YAKU A SHAGUN DAT AI LAIKA

Yaku 1

¹ Karai Kasang hte Madu Yesu Hkristu a mayam, Ngai Yaku gaw, bra mat nga ai amyu shi lahkawng ni hpe, ngwi pyaw ga shana dat nngai. ² Nye a hpu nau ni e, nanhte a kam sham ai myit hpe dinglik yu ai hkrum yang, shakut sharang chye ai myit jat nga ai hpe, nanhte chye nga myit dai majaw, ³ agung alau amyu myu hpe kadup hkrum myit dai shaloi e kabu gara shara kaba rai nga ai, myit la mu. ⁴ Dai hta n-ga, nanhte hkum hkum chyip chyip rai lu nna, hpa hta mung n kadawn myit ga, shakut sharang ai myit gaw tinang a atsup nga ai bungli hpe, shangut kau lu u ga. ⁵ Nanhte hta na marai langai ngai hpaji byeng-ya kadawn nga yang gaw, n jet kau ai sha, nlang hte hpe n daw n hta a jaw nga ai Karai Kasang kaw, hpyi nga u ga; shaloi shi lu la na ru ai: ⁶ rai ti mung, kam shut ai n lawm ai sha, kam sham ai myit hte hpyi nga u ga; kaning rai nme law, kam shut ai wa gaw, nbung e ahtu nna hta wa ai nawng na hka leng ni hte bung nga ai. ⁷ Dai wa gaw, Madu kaw na lama ma lu la na zawn, hkum nawn nga u ga; ⁸ shi gaw myit mashe rawng nga ai rai nna, shi a lam shagu hta agyoi ai wa rai nga ai. ⁹ Grit nga ai hpu nau wa gaw tinang a shagrau ai hta, sut su ai wa chyawm gaw tinang a shagrit ai hta, gumrawng nga mu ga; ¹⁰ kaning rai nme law, tsingdu a apu zawn shi wai mat wa nga ai. ¹¹ Ajan gaw kahtet ai nbung hte rawt wa jang, dai tsingdu nyawi mat wa ai rai nna, de a apu run hkrat wa ai hte, de a hkrang na hpraw tsawm ai gaw hten mat wa ai: sut su ai wa mung, dai hte maren, shi a maw mamaw hta, wai mat wa na ra ai. ¹² Agung alau hkrum yang shakut sharang ai wa gaw, a nga lu ai: kaning rai nme law, dinglik yu ai hkrum ngut jang, Karai Kasang shi e tsaw ra ai ni hpe ndat da ai asak janmau gaw, shi lu la na ru ai. ¹³ Rai ti mung, gung lau hkrum yang, Karai Kasang ngai hpe gung lau da nngai, nga nna kadai mung hkum tsun u ga: kaning rai nme law, n hkru n hkra ai gaw Karai Kasang hpe gung lau di lu ai n rai; shi hkum nan kadai hpe mung gung lau jahkrum nga ai n rai. ¹⁴ Kadai rai ti mung, tinang a myit kayut ai hta, len nang ai hte agaw hkalem ai hkrum nga yang gaw, gung lau ai hkrum nga ai. ¹⁵ Dai myit kayut ai chyawm gaw na-um nasin rai wa jang, yubak hpe shangai dat wu ai; yubak mahtang gaw kung hpan wa jang,si ai hpe shaprat dat wu ai. ¹⁶ Nye a tsaw ra ai hpu nau ni e, myit hkum dam myit. ¹⁷ Kaja ai kumhpaw nlang hte hte, hkum hkum re ai kumhpa yawng hte gaw, ntsa de nna rai nga ai hte, nhtoi hkum ni a Kawa kaw na yu hkrat wa ai rai nna, shi hta e gale galau re ai hte kayin kaye re ai shingnip rawng nga lu ai n rai. ¹⁸ Shi hpan tawn da ai amyu baw ni hta e, anhte alat amyu zawn tai wa u ga, shi myit ra ai hku hkan let dai ding man ai mungga hte shi anhte hpe shaprat dat mi ai. ¹⁹ Nye a tsaw ra ai hpu nau e, ndai lam hpe nanhte chye nga myit dai. Masha kadai wa rai ti mung, na la na matu lawan nga u ga; ga tsun na matu hkum tin nga u ga, masin pawt na matu mung, hkum tin nga u ga: ²⁰ kaning rai nme law, masha a masin pawt ai gaw, Karai Kasang a ding hpring ai lam hpe shachyen nga lu ai n rai. ²¹ Dai re ai majaw matsat shabat yawng hte hte, ladu lai ai n hkru n hkra hte hpe yeng kau nna, nanhte a myit masin hpe hkye hkrang la lu na, kraw lawang e hkai da ai mungga hpe, sumnung ai myit hte hkam la nga mu. ²² Nanhte gaw tinang hkum hpe n hkalem kau myit ga, dai mungga hpe a na yu ai ni sha n rai, dai hpe hkan galaw ai ni nan, a tai nga mu. ²³ Dai mungga hpe na la nhtawm, n hkan galaw ai wa kadai mung, tinang a hkum hkrang a myi man hpe jamna hta e yu yu ai wa hte bung nga ai; ²⁴ shi gaw tinang hkum hpe yu yu nna, sa wa nhtawm, shi a gawng shingyan a shingna hpe shaloi jang malap mali kau wu ai. ²⁵ Anhte hpe shalawt la lu ai, hkum tsup re ai tara hta azi yu nga nna, shing rai a nga nga ai wa chyawm gaw, na la nhtawm malap mali kau ai wa n rai. magan shachyen ai wa a tai nga ai majaw, dai wa gaw shi hkan galaw ai bungli hta e awng wa na ra ai. ²⁶ Ngai gaw naw ku htung shadik ai wa rai nga nngai, nga nna marai langai ngai myit nawn dam ti mung, tinang a shinglet hpe n chye hkang ai hte, tinang a myit hpe hkalem kau yang, dai wa a naw ku htung, kaman lila sha rai nga lu ai. ²⁷ Naw ku htung chyawm gaw, Ru tsang kyin dut hkrum ai jahkrai nmai ni hte, gaida gaina ni hpe kawan katsan yu yu nna, mungkan ga a awu asin re ai hpe koi kau na gaw, Kawa Karai Kasang a man e san seng ai hte ra n rawng ai naw ku htung rai nga ai. 

Yaku 2

¹Nye a hpu nau ni e, masha a myi man hpe tau yu let arawng sadang lu ai anhte a Madu Yesu Hkristu hpe kam sham ai lam, nanhte hkam la nga myit hka? ² Kaning rai nme law, aja lachyawp chyawp nna, reng ai hpun palawng bu hpun ai masha langai mi; bai, agang chyalang re ai hpun palawng bu hpun ai matsan mayan masha langai mi, nanhte a tara jawng hta shang wa ma yang; ³ dai reng ai hpun palawng bu hpun ai wa hpe nanhte hkap yu mu ai rai nna, Nang e arawng lu ai shara hta dung nga u; bai, dai matsan mayan re ai wa hpe, Wo nang e tsap nga u; shing n rai, nye a lagaw nhpang e dung nga u, nga nna tsun myit yang gaw, ⁴ nanhte shada da ginhka wa nna, n hkru ai myit mang rawng ai daw dan ai ni tai wa myit dai, n rai myit ni? ⁵ Ngai tsaw ra ai hpu nau ni e, madat mara la mu: kam sham ai sut gan hta lu su nna, Karai Kasang hpe tsaw ra ai ni a matu mara, ndat da ai mungdan a sali wunli hpe hkam la lu mu ga, Karai Kasang ga mungkan ga na matsan mayan ni hpe lata la ma nu ai, n rai ni? ⁶ Nanhte mahtang matsan mayan wa hpe n gawn n sawn di kau mu hka; sut su ai ni chyawm gaw, nanhte hpe zingri zingrat di myit dai rai nna, tinang a lata hte nan tara tingnyang ni a man de, nanhte hpe dun ahkyik la myit dai, n rai ni? ⁷ Nanhte hpe shamying da ai, dan hkung ai amying nsang hpe mung, shanhte nan shatan nhkan rai ma ai, n rai ni? ⁸ Dai rai nna, Na a htingbu wa hpe na a hkum hte maren nang tsaw ra lu na ndai, nga nna Chyum laika hta rawng ai hkawhkam tara hpe, nanhte shatup mu yang gaw, nanhte mai kaja ai hpe galaw nga myit dai. ⁹ Masha a myi man hpe nanhte tau yu nga myit yang gaw, nanhte yubak galaw nga myit dai rai nna, dai tara hpe tawt lai ai ni tai nga ai hte, jeyang ai hkrum nga myit dai. ¹⁰ Kadai rai ti mung tara ting hpe hkan shatup lu ti mung, dai hta na langai mi hpe kataw kau yang gaw, yawng hte hta ra ging ai wa rai nga ai. ¹¹ Kaning rai nme law, Masha num hpe hkum shaw, nga nna hkang da ai wa gaw, Masha hpe hkum sat, nga nna naw tsun nga ai. Dai rai nna, masha a num hpe nang n shaw ti mung, masha hpe sat kau n yang gaw, dai tara hpe tawt lai ai wa nang rai nga ndai. ¹² Dai re majaw, nanhte hpe shalawt lu na tara hte daw dan ai hkrum magang lu na ni zawn, ga a tsun nga mu; dai hte maren hkan galaw nga mu. ¹³ Kaning rai nme law, matsan dum na myit n rawng ai wa gaw, matsan dum ai hku n re ai sha, daw dan ai hkrum na ra ai. Matsan dum ai lam chyawm gaw, daw dan ai lam hta grau nna awng wa lu ai. ¹⁴ Nye a hpu nau ni e, marai langai ngai, Ngai gaw makam masham rawng nga nngai, nga nna tsun nga ti mung, magam bungli n shachyen nga a yang gaw, hpa akyu nga a ta? Makam masham gaw dai wa hpe hkye hkrang la lu na a ni? ¹⁵ Hpu nau wa langai ngai, shing n rai kajan langai ngai, singgu krin rai nga ma ai hte, shani shagu sha na lusha shahpa nhprut ma yang gaw, ¹⁶ nanhte hta na marai langai ngai, Ngwi pyaw ai hte wa ma sit; lum nga mu, hkru kat nga mu, ngu nna shan hpe tsun mu ti mung, hkum a matu ra nga ai hte maren, n jaw dat mu yang gaw, hpa akyu nga na a ta? ¹⁷ Dai hte maren, makam masham hta magam bungli n lawm yang gaw, tinang dai chyasi rai nga ai. ¹⁸ Bai lam mi gaw, Nang makam masham rawng nga ndai, ngai mahtang magam bungli rawng nga nngai, nga nna marai langai ngai tsun nga a yang gaw, magam bungli n lawm ai, na a makam masham gaw ngai hpe madun dan e, shaloi nye a magam bungli hte nye a makam masham, ngai nang hpe madun dan na de ai. ¹⁹ Karai Kasang gaw langai sha rai nga ai, nang kam nga n hka? Rai sa, mai kaja nga ndai: nat ni mung kam sham nga nna, hkrit gari nga ma ai. ²⁰ Dai hta kaga, wa dan seng breng wa e, makam masham hta magam bungli n lawm yang gaw, kaman lila rai nga ai hpe, nang chye mayu da wu ni? ²¹ Anhte a wa Abraham dai hkungri ntsa e, shi a kasha Isak hpe hkungga shatai ai shaloi, magam bungli hte ding hpring wa lu ai, n rai ni? ²² Dai rai nna, dai kam sham ai gaw, shi a magam bungli hte rau shachyen nna, dai magam bungli a majaw, dai kam sham ai gaw tup wa lu ai hpe, nang mu lu ndai; ²³ shing rai, Abraham gaw Karai Kasang hpe kam sham wu ai rai nna, dai hpe ding hpring ai rai nga ai shi a matu ngu ya wu ai hte, Karai Kasang a jinghku wa shi hpe ngu da wu ai, nga nna tsun da ai laika gaw dik wa sai. ²⁴ Dai rai nna, kam sham ai hte sha n rai, magam bungli hte masha gaw ding hpring wa lu nga ai hpe nanhte dum chye nga myit dai. ²⁵ Dai hte maren, Rahab ngu ai shawa num gaw, kasa ni hpe hkap hkalum la nna, kaga lam hku e dat dat mu ai shaloi, magam bungli hte ding hpring wa lu ai, n rai ni? ²⁶ Kaning rai nme law, dai hkum tsawp hta wenyi n rawng a yang gaw, chyasi rai nga ai zawn, dai makam masham hta mung, magam bungli n lawm yang gaw, chyasi rai nga ai. 

 

Yaku 3

¹ Nye a hpu nau ni e, anhte sara ni grau nna daw dan ai hkrum na ga ai hpe, anhte chye nga ga ai majaw, marai law law wa sara hkum tai nga myit. ² Kaning rai nme law, anhte nga manga hte hta, malaw maga gaw kataw ai hkrai rai nga ga ai. Marai langai ngai ga hte n kataw a yang gaw, hkum hkum tsup tsup re ai wa hte, tinang a hkum ting hpe hkang lu ai wa rai nga ai. ³ Gumra ni anhte a myit hkan lu hkra, n-gup hta gumhtung bang gaw yang, de a hkum ting hpe anhte hkang lu gaw ai. ⁴ Dai hta kaga, shanghpaw li ni hpe yu yu mu; dai ni dai hte wa kaba nga ai hte, ja la ai nbung laru e ahpawt gumpye ai hkrum mat wa ti mung, li hkang ai wa myit ra ai hte maren, grai kaji ai li hkang hte sha, dai ni hpe hkang la lu ai. ⁵ Dai hte maren, shinglet gaw daw shan kaji nga ai rai ti mung, gumrawng gumtawng kaba nga lu ai: yu mu, nte sha law ai wan gaw, ning san wa kaba ai maling hpe hkru kau lu a hka! ⁶ Dai shinglet mung wan rai nga ai: anhte a daw shan ni hta e, dai shinglet gaw, yubak a mungkan tai wa nga ai rai nna, anhte a hkum ting hpe awu asin di kau wu ai hte, dai gawng shing-yan a hkrang hpe nat kau wu ai rai nna, ngarai mung gaw dai hpe nan shachyi wu ai. ⁷ Kaning rai nme law, uni uzai hte u amyu myu, gumrawt hkawm ai baw hte hka kata na nga amyu myu hpe, masha a lata hte hku shani la lu nna, dai hte gaw ni mat wa ma sai. ⁸ Dai shinglet hpe chyawm gaw masha kadai rai ti mung, n hku shani la lu mu ai: dai gaw ndi nda n hkru n hkra re ai hte, chyasi ai tuk hte hpring chyat re ai baw rai nga ai. ⁹ Dai shinglet e, anhte gaw dai Madu hte Wa hpe shaa nga ga ai; bai, Karai Kasang a hkum hkrang hte maren hpan tawn da mu ai shinggyim masha ni hpe mung, dai hte dagam dala nga kau ga ai. ¹⁰ N-gup langai hta nna sha, shaman ai ga hte dagam dala re ai ga pru wa ai. Nye a hpu nau ni e, shing nga ai gaw n mai nga ai. ¹¹ Npun hpaw ai hka hpawk langai hta nna, mu ai ntsin hte hka ai ntsin pru lu a ni? ¹² Nye a hpu nau ni e, maihpang hpun hta tsanlun si, tsabyi ru hta maihpang si, n si lu ai, n rai ni? Dai hte maren, jum shum ai hka gaw, mu ai ntsin hpe n shapraw lu nga ai. ¹³ Nanhte hta e, hpaji byeng-ya hte chye chyang ai wa, kadai rai nga a ta? Dai wa gaw shingdi chye ai hpaji byeng-ya hte, kaja ai arawn alai hkan let, tinang a magam bungli hpe madun ru ga. ¹⁴ Rai ti mung, nanhte a myit hta e ladu lai ai manawn masham hte gasat gala rawng nga myit yang gaw, dai teng man ai ga hpe hkum gumrawng kau myit, hkum masu kau myit. ¹⁵ Shing re ai hpaji byeng-ya chyawm gaw, ntsa de nna yu hkrat wa ai hpaji byeng-ya n rai; dai gaw, dinghta ga a, ashu ashan a hte ji nat a hpaji byeng-ya hkrai rai nga ai. ¹⁶ Kaning rai nme law, manawn masham hte gasat gala rai nga yang gaw, kashuk kashak hte n shawp ai amu amyu myu hkum nga ai. ¹⁷ Ntsa de na hpaji byeng-ya chyawm gaw, shawng npawt e san seng ai rai nga ai; dai hpang e, htingrai htingrat chye ai, sumnung ai, shingdi ai, matsan dum ai hte kaja ai asi hte hpring nga ai, gale galau n re ai hte hpyi hpun n chye ai hpaji byeng-ya rai nga ai. ¹⁸ Dai hta n-ga, htingrat htinglu shachyen chye ai ni a lata hte, ding hpring lu ai asi gaw, ngwi pyaw ai hte gat nga ai. 

 

Yaku 4

¹ Nanhte hta e majan hte hpyen gasat ai gaw, kanang na pru wa ma lit ta? Nanhte a daw shan ni hta e gasat hkying ai pyaw daw kadaw ai a majaw rai nga ai, n rai ni? ² Nanhte myit kayut nga ti mung, hpa n lu la myit dai. Nanhte sat kau nga ai hte manawn masham rai nga ti mung, hpa n lu la lu myit dai: nanhte hpyen gasat nga ai hte, majan galaw myit dai; nanhte n hpyi myit dai majaw, hpa n lu la myit dai. ³ Nanhte hpyi ti mung, n hkam la lu myit dai; kaning rai nme law, nanhte a pyaw daw lam hta ginlut kau myit ga, n mai ai mahtang nanhte hpyi nga myit dai. ⁴ La shaw ai ni e, mungkan ga hpe jinghku hku ai myit gaw, Karai Kasang hpe n dawng n yawt ai myit rai nga ai, nanhte n chye nga myit ni? Dai rai nna, mungkan ga a jinghku tai mayu ai wa kadai rai ti mung, Karai Kasang hpe n dawng n yawt ai wa tai nga ai. ⁵ Dai hta kaga, anhte hta e bang rawng da ai Wenyi gaw, manawn masham du hkra myit marin nga ai kun? nga nna Chyum laika tsun ai gaw, kaman rai nga ai, nanhte nawn da mu ni? ⁶ Shi mahtang gaw grau kaba ai chyeju a jaw nga ai. Dai rai nna, Karai Kasang gaw gumrawng gumtawng ai ni hpe gang hkum kau nna, myit nem ai ni hpe chyeju jaw ya wu ai, nga nna laika tsun nga ai. ⁷ Dai re ai majaw, Karai Kasang a npu e a taw nga mu: nat gumlau hpe ban hkum kau mu; shaloi shi nanhte kaw nna hprawng mat na ra ai. ⁸ Karai Kasang hpang de sit sa wa mu; shaloi shi nanhte hpang de sit wa na ra ai. Yubak galaw ai ni e, nanhte a lata hpe jasan jaseng kau mu; myit mashe rawng ai ni e, nanhte a myit masin hpe shachyoi shapra da mu. ⁹ Nji nmu, sharung shayawt ai hte, hkrap ngu hkrap ngoi rai nga mu; nanhte a mani ai gaw sharung shayawt ai hte, nanhte a kabu gara ai gaw yawn du krung ai hte galai mat u ga. ¹⁰ Dai Madu a man e myit shanem nga mu, shaloi shi nanhte hpe shagrau na ma rin dai. ¹¹ Hpu nau ni e, nanhte shada da nsu nnawn ga hkum tsun myit. Tinang a kahpu kanau hpe nsu nnawn ga tsun nga ai, shing n rai, jeyang ai wa gaw, dai tara hpe nsu nnawn ga tsun nga nna jeyang ai wa rai nga ai. Dai tara hpe nang jeyang nga ndai rai yang gaw, tara hpe hkan galaw ai wa n rai, dai hpe jeyang ai wa nang tai nga ndai. ¹² Tara jaw da lu ai hte tara dara ai wa chyawm gaw, hkye hkrang la lu ai hte jahten kau lu ai wa chyu sha, rai nga ai: dai re ai majaw, na a htingbu wa hpe jeyang ai wa, nang gaw, kadai wa rai nga n ta? ¹³ Ba lam mi gaw, Dai ni, shing n rai, hpawt ni e, ndai mare de anhte sa wa nhtawm, dai yang e laning mi hkring nga nna, hpaga ga na hte amyat lu sha na gaw ai, nga nna tsun nga ai ni e, sa ma rit; ¹⁴ hpawt ni e pyi hpa byin na ra ai gaw, nanhte n chye nga myit dai; nanhte a asak gaw hpa rai nga ma lit ta? chyahkring chyahkra sha dan pru nna, hkoi mat ai salu rai nga ma lit dai. ¹⁵ Dai rai nna, Dai Madu hkraw nga a yang gaw, anhte mung a hkrung nga lu na hte, ndai mung, wora mung galaw lu na ga ai, nga nna nanhte mai tsun na myit dai. ¹⁶ Ya chyawm gaw nanhte a grang ai ga hta nanhte gumrawng gumtawng rai nga myit dai: shing re ai gumrawng gumtawng nlang hte gaw, n shawp n kap rai nga ai. ¹⁷ Dai re ai majaw, kaja ai amu chye galaw ninglen n galaw ai wa gaw, yubak mara kap nga ai. 

 

Yaku 5

¹ Sut su ai ni e, sa ma rit; nanhte a ntsa e du magang ra ai tsin-yam tsindam majaw, hkrap shabam nga mu. ² Nanhte a sut gan gaw yat mat ma ai rai nna, nanhte a hpun nba hpe manut e sha kau ma nu ai. ³ Nanhte a aja hte gumhpraw hta pyi nhkan jung ma ai rai nna, de a nhkan mung, nanhte a mara maga de sakse hkam ya ai hte, nanhte a hkum shan hpe wan zawn, sha kau na ru ai. Nanhte gaw hpang jahtum ai nhtoi ni hta e sut gan mahkawng da ma nu ai. ⁴ Yu mu, nanhte a yi hkauna ni hpe dan shangun nhtawm, nanhte hkalem sha kau ai bungli galaw ai ni a shabrai gaw, jahtau nga ai rai nna, mam dan ai ni a garu ai nsen mung, dai Madu Seba-ut a na hta e hkrang shang wa sai. ⁵ Nanhte gaw ga ntsa e shakawng ndawng rai nga ai hte, pyaw daw hkrai kadaw myit dai: sat ai shani hta e, nanhte gaw tinang a myit hpe kawn da ma nit dai. ⁶ Dai ding hpring ai wa hpe nanhte daw dan nna, sat kau ma nu ai; shi gaw nanhte hpe ban hkum nga ai n rai. ⁷ Dai re ai majaw, hpu nau ni e, dai Madu bai du ai du hkra shakut sharang nga mu law. Yu mu, sun galaw ai wa gaw, ga a asau asi hpe ala nga ai rai nna, marang nhpaw hte hpang shaloi na marang dai hta e htu shaya ai du hkra, shakut sharang nga ai. ⁸ Nanhte mung shakut sharang nga mu: dai Madu a bai du na gaw ni wa magang ra ai majaw, nanhte a myit hpe shangang shakang da mu. ⁹ Hpu nau ni e, nanhte daw dan ai n hkrum myit ga, shada da hkum aput angun nga myit; yu mu, tara agyi wa gaw, chyinghka makau e a tsap nga ai. ¹⁰ Hpu nau ni e, dai Madu a amying nsang hte hkaw tsun dan ai myihtoi ni a nni nkri hkrum ai hte, shakut sharang nga ai myit gaw, nanhte a ningli tai wa ma lit ga. ¹¹ Yu mu, shakut sharang lu ai ni hpe, anhte a ngu gaw ai; Yoba a myit galu ai lam nanhte na yu ma nit dai; dai Madu a asak htum wa ai lam mung, nanhte mu chye ma nit dai: dai Madu gaw nachying myit yu machyi nga ai hte matsan yu dum nga ai law. ¹² Ya mahkra hta n-ga, nye a hpu nau ni e, hpa hpe mung dagam dala hkum nga myit: sumsing lamu hte dinghta aga hpe dagam dala hkum nga myit: dagam dala ai ga kaga mung hkum tsun nga myit. Nanhte daw dan ai n hkrum myit ga, nanhte a aga gaw, Re ai gaw, re ai, N re ai gaw, n re ai, rai nga ma lit ga. ¹³ Nanhte hta langai ngai nji nmu hkoi hkrum nga myit ta? shi akyu hpyi nga u ga; langai ngai myit pyaw nga a yang gaw, shi mahkawn mangoi nga u ga. ¹⁴ Nanhte hta langai ngai machyi makaw hkoi hkrum nga myit ta? dai wa gaw, Hpung na salang ni hpe shaga la nhtawm, shanhte gaw dai Madu a amying nsang hte shi hpe namman chya ya let, shi a matu mara akyu hpyi ya mu ga: ¹⁵ shing rai kam sham ai myit hte akyu hpyi ai ga gaw, dai machyi ai wa hpe shamai shatsai lu nna, dai Madu gaw shi hpe sharawt la na ru ai; shi gaw yubak mi galaw hkrup dam ti mung, raw dat kau ai hkrum na ra ai. ¹⁶ Nanhte shamai shatsai hkrum myit ga, nanhte a yubak mara hpe shada da shapraw dan nna, shada da a matu mara akyu hpyi nga mu. ¹⁷ Ding hpring ai wa a hpyi nem ai ga gaw, shabyin lu na atsam law law rawng nga lu ai. Elia gaw anhte hte maren myit mang rawng nga ai shinggyim masha hkrai rai nga ti mung, marang n htu u ga aja awa akyu hpyi wu yang, masum ning e shata kru tup ga ntsa e marang n htu ai nga mat ai. ¹⁸ Bai akyu hpyi dat wu yang, sumsing lamu gaw marang jahtu dat wu ai rai nna, dai aga gaw, de a nsi nai si ni hpe shatut dat wu ai. ¹⁹ Nye a hpu nau ni e, nanhte hta na marai langai ngai, dai teng man ai lam hta na dam mat wa nna, kaga langai ngai shi hpe shabai dat wu yang gaw, ²⁰ yubak galaw ai wa hpe, shi a shut hpyit ai lam hta na shabai dat wu ai wa gaw, myit masin hpe si ai kaw na hkye hkrang la wu ai rai nna, yubak sumpum hpe makoi magap ai rai nga ai, dum hprang nga mu law.