MARKU A LAIKA ( MARK )

Marku 1

¹ Karai Kasang a Kasha, Yesu Hkristu a kabu gara shi ga a npawt nhpang re ai lam. ² Yu mu, na a man e na a lam lajang magang na, Nye a kasa hpe ngai shangun dat we ai; ³ Nam mali kata e jahtau ai nsen gaw: Dai madu a lam lajang da mu, Shi a lam masun ni hpe shading mu, nga nna, ⁴ myihtoi Esaia laika hta ka da nga ai hte maren, yubak raw dat kau na matu, myit malai baptisma hkaw dan ai hte, nam mali hkan e baptisma jaw ai Yawhan gaw, paw pru ra ai. ⁵ Dai rai nna, Yuda mung ting na ni hte, Yerusalem hkan na nlang hte gaw, shi hpang de pru sa wa nna, tinang a yubak hpe shapraw dan let, shi a lata hte Yawdan hka hta e baptisma hkam la ma ai. ⁶ Yawhan chyawm gaw, gawla-u mun hte da ai hpun palawng hpe bu hpun nna, shi nshang e shanhpyi shingkyit kyit nga ai: dinggam-yaw hte nam na lagat jahku hpe shi lu sha nga ai. ⁷ Shaloi shi gaw, Ngai hta n-gun grau rawng ai wa gaw, nye a hpang e du na ra ai: shi a kyepdin sumri hpe ngai gum raw na pyi ging nga nngai n rai. ⁸ Ngai gaw nanhte hpe hka hta baptisma jaw ma sa de ai, rai ti mung, dai wa gaw, nanhte hpe chyoi pra ai Wenyi hta baptisma jaw na ma rin dai, ngu nna hkaw dan mu ai. ⁹ Dai nhtoi hte hta e Yesu gaw, Galile mung, Nazaret mare de na sa du nna Yawhan a lata hte Yawdan hka hta e baptisma hkam la wu ai. ¹⁰ Shaloi jang, dai hka hta na shi pru lung wa yang sumsing lamu gaw ga malang wa ai hte, dai Wenyi gaw hkrudu zawn, shi a ntsa e yu wa ai hpe, shi mu wu ai rai nna, ¹¹Nang gaw nye tsaw ra ai Kasha rai nga ndai; nang hta ngai sharawng awng nngai law, nga ai nsen gaw lamu de na ngoi pru ai. ¹² Shaloi jang, dai Wenyi gaw nam mali hkan e shi hpe shadut wu ai. ¹³ Satan a gung lau ai hkrum let, dai nam mali hkan e, nhtoi mali shi ya tup shi nga nga ai; matse labye ni hte rau shi rai nga ai rai nna, lamu kasa ni shi hpe galaw daw mu ai. ¹⁴ Yawhan gaw ap kau hkrum ai hpang, Yesu gaw Galile mung de sa du nna, ¹⁵ Dai aten ladaw dik wa ai hte, Karai Kasang a mungdan gaw ni wa magang ra ai: myit malai lu nna, dai kabu gara shi ga hpe kam sham nga mu, ngu nna Karai Kasang a kabu gara shi ga hpe hkaw dan mu ai. ¹⁶ Galile nawng makau e garet hkawm nga yang, Simun hte Andre yan nau gaw nawng hta e sumgawn kabai bang nga ai hpe, shi mu hkrup wu ai: kaning rai nme law,shan gaw nga hkan ai masha rai nga ma ai. ¹⁷ Shaloi Yesu gaw Ngai kaw hkan ma rit; masha hpe hkan hkwi na masha, ngai nan hpe shatai na ma de ai, ngu nna shan hpe tsun mu ai. ¹⁸ Shaloi jang, shan gaw dai sumgawn ni hpe kau da nna,shi kaw hkan nang ma ai. ¹⁹ Bai, loi mi hkawm sa wa yang, Zebedi a kasha Yaku hte shi a kanau Yawhan yan hpe shi mu hkrup mu ai; shan gaw dai li hta e,tinang a sumgawn ni hpe kapa nna nga nga ma la ai. ²⁰ Shaloi jang, shi shan hpe shaga mu ai: dai rai nna shan gaw, shan a kawa Zebedi hpe, nchyang ni hte rau, dai li hta e jahti da nna shi kaw hkan nang ma ai. ²¹ Dai hpang shanhte Kaperna-um mare de shang ma ai. Shaloi jang laban nhtoi e shi shanhte a tara jawng hta shang nna sharin shaga nga ai. ²² Shi sharin shaga ai lam hpe shanhte mau mat nga ma ai: kaning rai nme law, laika ka ai sara ni zawn n rai, daru magam ahkang lu ai wa zawn shi shanhte hpe sharin shaga ya mu ai. ²³ Shaloi jang, shanhte a tara jawng hta e, n san n seng nat kap ai masha langai mi lawm nga ai: ²⁴ shi jahtau nna, Nazare wa Yesu e, anhte nang hte hpa seng ga ta? anhte hpe jahten na nang sa du n ni? nang kadai re ai ngai chye nga nngai; Karai Kasang a chyoi pra ai wa nang rai nga ndai, ngu wu ai. ²⁵ Shaloi Yesu gaw, Atsin sha nga u, shi kaw na pru wa u, ngu nna shi hpe daru kau wu ai. ²⁶ Dai rai nna, dai n seng ai nat gaw shi hpe bu kashan shangun nna nsen kaba hte jahtau let shi kaw na pru mat wa ai. ²⁷ Nlang hte gaw mau mahka nga nna,Ndai gaw, hpa rai nga a ta? ningnan sharin shaga ai lam rai i! daru magam ahkang hte n seng ai nat ni hpe pyi shi htet da nna, shanhte madat mara nga ma ai, nga nna shada da tsun hkat ma ai. ²⁸ Shaloi jang Galile mung ting na shara shagu hkan e, shi a lam kajai gara gumhkawng pri rai wa sai. ²⁹ Shaloi jang, dai tara jawng hta na pru wa nhtawm, shanhte gaw Yaku yan Yawhan hte rau, Simun yan Andre a nta de shang wa ma ai. ³⁰ Ya Simun a kani hkali bu nna kaleng taw nga ai: shaloi jang shanhte gaw shi a lam shi hpe tsun dan mu ai. ³¹ Shaloi shi sit wa nna, shi a lata jum let shi hpe sharawt wu ai. Dai hkali mung kawp mat nna, shi shanhte hpe galaw daw mu ai. ³² Ya, jan shang nna shana ahkying du jang, shanhte machyi makaw hkrum ai ni hte nat kap ai ni nga manga hte hpe, shi hpang de sa hpai tawn mu ai: ³³ dai rai nna, mare ting, dai chyinghka lam makau e sa zup hpawng nga ma ai. ³⁴ Shing rai ana ahkya amyu myu hte machyi ai masha law law hpe shi shamai shatsai ya nna, nat law law hpe mung, shaden kau mu ai; shi gaw Hkristu rai nga ai hpe, nat ni chye nga ma ai majaw, shi shanhte hpe ga tsun na ahkang n jaw mu ai. ³⁵ Jahpawt manap jau jau e, nhtoi garai n htoi yang, shi rawt pru nna, nam na machyi shim ai shara de sa wa nhtawm, dai yang e akyu hpyi nga ai. ³⁶ Shaloi Simun hte shi hte rau nga ai ni shi hpe hkan tam nga ma ai: ³⁷ shanhte shi hpe hkrum nna,Nlang hte gaw nang hpe tam nga ma ai, ngu nna shi hpe tsun mu ai. ³⁸ Shi gaw, Grup yin hkan na mare kahtawng ni hta e ngai hkaw dan lu n ga, shara kaga de anhtesa wa sa ga; dai lam majaw ngai sa du nngai, ngu nna shanhte hpe tsun mu ai. ³⁹ Shaloi, Galile mung ting na shanhte a tara jawng ni hta e, shi sa hkaw dan nna, nat ni hpe shaden kau mu ai. ⁴⁰ Manggang kap ai masha langai mi mung shi hpang de sa ai rai nna, lahput hput di let, Nang hkraw n yang gaw, ngai hpe shapra ya lu na rai nga ndai, ngu nna hpyi nem wu ai. ⁴¹ Shi gaw matsan dum ai hte shi a lata ladawn let shi hpe ahtawk nna, Ngai hkraw nga nngai, san pra wa nu, ngu wu ai. ⁴² Shaloi jang, dai manggang shi kaw na pru mat nna, shi san pra mat ai. ⁴³ Shaloi shi gaw, De a lam,kadai hpe mung, ga hkaw mi pyi nang n tsun n ga, sadi nga u: pru wa nna hkinjawng wa hpe na a hkum madun dan nhtawm, shanhte a matu sakse tai u ga, nang san pra ai a matu, Mawshe tawn da ai hte maren, hkungga wa nawng ya u, ⁴⁴ ngu nna dai wa hpe ginhtim da nhtawm, tin tin shabawn dat wu ai. ⁴⁵ Shi mahtang pru wa nna,dai hpe aja awa hkai dan ai hte dai lam hpe kajai gumhkawng dat wu ai: shing rai Yesu gaw, mare kata de leng leng n shang lu ai rai nna, nam mali hkan e a nga nga ai: shara magup hkan na ni mung, shi hpang de sa du ma ai.

Marku 2

¹Ya tawng marang mi na ai hpang Kaperna-um de bai shang yang, dai nta hta e shi rai nga ai hpe, na gara shajang ma ai. ² Dai rai nna, masha lan lak zup hpawng nga ma ai rai nna, chyinghka lam makau e pyi, shanhte a matu shang shara n nga hkra, rai nga ma ai : shi shanhte hpe dai mungga tsun dan mu ai. ³ Shaloi hkum katsing si ai masha langai mi hpe, marai mali hpai nna shi hpang de tawn da mu ai. ⁴ Masha wunawng chyat nga ma ai majaw, dai wa hpe shi hpang de n shashawn lu jang shi rawng nga ai nta magap hpe shanhte kayen kau mu ai rai nna, dai hpe tawk waw nhtawm, katsing si ai wa hpe yup rai hte nawng shayawn dat mu ai. ⁵ Yesu gaw shanhte a kam sham ai myit mu jang, Sha e, na a yubak dat kau ya sa de ai, ngu nna katsing si ai wa hpe tsun wu ai. ⁶ Dai yang e laika ka ai sara ni nkau mi dung nga nna, Ndai wa gaw, hpa rai ning nga tsun a ta? Shatan nhkan ga shi tsun nga ai: ⁷ Karai Kasang sha n rai yang yubak dat kau ya lu ai gaw kadai wa rai nga a ta? nga nna tinang a kraw kata e myit aru yu nga ma ai. ⁸ Shanhte gaw tinang a kraw kata e shing rai myit aru yu nga ma ai hpe, Yesu gaw shi a wenyi hta chye chyang nga ai majaw, Nanhte hpa rai karaw kata e ndai hte wa myit aru nga myit ta? ⁹ Dai katsing si ai wa hpe, Na a yubak dat kau ya sa de ai; shing n rai, Rawt u, na a yup ku hpe la nna hkawn wa na, ning ngu tsun ai ga ya hta gara mahtang grau tsun loi a ta? ¹⁰ Rai ti mung, Masha kasha gaw, ga ntsa e, yubak dat kau ya ai ahkang aya lu ai gaw,nanhte chye nga myit ga, ¹¹ dai hkum katsing si ai wa hpe, Nang hpe ngai tsun de ga, Rawt u, na a yup rai hpe la nna, na a nta de wa nu, ngu nna tsun wu ai. ¹² Shaloi jang shi rawt nna, shi a yup rai hpe lang let, mahkra a man e pru wa ai; nga ma ai rai nna, Karai Kasang hpe shakawn kungkawn let, Anhte galoi mung, dai zawn re ai n mu yu ga ai, nga ma ai. ¹³ Bai, dai nawng makau de shi pru sa wa ai; shawa hpawng ni nlang hte gaw, shi hpang de sa du ma ai rai nna, shi shanhte hpe sharin shaga yu mu ai. ¹⁴ Garet hkawm wa let, Alhpe a kasha Lewi, kang hta ai sum e dung nga ai hpe shi mu hkrup wu ai rai nna, dai wa hpe, Ngai kaw hkan rit, ngu wu ai. Shaloi shi rawt nna, shi kaw hkan nang nga ai. ¹⁵ Dai hpang shi a nta de shat sha na shi dung nga ai rai nna, kang hta ai ni hte yubak kap ai masha law law wa, Yesu hte shi a sape ni rau dung nga ma ai: kaning rai nme law, law law wa rai nga ma ai rai nna shanhte shi kaw hkan nang ma ai. ¹⁶ Shing rai, yubak kap ai ni hte, kang hta ai ni rau shi shat sha ntga ai hpe, Hparishe ni a laika ka ai sara ni mu mu yang shanhte gaw, Kang hta ai ni hte yubak kap ai ni rau, shi lu sha nga a hka? ngu nna, shi a sape ni hpe tsun mu ai. ¹⁷ Yesu dai hpe na wu yang, N-gun ja ai ni tsi sara n ra ma ai, machyi ai ni sha ra ma ai: ding hpring ai ni hpe shaga na n rai, yubak kap ai ni hpe shaga na she ngai sa du nngai, ngu nna shanhte hpe tsun mu ai. ¹⁸ Ya, Yawhan a sape ni hte Hparishe ni lusha gam ga ma ai: dai rai nna shanhte shi kaw sa du nna, Yawhan a sape ni hte Hparishe ni a sape ni, lusha gam ga ma ai mi, na a sape ni mahtang hpa rai lusha n gam nga ma ta? Ngu mu ai. ¹⁹ Yesu gaw, La nnan wa gaw hkungran ai gawk hte seng ai ma ni hte naww nga nga yang, shanhte lusha gam lu ma ni? la nnan wa, shanhte hte rau naw nga ai laman e, shanhte lusha gam lu ma ai n rai. ²⁰ Rai ti mung la nnan wa hpe shanhte kaw na jahka mat wa na nhtoi du na ra ai; dai nhtoi hta e shanhte lusha gam na ma ra ai. ²¹ Palawng nsa hpe, garai n htun ai sumpan chyen hte kadai mung n kapa ga ai: shing di yang, dai achyen gaw dai hpe sha ai hte, dai nnan gaw dingsa hpe gang je kau nna, de a je mat ai gaw grau kaba wa ai. ²² Tsabyi nnan hpe mung, shanhpyi ndum dingsa hta, kadai mung n bang da ga ai: shing di yang, tsabyi gaw ndum ni hpe kapaw je kau nna, dai tsabyi hte ndum ni sum mat ma ai. ( Tsabyi nnan gaw, ndum nnan hta bang ga ma ai.) ²³ Dai hpang laban nhtoi hta e, Yesu gaw hkaibang yi hku ga hkawm wa ai rai nna, shi a sape ni lai wa let, mam nsi hpe di ma ai. ²⁴ Dai rai nna Hparishe ni gaw, Yu u, n mai galaw ai amu, shanhte hpa rai laban nhtoi hta e galaw nga ma ta? ngu nna shi hpe tsun mu ai. ²⁵ Shaloi shi gaw, Dawi hte shi hte rau nga ai ni kadawn nna, kawsi hkrum nga ma yang, ²⁶ hkinjawng agyi Abiahta a lakhtak e, Karai Kasang a nta de shang nna, hkinjawng ni sha n rai yang gaw, kadai mung n mai sha ai madun da ai muk hpe sha nna, shi hte rau nga ai ni hpe mung, jaw mu ai amu a lam, nanhte kalang mi muk n hti yu myit ni? ngu nna shanhte hpe tsun mu ai. ²⁷ Bai shi gaw, Laban nhtoi gaw masha n matu tai wa sai, masha chyawm gaw laban nhtoi a matu tai wa lu ai n rai; ²⁸ dai rai nna, Masha Kasha gaw, laban nhtoi a Madu mung rai nga ai, ngu nna shanhte hpe tsun mu ai. 

 

Marku 3

¹ Shaloi, tara jawng hta e shi bai shang ai rai nna, dai yang e, lata katsing si ai masha langai mi nga ai. ² Laban nhtoi hta e, dai wa hpe shamai ya na kun? nga nna, Yesu hpe mara shagun na, shanhte gyam yu nga ma ai. ³ Shaloi shi gaw dai lata katsing si ai wa hpe, Kaang e rawt tsap u, ngu nna tsun wu ai. ⁴ Bai, shi shanhte hpe, Laban nhtoi hta e, kaja ai amu galaw na, n kaja ai amu galaw na, masha asak hpe hkye la na, shing n rai sat kau na, gara mahtang mai galaw na a kun? ngu mu ai. ⁵ Shanhte chyawm gaw, atsin sha rai nga ma ai. Shing rai shanhte a myit ja ai majaw, shi myit yawn nna, masin pawt let shanhte hpe grup yin yu nhtawm, Na a lata ladawn u, ngu nna dai wa hpe tsun wu ai. Shi mung ladawn nna, shi a lata mai mat lu ai. ⁶ Dai rai nna, Hparishe ni pru nhtawm, shi hpe kaning di sat kau lu na, nga nna Herodi ngu ai ni hte, shaloi jang, bawng nga ma ai. ⁷ Ya Yesu gaw, shi a sape ni hte rau dai nawng de htawt mat wa ma ai: Galile mung na, masha wunawng wuwa hkan nang nga ma ai; ⁸ dai hta n-ga Yuda mung hteYerusalem mare na, Idumia mung hte, Yawdan hka wora hkran na ni hte, Turu hte Sidun ginwang hkan na masha wunawng wuwa, shi galaw dat ai amu a lam hte hpe, na ma ai rai nna, shi hpang de sa du ma ai. ⁹ Shawa masha ni shi hpe n htu hkra mu ga, li kaji langai mi shi a matu san tawn da na, shi a sape ni hpe tsun da mu ai: ¹⁰ kaning rai nme law, masha law law hpe shi shamai ya mu ai majaw, ana ahkya hkrum ai ni nlang hte, shi hpe ahtawk lu hkra, nga nna shi kaw anin shang wa ma ai. ¹¹ N seng ai nat ni mung shi hpe mu jang, shi a man e dagup nna, Nang gaw Karai Kasang a Kasha rai nga ndai, nga nna jahtau ma ai. ¹² Shi hpe n shadan dan mu ga, nga nna shi shanhte hpe aja awa daru kau mu ai. ¹³ Bai, dai bum de shi lung wa nhtawm, shi ra ai ni kadai hpe mung shaga la mu ai rai nna, shanhte shi hpang de sa du ma ai. ¹⁴ Dai rai nna, shi hte rau nga nga na hte ga hkaw dan na matru shangun dat nna, nat ni hpe shaden kau lu na ahkang lu la mu ga, ¹⁵ marai shi lahkawng hpe shi san da nhtawm shanhte hpe kasa ni, ngu nna shamying da mu ai. ¹⁶ Dai marai shi lahkawng hpe shi san da nna, Simun hpe, Petru ngu nna mying hkawt shamying wu ai; ¹⁷ bai, Zebedi a kasha Yaku hte, Yaku a kanau Yawhan shan nau hpe, Buanerga, ngu nna mying hkawt shamying mu ai; dai gaw, mu ngoi ai kasha yan ngu ai rai nga ai: ¹⁸ bai, Andre, Hpilip, Barhtolume, Mahte, Htawma, Alhpe a kasha Yaku, Htade, Kanani masha Simun hte, ¹⁹ shi hpe ap kau na Yuda Iskarut hte rai ma ai. ²⁰ Dai hpang, shi nta hta e shang wa ai rai nna, shanhte shat pyi n sha lu hkra, shawa masha ni bai zup hpawng nga ma ai. ²¹ Shi a nta masha ni dai hpe na mu yang, Shi myit n gring ng ai, ngu nna shi hpe rim la na pru sa wa ma ai. ²² Dai hta n-ga Yesusalem na yu wa ai laika ka ai sara ni mung, Shi gaw Bezebula rawng ai wa rai nga ai; nat ni a agyi wa hte shi nat ni hpe shaden kau mu ai,nga nna tsun ma ai. ²³ Shing rai shi shanhte hpe shaga la nna, ga shadawn hku hte tsun mu ai gaw, Satan gaw, Satan hpe kaning rai shaden kau lu na a ta? ²⁴ Mungdan langai mi dinghku brun mat wa yang, dai mungdan gaw grin nga lu na n rai; ²⁵ nta langai mi mung, dinghku brun mat wa yang, dai hta gaw grin nga lu na n rai. ²⁶ Dai hte maren, Satan gaw tinang hpang maga rawt nna, tinang hte hka wa yang, shi nhking nga lu ai sha, htum mat na ra ai. ²⁷ Dai hta kaga n-gun ja ai wa hpe garai n gyit yang, shi a nta hta shang nna, shi a arai hpe hpya la na, kadai mung n galaw lu ai; shi hpe gyit ngut jang she, shi a nta hpe hpya la na ru ai. ²⁸ Ngai nanhte hpe teng teng tsun ma de ga, Shinggyim masha ni a yubak yawng hte hte, shanhte a shatan nhkan ai ga amyu myu hpe, raw dat kau na ahkang lu ma ai: ²⁹ rai ti mung, dai chyoi pra ai Wenyi hpe shatan nhkan ai masha kadai rai ti mung, htani htana e raw dat kau ai n hkrum lu na ma ai: dai masha gaw htani htana yubak a kap nga ai wa rai nga ai, ngu mu ai. ³⁰ Dai nga ai gaw, Shi n seng ai nat rawng nga ai, nga nna shanhte tsun ai ga a majaw, tsun mu ai. ³¹ Dai laman e, shi a kanu hte kanau ni gaw, shinggan e tsap nna, shi hpe shaga u ga, shangun dat ma ai. ³² Dai shaloi e shawa masha ni shi a grup yin e dung nga ma ai rai nna, shanhte gaw, Yu u, na nnu hte nnau ni, shinggan de nna nang hpe tam nga ma ai, ngu nna shi hpe tsun mu ai. ³³ Htan let shi shanhte hpe tsun mu ai gaw, Ngai nu hte ngai nau ni gaw, kadai ni mahtang rai nga ma ta? ngu mu ai. ³⁴ Bai, shi a grup yin e dung nga ai ni hpe kayin yu let, shi gaw, Ngai nu hte ngai nau ni hpe, yu mu. ³⁵ Karai Kasang a myit hkan nga ai ni, kadai rai ti mung, ngai nau, ngai jan, ngai nu, rai nga ma ai, ngu mu ai

 

Marku 4

¹ Bai, dai nawng makau e shi sharin shaga rai nga ai. Shawa masha law law wa, shi hpang de sa hpawng ma ai majaw, nawng na li hta e shi shang nna dung nga ai: shawa masha ni nlang hte gaw, nawng makau hkarang ntsa e,nga nga ma ai. ² Shaloi ga shadawn hku law law hte, shi shanhte hpe sharin shaga mu ai rai nna, shi a sharin shaga ai lam hta, Madat mara mu: ³ yu mu, nli gat ai wa gaw, nli gat na pru sa wa ai. ⁴ Gat dat wu yang, nkau mi gaw lam makau e hktat nna, u ni dai hpe sa hta sha ma ai. ⁵ Kaga gaw, ga n law ai lung rawk ntsa e hkrat wa nna, ga n htat ai majaw ya sha tu pru ti mung, ⁶ jan pru katen jang, krau mat wa nna, ru n jung lu ai majaw nyip si mat ma ai. ⁷ Kaga gaw,ju hpun ni hta hkrat ai; ju hpun ni mung kaba wa nna, dai hpe lim kau mu ai majaw, asi n si lu ai. ⁸ Bai, kaga gaw ga kaja hta hkrat ai; dai gaw asi si let, kaba wa ai hte grawng wa ai rai nna, dang sumshi, kru shi, latsa rai, mayat wa ai. ⁹ Bai shi gaw, Na la na, na tu ai wa gaw, na lu u ga, ngu nna shanhte hpe tsun mu ai. ¹⁰ Dai hpang shi hkrai sha rai nga yang, shi hte rau nga ai ni hte sape shi lahkawng gaw, dai ga shadawn a lam shi hpe san mu ai. ¹¹ Dai rai nna, shi gaw, Karai Kasang a mungdan a sung htum ai lam hpe, nanhte hpe shadan dan ai ahkang rai nga ai: ¹² shinggan de nga ai ni chyawm gaw, Myit n kayin lu nna, raw dat kau ai n hkrum mu ga, Shanhte mu lamu n yu lu na hte,Na lana n chye na lu mu ga, hpa lam mung ga shadawn hku hte sha, shanhte hpe shapraw dan na nme ai, ngu nna shanhte hpe tsun mu ai. ¹³ Bai shi gaw, Ndai ga shadawn hpe nanhte n chye na lu mu ni? dai rai yang, ga shadawn yawng hte hpe kaning rai chye lu na myit hka? ¹⁴ Nli gat ai wa gaw, dai mungga hpe gat nga ai. ¹⁵ Lam makau e mungga hpe gat da nna, taw nga ai hte chyawm gaw,- dai mungga hpe na la ai shaloi jang, Satan gaw sa du nna, shanhte hta gat da ai mungga hpe shaw la kau ai ni hpe,ang nga ai. ¹⁶ Dai hte maren, dai lung rawk hta gat da ai hte gaw, dai mungga hpe na la ai, shaloi jang, kabu gara ai myit hte hta la ai ni rai ma ai: ¹⁷ rai ti mung, shanhte hta ru n jung nga ai rai nna, tawng marang mi sha nga nga ma ai: dai hpang, dai mungga a majaw ru tsang ai hte zingri zingrat hkrum ai shaloi jang, shanhte myit kataw wa ma ai. ¹⁸ Bai, ju hpun hta e, kaga mung gat nga ai; dai ni gaw, dai mungga hpe na la ti mung, ¹⁹ ndai mungkan a myit tsang ai, sut gan a hkalem ai hte myit marin ai lam kaga ga shang wa nna, dai mungga hpe lim kau ai majaw, asi n si lu ai ni, rai nga ma ai. ²⁰ Bai, ga kaja hta e gat nga ai ni chyawm gaw, dai mungga hpe na la ai hte dai hpe hkam la nna, asi si let, dangsumshi, kru shi, latsa dang, mayat wa ai ni rai nga ma ai, ngu nna shanhte hpe tsun mu ai. ²¹ Bai shi shanhte hpe tsun mu ai gaw, Pyingdin hpe, mung npu e, shing n rai, yup ku npu e shadun na, la sa ga ma ni? pyengdin shadun hta e shadun na she,la sa ga ma ai, n rai ni? ²² kaning rai nme law, n dan n pru lu hkra makoi da ai arai n nga ai; dai hta kaga, makoi magap da ai arai mung, n dan n leng wa lu na, n nga ai. ²³ Na la na, na tu ai wa kadai mung, na la mu ga, ngu mu ai. ²⁴ Bai shi shanhte hpe tsun mu ai gaw, Nanhte hpa na la myit dai gaw, sadi nga mu: nanhte hteng ya ai dang hte nanhte hpe bai hteng ya na ma rin dai: rai sa, nanhte myat wa na ma rin dai. ²⁵ Kaning rai nme law, lu ai wa kadai hpe mung,naw jat jaw na ra ai; n lu ai wa kadai hpe mung, shi lu ai rai hpe pyi,shi kaw na naw shaw la ya na ra ai, ngu mu ai. ²⁶ Bai shi gaw, Dai rai nna, Karai Kasang a mungdan gaw, aga nsta e nli gat bang ai masha zawn, rai nga ai; ²⁷ gat ngut jang, shani shana shi yup wa, rawt wa nga ai rai nna, shi n chye ai lam hta nli gaw prut wa nna, tu kaba wa nga ai. ²⁸ Aga gaw shi hkrai asi si wa ai hte, shawng e maku, hpang e htingkyang, dai hpang htingkyang hta e mam nsi hkum wa shangun ai. ²⁹ Mam myin jang nmut ta du ai majaw, shi shaloi jang, dai nhkyau hpe shangun dat wu ai, ngu mu ai. ³⁰ Bai shi gaw, Karai Kasang a mungdan hpe, hpa hte shabung lu na gaw ta? hpa ga shadawn hku hte shadawn na gaw ta? ³¹ Dai gaw chyinghkrang tum zawn rai nga ai; ga ntsa e gat dat jang ga ntsa na tum amyu mahkra hta kaji htum dam ti mung, ³² gat dat ai hpang, tu wa nna, shatmai lap amyu mahkra hta grau kaba wa ai hte, lakung lakying kung dam wa nna ntsa malen u ni de a shingnip hta e shingbyi nga lu ma ai, ngu mu ai. ³³ Shing rai ga shadawn hku law law hte, shanhte matsing lu ai hte maren, shi shanhte hpe dai mungga lam tsun dan mu ai. ³⁴ Ga shadawn hte n rai yang gaw,shi shanhte hpe hpa mung n tsun dan yu ai. Rai ti mung, shanhte hkrai rai nga ma yang, ga nlang shi a sape ni hpe shapraw shadan dan mu ai. ³⁵ Dai shani a shana du jang, shi gaw, Anhte wora hkran de rap wa sa ga, ngu nna shanhte hpe tsun mu ai. ³⁶ Dai rai nna, shawa masha ni hpe kau da nhtawm,shi kaman nga ai hte maren, shanhte gaw shi hpe li hta e shashawn la mu ai; li kaga mung shi hte rau naw lawm ma ai. ³⁷ Shaloi, nbung laru kaba ru wa nna, hka leng ni li hta kaput bang wa ai majaw, dai li gaw hpring magang wa ai. ³⁸ Shi chyawm gaw, li mai de punghkum ntsa e, yup pyaw nga ai: shaloi shanhte shi hpe jasu nna, Sara e, anhte mat mat na hpe, nang hpa n nawn nga n ni? ngu nna shi hpe tsun mu ai. ³⁹ Dai majaw shi rawt nna, nbung hpe daru wu ai hte,dai nawng hpe, Atsin sim rai nga u, ngu wu ai. Dai nbung mung num mat wa nna,a katsi sha rai mat wa ai. ⁴⁰ Shaloi shi gaw, Nanhte hpa majaw hkrit nga myit ta? nanhte kam sham ai myit garai n rawng nga myit ni? ngu nna shanhte hpe tsun mu ai. ⁴¹ Shanhte mahtang hkrit kaba hte hkrit nga nna, Ndai wa gaw kadai wa re ai i? dai nbung hte nawng pyi shi a ga madat nga ma hka? nga nna shada da tsun shajang ma ai. 

 

Marku 5

¹ Ya dai nawng wora hkran na, Gerase mung de shanhte du ma ai. ² Shi gaw li de na pru wa ai shaloi jang, n seng ai nat kap ai masha langai mi lup wa kaw na pru nna, shi hpe sa tau wu ai. ³ Dai wa a nga shara gaw, lup ni hta e rai lu ai rai nna, kadai mung, hpri sumri hte pyi shi hpe n gyit da lu mu ai; ⁴ kaning rai nme law, hkang hkyihkyang hte hpri sumri hte law law lang shi hpe gyit da mu ti mung, hpri sumri hpe shi gang dut kau ai hte, hkang hkyihkyang ni hpe agrawp malan kau wu ai rai nna, kadai mung shi hpe shani la lu na n-gun n rawng ma ai. ⁵ Shani shana tut e dai lup ni hte bum hkan e shi nga nga nna,jahtau marawn let shi hkum hpe nlung hte arin aran di wu ai. ⁶ Yesu hpe tsan tsan kaw nna mu mada wu yang, shi gat na nna shi hpe naw ku ai hte, Tsaw Htum ai Karai Kasang a KashaYesu e, ngai nang hte hpa daw nga ga ta? ⁷ Nang ngai hpe n zingri n ga, Karai Kasang hta, ngai nang hpe dagam de ai, ngu nna nsen kaba hte jahtau wu ai. ⁸ Kaning rai nme law, shi gaw, N seng ai nat, nang e, dai wa kau na pru mat wa u,ngu nna shi hpe jet da boi sai. ⁹ Bai Yesu gaw, Na amying hpa rai lit ta? ngu nna shi hpe san wu yang, shi gaw, Anhte law wa rai nga ga ai majaw, nye a amying Legio rai nga li ai, ngu nna shi hpe htan wu ai. ¹⁰ Dai hta kaga, dai mung hkan na shanhte hpe n shabawn kau mu ga, shi Yesu hpe grai hpyi nem wu ai. ¹¹ Ya,dai bum lanem hkan e, wa nawng kaba kanaw sha nga ma ai. ¹² Dai rai nna, nat ni gaw, Anhte dai wa ni hta shang lu u ga, shangun dat mi, ngu nna shi hpe hpyi nem mu ai. ¹³ Shaloi shi shanhte hpe ahkang jaw dat mu ai. N seng ai nat ni chyawm gaw, pru wa nhtawm wa ni hta shang ma ai rai nna, wa nawng gaw dai n-gam mahka kaw na nawng de rut gat bang wa nna, nawng hta e marit si mat ma ai: dai wa ni gaw hkying lahkawng daram rai nga ma ai. ¹⁴ Wa rem ai ni chyawm gaw, hprawng gat wa nna, dai mare hte nta htinghkrai hkan e, dai lam tsun dan ma ai. Shaloi, dai byin ai amu hpe yu yu na, shanhte pru sa wa ma ai. ¹⁵ Shanhte Yesu kaw du ma yang, Legio lawm ai nat kap ai wa gaw, hpun palawng bu hpun nna, shawoi na myit hte dung nga ai hpe, shanhte mu mu ai rai nna,hkrit kahpra mat ma ai. ¹⁶ Dai lam mu chye ai ni mung, dai nat kap ai masha hte wa ni hta kaning rai byin ai hpe, shanhte hpe hkap hkai dan mu ai. ¹⁷ Dai rai nna, shanhte a bu ga na pru wa na lam shi hpe jawm hpyi nem mu ai. ¹⁸ Dai li hta wa shang yang,shi hte rau nga nga na, nat kap ai wa gaw shi hpe hpyi nem wu ai. ¹⁹ Shi mahtang ahkang n jaw ai sha, Na nta na ni hte na a manang ni hpang de bai wa nna, dai Madu nang hpe gade wakarum nna, matsan dum nga ai hpe, wa tsun dan su, ngu nna shi hpe tsun dat wu ai. ²⁰ Dai majaw shi pru wa nna, Yesu shi hpe gade wa karum sai gaw Dekapoli mung ginwang hkan e, hkaw dan mu ai rai nna, nlang hte nan mau mahka nga ma ai. ²¹ Ya, Yesu gaw li hta wora hkran de bai rap wa yang, masha wunawng kaba shi kaw sa hpawng ma ai; dai nawng makau e shi nga nga ai. ²² Shaloi, tara jawng agyi ni hta na, Ya-iru mying ai masha langai mi sa du nna shi hpe mu hkrup jang,shi a lagaw nhpang e dingnyawm nna, ²³ Nye a shayi sha kaji nsa hti wa magang sai: shi bran wa nna, naw a hkrung nga u ga, shi a ntsa e lata mara ya na, sa wa rit, ngu nna akroi anoi shi hpe hpyi nem wu ai. ²⁴ Dai rai nna, shi hte rau sa wa ai. Masha wunawng kaba mung, shi kaw hkan gumbawm nna, shanhte gaw shi hpe kanawng matep hkra mu ai. ²⁵ Shi lahkawng ning tup sai htaw machyi ai numsha langai mi mung lawm nga ai: ²⁶ shi gaw tsi sara law law a lata hta nni nkri law law wa hkrum ai hte, shi lu malu mahkra hpe ginlut kau wu ti mung, mai mat lu hkra n rai, grau nna yak wa lu ai; ²⁷ shi gaw Yesu a lam na wu yang, dai shawa hpawng a shingnawm hta sa du nna, shi a hpun palawng hpe ahtawk wu ai. ²⁸ Kaning rai nme law, shi gaw, Shi a hpun palawng hpe sha pyi ngai ahtawk lu taw, ngai mai wa lu na ring ngai, nga ai. ²⁹ Shaloi jang, shi a sai nhpang hkyet mat wa nna,shi a atsu atsam mai mat ai hpe, shi hkum dai dum chye wu ai. ³⁰ Yesu gaw, shi hta na atsam pru wa ai hpe, shi a myit hta shaloi jang chye dum wu ai majaw, dai shawa hpawng de kayin wa let, Nye a hpun palawng hpe kadai ahtawk nga nit ta? ngu nna san mu ai. ³¹ Dai rai nna shi a sape ni, Shawa masha ni nang hpe kanawng matep hkra nga ai hpe, nang mu nit htawm e, Ngai hpe kadai ahtawk mi ta? naw nga n hka i? ngu nna shi hpe htan mu ai. ³² Shi mahtang, dai amu galaw ai num hpe madayu na, kayin yu nga ai. ³³ Dai numsha chyawm gaw, shi hta byin ai amu hpe chye chyang ai majaw, hkrit gari let sit sa nna, shi a man e dingnyawm nhtawm, shi a lam yawng mayawng hte hpe teng ai hku sha tsun dan wu ai. ³⁴ Shi mahtang, Shayisha e, na a kam sham ai gaw nang hpe shamai ya nit dai: ngwi pyaw ai hte wa u: na a atsu atsam mai wa nu ga,ngu nna shi hpe tsun dat wu ai. ³⁵ Shi naw tsun nga yang, tara jawng agyi a nta na ni sa du nna, Na a shayi sha si mat sai; dai sara hpe hpa rai naw shatsang nga n ta? ngu mu ai. ³⁶ Yesu mahtang dai sa tsun ai ga hpe hpa n nawn nna, Hkum hkrit et; kam sham ai myit sha rawng u, ngu nna tara jawng agyi wa hpe tsun dan wu ai. ³⁷ Shaloi, Petru, Yaku hte Yaku a kanau Yawhan hta kaga, shi kaw hkan nang na ahkang kadai hpe mung n jaw mu ai. ³⁸ Ya, dai tara agyi a nta de du ma yang, kaming kamawng re ai, hkrap ngu hkrap ngoi ai hte sharung shayawt kaba hpe shi mada mu wu ai: ³⁹ nhku de shang wa yang, Nanhte hpa rai kaming kamawng re ai hte hkrap ngu hkrap ngoi rai nga myit ta? ma gaw si ai n rai, yup pyaw nga ai, nga nna shanhte hpe tsun mu ai. ⁴⁰ Shanhte chyawm gaw shi hpe asawng asang ngu kau mu ai. Shi mahtang nlang hte hpe shaden kau ngut jang, dai ma a kanu yan kawa hte shi hte rau nga ai ni hpe, shaga la nna, dai ma a taw nga ai shara de shang wa ai: ⁴¹ shaloi dai ma a lata hpe shi jum da nna, Talihta Kumi, ngu wu ai; de a ga lachyum gaw, Mahkawn e, rawt u, ngai ngu de ai, nga ai rai lu ai. ⁴² Shaloi jang, dai mahkawn gaw rawt nna, hkawm wa ai: shi a aprat gaw shi lahkawng ning rai nga ai. Shing rai shanhte nachying mau mahka mat ma ai. ⁴³ Dai amu a lam hpe kadai mung n chye mu ga, shi shanhte hpe grai di ginhtim da mu ai: dai hta kaga, ma hpe shahpa jaw na, shi htet da mu ai. 

 

Marku 6

¹ Shaloi dai yang na shi pru mat wa ai rai nna, shi a bu ga de du wa ai: shi a sape ni mung shi kaw a hkan nang nga ma ai. ² laban nhtoi du yang, tara jawng hta e, shi sharin shaga hpang nga ai. Ga na lu ai ni law law wa, myit na kahpra nga ma ai rai nna, Ndai wa gaw, ndai hte hpe kanang na lu la wu hka? Dai wa lu la ai hpaji byengya gaw hpa baw rai nga a ta? Shi a lata hta byin ai, ndai magam amu gaw, hpa wa rai nga a ta? ³ Shi gaw, dai lasama wa rai nga ai, n rai ni? Mari a kasha shi rai nga ai hte, Yaku, Yosep, Yuda, Simun hte a kahpu mung, shi rai nga ai, n rai ni? Shi a kajang ni mung, anhte hte rau,nang e nga nga ma ai, n rai ni? nga wa ma ai rai nna, shi a lam myit kataw wa ma ai. ⁴ Yesu mahtang, Myihtoi gaw, tinang a bu ga hta tinang a mayu dama ni hte,tinang a nta hta n rai jang she, arawng lu nga ai, ngu nna shanhte hpe tsun mu ai. ⁵ Nji nmu hkrum ai nkau mi a ntsa e lata mara nna shamai ya na hta kaga, daiyange hpa magam amu hpe mung, shi n galaw lu ai. ⁶ Shanhte a n kam n sham ai myit majaw, shi a mau nga ai. Dai hpang, grup yin hkan na kahtawng ni hta e, shi kawan hkawm nna, sharin shaga nga ai. ⁷ Shaloi dai sape shi lahkawng hte hpe shi shaga la nhtawm, marai lahkawng yep yep di nna, shangun dat mu ai hte, n seng ai nat ni hpe dang kau lu na ahkang, jaw dat mu ai rai nna; ⁸ dawhkrawng hta kaga, hkrun lam a matu, muk mung, htingpa mung, shingkyit hta dingsen mung, n gun n lang ai sha, kyepdin din nna, ⁹ palawng lahkawng hpe mung n hpun ai sha, sa wa mu, ngu nna shanhte hpe shadum dat mu ai. ¹⁰ Dai hta n-ga, Gara nta hta rai ti mung, nanhte shang myit yang, dai yang na pru wa ai nhtoi du hkra, dai kaw a nga nga mu. ¹¹ Gara shara hta e rai ti mung, nanhte hpe n hkap la nna, nanhte hpe n madat mara nga ma yang gaw, dai yang na pru wa let, shanhte hpang maga de sakse tai u ga, nanhte a lagaw lahpan hta kap ai ga nhpu hpe, ahpu sharun kau da mu, ngu nna shanhte hpe tsun dat mu ai. ¹² Shaloi shanhte pru wa nna, masha ni myit malai lu na lam, hkaw dan mu ai: ¹³ nat law law hte hpe shanhte shaden kau mu ai hte, nji nmu hkrum ai ni law law hpe naman chya ya nna shamai shatsai ya dat mu ai. ¹⁴ Shaloi Herod hkawhkam gaw dai lam hpe na wu ai: kaning rai nme law, Yesu a amying dan hkung wa lu ai rai nna, masha ni gaw, baptisma jaw ai Yawhan gaw si ai ni kaw na bai hkrung rawt wa sai; dai majaw, dai magam amu hte gaw, dai wa hta e pra pra rai pru nga ai; ¹⁵ kaga ni mahtang, Shi gaw, Elia rai nga ai; bai kaga hte gaw, Moi na myihtoi langai mi zawn, myihtoi bai pru ra ai, nga shajang ma ai. ¹⁶ Herod mahtang, dai na wu yang, Ngai baw htau kau se ai Yawhan gaw bai hkrung rawt wa sai, nga ai. ¹⁷ Ya Herod shi hkum nan, shi a kanau Hpilip a madu jan Herodia hpe hkungran la ai majaw, shangun dat nna Yawhan hpe rim la nhtawm, htawng hta e hkang da wu ai. ¹⁸ Kaning rai nme law, Yawhan gaw, Na nnau a madu jan hpe la na, n mai nga ai, ngu nna Herod hpe daru kau wu ai. ¹⁹ Herodia mung shi hpe myit machyi nga nna, shi hpe sat kau mayu wu ti mung, shi n rai lu ai: ²⁰ kaning rai nme law, Yawhan gaw ding man ai hte chyoi pra ai wa rai nga ai hpe, Herod chye wu ai majaw, shi hpe hkrit kamyin ai hte makawp maga nga ai: shi a ga na la wu yang, shi myit grai ung ang rai nga ti mung, shi a ga na la na grai ra nga ai. ²¹ Ya, Herod a shangai ai nhtoi du nna, shi gaw shi a hkringmang ni, hpyen du ni hte Galile mung na agyi ni hpe shana shat galaw daw nga yang: ²² mai ang ai nhtoi du ai majaw, Herodia a shayi sha shang nhtawm ka nga ai: dai lam hpe, Herod hte shi hte rau dung ai ni gaw ra mu ai. Dai rai nna, dai hkawhkam gaw, Nang tsaw matsaw ngai kaw hpyi rit ngai jaw na de ai, ngu nna dai mahkawn hpe tsun wu ai. ²³ Dai hta n-ga, Nang ngai hpe hpyi mahpyi, nye a mungdan kaang hkup du hkra, ngai nang hpe jaw na de ai, ngu nna shi hpe dagam wu ai. ²⁴ Shaloi shi pru wa nna shi a kanu hpe, Ngai hpa hpyi na ma? ngu nna san wu yang, shi gaw, baptisma jaw ai Yawhan a baw hpe hpyi u, ngu wu ai. ²⁵ Shaloi jang dai hkawhkam hpang de shi tin tin shang nna, Baptisma Sara Yawhan a baw hpe, ban hta e nang ngai hpe ya jang jaw na, ngai ra nga nngai, ngu nna hpyi wu ai. ²⁶ Dai hkawhkam chyawm gaw ja ja myit yawn nga ti mung, dai dagam kau ai ga hte, rau dung rau hpawng nga ai ni a majaw, shi hpe ndang kau mayu ai n rai. ²⁷ Shaloi jang, hkawhkam gaw, mang galang langai mi hpe shangun dat nna, Yawhan a baw hpe sa la na, hkang dat wu ai. ²⁸ Shaloi shi sa wa nna, htawng hta e Yawhan a baw hpe daw nhtawm, dai baw hpe ban e la wa nna, dai mahkawn hpe ya dat wu ai: dai mahkawn mung kanu e ap ya wu ai. ²⁹ Shi a sape ni dai na mu yang, shanhte sa du nna, shi a moi mang hpe la wa nhtawm, lup hta e tawn da mu ai. ³⁰ Dai hpang, kasa ni gaw Yesu kaw wa zup nna, shanhte galaw sai lam nlang hte hte, sharin shaga ya ai lam yawng shi hpe shana dan mu ai. ³¹ Dai rai nna shi gaw, Nam mali kata na machyi shim ai shara de, nanhte hkrai nan sa nna, loi mi ban sa la mu, ngu nna shanhte hpe tsun mu ai. Kaning rai nme law, sa sa wa wa rai nga ai ni gaw law la ma ai rai nna, shanhte gaw shat sha na aten pyi n mu da mu ai. ³² Dai rai nna, shanhte gaw li hte sa nhtawm nam mali na machyi shim ai shara de sa wa ma ai. ³³ Rai ti mung, masha ni gaw shanhte pru sa wa ma ai hpe mu mada nna, law law wa shanhte hpe chye mu ai hte, mare shagu hkan na hkarang lam hku e gat sa wa nna, shanhte a shawng e du ma ai. ³⁴ Shing rai shi pru nna masha wunawng kaba mu mada ai hte shanhte gaw rem ai wa n nang ai sagu hpung hte bung nga ma ai majaw, shi shanhte hpe matsan dum nna, law law wa sharin shaga ya mu ai. ³⁵ Ya, jan du wa sa yang, shi a sape ni shi kaw sa du nna, Ndai yang nam mali rai nga ai hte jan du wa magang sai: ³⁶ dai rai nna masha ni gaw grup yin kahtawng hte htinghkrai ni hta, lusha hpa hpa sa mari la mu ga, shanhte hpe shabawn dat mu, ngu mu ai. ³⁷ Shi gaw, Nanhte nan shanhte hpe sha na jaw mu, ngu nna htan mu ai. Shanhte gaw, Anhte sa wa nna, gumhpraw lap ni tsa hte muk mari jaw na rai kun? ngu nna shi hpe san mu ai. ³⁸ Shi mahtang shanhte hpe, Nanhte muk gade lu nga myit ta? sa yu mu, ngu mu ai. Shanhte chye jang, Muk manga hte nga lahkawng sha rai nga ai, ngu mu ai. ³⁹ Dai rai nna yawng hte gaw, hpung mi hte hpung mi, dai tsingdu yang e hkrawn taw nga mu ga, shi htet da mu ai. ⁴⁰ Shanhte mung latsa tsa hte manga shi shi di nna, lam mi hte lam mi, dung nga ma ai. ⁴¹ Shaloi dai muk manga hte nga lahkawng hpe shi la nna, lamu de mada yu let shaman ya nhtawm, dai muk hpe ahkyep alep nna, masha ni a man e hkan tawn mu ga, sape ni hpe jaw da mu ai; dai nga lahkawng hpe mung, masha gu hkra hpe karan jaw mu ai. ⁴² Shanhte nlang sha nna hkru kat ma ai. ⁴³ Dai hta kaga ngam ai ahkyep ahkap hpe shanhte lahkawn la yang, mung shi lahkawng hpring dem rai nga ai; nga mung naw ngam nga ai. ⁴⁴ Muk sha ai ni chyawm gaw, lasha hkying manga ting rai nga ma ai. ⁴⁵ Shaloi jang, shawa masha ni hpe naw shabawn lawn nga yang, sape ni li hta shang nna, shi a shawng e nawng wora hkran Betsaida mare de rap sa wa mu ga,shi shanhte hpe reng dat mu ai. ⁴⁶ Shanhte hpe shabawn dat ngut jang, shi akyu hpyi na matu, dai bum de lung wa sai. ⁴⁷ Shana du yang, dai li gaw nawng kaang e rai nga nna, shi hkrai sha hkarang de hti nga ai. ⁴⁸ Nbung hkap htu nga ai majaw, dai li hpe grai shap kyin nga ma ai hpe, shi mu mu yang, dai shana na ahkying ladaw mali daram hta e, nawng ntsa e hkawm let, shi shanhte kaw sa du ai rai nna, shanhte kaw lai wa mayu sam nga ai. ⁴⁹ Shanhte chyawm gaw, shi nawng ntsa e hkawm nga ai hpe, mu mu yang, dai gaw minla rai nga ai, myit nawn nna jahtau marawn ma ai: ⁵⁰ kaning rai nme law, nlang hte gaw shi hpe mu mada nna myit kahpra nga ma ai. Shaloi jang, shi shanhte hte shaga hkat nna, Ngwi pyaw myit ga: ngai she rai nngai; hkum hkrit myit, ngu nna shanhte hpe tsun mu ai. ⁵¹ Shaloi dai li de, shi shanhte kaw shang nna, dai nbung gaw num mat wa ai. Shanhte mahtang nachying mau katu nga ma ai: ⁵² kaning rai nme law, dai muk sha ai lam shanhte n chye na ma ai hte, shanhte a myit ja mat ma lu ai. ⁵³ Ya, wora hkran de rap tawng ngut yang, Genesaret ngu ai danam de shanhte du ma ai rai nna, sek nga ma ai. ⁵⁴ Dai li hta na shanhte yu wa ma ai shaloi jang, masha ni shi hpe chye mu ai hte, ⁵⁵ dai ginwang ting gat kahkrang nna, machyi makaw hkrum ai ni hpe, hpun panep hte nawng, shi nga ai shara de, hpai sa du mu ai. ⁵⁶ Dai hta kaga, gara kahtawng hta e rai ti mung, mara hta e rai ti mung, htinghkrai shara hta e rai ti mung, shi shang wa yang, dai yang na htingwang hta e, ana ahkya hkrum ai ni hpe shanhte tawn da mu ai rai nna, shi a hpun palawng banbyau hpe sha pyi ahtawk na ahkang hpyi nem mu ai: shi hpe ahtawk lu ai ni yawng hte nan, mai mat wa ma ai. 

 

Marku 7

¹ Dai shaloi e,Hparishe ni hte, Yerusalem na lung wa ai laika ka ai sara ni hkau mi gaw, shi kaw sa zup ma ai rai nna, ² shi a sape nkau mi, lata n shin kau ai, awu asin ngu ai hte shat sha nga ma ai hpe, mu hkrup da mu ai. ³ Kaning rai nme law, Hparishe ni hte Yuda ni mahkra gaw, ji wa ni a ga madat hpe hkan nga ma ai rai nna, lata hpe atsawm sha n shin kau yang gaw, shat n sha yu ma ai: ⁴ gat de na bai wa ti mung, hkum garai n shin yang, shanhte n sha yu ma ai: dai hta n-ga; gawm ni, ka-mai ni, magri wan ni hpe kashin kau ai hta kaga, shanhte hkan ai ahtung ahking law law wa, naw rai nga ma lu ai. ⁵ Dai rai nna Hparishe ni hte laika ka ai sara ni gaw, Na a sape ni, hpa rai ji wa a ga madat hpe n hkan ai wa, awu asin re ai lata hte nan, shat sha nga ma ta? ngu nna shi hpe san mu ai. ⁶ Shi gaw, Sawt ai ni e, laika hta ka da nga ai hte maren, Ndai amyu gaw tinang a nten hte ngai hpe hkungga lara ma ti mung, Shanhte a myit masin ngai hte tsan gang ma lu ai: ⁷ Masha ga matsun hpe sha, htawn sharin shaga nga ma ai majaw, Shanhte ngai hpe kaman lila naw ku nga ma ai, nga nna, nanhte a lam Esaia, myihtoi ga ka da ai gaw, gaja wa teng sa lu ai. ⁸ Nanhte gaw Karai Kasang a hkang da ai ga hpe kau da nhtawm, masha a ga madat hpe sha hkan nga myit dai, ngu mu ai. ⁹ Bai, shi shanhte hpe, Gaja wa nanhte a ga madat hpe hkan nga na nga nna. Karai Kasang a hkang da ai ga hpe nanhte shingkan kau mu ai. ¹⁰ Kaning rai nme law, Na nnu nwa hpe hkungga lara di u; bai, Kanu kawa hpe n kaja ai ga tsun ai wa gaw, teng teng si u ga, nga nna Mawshe tsun nga ti mung, nanhte gaw, ¹¹ tinang a kanu kawa hpe, Nye a lata na nang lu la mai ai arai gaw, Korban ngu ai, Karai Kasang a matu alu kumhpa rai nga ai, nga nna tsun ai wa kadai rai ti mung, ¹² tinang a kanu kawa hpe karum na, nanhte hkum nga myit dai; ¹³ dai rai nna, nanhte ap tawn da ai ga madat hte, Karai Kasang a mungga hpe nanhte sai kau da mu ai; shing rai lam law law wa nanhte galaw nga myit dai, ngu nna shanhte hpe tsun mu ai. ¹⁴ Shawa masha ni hpe shi bai shaga la nna shanhte hpe tsun mu ai gaw, Nanhte nlang ngai hpe madat mara nna, chye na la mu: ¹⁵ masha a shinggan e nga nna, shi kata de shang wa ai hpa rai ti mung, shi hpe awu asin di kau lu ai n rai; masha a kraw kata de nna pru wa ai mahtang gaw, masha hpe awu asin di kau wu ai, ngu mu ai. ¹⁷ Dai hpang, shawa masha ni hte hka wa nna, nta de bai shang yang, shi a sape ni, dai ga shadawn a lam shi hpe san mu ai. ¹⁸ Dai rai nna, shi shanhte hpe, Dai hpe sha mung nanhte n chye na la myit ni? Shinggan de nna masha kata de shang waai hpa rai ti mung, masha hpe awu asin di kau lu ai n rai, nanhte n dum lu myit ni? ¹⁹ kaning rai nme law, dai gaw, shi a myit masin kata de shang wa ai n rai, shi a kan kata de sha shang wa ai hte hkum tsan ai shara de bai pru wa ai: - dai lam lusha yawng mayawng hpe jasan jaseng di wu ai. ²⁰ Bai lam mi gaw, Masha hta na pru wa ai gaw, masha hpe awu asin di kau wu ai: ²¹ kaning rai nme law, masha a myit kata de nna, n kaja ai myit mang ai, num shut hpyit na, lagu na, masha sat na, num shaw na, lawhpa ai, n hkru n hkra ai ²² hkalem ai, ngang ai, manawn masham ai, shatan nhkan ai, gumrawng ai hte angawk angak re ai myit, pru wa ai: ²³ dai n hkru ai lam nlang hte gaw kata de nna pru wa ai rai nna, masha hpe awu asin di kau wu ai, ngu mu ai. ²⁴ Shaloi dai yang na shi rawt wa nna, Turu hte Sidun lamu ga jarit hkan e du hkra pru sa wa ai. Nta hta e shi shang nna, dai hpe kadai mung n chye lu u ga,shi ra nga ti mung, koi lu ai n rai. ²⁵ Kaning rai nme law, n seng ai nat kap ai shayi sha kaji lu ai numsha gaw, shi a lam shaloi jang, na wu ai rai nna,sa du nhtawm, shi a lagaw nhpang e dingnyawm nna, shi a shayi sha kaw na dai nat hpe shaden kau ya u ga, shi hpe hpyi nem wu ai: ²⁶ dai numsha chyawm gaw Heleni amyu na Suru-Hpiniki numsha rai nga ai. ²⁷ Dai rai nna Yesu gaw, Ma ni hpe shat hkru hkra shawng jaw n ga: ma ni a shat la nna, gwi ni hpe jaw kau na n mai nga ai, ngu nna shi hpe tsun wu ai. ²⁸ Dai numsha mahtang, Rai sa, Madu e, sha ku npu na gwi ni mung, ma ni a shat ahkyep ahkap hpe sha ga ma ai, ngu nna shi hpe htan wu ai. ²⁹ Bai, Yesu gaw, Dai tsun ai ga a gawp e sa wa su: nat gaw, na a shayi sha kaw na pru wa sai, ngu nna shi hpe tsun wu ai. ³⁰ Dai majaw shi nta de bai wa ai rai nna, dai ma gaw yup ku ntsa e kaleng taw nga ai hte, nat gaw shi kaw na pru mat ai hpe, mu wu ai. ³¹ Bai, Turu a ga jarit kaw nna pru wa yang, Sidun hpe lai ga wa nna, Dekapoli ginwang kaang hku ga sa wa nhtawm, Galile nawng de sa du ai. ³² Shaloi na lahpang nna maa ai masha langai mi hpe, shanhte shi hpang de woi wa mu ai rai nna, shi a ntsa e lata mara ya na, hpyi nem wu ai. ³³ Shing rai shawa masha hpawng na, shim ai shara de shi hpe shapraw la nhtawm, dai wa a na lashing hku shi a layung achyaw bang ai hte, mayen mahtaw nhtawm, shi a shinglet hpe mung ahtawk ya wu ai rai nna, ³⁴ lamu de mada yu let, shi madai nna, dai wa hpe, Ethpahta, ngu wu ai: dai gaw, Hpaw wa u, nga ai, rai lu ai. ³⁵ Dai rai nna, shi a na san mat wa ai hte, shi a shinglet lakang hpyan mat wa nna, ga leng leng tsun lu ai. ³⁶ Dai lam kadai hpe mung n tsun dan mu ga, shi shanhte hpe ginhtim da mu ti mung, shanhte hpe je ginhtim je shanang hkai dan shajang mu ai. ³⁷ Shanhte mung nachying wa mau mahka mat ma ai rai nna, Shi yawng mayawng hte hpe mai kaja ai hku galaw lu ai: na lahpang ai ni hpe na lu shangun nna, n chye shaga ai ni hpe ga tsun shangun lu ai, nga ma ai. 

 

Marku 8

¹ Ya, dai nhtoi hte hta e, masha wunawng kaba bai hpawng nga ma ai rai nna,shanhte shahpa hpa n lu ma ai shaloi, shi sape ni hpe shaga la nna, ² Shawa masha ni ya masum ya tup ngai hte rau nga nga nna, hpa shahpa mung n lu ma ai majaw, ngai shanhte hpe matsan dum la nngai: ³ Kawsi nga yang, tinang nang a nta de shanhte hpe shabawn dat yang gaw, shanhte hkrun lam hkan e ba galawp wa na ma ai: shanhte hta na nkau mi mung tsan ai de nna sa du ma ai, ngu nna shanhte hpe tsun mu ai. ⁴ Sape ni shi hpe htan nna, Ndai nam mali hta e, shanhte hpe muk jahkru shakat lu hkra, kanang na wa lu la lu na rai ta? ngu mu ai. ⁵ Shi mahtang, Nanhte muk gade lu nga myit ta? ngu nna san mu yang, shanhte gaw, Sanit sha rai sai, ngu mu ai. ⁶ Dai rai nna shawa masha ni ga hta dung nga na shi hkang da mu ai: shaloi dai muk sanit hpe shi la nna, shakawn ngut jang, dai hpe ahkyep alep nhtawm, shanhte a man e hkambum da mu ga, shi a sape ni hpe jaw da mu ai: shanhte mung, shawa masha ni a man e, hkambum da mu ai. ⁷ Nga kaji loi mi sha mung shanhte lu nga ma ai rai nna, dai hte hpe shaman ya nhtawm, dai hpe mung hkambum da mu ga, hkang da mu ai. ⁸ Shaloi shanhte sha nna hkru kat lu nga ma ai; ngam ai adaw ahkyep hpe ka sanit tup shanhte lahkawn la mu ai. ⁹ Marai hkying mali daram rai nga ma ai; dai hpang shi shanhte hpe shabawn dat mu ai. ¹⁰ Shaloi jang shi a sape ni hte rau li kata de shi shang nna, Dalamanuhta a ginwang de e sa du ai. ¹¹ Dai shaloi Hparishe ni pru sa nna, shi hte ndang kalang hkat ma ai hte, shi hpe chyam yu let lamu ntsa na lamik kumla hpe, shi kaw hpyi mu ai. ¹² Shing rai shi a wenyi hta shi grai madai nna, Ndai amyu gaw hpa majaw lamik kumla hpe hpyi nga ma hka? ngai nanhte hpe teng teng tsun ma de ga Ndai amyu hpe lamik kumla hpa mung, shapraw dan na ma we ai n rai, ngu mu ai. ¹³ Shaloi shi shanhte hpe kau da nna, li hta e bai shang nhtawm, wora hkran de rap mat wa ai. ¹⁴ Shanhte mahtang muk gun na malap kau mu ai, dai li hta e muk tawng langai sha nan, ngam nga ma lu ai. ¹⁵ Shaloi shi shanhte hpe, Hparishe ni a matsi hte Herod a matsi hpe koi kau lu myit ga, sadi nga mu, ngu nna shanhte hpe ginhtim da mu ai. ¹⁶ Dai rai nna, shanhte gaw, Anhte muk n gun nga ga hka, nga nna shada da tsun hkat ma ai. ¹⁷ Yesu dai hpe chye wu yang, Nanhte muk n gun ai lam, hpa rai tsun hkat nga myit ta? ya du hkra nanhte n htai la lu nna, n chye na nga myit ni? nanhte a myit masin a ja nga ma lit ni? ¹⁸ myi tu ti mung, nanhte n mu nga myit ni? na tu ti mung n na nga myit ni? ¹⁹ Dai muk manga sha, masha hkying manga hpe ngai ahkyep alep jaw ai hpang, nanhte lahkawn la ai adaw ahkyep, mung gade hpring dem re ai hpe nanhte n dum kau ma nu ni? ngu mu ai. Shanhte gaw, Mung shi lahkawng re ai, ngu mu ai. ²⁰ Dai muk sanit hpe mung, masha hkying mali hpe karan jaw yang, nanhte lahkawn la ai adaw ahkyep ka gade hpring dem rai nga a ta? ngu nna bai san mu yang, shanhte gaw, Ka sanit re ai, ngu nna shi hpe tsun mu ai. ²¹ Bai shi shanhte hpe, Ya du hkra wa nanhte n chye na nga myit ni? ngu nna tsun mu ai. ²² Shaloi shanhte gaw Betsaida de du ma ai. Ya, myi kyaw ai masha langai mi hpe shanhte shi hpang de woi wa mu ai rai nna, shi hpe ahtawk na hpyi da mu ai. ²³ Shi gaw dai myi kyaw ai wa hpe lata hte dun nna, kahtawng shinggan de shapraw nhtawm, shi a myi hpe mayen madit nna, shi a ntsa e lata mara da let, Nang lama ma mu da nu ni? ngu nna shi hpe san wu ai. ²⁴ Shi gaw dawng yu nna, Masha hpe ngai mu nngai; hpun zawn shanhte hkawm ma ai ngai mu ma se ai, ngu wu ai. ²⁵ Bai shi a myi ntsa e, lata mara da yang, dai wa gaw mada mu lu nna, myi majing rai mat ai hte, arai yawng mayawng hpe asan sha mu lu nu ai. ²⁶ Shaloi shi a nta de shi hpe dat dat wu ai rai nna, Dai kahtawng hta e pyi nang hkum shang et,ngu dat wu ai. ²⁷ Dai hpang Yesu hte shi a sape ni gaw Kesarea Hpilipi mare a kahtawng ni hta e lai hkawm wa ma ai rai nna, hkrun lam hkan rai nga yang, shi a sape ni hpe,Masha ni, ngai hpe kadai wa re ai, nga nga ma ta? ngu nna san mu ai. ²⁸ Shanhte gaw, Baptisma Sara Yawhan re ai; kaga hte gaw, Elia re ai; bai, kaga hte gaw, Myihtoi ni hta na langai mi rai nga ai, nga ma ai, ngu nna shi hpe tsun dan mu ai. ²⁹ Bai, shi shanhte hpe, Nanhte mahtang ngai hpe kadai wa re ai, nga nga myit ta? ngu nna san mu ai. Petru htan let, Nang, Hkristu rai nga ndai, ngu nna shi hpe tsun wu ai. ³⁰ Dai rai nna, shi a lam kadai hpe mung n tsun dan u ga, shi shanhte hpe ginhtim da mu ai. ³¹ Dai shaloi e, Dai Masha Kasha gaw nni nkri law law wa hkrum nna, agyi salang ni, hkinjawng agyi ni hte laika ka ai sara ni e nyet kau ai hkrum na hte, sat kau ai hkrum nhtawm, masum ya nhtoi hpang e bai hkrung rawt wa lu na lam,shi shanhte hpe sharin achyin hpang mu ai. ³² Dai ga hpe shi dan dan leng leng tsun dan mu ai. Dai rai nna Petru gaw shi hpe shaga la nna, daru kau wu ai. ³³ Shi mahtang kayin wa ai hte, shi a sape ni hpe mada yu let Petru hpe, Satan e nye hpang de sit mat wa u; Karai Kasang hte seng ai lam n rai, masha hte seng ai lam hpe sha nang myit nga ndai, ngu nna daru kau wu ai. ³⁴ Bai shawa masha ni hte shi a sape ni hpe shi shaga la nna shanhte hpe tsun mu ai gaw, Ngai hpang de hkan sa mayu ai wa kadai rai ti mung, tinang hkum hpe ndang kau nna, shi a wudang hpai let, ngia kaw hkan nang ru ga. ³⁵ Tinang asak hpe hkye la mayu ai wa kadai mung, asak sum na ra ai: nye a matu hte, dai kabu gara shi ga majaw, asak sum ai wa chyawm gaw, dai hpe hkye la lu na wu ai. ³⁶ Bai, masha gaw ndai mungkan ting hpe madu lu da nna, tinang a asak sum mat a yang gaw, shi a matu hpa akyu nga lu ta? ³⁷ masha gaw hpa gawng malai hkungga hte wa, tinang a asak hpe raw la lu na a ta? ³⁸ Kaning rai nme law, ndai shut hpyit ai hte yubak kap ai amyu hta e, ngai hte ngai tsun ai mungga hpe kaya nga ai wa kadai mung, dai Masha Kasha gaw shi a Kawa a hpung shingkang hte chyoi pra ai lamu kasa ni hte nawng du sa wa yang, dai wa hpe kaya kau na ru ai. 

 

Marku 9

¹ Nanhte hpe ngai teng teng tsun ma de ai gaw, Nang e tsap nga ai ni nkau mi, Karai Kasang a mungdan gaw hpung dagu hte du ra ai hpe, garai n mu mu gaw, si ai n hkrum na ma ai, ngu mu ai. ² Ya, de a hpang kru ya lai yang, Yesu gaw, Petru, Yaku, Yawhan hte hpe shaga la nhtawm, tsaw ai bum de, shanhte hpe hkrai woi lung wa mu ai. Shaloi, shanhte a man e shi a ahpraw asam galai wa ai hte, ³ shi a hpun palawng gaw kabrim kabram wa nna, nachying hpraw tu wa lu ai: ga ntsa na tsi chyaw ai wa kadai mung, dai hte wa hpraw jahtap lu ai n rai. ⁴ Mawshe yan Elia mung shanhte kaw dan pru ma ai: shan gaw Yesu hte ga tsun ma ai. ⁵ Shaloi Petru Yesu hpe, Rabai e, ndai yang e nga na, anhte a matu mai nga ai: nang e sum masum, na a matu langai mi, Mawshe a matu langai mi, Elia a matu langai mi, anhte gap ga, ngu nna tsun wu ai. ⁶ Shanhte hkrit kahpra nga ma ai majaw, shi hpa tsun na hpe, n chye wu ai. ⁷ Dai shaloi sunwi du hkrat nna, shanhte hpe ka-up nhtawm, dai sumwi hta na nsen pru nna, Ndai wa gaw, ngai tsaw ra ai, ngai Sha rai nga ai: shi a ga madat mara mu, nga ai. ⁸ Ya akajawng sha kayin yu yang, Yesu hta kaga, shanhte kadai hpe mung n mu ma nu ai. ⁹ Ya dai bum de na yu hkrat wa ma yang, dai Masha Kasha gaw si ai ni kaw na garai n rawt rawt gaw, shanhte mu ai hpe, kadai wa hpe mung n hkai dan mu ga, shi shanhte hpe ginhtim da mu ai. ¹⁰ Shanhte mahtang dai ga hpe matsing la nna, Si ai ni kaw na bai rawt wa na, nga ai gaw, hpa nga ai rai lu hka? nga nna shada da san bu ma ai. ¹¹ Shaloi shanhte gaw, Elia shawng du sa na ra ai, nga nna laika ka ai sara ni hpa majaw tsun nga ma ta? ngu nna shi hpe san mu ai. ¹² Shi gaw, Gaja wa, Elia shawng du ra ai rai nna, yawng mayawng hte hpe shagrin da lu nu ai: dai hta kaga, dai Masha Kasha mung, nni nkri law law wa hkam nga nna, gang kau ai hpe hkrum na wu ai, nga nna hpa rai ka da nga a ta? ¹³ Nanhte hpe ngai tsun ma de ga, Elia gaw du boi sai rai nna, shi a lam ka da nga ai hte maren, shanhte gaw tinang a myit ra ai hku shi hpe di kau ma nu ai, ngu mu ai. ¹⁴ Bai, sape ni kaw du wa ma yang, shanhte a grup yin e masha wunawng kaba nga nga ma ai rai nna, laika ka ai sara ni shanhte hte ndang kalang hkat nga ma ai hpe, wa mu mu ai. ¹⁵ Shawa masha ni shi hpe mu hkrup jang, mau mahka mat ma ai rai nna, shi hpang de sa gat shakram mu ai. ¹⁶ Shaloi shi gaw, Nanhte gaw hpalam shanhte hte san hkat nga myit ta? ngu nna shanhte hpe san mu yang, ¹⁷ Shawa masha ni hta na marai langai mi shi hpe htan nna, Sara e, ngai sha nang hpang de ngai woi wa ring ngai; n chye shaga ai nat rawng nga ai: ¹⁸ kanang mung shi hpe jashung yang, dai nat gaw shi hpe gumpye kau wu ai rai nna, shi hkumbawp lawu aihte wa udik urin nna hkum akyip akap rai mat nga ai: shi hpe shaden kau ya mi ga,na a sape ni hpe ngai tsun dan nme ai rai ti mung, shanhte n rai lu ma ai, ngu wu ai. ¹⁹ Dai rai nna Yesu gaw, Makam masham n rawng ai amyu e, gaten du hkra ngai nanhte hte rau nga nga lu na rai ta? gaten du hkra nanhte hpe sharang nga lu na rai ta? shi hpe ngai hpang de woi sa ma rit, ngu nna htan mu ai. ²⁰ Shaloi shanhte gaw dai ma hpe woi sa mu ai. Shi hpe mu hkrup ai shaloi jang, dai nat gaw shi hpe htan kashan shangun nna,shi ga de kadawng wa ai hte, hkumbawp lawu let gumkan galu nga ai. ²¹ Dai rai nna, Yesu gaw, Shing rai shi hta byin ai gaw,gade na wa sa ta? ngu nna kawa hpe san wu yang, shi gaw, Naw kaji kaw nna rai sai: ²² shi hpe jahten lu hkra nga nna, wan hta e rai ti mung, hka hta e rai ti mung, law law lang wa shi hpe kabai bang bang di wu ai: rai ti mung, nang rai lu n yang gaw, an hpe matsan dum nna karum ya mi, ngu wu ai. ²³ Yesu gaw, Nang rai lu yang gaw!- Kam sham ai myit rawng ai wa gaw hpa mung rai lu na ra ai, ngu nna shi hpe tsun wu ai. ²⁴ Shaloi jang, dai ma a kawa gaw, Ngai kam sham nga nngai, nye a n kam n sham ai myit naw matsan dum ya e, nga nnajahtau tsun ai. ²⁵ Dai shawa masha ni gat let zup hpawng wa ma ai hpe Yesu mu wu yang, dai n seng ai nat hpe, N chye shaga nna na lahpang ai nat e, ngai nang hpe htet da de ga, shi hta na pru mat wa u; htawm hpang e galoi mung bai hkum shang nit, ngu nna daru kau wu ai. ²⁶ Shaloi, shabam wa ai hte shi hpe bu kashan dat nhtawm, shi pru mat wa ai: dai ma mung si ai zawn rai mat ai hte, masha law law wa, Shi si mat sai, nga shajang ma ai. ²⁷ Yesu mahtang shi a lata hpe dun let, shi hpe sharawt wu ai rai nna, shi rawt wa sai. ²⁸ Nta nhku de bai shang wa yang, shi a sape ni la gyim san nna, Anhte dai nat hpe hpa majaw n shaden kau lu gaw ta? ngu mu ai. ²⁹ Shi gaw, Ndai amyu hpe gaw, akyu hpyi ai hte sha n rai yang gaw, n shapraw lu na re ai, ngu nna shanhte hpe tsun mu ai. ³⁰ Dai yang na pru wa ma yang, shanhte gaw Galile mung hku ga sa wa ma ai rai nna, dai hpe kadai mung n chye lu u ga, shi ra nga ai. ³¹ Kaning rai nme law,Dai Masha Kasha gaw masha ni a lata hta e ap kau ai hkrum nna, shanhte shi hpe sat kau na ma ru ai hte, sat kau ai hkrum ngut jang, masum ya nhtoi hpang e, shi bai hkrung rawt wa na ra ai, ngu nna shi a sape ni hpe sharin achyin ya nna, tsun dan mu ai. ³² Shanhte mahtang dai ga hpe n chye na mu ti mung, shi hpe jasan na n wam nga ma ai. ³³ Dai hpang shanhte gaw Kaperna-um de du sa ma ai. Nta nhku de rawng nga yang shi shanhte hpe, Nanhte lam hkan e, hpa lam tsun hkat nga myit ta? ngu nna san mu ai. ³⁴ Shanhte mahtang atsin sha nga ma ai: kaning rai nme law, Gara mahtang grau kaba nga ga ai kun? nga nna, lam hkan e shanhte shada da tsun hkat ma sai. ³⁵ Shaloi shi dung nna, sape shi lahkawng hte hpe shaga la nhtawm, shanhte hpe, Grau mayu ai wa kadai rai ti mung, nlang a hpang na wa hte, nlang a ali ama tai u ga, ngu nna tsun mu ai. ³⁶ Bai, ma kaji langai mi hpe shi shaga la nna, shanhte a kaang e shatsap tawn wu ai; shi hpe pawn la let shanhte hpe, ³⁷ Ma kaji ni hta na, ndia zawn re ai ma langai mi hpe, nye a amying majaw hkap la ai wa kadai mung, ngai hpe hkap la nga ai: ngai hpe hkap la ai wa mung, ngai hpe hkap la ai n rai, ngai hpe shangun dat ai wa hpe she hkap la ai rai nga ai. ³⁸ Dai shaloi e Yawhan gaw, Sara e, anhte kaw n hkan nang ai marai langai mi na a amying hte nat shaden kau ai hpe anhte mu hkrup sa gaw ai rai ti mung, anhte gaw n hkan nang ai majaw, shi hpe hkum kau gaw ai, ngu nna shi hpe tsun wu ai. ³⁹ Yesu mahtang, Shi hpe hkum hkum myit: nye a amying hte magam amu galaw ai wa gaw, nye a lam hpe n kaja ai ga alawan tsun lu na, kadai mung n nga ai: ⁴⁰ anhte a gumlau maga e n nga ai wa gaw, anhte a hpang maga nga ai wa rai nga ai. ⁴¹ Nanhte hpe ngai teng teng tsun ma de ai gaw, Hkristu a amying hte nanhte seng nga myit dai, nga nna ntsin htinggap mi nanhte hpe jaw ai wa kadai mung, shi a shabrai hpe gaja wa gawm kaw lu na wu ai n rai, ⁴² lam mi gaw, Ndai kam sham nga ai ma kaji ni hta na langai mi hpe, myit kataw shangun ai wa kadai rai timung, shi a du hta htumrin kaba noi nna, nawng hta kabai bang kau na gaw, shi a matu grau nna mai nga ai. ⁴³ Na a lata nang hpe myit kataw shagun a yang gaw, dai hpe kahtam dut kau u: lata lahkawng hkum nga ai hte ngarai mung na n si n krip ai wan hta shang na hta, lata hten ai hte asak hkrung ai de shang na gaw, grau mai nga ai. ⁴⁵ Na a lagaw nang hpe myit kataw shangun a yang gaw, dai hpe kahtam dut kau u: lagaw lahkawng hkum nga ai hte, ngarai mung de jahkrat kau ai hkrum na hta, lagaw hten ai hte asak hkrung ai de shang na gaw, grau mai nga ai. ⁴⁷ Na a myi nang hpe kataw shangun a yang gaw, dai hpe malawk kau u: myi lahkawng maga hkum ai hte, shanhte a matu byet n si nna, wan mung n si n krip hkraw ai, ⁴⁸ ngarai mung de jahkrat kau ai hkrum ai hta, myi maga sha nga ai hte, Karai Kasang a mungdan de nang shang na gaw, grau mai nga ai. ⁴⁹ Kaning rai nme law, kadai wa rai ti mung, wan ngu ai jum hte shashum la ai hkrum lu na ra ai: ⁵⁰ Jum gaw kaja nga ai: rai ti mung, jum hkawng mat yang gaw, hpa hte jashum la lu na myit ta? Nanhte hta jum sharawng da mu: nanhte shada da ahkau achyap rai nga mu, ngu mu ai. 

 

Marku 10

¹ Dai kaw na shi rawt pru nna, Yuda mung ga jarit hte Yawdan hka wora hkran de du sa ai rai nna, masha wunawng wuwa shi hpang de bai sa hpawng ma ai majaw, shi htung nga ai hte maren, shanhte hpe bai sharin shaga ya mu ai. ² Shaloi Hparishe ni sa du nna, shi hpe dinglik yu let, Masha gaw tinang a madu jan hpe shabawn kau na, mai nga a ni? ngu nna shi hpe san mu ai. ³ Shi gaw Mawshe nanhte hpe kaning nga hkang da a ta? ngu nna htan mu ai. ⁴ Shanhte gaw, Jahka ai laika ka da nna, shi hpe shabawn kau na, Mawshe ahkang jaw da sai, ngu mu ai. ⁵ Yesu gaw, Nanhte a myit ja nga ma lit dai majaw, ndai hkang da ai ga, shi nanhte a matu ka da nu ai. ⁶ Rai ti mung, lamu ga nnan lat kaw nna, lasha hte numsha yan hpe shi hpan da mu ai. ⁷ De a majaw lasha gaw kanu kawa hpe kau da nna, ⁸ shan lahkawng gaw hkum shan langai sha tai lu na ma ra ai. ⁹ Shing rai shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu mu ai. ¹⁰ Nta nhku de nga nga ma yang, sape ni ndai lam shi hpe bai san mu ai. ¹¹ Shaloi shi gaw, Tinanga madu jan hpe shabawn kau nhtawm, num kaga hpe hkungran ai wa kadai mung, shi a madu jan hpe shut ai wa tai nga ai: ¹² numsha mung shi a madu wa hpe shabawn kau nna, la kaga hpe hkungran a yang gaw, la shaw ai amu galaw ai rai nga ai, ngu mu ai. ¹³ Ma kaji ni hpe ahtswk ya mi ga, nga nna shi hpang de woi sa ma ai: sape ni mahtang shanhte hpe daru kau mu ai. ¹⁴ Yesu dai hpe mu yang, myit yu pawt nga ai rai nna, Ma ni hpe ngai hpang de sa shangun ma ru; shanhte hpe hkum gang shadang myit; kaning rai nme law, Karai Kasang a mungdan gaw, dai zawn re ai ni a mungdan rai nga ai. ¹⁵ Nanhte hpe ngai teng teng tsun ma de ga, Kadai rai ti mung Karai Kasang a mungdan hpe ma kaji zawn n hkap la ai wa gaw, dai hta e gaja wa n shang lu na ra ai, ngu nna shanhte hpe tsun mu ai. ¹⁶ Shaloi shi shanhte hpe pawn la nna, shanhte a ntsa e lata mara da let, shaman ya mu ai. ¹⁷ Bai, lam e sa wa nga yang, marai langai mi shi kaw gat du nna, shi a man e lahput hput di let, Mai kaja ai Sara e, n htum n wai asak sali wunli lu la hkra, ngai hpa mi galaw na rai ta? ngu nna shi hpe san wu ai. ¹⁸ Yesu gaw, Ngai hpe mai kaja ai hpa rai nga n ta? Karai Kasang hta kaga mai kaja ai kadai mung n nga ai. ¹⁹ Jep ai tara hta, Masha hkum sat, masha num hkum shaw, hkum lagu, n teng n man ai sakse hkum hkam, maw sha map sha hkum rai et, nnu yan nwa hpe hkungga lara di u, nga ai ga hpe nang chye nga ndai, ngu nna shi hpe tsun wu ai. ²⁰ Dai wa gaw, Sara e, dai yawng mayawng hte hpe, brang ram kaw nna, ngai hkan se ai, ngu nna Yesu hpe tsun wu ai. ²¹ Yesu shi hpe azi yu let, shi hpe tsaw ra wu ai rai nna, Lam langai mi nang naw ra nga ndai: nang wa su, lu malu hte hpe dut kau nna matsan mayan ni hpe karan jaw u; shing rai jang she sumsing lamu ntsa e nang sut gan lu na rin dai; ngai kaw mung sa hkan nang rit, ngu nna shi hpe tsun wu ai. ²² Shi mahtang dai ga majaw, myi man sum mat nna, myit yawn la ai hte hprang rai mat wa ai: kaning rai nme law, shi arai law law lu ai wa rai nga ai. ²³ Shing rai Yesu gaw praw rai yu nna, shi a sape ni hpe, Sut su ai ni gaw,Karai Kasang a mungdan hta, nachying wa shang yak la ahka gaw! ngu nna tsun mu ai. ²⁴ Sape ni mahtang shi a ga majaw, mau mahka nga ma ai. Dai rai nna Yesu gaw, Ngai sha ni e, Karai Kasang a mungdan hta shang na gaw, nachying yak la ahka gaw. ²⁵ Lu su ai wa gaw, Karai Kasang a mungdan de shang loi ai hta, gawla-u gaw samyit na hku gale na grau loi nga ai, ngu nna shanhte hpe bai htan wu ai. ²⁶ Shanhte mahtang ladu lai nna mau mat let, Dai rai yang gaw, kadai wa mi hkye hkrang la ai kaw du lu na a ta? ngu nna shi hpe tsun mu ai. ²⁷ Yesu mahtang shanhte hpe mada yu nna, Dai amu gaw masha n dang di lu ti mung,Karai Kasang gaw, n dang di lu ai n nga ai; kaning rai nme law, Karai Kasang gaw yawng mayawng hpe dang di lu ai. ²⁸ Shaloi, Petru gaw, Anhte arai yawng hpe kau da nna, nang kaw hkan nang sa ga ai, ngu nna shi hpe tsun htang wu ai. ²⁹ Yesu gaw, Nanhte hpe ngai teng teng tsun ma de ga, Nye a matu mara hte, dai kabu gara shi ga a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai rai ti mung, ³⁰ zingri zingrat hkrum ai hte hpawn, ndai aprat hta e nta, kahpu kanau, kajan, kanu, kashu kasha hte yi hkauna hte hpe htam latsa dang, n lu la na wa, n nga ai: htawm hpang prat e gaw n htum n wai asak lu la na ra ai ³¹ Rai ti mung, shawng nga ai ni law law wa, hpang hkrat na ma ra ai; hpang hkrat ai ni mahtang gaw, shawng na ma ra ai, ngu mu ai. ³² Shaloi, Yerusalem de lung wa na, shanhte lam e rai ma sai rai nna, Yesu gaw shanhte a shawng e sa wa nga ai: shanhte mahtang mau mat ma ai: hkan nang nga ai ni mung, hkrit kahpra nga ma ai. Dai shaloi, sape shi lahkawng hte hpe, shi bai shaga la nhtawm, shi hta byin magang ra ai amu a lam, shanhte hpe tsun mu ai gaw, ³³ Yu mu, anhte Yerusalem mara de lung wa nga ga ai; dai Masha Kasha gaw hkinjawng agyi ni hte laika ka ai sara ni a lata hta, ap kau ai hkrum na ra ai: shanhte shi hpe si na lam daw dan nna, maigan amyu a lata de ap kau na ma ru ai: ³⁴ shanhte gaw shi hpe asawng asang di nna, mayen mahtaw bun ai hte, shi hpe anu kayat nhtawm, sat kau na ma ru ai: masum ya nhtoi hpang e shi bai hkrung rawt wa na ra ai, ngu mu ai. ³⁵ Dai shaloi Zebedi a kasha Yaku yan Yawhan gaw shi hpang de sit sa nna, Sara e,an hpyi mahpyi hpe nang an hpe jaw na gaw, an ra nga ga ai, ngu nna shi hpe tsun mu ai. ³⁶ Shi gaw, Ngai nan a matu galaw na, hpa ra nga myit ta? ngu nna shan hpe tsun mu ai. ³⁷ Shan gaw, Na a hpung shingkang hta e, na a hkra maga de langai mi, pai maga de langai mi, dung nga lu na ahkang an hpe jaw mi, ngu nna shi hpe tsun mu ai. ³⁸ Yesu mahtang, Nan hpa hpyi nga ai hpe, nan n chye myit dai. Ngai lu nga ai gawn hpe, nan lu lu na rai nga myit ni? ngai hkam la na baptisma hpe mung, nan hkam la lu na rai nga myit ni? ngu nna shan hpe tsun mu ai. ³⁹ Shan gaw, An rai lu na ga ai, ngu mu ai. Bai Yesu gaw, Ngai lu nga ai gawm hpe, nan mung lu na rai nga myit dai; ngai hkam la na baptisma hpe mung,nan hkam la na rai nga myit dai: ⁴⁰ rai ti mung, nye a hkra maga pai maga de dung nga lu na, ngai ahkang n jaw lu nngai; dai gaw, lajang da ya ai ni a matu mara sha, rai nga ai, ngu nna shan hpe tsun mu ai. ⁴¹ Ya, kaga sape shi, dai ga hpe na mu yang, shanhte Yaku yan Yawhan hpe myit na kahtet mu ai. ⁴² Dai majaw Yesu shanhte hpe shaga la nna, Maigan amyu ni hta up na ahkang lu la ai ni gaw, shanhte a ntsa e reng nga ma ai hte, daru magam re ai ni gaw,shanhte a ntsa e hkang nga ma ai hpe, nanhte chye nga myit dai. ⁴³ Nanhte hta chyawm gaw, shing rai nga ai n rai: nanhte hta grau mayu ai wa kadai rai ti mung, nanhte a ali ama tai u ga: ⁴⁴ nanhte hta baw tai mayu ai wa kadai rai ti mung, nlang a mayam tai u ga: ⁴⁵ kaning rai nme law, dai Masha Kasha wa pyi, shangun ma hpe yam sha na, nga nna du sa ai n rai; shangun ma a amu hpe galaw daw ya na hte, masha law law a matu mara, shi asak hpe gawng malai jahpu shatai ya na, nga nna du sa ai, ngu nna tsun mu ai. ⁴⁶ Shaloi shanhte gaw Yerihko mare de du ma ai. Bai Yesu gaw, shi a sape ni hte, masha wunawng wuwa kaba hte rau, Yerihko de na pru wa ma yang, Teme a kasha Bara Teme mying ai, myi kyaw nna hpyi sha ai wa langai mi, dai lam makau e dung nga ai. ⁴⁷ Nazaret wa Yesu nga nga ai hpe, shi na wu yang, Dawi a Kasha Yesu e, ngai hpe matsan dum la e law, ngu nna hpyi jahtau wu ai. ⁴⁸ Masha law law wa, shi atsin sha nga mat u ga, shi hpe jet kau mu ai. Shi mahtang, Dawi a Kasha e, ngai hpe matsan dum la e law, ngu nna grau jahtau shaja wu ai. ⁴⁹ Yesu gaw, tsap let, Shi hpe shaga wa ma rit, nga ai. Dai rai nna shanhte gaw, dai myi kyaw ai wa hpe shaga ai hte, Ngwi pyaw n ga; rawt u, shi nang hpe shaga nga ai, ngu mu ai. ⁵⁰ Shi gaw shi a hpun nba raw kau da ai hte, gan rawt nna Yesu hpang de sit sa wa ai. ⁵¹ Shaloi Yesu shi hpe ga tsun nna, Ngai nang hpe hpa di ya na,nang ra n ta? ngu wu ai. Myi kyaw ai wa gaw, Rabunai e, nye myi mu li ga law, ngu nna shi hpe tsun wu ai. ⁵² Yesu gaw, Hkawm wa su; na a kam sham ai gaw nang hpe shamai ya nit dai, ngu nna shi hpe tsun wu ai. Dai wa gaw shaloi jang myi mu lu nna, hkrun lam e shi kaw hkan nang nga ai. 

 

Marku 11

¹ Ya shanhte gaw, Yerusalem hte, Tsanlun bum na Bethpage yan Behtani kahtawng hkan e ni wa ma yang, shi sape lahkawng shangun dat nna, tsun mu ai gaw, ² Nan a shawng de na kahtawng de sa ma su: dai hta e shang wa ai shaloi jang, kadai mung garai n jawn yu ai lawze kasha dun nga ai hpe, nan mu na mu ai; dai hpe raw nhtawm dun wa ma rit. ³ Masha langai ngai, Nan hpa majaw shing rai galaw myit ta? nga nna san myit yang, nan gaw, Dai Madu ndai hpe ra ai da, ngu nna htan mu: shaloi jang, shi dai hpe nang de ya dat na ra ai, ngu mu ai. ⁴ Shan gaw sa wa nna, kahtawng lam chyinghka shinggan e lawze kasha dun nga ai hpe, mu mu ai rai nna, dai hpe raw dun wa mu ai. ⁵ Dai yang e tsap nga ai ni nkau mi gaw, Nan hpa majaw dai lawze kasha hpe raw dun mu ta? ngu nna shan hpe san mu yang, ⁶ Yesu shan hpe tsun dat mu ai hte maren, tsun dan mu ai: dai rai nna shanhte gaw shan hpe dat dat mu ai. ⁷ Shaloi shan gaw dai lawze kasha hpe Yesu hpang de dun wa mu ai rai nna, de a ntsa e shanhte a hpun nba mara nhtawm, shi dai hta jawn nga ai. ⁸ Masha law law wa, tinang a hpun nba ni hpe lam hta e nep ya ma ai: kaga hte gaw, nam na hpun lakung lakying kran la nna, dai lam e hkan nep ma ai. ⁹ Shawng e sa wa ai ni hte hpang e hkan nang ai ni gaw, Hawsanna: Madu a mying ningsang hte du sa ai wa gaw, a nga ai law; ¹⁰ Anhte a wa Dawi a du ra ai mungdan gaw, a nga ai law; Tsaw htum ai shara e, Hawsanna, rai wa u ga, nga nna jahtau garu ma ai. ¹¹ Shaloi Yesusalem na naw ku Htingnu kata de shi shang nna, arai yawng mayawng hpe shagu yu ngut jang, jan du wa ai majaw, shi pru nna, sape shi lahkawng hte hte rau, Behtani kahtawng de rai mat wa ai. ¹² Hpang jahpawt e Behtani kahtawng na pru wa ma yang, shi kawsi hkrum nga ai. ¹³ Shaloi tsan tsan kaw na, alap lap ai maihpang hpun langai mi shi mu hkrup nna,dai hta e si langai ngai lu la lu na, shi myit nna sit sa wa ai. Dai de du wa yang, maihpang si si na aten n re ai majaw, alap sha shi mu wu ai rai nna, ¹⁴ Prat dingsa e, nang hta na kadai mung asi n lu sha mu ga, ngu nna dai hpe tsun wu ai. Shi a sape ni mung dai hpe na nga ma ai. ¹⁵ Shaloi shanhte gaw Yerusalem de du ma ai. Dai naw ku Htingnu hta e mung,shi shang ai rai nna, dai Htingnu hta rai dut ai ni hte mari ai ni hpe shaden kau ai hte, gumhpraw byan ai ni a ku ni hte hkrudu dut ai ni a punghkum ni hpe kanawng kadawng kau ya mu ai. ¹⁶ Dai Htingnu kata de hka wan langai mi pyi shashawn na, shi n hkraw nga ai. ¹⁷ Shi shanhte hpe sharin shaga nna, Nye a nta gaw amyu baw shagu a matu akyu hpyi ai nta ngu na mu ai, nga nna ka da nga ai, n rai ni? nanhte chyawm gaw, dai hpe damya lungpu di kau ma nu ai, ngu nna tsun mu ai. ¹⁸ Hkinjawng agyi ni hte laika ka ai sara ni, dai na ma yang, shi hpe sat kau na lam tam ma ai: kaning rai nme law, mung masha ni nlang shi a sharin shaga ai lam hpe mau mahka nga ai majaw, shanhte gaw shi hpe hkrit da mu ai. ¹⁹ Shana shagu e, dai mare shinggan de shi pru hkawm wa ai. ²⁰ Dai hpang lahpawt mi hta e hkawm lai wa ma yang,dai maihpang hpun gawruhte nawng hkraw mat nga ai hpe, shanhte mu mu ai. ²¹ Dai rai nna, Petru shadum let, Rabai e, yu u, nang dagam kau ai maihpang hpun gaw hkraw mat sa hka! ngu nna shi hpe tsun wu ai. ²² Yesu htan let, Karai Kasang hpe kam sham nga mu: ²³ nanhte hpe ngai teng teng tsun ma de ai gaw, kadai rai ti mung, ndai bum hpe, Nang baw mat nna nawng hta htawt bang mat u, nga nna kam shut ai myit n rawng ai sha, tinang tsun ai hte maren byin na ra ai, kam sham nga ai rai yang gaw dai lam byin na ra ai. ²⁴ Dai majaw ngai nanhte hpe tsun ma de ai gaw, Nanhte hpyi mahpyi hte ra mara lu la na ra ai, ngu nna kam sham nga mu: shing rai jang, nanhte lu la na myit dai. ²⁵ Ahkyu hpyi let tsap nga ai shaloi, masha langai ngai nang hpe lama ma shut a yang gaw, sumsing lamu na nanhte a Nwa gaw, nanhte a mara hpe raw kau ya lu u ga, shi a mara hpe mung, raw kau ya mu. ²⁷ Dai hpang shanhte gaw Yerusalem de bai shang ma ai. Ya naw ku Htingnu kata e htinglet hkawm nga yang, hkinjawng agyi ni, laika ka ai sara ni hte agyi salang ni, shi hpang de sa du ma ai rai nna, ²⁸ Nang gaw hpa ahkang hte ndai a mu ni hpe galaw nga n ta? Ndai hte hpe galaw lu na, ndai ahkang gaw, nang hpe kadai wa jaw n ta? ngu nna tsun mu ai. ²⁹ Yesu gaw, Ngai mung, ga langai mi nanhte hpe san yu ma de ga; ngai hpe htan ya ma la, shaloi hpa ahkang hte ndai hte hpe ngai galaw nga nngai gaw, ngai nanhte hpe tsun dan na ma de ai: ³⁰ Yawhana baptisma lam gaw, lamu de na rai ni? shing n rai, masha hta na rai ni? ngai hpe htan yu mi ngu nna shanhte hpe tsun mu ai. ³¹ Shanhte mahtang shada da bawngnna, Lamu de na re ai, anhte ngu gaw yang, Dai rai yang nanhte hpa rai shi hpe nkam myit ta? nga nna, shi htan na ra ai: ³² bai, Masha hta na rai kun? anhte ngugaw yang,- mung masha ni hpe shanhte hkrit nga ma ai; kaning rai nme law, Yawhanmyihtoi rai nga ai hpe, nlang hte gaw, gaja wa kam nga ma ai. ³³ Dai rai nna, shanhte Yesu hpe htan let, Anhte n chye gaw ai, ngu nna tsun mu ai. Shaloi, Yesugaw, Ndai amu ni hpa ahkang hte ngai galaw nngai gaw, ngai mung nanhte hpe n tsun dan na nngai, ngu nna shanhte hpe tsun mu ai. 

 

Marku 12

¹ Dai shaloi ga shadawn hte hte shi shanhte hpe tsun hpang mu ai gaw, Mashalangai mi tsabyi sun hkai sharam da nna, grup yin e nhpan kum da ai hte tsabyi htung htu da nna, langchyi gap da nhtawm, sun galaw ai masha hpe boi ya da nna, kaga mung de sa nga mat ai. ² Ya aten du jang, sun galaw ai ni a lata na, dai sun na asi nkau mi lu la u ga, sun galaw ai ni hpang de, mayam langai mi hpe shangun dat wu ai. ³ Shanhte mahtang, shi hpe rim la nna, anu kayat nhtawm, kaman dat dat mu ai. ⁴ Bai, mayam kaga hpe, shi shanhte hpang de shangun dat wu ai: dai wa a baw hpe shanhte shahpye ya nna, shi hpe kaya kahpa jahkrum mu ai. ⁵ Bai, kaga hpe shangun dat wu yang, shanhte dai wa hpe sat kau mu ai: kaga marai law law hpe shi shangun dat ti mung, shanhte nkau mi hpe anu kayat di nna,nkau mi hpe sat kau mu ai. ⁶ Shi tsaw ra ai kasha langai mi naw nga ai shi hpe mung hpang jahtum e, shanhte hpang de shangun dat wu ai rai nna,Shanhte gaw ngaisha hpe mahtang hkrit hkungga na ma ai, nga nna myit da ai. ⁷ Sun galaw ai ni mahtang, Ndai wa gaw, sali wunli dagraw na wa rai nga ai; sa ma rit, shi hpe satkau gaw; shaloi shi a sali wunli, anhte lu la na gaw ai,nga nna shada bawng la ma ai. ⁸ Dai rai nna, shanhte shi hpe rim la nna, sat kau nhtawm, sun shinggan de kabai kau mu ai. ⁹ Dai majaw, tsabyi sun madu gaw,kaning di na mu ta? Shi sa du nna, sun galaw ai ni hpe sat kau nhtawm, dai sun masha kaga hpe, htawt shap ya na ru ai. ¹⁰ Dai hta n-ga, Wahpang gaw ai ni, lata kau ai nlung gaw, Ningjut jahtum na nlung tai wa sai: ¹¹ Dai gaw, dai Madu a majaw byin wa ai rai nna, Anhte a man e mauhpa amu rai nga ai, nga ai laika hpe pyi, nanhte n hti yu myit ni? ngu mu ai. ¹² Dai majaw shanhte gaw shi hpe rim la na tam ma ti mung, shawa masha ni hpe hkrit da mu ai: kaning rai nme law, ndai ga shadawn hpe, shanhte a lam shi tsun nga ai gaw, shanhte chye na mu ai. Shaloi shanhte shi hpe kau da nna pru mat wa ai. ¹³ Dai hpang, shi a ga hta shi hpe hkap wang lu u ga, shanhte gaw, Hparisheni hte Herodi ngu ai ni nkau mi, shi hpang de shangun dat mu ai. ¹⁴ Shaloi shanhte du nna, Sara e, nang teng man nga ndai hte, kadai hpe mung n agam nga ndai gaw anhte chye ga ai; masha a myi nam hpe nang n tau yu ai sha, Karai Kasang a lam hpe teng man ai hku sharin shaga nga ndai. Kehta hkawhkam hpe hkansi mai bang ga ni? ¹⁵ anhte bang na rai kun? n bang na rai kun? ngu nna shi hpe san mu ai. Shi mahtang shanhte a myit sawt ai lam chye nna, Nanhte hpa rai ngai hpe chyam yu nga myit ta? Ngai yu yu we ga, dai gumphraw lap mi ngai kaw la wa ma rit, ngu nna shanhte hpe tsun mu ai. ¹⁶ Dai rai nna, shanhte la wa mu ai. Shaloi shi gaw, Gade a sumla hte masat laika kap nga a ta? ngu nna san mu yang, shanhte gaw, Kehta a sumla hte masat rai nga ai, ngu nna shi hpe htan mu ai. ¹⁷ Dai rai nna Yesu gaw, Kehta hte seng ai hpe gaw, Kehta hpe ya mu; Karai Kasang hte seng ai hpe mung Karai Kasang hpe ya mu, ngu nna shanhte hpe tsun mu ai. Shanhte mahtang, shi a lam grai mau mat nga ma ai. ¹⁸ Dai hpang, Bai hkrung rawt wa na lam n nga ai, nga nna a tsun nga ai Saduke ni shi hpang de sit sa wa nna, san let tsun mu ai gaw, ¹⁹ Sara e, masha langai ngai a kahpu wa, kasha garai n kap ai si mat nna gaida nga yang, shi a kanau gaw dai gaida hpe hta la lu na rai nna, kahpu a matu mara shachyaw u ga, nga nna Mawshe anhte hpe ka da ya ma ni ai. ²⁰ Ning re ai yan nau ni marai sanitrai nga ma ai. Shawng na wa gaw num la nna, matu mara n kap ai, si mat sai. ²¹ Hpang na wa, dai num hpe hta nna, matu mara n kap yang, si mat sai: masum nguna wa dai hte maren rai mat ai: ²² shing rai dai shan nau ni sanit, matu mara n kra ma ai. Nlang hte a hpang jahtum e, dai numsha mung, si mat wa ai. ²³ Ya, dai bai hkrung rawt ai hta, dai ni hta na gade a madu jan shi rai na ra ta? Kaning rai nme law, marai sanit a madu jan shi tai yu sai, ngu mu ai. ²⁴ Yesu gaw, Dai Chyum Laika hte, Karai Kasang a atsam hpe, nanhte n chye mu ai majaw, nanhte lam dam nga myit dai, n rai ni? ²⁵ Si ai ni bai hkrung rawt wa jang, num la num ya n rai na ma ai: shanhte gaw sumsing lamu hta e, lamu kasa ni zawn, rainga ma ai. ²⁶ Dai hta kaga, si mat ai ni a bai hkrung rawt wa na lam, Karai Kasang gaw dai singwum makau e, Mawshe hpe, Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai,nga ai ga hpe, nanhte Mawshe a laika hta n hti yu myit ni? ²⁷ Karai Kasang chyawm gaw, si nga ai ni a Karai Kasang n rai, a hkrung nga ai ni a Karai Kasang she rai nga ai: nanhte grai lam dam mat ma rit dai, ngu mu ai. ²⁸ Dai shaloi, laika ka ai sara langai mi sa du nna, shanhte a ndang kalanghkat ai lam na wu ai hte, Yesu shanhte hpe hkap htan ai ga manu nga ai hpe, chyewu ai majaw, Hkang da ai ga mahkra hta e, gara mahtang grau kaba nga a ta? ngu nna shi hpe san wu ai. ²⁹ Yesu gaw, Israela amyu e, madat mara la mu; Anhte a Madu Karai Kasang gaw Madu langai sha rai nga ai: ³⁰ Dai Madu, na a Karai Kasanghpe, na a myit kraw lawang mahkra hte, na a myit masin mahkra hte, na a myit mang mahkra hte, na a n-gun lagaw mahkra hte, nang tsaw ra lu na ndai, nga ai gagaw, grau kaba ai ga rai nga ai. ³¹ Hpang na ga mahtang gaw, Na a htingbu wa hpe,na a hkum hte maren nang tsaw ra lu na ndai, rai nga ai. Ndai ga lahkawng hta, grau kaba ai hkang da ai ga n nga ai, ngu nna htan wu ai. ³² Dai laika ka ai sara gaw, Ara, rai sa, Sara e; Karai Kasang gaw langai sha rai nga ai hte, shi hta shaje kadai n nga ai, nang tsun ai ga teng nga lit dai: ³³ dai hta kaga, myit kraw lawang mahkra hte, myit hpaji mahkra hte, n-gun lagaw mahkra hte shi hpe tsaw ra lu na rai nna, tinang a htingbu wa hpe tinang a hkum hte maren tsaw ra lu na gaw, wan nat hkungga hte hkungga amyu mahkra hta grau kaba ai rai nga ai, ngu nna shi hpe tsun wu ai. ³⁴ Dai wa gaw, kung hpan myit hte htan nga ai hpe, Yesu chye wu yang, Nang gaw Karai Kasang a mungdan hte tsan nga ndai n rai,ngu nna shi hpe htan wu ai. Dai hpang kadai mung, shi hpe hpa pyi n san wam mu ai. ³⁵ Ya Yesu naw ku Htingnu nhku de sharin shaga nga yang, kahtap tsun mu ai gaw, Hkristu gaw, Dawi a kasha rai nga ai, nga nna laika ka ai sara ni, kaning rai tsun lu nga ma ta? ³⁶ Dawi shi hkum dai, chyoi pra ai Wenyi hta, Dai Madu nye a madu hpe tsun wu ai gaw: Na a gumlau ni hpe, na a lagaw npu e ngai tawn da ai du hkra, Nye a hkra maga de naw a dung nga u, nga nna tsun nga ai. ³⁷ Dawi shi dai Hkristu hpe Madu ngu wu ai: dai rai yang gaw, shi a kasha kaning rai nme rai na rai nga a ta? ngu mu ai. Shawa masha ni chyawm gaw, kabu gara ai hte shi hpe na ra ya mu ai. ³⁸ Bai sharin shaga nga let, shi tsun mu ai gaw, Laika ka ai sara ni hpe sadi nga mu: shanhte palawng galu bu hpun let hkawm sa mayu nna gat hkan shachyen ai mung, ³⁹ tara jawng ni hta e grau ai tingnyang ni hpe mung, poi hkane grau ai dung shara ni hpe mung, ra nga ma ai: ⁴⁰ gaida gaina ni a nta ni hpe, shanhte hpya lu hpya sha nna, hpyi hpun ai hte galu galang akyu hpyi ma ai. Dai ni gaw daw dan kau ai grau nna hkum na ma ra ai, ngu mu ai. ⁴¹ Dai hpang, dai alu sumpu tawtap e shi dung nga nna, shawa masha ni dai alu sumpu hta e dingsen bang ma ai hpe, yu nga ai. Sut su ai ni law law wa, law law sa bang ma ai. ⁴² Shaloi, matsan mayan re ai gaida jan langai mi sa nna, peksan langai mi ging ai, magri dingsen lahkawng bang nu ai. ⁴³ De a majaw, shi a sape ni hpe shi shaga la nna, Nanhte hpe ngai teng teng tsun ma de ga, ndai matsan mayan re ai gaida jan gaw, alu sumpu hta e bang da ai ni mahkra hta, grau nna bang dat nu ai. ⁴⁴ Kaning rai nme law, shanhte nlang, tinang a n taw n tsang lu ai hta na jan ai hpe bang da ma ai; shi chyawm gaw shi a matsan mayan re ai hta na lu malu mahkra hpe, rai sa, shi a nsa bau na arai yawng hpe, bang kau nu ai, ngu mu ai. 

 

Marku 13

¹ Ya, dai naw ku Htingnu na pru wa yang, Yesu a sape langai mi, Sara e, yuu: grai re ai nlung hte hte, grai re ai wahpang ni rai nga a hka! ngu nna shi hpe tsun wu ai. ² Yesu gaw, Ndai kaba ai wahpang ni hpe nang mada nu ni? nang e, n run n hpya ai sha, nlung langai mi a ntsa e langai mi muk n mara hkra, rai mat na ra ai, ngu nna shi hpe tsun wu ai. ³ Shaloi dai Tsanlun bum ntsa e, naw ku Htingnu tawtap e, dung nga yang, Petru, Yaku,Yawhan hte Andre gaw, ⁴ Dai hte gaw galoi ai me rai na ra ta? ndai yawng mayawng hte dik wa magang yang, hpa kumla dan pru na ra ta? anhte hpe tsundan mi, ngu nna shi hpe lagyim san mu ai. ⁵ Yesu gaw, Nanhte hta na kadai rai timung, hkalem kau ai n hkrum myit ga, sadi nga mu. ⁶ Masha law law wa nye a amying hte paw pru nna, Ngai gaw dai wa rai nga nngai, nga nna law law hpe lam shadam kau na ma ru ai. ⁷ Hpyen gasat ai hte, majan baw wa na shi ga, nanhte na myit yang, myit hkum ru myit: dai lam ni gaw byin lu na ra ai, rai ti mung, dai jahtum ai gaw garai n rai nga ai. ⁸ Bai amyu mi hte amyu mi, mung mi hte mung mi shada da gumlau hkat na ma ra ai: shara kaga kaga hta e nnang nawn nawn wa na ra ai; hku mung hku wa na ra ai: dai chyawm gaw kyin dut ngu ai a npawt nhpang rai nga ai. ⁹ Nanhte mahtang, tinang hkum lala sadi nga mu: shanhte gaw, salang hpawng ni kaw, nanhte hpe ap kau na ma ra ai; tara jawng ni hta e nanhte anu kayat ai hkrum na ma rim dai; du ni hte hkawhkam ni kaw, sakse tai wa na matu shanhte a man e nanhte tsap lu na myit dai. ¹⁰ Dai kabu gara shi ga hpe, masha amyu baw shagu hpe, shawng hkaw dan lu na, rai nga ai. ¹¹ Nanhte hpe tara agyi ni hpang de woi sa nna ap kau myit jang gaw, kaning ngu nna ga tsun na, myit hkum ru myit: dai ahkying hta e, nanhte hpe tsun shangun ai hte maren tsun dan mu: nanhte ga tsun nga ai ni n rai, dai chyoi pra ai Wenyi mahtang tsun nga ai. ¹² Dai shaloi e kahpu gaw kanau hpe kanau gaw kahpu hpe, kawa gaw kasha hpe si ai de ap bang kau na ma ra ai: kasha ni mung kanu kawa ni hpe gumlau rawt nna, sat kau shangun na mu ai. ¹³ Nye a amying majaw masha nlang hte a n dawng n yawt ai nanhte hkrum na ma rim dai; jahtum du hkra shakut sharang ai wa chyawm gaw, hkye hkrang la ai hkrum na ra ai. ¹⁴ Dai jahten shabya ai matsat shabat gaw, n da ang ai shara e tawn da ai hpe nanhte mu myit yang gaw,- laika hti nga ai wa gaw myit yu nga u ga;- dai shaloi e, Yuda mung hta e nga ai ni gaw, bum lang de hprawng mu ga; ¹⁵ nta ntsa e nga ai wa gaw, shi a nta na arai lama ma hpe shang la na, hkum yu wa nu ga; ¹⁶ hkauna pa e nga ai wa mung, shi a hpun nba wa la na, hkum nhtang wa nu ga. ¹⁷ Dai nhtoi hte hta na-um nasin re ai ni hte, ma chyu naw chyu ai ni gaw, nachying yak na ma ra ai; ¹⁸ Dai rai nna, dai gaw kashung ta e n byin wa u ga, akyu hpyi nga mu. ¹⁹ Kaning rai nme law, Karai Kasang hpan tawn da ai, ginding aga nnan lat kaw nna ya du hkra n byin yu ai hte, hpang de mung n byin lu na, ru tsang ai gaw, dai nhtoi hte hta e byin pru na ra ai. ²⁰ Dai nhtoi ni hpe, dai Madu n shagying kau yang gaw, gade a hkum shan mung, n lawt lu na ra ai; rai ti mung, shi lata la nu ai lata la ai ni a matu mara, dai nhtoi ni hpe shagying da nu ai. ²¹ Dai shaloi e masha langai ngai, Yu mu, nang e, yu mu wonang Hkristu nga nga ai, nga nna nanhte hpe tsun myit yang gaw, nanhte hkum kam myit. ²² Kaning rai nme law, masu ai Hkristu hte rai ti mung, masu ai myihtoi hte rai ti mung, paw pru nna, lata la ai ni hpe shadam lu yang, shadam lu hkra, lamik kumla hte mauhpa amu shachyen na ma ra ai. ²³ Nanhte mahtang sadi nga mu: ngai nanhte hpe ndai nlang tsun hkap da ni ai. ²⁴ Bai, ru tsang ai hpang na nhtoi hte hta e, jan gaw sin mat wa nna, shatamung nip mat na ra ai; ²⁵ shagan ni mung lamu de na di hkrat mat nna, sumsing lamu hta e nga ai nsam ni gaw gari wa na ma ra ai. ²⁶ Dai shaloi e Masha Kasha gawdaru magam hte hpung shingkang kaba hte nawng sumwi ni hta e du sa ai hpe, shanhte mu na ma ra ai. ²⁷ Dai shaloi e, lamu kasa ni hpe shi shangun dat nna, nbung mali maga na, aga htum ai de nna lamu htum ai kaw du hkra, shi a lata la ai ni hpe jahpawng la na ma ru ai. ²⁸ Dai hta kaga, maihpang hpun hpe yu nna, de a ga shadawn hpe matsing da mu: de a lakung lakying ni majawm wa nna lap prut wa jang, nlum ta ni wa ra ai hpe nanhte chye nga myit dai. ²⁹ Dai hte maren, dai lam ni byin hpang wa ai hpe,nanhte mu myit dai shaloi, Shi gaw chyinghka lam makau e ni wa ra ai hpe, chye na nga mu. ³⁰ Nanhte hpe ngai teng teng tsun ma de ga, Ya pra nga ai ndai amyu masha ni garai n lai mat ma yang, dai lam yawng mayawng hte byin mat na ra ai. ³¹Sumsing lamu hte ginding aga lai mat wa ti mung, nye a ga gaw n lai mat na li ai. ³² Rai ti mung, dai shani hte ahkying hpe dai Wa hta kaga, kadai mung n chye lu ai. lamu na kasa ni hte dai Kasha pyi dai hpe n chye lu ma ai. ³³ Dai ahkying hpe nanhte n chye nga myit dai majaw, sadi, maja nga mu. ³⁴ Dai lam, masha langai mi tsan tsan mung de sa nga mat na, shi a nta hpe kau da yang, shi a mayam ni hpe ahkang jaw mu ai hte langai hte langai hpe bungli karan ngut jang, chyinghka sin ai wa hpe mung maja nga u ga, nga nna hkang da ai lam hte bung nga ai: ³⁵ kaning rai nme law, dai nta madu gaw, nrim e, yup tung e, u-goi hpawa e, jahpawt manap e, bai du wa na ra ai hpe nanhte n chye da mu ai majaw, a maja nga mu: ³⁶ shing n rai, shi akajawng sha wa du nna, nanhte n dum shami yup nga ai hpe, wa mu na ra ai. ³⁷ Nanhte hpe ngai tsun ma de ai hte maren, yawng hte hpe ngai tsun ma we ga, A maja nga mu, ngu nna shanhte hpe tsun mu ai. 

 

Marku 14

¹ Dai hpang ni ni lai jang, Shalai wa ai poi hte Azuma poi du ra ai. Shaloi,hkinjawng agyi ni hte laika ka ai sara ni shi hpe kaning di hkalem ai hte rim la nna sat kau lu na lam tam nga ma ai: ² rai ti mung shanhte gaw, Mung masha ni n kabrawng wa mu ga, poi a laman e n rai u ga, nga nna tsun ma ai. ³ Ya Yesu gaw Behtani kahtawng na manggang kap ai Simun a nta e hkrawn taw nga yang, numsha langai mi nachying hpu ai mura nardu jet rawng ai lunghpraw gawm lang shang nna, dai lung hpraw gawm gang daw nhtawm, shi a baw hta e ru bunya wu ai. ⁴ Dai rai nna nkau mi gaw, myit yu kahtet nga ma ai hte, Ndai mura hpehpa rai nme lahpawt lama di kau wu ta? ⁵ Dai gaw lap masum tsa jan hte dut la nhtawm, matsan mayan ni hpe karan jaw lu na rai nga ai, nga nna shada da tsun hkat ma ai: shanhte mung dai numsha hpe daru kau mu ai. ⁶ Dai rai nna Yesu gaw, Dai numsha a nga nga u ga; nanhte hpa rai nme shi hpe shatsang nga myit ta? Shi gaw ngai hta kaja ai amu galaw nu ai. ⁷ Matsan mayan ni nanhte hte rau tut tut nga nga ma ai hte, nanhte ra ai hte maren shanhte hpe galoi mung chyeju galaw lu ti mung, ngai gaw nanhte hte rau tut tut nga lu na n rai, ⁸ Shi gaw rai lu ai hte maren galaw nu ai; lup makoi na matu, shi nye a hkum hpe hkap chya ya ni ai. ⁹ Nanhte hpe ngai teng teng tsun ma de ai gaw, Dai kabu gara shi ga hpe mungkan ga ting shara shagu hkan e hkaw dan nga yang, shi a masat dingsat tai na matu, shi galaw ai amu ngu nna hkai dan na ma ru ai, ngu mu ai. ¹⁰ Shaloi, sape shi lahkawng hta lawm ai Yuda Iskarut gaw, Yesu hpe kinjawng agyi ni a lata de ap ya na, shanhte hpang de pru sa wa ai. ¹¹ Dai hpe na yang, shanhte kabu gara nga ma ai rai nna, shi hpe gumhpraw jaw na, hkam la ma ai. Dai rai nna, shi hpe kaning di ap ya lu na, mai ang ai ginwan tam nga ai. ¹² Ya, dai shalai wa ai hkungga hpe sat mu ai, Azuma poi a nnan shani e, Yesu a sape ni gaw, Dai Sahlai wa ai poi nang sha lu n ga, gara shara hta e na amatu sa shachyip na, nang tsaw nga n ta? ngu nna shi hpe san mu ai. ¹³ Shaloi shi a sape lahkawng shi shangun dat nna, Dai mare de sa ma su; ntsin di bu hpai ai wa gaw nan hte hkrum na ra ai: shi kaw hkan nang nna, ¹⁴ shi kanang shang ti mung, nta madu hpe, Nye a sape ni hte rau dai Shalai wa ai poi hpe ngai sha lu na, nye a manam gawk kanang nga a ta? nga nna Sara gaw san shangun dat mu ai, ngu mu: ¹⁵ shaloi, jahting shachyip da ai ntsa gawk kaba shi nan hpe madun na ra ai: dai yang e anhte a matu shachyip da ma la, ngu nna tsun dat mu ai. ¹⁶ Daisape yan pru sa wa nna, mare de shang wa ma yang, shi tsun da mu ai hte maren, mu ma ai rai nna, dai Shalai wa ai poi shachyip da ma ai. ¹⁷ Ya nrim rim rai yang, dai sape shi lahkawng hte rau shi sa du ai. ¹⁸ Shanhte shat sha dung nga ma yang, Yesu gaw, Ngai nanhte hpe teng teng tsun ma de ga, ngai the rau sha nga ai, nanhte hta na marai langai mi, ngai hpe ap kau na ring ngai, ngu mu ai. ¹⁹ Shanhte mahtang myit na yawn nna, langai hte langai, Ngai rai na n ni? ngu nna shi hpe tsun mu ai. ²⁰ Bai shi gaw, Dai shi lahkawng hta lawm ai, hka wan hta ngai hte rau lata manaw ai wa rai nga ai. ²¹ Ka da nga ai hte maren Masha Kasha gaw sa wa na ra ai: rai ti mung, dai MashaKasha hpe ap kau ai wa hta dingnye nga na ra ai; dai masha n shangai taw gaw, shi a matu grau kaja nga ai, ngu nna shanhte hpe tsun mu ai. ²² Shanhte shat sha nga ma yang, shi muk la nna, shaman ya nhtawm, ahkyep alep nna, shanhte hpe jaw let, La mu, dai gaw nye a hkum rai nga li ai, ngu mu ai. ²³ Bai, gawm hpe mung shi la nna, shakawn kungdawn ngut jang, shanhte hpe jaw nna, shanhte nlang dai hta na lu ma ai. ²⁴ Shahte hpe shi tsun mu ai gaw, Dai gaw, masha law law a matu ru kau ya ai, dai ga shaka hte seng ai, nye a asairai nga li ai. ²⁵ Nanhte hpe ngai teng teng tsun ma de ga, Karai Kasang a mungdan hta e tsabyi nnan hpe ngai lu lu na nhtoi du hkra, ndai tsabyi ru a asi hta na, ngai kalang mi muk bai lu lu na n rai, ngu mu ai. ²⁶ Dai hpang mahkawn mangoi ngut jang, shanhte gaw Tsanlun bum de pru sa wama ai. ²⁷ Shaloi e, Yesu shanhte hpe tsun mu ai gaw, Nanhte nlang myit kataw na marin dai; kaning rai nme law, Sagu rem wa hpe ngai anu sat nna, sagu ni bra mat na ma ra ai, nga nna ka da nga ai: ²⁸ rai ti mung, ngai bai sharawt hkrum ai hpang e, Galile mung e ngai nanhte a shawng e, sa wa magang na nngai, ngu mu ai. ²⁹ Shaloi Petru gaw, Nlang hte pyi myit kataw mat ma ti mung, ngai n lawm na nngai, ngu nna shi hpe tsun wu ai. ³⁰ Yesu mahtang, Nang hpe ngai teng teng tsun de ga, Dai na pyi, u lahkawng lang garai n goi yang, nang ngai hpe masum lang nyet kau na rin dai, ngu wu ai. ³¹ Petru chyawm gaw, Nang hte rau ngai si ting mung ngai nang hpe n nyet kau na nngai, ngu nna aja awa tsun wu ai. Shanhte nlang dai hte maren tsun nang ma ai. ³² Getsemane mying ai shara de shanhte du ma ai rai nna, shi gaw, Ngai akyuhpyi nga yang nanhte nang e naw dung nga ma la, ngu nna shi a sape ni hpe tsun mu ai. ³³ Shaloi, Petru, Yaku, Yawhan hte hpe shi hte rau shaga woi nhtawm, shi myit mak wa ai hte, myit ru myit tsang grai hkrum nga ai rai nna, ³⁴ Nye a myit masin si hkra yawn hkyen kaba hkrum nga li ai: nang e nga nga nna, a maja nga ma la, ngu nna tsun mu ai. ³⁵ Shaloi, dai yang na shi loi mi lai sa nna, ga de gum dagup let, dai ahkying ladaw shi hta shalai lu taw gaw shalai kau na, nga nna, ³⁶ Aba, Wa e, yawng mayawng hpe nang shabyin lu ndai; ndai gawm hpe ngai kaw na shalai kau ya e; rai ti mung, nye a myit n rai, na a myit she rai u ga, ngu nna hpyi wu ai. ³⁷ Ya, shi bai wa yang, shanhte yup pyaw nga ma ai hpe mu mu ai rai nna, Petru hpe, Simun e, nang yup pyaw nga n ni? ahkying mi sha pyi maja na n sharang lu n ni? ³⁸ Agung alau ai kaw n du myit ga, maja, akyu hpyi nga mu: wenyi gaw let nga ai, hkum shan mahtang n-gun n ja nga ai, ngunna tsun wu ai. ³⁹ Bai, shi lai sa nna, shawng na ga hpe kahtap hpyi wu ai. ⁴⁰ Bai, nhtang wa yang, shanhte a myi yup shamawi ai majaw, shanhte naw a yup pyaw nga ma ai hpe shi mu mu ai rai nna, shi hpe kaning ngu htan na, shanhte n chye ma ai. ⁴¹ Masum lang bat nhtang wa yang, Nanhte gaw naw yup pyaw nna, asan apan rai nga myit hka: ram sai; ahkying aten du sai; yu mu, dai Masha Kasha gaw, yubak kap ai ni a lata hta e ap kau ai hkrum na ra ai. ⁴² Rawt mu; sa wa sa ga: yu mu, ngai hpe ap kau na wa gaw ni sa wa ra ai, ngu nna shanhte hpe tsun mu ai. ⁴³ Shi ga naw tsun nga yang pyi, sape shi lahkawng hta lawm ai Yuda hte, hkinjawng agyi ni, laika ka ai sara ni hte agyi salang ni kaw na, nhtu hte dawhkrawng lang ai shawa hpawng, shi hte rau sa du ma ai. ⁴⁴ Shi hpe ap kau na wa chyawm gaw, Ngai pup ai wa gaw, dai wa rai nga ai: shi hpe rim la nna sadi hte woi wa mu, ngu nna, shanhte hpe kumla htet da ma nu ai. ⁴⁵ Dai rai nna du aishaloi jang, shi Yesu kaw hkre rai sa nna, Rabai e, ngu nna shi hpe pup wu ai. ⁴⁶ Shaloi shanhte gaw shi hpe lata hte gang nna, rim la mu ai. ⁴⁷ Rai ti mung, makau e tsap nga ai ni hta na langai mi, nhtu shaw nhtawm, hkinjawng agyi a mayam hpe kahtam nna shi a na di mat lu ai. ⁴⁸ Yesu mahtang, Nanhte gaw, damya hpe rim la na zawn, ngai hpe rim la na, nhtu dawhkrawng hte rai nna pru sa ma rin ni? ⁴⁹ Sharin shaga nga let, naw ku Htingnu hta e ngai shani shagu nanhte hte rau nga ti mung, nanhte ngai hpe n rim la ma nit dai. Ndai chyawm gaw, laika ni dik wa mu ga majaw, byin wa sai, ngu nna shanhte hpe tsun wu ai. ⁵⁰ Shaloi, nlang hte gaw shi hpe kau da nna, hprawng mat wa ma ai. ⁵¹ Shabrang langai mi, lachyit nba sha lawai ai hte shi kaw hkan nang ai rai nna, dai ni shi hpe rim la mu ai: ⁵² shi chyawm gaw dai nba hpe malu kau da nhtawm, singgu krin hprawng mat wa ai. ⁵³ Shaloi shanhte gaw, Yesu hpe hkinjawng agyi wa hpang de, woi wa mu ai rai nna, hkinjawng agyi ni, agyi salang ni hte laika ka ai sara ni nlang, shi kaw hpawng sa wa ma ai. ⁵⁴ Petru chyawm gaw, hkinjawng agyi a wing kata du hkra,tsan tsan e shi kaw hkan nang nna, ali ama ni hte rau dung let, wan kra lawm ngaai. ⁵⁵ Shaloi dai hkinjawng agyi ni hte, salang hpawng ting gaw, Yesu hpe sat kau lu hkra, sakse tam nga ma ti mung, n mu mu ai: ⁵⁶ kaning rai nme law, marai law law wa shi a lam masu ai sakse hkam ma ti mung, shanhte a sakse ga n hkrum ma lu ai. ⁵⁷ Shaloi nkau mi rawt pru nna, shi a lam masu ai sakse hkam let, ⁵⁸ Ndai wa gaw, Lata nte galaw ai ndai naw ku Htingnu hpe ngai run kau nna, masum ya laman e, lata hte n re ai sha, kaga hpe bai de lu na we ai, nga nna shi tsun ai ga hpe anhte na sa gaw ai, ngu mu ai. ⁵⁹ Rai ti mung shanhte a sakse ga gaw, garai n hkrum nga ai. ⁶⁰ Shaloi hkinjawng agyi wa gaw kaang e gan rawt nna, Nang hkaw mi muk n htan nga n ni? shanhte na a lam kaning rai sakse hkam nga ma hka? ngu nna Yesu hpe san wu ai. ⁶¹ Shi mahtang atsin sha nga nna, hkaw mi muk n htan wu ai. Bai, hkinjawng agyi wa gaw, A lu ai Wa a Kasha, ngu ai Hkristu gaw, nang rai nga n ni? ngu nna shi hpe san wu ai. ⁶² Yesugaw, Ngai rai nga nngai; dai hta kaga, Masha Kasha gaw hpung dagu a hkra maga e dung nga nna, lamu na sumwi ni hte sa du ai hpe, nanhte mu na ma rin dai, ngu wuai. ⁶³ Dai rai nna, hkinjawng agyi wa gaw shi a hpun palawng hpe gang je let, Anhte hpa sakse mi naw ra nga ga ta? ⁶⁴ Dai shatan nhkan ga hpe nanhte na ma nitdai: nanhte hpa nawn da mu ta? ngu mu ai. Shi si ging ai wa rai nga ai, nga nna shanhte nlang daw dan mu ai. ⁶⁵ Dai hta kaga nkau mi gaw, shi hpe mayen mahtaw bun ai hte, shi a myi man hpe magap kau ya nhtawm, shi hpe htwi nna, Myihtoi ga tsun u, ngu nna shi hpe tsun wu ai: ali ama ni mung lata hte shi hpe bye kahpretmu ai. ⁶⁶ Petru chyawm gaw dai wing kata de nga ai shaloi, hkinjawng agyi a nchyang numsha langai mi sa du nna, ⁶⁷ Petru wan kra nga ai hpe mu wu yang, shi hpe mada yu nna, Nang mung Yesu ngu ai Nazaret masha hte rau nga ga ndai, ngu wuai. ⁶⁸ Shi mahtang nyet kau ai hte, Nang tsun ai ga hpe ngai n chye n dum se ai, ngu wu ai: dai hpang, nta jan de shi pru sa mat wa ai. ⁶⁹ Dai nchyang numshashi hpe bai mu jang, grup yin tsap nga ai ni hpe, Ndai wa mung shanhte hta lawm nga ai, nga ai. ⁷⁰ Shi mahtang, bai nyet kau wu ai. Dai hpang gade n na jang, grup yin tsap nga ai ni gaw, Gaja wa, nang shanhte hta lawm nga ndai; Galile masha mung nang rai nga ndai, ngu nna Petru hpe tsun mu ai. ⁷¹ Dai rai nna, shi gaw matsa mawa ga hte, Nanhte tsun ai wa hpe ngai n chye nngai, ngu nna dagam mu ai. ⁷² Shaloi jang, dai u lahkawng lang bat goi nga ai. Dai rai nna Petru gaw,U lahkawng lang garai n goi yang, nang ngai hpe masum lang nyet kau na rin dai, ngu nna Yesu shi hpe tsun ai ga gaw dum nga ai hte, dai hpe myit dum let, hkrap nga ai. 

 

Marku 15

¹ Dai jahpawt manap e pyi, hkinjawng agyi ni, agyi salang ni, laika ka ai sara ni hte dai salang hpawng tinggaw bawng hkut ma sai rai nna, Yesu hpe gyit nhtawm, shi hpe dun wa nna, Pilat kaw ap ya mu ai. ² Shaloi, Pilat gaw, Nang Yuda masha ni a hkawhkam rai nga n ni? ngu nna shi hpe san wu ai. Shi gaw, Nang tsun ai hte maren rai nga nngai, ngu nna htan wu ai. ³ Hkinjawng agyi ni mahtang, mara law law wa shi hpe shagun mu ai. ⁴ Dai rai nna Pilat gaw, Nang hpa muk n htan nga n ni? shanhte nang hpe mara shagun ai lam, gade wa law nga ai hpe yu yu u, ngu nna san wu ai. ⁵ Yesu chyawm gaw, ga hkaw mi muk, hpa n htan wu ai rai nna, Pilat gaw a mau nga ai. ⁶ Dai poi a laman e, shanhte hpyi nga ai hte maren, bawng dung ai masha langai ngai hpe shi shanhte a matu dat dat ga nga ai. ⁷ Dai shaloi e, gumlau kabrawng ai hte masha hpe sat kau ai gumlau ni hte rau gyit lawm ai, Baraba ngu ai wa langai mi, nang nga ai. ⁸ Shaloi shawa masha ni lung wa nna, htung hte maren shanhte hpe galaw na hpyi ma ai. ⁹ Pilat mahtang, Yuda ni a hkawhkam hpe dat dat na nanhte ra nga myit ni? ngu nna shanhte hpe htan mu ai. ¹⁰ kaning rai nme law, manawn masham majaw, hkinjawng agyi ni shi hpe ap kau mu ai hpe, shi chye nga ai. ¹¹ Hkinjawng agyi ni chyawm gaw, shanhte a matu Baraba hpe dat dat u ga, nga nna shawa masha ni hpe myit sharawt da mu ai. ¹² Pilat mahtang shanhtehpe bai htan nna, Dai rai taw gaw, Yuda ni a hkawhkam, nanhte ngu ai wa hpe ngaikaning di na rai ta? ngu wu ai. ¹³ Shanhte gaw, Wudang hta jen da u, nga nna baijahtau ma ai. ¹⁴ Pilat gaw, Shi n hkru ai hpa wa galaw hkrup sa ta? ngu nna san mu ai. Shanhte mahtang, Wudang hta shi hpe jen da u, nga nna grau jahtau bu ma ai. ¹⁵ Pilat gaw shawa masha ni hpe myit shapyaw ya mayu ai hte, shanhte a matu Baraba hpe dat ya nna, Yesu hpe anu kayat nhtawm, jen da ai hkrum u ga, ap kau dat mu ai. ¹⁶ Shaloi hpyen ma ni gaw Pretori Htingnu wing kata de, Yesu hpe woi wa nna,dai hpyen dap ting hpe shaga tawn mu ai. ¹⁷ Shanhte gaw hkyeng ai hpun nba shi hpe jahpun nna, ju kagup hkri nhtawm, shi hpe shagup mu ai hte, ¹⁸ Yuda ni a hkawhkam e, nang a lu nit ga law! ngu nna shi hpe shakram mu ai. ¹⁹ Bai, shanhte gaw kumba yan hte shi a baw hpe kayat nna, shi hpe mayen mahtaw bun mu ai hte, lahput hput di let shi hpe naw ku mu ai. ²⁰ Shi hpe asawng asang di ngut jang, dai hkyeng ai hpun nba hpe shanhte raw kau nna, shi a hpun palawng hpe jahpun mu ai. Shaloi, wudang hta shi hpe jen da na, shanhte shapraw sa wa mu ai rai nna, ²¹ shi a wudang hpe hpai ya u ga, nam kahtawng na wa nna, lai hkawm sa wa ai Alesandru yan Ruhpu a kawa, Simun ngu ai Kureni mung masha langai mi hpe, shadip mu ai. ²² Ya, Golgohta ngu ai shara de shanhte shi hpe shapraw mu ai; Golgohta a ga lachyum gaw, Pungkum shara ngu ai rai nga lu ai.- ²³ Shaloi shanhte gaw mura hte kayau ai tsabyi jahku hpe shi hpe jaw mu ti mung, shi n kam lu nu ai. ²⁴ Ya shanhte wudang hta e shi hpe jen da nna, shi a hpun palawng hpe karan tawn mu ai hte, langai hte langai la ang na matu hpaida da mu ai. ²⁵ Wudang hta e shi hpe jen da ai gaw, ahkying masum rai nga ai. ²⁶ Dai hta kaga, Yuda ni a Hkawhkam, ngu nna shi a mara hpe madun ai laika ka shakap tawn mu ai. ²⁷ Shi hte rau damya lahkawng hpe mung, shi a hkramaga de langai mi, pai maga de langai mi, shanhte jen da mu ai. ²⁹ Lam e lai sa wa ai ni mung shi hpe shatan nhkan nna, tinang abaw hpe kanga let, Aha! naw ku Htingnu hpe run kau nna, masumya na laman e bai de lu ai wa e, ³⁰ na a hkum hpe nan hkye la nna, wudang hta na yu hkrat wa u, ngu mu ai. ³¹ Hkinjawng agyi ni mung, laika kaai sara ni hte, dai hte maren asawng asang di let, Masha kaga hpe shi hkye la gaai; tinang hkum dai pyi n hkye la lu a hka! ³² anhte mu nna shi hpe kam sham lu u ga, Israela Hkawhkam, Hkristu gaw, dai wudang hta na ya yu hkrat wa u ga, nga nna shada da tsun ma ai. Shi hte rau wudang hta jen da ai yan mung, shi hpe aroiarip ngu mu ai. ³³ Ya ahkying kru du yang, dai kaw nna ahkying jahku du hkra, mung ting htae nsin chyip rai mat ai. ³⁴ Ahkying jahku hta e, Yesu gaw nsen kaba hte, Elo-i, Elo-i, lamasabakhtani? ngu nna jahtau wu ai; de a ga lachyum gaw, Nye a Karai Wa e, Nye a Karai Wa e, hpa majaw nang ngai hpe kau da nga n ta? nga ai, rai lu ai. ³⁵ Dai makau e tsap nga ai ni nkau mi, dai hpe na mu yang, Yu mu, shi Elia hpe shaga nga ai nga ma ai. ³⁶ Shaloi marai langai mi gat sa nna, hka kamu ntsin hkri hte jahpring nna, kumba nren hta shakap nhtawm, shi hpe gawn jaw wu ai rai nna, Nga nga u ga, Elia shi hpe sa shayu kau na kun, anhte yu yu gaw, ngu mu ai. ³⁷ Yesu mahtang nsen kaba hte jahtau let, nsa hkyet mat lu ai. ³⁸ Shaloi naw ku Htingnu na nba grang, ntsa nna ga hkren, kaang brang rai ga mat ai. ³⁹ Yesu gaw shing rai nsa hkyet mat ai hpe, shi man e tsap nga ai hpyen latsa up ai bu mu wu yang, Gaja wa, ndai wa gaw Karai Kasang a Kasha nan rai nga ai, nga ai. ⁴⁰ Tsan tsan kaw nna, a yu nga ai numsha ni mung, nga ma ai: shanhte hta na, Galile mung e shi naw nga yang, shi kaw hkan nang nna, shi hpe galaw daw ai Magadala Mari, Yaku kaji yan Yose a kanu Mari hte, Salome hte lawm ma ai: ⁴¹ Yerusalem mare de shi hte rau lung wa ai numsha kaga law law mung, yu lawm maai. ⁴² Ya nrim rim rai nna dai laban nhtoi a shawng shani ngu ai, shachyip da ai nhtoi rai nga ai majaw, arawng lu nna rung aya lu ai hte, Karai Kasang a mungdan hpe myit mada nga ai, Aramahti a mare na Yosep gaw sa du nna, ⁴³ Pilat hpang de shang wam ai hte Yesu a hkum tsawp hpe hpyi wu ai. ⁴⁴ Shi ya e sha si mat ai hpe Pilat mau nna, hpyen latsa up ai bu hpe shaga la nhtawm, shi si ai gaw myi wa rai sai kun, san wu ai. ⁴⁵ Hpyen bu shi hpe shana wu ai majaw, dai moi mang gaw, Yosep hpe ap ya mu ai. ⁴⁶ Shi gaw lachyit sumpan mari la nna dai moi mang hpe shayu nhtawm, sumpan hta e kayawp ahkyen nna, nlung hta krawk da ai lup hta e bang tawn da wu ai: dai lup a mahka e, shi nlung galau pat da wu ai. ⁴⁷ Magadala Mari yan Yose a kanu Mari gaw, dai tawn da ai shara hpe mu ma ai. 

 

Marku 16

¹ Ya, laban nhtoi lai mat jang, Magadala Mari yan Yaku a kanu Mari hte Salome gaw, dai moi mang hpe chya ya na matu, manam pyaw ai sau mari ma ai. ² Dai nhtoi bat mi a shawng shani jahpawt jau jau e, jan pru jang, shanhte gaw dai lup de sa wa ma ai. ³ Shaloi shanhte gaw, Dai lup mahka de na, anhte a matu dai nlung hpe kadai galau kau ya na a ta? nga nna shada da tsun hkat ma ai. ⁴ Yudat yang, dai nlung galau mat nga ai hpe shanhte mu ma ai: dai gaw nachying kaba nga ai. ⁵ Dai lup kata de shang yang, hpraw tu ai nba lawai ai hte, hkra maga e dung nga ai shabrang langai mi hpe, shanhte mu ma ai rai nna, mak mat ma ai. ⁶ Shi mahtang, Nanhte hkum mak mat myit: wudang hta e jen da sai Nazaret wa Yesu hpe nanhte tam nga myit dai: shi rawt wa sai; shi nang e n nga sai; shi hpe bang tawn da ai shara hpe yu yu mu! ⁷ Rai ti mung, Nanhte a shawng e, Galile mung de shi sa wa na ra ai da, ngu nna shi a sape ni hte Petru hpe wa tsun dan mu; shi tsun dan ai hte maren, dai yang e nanhte shi hte hkrum na ma rin dai, ngu nna shanhte hpe tsun dan mu ai. ⁸ Shaloi shanhte pru wa nna, dai lup de na hprawng mat ma ai: kaning rai nme law, hkrit gari ai hte mau mak mat ai shanhte hkrum ma sai: hkrit nga ma ai majaw, shanhte kadai hpe mung hpa muk n tsun ma ai. ⁹ ( Ya, dai nhtoi bat mi a shawng shani jau jau e, shi hkrung rawt mat wa ai hpang, nat sanit shaden kau ya ai Magdala Mari hpe, shi hkum shawng shadan dan wu ai. ¹⁰ Shi pru nna, sharung shayawt, hkrap ngu hkrap ngoi rai nga ma ai, Yesu kaw hkan nang yu ai ni hpe, shana ya mu ai. ¹¹ Shi gaw a hkrung nga ai hte, shi hkum nan shi mu la sai hpe, shanhte na ma ai shaloi, n kam n sham ma ai. ¹² Dai hte a hpang, shanhte hta na nam kahtawng de hkawm sa wa ai marai lahkawng hpe, shi ahpraw asam kaga di nna, shan hpe shadan dan mu ai. ¹³ Shan gaw bai wa nna kaga ni hpe shana ya mu ai: shanhte mung n na kam ma ai. ¹⁴ Dai hpang, sape shi langai ni hkrai, shat sha nga ma yang, shi shanhte hpe shi hkum shadan dan wu ai. shi si ai kaw na bai hkrung rawt wa ai, mu lu ai ni a ga hpe nan, n kam ma ai majaw, shanhte a n kam n sham ai hte, myit ja nga ai hpe daru kau wu ai. ¹⁵ Bai shi shanhte hpe, Nanhte mungkan ting chyam hkra hkawm sa wa nna, shinggyim masha amyu baw shagu hpe, dai kabu gara shi ga hpe hkaw dan mu. ¹⁶ Kam sham nna baptisma hkam la ai wa gaw, hkye hkrang la ai hkrum na ra ai. n kam n sham ai wa chyawm gaw, daw dan ai hkrum na ra ai. ¹⁷ Kamsham ai ni madun dan lu na lamik kumla gaw, da ndai ni rai nga ai: Shanhte nye a amying hte nat ni hpe shaden kau lu na ma ra ai; ga amyu kaga ga mung, tsun dan lu na ma ra ai; ¹⁸ tinang a lata hte lapu hpe magra jum lu ma ai hte, si ai baw gung hpe lu ma ti mung, hpa mung n hkrum na ma ai; machyi makaw hkrum ai ni a ntsa e shanhte lata mara ya nna, dai ni bran wa na ma ra ai, ngu nna matsun dat mu ai. ¹⁹ Shingrai, dai Madu Yesu gaw, shanhte hpe ga tsun da ai hpang, sumsing lamu de shalun la ai hkrum nna, Karai Kasang a hkra maga de dung nga ai. ²⁰ Shanhte mung hkawm sa nna, shara shagu hkan e hkaw dan mu ai: dai Madu shanhte hte shingdep nna, shabyin lu ai lamik kumla ni hte dai mungga hpe shagrin ya mu ai.)