe, ap ya kau nu ai. ¹⁵ Ndai lam ni hpe ahkang aya hkum hkum hte tsun dan u, shadum shahprang nna daru sharin nga u: kadai mung nang hpe n gawn n sawn n rai mu ga. 

 

Titu 3

¹ Ahkang aya lu ai du ni a npu e taw nga nna, madat mara nga na hte, kaja reng ai magam bungli shagu a matu chyip chyip rai nga let, ² kadai hpe mung n shatan ai hte, ga law lam n tam ai sha, myit ngwi myit pyaw rawng nna, masha yawng hte hpe lam shagu hta sumnung ai myit madun dan mu ga, shanhte hpe shadum shahprang nga u. ³ Kaning rai nme law, anhte mung shawng de gaw myit ngawk ai, n madat n mara ai, lam dam nna, ngang kayut ai hte pyaw daw kadaw ai lam amyu myu hkan galaw yu ai ni, n hkru n hkra ai hte manawn masham hta hkan len nga let, matsat shabat re ai ni, manang shada da n dawng n yawt re ai ni, rai nga ga ai. ⁴ Rai ti mung, anhte a Hkye hkrang la ai Madu Karai Kasang a chyeju hte n-gaw nwai myit dan pru wa ai shaloi e, ⁵ anhte hkum nan galaw ai ding hpring ai magam bungli a majaw n re ai sha, shi a matsan dum ai chyeju majaw she, bai shangai lam hte seng ai kashin kamun kau ya ai hte, anhte a Hkye hkrang la ai Madu Yesu Hkristu a marang e, ⁶ anhte a ntsa e n taw n tsang ru bun ya ai Chyoi pra ai Wenyi e myit ningnan galai ya ai hte e, shi anhte hpe hkye hkrang la mi ai: ⁷ dai rai nna, shi a chyeju hte ding hpring ai hkrum lu ga ai majaw, htani htana asak lu la na lam myit mada nga ai hte maren, anhte sali wunli hkam la ai ni rai na ga ai. ⁸ Ndai ga gaw kangka re ai ga rai nga ai rai nna, Karai Kasang hpe kam sham ai ni gaw, kaja reng ai magam bungli a shachyen nga na myit dum nga mu ga, ndai lam ni hpe nang grai ngu tsun shangang ya na, ngai ra nga nngai. Dai lam ni gaw masha a matu mai kaja nga ai rai nna akyu rawng nga ai: ⁹ angawk angak nga nna san ai ndang kalang ga hpe mung, ahtik labau gawn ai lam hpe mung, jep ai tara a majaw ga law ga la nga nna gasat ningjet re ai lam hpe mung, koi kau u: kaning rai nme law, dai lam ni gaw akyu n rawng ai hte kaman lila sha rai nga ai. ¹⁰ Sharin shaga ai lam hte nhtan shai ai wa hpe langai lahkawng lang shadum shahprang ngut jang, jahka kau u; ¹¹ shing re ai wa gaw, tinang dai tinang hkum hpe daw dan kau ngut nna, myit byak ai hte yubak galaw ai wa rai nga ai, chye dum u. ¹² Ngai Artima hpe, shing n rai Tuhkiku hpe, nang kaw shangun dat yang, Nikopoli mare de ngai hpe sa tau na, tin tin rai u: dai mare e nshung ta shalai na, ngu nna ngai myit da we ai. ¹³ Bawmung wa Zena yan Apolo hta lam jarit hpa mung n kadawn ma lu ga, shan hpe hkum hkum di nna shabawn dat u. ¹⁴ Anhte a masha ni mung asi kata ai ni n rai mu ga, lang ra ai lam hta lang lu hkra, mai kaja ai amu shachyen chye na sharin la mu ga. ¹⁵ Ngai hte rau nga ai ni nlang hte gaw, nang hpe shakram dat ma ai: kam sham ai lam hta anthe hpe tsaw ra ai ni hpe shakram ya mi.Chyeju gaw nanhte mahkra hte rau a nga nga u ga law.