PETRU A SHAGUN DAT AI LAIKA LANGAI

1 Petru 1

¹ Yesu Hkristu a kasa, ngai Petru gaw, Wa Karai Kasang a moi na chye chyang ai a majaw, dai Wenyi a shachyoi shapra ai hta, madat mara nna, Yesu Hkristu a sai hte lapri ai chyeju hkam la lu na, ² Puntu, Galati, Kapadoki, Asi hte Behtuni mung hkan e bra mat ai ni hte rau, lata la ai shingbyi nga ai ni hpe, ga shana dat nngai: chyeju hte ngwi pyaw ai gaw nanhte hta law htam wa ma lit ga law. ³ Anhte a Madu Yesu Hkristu a Kawa Karai Kasang gaw a nga u ga: si mat ai ni kaw na Yesu Hkristu a bai hkrung rawt wa ai a marang e, a hkrung nga ai myit mada shara hte, ⁴ n run n hten ai, awu asin n re ai, n wai n mat ai sali wunli hpe hkam la lu na matu, shi a galu kaba ai chyeju majaw, shi anhte hpe bai shangai mi ai: ⁵ hpang jahtum ai nhtoi e dan pru u ga, nga nna lajang da sai hkye hkrang la ai chyeju hpe hkam la lu na hte, kam sham ai myit marang e, Karai Kasang a n-gun lagaw hte makawp maga hkrum nga ai, nanhte a matu mara, dai sali wunli gaw, sumsing lamu hta e kyem da nga ai. ⁶ Nanhte a jet ai kam sham myit gaw, wan hta e chyam yu ai hkrum nhtawm, hten mat chye ai aja hte grau hpu ai rai nna, Yesu Hkristu a dan pru ai nhtoi hta e, dai gaw, shakawn kungdawn ai, hpung shingkang hte arawng sadang rawng ai arai tai wa u ga, ⁷ ya chyahkring chyahkra e gung lau amyu myu hte nanhte yawn hkyen hkrum nga myit ti mung, dai hkye hkrang la ai
lam a gawp e, nanhte grai kabu gara nga lu myit dai. ⁸ Dai Yesu hpe nanhte n mu yu ti mung, tsaw ra nga ma nit dai; shi hpe garai n mada mu mu ti mung, shi hpe kam sham nga ai a gawp e, ndang tsun hkra dan hkung ai kabu gara ai hte nanhte kabu gara nga myit dai rai nna, ⁹ myit masin hpe hkye hkrang la lu ai, ngu ai, kam sham ai a akyu hpe hkam la lu ma nu ai. ¹⁰ Dai nanhte kaw dep lu ai akyu ara lam hpe, myihtoi ga htawn tsun ai myihtoi ni mung, dai hkye hkrang la ai lam hpe azin ayang tam nna sawk yu ma nu ai: ¹¹ Hkristu gaw nni nkri hkrum na hte dai hpang e hpung shingkang lu la na, nga nna shanhte hta e rawng nga ai Hkristu a Wenyi gaw, shawng e sakse hkam nga ai shaloi, gara aprat hte kaning re ai aten hta me, dai hte byin na ra ai kun, shanhte sawk yu nga ma ai. ¹² Kaning rai nme law, ndai shanhte daw ai amu hte gaw, tinang a matu n re ai sha, nanhte a matu rai nga ai hte, sumsing lamu de na shangun dat ai Chyoi pra ai Wenyi a ahkang hte, kabu gara ai shi ga, nanhte hpe hkaw dan ai ni, ya nanhte hpe gawn dan lu na amu rai nga ai gaw, shanhte hpe mung madun dan ma nu ai: dai amu hte hta lamu kasa ni mung, azi yu mayu nga ma ai. ¹³ Dai re ai majaw, nanhte a myit kraw lawang a nshang hta shingkyit kyit nna, htauli htaula hta grin nga let, Yesu Hkristu dan pru wa ai shaloi e, nanhte hpang de la sa na ra ai chyeju hpe, myit mada nga mu. ¹⁴ Nanhte mung madat mara ai ma zawn rai nga let, nanhte garai n chye ai aten na shawng na myit marin kau ai hte hpe ya n hkan dagraw ai sha, ¹⁵ nanhte hpe shaga la ai wa gaw chyoi pra nga ai hte maren, nanhte mung arawn alai shagu hta chyoi pra nga mu: ¹⁶ kaning rai nme law, Ngai chyoi pra nga nnai majaw, nanhte mung chyoi pra nga myit ga, nga nna ka da nu ai. ¹⁷ Dai hta kaga, myi man n tau yu ai sha, langai hte langai a amu hte maren daw dan nga ai Kawa hpe nan, nanhte hpyi shaga myit yang gaw, nanhte manam tai hkawm nga ai aten hte yang, hkrit kamyin ai hte hkan shatup nga mu. ¹⁸ Kaning rai nme law, ji wa ni kaw nna hkan dagraw nga ai nanhte a n se ai arawn alai hta na, hten mat chye ai aja gumhpraw hte nanhte hpe galai hkrang la lu na n rai; ¹⁹ ana n kap ai, ra n rawng ai Hkristu ngu ai sagu kasha a hpu la ai asai hte sha, galai hkrang la lu na myit dai; ²⁰ ginding aga garai n lat kaw nna, shi hpe chye tau wu ti mung, si ai ni kaw na shi hpe hkrung sharawt la wu ai hte, shi hpe hpung shingkang jaw ai Karai Kasang hpe, ²¹ shi a marang e kam sham ai ni, nanhte a matu mara, ndai hpang jahtum ai aten e dan hkung pru wa sai: shing rai, nanhte a makam masham hte myit mada shara gaw, Karai Kasang hta jung nga na ra ai. ²² Dai ding man ai ga hpe madat mara nga let, nanhte kahpu kanau ni hpe gaja wa teng teng, tsaw ra lu ai du hkra, nanhte a myit masin hpe san seng kau lu myit dai majaw, nanhte a myit ting hte shada da tsaw ra nga mu; ²³ nanhte gaw hten mat chye ai nli hta na n rai, hten mat n chye ai, Karai Kasang a hkrung na ai hte a nga nga ai mungga nli hta, bai shangai wa lu ma nit dai. ²⁴ Kaning rai nme law, Ashan yawng gaw tsingdu zawn rai nga ai, Dai ni a hpung shingkang ting, tsingdu a apu zawn rai nga ai; Dai tsingdu gaw nyawi mat wa ai rai nna, Apu ni mung, run hkrat mat wa ma ai. ²⁵ Dai Madu a matsun chyawm gaw, prat mi hte prat mi a nga nga ai. Dai gaw, nanhte hpe hkaw tsun dan ai kabu gara ai matsun rai nga ai. 

1 Petru 2

¹ Dai re ai majaw, dai Madu gaw n gaw nnyeng rai nga ai hpe, nanhte chyim yu ma nu yang gaw, ² n hkru n hkra, hkalem hkalam, sawt masawt, manawn masham hte nsu nnawn ai baw law ai ga nlang hte hpe kau da nhtawm, ³ ma chyangai zawn dai hkye hkrang la ai chyeju hta kaba wa lu myit ga, kung hpan ai hte jet ai chyu hpe, myit marin nga mu. ⁴ Dai Madu hpang de nanhte sit sa wa nna, shi gaw a hkrung nga ai nlung rai nga ai: masha ni dai hpe sai kau mu ti mung, Karai Kasang a man e lata la ai hte hpu la ai nlung shi rai nga ai. ⁵ Nanhte mung a hkrung nga ai nlung hte zawn, wenyi hte seng ai nta hpe de nga ma nit dai rai nna, Yesu Hkristu a marang e, sharawng awng wa nna, wenyi hte seng ai hkungga Karai Kasang hpe jaw lu na matu, chyoi pra ai hkinjawng amyu tai wa ma nit dai. ⁶ Kaning rai nme law, Yu mu, lata la ai hte hpu la ai jut na nlung gaw, Ziun hta e ngai gaw da se ai rai nna, Dai hpe kam sham ai wa gaw, kaya kahpa n hkrum na ra ai, nga nna laika hta rawng nga ai. ⁷ Dai re ai majaw, nanhte kam sham ai ni a matu mara, dai gaw arawng rai nga ma lit dai; rai ti mung, n kam sham ai ni a matu mara, Wahpang gaw ai ni sai kau ai nlung gaw, Ningjut jahtum nlung tai sai rai nna, ⁸ Ahtu kataw shara hte myit kataw shangun na lunghkrung mung tai wa sai. N madat n mara nga ma ai majaw, dai mungga hta shanhte kataw wa ma sai: shing rai hkrum mu ga mung, shanhte hpe san da ngut sai rai. ⁹ Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a dan hkung ai magam hpe shabrawng dat ya myit ga, lata la ai amyu, hkawhkam hkinjawng ni, chyoi pra ai amyu baw hte, Karai Kasang lahku la ang ai masha ni, rai gna myit dai. ¹⁰ Nanhte mung, shawng e amyu rai nga myit dai n rai, ya chyawm gaw, Karai Kasang a amyu rai wa ma nit dai; shawng e chyeju hkam la ma nit dai n rai, ya chyawm gaw, chyeju hkam la lu ma nit dai. ¹¹ Ngai tsaw ra ai ni e, myit masin hte gasat hkat nga ai hkum shan kayut la nga ai baw hpe koi kau myit ga, ga ningtsa e shingbyi nga ai ni hte, bu hkawm manam zawn rai nga ai ni nanhte hpe, ngai nem da ma de ai: ¹² tara maigan de na ni, nanhte hpe baw law nna n kaja ai hku shatu ma yang, nanhte a kaja ai amu mu la nna, dai daw dan ai nhtoi hta e Karai Kasang hpe shagrau lu mu ga, shanhte a man e nanhte a arawn alai tsup nga lu u ga law. ¹³ Dai Madu a marang e, masha hta na san tawn da ai aya shagu a npu e, a taw nga mu; ¹⁴ tsaw htum nga ai hkawhkam a npu e rai ti mung, n hkru ai ni hpe daw dan na hte, kaja ai amu galaw ai ni hpe awlaw na matu mara, shi san dat ai munggyi ni a npu e rai ti mung, a taw nga mu: ¹⁵ kaning rai nme law, kaja ai bungli shachyen let, myit n gring ai ni a n chye n chyang ai ga hpe nanhte jasim lu na gaw, Karai Kasang myit da ai hku rai nga ai. ¹⁶ Nanhte shanglawt rai myit ti mung, n kaja ai amu hpe shinggang kau na matu,nanhte a lawt ai akyu hpe hkum lang myit: Karai Kasang a shangun ma ni zawn, shanglawt tai nga mu. ¹⁷ Nlang hte hpe hkungga lara di mu; kahpu kanau ni hpe tsaw ra nga mu. Karai Kasang hpe hkrit kamyin nga mu; hkawhkam wa hpe hkungga lara di mu. ¹⁸ Shangun ma ni e, nanhte a madu ni a npu e, hkrit kamyin ai myit hte a taw nga mu; kaja ai ni hte myit ngwi ai ni a npu e sha n rai, kajet kaje re ai ni a npu e mung, a taw nga mu. ¹⁹ Kaning rai nme law, marai langai ngai Karai Kasang hpe naw ku nu ai majaw, mara n rawng ti mung, nni nkri hkrum nna, yawn hkyen hkrum let shakut sharang nga a yang gaw, dai hta akyu lawm nga lu ai. ²⁰ Nanhte yubak galaw ninglen, htwi ai bye ai hkrum sha nna, machyi sharang nga myit yang gaw, hpa arawng lu la myit ta? Kaja ai amu galaw ninglen, nni nkri hkrum sha ai hte machyi sharang nga myit yang gaw, dai gaw Karai Kasang a man e akyu rai nga ai. ²¹ Dai lam gaw nanhte hpe shaga da ai lam rai nga ai; Hkristu mung nanhte a matu mara nni nkri hkrum wu ai hte, nanhte shi a hkang hta hkan nang lu myit ga, nanhte a matu ningli tawn da nu ai. ²² Shi gaw yubak galaw yu ai n rai; shi a n-gup hta na hkalem ai ga mung n mu hkrup ai. ²³ Shi aroi arip hkrum yang, bai roi htang ai n rai; nni nkri hkrum yang, ahkrim nga ai n re ai sha, ding man ai hku daw dan ai wa a lata hta e, shi a hkum hpe ap da nu ai. ²⁴ Anhte gaw yubak mara hta si mat wa nga ga ai rai nna, ding hpring ai hta e hkrung nga lu u ga, shi gaw, shi hkum hta nan, dai hpun ntsa e, anhte a yubak mara hpe gun kau nu ai: shi a nma a gawp hte e, anhte shamai shatsai ai hkrum ga ai. ²⁵ Kaning rai nme law, nanhte nlang sagu zawn lam dam mat myit ti mung, ya gaw, dai Sagu rem wa hte nanhte a myit masin a Hpung up wa hpang de, nhtang wa ma nit dai. 

1 Petru 3

¹ Dai hte maren, numsha ni e, tinang a madu wa a hkang ai hku hkan nga mu: shanhte hta na langai ngai dai mungga hpe n madat ma ti mung, nanhte hkrit kamyin ai myit hte hkan nga ai chyoi pra ai arawn alai mada mu ma yang gaw, ² ga nlawm ti mung, madu jan a arawn alai majaw, shanhte hpe lau lu na rai nga ai. ³ Nanhte a mawn sumli ai gaw, kara lajang ai, aja gumhpraw hte sumli ai, hpun palawng shareng let hkum jahtap nga ai hku n rai; ⁴ Karai Kasang a man e hpu ging ai, myit masin hta makoi nga ai masha ngu ai, hten byak n chye ai, a mu sha hte sumnung nga ai wenyi a lam hta, mawn sumli nga mu. ⁵ Moi shawng na Karai Kasang hpe myit mada nga ai, chyoi pra ai num ni mung, tinang a hkum hpe shing rai jahtap mu ai rai nna; ⁶ Sara gaw Abraham hpe madat mara wu ai majaw, shi hpe Madu ngu wu ai hte maren, tinang a madu wa ni a hkang ai hku hpe hkan nga ma ai: kaja ai amu galaw nna, hpa hkrit shara hta mung, n hkrit n kang nga myit yang gaw, nanhte mung Sara a shayi sha ni rai nga myit dai. ⁷ Dai hte maren, lasha ni e, chye chyang ai hku hkan nna, n-gun kya ai hkum hkrang ngu ai numsha hte rau kanawn mazum nga mu: nanhte a akyu hpyi ai ga gang kau ya ai n hkrum myit ga, nanhte hte maren asak a sali wunli akyu lu la na ni hpe zawn, shanhte hpe hkungga lara di mu. ⁸ Dai hta n-ga, nanhte nlang shada da myit hkrum nna, myit yu machyi ai,hpu nau shada da tsaw ra nna, matsan dum ai hte myit gyip ai; ⁹ n hkru ai a matu n hkru ai bai n tai na hte, roi rip ai a matu roi rip ai bai n tai ai sha, shaman ya na mahtang gaw, a daw nga mu; kaning rai nme law, shaman ya da sai sali wunli hpe hkam la lu myit ga, nanhte hpe shaga da ma nit dai. ¹⁰ Dai rai nna, Asak hkrung ai tsaw ra nga ai hte, Nhtoi kaja mu mayu ai wa kadai mung, Shi a shinglet hpe n hkru ai kaw na, Shi a nten hkalem ga kaw na, jahka la u ga, ¹¹ N hkru ai hpe koi kau nhtawm, kaja ai galaw nga u ga, Ngwi pyaw ai hpe tam nna, hkan sa nga u ga. ¹² Kaning rai nme law, dai Madu a myi, ding hpring ai ni hpe a yu nga ai rai nna, Shanhte a hpyi ai ga hpe, shi a na madat nga ai. Dai Madu a myi man chyawm gaw, n hkru ai amu galaw ai ni hpe matsing nga ai. ¹³ Nanhte kaja ai lam hta htep lahti rai nga myit yang gaw, nanhte hpe sharu shatsang lu na, kadai wa rai nga a ta? ¹⁴ Dai rai nna, ding hpring ai lam a majaw, nanhte nni nkri hkrum myit yang gaw, nanhte a lu nga myit dai; shanhte a jahkrit ai hpe mung, hkum hkrit nga myit; de a majaw sha pyi hkum ung-ang nga myit; ¹⁵ dai Madu hpe madu a shatai nga na matu, nanhte a myit masin hta e Hkristu hpe san da nga mu: nanhte hta rawng ai myit mada nga ai lam, kadai rai ti mung nanhte hpe ga san dam ma yang gaw, ga lachyum tsun dan lu na matu, tut e a jin nga mu; rai ti mung, dai hpe sumnung ai hte hkrit kamyin ai myit hte, a galaw nga mu: ¹⁶ shing rai, nanhte myit nsam kaja rawng myit yang gaw, Hkristu hta lakap nna, nanhte hkan ai arawn alai a majaw, nanhte hpe ndang hkat nga ai hte aroi arip nga ai ni, kaya kahpa hkrum mat mu ga. ¹⁷ Dai rai nna, Karai Kasang dai hku hkraw nga a yang gaw, n kaja ai amu galaw nna nni nkri hkrum nga ai hta, kaja ai amu galaw ninglen nni nkri hkrum ai gaw, grau nna kaja nga ai. ¹⁸ Kaning rai nme law, Hkristu mung yubak a majaw kalang sha mi si hkam nu ai; Karai Kasang hpang de anhte hpe woi wa lu hkra, ding hpring ai wa gaw, n ding n hpring ai ni a matu mara si hkam ai hte, dai hkum tsawp nan si mat ti mung, dai wenyi hta a hkrung nga ai: ¹⁹ dai wenyi hte nan pru wa yang, dai htawng hta e rawng nga ai tsu ni hpe shi wa hkaw dan mu ai; ²⁰ dai ni gaw, moi shawng na Noa lakhtak e, Karai Kasang a matsan dum ai myit ala nga ti mung, masha law ma ai n rai, marai matsat sha, hka hta na sai la jahkrum ai shanghpaw li hpe shachyaw da nga ai shaloi e, n madat mara re ai ni hpe nan, rai nga ma ai. ²¹ Dai hka hta na zawn, ya e baptizma ngu ai kumla gaw, nanhte hpe hkye hkrang la lu nga ai; dai gaw, hkum shan hta e kap ai matsat shabat hpe sharun kau na lam n rai; Yesu Hkristu a bai hkrung rawt wa ai a marang e, Karai Kasang a man e san seng ai myit nsam tam san ai lam rai nga ai. ²² Yesu Hkristu mahtang gaw, sumsing lamu de lung shang mat wa nhtawm, Karai Kasang a hkra maga de a nga nga ai rai nna, lamu kasa ni, ahkang aya lu ai ni hte, hpung dagu rawng ai ni gaw, shi a npu e daw nga ma ai. 

1 Petru 4

¹ Shing rai, Hkristu gaw dai hkum shan hta nni nkri hkrum nu ai rai nna, dai hkum shan hta nni nkri hkrum ai wa gaw; yubak hte hka mat lu ai majaw. ² ndai hkum tsawp hta e naw a hkrung nga ai aprat e, masha a myit marin ai hku n hkan ai sha, Karai Kasang a myit hpe hkan nang lu myit ga. nanhte mung dai myit hpe nan, hpyen palawng zawn a hpun da nga mu. ³ Kaning rai nme law, tara matgan ni a bawng hkut ai lam hpe shadik lawm nna, myit mak ai, ngang kayut ai, tsabyi lu lai ai, tangpyaw shalai ai, lu sha marim ai hte arawng n nga ai sumla naw ku na lam hta hkawm sa ai gaw, ya lai wa ai aprat hte ram la sai. ⁴ Nanhte gaw shawng na ladu nan ahkut ai matsat shabat lam hta e, shanhte rau n gat nang lawm ma nit dai majaw, nanhte hpe shatan nhkan let, a mau nga ma ai; ⁵ rai ti mung, a hkrung nga ai ni hte si mat ai ni hpe daw dan na jin jin rai nga ai wa a man e, shanhte nan lala, jahpan gawn dan na ma ru ai. ⁶ Kaning rai nme law, hkum tsawp lu ai shinggyim masha ni zawn, daw dan na hkrum ma ti mung, Karai Kasang a gawp e wenyi hta hkrung nga lu na matu mara, dai kabu gara ai shi ga si mat ai ni hpe mung, hkaw dan da mu ai. ⁷ Arai yawng mayawng htum mat na aten ni magang wa ra ai. Dai re ai majaw, nanhte myit su rai nga nna, akyu hpyi na matu htauli htaula rai nga mu. ⁸ Mahkra, hta n-ga, nanhte shada da tsaw ra ai myit makyit rawng nga mu; kaning rai nme law, tsaw ra ai myit gaw, yubak mara law law hpe magap da lu ai. ⁹ Aput apai n nga ai sha, nanhte shada da manam daw ai lam a daw nga mu. ¹⁰ Langai hte langai chyeju kumhpa lu la ai hte maren, Karai Kasang a chyeju amyu myu hpe, kaja ai hpajau wa jau ai zawn, nanhte shada da dai hpe jau hkat nga mu. ¹¹ Yesu Hkristu a marang e, lam shagu hta e, Karai Kasang gaw shagrau shatsaw ai hkrum wa u ga, marai langai ngai ga tsun nga a yang gaw, Karai Kasang a mungga hte maren tsun nga u ga; langai ngai galaw daw nga a yang gaw, Karai Kasang jaw da ai n-gun lagaw hte maren, galaw daw nga u ga, Yesu Hkristu nan, hpung shingkang hte n-gawn tawa hpung dagu, htani htana prat dingsa e a nga nga ai law. Amen. ¹² Tsaw ra ai ni e, nanhte hpe chyam yu na matu, nanhte a kata e du bang ai wan dinglik gaw, mauhpa amu zawn nanhte hta byin nga ai, nga nna hkum nawn nga myit: ¹³ Hkristu gaw shi a hpung shingkang hta paw pru ai shaloi, kabu gara ai kaba hte nanhte kabu gara wa lu myit ga, shi a nni nkri hkrum ai lam hta, nanhte mung lawm lu myit dai majaw, kabu gara nga mu. ¹⁴ Hkristu a amying nsang a majaw, nanhte asawng asang hkrum nga myit yang gaw, nanhte a lu myit dai; kaning rai nme law, hpung shingkang a Wenyi hte Karai Kasang a Wenyi gaw, nanhte a ntsa e a wam nga ai. ¹⁵ Dai hta kaga, masha hpe sat ai wa, lagu lagut, n hkru n hkra galaw ai wa hte, masha amu hpe hkan kajam ai wa zawn, nanhte hta na kadai mung, nni nkri n hkrum u ga; ¹⁶ rai ti mung, Hkristu sape rai nga ai majaw nni nkri hkrum a yang gaw, shi kaya kahpa n dum ai sha, dai amying nsang hta e, Karai Kasang hpe shagrau shatsaw nga u ga. ¹⁷ Kaning rai nme law, Karai Kasang a nta na ni hpe tara dara hpang na aten du ra ai: dai gaw anhte a ntsa e shawng ang pru wa yang gaw, Karai Kasang a kabu gara shi ga hpe n madat mara ai ni a jahtum ai gaw, kaning rai na ra ai kun? ¹⁸ Ding man ai wa gaw, hkye hkrang la ai kaw, du yak la nga ai teng yang gaw, tara n hkungga ai hte yubak kap ai wa gaw, kanang ang bang wa na ra ta? ¹⁹ Dai rai nna, Karai Kasang a myit da ai hku hte maren nni nkri hkrum ai ni gaw, kaja ai amu bungli galaw nga let, sadi sahka nga ai Hpan wa Ningsang a lata hta e, tinang a myit masin hpe ap bang ya mu ga. 

1 Petru 5

¹ Dai re ai majaw, Hkrsitu a nni nkri hkrum ai lam hta sakse tai nga ai hte, paw pru magang ra ai hpung shingkang hta hkambum lu ai nanhte a kanawn salang, ngai gaw, nanhte hta lawm ai Hpung salang ni hpe shadum shahprang dat ma we ga; ² nanhte hte rau rai nga ai Karai Kasang a sagu hpung hpe a rem nga mu; adip ahkrip re ai hku zawn n nawn ai sha, dingsa myit hte galaw nga mu; n san n seng ai amyat majaw n re ai sha, htauli htaula myit hte galaw mu; ³ dai hpung hpe madu mayu ai myit hte n re ai sha, dai hpung hta lawm ai ni a man e ningli npawt tai nga myit ga. ⁴ Shing rai yang gaw, dai Hpung rem agyi wa dan pru ai shaloi e, nanhte gaw n wai n mat ai arawng sadang a janmau hpe, lu la na mu ai. ⁵ Dai hte maren, brang ram ni e, salang ni a npu e a taw nga mu. Dai hta n-ga, nanhte nlang shada da daw nga myit ga, myit gyip ngu ai hpajet hpe kyit nga mu: kaning rai nme law, Karai Kasang gaw gumrawng ai ni hpe shadang da ti mung, myit gyip ai ni hpe chyeju jaw mu ai law. ⁶ Dai rai nna, Karai Kasang gaw ram ging ai aten e, nanhte hpe shagrau shatsaw dat myit ga, shi a n-gun rawng ai lata npu e, tinang dai myit a nem nga mu: ⁷ shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu. ⁸ Nanhte htauli htaula rai nga mu; a maja nga mu: nanhte a gumlau wa ngu ai. Nat gaw, kadai wa hpe mahtang mayu kau lu na, nga nna shabam ai hkanghkyi zawn, ningwan kahkrang hkawm nga ai. ⁹ Mungkan ga e nga ai nanhte a nhpu nnau ni mung, dai zawn re ai nni nkri hkrum nga ai hpe nanhte chyelu nna, kam sham ai myit hte dai Nat hpe dakring dakan di a hkap nga mu, ¹⁰ Nanhte mahtang chyahkring chyahkra nni nkri hkrum ai hpang, Hkristu hta e htani htana nga ai hpung shingkang a matu, nanhte hpe shaga la da ai, chyeju hkum hkum rawng ai Karai Kasang gaw, shi hkum nan, nanhte hpe shakup shatsup na, shangang shakang na hte n-gun sharawng na ma rin dai. ¹¹ Shi kaw htani htana e, n-gawn tawa hpung dagu a nga nga u ga law. Amen. ¹² Shing rai, dai lam gaw, Karai Kasang a chyeju lam teng teng rai nga ai hpe, shadum shahprang nna sakse hkam ya na matu, ngai nawn nga nngai hte maren, sadi sahka re ai Silwanu ngu ai hpu nau a lata hte, ndai ga gadun ngai nanhte hpe ka ya dat nngai; ndai chyeju hta e mung nanhte a nga nga myit dai. ¹³ Babelon mare hte e nga ai, nanhte hte rau lata la ai Hpung gaw, nanhte hpe shakram dat ga ai. Ngai sha Marku mung, nanhte hpe shakram dat nga ai. ¹⁴ Nanhte shada da tsaw ra ai pup ai hte a shakram nga mu. Hkristu hta e lawm ai ni nlang hte kaw, ngwi pyaw nga myit ga law.