PETRU A SHAGUN DAT AI LAIKA LAHKAWNG

2 Petru 1

¹ Yesu Hkristu a mayam hte, kasa tai nga ai, ngai Simun Petru gaw, anhte a Karai Kasang hte, Hkye Hkrang la ai Madu Yesu Hkristu a ding hpring ai lam hta, anhte zawn hpu la ai makam masham lu la nga ai ni hpe, ga shana dat nngai. ² Karai Kasang hte anhte a Madu Yesu hpe chye chyang ai lam hta, chyeju hte ngwi pyaw ai gaw, nanhte hta e law htam wa ma lit ga law. ³ Hpung shingkang hte arawng sadang e anhte hpe shaga la ai wa a chye chyang lu ai nyan a gawp e, shi a Karai Wa atsam gaw, asak hkrung nga ai hte tara hkungga ai lam hta seng maseng hte anhte hpe jaw da mi ai rai nna, ⁴ nanhte gaw mungkan ga a myit marin ai hten bya ai lam na lawt lu wa let, Karai Wa a myit marai hpe dagraw la lu myit ga, arawng lu ai hte galu kaba la ai ga ndat ni, shi anhte hpe jaw dat mi ai. ⁵ Dai re ai majaw, nanhte mung, tin tin larau ladau rai nga let, nanhte a kam sham ai myit hta san seng ai marai a shajat nga mu; san seng ai marai hta chye chyang ai; ⁶ chye chyang ai hta koi gam ai, koi gam ai hta shakut sharang ai, shakut sharang ai hta tara hkungga ai, ⁷ tara hkungga ai hta hpu nau hpe tsaw ra ai, hpu nau hpe tsaw ra ai hta, n-gaw nwai ai myit, a shajat nga mu. ⁸ Kaning rai nme law, dai hte gaw nanhte hta e rawng nga nna, law htam wa myit yang gaw, anhte a Madu Yesu Hkristu a chye chyang ai lam hta,nanhte kaman lila rai nga ai hte asi n si lu na myit dai, n rai. ⁹ Dai hte hpe kata nga ai wa chyawm gaw, myi hten ai hte myi pat kau ai masha rai nga ai rai nna, shi a moi na yubak dingsa hpe jasan jaseng kau ai lam nan, malap mali di kau nu ai. ¹⁰ Dai re ai majaw hpu nau ni e, nanhte hpe shaga da ai hte lata la ai chyeju hpe shangang shahkang
rai lu u ga, larau ladau rai nga mu: dai hku galaw nga myit yang gaw, nanhte galoi mung kataw katan rai wa na myit dai n rai: ¹¹ dai lam hkan nga myit taw gaw, anhte a Madu hte Hkye Hkrang la ai wa Yesu Hkristu a htani htana prat dingsa na mungdan de shang wa lu na lam, nanhte hpe n taw n tsang di ya na ma rin dai. ¹² Dai rai nna, nanhte dai hte hpe chye nga ai hte, ya rau rai nga ai teng man ai ga hta a grin nga myit ti mung, dai lam ni nanhte hpe shadum shahprang na, ngai tut tut naw a tsang nga nngai. ¹³ Dai hta kaga, ndai hkum tsawp hta e ngai naw a nga nga yang, nanhte a dum hprang na myit hpe jasu ya na, sut nga ai hpe ngai myit da we ai; ¹⁴ kaning rai nme law, anhte a Madu Yesu Hkristu gaw, ngai hpe madun dan nngai hte maren, gade n na yang ndai hkum tsawp hpe ngai kau da na we ai, ngai chye nga nngai. ¹⁵ Rai sa, ngai pru mat wa ai hpang, nanhte galoi mung ndai hte hpe dum hprang nga lu myit ga, ngai naw shakut sharang nga na nngai. ¹⁶ Kaning rai nme law, anhte a Madu Yesu Hkristu a hpung atsam hte, du sa wa na ra ai lam, shi nanhte hpe shana dan ai shaloi e, hpaji maumawi ga hpe hkan let, anhte hkai ga ai n rai; anhte hkum nan shi a dan hkung ai hpung shingkang hpe tinang dia mu lu ai ni rai nga ga ai. ¹⁷ Shi gaw Kawa Karai Kasang kaw na, arawng sadang hte hpung shingkang hpe lu la wu ai shaloi, daru magan hpung shingkang kaw na ning nga ai nsen shi kaw dan pru nna, Ndai wa gaw ngai sharawng awng nga ai, ngai tsaw ra ai ngai Sha rai nga li ai, ngu wu ai: ¹⁸ dai chyoi pra ai bum ntsa e shi hte rau nga nga ai shaloi e, dai nsen sumsing lamu de na shi kaw dan pru ai gaw, anhte nan na lu gaw ai. ¹⁹ Dai rai nna, grau grin wa nga ai myihtoi ga mung, anhte lu sa gaw ai; nanhte a myit masin hta e nhtoi leng wa nna, nhtoi gintawng pru wa ai ten du hkra, nsin sin ai shara de htoi tu nga ai pyengdin hpe zawn, dai myihtoi ga hpe nanhte a hkan nang nga na, mai kaja nga ai. ²⁰ Dai hta kaga, laika hta rawng ai gara myihtoi ga rai ti mung, tinang a myit shasat ai hte maren, ga lachyum shapraw lu ai n rai, shawng chye la mu. ²¹ Kaning rai nme law, masha a myit shasat ai hku majaw, hpa myihtoi ga galoi mung byin pru yu ai n rai; Chyoi pra ai Wenyi e myit shadut ya hkrum ai masha ni gaw, Karai Kasang kaw na ga htawn tsun ma ai. 

2 Petru 2

¹ Rai ti mung, amyu masha ni hta e, masu ai myihtoi ni mung paw pru ma ai; dai hte maren, nanhte hta e mung, masu ai sara ni paw pru wa na ma ra ai rai nna, jahten shabya chye ai bra wa ai ga hpe, mayun shashawn la nna, shanhte hpe mari la sai Madu hpe nyet kau ai hte, tinang dai a ntsa e tsin-yam tsindam hpe, larau ladau du shangun na ma ru ai. ² Masha law law wa mung shanhte a mak mat ai lam hkan nang ma ai hte, shanhte a matu mara, dai teng man ai lam gaw, shatan nhkan hkrum mat na ra ai. ³ Shanhte gaw lawhpa ai myit hkan let, hkalem ai ga hte nanhte hpe hpaga ga na ma rin dai: shanhte hpe daw dan na ari chyawm gaw, moi chyaloi nhkoi kaw nna n lanyan ai hte, shanhte hkrum sha na tsin-yam tsindam gaw gaungwi gausi yup shamawi nga ai n rai. ⁴ Kaning rai nme law, Karai Kasang gaw yubak galaw kau ai lamu kasa ni hpe pyi lahpawt lama n di ai sha, ngarai mung de jahkrat kau mu ai rai nna, tara dara ai nhtoi du hkra shanhte hpe rim da let, chyang htat ai nsin sin ai nhkun hta e rawng da mu ai hte; ⁵ moi moi na mungkan ga hpe mung lahpawt lama n di ai sha, ding hpring ai tara hkaw dan ai sara Noa hte masha sanit hpe makawp maga la nhtawm, tara n hkungga ai ni a mungkan ga a ntsa e sha-u sha-ing dat wu ai hte; ⁶ Sodom hte Gomora mare yan hpe mung, wan mang shatai kau nna, sharun shabyak kau mu ai hte, hpang e du pra ai, tara hpe n hkungga ai ni a matu mara ningli shatai mu ai; ⁷ rai ti mung, dai mare na n se ai masha ni a n san n seng ai arawn alai majaw, myit tsang hkrum ai ding hpring ai Lawt hpe gaw, shi mawai la wu ai: - ⁸ kaning rai nme law, dai ding hpring ai wa gaw, shanhte hte rau a nga nga ai shaloi e, shanhte a tara n lang ai amu hpe mu lu, na lu na majaw, shi a ding hpring ai myit masin gaw shani shagu yu nai mat nga lu ai. - ⁹ Dai Madu gaw, tara hkungga ai ni hpe agung alau kata na mawai la na hte, n ding n hpring ai ni hpe ari jahkrum na matu, tara dara na nhtoi du hkra hkang tawn da na nga, chye nga ai: dai hkum shan a matsat shabat marin ai lam hta hkawm wa ma ai rai nna, ahkang aya lu ai ni hpe n gawn n sawn di mu ai ni nan, grau nna dai zawn di na, shi chye nga ai. ¹⁰ Dai ni gaw, nden ja ai ni hte, tinang a myit hkan nna, hpung shingkang rawng ai ni hpe n hkrit kamyin ai sha, shatan nhkan nga ai ni rai nga ma ai; ¹¹ Lamu kasa ni mahtang gaw shanhte hta n-gun hte atsam grau rawng nga ma ti mung, dai ni gaw shanhte a lam shatan nhkan re ai daw dan ai gaw, dai Madu a man e, n tsun yu ma ai. ¹² Dai masha ni mahtang gyit hkang la nna, jahten shabya na matu mara myit n leng ai ashu ashan ni zawn, pra wa ai ni nan, rai nga ma ai; n chye n chyang ai hpa lam hpe mung shanhte shatan nhkan mu ai rai nna tinang ni e jahten shabya di ai lam hta jahten shabya ai hkrum na hte, n ding n man ai amu a matu mara, n ding n man ai shabrai hkam la na ma ru ai. ¹³ Shanhte gaw shani gangwan e pyi, shut lai ai amu hpe, tangpyaw dum nga ma ai; nanhte hte rau poi galaw sha nga ma yang, tinang a hkalem ai hta e shanhte tawt lai nga ma ai rai nna, agang chyalang hte matsat shabat re ai ni rai nga ma ai. ¹⁴ Shanhte a myi gaw num shaw ai amu hte yubak baw sumhpa hte hpring chyat nga ma ai rai nna, shanhte gaw n ngang n hkang re ai ni hpe lau la mu ai: shanhte myit lawhpa ai hta maju jung nga ma lu ai; dagam dala hkrum ai kashu kasha ni mung, shanhte rai nga ma ai. ¹⁵ Dai malang ai lam hpe shanhte kau da ma nu ai rai nna, n ding n man ai shabrai hpe tsaw ra wu ai Beora a kasha Balam a lam hta, hkan nga ma ai: ¹⁶ rai ti mung, dai wa gaw tinang a tawt lai ai amu majaw, daru kau ai hkrum sha wu ai; ga n chye tsun ai lawze gaw, masha a nsen hte shaga wa ai rai nna, dai myihtoi a n gring ai amu hpe kajet kau nu ai. ¹⁷ Shanhte gaw, hka n rawng ai hka htung ni hte, nbung e shapoi ai saiwan rai nga ma ai rai nna, dai chyang htat nna mang nga ai nsin gaw, shanhte a matu mara mazing da nga ai. ¹⁸ Kaning rai nme law, hkum shan a myit marin nna, mak kayut nga ai hku hkan yang, kaman lila grang ai ga kaba a tsun nga let, lam dam mat ai ni kaw na lawt lu magang wa ai ni hpe, shanhte lau la mu ai; ¹⁹ shanhte gaw dai ni hpe lawt lu na ahkang, ga ndat da ma ai rai ti mung, tinang pyi hten byak wa ai a mayam ni rai nga ma ai; kaning rai nme law, dang kau ai hkrum ai wa gaw, shi hpe dang lu ai wa a mayam rai nga ai. ²⁰ Dai hta kaga, anhte a Madu hte Hkye Hkrang la ai wa Yesu Hkristu hpe chye chyang lu ai a gawp e, shanhte gaw mungkan ga a matsat shabat lawt lu nhtawm e, dai hta e a gyit ahkang da nga ai hpe bai hkrum hkrup nna, dai gaw shanhte hpe bai dang kau mu yang gaw, dai ni a hpang na gaw shawng na hta grau nna yak wa nga ai. ²¹ Kaning rai nme law, dai ding hpring ai lam hpe chye chyang la nhtawm e, shanhte hpe ap da mu ai chyoi pra nga ai hkang da ai ga hpe tawt lai kau ai hta, dai lam hpe n chye nga yang mahtang gaw, shanhte a matu grau nna mai nga ai. ²² Gwi gaw tinang a nhpat hpe nhtang sha ai, wa hku mung kashin ai hpang hkumpup hta bai hkalawi nga ai, nga nna teng man ai ga shadawn gaw, shanhte hta dik wa sai. 

2 Petru 3

¹ Tsaw ra ai ni e, da ndai gaw ya nanhte hpe lahkawng lang na ka shagun dat ai laika rai nga ai; chyoi pra ai myihtoi ni moi shawng e tsun dan ai ga hpe mung, nanhte a kasa ni a lata hta ap da ai, ² dai Madu hte Hkye Hkrang la ai wa a htet da ai ga hpe mung, nanhte a dum nga myit ga, ndai laika yan hta nanhte a san seng ai myit hpe shadum shahprang let, ngai jasu da ma de ai. ³ Kaning rai nme law, hpang jahtum na nhtoi hte hta, tinang a myit kayut ai hku hkan nna, asawng asang rai let, Dai Madu bai du na ra ai, nga ai ga madat gaw, kanang rai nga a ta? ⁴ Ji wa ni yup lai mat wa ai kaw nna, lamu ga nnan lat da ai aten hta na, nga yawng nga pra nga nga ai hte maren, ya e mung a rai nga ai, nga nna du na ra ai jahpoi ai ni tsun pru na ma ra ai hpe, shawng e chye nga mu. ⁵ Rai ti mung, sumsing lamu ni gaw, moi chyaloi nhkoi kaw nna nga nga ai hte, hka hta na dawng pru nna, hka e gaw da ai ginding aga hpe mung, Karai Kasang a mungga a majaw a grin nga ai hte, ⁶ dai hte mung dai aprat na mungkan ga hpe, hka lim kau hkrum ai hte hten mat nga ai hpe shanhte gaw dingsa malap kau mu ai. ⁷ Ya e nga ai sumsing lamu ni hte ginding aga hpe chyawm gaw, tara n lang ai ni a daw dan ai hte jahten shabya hkrum na nhtoi du hkra, wan jahkru na matu mara, moi na mungga hte nan a rem da nga nu ai. ⁸ Rai ti mung, tsaw ra ai ni e; dai Madu a man e nhtoi langai mi gaw shaning hkying mi hte, shaning hkying mi gaw nhtoi langai mi hte maren rai nga ai lam langai sha hpe, malap mali hkum rai nga myit. ⁹ Nkau mi gaw, Ala nga ai, nga nna myit ma ai hte maren, dai Madu gaw shi a ga madat hpe shadik na ala nga ai n rai: rai ti mung, yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai majaw, shi nanhte hpe myit galu kaba madun nga ai. ¹⁰ Dai Madu a nhtoi chyawm gaw, lagu lagut zawn du na ra ai; dai nhtoi hta e sumsing lamu ni kadu ai nsen hte lai mat wa nna, arai guji guyang ni, kahtet lai ai hte krawp ayai mat wa nna, aga hte dai hta e nga ai yawng mayawng hte gaw, hkru hkat mat na ra ai. ¹¹ Shing rai, arai yawng mayawng krawp ayai mat ai hkrum na teng nga ai majaw, sumsing lamu ni hpe wan hkru kau ai hta krawp ayai mat nna, arai guji guyang hpe kahtet lai ai hte shabyawng kau na Karai Kasang a nhtoi hpe, nanhte ala nga nna myit marit nga myit dai gaw, ¹² chyoi pra ai arawn alai hte tara hkungga ai myit rawng let, nanhte kaning re ai masha mai tai na myit ta? ¹³ Shing rai byin wa ti mung, shi a ga madat majaw, ding hpring rawng ai sumsing lamu nnan hte ginding aga nnan hpe, anhte myit mada nga ga ai. ¹⁴ Shing rai myit mada ai lam ni rai nga myit dai majaw, tsaw ra ai ni e, ngwi pyaw ai hku hkan let, shi a man e, matsat shabat hte agang chyalang n kap myit ga, shakut sharang nga mu. ¹⁵ Anhte a tsaw ra ai hpu nau Pawlu mung, shi lu la ai nyan a hpaji majaw, nanhte hpe ka dat nna, shi a shagun dat ai laika ni yawng hte hta e ka dat nu ai hte maren, dai Madu a galu kaba ai chyeju myit gaw hkye hkrang la ai lam rai nga ai, ngu nna myit tau la nga mu. ¹⁶ Dai laika ni hta e chye yak ai lam langai ngai rawng nga ai rai nna, n sharin yu ai ni hte myit n gring ai ni gaw, dai Chyum laika ni kaga hpe zawn, tinang dai a jahten shabya na matu shanut kau mu ai. ¹⁷ Nanhte chyawm gaw, tsaw ra ai ni e, ndai hte hpe shawng e chye ma nit dai majaw, tara n lang ai ni a lam dam mat ai hta e nanhte mung n lawm ai hte, nanhte a ngang hkang ai myit, jahten shabya kau ai n hkrum myit ga, a maja nga mu: ¹⁸ Anhte a Madu hte Hkye Hkrang la ai wa Yesu Hkristu a chyeju hte chye chyang a lam hta e, nanhte kaba wa nga myit ga. Ya e mung, htani htana prat dingsa e mung, Yesu Hkristu kaw hpung shingkang a nga nga u ga law.