Mungkan ntsa na Nu a tsaw myit ni wa,
Lamu na shagan, Panglai na zaibru hte shadawn ndang.
Shinggyim maka pru nna, Nu a hkri Tung hta sa pra
Shata jahku hkum gawng li, chying hkai ten du hkra Nu hkam sharang
Shangai yang mung shinggyim machyi hte gadau, karai makam hte jahtau
Sai tung sai pa she gabreb, gade machyi tim wa she watik na Nu sharang
Nu a ladi mung gahtan du mat, shangai ai hpe mung awng dang lu.
Ma a myi man Nu mu lu, hkum shan machyi ai lam bai malap.
Nu a kasha hpe aw law ai, mare masha yawng mung zimlum sai
Hpaw goi hpawtsu she gashai, jahtawng japhtu mung n hprai.
N-baw n-nyeng yawng makai, Udi yu nga shan mung yawng hkum sai.
Htung hkring maka hte hkrang raw, karai mungga hte dai daw.
Tsawm htap awng dang mying hpe jaw.
Jahtawng htu dai daw shangai poi, shingran dat yang kabu n ngai oi.
Wunpawng myu sha law ra ai da, Nu a shangai lam mung dai hte hkrak.
Wa a tsaw myit hpe Nu galoi n ning dang, Gam, Naw, La, Tu mying she htum.
Aing htawngsu hta, shaning shagu mying bang jat
Aing htawngsu laika pa mung jat she jat.
Machyi makaw yang mung tsi hpaw jaw
Ngai sha myit pyaw u ga nga, n-gup she masen hkra lahpyaw hpyaw
Nu e ngu na marawn dat yang, kajawng htaplap let makau kaw du
Nu e machyi ai ngu tsun yang mung, Nu mung hkam sha myi pwi pru;
Sharu shayak na hkrap aput, oi ye Nu sha nga ba shayup
Nu a kya ai nsen ni wa, nshung jan zawn alum nga
Ngai kasha shayak ai, Nu pyi gaw gawng run sai.
Yup tung yup gan maza ran, yup mang pyi n mu n htoi htoi
Yupsu yupma yuptung ni law law lai, aten ladaw mung wai
Kawsi yang mung Nu hpe sharu, wa htu ten pyi n nga hkra shat maya jaw.
Ngai sha kawsi na hpe tsang, hkrap na hpe mung Nu nang tsang;
Nau jaw sha na maza bai ayai, jan she du hkra Nu n rau
makam lam hta hkri dung hkra, Jahpawt shana kyu hpyi ya;
chyum mugga hpe hti mayu hkra, Hpan wa karai hte mung Nu shachyen ya
Nu a tsaw ra myit ni wa, shinglet shingni hte shagawp n ma.
Shangai chyinghkai ladaw mung gashai.
Chying hkai nu a chyu hpang hpe rap, laika sharin jawng de kap;
Ngai sha ngwi pyaw lu na matu, shingran kaja hpe Nu hkai dan
Hpaji lam hta hpang hkrat n mai, hparat lam mung kung kyang hkra
Laika jawng de Nu nan woi sa.
Tinang kasha tsawm htap hkra, Bu hpun lam hpe Nu shatsawm ya.
N-chye n mai ai amyu htung hkring labau, shana shagu Nu sharin ya
Htung hkring ningli, myu tsaw kasi, shadut shakat dik ai chyinghkai Nu;
Mungkan hpaji shinggyim lai len, htai tsun sara ya ai Chyinghkai Nu
Goi e… jin ngu n nga ai Nu a tsaw myit ni wa.
Chyinghkai Nu a matsun ai ga, wuhpung kata akyu pru ra
Kyang tsawm ningja tai u ga, chyeju ning shawng prat ning shawng
Htoi san ning hkaw jan lagaw, gat dwi shingnip de Nu woi sa.
Shaga n madat yang riduk hte gayet, madat mara lam hpe Nu sharin ya.
Masu magaw n nga hkra, myit san seng ra ai hpe Nu sharin ya.
Tsun shaga ai lam si mani hkra, shani shana Nu sharin ya.
Sa-up la ai n lum ten du, Nu a layit gaw bungsoi jaw lu
An nau ni yawng kasi yang, Nu a hkum hta salat she grit;
Ya nam ten du yang marang htu abya,
Yi awn magam mung Nu shakut ra
Numri hkrat ai n shung ten du, nra gabrep na zawn gasi ai lu;
Hku-wawt hku na bung shi ni, Nu a hkum hta ndawt ya
Nu jahpun ya ai hpajawng hte, annau ni gaw gai lum sai.
Kraw n hkrat ai yulihku, Wa gaw jum ju Nu gaw nai htu
Bum yi hkan na pungkaw garet, htingga jinghpa du she gayep;
Bunglang htingpa Nu lagaw hkang hkrai, Salum kata galoi nhprai
Hkyiba litli Nu nang gun, gahtan salat lagaw ndung du
Mayin machyawn ai yagyi shat, nam chyim hkum ai mu dik sa
Dinghku kata aput apai nnga, Wa a ningrum kaja shi tai ya
Gwi wau U goi pyi n mai ai, gai maja ra ai mare hta nga;
Machyu pala n hkrit n kang, ngai sha kawsi na hpe Nu grai tsang
Chying hkai Nu a chyeju gaw, dwi kasi ai hka namtau langai hpa
Nu a marai yawng ma hkra, annau ni yawng hpe arang jaw ya.
Chyinghkai Nu a chyeju ni wa, ya sha ya sha sawn sumru
Sha dawn ga yan ngai nmu, sung htum tsaw htum tsun yu tim
N-htum ai hka yan langai zawn, ading sha lwi ai majaw mung rai
Chyinghkai Nu a chyeju gaw, shagawp yang nma, tsun jahta yang npra
Goi e…….Hpun tang ndu ai zawn hkam sha nngai oi……..
Aw……………Nu e, Nu e nang;
Karai hpe nchye shingtawt ndai...Wa hpe nchye shalu ndai
Manang nchye shatu ndai...Bu hpun sumraw nchye shingjawng ndai...
Masha nchye shatan ndai...
Nu e nang sharin ai ga langai mi, galoi mung nlu malap ai dik gaw
Ma ni e …….nmai gumrawng ai yaw…da
Nu a myi man galoi mung grai htoi tsawm
Hpan wa Karai hpe Chyeju shakawn, Chyinghkai Nu hpe mung Chyeju dum;
Sha grau kum-hpa mung ngai nlu, Sut gan aja mung ngai nsu
Salum gasi ndai hte, shagrau kumhpa sak jaw nngai
Asak kalu ai ngwi pyaw Chyeju, hpan wa Karai sha-man ya u ga law…
Dai ni ndai zawn Wunpawng sha ngu nna, Mungka ntsa e sa pra nga lu hkra, Kasha ni hpe shakung shapan, sharin achyin, shachye shachyang, shalan shabran, shadum shahprang, shading sharai, shabu jahpun, shakat jahkru, shamai shatsai, shamye shading, shadut shahkat, sharawt shatsaw…. Tsawra myit kaba…. hte, shakut shaja let, Kanu tai wa sai…..Kanu tai nga ai…… Kanu tai na ni yawng…hpe grai…Chyeju dum ai hte hkungga jaw let, hpundin dat n ngai law….
Ga shagawp,
Tangbau Maw She
9 May, 2010
(KCF)
Post a Comment