MAHTE A LAIKA

Mahte 1

¹ Da ndai gaw Abraham a kasha hte Dawi a kasha,Yesu Hkristu a ahtik labau gawn ai Chyum laika rai nga ai. ² Abraham gaw Isak hpe shaprat wu ai; Isak,Yaku hpe shaprat wu ai; Yaku gaw Yuda hte shi a kahpu kanau ni hpe shaprat wu ai; ³ Yuda gaw, Htama hta, Hparet yan Zerak hpe shaprat wu ai; Hparet gaw Hesrum hpe shaprat wu ai; Hesrum, Aram hpe shaprat wu ai; ⁴ Aram, Aminada hpe shaprat wu ai; Aminada, Nasun hpe shaprat wu ai; Nasun, Salmun hpe shaprat wu ai; ⁵ Salmun, Rahab hta, Bua hpe shaprat wu ai; Bua, Ruhta hta, Obed hpe shaprat wu ai; Obed gaw Yese hpe shaprat wu ai; ⁶ Yese gaw Dawi hkawhkam hpe shaprat wu ai; Dawi gaw Uria a madu jan ngu na hta, Shawlumon hpe shaprat wu ai; ⁷ Shawlumon gaw Rehoboam hpe shaprat wu ai; Rehoboam gaw Abia hpe shaprat wu ai; Abia gaw Asap hpe shaprat wu ai; Asap gaw Yosahpat hpe shaprat wu ai; ⁸ Yosahpat, Yoram hpe shaprat wu ai; Yoram, Uzia hpe shaprat wu ai; Uzia, Yohtam hpe shaprat wu ai; ⁹ Yohtam gaw Ahaza hpe shaprat wu ai; Ahaza gaw Hezekia hpe shaprat wu ai; ¹⁰ Hezekia, Manase hpe shaprat wu ai; Manase, Amon hpe shaprat wu ai; Amon,Yosia hpe shaprat wu ai; ¹¹ Yosia gaw Babelon ginwang de bawng wa dung na aprat e, Yehkonia hte shi a kahpu kanau ni hpe shaprat wu ai; ¹² Babelon hta bawng wa dung nga ai hpang e, Yehkonia gaw Salahtila hpe shaprat wu ai; Salahtila, Zerubabela hpe shaprat wu ai; ¹³ Zerubabela, Abiu hpe shaprat wu ai; Abiu gaw Eliakim hpe shaprat wu ai; Eliakim, Azura hpe shaprat wu ai; ¹⁴ Azura, Zaduk hpe shaprat wu ai; Zaduk, Ahkim hpe shaprat wu ai; Ahkim, Eliu hpe shaprat wu ai; ¹⁵ Eliu, Eliaza hpe shaprat wu ai; Eliaza, Mahtan hpe shaprat wu ai; Mahtan, Yaku hpe shaprat wu ai; ¹⁶ Yaku gaw Mari a madu wa Yosep hpe shaprat wu ai; Mari mahtang gaw, Hkristu ngu ai Yesu hpe shangai wu ai; ¹⁷ Shing rai, Abraham a aprat kaw nna Dawi a aprat du hkra, ahtik labau shi mali; bai, Dawi kaw nna Babelon hta bawng dung nga ai aprat du hkra,ahtik labau shi mali; bai, Babelon hta bawng dung nga ai kaw nna,Hkristu a aprat du hkra, ahtik labau shi mali li rai nga ma ai. ¹⁸ Ya, Yesu Hkristu a shangai wa ai lam ning rai nga ai: Shi a kanu Mari gaw, Yosep e mahtan da nga sai rai nna, shan shada da garai n kanawn yang, shi gaw dai Chyoi pra ai Wenyi a majaw na-um nasin rai wa sai. ¹⁹ Shi a madu wa Yosep chyawm gaw, ding man nga ai rai nna, shi hpe n shabrawng mayu wu ai majaw,shi e lagyim dat kau na maw nga ai. ²⁰ Ndai lam ni hpe naw myit aru nga yang,yu u, Madu a lamu kasa langai mi yup mang hta shi hpe hkum madun dan nna,Dawi a kasha Yosep e, na a madu jan Mari hpe la na myit hkum ru et; shi a na-um nasin gaw,dai chyoi pra ai Wenyi kaw na rai nga ai: ²¹ Shi gaw shadang sha shangai na ru ai rai nna, nang shi a amying hpe,Yesu, ngu nna shamying lu na rai nga ai: kaning rai nme law,shi a amyu hpe tinang a yubak mara kaw na hkye hkrang la na shi rai nga ai, ngu wu ai. ²² De a lam yawng hte, dai Madu gaw myihtoi hta tsun ai ga dik wa u ga majaw byin wa sai. ²³ Shi gaw, Yu u, dai hkawn sek gaw na-um nasin rai wa na rai nna, shadang sha shangai na ra ai, Shi a amying, Emanuela shamying ya na ma ru ai, nga ai: de a ga lachyum, Karai Kasang anhte hte rau rai nga ai, nga ai re ai. ²⁴ Yosep gaw, yup pyaw kaw na rawt wa nhtawm, dai Madu a kasa shi hpe hkang da wu ai hte maren, galaw wu ai rai nna, shi a madu jan hpe la wu ai: ²⁵ rai timung, shadang sha hpe garai n shangai lu yang, shi hte n hkrum ai sha nga nga ai: dai shadang sha hpe, shi Yesu ngu nna shamying wu ai. 

Mahte 2

¹Ya, Herod hkawhkam a lakhtak e, Yuda mung na Betlehem mare hta Yesu shangai wa ngut jang, yu mu, hpaji rawng ai masha sinpraw mung na Yerusalem de sa du ma ai rai nna, ² Shangai wa sai Yuda hkawhkam wa gaw, kanang rai nga a ta? shi a shagan hpe sinpraw mung hta e anhte mulu sa gaw ai rai nna, shi hpe naw ku na sa du ra ga ai, nga nna san ma ai. ³ Herod hkawhkam dai ga hpe na jang, shi hte Yerusalem na yawng hte hte rau myit kahpra nga ma ai rai nna, ⁴ dai amyu a hkinjawng agyi ni hte laika ka ai sara ni nlang hte hpe jahpawng da nhtawm, Hkristu hpe kanang shangai dat na ma ru ta, nga nna shanhte hpe jasan mu ai. ⁵ Shanhte gaw, Yuda mung na Betlehem mare hta e shangai wa na ra ai: kaning rai nme law, myihtoi a lata hte ning nga nna ka da nga ai, ⁶ Yuda mung na,nang Betlehem e,Yuda agyi ni hta, kaji htum nga ndai n rai; Nye a amyu Israela hpe woi rem nga na Du gaw, Nang kaw nna pru wa na ra ai, nga ai, ngu nna shi hpe tsun dan mu ai. ⁷ Shaloi Herod gaw, hpaji rawng ai ni hpe lagyim shaga la nna, dai shagan dan pru ai ladaw hpe shanhte kaw azin ayang san achyin la nhtawm, ⁸ Betlehem de shanhte hpe shangun dat yang, Nanhte sa nna, dai ma kaji a lam azin ayang hkan tam ai hte, shi hpe mu hkrup lu jang, ngai mung shi hpe sa naw ku lu n ga, ngai hpe wa shana ya mi, ngu nna tsun dat mu ai. ⁹ Dai hkawhkam a ga na la ngut jang, shanhte pru mat wa ma ai rai nna, yu mu,sinpraw mung e mada mu ai shagan gaw, ma kaji nga ai shara a ntsa e ang ang di rai kap mat hkra, shanhte a shawng e a sa wa nga ai. ¹⁰ Dai shagan hpe mu mu ai shaloi, shanhte nachying kabu gara nga ma ai. ¹¹ Dai nta hta e shang bang wa ma yang, dai ma kaji hte shi a kanu Mari hpe, shanhte mu mu ai rai nna, lahput hput di let shi hpe naw ku mu ai: tinang a sut sumpu hpaw nhtawm, shi hpe aja, lawban hte mura ngu ai kumhpa hpe sak mu ai. ¹² Herod hpang hku bai n hprang wa mu ga, yup mang hta shanhte hpe madun dan mu ai majaw, shanhte gaw tinang a mung de, lam kaga hku wa mat ma ai. ¹³ Ya shanhte wa mat ai hpang, yu mu, dai Madu a lamu kasa langai mi yup mang hta Yosep kaw dan pru nna, Rawt u, dai ma kaji hte shi a kanu hpe woi la nna, Egutu mung de hprawng sa u: ngai nang hpe bai shaga ai ladaw du hkra, dai yang e a nga nga su; kaning rai nme law, dai ma kaji hpe sat kau na, Herod tam magang ra ai, ngu wu ai. ¹⁴ Shaloi shi rawt nna, dai ma kaji hte shi a kanu hpe, shana ladaw e woi la nna, Egutu mung de htawt wa ai hte, Herod nsa hkyet ai ladaw du hkra, dai yang e a nga nga ai. ¹⁵ Dai gaw, Ngai sha hpe Egutu mung na ngai shaga la se ai, nga nna myihtoi a n-gup hte dai Madu tsun ai ga gaw, dik wa u ga she byin wa ai. ¹⁶ Hpaji rawng ai ni Herod hpe hkalem kau ma ai,shi chye nga ai shaloi, shi ja ja masin pawt bu ai hte, hpaji rawng ai ni shi hpe madun dan ai aten sawn la nna, shi shangun dat nhtawm, Betlehem hte de a ginwang hkan e rawng nga ai, ni ning kaw nna lawu grit re ai lasha ma kaji nlang hte hpe, sat kau mu ai. ¹⁷ Dai shaloi jang, Rama shara hta e ngoi ai nsen, Hkrap ngu hkrap ngoi, ja ja sharung shayawt ai, na lu sai; ¹⁸ Rahkela, shi a kasha ni hpe hkrap nga ai rai nna, Shanhte n nga ma ai majaw, Shalan shabran n rai lu sai. nga nna myihtoi Yeremia n-gup hte tsun ai ga dik wa sai. ¹⁹ Ya Herod nsa hkyet mat ai hpang, yu mu, dai madu a lamu kasa langai mi, Egutu mung hta e, yup mang hte Yosep kaw dan pru nna, ²⁰ Rawt u, dai ma kaji hte shi a kanu hpe woi la nna, Israela a mung de wa su; dai ma kaji a asak hpe tam ai ni si mat ma sai, nga ai. ²¹ Shaloi shi rawt nna dai ma kaji hte shi a kanu hpe woi la nhtawm, Israela a mung de bai wa ai. ²² Rai ti mung, Arkela-u, shi a kawa Herod a malai, Yuda mung hta e hkawhkam tai nga ai shi na wu ai shaloi, dai de e shang wa na shi hkrit nga ai: dai hta kaga, yup mang hte shi hpe bai madun dan wu ai majaw, Galile mung de shi bai htawt nna, Nazaret ngu ai mare hta a nga nga ai. ²³ Dai rai nna, Nazare wa shi hpe ngu na ma ru ai, nga nna myihtoi ni tsun ai ga gaw dik wa sai. 

 

Mahte 3

¹ Dai ladaw a laman e Baptisma sara Yawhan paw pru nna, ² Sumsing lamu a mungdan du magang ra ai majaw, myit malai lu mu, nga nna Yuda nam mali hkan e tara hkaw nga ai. ³ Dai wa gaw, Nam mali kata e jahtau ai nsen gaw, Dai madu a lam lajang da mu, Shi a lam masun ni hpe shading mu! nga nna myihtoi Esaia lakap nna tsun ai wa nan rai nga ai. ⁴ Dai Yawhan chyawm gaw, gawla-u mun hte da ai nba bu hpun nna, shi nshang e shanhpyi shingkyit kyit nga ai: shi a shahpa mung, dinggam-yaw hte nam na lagat jahku rai nga lu ai. ⁵ Dai shaloi e Yerusalem na ni, Yuda mung ting na ni hte, Yawdan hka ginwang shara magup hkan na ni, shi hpang de pru sa wa ma ai rai nna, ⁶ tinang a yubak hpe shapraw dan let shi a lata hte Yawdan hka hta e baptisma hkam la ma ai. ⁷ Ya Hparishe hte Saduke masha law law wa baptisma hkam la na nga sa ma ai hpe shi mu mu yang, shanhte hpe shi tsun mu ai gaw, Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta? ⁸ Dai majaw myit malai hte ging dan ai asi si mu! ⁹ Abraham gaw anhte a wa rai nga ma li ai, nga nna tinang a kraw hta e hkum nawn nga myit! nanhte hpe ngai tsun ma de ga, Karai Kasang gaw ndai nlung ni hta na Abraham a matu kasha hpan shapraw da lu ai. ¹⁰ Ya e pyi dai nwa gaw, hpun pawt nhpang hkan e tawn da nga ai; dai rai nna, asi kaja nsi ai hpun nga manga hpe, kran daw kau nna wan hta kabai bang kau nga ai. ¹¹ Ngai gaw,myit malai lu myit ga, hka hta nanhte hpe baptisma jaw ma de ai, rai ti mung, nye a hpang e du sa ai wa mahtang gaw, ngai hte n-gun grau ja ai rai nna,shi a kyepdin gun na pyi ngai n ging n dan nngai: dai wa gaw chyoi pra ai Wenyi hta mung, wan hta mung nanhte hpe baptisma jaw na myit dai: ¹² shi a lata hta dai hkuwawn shi lang nga ai rai nna, shi a mam chyarang hpe shi yit jasan nhtawm,shi a mam hpe gaw dum hta shinggyin bang da nna, mam nsan hpe gaw, n sat lu ai wan hte nat kau na ru ai, ngu mu ai. ¹³ Dai aten e Yesu gaw, Yawhan a lata hte baptisma hkam la na nga, Galile mung kaw nna, Yawdan hka makau e nga ai Yawhan hpang de, du sa wa ai. ¹⁴ Shi chyawm gaw, Ngai mahtang she nang kaw nna baptisma hkam la na ra nga nngai, nang mahtang ngai kaw du sa rin ni? ngu nna shi hpe hkap ndang let tsun dan wu ai. ¹⁵ Shaloi Yesu gaw, Ya dai shabyin ya e; ding man ai lam shagu hpe shadik lu mu ga, an a matu sut nga ma li ai, ngu nna shi hpe htan wu ai: shaloi, shi hpe dai lam shabyin ya wu ai. ¹⁶ Ya Yesu gaw baptisma hkam la ngut jang, dai hka hta na byawn hprang rai lung wa nna, yu u, lamu gaw hpaw malang wa nhtawm, Karai Kasang a Wenyi gaw, hkrudu zawn yu hkrat wa nna, shi a ntsa e dung nga ai hpe shi mu lu ai: ¹⁷ dai hta n-ga, Ndai wa gaw ngai sharawng awng nga ai, ngai tsaw ra ai Kasha rai nga li ai, nga nna lamu de na nsen ngoi pru wa ai. 

 

Mahte 7

¹ Nanhte jeyang ai n hkrum myit ga, hkum jeyang myit. ² Kaning rai nme law, nanhte jeyang ai hku hkan nna, nanhte jeyang ai hkrum na ma rin dai; nanhte hteng ya ai dang hte,nanhte hpe hteng ya na ma rin dai. ³ Tinang a myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, nang hpa rai yu nga n ta? ⁴ Yu u, na a myi hta hpuntawng rawng nga nlen, Naw hkring u, na a myi hta na nbun hpe ngai lai kau ya de ga, na nhpu nnau hpe nang kaning rai tsun lu n ta? ⁵ Sawt ai wa e,na a myi hta na hpuntawng hpe shawng lai kau u; dai hpang, na a nhpu nnau a myi na nbun hpe lai kau ya na, nang asan sha mu lu na rin dai. ⁶ Chyoi pra ai arai hpe gwi ni hpe hkum jaw mu; nanhte a hkachyi ni hpe wa ni man e hkum kabai tawn mu: shing n rai jang, dai ni tinang a lagaw hte dai hpe kabye kau nna, nanhte hpe nhtang kawa na ma rin dai. ⁷ Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai. ⁸ Kaning rai nme law, hpyi ai wa kadai mung lu la ai; tam ai wa mung mu la ai, akawk nga ai wa hpe mung,hpaw ya wu ai. ⁹ Nanhte hta na kadai rai ti mung, shi a kasha gaw muk hpyi yang, nlung jaw na wu ni? ¹⁰ nga hpyi yang, lapu jaw na wu ni? ¹¹ Dai rai nna,nanhte pyi nhkru nga myit dai mi, tinang a kasha ni hpe kaja ai kumhpa chye jaw myit yang gaw, dai hta grau n-ga, sumsing lamu na nanhte a Kawa gaw, shi hpe hpyi ai ni hpe kaja ai kumhpa jaw na n rai hka! ¹² Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu:dai gaw, jep ai tara hte myihtoi ni a ga kanu rai nga ai. ¹³ Dai gyip ai chyinghka hku shang wa mu: kaning rai nme law, hten bya ai de hkrang ai lam gaw, dam lada rai maden nga ai rai nna, dai hta shang mat wa ai ni law la ma ai. ¹⁴ Asak hkrung ai de hkrang ai chyinghka chyawm gaw, gyip nga ai hte de a lam gyeng nga ai rai nna,dai hpe mu tam ai ni n law ma ai. ¹⁵ Kraw lawang hta e amya sha na cyahkyawn myit rawng nna, sagu hpyi bu hpun let nanhte kaw sa du ai myihtoi masu ni hpe koi gam mu. ¹⁶ Shanhte a asi hte shanhte hpe chye lu na rai mu ai. Ju hpun hta na tsabyi si,salau hpun hta na maihpang si di la lu a ni? ¹⁷ Dai rai nna kaja ai hpun shagu gaw ja ai asi si nga ai; hpundaw wa ai hpun chyawm gaw, n ja ai asi si nga ai: ¹⁸ kaja ai hpun gaw n ja ai asi si lu ai n rai, hpundaw wa ai hpun mung, ja ai asi si lu ai n rai. ¹⁹ Ja ai asi n si ai hpun yawng mayawng hte gaw,kran daw kau nna wan hta kabai bang kau ai hkrum ma ai. ²⁰ Dai rai nna, shanhte a asi hte,shanhte a akyang hpe chye na mu ai. ²¹ Ngai hpe Madu e, Madu e, nga ai hte yawng mayawng gaw, sumsing lamu na mungdan hta shang lu na ma ai n rai: sumsing lamu hta nga ai,nye wa a myit hkan ai wa sha, shang lu na ra ai. ²² Dai shani e, Madu e, Madu e, na a amying hte anhte myihtoi htoi sa ga ai hte, na a amying hte nat hkyawt kau nna, na a amying hte magam amu law law shachyen sa ga ai, n rai ni? nga nna law law wa ngai hpe tsun na ma ra ai ²³ Dai shaloi e, Ngai nanhte hpe galoi mung n chye ma de ai; n tara ai amu galaw ai ni e, ngai kaw na pru mat wa mu, ngu nna ngai shanhte hpe tsun na ma we ai. ²⁴ Ndai nye a ga na nna, hkan galaw ai wa kadai mung, tinang a nta hpe lunghkrung ntsa e gap da ai hpaji rawng ai wa hte bung nga ai. ²⁵ Dai marang htu nna, hka tung wa ai hte nbung bung wa nna, dai nta hpe ahtu ti mung,lunghkrung ntsa e gaw da nga ai majaw, n kadawng lu ai. ²⁶ Ndai nye a ga na nna, n hkan galaw ai wa kadai mung, tinang a nta hpe zaibru jang e gap da ai masha angawk hte bung nga ai. ²⁷ Dai marang htu nna, hka tung wa ai hte nbung bung wa nna, dai nta hpe wa ahtu wu ai rai nna dai gaw kadawng daw mat ai: de a kadawng daw mat ai gaw nyawp rap rai nga ai,ngu nna hkaw dan mu ai. ²⁸ Ya, Yesu gaw dai ga hpe hkaw tsun ngut jang, shi sharin shaga ai lam hpe shawa masha ni mau mat nga ma ai; ²⁹ kaning rai nme law, shante a laika ka ai sara ni zawn n rai, ahkang aya lu ai wa zawn, shi shanhte hpe sharin shaga ya mu ai.

 

 

Mahte 4

¹ Dai shaloi e, Nat e gung lau hkrum u ga,dai Wenyi gaw Yesu hpe nam mali de woi bang wa nu ai. ² Ya shani mali shi ya, shana mali shi na tup, shi lusha gam ai hpang kawsi wu ai. ³ Shaloi, dai gung lau ai wa shi kaw du nna, Nang Karai Kasang a Kasha rai n yang gaw, ndai nlung ni hpe muk tai mu ga, tsun u! ngu wu ai. ⁴ Shi mahtang htan nna, Masha gaw, muk hte sha hkrung nga lu na n rai; Karai Kasang a n-gup hta na pru ai mungga nlang hte hte hkrung nga lu na ra ai, nga nna ka da nga ai, ngu wu ai. ⁵ Shaloi Nat gaw dai chyoi pra ai mare de, shi hpe woi wa nna, naw ku Htingnu a nchyun e shadun da nhtawm, ⁶ Nang Karai Kasang a Kasha rai n yang gaw, na hkum nan le de jahkrat dat u: kaning rai nme law, lung hta, na a lagaw n ahtu u ga, Na a matu shi a lamu kasa ni hpe shi hkang da nna, Shanhte a lata hta, nang hpe pawn la na ma ra ai, nga nna ka da nga ai, ngu nna shi hpe tsun wu ai. ⁷ Bai, Yesu gaw, Dai Madu, na a Karai Kasang hpe nang chyam yu lu na n rai, nga nna mung ka da nga ai, ngu wu ai. ⁸ Bai, Nat gaw, nachying tsaw ai bum ntsa de shi hpe woi lung wa da nna, mungkan ga na mungdan nlang hte hte dai ni a arawng sadang hpe, shi hpe madun dan nhtawm, ⁹ Nang dingnyawm nna ngai hpe naw ku n yang gaw, ndai yawng mayawng hte hpe ngai nang hpe jaw na de ai, shi hpe ngu wu ai. ¹⁰ Dai rai nna Yesu gaw, Satan e, pru mat wa u; dai Madu, na a Karai kasang hpe nang naw ku lu na rai nna, shi hpe hkrai daw lu na re ai, nga nna she ka da nga ai shi hpe ngu wu ai. ¹¹ Shaloi jang dai Nat gaw shi kaw na pru mat wa nna, lamu kasa ni shi hpe sa galaw daw mu ai. ¹² Ya Yawhan ap kau ai hkrum nga ai hpe shi na wu yang, shi Galile mung de htawt sa wa ai: ¹³ bai, Nazaret mare na htawt mat wa a yang, Zebulon hte Naphtali a mung ginwang hkan na nawng makau e nga ai Kaperna-um mare de shi du nna a nga nga ai. ¹⁴ Dai gaw,Zebulon hte Naphtali a mung, ¹⁵ Nawng makau e,Yawdan hka wora hkran na, Amyu kaga ni a Galile ga e; Nsin kata e dung nga ai amyu gaw, ¹⁶ Nhtoi kaba mu lu ma ai rai nna, Si ai mung hte de a shingnip kata hta dung nga ai ni kaw, Nhtoi dawng pru wa sai, nga nna myihtoi Esaia tsun ai ga dik wa u ga majaw byin nga ai. ¹⁷ Dai aten kaw nna Yesu gaw, Sumsing lamu a mungdan du magang ra ai rai nna, myit malai lu mu, nga nna hkaw nga ai hte tsun hpang nga ai. ¹⁸ Ya, Galile nawng makau e garet hkawm wa yang, shan nau rai nga ai Petru ngu ai Simun hte, shi a kanau Andre yan gaw, shan a sumgawn nawng hta e kabai bang nga ai hpe, shi mu hkrup mu ai: kaning rai nme law, shan lahkawng nga hkan ai masha rai nga ma ai: ¹⁹ Shaloi shi gaw, Ngai kaw hkan ma rit; masha hpe hkan hkwi na masha, ngai nan hpe shatai na ma de ai, ngu nna shan hpe tsun mu ai. ²⁰ Shaloi jang, shan gaw dai sumgawn ni hpe kau da nna shi kaw hkan nang ma ai. ²¹ Bai, dai kaw na hkawm wa yang kaga shan nau, Zebedi a kasha Yaku hte shi a kanau Yawhan yan gaw, shan a kawa Zebedi hte rau li hta nga nga nna,shanhte a sumgawn kapa nga ma ai hpe, shi mu hkrup mu ai rai nna, shan hpe shaga la mu ai. ²² Shaloi jang, shan gaw dai li hte shan a kawa hpe rap di kau da nna, shi kaw hkan nang ma ai. ²³ Bai, shi gaw Galile mung ting hta kawan hkawm let, shanhte a tara jawng ni hta shi sharin shaga nga nna, dai mungdan a kabu gara shi ga hpe hkaw dan ai hte, mung masha ni a machyi makaw amyu myu hte ana ahkya amyu myu hpe shamai shatsai ya wu ai. ²⁴ Dai majaw, shi a kajai gumhkawng ai shi ga gaw, Suri mung ting hta e pri rai wa sai rai nna, shanhte gaw, hkum n pyaw ai, machyi makaw amyu myu hte kawa machyi hkrum ai ni hte, nat kap ai, mamu mu ai hte lagaw lata katsing si ai ni hpe shi hpang de woi sa mu ai rai nna, shi shanhte hpe shamai shatsai ya wu ai. ²⁵ Shing rai, Galile mung hte Dekapoli mung, Yerusalem mare hte Yuda mung hte Yawdan hka wora hkran na masha wunawng wuwa kaba shi kaw hkan nang ma ai. 

 

Mahte 5

¹ Ya, dai wunawng wuwa ni hpe mu hkrup jang, dai bum de shi lung wa sai: shi dung nga yang, shi a sape ni shi kaw du ma ai rai nna, ² shi a n-gup hpaw ya ai hte, shanhte hpe sharin shaga let tsun mu ai gaw: ³ Wenyi hta matsan mayan rai nga ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga ma lu ai. ⁴ Yawn hkyen hkrum ai ni gaw, a lu ma ai; kaning rai nme law, shanhte shalan shabran ai hkrum na ma ra ai. ⁵ Myit sumnung ai ni gaw,a lu ma ai; kaning rai nme law, shanhte mungkan ga hpe madu lu na ma ra ai. ⁶ Ding hpring ai hpe kawsi hpang kara nga ai ni gaw, a lu ma ai; kaning rai nme law, shanhte hkru kat wa lu na ma ra ai. ⁷ Matsan chye dum ai ni gaw, a lu ma ai; kaning rai nme law, shanhte matsan dum la ai hkrum na ma ra ai. ⁸ Myit san seng ai ni gaw a lu ma ai; kaning rai nme law, shanhte gaw Karai Kasang hpe mu lu na ma ru ai. ⁹ Shangwi shapyaw chye ai ni gaw, a lu ma ai; kaning rai nme law, shanhte hpe, Karai Kasang a kasha ni, ngu nna shamying na ma ru ai. ¹⁰ Ding man ai lam majaw, zingri zingrat hkrum ai ni gaw, a lu ma ai; kaning rai nme law, sumsing lamu a mungdan, shanhte a mungdan rai nga ma lu ai. ¹¹ Nye a lam majaw, masha ni gaw nanhte hpe asawng asang di nna zingri zingrat nga ma ai hte, masu ai hku hkan let mara amyu myu shangun da myit dai shaloi e, nanhte a lu myit dai: ¹² kabu nna pyaw pyaw rai nga mu; kaning rai nme law sumsing lamu hta e nanhte a shabrai kaba nga ma lit dai: nanhte a shawng na myihtoi ni hpe mung shanhte dai hte maren zingri zingrat di kau ma nu ai. ¹³ Nanhte gaw dinghta ga a ajum rai nga myit dai; dai ajum mahtang hkawng mat yang gaw, hpa hta jashum la lu na rai ta? shinggan de kabai kau nna, masha e kabye kau na hta kaga, hpa asung mi n shang lu ai. ¹⁴ Nanhte gaw mungkan ga a nhtoi rai nga myit dai. Bum ntsa e de ai mare hpe shinggang lu na n rai; ¹⁵ Pyengdin hpe shatu nhtawm, mung npu e tawn da ai gaw, kadai n galaw yu ai; pyengdin shadun hta tawn da nna, dai gaw, nta e nga nga ai ni nlang hte hpe jahtoi ya mu ai. ¹⁶ dai rai nna, masha ni gaw nanhte a kaja ai bungli mu lu nna, sumsing lamu e nga ai nanhte a kawa hpe shagrau shaa lu mu ga, shanhte a man e nanhte a nhtoi hpe htoi tu shangun da mu law. ¹⁷ Dai jep ai tara hte myihtoi ni a ga hpe raw dat kau na, nga nna ngai sa du ai gaw, hkum nawn nga myit; raw dat kau na matu n rai, dai hpe shadik na she, ngai sa du ring ngai. ¹⁸ Nanhte hpe ngai teng teng tsun ma de ga, lamu hte aga garai n lai wa yang,dai hpe garai n shabyin byin gaw, dai jep ai tara kaw nna, ga kanu langai mi hte madin langai mi pyi, lai wa lu na n rai. ¹⁹ Dai rai nna, kadai mung, dai kaji htum ai ga matsun langai ngai hpe tawt lai nna, masha ni hpe ning rai sharin shaga nga a yang gaw, sumsing lamu a mungdan hta kaji htum ai wa ngu na ma ru ai: ga dai hpe hkan galaw nna, sharin achyin ya ai wa chyawm gaw, sumsing lamu a mungdan hta, kaba ai wa ngu na ma ru ai. ²⁰ Kaning rai nme law, nanhte hpe ngai tsun ma de ai gaw, Nanhte a ding hpring ai lam,laika ka ai sara ni hte Hparishe ni a ding hpring ai hta n grau ma lit yang gaw, sumsing lamu a mungdan hta nanhte gaja wa n shang lu na myit dai. ²¹ Masha hpe nang sat lu na ndai n rai; sat kau ai wa gaw, jeyang ai de ging dan nga ai, nga nna moi shawng na ni hpe tsun dan ai ga gaw, nanhte na yu ma nu ai. ²² Ngai mahtang nanhte hpe tsun ma de ai gaw, tinang a kahpu kanau wa hpe masin pawt ai wa kadai rai ting mung jeyang ai hte ging dan nga ai: tinang a kahpu kanau wa hpe, Raka, nga ai wa gaw salang hpawng a daw dan ai hte ging dan nga ai: bai, Mana ndai, nga ai wa gaw, ngarai a wan hte ging dan nga ai. ²³ Dai rai nna dai hkungri de, na a kumhpa hpe nang la sa yang, na a nhpu nnau nang hpe mara shagun ai shara lama ma nga nga ai hpe, dai shaloi jang nang dum lu wu yang gaw, ²⁴ hkungri a man e na a kumhpa hpe tawn da nhtawm, na nhpu nnau hte myit jahkrum la na shawng sa nna, dai hpang e na a kumhpa hpe wa mara da u. ²⁵ Nang hpe hka galaw ai wa hte rau, lam e naw sa wa yang, shi hte myit alawan jahkrum u; shing n rai, dai hka galaw ai wa gaw, tara agyi a lata hta nang hpe ap kau na ra ai; tara agyi gaw mang galang kaw nang hpe ap kau na ndai rai nna, htawng hta jahkrat kau ai nang hkrum na rin dai: ²⁶ nang hpe ngai teng teng tsun de ai gaw, peksan prai hkra nang garai n wa wa gaw, dai kaw nna nang pru lu na ndai n rai. ²⁷ Masha num nang shaw lu na ndai n rai, nga nna, tsun da ai gaw, nanhte na yu ma nu ai. ²⁸ Ngai mahtang nanhte hpe tsun ma de ai gaw, myit madu hte numsha hpe yu yu nna ra ai wa gaw, shi a myit hta, dai numsha hte, num shaw ai amu galaw nu ai. ²⁹ Dai rai nna, hkra maga na myi nang hpe shut shangun n yang gaw, dai hpe malawk kabai kau u; na a hkum ting hpe Ngarai mung hta jahkrat kau ai hkrum na hte, na a hkum daw langai mi hten na gaw, grau kaja nga ai. ³⁰ Na a hkra lata mung nang hpe shut shangun n yang gaw, dai hpe kahtam dut kabai kau u; na a hkum ting Ngarai mung de shang wa na hte, na a hkum daw langai mi hten na gaw, grau kaja nga ai. ³¹ Na a madu jan hpe jahka mayu n yang gaw, shi hpe dat dat na laika jaw u ga, nga ai ga mung nga sai. ³² Ngai mahtang nanhte hpe tsun ma de ai gaw, la shaw ai majaw sha n rai yang gaw, tinang a num hpe jahka ai wa gaw, shi hpe la shaw shangun nu ai; (dai jahka kau ai num hpe hkungran ai wa mung, num shaw ai amu galaw nu ai.) ³³ Bai Masu let nang n dagam lu na ndai rai nna, na a dagam ai ga gaw dai Madu kaw nang shadik lu na wu ai, nga nna moi shawng na ni hpe tsun dan ai ga gaw, nanhte na yu ma nu ai. ³⁴ Ngai mahtang nanhte hpe tsun ma de ai gaw, nanhte hpa mung dagam dala rai lu na myit dai n rai: lamu hpe dagam lu na myit dai n rai; dai gaw Karai Kasang a tingnyang rai nga lu ai: ³⁵ aga hta mung n rai; dai gaw shi a lagaw mara ai shara rai nga lu ai: Yerusalem hpe mung n rai; dai gaw hkawhkam kaba a dung nga ai mare rai nga ai. ³⁶ Na a baw hta mung dagam lu na ndai n rai: nang gaw kara singgawng langai mi hpe pyi, hpraw u ga chyang u ga n galaw lu ndai. ³⁷ Na a ga gaw, Rai sa nga yang, rai u ga, N rai nga yang, n rai u ga; dai hta lai ai ga nlang hte gaw n kaja ai wa hte seng nga ai. ³⁸ Myi a matu myi, wa a matu wa bai htang lu na, nga nna tsun dan ai ga gaw nanhte na yu ma nu ai. ³⁹ Ngai mahtang nanhte hpe tsun ma de ai gaw, N hkru ai wa hpe hpa mung hkum tai mu; na a hkra shabyi bye ai wa hpe, maga mi naw ja ya u. ⁴⁰ Nang hpe tara dara nna na a lawng hkoi la kau mayu ai wa hpe, na a palawng hpe mung hkum ndang u; ⁴¹ nang hpe dip nna mai langai mi sa shangun ai wa hte rau, mai lahkawng naw hkan sa u. ⁴² Nang kaw hpyi ai wa hpe jaw u; nang kaw nna hkoi shap mayu ai wa hpe hkum gang kau u; ⁴³ Na a baw sang wa hpe nang tsaw ra lu nna, na hpyen wa hpe n dawng n yawt lu na ndai, nga nna tsun dan ai ga gaw, nanhte na yu ma nu ai. ⁴⁴ Ngai mahtang nanhte hpe tsun ma de ai gaw, nanhte a hpyen ni hpe tsaw ra mu: nanhte hpe zingri zingrat ai ni a matu mara akyu hpyi mu: ⁴⁵ shing rai yang gaw, sumsing lamu hta nga ai nanhte a Kawa a kashu kasha ni gaw, nanhte tai na ma rin dai; kaning rai nme law, n kaja ai ni hte kaja ai ni a ntsa e, shi a jan hpe shi pru shangun nga ai rai nna, ding hpring ai ni hte n ding n hpring ai ni a ntsa e, marang jahtu ya mu ai. ⁴⁶ Nanhte hpe tsaw ra ai ni hpe sha tsaw ra myit yang gaw, nanhte hpa shabrai lu la na myit ta? kang hta ai ni mung, dai hte maren galaw ma ai, n rai ni? ⁴⁷ Nanhte a nhpu nnau ni hpe sha hkrum shaga myit yang gaw, hpa grau shara nga na myit ta? tara maigan ni mung, dai hte maren galaw ma ai, n rai ni? ⁴⁸ Dai majaw, sumsing lamu na nanhte a Kawa gaw kup nga ai hte maren, nanhte mung kup kup rai nga mu. 

 

Mahte 6

¹ Masha ni mada mu lu mu ga, shanhte a man e sha, nanhte a daw ya ai amu hpe nanhte n galaw myit ga, sadi nga mu: shing n rai yang gaw, sumsing lamu hta nga ai nanhte a Kawa kaw na, nanhte shabrai n lu na mu ai. ² Nang alu jaw n yang gaw, masha ni a shakawn ai ga lu la lu u ga, tara jawng ni hta, lam hkan e mung, sawt ai masha ni galaw ai zawn, na a man e pahtau hkum dum shangun u: nanhte hpe ngai teng teng tsun ma de ai gaw, shanhte gaw,tinang a shabrai lu la ma nu ai. ³ Nang mahtang, alu jaw n yang gaw, na a hkra lata galaw ai amu hpe na a pai lata n chye lu u ga; ⁴ shing rai,na a alu jaw ai amu n dan n leng ai hta rai nga lu na rai nna, n dan n leng ai shara hpe mu lu ai, na a Nwa gaw, nang hpe bai htang na rin dai. ⁵ Nanhte akyu hpyi nga myit yang gaw, sawt ai masha ni zawn hkum rai myit: kaning rai nme law, masha ni shanhte hpe mu lu mu ga, tara jawng ni hta, mare lam nshe ni hta tsap nga nna akyu hpyi nga na shanhte tsaw nga ma ai: nanhte hpe ngai teng teng tsun ma de ai gaw, shanhte tinang a shabrai lu la ma nu ai. ⁶ Nang mahtang akyu hpyi nga n yang gaw, na a kata gawk de shang nna, chyinghka hpe la da nhtawm, n dan n leng ai shara e, na a Nwa hpe hpyi u: n dan n leng ai shara hpe mu lu ai, na a Nwa gaw, nang hpe bai htang na rin dai. ⁷ Nanhte akyu hpyi nga myit yang, tara maigan na ni zawn, ga bai kahtap htap hkum rai nga myit: kaning rai nme law, ga galu galang tsun nga ma ai majaw, shanhte hpe madat mara la ya na ra ai, nga nna shanhte myit nawn ma ai. ⁸ Nanhte garai n hpyi lu yang pyi, nanhte ra ai hku hpe, nanhte a Kawa (Karai Kasang ) chye ya nga ai majaw, shanhte hte hkum bung nga myit. ⁹ Dai rai nna, nanhte gaw ning ngu akyu hpyi mu, Sumsing lamu na anhte a Wa e, Na a amying nsang chyoi pra nga lit ga; ¹⁰ Na a mungdan du wa ru ga; Lamu tang hta, na a myit dik nga ai hte maren, ga ntsa e mung,dik lit ga law; ¹¹ Anhte hta ra ai lusha, dai ni anhte hpe jaw mi; ¹² Masha ni anhte hpe shut ai mara, anhte raw kau ya ai zawn, anhte a mara hpe mung raw kau ya mi; ¹³ Agung alau nga ai de, anhte hpe n sa shangun ai sha, N kaja ai lam hta na,shaw la mi law. ¹⁴ Kaning rai nme law, masha ni a shut hpyit ai hpe nanhte raw kau ya myit yang gaw, nanhte a lamu na Kawa gaw,nanhte a shut hpyit ai hpe mung, raw kau ya na myit dai; ¹⁵ Masha ni a shut hpyit ai hpe nanhte n raw kau ya myit yang gaw, nanhte a Kawa mung, nanhte a shut hpyit ai hpe, n raw kau ya na myit dai. ¹⁶ Bai, nanhte lusha gam nga myit yang, sawt ai masha ni zawn, nanhte a myi man hpe hkum kabyi myit; masha ni a man e shanhte a lusha gam ai dan lu u ga, shanhte gaw tinang a myi man hpe jasum ma ai. nanhte hpe ngai teng teng tsun ma de ai gaw, shanhte tinang a shabrai lu la ma nu ai. ¹⁷ Nang mahtang lusha gam nga n yang gaw, na a baw hpe naman chya nna, na a myi man hpe myit kau u; ¹⁸ Shing rai, masha a man e n rai, n dan n leng ai shara hta nga ai na a Nwa a man e sha, na a lusha gam ai dan nga na ra ai rai nna, n dan n leng ai shara hpe mu ai, na a Nwa gaw, nang hpe bai htang na rin dai. ¹⁹ Manut hte nhkan e sha jahten nna, lagu lagut ni tawk htu nna lagu la lu ai, dinghta ga a ntsa e, nanhte a sut gan hpe hkum mahkawng da mu. ²⁰ Manut hte nhkan n sha jahten lu nna, lagu lagut ni mung n tawk htu lu ai hte n lagu la lu ai, suming lamu hta e, nanhte a matu sut gan hpe mahkawng da mu: ²¹ kaning rai nme law, na a sut gan nga ai kaw, na a myit masin mung nga na lit dai. ²² Dai myi gaw, hkum a pyengdin rai nga lu ai; na a myi asan sha rai nga yang gaw, na a hkum ting a htoi nga ai; ²³ na a myi n kaja nga yang gaw, na a hkum ting a sin nga ai: nang hta rawng ai nhtoi gaw, nsin tai mat yang gaw, dai nsin gaw gade htat nga a hka! ²⁴ Kadai rai ting mung, madu lahkawng kaw chyang lu na n rai; shi langai mi hpe n dawng nna kaga hpe tsaw ra na wu ai; shing n rai langai mi hpe kasawt nna, kaga hpe n kaw n law di na wu ai; nanhte Karai Kasang hpe mung, mungkan a sut gan hpe mung, rau chyang lu na myit dai n rai. ²⁵ Dai rai nna ngai nanhte hpe tsun ma de ai gaw, hpa lu sha na hpa lu lu na asak a matu, kaning rai lu hpun na nanhte a hkum a matu, hkum tsang nga myit; dai asak gaw ashat hta, hkum hkrang gaw hpun palawng hta grau nga ma ai, n rai ni? ²⁶ Ntsa malen na u ni hpe mada yu mu; shanhte n gat n dan ma ai, sut dek hta mung n mahkawng da ma ai: rai ting mung, sumsing lamu na nanhte a Kawa gaw, shanhte hpe lusha jaw da nga ai: nanhte gaw shanhte hta grau nga myit dai n rai ni? ²⁷ Nanhte hta kadai rai ti mung, myit tsang ai hte, tinang a aprat galu u ga, dawng mi daram jat la lu na myit ni? ²⁸ Bai,hpun palawng a matu nanhte hpa rai myit tsang nga myit ta? Prang na hkalaw pan ni, kaning rai kaba wa ma ai hpe, myit dum nga mu: dai ni gaw, makan mung n galaw, ari mung n ri ma ai: ²⁹ rai ti mung, ngai nanhte hpe tsun ma de ai gaw, Shawlumon pyi shi a hpung kaba mahkra hta, dai nampan langai mi zawn, bu hpun lu ai n rai. ³⁰ Ai n kam ai baw e, dai ni nga nna hpawt de wan nmang hta kabai bang kau ai nam na tsingdu hpe pyi, Karai Kasang shing re jahpun da ai rai jang gaw, dai hta grau nna nanhte hpe jahpun na myit dai, n rai ni? ³¹ Dai re ai majaw nanhte gaw myit ru myit tsang let, Anhte hpa sha na, hpa lu na, hpa bu hpun na i? nga nna hkum tsun nga myit; ³² kaning rai nme law, tara maigan ni dai nlang hte hpe tam nga ma ai: dai yawng mayawng hte hpe nanhte ra nga myit dai gaw, sumsing lamu na nanhte a Kawa gaw chye nga ai. ³³ Nanhte chyawm gaw, shi a mungdan hte shi a ding hpring ai lam hpe shawng tam nga mu; shaloi dai nlang nanhte hpe kahtap jaw na ma rin dai. ³⁴ Dai rai nna, hpawt ni na matu myit hkum tsang myit ; hpawt ni gaw shi a matu ru tsang na ra ai.Dai ni na ru tsang ai gaw, dai ni na matu ram nga ai. 

 

Mahte 7

¹ Nanhte jeyang ai n hkrum myit ga, hkum jeyang myit. ² Kaning rai nme law, nanhte jeyang ai hku hkan nna, nanhte jeyang ai hkrum na ma rin dai; nanhte hteng ya ai dang hte,nanhte hpe hteng ya na ma rin dai. ³ Tinang a myi hta rawng ai hpuntawng hpe n myit yu ai mi, na a nhpu nnau a myi hta rawng ai nbun hpe, nang hpa rai yu nga n ta? ⁴ Yu u, na a myi hta hpuntawng rawng nga nlen, Naw hkring u, na a myi hta na nbun hpe ngai lai kau ya de ga, na nhpu nnau hpe nang kaning rai tsun lu n ta? ⁵ Sawt ai wa e,na a myi hta na hpuntawng hpe shawng lai kau u; dai hpang, na a nhpu nnau a myi na nbun hpe lai kau ya na, nang asan sha mu lu na rin dai. ⁶ Chyoi pra ai arai hpe gwi ni hpe hkum jaw mu; nanhte a hkachyi ni hpe wa ni man e hkum kabai tawn mu: shing n rai jang, dai ni tinang a lagaw hte dai hpe kabye kau nna, nanhte hpe nhtang kawa na ma rin dai. ⁷ Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai. ⁸ Kaning rai nme law, hpyi ai wa kadai mung lu la ai; tam ai wa mung mu la ai, akawk nga ai wa hpe mung,hpaw ya wu ai. ⁹ Nanhte hta na kadai rai ti mung, shi a kasha gaw muk hpyi yang, nlung jaw na wu ni? ¹⁰ nga hpyi yang, lapu jaw na wu ni? ¹¹ Dai rai nna,nanhte pyi nhkru nga myit dai mi, tinang a kasha ni hpe kaja ai kumhpa chye jaw myit yang gaw, dai hta grau n-ga, sumsing lamu na nanhte a Kawa gaw, shi hpe hpyi ai ni hpe kaja ai kumhpa jaw na n rai hka! ¹² Masha ni nanhte hpe hkan galaw na, nanhte tsaw matsaw hte maren, nanhte mung dai hku shanhte hpe hkan galaw mu:dai gaw, jep ai tara hte myihtoi ni a ga kanu rai nga ai. ¹³ Dai gyip ai chyinghka hku shang wa mu: kaning rai nme law, hten bya ai de hkrang ai lam gaw, dam lada rai maden nga ai rai nna, dai hta shang mat wa ai ni law la ma ai. ¹⁴ Asak hkrung ai de hkrang ai chyinghka chyawm gaw, gyip nga ai hte de a lam gyeng nga ai rai nna,dai hpe mu tam ai ni n law ma ai. ¹⁵ Kraw lawang hta e amya sha na cyahkyawn myit rawng nna, sagu hpyi bu hpun let nanhte kaw sa du ai myihtoi masu ni hpe koi gam mu. ¹⁶ Shanhte a asi hte shanhte hpe chye lu na rai mu ai. Ju hpun hta na tsabyi si,salau hpun hta na maihpang si di la lu a ni? ¹⁷ Dai rai nna kaja ai hpun shagu gaw ja ai asi si nga ai; hpundaw wa ai hpun chyawm gaw, n ja ai asi si nga ai: ¹⁸ kaja ai hpun gaw n ja ai asi si lu ai n rai, hpundaw wa ai hpun mung, ja ai asi si lu ai n rai. ¹⁹ Ja ai asi n si ai hpun yawng mayawng hte gaw,kran daw kau nna wan hta kabai bang kau ai hkrum ma ai. ²⁰ Dai rai nna, shanhte a asi hte,shanhte a akyang hpe chye na mu ai. ²¹ Ngai hpe Madu e, Madu e, nga ai hte yawng mayawng gaw, sumsing lamu na mungdan hta shang lu na ma ai n rai: sumsing lamu hta nga ai,nye wa a myit hkan ai wa sha, shang lu na ra ai. ²² Dai shani e, Madu e, Madu e, na a amying hte anhte myihtoi htoi sa ga ai hte, na a amying hte nat hkyawt kau nna, na a amying hte magam amu law law shachyen sa ga ai, n rai ni? nga nna law law wa ngai hpe tsun na ma ra ai ²³ Dai shaloi e, Ngai nanhte hpe galoi mung n chye ma de ai; n tara ai amu galaw ai ni e, ngai kaw na pru mat wa mu, ngu nna ngai shanhte hpe tsun na ma we ai. ²⁴ Ndai nye a ga na nna, hkan galaw ai wa kadai mung, tinang a nta hpe lunghkrung ntsa e gap da ai hpaji rawng ai wa hte bung nga ai. ²⁵ Dai marang htu nna, hka tung wa ai hte nbung bung wa nna, dai nta hpe ahtu ti mung,lunghkrung ntsa e gaw da nga ai majaw, n kadawng lu ai. ²⁶ Ndai nye a ga na nna, n hkan galaw ai wa kadai mung, tinang a nta hpe zaibru jang e gap da ai masha angawk hte bung nga ai. ²⁷ Dai marang htu nna, hka tung wa ai hte nbung bung wa nna, dai nta hpe wa ahtu wu ai rai nna dai gaw kadawng daw mat ai: de a kadawng daw mat ai gaw nyawp rap rai nga ai,ngu nna hkaw dan mu ai. ²⁸ Ya, Yesu gaw dai ga hpe hkaw tsun ngut jang, shi sharin shaga ai lam hpe shawa masha ni mau mat nga ma ai; ²⁹ kaning rai nme law, shante a laika ka ai sara ni zawn n rai, ahkang aya lu ai wa zawn, shi shanhte hpe sharin shaga ya mu ai. 

 

Mahte 8

¹ Ya dai bum de nna yu hkrat wa yang, masha wunawng wuwa kaba shi kaw hkan nang ma ai. ² Shaloi, yu mu, manggang kap ai masha langai mi sa du nna shi hpe naw ku let, Madu e, nang hkraw n yang gaw, ngai hpe shapra ya lu na rai nga ndai,ngu wu ai, ³ Shi chyawm gaw lata ladawn nna, shi hpe ahtawk let, Ngai hkraw nga nngai, san pra wa nu, ngu wu ai: dai shaloi jang, shi a manggang san pra mat lu ai. ⁴ Shaloi Yesu gaw, Dai lam kadai hpe mung hkum tsun dan et; pru wa nhtawm na hkum hkinjawng wa hpe madun dan u; shanhte a matu sakse tai u ga, Mawshe tawn da ai kumhpa jaw da nu, shi hpe ngu dat wu ai. ⁵ Ya,Kaperna-um mare de shang bang wa yang hpyen latsa up ai bu langai mi shi kaw sa du nna, ⁶ Madu e, nye a ma katsing si ai ana hte nye a nta e a taw nga nna, aja awa aju machyi nga ai, ngu nna shi hpe hpyi nem wu ai. ⁷ Shi gaw,Shi hpe shamai ya na, ngai sa du na nngai,ngu wu ai. ⁸ Shaloi dai hpyen bu wa gaw Madu e, nye a nta magaw npu e nang sa shang na gaw, ngai n ging n dan nngai: na ga hkaw mi sha tsun dat rit, shaloi nye ma mai na ra ai. ⁹ Kaning rai nme law, ngai mung du lawu na masha rai nga nngai, nye a lawu de mung hpyen masha nga ma ai rai nna, marai mi hpe, Sa u, ngu yang, shi sa wa ai; kaga wa hpe,wa rit ngu yang, shi wa ai; nye a mayam wa hpe mung, Ndai galaw u, ngu yang, shi galaw nga ai, ngu nna htan wu ai. ¹⁰ Dai ga Yesu na yang shi mau nna shi kaw hkan nang ai ni hpe tsun mu ai gaw, Nanhte hpe ngai teng teng tsun ma de ga,Israela amyu hta pyi, dai hte wa kam sham ai gaw ngai n mu hkrup nngai; ¹¹ Bai ngai nanhte hpe tsun ma de ai gaw, sinpraw sinna maga de na, masha law law wa du wa na ma ai rai nna, sumsing lamu a mungdan hta e, Abraham, Isak,Yaku hte hte rau jawm dung lu na ma ra ai. ¹² Dai mungdan a kashu kasha ni chyawm gaw, shinggan de na nsin hta shaden bang kau ai hkrum na ma ra ai: dai yang e, hkrap ngu hkrap ngoi ai hte wa urin udik rai nga na ma ra ai, ngu mu ai. ¹³ Yesu gaw, dai hpyen bu hpe mung, Nang wa nit: Nang kam sham ai hte maren nang hta byin u ga, ngu dat wu ai. Dai ahkying hta nan,dai ma gaw mai mat lu ai. ¹⁴ Bai, Yesu gaw Petru a nta hta shang yang, shi a kani hkali bu taw nga ai hpe mu hkrup wu ai. ¹⁵ Shi a lata hpe ahtawk ya wu yang, dai hkali kawp mat nna, shi rawt nhtawm, shi hpe galaw daw wu ai. ¹⁶ Ya, shana de du yang, shanhte gaw nat kap ai masha law law hpe shi hpangde woi sa wa mu ai rai nna, ga hte sha dai nat ni hpe shi shaden kau mu ai; machyi makaw hkrum ai ni nlang hte hpe mung,shamai ya mu ai. ¹⁷ Dai gaw, Shi hkum nan, anhte a ana ahkya hpe la kau ya nna, anhte a nji nmu hte hpe gun la kau nu ai, nga nna, myihtoi Esaia tsun ai ga dik wa u ga, rai nga ai. ¹⁸ Ya, Yesu gaw shi hpe shinggrup nga ai masha wunawng wuwa hpe mu mu yang,nawng wora hkran de rap sa wa na shi hkang da nga ai. ¹⁹ Shaloi laika ka ai sara langai mi sa du nna, Sara e, nang sa ai shara shagu de,ngai nang kaw hkan nang na nngai,ngu wu ai. ²⁰ Yesu gaw, Chyahkyawn ni nhkun lu ma ai,ntsa malen pyen ai u ni mung u yup lu ma ai; dai Masha Kasha chyawm gaw baw tawn na shara pyi n lu nga ai, shi hpe ngu wu ai, ²¹ Sape ni hta na langai mi mung, Madu e, nye wa hpe wa makoi na ahkang shawng jaw e, ngu nna shi hpe tsun wu ai. ²² Yesu gaw,Ngai kaw hkan nang rit; masha chyasi ni gaw, tinang a chyasi ni hpe makoi mu ga, ngu wu ai. ²³ Li de shang wa ngut jang shi a sape ni shi kaw hkan nang ma ai. ²⁴ Shaloi,yu mu,dai nawng e laru kaba ru wa nna,hka leng ni dai li hpe kaup wa mu ai; shi chyawm gaw yup pyaw nga ai. ²⁵ Dai rai nna shi hpe sa jasu let shanhte gaw, Madu e,hkye la mi, anhte htum mat wa nga ga ai, ngu mu ai. ²⁶ Shi gaw,Ai n kam ai ni e, hpa rai hkrit nga myit ta? ngu nna shanhte hpe tsun mu ai.Shaloi shi rawt nna, nbung hte nawng hpe daru kau wu ai: shing rai nachying atsin sim rai nga ai. ²⁷ Masha ni chyawm gaw,mau mahka nga nna, Ndai wa gaw kaning re ai wa rai nga a ta? nbung hte nawng pyi, shi hpe madat mara nga ma hka? nga shajang ma ai. ²⁸ Ya,wora hkran Gadare ginwang hkan e sa du jang,lup wa e sa nga ai nat kap ai masha lahkawng, shi hpe sa tau ma ai: shan gaw nachying n hkru la nga ma ai majaw,dai lam hta e kadai mung n lai hkawm lu ma ai. ²⁹ Shan gaw, Karai Kasang a Kasha e, an nang hte hpa seng nga ga ta? aten garai n du yang,an hpe zingri na nang sa du rin ni? ngu nna jahtau mu ai. ³⁰ Ya shanhte hte tsawmra mi tsan kaw e,wa wunawng kaba kanaw sha nga ma ai. ³¹ Dai rai nna, nat ni shi hpe hpyi nem nna,Nang anhte hpe hkyawt kau mi yang gaw, dai wa wunawng hta anhte hpe shang lu shangun mi,ngu mu ai. ³² Shi gaw, Sa wa mu, shanhte hpe ngu mu ai. Pru mat wa ma yang,shanhte dai wa ni hta shang wa ma ai rai nna, dai wa wunawng nlang hte n-gam mahka kaw nna nawng de rut gat bang wa ai hte, hka hta e marit si mat ma ai. ³³ Wa rem ai ni chyawm gaw hprawng wa ma ai hte,dai mare de shang nna,byin mabyin hte hte,nat kap ai yan a lam hpe tsun dan mu ai. ³⁴ Dai majaw, mare ting Yesu hpe tau la na pru sa wa ma ai rai nna, shi hte hkrum jang,shanhte a ginwang na pru mat wa u ga, shi hpe hpyi mu ai. 

 

Mahte 9

¹ Bai li de shi shang nna, rap wa ai hte tinang a mare de du wa ai. ² Shaloi,Yu mu,panep hta taw nga ai katsing si ai masha langai mi hpe,shanhte shi hpang de hpai sa mu ai.Yasu gaw shanhte a kam sham ai myit mu jang,Sha e,ngwi pyaw nga n ga; na a yubak dat kau ya sa de ai, ngu nna katsing si ai wa hpe tsun wu ai. ³ Dai rai nna laika ka ai sara ni nkau mi, Ndai wa shatan nhkan ga ga nga ai,nga nna tinang a kraw kata e tsun ma ai. ⁴ Yesu gaw shanhte a myit mang ai hpe chye ya jang,Nanhte a kraw hta e,hpa majaw n kaja ai myit nga myit ta? ⁵ Na a yubak dat kau ya sa de ai; shing n rai, Rawt hkawm wa u, ning ngu tsun ai ga yan hta,gara mahtang grau tsun loi a ta? ⁶ Rai ti mung,dai Masha Kasha gaw ga ntsa e,yubak dat kau ya ai ahkang aya lu ai gaw,nanhte chye myit ga,-shaloi dai katsing si ai wa hpe, Rawt u,na a hpun panep hpai la nna, na a nta de wa u,ngu wu ai. ⁷ Shaloi shi rawt nna shi a nta de wa mat ai. ⁸ Dai hpe mu ai shawa masha ni, hkrit kamyin nga ma ai rai nna, shinggyim masha ni hpe ning re ai ahkang jaw ai Karai Kasang hpe sharawng awng nga ma ai. ⁹ Yesu gaw dai shara kaw na sat sa wa yang,kang hta ai sum e dung nga ai Mahte ngu ai wa hpe shi mu hkrup nna,Ngai kaw hkan nang rit,shi hpe ngu wu ai:shaloi shi rawt nna shi kaw hkan nang nga ai. ¹⁰ Dai hpang dai wa a nta e dung nga a yang,yu mu,kang hta ai ni hte yubak kap ai masha law law wa,Yesu hte shi a sape ni hte rau sa dung nga ma ai. ¹¹ Hparishe ni dai mu ma yang shanhte gaw,Kang hta ai ni hte yubak kap ai ni hte rau,hpa rai nanhte a sara gaw shat pawng sha a ta? nga nna shi a sape ni hpe san mu ai. ¹² Shi gaw dai na jang,N-gun ja ai ni tsi sara n ra ma ai; machyi ai ni sha ra ma ai. ¹³ Dai rai nna,Hkungga jaw ai lam n rai, matsan dum ai lam she ngai tsaw nga nngai,nga ai ga hpe chye lu mu ga,sa sharin la mu: Kaning rai nme law, ding hpring ai ni hpe shaga na n rai, yubak kap ai ni hpe shaga na she ngai sa du nngai, ngu mu ai. ¹⁴ Shaloi Yawhan a sape ni shi kaw sa du nna,Anhte hte Hparishe ni lusha bai gam gam rai ga ai mi,na a sape ni hpa majaw lusha n gam nga ma hka? ngu mu ai. ¹⁵ Yesu gaw,La nnan wa gaw,hkungran ai gawk hte seng ai ma ni hte rau naw nga yang,shanhte yawn hkyen hkrum na ma hka? Rai ti mung? la nnan wa hpe shanhte kaw na jahka mat wa na nhtoi du na ra ai; dai shaloi shanhte lusha gam na ma ra ai. ¹⁶ Palawng nsa hpe garai n htun ai sumpan achyen hte kadai mung n kapa ga ai; shing di yang,dai achyen gaw palawng dingsa hpe gang nna,de a je ai hku gaw grau kaba wa ai. ¹⁷ Tsabyi nnan hpe mung shanhpyi ndum nsa hta, kadai mung n bang da ga ai: shing di yang, ndum ni kapaw wa ai hte tsabyi yun mat nna,ndum ni hten mat ma ai: tsabyi nnan hpe ndum nnan hta bang da ma ai rai nna, dai lahkawng yan a kaja nga ai. ¹⁸ Ndai ga shanhte hpe naw tsun nga yang,yu mu,agyi langai mi shi kaw sa dunna, shi hpe naw ku let,Nye a shayi sha nsa hkyet wa sai rai tim, nang sa nna shintsa e lata mara ya yang gaw, shi hkrung wa na ra ai, ngu wu ai. ¹⁹ Shaloi Yesu rawt nna, shi a sape ni hte rau dai wa kaw hkan nang ma ai. ²⁰ Shaloi,yu mu, shi lahkawng ning sai htaw machyi ai numsha langai mi shi hpang de sit sa wa nna, shi a palawng a banbyau ahtawk wu ai; ²¹ kaning rai nme law, Shi a palawng hpe sha ngai ahtawk lu yang gaw, ngai mai wa lu na ring ngai,myit nna shi a kraw e nga ai. ²² Yesu mahtang kayin nna shi hpe mu wu yang, Shayi sha e,ngwi pyaw n ga; na a kam sham ai gaw nang hpe shamai ya nit dai,ngu wu ai. Dai ahkying kaw nna,dai numsha mai mat nga ai. ²³ Ya,Yesu gaw dai agyi a nta de sa du nna, sumpyi dum ai ni hte sharung shayawt nga ai wunawng hpe mu mu yang, ²⁴ Yen dat mi, dai nunsha ma gaw si nga ai n rai,yup pyaw nga ai, ngu wu ai.Shanhte mahtang shi hpe asawng asang di kau mu ai. ²⁵ Dai hpawng nga ai ni hpe shapraw kau ai hpang,shi shang nna,ma a lata hpe jum wu ai; shaloi dai numsha ma rawt wa ai. ²⁶ Dai rai nna,shi a kajai gumhkawng ai ga dai mung ting hta pri rai wa ai. ²⁷ Yesu gaw dai shara kaw nna sat sa wa yang,myi kyaw ai masha lahkawng shi kaw hkan nang let,Dawi a kasha e,an hpe matsan dum la mi, nga nna jahtau ma ai. ²⁸ Dai nta de shang yang,dai myi kyaw ai yan shi kaw sa du nna,Yesu gaw, Ndai ngai galaw lu nngai hpe,nan kam nga myit ni? ngu nna shan hpe san mu ai. Shan mahtang, Rai sa, Madu e, ngu mu ai. ²⁹ Dai rai nna shan a myi hpe shi ahtawk nna,Nan kam sham nga ai hte maren,byin wa ma lit ga, ngu mu ai. ³⁰ Shaloi shan a myi hpaw wa ma lu ai.Yesu chyawm gaw,Kadai mung,ndai hpe n chye lu mu ga, sadi nga mu,ngu nna shan hpe aja awa ginhtim da mu ai. ³¹ Rai ti mung, shan gaw pru wa nna,shi a kajai gara ai lam hpe dai mung ting hta e shabrawng dat mu ai. ³² Dai yan pru mat wa jang,yu mu,n chye shaga ai nat kap ai masha hpe shi kaw woi shashawn mu ai. ³³ Dai nat hpe shaden kau ai hpang, n chye shaga ai wa gaw shaga lu ai. Dai rai nna, shawa masha ni a mau nga nna,Israela amyu hta ndai zawn re ai,galoi mung n mu yu ga ai,nga ma ai. ³⁴ Hparishe ni mahtang gaw, Nat ni a agyi hte sha,shi nat ni hpe shaden kau lu nu ai,nga ma ai. ³⁵ Dai hpang Yesu gaw,mare kahtawng shagu hkan e kawan hkawm nna,shahte a tara jawng ni hta e sharin shaga ya ai hte sumsing lamu mungdan a kabu gara shi ga hpe hkaw dan let,ana ahkya amyu myu hte,machyi makaw amyu myu hpe shamai shatsai ya mu ai. ³⁶ Dai shawa hpawng ni hpe mu jang,shi shanhte hpe matsan dum da mu ai:kaning rai nme law,shanhte gaw,sagu rem ai wa n nga ai majaw,ru tsang hkrum ai hte bra mat wa ai sagu hte bung nga ma ai. ³⁷ Dai rai nna, shi a sape ni hpe shi tsun mu ai gaw,Nmut shang shara law law nga ai,amu galaw na ni mahtang n law ma ai: ³⁸ dai majaw,dai mam Madu gaw shi a nmut hta amu galaw na masha shang shangun dat ya mu ga,hpyi nga mu,ngu wu ai. 

 

Mahte 10

¹ Shaloi shi a sape shi lahkawng hte hpe shi shaga la nna, n seng ai ji nat ni hpe shaden kau lu mu ga hte, ana ahkya amyu myu,machyi makaw amyu myu hpe shamai shatsai lu na ahkang,shanhte hpe jaw mu ai. ² Ya dai kasa shi lahkawng a amying,ndai rai nga ma lu ai: shawng na wa Petru ngu ai Simun hte shi a kanau Andre; Zebedi a kasha Yaku hte shi a kanau Yawhan; ³ Hpilip hte Barhtolume; Htawma hte kang hta ai wa Mahte; Alhpe a kasha Yaku hte Htade; ⁴ Kanan masha Simun hte shi hpe ap kau ai Yuda Iskarut hte rai ma ai. ⁵ Dai shi lahkawng hte hpe Yesu shangun dat nna,shanhte hpe tsun mu ai gaw,Tara maigan ni a lam hta e hkum sa myit; Samari masha ni a mare hta e mung hkum shang myit: ⁶ Israela amyu hta na dam mat wa ai sagu ni kaw she shawng sa wa mu. ⁷ Pru hkawm wa yang,Sumsing lamu na mungdan gaw ni wa magang ra ai,ngu nna hkaw tsun dan mu. ⁸ Machyi makaw hkrum ai ni hpe shamai ya mu; si mat ai ni hpe sharawt dat mu; manggang kap ai ni hpe jaseng ya mu, nat ni hpe shaden kau mu; jahpu n ya ai sha nanhte lu la mu ai rai nna, jahpu n hpyi ai she jaw ya mu. ⁹ Nanhte a shingkyit hta e, aja, gumhpraw, singsen, hkum gun da mu; ¹⁰ hkrun lam na matu mung htingpa hte palawng, lahkawng, kyepdin hte dawhkrawng, hkun gun myit: kaningrai nme law, amu galaw ai wa gaw shi a shahpa lu la ging nga ai. ¹¹ Gara mare,gara kahtawng hta e rai ti mung,nanhte shang myit yang, dai yang na ging dan nga ai wa hpe tam la mu: nanhte pru wa ai du hkra,dai shara hta e a nga nga mu. ¹² Nta hta shang myit yang gaw,dai ni hpe shachyen ya mu: ¹³ dai nta hta ging dan nga a yang gaw, nanhte a shaman ai ga shi ntsa e du u ga; ging dan ai wa n rai yang gaw,nanhte a shaman ai ga nanhte hpang de bai nhtang wa u ga. ¹⁴ Nanhte hpe n hkap hkalum la nna,nanhte a ga hpe n madat ya yang gaw,dai nta kaw na,shing n rai,dai mare kaw na pru wa nhtawm,nanhte a lagaw hta a kap ai nhpu hpe ahpu kau mu. ¹⁵ Nanhte hpe ngai teng teng tsun ma de ai gaw,tara dara ai nhtoi hta e, Sodom hte Gomora mung gaw,dai mare hta yubak nhkyi na ra ai. ¹⁶ Yu mu,chyahkyawn ni a kaang de sagu hpe zawn, ngai nanhte hpe shangun dat ma de ai: dai rai nna nanhte gaw; lapu zawn hpaji rawng nna, hkrudu zawn myit shingdi nga mu. ¹⁷ Rai ti mung, masha ni hpe sadi nga mu: kaning rai nme law, shanhte gaw salang hpawng ni a lata hta nanhte hpe ap kau na ma ra ai rai nna, shanhte a tara jawng ni hta e nanhte hpe anu kayat na ma rin dai. ¹⁸ Shanhte a man e mung,tara maigan amyu ni a man e mung, sakse tai na matu nanhte gaw nye a majaw,du ni hte hkawhkam ni a man de,dun bang ai, hkrum na ma rin dai. ¹⁹ Nanhte hpe ap kau myit dai shaloi,kaning ngu nna,hpa hku tsun lu na hpe,myit hkum tsang myit: dai ahkying hta,hpa tsun mai na gaw,nanhte hpe shadum na ma rin dai: ²⁰ kaning rai nme law,ga tsun nga ai ni nanhte n rai, nanhte a Kawa a Wenyi gaw nanhte hta ga tsun nga ai. ²¹ Kahpu gaw kanau wa hpe, kawa gaw kasha hpe nsa dan hkra ap kau na ra ai; kasha ni mung gumlau maga de rawt nna, kanu yan kawa hpe sat shangun na ma ru ai. ²² Nye a amying majaw masha nlang hte gaw nanhte hpe n dawng n wawm na myit dai: rai timung,htum hkra shakut sharang ai wa gaw,hkye hkrang la ai hkrum na ra ai. ²³ Mare langai mi hta nanhte hpe zingri zingrat myit yang gaw,kaga de hprawng sa mu: nanhte hpe ngai teng teng tsun ma de ai gaw,Israela a mare ni hpe garai n htum lu yang,dai Masha Kasha gaw du na ra ai. ²⁴ Sape gaw sara hta,grau ai n rai; mayam mung shi a madu hta grau ai n rai. ²⁵ Sape gaw shi a sara zawn,mayam gaw shi a madu zawn rai nga yang gaw,ram nga ai: shanhte gaw nta madu wa hpe Bezebula ngu mu yang gaw, shi a nta na ni hpe,shing grau ngu na mu ai,n rai hka! ²⁶ Dai re ai majaw shanhte hpe hkum hkrit mu: kaning rai nme law,magap da nna, n pru n dan lu na arai gaw n nga ai; makoi da nna n chye na lu na arai mung n nga ai. ²⁷ Ngai nanhte hpe nsin kata e tsun dan ai lam hpe,nhtoi hta e tsun dan mu: nanhte na hta e na la ai lam hpe,nta ntsa nna hkaw dan mu. ²⁸ Hkum tsawp hpe sha sat kau nna,myit masin hpe n sat kau lu ai ni hpe hkum hkrit mu:myit masin hte hpawn hkum tsawp hpe ngarai mung hta e jahten kau lu ai wa hpe grau nna hkrit nga mu. ²⁹ U tsa lahkawng hpe peksan langai mi hte dut kau lu ai, n rai ni? nanhte a Kawa a myit hte n rai yang gaw,dai ni hta na langai mi pyi ga de n hkrat ma ai. ³⁰ Nanhte a baw na kara singgawng mahkra hpe mung, hti da nu ai. ³¹ Dai re ai majaw,hkum hkrit myit: u tsa law law hta nanhte grau nna hpu nga myit dai. ³² Kadai rai ti mung,masha ni a man e ngai hpe yin la ai wa hpe,Sumsing lamu e nga ai,nye Wa a man e dai wa hpe ngai yin la na we ai. ³³ masha ni a man e ngai hpe nyet kau ai wa hpe chyawm gaw,sumsing lamu e nga ai, nye Wa a man e, dai wa hpe ngai nyet kau na we ai. ³⁴ Ga ntsa de ngwi pyaw na lam shangun dat na ngai sa ring ngai,hkum myit nga myit: ngwi pyaw na lam shangun dat na ngai sa nngai n rai,nhtu hpe shangun dat na she ngai sa ring ngai. ³⁵ Kaning rai nme law, masha langai ngai gaw shi a kawa hte, shayi sha gaw shi a kanu hte,kanam gaw shi a kamoi hte bra mat shangun na, ngai sa ring ngai rai nna, ³⁶ tinang hpe n dawng n yawt na ni gaw, tinang a nta na ni tai wa na ma ra ai. ³⁷ Kadai mung,ngai hpe tsaw ra ai hta, kanu kawa hpe grau nna tsaw ra ai wa gaw, ngai hte n ging n dan nga ai: ngai hpe tsaw ra ai hta,shayi shadang sha hpe grau nna tsaw ra ai wa mung,ngai hte n ging n dan nga ai. ³⁸ Tinang a wudang hpai let,nye a hpang e n hkan ai wa gaw,ngai hte n ging n dan nga ai. ³⁹ Tinang a asak hpe lahpawt ai wa gaw,asak sum na ra ai: nye a jaw e,tinang asak jasum ai wa chyawm gaw,asak mu la na ru ai. ⁴⁰ Nanhte hpe hkap hkalum la ai wa gaw,ngai hpe mung hkap hkalum la ai; ngai hpe hkap hkalum la ai wa mung,ngai hpe shangun dat ai wa hpe hkap hkalum la ai rai nga ai. ⁴¹ myihtoi a myi man hpe tau nna myihtoi hpe hkap hkalum la ai wa gaw,myihtoi a shabrai lu la na ru ai; ding hpring ai wa a myi man hpe tau nna,ding hpring ai wa hpe hkap hkalum la ai wa gaw,ding hpring ai wa a shabrai lu la na ru ai. ⁴² Masha langai ngai gaw,sape a myi man hpe tau nna, ndai ma kaji langai ngai hpe,ntsin katsi htinggap mi sha jaw wu yang,dai wa gaw shi a shabrai n lu la na nu ai n rai,nga nna ngai nanhte hpe teng teng tsun nngai,ngu mu ai. 

 

Mahte 11

¹Ya, Yesu gaw shi a sape shi lahkawng hte hpe hkang da ngut yang,shanhte a mare ni hta sharin shaga nna,tara hkaw hkawm wa na matu,shi dai shara kaw na pru sa wa ai. ² Hkristu e galaw dat ai amu bungli a lam Yawhan gaw htawng hta e na wu yang shi a sape hta na shi shangun dat nna, ³ Nang gaw dai du sa na ra ai wa rai nga n ni? shing n rai, kaga hpe anhte naw myit mada lu na rai nga a ni? ngu nna shi hpe san dat wu ai. ⁴ Yesu htan let shanhte hpe tsun mu ai gaw,Na mana mu mamu hte maren,Yawhan hpe wa tsun dan mu: ⁵ myi kyaw ai ni myi mu lu ma ai, lagaw hten ai ni hkawm sa lu ma ai,manggang kap ai ni san pra wa lu ma ai,na lahpang ai ni na lu ma ai,si mat ai ni sharawt la ai hkrum ma ai hte,matsan mayan ni a matu kabu gara shi ga hkaw dan nga ai: ⁶ ngai hta myit kataw ai lam n mu ai wa kadai mung,a lu nga ai,ngu mu ai. ⁷ Ya shanhte wa mat ai hpang,Yesu gaw Yawhan a lam hpe lakap nna shawa masha ni hpe tsun hpang mu ai gaw,Dai nam de,hpa hpe hpu yu na,nanhte sa myit ta? nbung e kanga ai maiaw hpe rai ni? ⁸ shing n rai,hpa yu na sa myit ta? mani ai hpun palawng bu hpun ai wa hpe,rai ni? Yu mu,mani ai hpun palawng bu hpun ai ni gaw,hkawhkam a htingnu ni hta nga ma ai. ⁹ Dai hpe n rai taw,hpa majaw sa pru myit ta? myihtoi hpe sa yu na rai ni? Rai nga ai; nanhte hpe ngai tsun ma de ai gaw, myihtoi hta grau kaba ai wa mung rai nga ai. ¹⁰ Yu u,na n man e,na a lam lajang magang na, Nye a kasa hpe na a shawng de ngai shangun dat we ai, nga nna ka da ai ga gaw shi a lam rai nga lu ai. ¹¹ Nanhte hpe ngai teng teng tsun ma de ai gaw,Numsha kaw shangai ai ni hta,Baptisma Sara Yawhan hta grau kaba ai marai langai mi muk n paw pru ai: rai ti mung,sumsing lamu a mungdan hta kaji ai wa gaw,shi hta grau kaba nga ai. ¹² Baptisma Sara Yawhan a ladaw langa kaw nna ya du hkra,sumsing lamu a mungdan gaw anin katut hkrum nga ai rai nna,share lu ai ni mahtang,dai hpe shanyen la lu ma ai. ¹³ Kaning rai nme law,myihtoi ni nlang hte hte dai jep ai tara gaw,Yawhan a aprat du hkra sharin shaga nga ai: ¹⁴ nanhte madat la mayu myit yang gaw,ndai wa gaw, du magang ra ai Elia rai nga ai. ¹⁵ Na tu ai wa gaw,na la u ga. ¹⁶ Dai majaw,ndai amyu hpe,ngai hpa hte shadawn dan na ma we ta? Shanhte gaw, ¹⁷ Nanhte a matu anhte sumpyi dum ga ti mung,nanhte n ka myit dai: Anhte sharung shayawt ti mung,nanhte n yawn myit dai, nga nna,gat hkan e dung let,shada da gintan hkat ai ma ni hte bung nga ma ai. ¹⁸ Kaning rai nme law,Yawhan sa du nna n lu n sha ai sha nga yang,shanhte gaw, Shi nat kap ai wa rai nga ai,nga ma ai: ¹⁹ Dai Masha Kasha du sa nna,lu nga sha nga ai rai ti mung,Ndai sha marim ai wa,tsabyi lu shalai ai hte,kang hta ai ni,yubak kap ai ni a jinghku hpe yu mu,nga nna bai tsun ma ai.Hpaji byeng ya chyawm gaw,shi a amu bungli hta awlaw ai hkrum nga ai,ngu mu ai. ²⁰ Dai shaloi e Yesu gaw ga sharawt nna,shi a magam bungli malaw maga dan sai mare ni hpe,myit malai n lu ma ai majaw,ning ngu daru kau mu ai: ²¹ O,Kurazin e,nang dingnye lu ndai! O,Betsaida e,nang dingnye lu ndai! Kaning rai nme law,nan hta dan ai magam bungli ni hpe,Turu hte Sidun mare yan hta dan yu taw gaw, dai yan gaw moi moi e nan lachyit nba hte dap hta e,myit malai lu boi na ma sai. ²² Dai majaw,nan hpe ngai tsun nngai gaw,dai tara dara ai nhtoi hta e, Turu hte Sidun mare yan gaw,nan hta naw chyamai na ma ra ai. ²³ Nang mung, Kaperna-um e,lamu du hkra sharawt ai,nang hkrum na n ni? katsan ga du hkra jahkrat kau ai nang hkrum na rin dai.Kaning rai nme law,nang hta dan ai magam bungli ni hpe,Sodom hta e shabyin taw gaw,dai mare gaw dai ni du hkra a grin nga na re ai. ²⁴ Dai majaw nanhte hpe ngai tsun ma de ai gaw,tara dara ai nhtoi hta e,Sodom mung gaw,nang hta naw chyamai na ra ai,nga ai. ²⁵ Dai aten hte hta Yesu gaw ga hpaw nna,Sumsing lamu hte ginding aga a Madu,Wa e; hpaji byeng-ya rawng ai ni hte myit kung hpan ai ni kaw na ndai lam nang makoi magap da nhtawm,ma kaji ni hpe madun dan ndai majaw,ngai nang hpe shakawn kungdawn nngai: ²⁶ rai sa,Wa e,nang tsaw ai hku,ndai rai nga lit dai. ²⁷ Nye Wa gaw arai yawng mayawng ngai hpe ap ya ni ai;Wa hta kaga,dai kasha hpe kadai mung nchye lu ai: dai Kasha hte,dai Kasha jahtoi ya mayu ai masha hta kaga,Wa hpe mung,kadai n chye lu ai. ²⁸ Hki ba la nna lit li gun ai ni yawng hte e,ngai kaw wa ma rit; ngai nanhte hpe ban sa shangun na ma de ai. ²⁹ Ngai gaw myit sumnung ai hte myit gyip nga nngai rai nna nye a kandang hpe hpai mu,nye a lam sharin la mu: dai rai yang nanhte a myit masin ban sa ai hkrum na ma lit dai: ³⁰ kaning rai nme law,nye a kandang hpai loi ai hte,nye a lit mung tsang nga li ai,ngu mu ai. 

 

Mahte 12

¹ Dai aten hte hta Yesu gaw laban nhtoi e,hkaibang yi hku ga hkawm wa ai,shi a sape ni mahtang kawsi hkrum ma ai rai nna,mam nsi di la nhtawm,sha ma ai. ² Hparishe ni dai mu jang, shanhte gaw,Yu u,laban nhtoi e n mai galaw ai amu,na a sape ni galaw ma ai,ngu nna shi hpe tsun mu ai. ³ Shi shanhte hpe,Dawi hte shi kaw hkan nang ai ni hte rau kawsi hkrum ma yang,shi gaw Karai Kasang a nta de shang nna, ⁴ shi mung,shi hte rau nga ai ni mung,n mai sha ai,hkinjawng ni chyu sha mai sha ai madun da ai muk ni hpe la sha nu ai lam hpe pyi,nanhte n hti yu myit ni? ⁵ Bai,laban nhtoi e dai Htingnu hta nga ai hkinjawng ni,laban nhtoi hpe wu kau mu ti mung,mara n nga ai gaw,dai tara laika hta nanhte n hti yu myit ni? ⁶ Nanhte hpe ngai tsun ma de ai gaw,Dai Htingnu hta grau kaba ai mahtang gaw,nang e rai nga ai. ⁷ Hkungga jaw ai lam n rai,matsan dum ai lam hpe sha ngai tsaw nngai,nga ai ga hpe nanhte chye mu taw gaw,mara n kap ai ni hpe,nanhte mara shagun na myit dai n rai: ⁸ kaning rai nme law,dai Masha Kasha gaw,laban nhtoi a Madu rai nga ai,ngu mu ai. ⁹ Bai,dai shara kaw nna shi sat sa wa nhtawm,shanhte a tara jawng hta shang ai: ¹⁰ ya yu mu,lata katsing si ai masha langai mi nga ai rai nna,shanhte gaw shi hpe,mara shagun lu u ga, Laban nhtoi hta e mai shamai ya a ni? ngu nna,shi hpesan mu ai. ¹¹ Dai majaw shi shanhte hpe,Nanhte hta sagu langai mi lu ai masha lawm nna,dai gaw laban nhtoi e nhkun hta hkrat yang,dai hpe n dun shaw la ai wa langai ngai nga na myit ni? ¹² Masha gaw sagu hta gade grau hpu a hka! Dai rai nna,laban nhtoi hta amu kaja galaw na sut nga ai,ngu mu ai. ¹³ Shaloi shi gaw dai wa hpe,Na a lata ladawn u,ngu wu ai.Dai majaw shi ladawn nna,dai gaw maga mi na zawn majing rai mat lu ai. ¹⁴ Hparishe ni chyawm gaw pru wa nna,shi hpe kaning di jahten kau lu na lam bawng nga ma ai. ¹⁵ Yesu dai hpe chye jang, kaga de htawt mat wa ai.Masha law law mung,shi kaw hkan nang ma ai rai nna, shanhte nlang hte hpe shamai shatsai di nhtawm, ¹⁶ shi a lam n shabrawng dat mu ga,shanhte hpe ginhtim dat mu ai. ¹⁷ Dai byin wa ai lam gaw, Ngai lata la ai,nye a shangun ma hpe, Ngai myit sharawng awng ai nja nhpra wa hpe,yu mu. ¹⁸ Nye Wenyi shi a ntsa e ngai bang da ya nna, Shi masha amyu ni hpe daw dan ai lam tsun dan na mu ai. ¹⁹ Shi gaw n gasat,n jahtau na rai nna, Shi a nsen hpe lam hkan e n na lu na mu ai. ²⁰ Tara dara ai lam nlaw wa ai du hkra, Bye dip kau ai maiaw hpe shi n shadaw na hte Nhkut hku ai wan shat hpe,n sat kau na wu ai. ²¹ Shi a amying hta masha amyu ni myit mada na ma ra ai, nga nna,myihtoi Esaia tsun ai ga dik wa na matu byin wa sai. ²² Dai shaloi jang,myi kyaw ai hte n chye shaga ai nat kap ai wa langai mi hpe, shi kaw woi bang mu ai: shi gaw dai wa hpe shamai ya nu ai rai nna,n chye shaga ai wa gaw shaga lu ai hte myi mu lu nu ai. ²³ Dai majaw shawa masha ni mau mahka nna,Ndai wa gaw Dawi a kasha rai nga a hka? nga nna tsun shajang ma ai. ²⁴ Hparishe ni mahtang dai hpe na jang,Nat ni a du Bezebula hte n rai yang gaw,ndai wa nat ni hpe shaden kau lu na n rai,nga ma ai. ²⁵ Shanhte a myit mang ai hku chye ya mu ai majaw,shi shanhte hpe tsun mu ai gaw,Dinghku brun ai mungdan shagu gaw hten bya mat na ra ai: gara mare,gara nta rai ti mung,dinghku bra mat wa yang,hking nga lu na n rai. ²⁶ Satan gaw Satan hpe shaden kau ai rai yang gaw,shi gaw tinang hte hka bra wa nga ai: dai rai taw gaw,shi a mungdan kaning rai nme hking lu na lu ta? ²⁷ Ngai chyawm gaw Bezebula hte sha nat ni hpe shaden kau ma we ai rai yang gaw,nanhte a kasha ni kadai wa hte shaden kau nga ma ta? Dai majawshanhte gaw nanhte hpe tara dara ai agyi ni tai na ma ra ai. ²⁸ Karai Kasang a wenyi hte nat ni hpe ngai shaden kau ma we ai rai yang gaw,Karai Kasang a mungdan nanhte kaw du sai rai nga ai. ²⁹ N-gun ja ai wa hpe shawng n gyit kau yang gaw,shi a arai kashun la na,n-gun ja ai wa a nta nhku de kadai shang lu na rai ta? gyit da yang she shi a nta hpe hpya lu na rai nga ai. ³⁰ Ngai hpang maga de n nga ai wa gaw,nye a gumlau maga de rai nga ai: ngai hte kahkyin gumdin n re ai wa gaw,ayai aya rai nga ai. ³¹ Dai majaw ngai nanhte hpe tsun ma de ga,yubak hte shatan nhkan ga amyu myu hpe,masha kaw na raw dat kau lu na lam hku nga ai; rai ti mung,Wenyi hpe shatan nhkan ga,raw dat kau lu na lam n nga ai. ³² Dai Masha Kashahpe ga hte shut hpyit ai wa kadai hpe mung, mara raw dat kau ya na lam hku nga ai; chyoi pra ai Wenyi hpe ga hte shut hpyit ai wa chyawm gaw, ndai aprat hta rai ti mung,hpang na aprat hta rai ti mung, raw dat kau ya ai hkrum lu na n rai. ³³ Dai hpun kaja nga ai hte,de a asi mung kaja nga ai,ngu mu: shing n rai,dai hpun n kaja nga ai hte,de a asi n kaja nga ai, ngu mu: kaning rai nme law, hpun hpe gaw tinang a asi hte chye ginhka lu ai. ³⁴ Pu htum amyu ni e,nanhte n hkru nga myit dai mi,kaja ai ga kaning rai tsun lu na myit ta? kaning rai nme law, kraw hta hpring chyat nga ai kaw na, n-gup de tsun nga ai. ³⁵ Kaja ai wa gaw tinang a kaja ai sut dek hta na kaja ai arai shapraw wu ai; n kaja ai wa mahtang gaw,n kaja ai sut dek hta na n kaja ai arai shapraw wu ai. ³⁶ Nanhte hpe ngai tsun ma de ga,masha ni tsun nga ai,tinang a kaman lila ga yawng hte a majaw,tara dara ai nhtoi hta e,jahpan dan na hkrum na ma ra ai. ³⁷ Kaning rai nme law,na a ga majaw nang awlaw ai hkrum na ndai: shing n rai,na a ga majaw,daw dan ai hkrum na rin dai,ngu mu ai. ³⁸ Dai shaloi laika ka ai sara ni hte Hparishe ni nkau mi shi hpe htan nna,Sara e,nang dan ai lamik kumla langai mi,anhte mu mayu ga ai,ngu mu ai. ³⁹ Shi htan let shanhte hpe tsun mu ai gaw,N hkru ai hte shut hpyit ai amyu gaw,lamik kumla tam ma ai; myihtoi Yona a lamik kumla hta kaga,hpa lamik kumla mung,shanhtehpe n dan na nme ai. ⁴⁰ Yona gaw shani masum ya hte shana masum na du hkra,dai nga kaba a kan kata e rawng nga ai hte maren, dai Masha Kasha mung,shani masum ya hte shana masum na du hkra,ga sung ai kata e rawng nga na ra ai. ⁴¹ Tara dara ai nhtoi hta,Ninewe masha ni gaw, ndai prat na amyu hte rau rawt wa nna, shanhte hpe daw dan na ma ru ai: kaning rai nme law, Yona hkaw tsun ai ga a majaw shanhte myit malai lu ma ai: yu mu,ndai yang e, Yona hta grau kaba ai wa nga nga ai. ⁴² Tara dara ai nhtoi hta,dingda mung na hkawhkam jan gaw,ndai prat na amyu hte rau rawt wa nna,shanhte hpe daw dan na ra ai: kaning rai nme law,shi gaw Shawlumon a hpaji madat na,ga jahtum de na sa du ai: yu mu ndai yang e,Shawlumon hta grau kaba ai wa nga nga ai. ⁴³ Dai n seng ai nat chyawm gaw,masha hta na pru nhtawm, hkraw hkun ai shara hkan e hkawm sa wa nna,sim sa na shara tam wu ti mung, n mu nu ai. ⁴⁴ Shaloi shi gaw, Ngai pru kau da se ai nta de, ngai bai nhtang wa na nngai, nga ai: bai du wa yu yang, dai nta gaw asan awan di nna, ye kau ai hte shatsawm da ai hpe, mu nu ai. ⁴⁵ Shaloi shi nhtang sa nna, shi hta grau n hkru ai nat sanit hpe shaga wa nhtawm,shanhte shang nna dai yang e a rawng nga ma ai; dai rai nna, dai masha a hpang de na asam gaw, shawng de na hta, grau ru wa lu ai: dai hte maren ndai n hkru ai amyu hta byin wa na ra ai, ngu mu ai. ⁴⁶ Shawa masha ni hpe ga naw tsun nga yang, shi a kanu hte kanau ni gaw, shi hte ga tsun na nga nna shinggan e tsap nga ma ai. ⁴⁷ Dai rai nna marai langai mi gaw, Yu u, na nnu hte nnau ni, nang hte ga tsun na, shinggan e tsap nga ma ai, ngu wu ai. ⁴⁸ Htan let shi hte ga tsun ai wa hpe shi tsun wu ai gaw, Ngai nu hte ngai nau ni gaw, kadai ni rai nga ma ta? ngu wu ai. ⁴⁹ Bai, shi a sape ni hpang de shi a lata ladawn nna, ⁵⁰ Ngai nu hte ngai nau ni hpe yu mu: sumsing lamu hta nga ai nye Wa a myit hku hkan galaw ai ni kadai mung, ngai nau, ngai jan, ngai nu, rai nga ma ai, ngu nna tsun mu ai. 

 

Mahte 13

¹ Dai shani jang, Yesu gaw dai nta na pru nhtawm, nawng makau e sa dung nga ai. ² Masha wunawng wuwa shi hpang de zup hpawng sa wa ma ai majaw, li langai mi hta shi shang dung nga ai rai nna, shawa masha ni mahkra gaw hkingau hta e tsap nga ma ai. ³ Shaloi, lam law law wa ga shadawn hku hte shi shanhte hpe tsun mu ai gaw, Nli gat ai wa gaw nli gat na pru sa wa ai. ⁴ Gat dat wu yang nkau mi gaw lam makau e hkrat nna, u ni dai hpe sa hta sha kau mu ai. ⁵ Nkau mi gaw, ga n law ai lung rawk hta e hkrat wa nna, ga n htat ai majaw, ya jang tu pru ti mung, ⁶ jan pru katen jang krau mat wa ai rai nna, ru n jung lu ai majaw hkraw mat wa ai. ⁷ Nkau mi gaw ju hpun nhpang e hkrat nna, ju hpun ni tu kaba wa ai hte, dai hpe lim kau mu ai. ⁸ Nkau mi gaw ga kaja hta hkrat wa nna, asi si wa ai: nkau mi dang latsa, nkau mi kru shi, nkau mi sumshi si mayat wa ai: ⁹ na tu ai wa gaw na la u ga, ngu mu ai. ¹⁰ Shaloi shi a sape ni sit wa nna, Ndai ni hpe hpa rai ga shadawn hte tsundan mu ta? ngu nna shi hpe san mu ai. ¹¹ Shi htan nna, Sumsing lamu a mungdan a sung htum ai lam ni hpe chye na shara, nanhte a matu hku nga ma lit dai; wora ni a matu chye na shara n hku ma lu ai. ¹² Kaning rai nme law, lu ai wa kadai hpe mung naw jat jaw na rai nna, shi law wa na ra ai; n lu ai wa kaw na pyi shi lu ai hpe naw shaw la na ra ai. ¹³ Dai rai nna, shanhte mu lamu n mu ai hte, na lana n na la nna, n chye na ma ai majaw, ga shadawn hku ngai shanhte hpe tsun dan ma we ai. ¹⁴ Shing rai, Esaia tsun ai myihtoi ga gaw shanhte hta dik ang wa sai. Shi gaw, Nanhte na lana n chye na la na mu ai, Yu layu e n mu na mu ai, ¹⁵ Kaning rai nme law, ndai amyu gaw, Tinang myi hte n mu lu na hte Na hte n na lu nna, Myit hte n chye na lu mu ga she, Shanhte myit n kayin lu nna, Ngai shanhte hpe n shamai mai lu hkra Shanhte a myit mak nga nna, Shanhte a na lahpang nga ai hte, Shanhte a myi pat nga ma lu ai, nga ai. ¹⁶ Nanhte a myi mu lu ai hte, nanhte a na, na lu nga ma lit dai majaw, a nga myit dai. ¹⁷ Nanhte hpe ngai teng teng tsun ma de ga, nanhte mu lu ai arai ni hpe myihtoi hte ding hpring ai masha law law wa, mu mayu ti mung, n mu ma ai; nanhte na lu ai lam ni hpe mung, na mayu ti mung, n na lu ma ai. ¹⁸ Dai rai nna dai nli gat ai ga shadawn hpe madat la mu. ¹⁹ Kadai mung, dai mungdan lam hpe na ninglen n chye la yang gaw, dai n hkru ai wa sa du nna, shi a myit hta gat ai nli hpe shaw la kau wu ai: dai gaw lam makau e gat ai nli hpe rai nga ai. ²⁰ Lung rawk hta gat ai nli a lam gaw, dai ga hpe na nna, shaloi jang kabu gara ai myit hte hta la wu ti mung, ²¹ kraw hta e ru n jung ai majaw, ladaw mi sha nga nga nhtawm, dai mungga a majaw ru tsang ai hte zingri zingrat hkrum jang, shaloi e myit kataw re ai wa hpe rai nga ai. ²² Ju hpun hta gat ai nli a lam gaw, dai ga hpe na la ti mung, ndai prat na myit tsang ai hte hkalem kau ai sut gan gaw, dai mungga hpe lim kau nna, asi n si lu ai wa hpe rai nga ai. ²³ Ga kaja hta gat ai nli a lam chyawm gaw, dai ga hpe na la nna hta la nu ai hte, gaja wa teng teng asi si nna,nkau mi dang latsa, nkau mi kru shi, nkau mi sumshi jat wa ai wa hpe, rai nga ai, ngu wu ai. ²⁴ Ga shadawn kaga mung, shi shanhte hpe kahtap tsun mu ai gaw, Sumsing lamu a mungdan, hkauna hta nli kaja gat ai wa hte bung nga ai. ²⁵ Masha ni yup pyaw nga yang, gumlau ai wa gaw sa nna, dai mam hta e tsing tum gat bang, nhtawm pru mat wa ai. ²⁶ Ya dai mam maku tu wa nna asi si jang, tsing mung dan pru wa ai. ²⁷ Shaloi nta madu a mayam ni sa du nna, Madu e, na a hkauna hta e nli kaja ai nang gat nu ai n rai ni? rai taw gaw, hpa rai nme tsing tu a ta? ngu mu ai. ²⁸ Shi gaw, Gumlau wa dai hpe galaw nu ai, ngu nna shanhte hpe tsun mu ai. Dai rai nna shanhte gaw, Anhte dai hpe magang kau na, nang hkraw nga n ni? shi hpe ngu mu ai. ²⁹ Shi mahtang, N rai, nanhte tsing hpe baw kau yang gaw, mam hte nawng n baw lawm u ga, dai a nga nga u ga. ³⁰ Dai lahkawng yan nmut ta du hkra, rau tu kaba wa mu ga: nmut ta du jang, tsing hpe shawng dan mahkawng nna, nhtan nhtawm wan hta nat kau mu; dai mam hpe chyawm gaw, nye a dum hta e mahkawng da mu,ngu nna mam dan ai ni hpe ngai tsun na ma we ai, ngu mu ai. ³¹ Ga shadawn kaga mung, shi shanhte hpe kahtap tsun mu ai gaw, Sumsing lamu a mungdan gaw, masha la nna shi a yi hta hkai ai chyinghkrang tum hte bung nga ai. ³² Dai gaw tum abaw shagu hta kaji htum ai tum rai nga ti mung, kaba wa jang, shatmai lap ni hta grau kaba wa lu ai rai nna, hpun tai nga ai hte ntsa malen na u ni mung, de a lakung lakying ni hta sa dung nga ma ai, ngu mu ai. ³³ Ga shadawn kaga mung, shi shanhte hpe tsun mu ai gaw, Sumsing lamu a mungdan gaw, numsha e la nna, muk shadung dang masum hta bang dat wu yang, mahkra hte hpe shawawm dat lu ai matsi hte bung nga ai, ngu mu ai. ³⁴ Shing rai lam shagu Yesu gaw ga shadawn hku hte, shawa masha ni hpe tsun dan mu ai: kaning rai nme law, ³⁵ Nye a n-gup, ga shadawn hte ngai hpaw nna, Ginding aga nnan lat kaw nna,makoi da ai ga hpe ngai htai dan na nngai, nga nna myihtoi tsun ai ga dik wa u ga, ga shadawn hte n rai yang gaw, shi shanhte hpe hpa mung n tsun dan yu ai. ³⁶ Dai hpang shawa masha ni hte shi hka wa nna, dai nta hta e shang mat wa ai.Shaloi shi a sape ni shi kaw sit sa wa nna, Hkauna hta e tu ai tsing a ga shadawn lam, anhte hpe htai dan mi, ngu mu ai. ³⁷ Shi htan nna, Nli kaja gat ai wa gaw, dai Masha Kasha rai nga ai; hkauna gaw, mungkan ga, rai nga ai; ³⁸ Kaja ai nli gaw, dai mungdan a kashu kasha ni rai nga ma ai; tsing gaw, dai n hkru ai wa a kashu kasha ni rai nga ma ai; ³⁹ dai hpe gat ai gumlau wa gaw, Nat rai nga ai; nmut ta gaw, lamu ga htum na aten rai nga ai; mam dan ai ni gaw, lamu kasa ni rai nga ma ai. ⁴⁰ Dai tsing hpe gumdin la nna wan nat kau ai zawn, lamu ga htum na aten hta e mung, byin na ra ai. ⁴¹ Dai masha kasha gaw shi a lamu kasa ni hpe shangun dat na rai nna, shanhte gaw shi a mungdan hta na, myit kataw shangun ai baw hte tara hte n bung ai amu galaw ai ni nlang hte hpe, lata shaw la nhtawm, wan htung hta kabai bang da na ma ru ai: ⁴² dai yang e hkrap ngu hkrap ngoi ai hte wa udik ai gaw, rai nga ai. ⁴³ Dai shaloi e ding hpring ai ni gaw shanhte a Kawa a mungdan hta e, ajan zawn htoi kabrim na ma ra ai; na tu ai wa gaw na la u ga. ⁴⁴ Sumsing lamu a mungdan gaw, ga dachyawk hta e makoi da nna, masha mu hkrup lu ai hte, bai makoi da ai sut gan hte bung nga ai: kabu gara ai myit hte shi wa nhtawm e, shi lu malu hte hpe dut kau nna, ga dachyawk dai hpe mari la wu ai. ⁴⁵ Bai, sumsing lamu a mungdan gaw, kaja reng ai hkachyi hpe tam nga ai hpaga wa hte bung nga ai: ⁴⁶ manu kaba ai hkachyi langai mi hpe mu hkrup jang, shi nhtang wa nhtawm e, shi lu malu hte hpe dut kau nna, dai hpe mari la wu ai. ⁴⁷ Bai, Sumsing lamu a mungdan gaw, nawng hta e kabai bang nna, nga amyu myu hpe magawn la ai sumgawn hte bung nga ai. ⁴⁸ Dai hpring chyat nga yang, shanhte gaw hkarang de karawt la mu ai rai nna, dung nga let, kaja ai baw hpe mung hta e bang da nna, n kaja ai baw hpe, kabai kau mu ai: ⁴⁹ Dai hte maren lamu ga htum na aten hta e byin na ra ai: Lamu kasa ni pru sa nna, ding hpring ai ni a kata na, n hkru ai ni hpe lata karan da na mu ai rai nna, ⁵⁰ wan htung hta kabai bang kau na ma ru ai: dai yang e hkrap ngu hkrap ngoi ai hte wa udik ai gaw rai nga ai. ⁵¹ Ndai lam mahkra hte hpe, nanhte chye na da mu ni? ngu nna san mu yang, shanhte gaw,Chye na nga ga ai, ngu mu ai. ⁵² Bai shi gaw, Dai rai nna sumsing lamu mungdan a matu sape tai sai laika ka ai sara kadai mung, nta madu rai nga ai hte, tinang a sut dek hta na, nnan baw mung dingsa baw mung shapraw ai wa hte bung nga ai, ngu nna ⁵³ Ya, Yesu gaw dai ga shadawn ni hpe tsun ngut jang, dai shara kaw na shi pru mat wa ai. ⁵⁴ Shi a bu ga de sa du wa yang shanhte a tara jawng ni hta shanhte hpe sharin shaga ya nga ai; dai rai nna, shanhte gaw myit a mau nga ai hte, Ndai wa gaw, ning re ai hpaji byeng-ya hte daru magam atsam gaw, kanang na lu la wu hka? ⁵⁵ shi gaw lasama wa a kasha re ai, n rai ni? shi a kanu Mari mying ai hte, shi a kanau ni Yaku, Yosep, Simun hte Yuda rai nga ma ai, n rai ni? ⁵⁶ shi a kajan ni yawng mung, anhte hte rau nga nga ma ai, n rai ni? dai rai taw gaw, ndai wa gaw, ndai nlang hte kanang na lu la wu hka? nga nna shi a lam myit kataw wa ma ai. ⁵⁷ Yesu mahtang Myihtoi gaw tinang a bu ga hte nta hta n rai jang she, arawng lu nga ai, ngu nna shanhte hpe tsun mu ai. ⁵⁸ Shanhte kam sham ai myit n rawng nga ma ai majaw, dai shara e magam amu law law wa shi n galaw nu ai. 

 

Mahte 14

¹ Dai aten hta e Herod munggyi Yesu a kajai gumhkawng shi ga hpe na lu nna, ² Ndai wa gaw Baptisma Sara Yawhan rai nga ai: shi gaw si ai ni kaw na rawt wa sai rai nna ning re ai magam amu hpe shachyen ya nga ai, nga nna shi a ali ama ni hpe tsun mu ai. ³ Herod mahtang, shi kanau Hpilip a madu jan Herodia majaw, Yawhan hpe rim gyit la nna, htawng hta e bang da nu ai. ⁴ Kaning rai nme law, Yawhan gaw, Dai num hpe nang n mai madu na ndai, ngu wu ai rai nna, ⁵ shi hpe sat kau mayu nu ai rai ti mung, mung masha ni Yawhan hpe myihtoi zawn nawn da mu ai majaw, shanhte hpe hkrit da mu ai. ⁶ Ya Herod a shangai nhtoi du jang, Herodia shayi sha dai poi kaang e pru ka ai hte Herod hpe myit shapyaw ya wu ai; ⁷ dai rai nna, hpyi mahpyi hte shi hpe jaw na, ngu nna dagam ai hte ga ndat da wu ai. ⁸ Dai numsha a kanu shi hpe shatsam wu ai majaw, Ndai ban hta e, Baptisma Sara Yawhan a baw bang ya e, ngu wu ai. ⁹ Dai hkawhkam chyawm gaw, yawn la ti mung,dagam ai ga hte shi hte rau dung sha ai ni a majaw, jaw sa na, ngu dat wu ai: ¹⁰ shaloi shi shangun nna, htawng hta e Yawhan a du hpe htau dut wu ai. ¹¹ Shi a baw hpe mung ban hta la pru nna,dai mahkawn hpe ap ya nu ai: shi chyawm gaw, shi akanu hpang de la wa wu ai. ¹² Shi a sape ni mahtang dai moi mang hpe sa hta nna, lup kau nhtawm, Yesu hpe sa tsun dan mu ai. ¹³ Yesu gaw, dai ga na jang, li jawn let dai yang kaw nna pru mat wa nhtawm, shingran katsi ai shara de lagyim sa mat wa ai: shawa masha ni dai na mu yang, shanhte gaw mare shagu hkan na shi hpang de hkarang hku e hkan nang ma ai. ¹⁴ Pru wa yang, masha wunawng wuwa kaba hpe shi mu hkrup nna, shanhte hpe matsan dum ai hte shanhte a machyi makaw hkrum ai ni hpe shamai shatsai ya mu ai. ¹⁵ Ya shana de du yang, sape ni shi kaw sit sa wa nna, Ndai shara nam mali rai nga ai hte, ahkying mung lai wa sai: shawa masha ni kahtawng hkan e shahpa sa mari la mu ga, shanhte hpe shabawn dat mu, ngu mu ai. ¹⁶ Yesu mahtang, shanhte hpe shabawn shara n nga ai; nanhte nan shanhte hpe sha na jaw mu, ngu nna sape ni hpe tsun wu ai: ¹⁷ Shanhte chyawm gaw, Anhte gaw muk manga hte nga lahkawng sha, lu ga ai,ngu mu ai. ¹⁸ Shi gaw, Dai hpe ngai hpang de la wa ma rit, ngu wu ai. ¹⁹ Shawa masha ni tsingdu hta hkrawn taw nga mu ga shi hkang da wu ai; shaloi dai muk manga hte nga lahkawng hpe shi la nna, lamu de mada yu let dai hpe shaman ya wu ai hte ahkyep alep nna, muk dai sape ni hpe jaw dat wu ai; sape ni mung shawa masha ni hpe gam jaw mu ai. ²⁰ Shaloi shanhte yawng sha nna hkru kat nga ma ai; ngam ai adaw ahkyep ni lahkawn la yang, mung shi lahkawng hpring dem naw rai nga ai. ²¹ Dai sha ai ni chyawm gaw, numsha hte ma kaji hpe n hti lawm yang, lasha hkrai hkying manga daram rai nga ma ai. ²² Shaloi jang, Yesu gaw, shawa masha ni hpe garai n shabawn dat yang,sape ni hpe li shajawn nna, shi shawng e wora hkran de rap mat wa shangun mu ai. ²³ Shawa masha ni hpe shabawn dat kau nhtawm, akyu hpyi na matu, bum ntsa de shi hkrai lung wa ai: nrim rim rai jang, shi chyu sha dai yang e hti nga ai. ²⁴ Dai li chyawm gaw, stadia law law wa hkarang hte gang wa sai rai nna, dai nbung n sun nga ai majaw, hka leng ni dai hpe kayat shadang mu ai, ²⁵ Ya shana na ahkying ladaw mali hta e, shi gaw nawng ntsa e hkawm let, shanhte hpang de hkan sa nang ai. ²⁶ Dai nawng ntsa e shi hkawm wa ai hpe, sape ni mu mu yang, shanhte kajawng nna,Dai gaw minla rai nga ai, nga nna hkrit gari ai hte marawn ma ai. ²⁷ Shaloi jangYesu gaw, Myit apyaw sha nga mu; ngai she rai nngai; hkum hkrit nga myit, ngu nna shanhte hpe tsun mu ai. ²⁸ Petru mahtang htan nna, Madu e, nang rai n yang gaw,hka ntsa hku nang kaw sa du lu na, ngai hpe shaga la e, ngu wu ai: ²⁹ shi gaw, Sa rit, ngu wu ai. Dai rai nna Petru gaw li hta na yu hkrat nna, hka ntsa e hkawmlet, Yesu hpang de sa wa ai. ³⁰ Rai ti mung, nbung hpe mu jang shi hkrit nga ai;dai rai nna hka hta lup bang wa jang, shi gaw, Madu e, ngai hpe sai la e, ngu nna jahtau wu ai. ³¹ Shaloi jang Yesu gaw shi a lata ladawn nna, shi hpe dun la let, Ai n kam ai wa e, hpa majaw nang kam shut nga n ta? ngu nna shi hpe tsun wu ai. ³² Shan gaw dai li hta shang mat jang, dai nbung num mat wa ai: ³³ dai li kata e nga ai ni mahtang shi hpe naw ku nna, Nang gaw Karai Kasang a Kasha gaja wa teng teng rai nga ndai, ngu mu ai. ³⁴ Ya wora hkran de rap kawt jang, shanhte Genesaret mare de du ma ai. ³⁵ Dai shara e nga ai masha ni shi hpe chye jang, dai mung grup yin a shara magup hkan na machyi makaw hkrum ai ni hpe, shi kaw woi sa bang shangun mu ai rai nna, ³⁶ shi a palawng banbyau hpe sha ahtawk na ahkang hpyi nem mu ai: ahtawk ai ni kadai mung mai mat wa ma ai. 

 

Mahte 15

¹ Dai shaloi e, Yerusalem mare de na Hparishe ni hte laika ka ai sara ni, Yesu kaw sa du nna, ² Na a sape ni gaw hpa majaw ji wa ni a ahtung alai tawt kau nga ma ta? shanhte gaw lata n kashin ai nan, muk sha ma ai, ngu mu ai. ³ Shi shanhte hpe htan nna tsun mu ai gaw, Taw, nanhte wa gaw, hpa majaw nanhte a ahtung alai hte, Karai Kasang a ga matsun hpe tawt kau nga myit ta? ⁴ Kaning rai nme law, Na nwa hte nnu hpe hkungga lara di u; bai Tinang a kanu kawa hpe n hkru ai ga tsun ai wa gaw, teng teng si u ga, nga nna Karai Kasang tsun nga ti mung, ⁵ nanhte mahtang gaw, Tinang a kanu kawa hpe, Nang nye a lata na lu la mai ai arai gaw, Karai Kasang a matu kumhpa rai mat sai, nga nna tsun na gaw mai nga ai, ngu kau mu ai: ⁶ shing nga nna, tinang a kawa hpe n hkungga nga ai; Karai Kasang a ga matsun hpe mung, nanhte a ahtung alai hte nanhte sai kau mu ai. ⁷ Sawt ai ni e, Ndai amyu gaw, tinang a nten hte ngai hpe hkungga lara rai ma ti mung, Tinang a myit gaw, ngai hte tsan gang ma lu ai. ⁸ Masha ga matsun hku sha sharin shaga nga ma ai majaw, Shanhte kaman lila ngai hpe naw ku da mi ai, ⁹ nga nna, nanhte a lam Esaia tsun ai myihtoi ga ang nga ma lit dai. ¹⁰ Shaloi shawa masha ni hpe shi shaga la nna tsun mu ai gaw, Madat mara nna chye na la mu: ¹¹ n-gup de shang wa ai arai gaw, masha hpe awu asin di kau lu ai n rai; n-gup hta na pru wa ai mahtang gaw, masha hpe awu asin di kau nga ai, ngu wu ai. ¹² Shaloi sape ni sit sa nna, Ya tsun ai ga ndai Hparishe ni na jang, shanhte myit na machyi ma ai hpe nang chye nga n ni? ngu nna shi hpe tsun mu ai. ¹³ Shi htan nna, Sumsing lamu hta nga ai nye Wa n hkai da ai hpun yawng hte gaw,ru hte nawng baw kau ai hkrum na ra ai. ¹⁴ Shanhte gaw nga nga mu ga: myi kyaw ninglen lam madun ai ni rai nga ma ai: myi kyaw ai wa gaw, myi kyaw wa hpe lam madun a taw gaw, shan lahkawng gaw nhkun kata de hkrat na ma ra ai, ngu mu ai. ¹⁵ Shaloi Petru gaw, Ndai ga shadawn anhte hpe htai dan mi, ngu nna htan wuai. ¹⁶ Yesu gaw,Ya du hkra nanhte mung,myit n kung nga myit ni? ¹⁷ N-gup de shang ai arai yawng hte gaw, kan kata e du nhtawm, hkum tsan ai shara de kabai kau ai hkrum nga ai hpe, nanhte n dum lu mu ni? ¹⁸ N-gup hta na pru wa ai mahtang gaw, myit masin hta na byin pru ai rai nna, dai hte gaw masha hpe awu asin di kau wu ai. ¹⁹ Kaning rai nme law, myit masin hta na n hkru ai myit mang ai, masha sat na, num shaw na, num shut hpyit na, lagu na, n teng n man ai sakse hkam na hte shatan nhkan ai lam hte gaw byin pru wa ai. ²⁰ Dai hte gaw masha hpe awu asin di kau ai lam rai nga ai; lata n kashin ai hte muk sha na mahtang gaw, masha hpe awu asin di kau wu ai n rai, ngu wu ai. ²¹ Ya Yesu gaw dai yang na pru wa nna, Turu hte Sidun a mung ginwang hkan esa du ai. ²² Shaloi, Yu mu, Hkanan amyu numsha langai mi, dai mung a ga jarit de na pru sa nna, Dawi a Kasha, Madu e, ngai hpe matsan dum e law; nye a shayi sha nat e zingri ai grai hkrum nga ai, nga nna jahtau let tsun wu ai. ²³ Shi chyawm gaw ga hkaw mi pyi n htan wu ai. Shi a sape ni mung sit sa nna, Shi hpe shabawn kau u; anhte a hpang e shi hkan jahtau nga ai, ngu nna shadut mu ai. ²⁴ shi htannna, Israela nta na dam mat wa ai sagu ni a matu sha, ngai hpe shangun dat nngai,nga ai. ²⁵ Dai numsha mahtang gaw, sit sa wa nna, shi hpe naw ku let,Madu e, ngai hpe karum e law, ngu wu ai. ²⁶ Shi gaw, kasha ni a shahpa hpe la nhtawm, gwi ni hpe jaw kau na gaw,n sut nga ai, ngu nna htan wu ai; ²⁷ Dai numsha mahtang, Rai nga ai, Madu e; gwi ni gaw tinang a madu a sha ku hta na hkrat ai ayun ayaw hpe sha mai nga ai,nga ai. ²⁸ Dai rai nna Yesu gaw, Numsha e; na a kam sham ai gawkaba nga lit dai; nang tsaw nga ai hku byin wa lit ga, ngu nna, shi hpe htan wu ai. Dai ahkying kaw nna, shi a shayi sha mai lu ai. ²⁹ Bai Yesu gaw dai shara kaw na sat sa wa nna, Galile nawng makau de sa duai: dai bum ntsa de shi lung wa nna dai yang e dung nga ai. ³⁰ Shaloi masha wunawng wuwa kaba shi kaw sa du ma ai hte, lagaw hten ai, lata hten ai, myi kyaw ai, n chye shaga ai hte ana amyu myu kap ai masha law law wa hpe, shanhte lahku sa ma ai rai nna, shi a lagaw nhpang e shayu tawn da mu ai: shi shanhte hpe shamai shatsai di mu ai. ³¹ Dai rai nna, n chye shaga ai ni shaga lu ma ai, lagaw hten ai ni hkawm sa lu ma ai hte, myi kyaw ai ni myi mu lu ma ai hpe, shawa masha ni mu mu yang, shanhte mau mahka nga ma ai rai nna, Israela Karai Kasang hpe shakawn kungdawn mu ai. ³² Shaloi Yesu shi a sape ni hpe shaga la nna, Ndai masha hpung ni hpe ngaimatsan dum nga nngai: ya masum ya tup shanhte ngai hte rau nga nga ma sai rai nna, shahpa hpa mung n nga ma sa lu ai: lam hkan e hki ba htum ai n hkrum mu ga, kawsi nga ma yang ngai shanhte hpe n shabawn dat mayu nngai, ngu mu ai. ³³ Sape ni mahtang, Masha nde wa nan hkru kat lu hkra muk ningsan wa, ndai nam mali hta e, kanang na lu la na ga ta? ngu nna shi hpe tsun mu ai. ³⁴ Yesu gaw, Nanhte kaw muk gade wa nga nga a ta? ngu nna shanhte hpe san mu ai. Shanhte gaw, Muk tawng sanit hte nga kaji loi mi sha nga nga ai, ngu mu ai. ³⁵ Shaloi shawa masha ni hpe ga hta dung nga na, shi hkang da nhtawm, dai muk sanit hte nga ni hpe la nna, ³⁶ shakawn ngut jang ahkyep alep di ai hte sape ni hpe jaw mu ai. ³⁷ Sape ni mahtang shawa masha ni hpe gam jaw mu ai. Shing rai shanhte yawng sha nna hkru kat nga ma ai hte ngam ai adaw ahkyep ni hpe lahkawn la yang,mung sanit hpring dem rai nga ai. ³⁸ Dai sha ai ni gaw, numsha hte ma kaji hpe n hti lawm yang, lasha hkrai hkying mali rai nga ma ai. ³⁹ Dai shawa masha ni hpe shi shabawn dat nhtawm, li hta shang nna, Magadan ginwang hkan e sa du ai. 

 

Mahte 16

¹ Shaloi Hparishe ni hte Saduke ni sa du nna, shi hpe chyam dinglik yu let,lamu de na lamik kumla madun dan mi ga, hpyi ma ai. ² Shi gaw,[Shana de e, lamu hkyeng yang gaw, Lamu san na ra ai, nga nna nanhte tsun ga myit dai: ³ bai, jahpawt e rai jang gaw, lamu hkyeng ai hte n san nga ai majaw, Laru marang wa na ra ai, nanhte nga ga myit dai. Shing rai, lamu a man hpe nanhte chye ginhka lu mu ai rai ti mung ndai prat na kumla ni hpe,n chye ginhka myit dai] ⁴ N hkru ai hte shut hpyit ai amyu gaw, lamik kumla tam nga ai; rai ti mung, Yona a lamik kumla hta kaga, hpa lamik kumla mung, shanhte hpe n dan na nme ai, ngu nna tsun mu yang, shi shanhte hpe kau da nna, pru mat wa ai. ⁵ Bai sape ni gaw wora hkran de rap du yang, muk la gun na hpe malap kau maai. ⁶ Shaloi Yesu gaw, Hparishe ni hte Saduke ni a matsi hpe matsing da nna koi kau mu, ngu nna shanhte hpe tsun wu ai. ⁷ Shanhte mahtang, Anhte muk n gun nga ga hka, nga nna shada da tsun wa ma ai. ⁸ Yesu dai hpe hten wu yang, Ai n kam ai ni e, nanhte muk n gun ai hpe tau nna, hpa majaw shada da tsun wa myit ta? ⁹ Masha hkying manga, dai muk manga hpe sha lu nna, nanhte mung gade naw lahkawn la mu ai hte, ¹⁰ masha hkying mali, dai muk sanit hpe sha la lu nna, nanhte mung gade naw lahkawn la lu ai hpe, nanhte n sawn yu ai hte, n dum da mu ai? ¹¹ Muk a lam ngai nanhte hpe n tsun nngai gaw, nanhte hpa rai n dum nga myit ta? Hparishe ni hte Saduke ni a matsi hpe koi kau mu, ngu nna she ngai tsun ma de ai, ngu wu ai. ¹² Dai rai nna, muk hta na matsi hpe n rai,Hparishe ni hte Saduke ni a sharinshaga ai lam koi kau na she, shi tsun nga ai hpe, shanhte chye na mu ai. ¹³ Ya, Yesu gaw Kesare-Hpilip mare a ginwang hkan e du wa yang, Dai Masha Kasha rai nga ai hpe, masha ni kadai wa rai nga ai, nga nga ma ta? ngu nna shi a sape ni hpe san mu ai. ¹⁴ Shanhte gaw, Nkau mi, Baptisma Sara Yawhan; kaga ni gaw, Elia; bai kaga ni gaw, Yeremia, shing n rai myihtoi langai ngai re ai, nga ma ai, ngu mu ai. ¹⁵ Bai shi gaw, Nanhte mahtang ngai hpe kadai wa rai nga ai, nga nga myit ta? ngu wu ai. ¹⁶ Simun Petru gaw htan nna, Nang gaw Hkristu ngu ai a hkrung nga ai Karai Kasang a Kasha rai nga ndai, ngu wu ai. ¹⁷ Dai rai nna Yesu gaw, Bara-Yona Simun e, nang a lu ndai: ashan hte asai gaw, nang hpe dai madun dan ai n rai; sumsing lamu e nga ai nye a Wa gaw dai hpe madun dan da ndai. ¹⁸ Bai, nang hpe ngai tsun de ga, Nang Petru rai nga ndai hte, ndai lunghkrung ntsa e nye a Hpung hpe ngai de da na we ai rai nna. Katsan ga na chyinghka ni, dai hpe dang kau lu na n rai. ¹⁹ Sumsing lamu na mungdan a sumsaw ni ngai nang hpe ap ya na de ai rai nna, ding hta ga hta nang gyit da mada gaw, sumsing lamu hta mung gyit da ai hkrum na ra ai; dinghta ga hta nang raw maraw gaw, sumsing lamu hta mung, raw kau ai hkrum na ra ai, ngu nna shi hpe htan wu ai. ²⁰ Bai Hkristu shi rai nga ai gaw, kadai hpe mung n tsun dan mu ga, sape ni hpe ginhtim da mu ai. ²¹ Dai aten kaw nna Yesu Hkristu gaw, Yerusalem mare sa lu na hte agyi salang ni, hkinjawng agyi ni hte laika ka ai sara ni a lata hta e nni nkri law law wa hkrum nna, sat kau na hpe hkam la nhtawm, masum ya nhtoi hta e, bai sharawt lalu na lam, shi a sape ni hpe madun dan hpang wu ai. ²² Dai rai nna Petru gaw, shi hpe shaga la nna, Madu e, dai nang hta n byin u ga; dai gaw nang hpe galoi n hkra lu na rai, ngu nna shi hpe jet kau wu ai. ²³ Shi mahtang kayin nhtawm Petru hpe, Satan e, nye hpang de sit mat wa u; Karai Kasang hte seng ai lam n rai, masha hte seng ai lam hpe sha nang myit nga ndai majaw, nye a matu myit kataw shara nang rai nga ndai, ngu nna tsun wu ai. ²⁴ Bai, Yesu gaw shi a sape ni hpe, Ngai hpang de sa wa mayu ai wa kadai rai ti mung, tinang a hkum hpe nyet kau lu na rai nna, shi a wudang hpai let, ngai kaw hkan nang ru ga. ²⁵ Tinang a asak hpe hkye la mayu ai wa kadai mung, dai sum mat na lu ai; nye a jaw e tinang a asak sum ai wa chyawm gaw, dai hpe mu lu na ru ai. ²⁶ Bai, masha gaw nga yawng nga pra kawm dawm amyat lu la ninglen, tinang asak sum mat yang gaw, shi a matu hpa akyu nga lu ta? masha gaw, hpa gawng malai hkungga hte wa tinang a asak hpe shaw la lu na a ta? ²⁷ Kaning rai nme law, dai Masha Kasha gaw Kawa a hpung shingkang hte shi a lamu kasa ni hte nawng, du na ra ai; dai shaloi e, tinang galaw ai hte maren langai hte langai hpe bai htang na ra ai. ²⁸ Ngai nang hpe teng teng tsun ma de ga, nang e tsap nga ai ni nkau mi, dai Masha Kasha gaw shi a mungdan hta du wa ai hpe, garai n mu mu gaw, si ai n hkrum na ma ai, ngu mu ai. 

 

Mahte 17

¹Ya kru ya lai jang, yesu gaw, Petru, Yaku hte shi a kanau Yawhan hte hpe shaga la nhtawmm, tsaw ai bum ntsa de kaga lak shanhte hpe woi lung mu ai. ² Shaloi shanhte a man e shi ahpraw asam galai wa ai hte, shi a myi man gaw, jan zawn htoi kabrim nna, shi a hpun palawng nhtoi zawn hpraw tu wa lu ai: ³ dai hta n-ga Mawshe yan Elia mung, shi hte ga tsun let, shanhte a man e dan pru ma ai. ⁴ Shing rai Petru gaw, Madu e, ndai yang e anhte nga na mai nga ai: nang hkraw n yang gaw, nang e sum masum, na a matu langai mi, Mawshe a matu langai mi, Elia a matu langai mi, ngai gap na nngai, ngu nna Yesu hpe tsun wu ai. ⁵ Dai ga shi naw tsun nga yang, yu mu, htoi tu ai sumwi gaw shanhte hpe ka-up mu ai hte dai sumwi hta na nsen pru nna, Ndai wa gaw nga sharawng awng ai, ngai tsaw ra ai ngai Sha rai nga ai: shi a ga madat mara mu, nga ai. ⁶ Sape ni dai hpe na jang, shanhte myi man dagup nna, nachying hkrit gari nga ma ai. ⁷ Shaloi Yesu wa nna shanhte hpe ahtawk let, Rawt mu, hkum hkrit nga myit, ngu wu ai. ⁸ Shanhte dawng yu mu yang, Yesu hta kaga, kadai hpe mung n mu ma nu ai. ⁹ ya dai bum na shanhte yu hkrat wa ma yang, Yesu gaw, Dai Masha Kasha si ai ni kaw na sharawt la ai garai n hkrum hkrum gaw, ndai shingran hpe, kadai wa hpe mung hkum tsun dan myit, ngu nna shanhte hpe hkang dat mu ai. ¹⁰ Shaloi shi a sape ni, Dai rai taw gaw, Elia shawng sa du na ra ai, nga nna laika ka ai sara ni hpa majaw tsun nga ma ta? ngu nna shi hpe san mu ai. ¹¹ Shi htan nna, Elia gaw sa du ra ai rai nna, yawng mayawng hte hpe shagrin da lu nu ai: ¹² rai ti mung, ngai nanhte hpe tsun ma de ai gaw, Elia du boi sai rai nna, shanhte shi hpe n chye mu ai majaw, tinang a myit hte maren di kau ma nu ai; dai Masha Kasha mung, shanhte a lata hte dai hte maren nni nkri hkrum na ra ai, ngu wu ai. ¹³ Dai majaw Baptisma Sara Yawhan hpe lakap nna, shi tsun nga ai gaw, sape ni chye na mu ai. ¹⁴ Ya shawa masha ni hpang de wa du ma yang, masha langai mi shi kaw sit sa nna, lahput hput di let, Madu e, ngai sha hpe matsan dum ya e; shi mamu mu ai rai nna, atsu atsam grai hkrum nga ai: ¹⁵ law law lang wa wan hta mung, law law lang wa hka hta mung, shi kataw bang bang re ai: ¹⁶ na a sape ni hpang de ngai shi hpe woi wa lu ti mung, shanhte n shamai lu mu ai, ngu mu ai. ¹⁷ Yesu htan nna Makam masham n rawng ai hte nhtan shai ai amyu e, ngai nanhte hte rau gaten du hkra nga nga lu na rai ta? gaten du hkra, nanhte hpe sharang nga lu na rai ta? ngai hpang de shi hpe woi sa ma rit, ngu wu ai. ¹⁸ Shaloi Yesu shi hpe daru kau wu ai rai nna, dai nat gaw shi kaw na pru mat wa ai; dai ahkying kaw nna dai ma gaw mai mat lu ai. ¹⁹ Dai hpang sape ni hkrai sha Yesu hpang de sit sa wa nna, Anhte gaw dai nat hpe hpa majaw n shaden kau lu gaw ta? ngu mu ai. ²⁰ Shi gaw, Nanhte ai n kam myit dai majaw, n di lu mu ai; nanhte hpe ngai teng teng tsun ma de ai gaw; Kam sham ai myit chyinghkrang tum daram nanhte rawng nga myit yang gaw, ndai bum hpe, Wora de htawt sit mat u, ngu nna nanhte tsun mu yang, dai htawt sit mat na ra ai: nanhte n di lu na amu hpa mung n nga na re ai, ngu nna shanhte hpe tsun mu ai. ²² Ya, Galile mung hta shanhte wa zup ma yang, Yesu gaw, Dai Masha Kasha hpe masha ni a lata hta ap kau ai hkrum na aten ni magang wa ra ai: ²³ shanhte shihpe sat kau na ma ru ai rai nna, masum ya nhtoi hta e sharawt la ai shi hkrum na ra ai, ngu nna shanhte hpe tsun wu ai; dai rai nna, shanhte nachying myit yawn nga ma ai. ²⁴ Bai, shanhte Kaperna-um de wa du ma yang, naw ku Htingnu na alu lahkawn ai ni gaw Petru kaw sa du nna, Nanhte a sara gaw dai shekela chyen mi n bang ga a ni? ngu mu ai. ²⁵ Shi gaw, Bang ga ai, ngu wu ai. Ya Petru nta hta shang wa yang, Yesu shi hpe hkap tsun nna, Simun e, nang kaning rai myit da wu ta? ga ningtsa hkawhkam ni, kang hte hkansi kadai kaw na hta ma ta? tinang kashu kasha ni kaw na hta ma ni? shing n rai, yu maya ni kaw na hta ma ni? ngu wu ai. ²⁶ Shi gaw, Yu maya ni kaw na hta ma ai, ngu wu yang, Yesu gaw, Dai rai taw gaw, kashu kasha ni lawt lu ma ai: ²⁷ rai ti mung, anhte a majaw shanhte myit n kataw mu ga, nawng de sa nna, nga myek jahkrat bang u; shawng lu ai nga hpe shaw la nhtawm, n-gup mahka yang, shekela pa mi nang mu na ru ai: dai hpe la nna, ngai hte na a matu shanhte hpe ya u, ngu nna shi hpe tsun wu ai. 

 

Mahte 18

¹ Dai ahkying hta e sape ni gaw Yesu hpang de sa du nna, Sumsing lamu a mungdan hta kadai wa mahtang grau kaba nga a ta? ngu nna san mu ai. ² Dai rai nna shi gaw ma kaji langai mi hpe shaga la ai hte, shanhte a kaang e shatsap tawn nhtawm, ³ Nanhte hpe ngai teng teng tsun ma de ai gaw, nanhte myit n kayin nna, ma kaji zawn n tai myit yang gaw, sumsing lamu a mungdan hta, nanhte n shang lu na myit dai. ⁴ Ndai ma kaji zawn, tinang a myit shanem ai wa kadai rai ti mung, sumsing lamu a mungdan hta, grau kaba ai wa tai na ra ai. ⁵ Ndai ma kaji zawn re ai wa langai mi hpe, nye a amying hte hkap la ai wa kadai mung, ngai hpe hkap la nga ai. ⁶ Ngai hpe kam sham nga ai, ndai ma kaji ni hta na langai mi hpe, myit kataw shangun ai wa kadai mung, shi a du hta htumrin lung kaba noi nna, nawng na sung htum ai shara de jahkrat kau na gaw, ging nga ai. ⁷ Myit kataw shara nga nga ai majaw, mungkan ga na ni dingnye lu ma ai: myit kataw shara n nga hkra gaw, n rai lu ai; rai ting mung, myit kataw shara shabyin dat ai wa gaw, dingnye lu ai. ⁸ Na a lata, shing n rai, na a lagaw nang hpe myit kataw shangun n yang gaw,dai hpe kahtam dut kabai kau u: lagaw lata hkum hkum re ai hte, htani htana wan hta jahkrat kau ai hkrum na hta, hkum daw hten ai hte asak hkrung ai de shang na gaw, grau mai nga ai. ⁹ Na a myi nang hpe myit kataw shagun n yang gaw,dai hpe malawk kabai kau u: myi lahkawng maga hkum ai hte, ngarai mung na wan hta jahkrat kau ai hkrum na hta, myi maga sha nga ai hte asak hkrung ai de shang na gaw, grau mai nga ai. ¹⁰ Dai ma kaji langai mi hpe pyi nanhte n gawn n sawn n di kau myit ga, sadi nga mu: nanhte hpe ngai tsun ma de ga, Sumsing lamu kata e, shanhte a lamu kasa ni gaw, sumsing lamu na nye Wa a myi man hpe, galoi mung a mada nga ma ai. ¹² Nanhte kaning ngu myit da mu ta? masha langai ngai sagu latsa lu nna, dai hta na langai mi dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam ga ai, n rai ni? ¹³ Dai hpe mu hkrup jang, n dam ai sagu jahku shi jahku a matu kabu gara ai hta, dai langai sha a matu grau nna kabu gara nga ai, ngai teng teng nanhte hpe tsun ma de ai. ¹⁴ Dai hte maren, ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai. ¹⁵ Na nhpu nnau wa nang hpe shut hpyit kau yang gaw, shi hpang de sa nhtawm,nan lahkawng hkrai chyaw rai da nna, shi a mara hpe madun u: na a ga hpe madat la a yang gaw, na nhpu nnau wa hpe nang mawai la lu nu ai. ¹⁶ Na a ga hpe n madat la yang gaw, marai langai lahkawng hpe naw shaga la nna, hpa hku hpa lam rai ti mung, sakse lahkawng masum a n-gup ga hte daw dan ya mu. ¹⁷ Shanhte a ga n madat hkraw a yang gaw, dai Hpung hpe sa shana ya mu: dai Hpung hpe mung n madat hkraw a yang gaw, tara maigan wa hte kang hta ai wa zawn, na a man e shi rai u ga. ¹⁸ Ngai nanhte hpe teng teng tsun ma de ai gaw, Dinghta ga hta nanhte gyit da mada gaw, sumsing lamu hta mung, gyit da ai hkrum na ma ra ai: dinghta ga hta nanhte raw maraw gaw, sumsing lamu hta mung, raw kau ai hkrum na ma ra ai. ¹⁹ Bai, nanhte hpe ngai tsun ma de ga, Nanhte hta na marai lahkawng, dinghta ga hta e myit hkrum da ai hte hpa lam hpe mung hpyi mu yang gaw, sunsing lamu e nga ai nye Wa gaw, shan a matu dai hpe shatup ya na mu ai. ²⁰ Kaning rai nme law, marai lahkawng masum, nye a mying hpe gang nna zup hpawng nga ma yang gaw, dai yang shanhte a kaang e ngai mung lawm nga nngai, ngu mu ai. ²¹ Shaloi Petru shi kaw sit sa nna, Madu e, nye hpu nau wa ngai hpe bai shut shut rai yang gaw, ngai gade lang shi a mara raw kau nga lu na rai ta? sanit lang du hkra rai ni? ngu wu ai. ²² Yesu gaw, Sanit lang du hkra sha n rai; sanit shi e htam sanit lang du hkra, mai rai nga ai, ngai nang hpe tsun de ai, ngu wu ai. ²³ Dai rai nna sumsing lamu a mungdan gaw, shi a mayan ni hpe, ga jahpan la mayu ai hkawhkam wa langai mi hte bung nga ai. ²⁴ Ga jahpan la nga a yang,gumhpraw mun mi hka kap ai masha langai mi hpe, shi kaw woi sa mu ai. ²⁵ Hka wa na, shi hpa mung n lu ai majaw, shi hkum, shi a madu jan, shi a kasha ni mung,shi lu malu yawng hte hpe mung, dut kau nna hka wa u ga, nga nna shi a madu hkang da nga ai. ²⁶ Dai majaw mayam wa gaw, lahput hput di da nna shi hpe naw ku let, Ngai hpe matsan naw dum e law, ngai mahkra nang hpe wa na de ai, ngu wu ai. ²⁷ Dai rai nna, mayam a madu gaw shi hpe matsan dum nna, dat dat wu ai hte, shi a hka raw kau ya wu ai. ²⁸ Shaloi dai mayam wa pru nna shi kaw peksan latsa sha hka kap ai mayam manang langai mi hpe hkrum jang, shi hpe dun la ai hte shi du hpe gra chyit di nna, Nye hka ya wa e, ngu wu ai. ²⁹ Dai majaw mayam manang wa gaw lahput hput di da nna, Ngai hpe matsan naw dum e law, ngai nang hpe wa na de ai, ngu nna hpyi nem wu ai. ³⁰ Shi mahtang n hkraw wu ai rai nna, hka wa kau ai aten du hkra, htawng hta e shi hpe jahkrat da wu ai. ³¹ Ya, shi a mayam manang ni dai hpe mu hkrup mu yang, shanhte nachying myit yu machyi ya mu ai rai nna, dai byin mabyin hte shanhte a madu hpe wa shana da mu ai. ³² Shaloi jang shi a madu gaw shi hpe shaga la nna, N hkru ai mayam e, nang ngai hpe hpyi nem ndai majaw, nang hta kap ai hka yawng, ngai raw kau ya sa de ai: ³³ ngai nang hpe matsan dum de ai hte maren, na a mayam manang hpe mung, nang matsan mai dum ndai, n rai ni? nguwu ai.| ³⁴ Shi a madu mung masin pawt nna, shi hka wa kau ai aten du hkra, mang galang ni a lata hta shi hpe ap kau wu ai. ³⁵ Shing rai nanhte hta na kadai wa rai ti mung, tinang a hpu nau wa mara hpe myit masin yawng hte n raw kau ya myit yang gaw, sumsing lamu na nye Wa mung, nanhte hpe tai na ma rin dai, ngu wu ai. 

 

Mahte 19

¹ Ya, ndai ga hpe Yesu tsun shangut ai hpang, shi Galile mung na pru wa nhtawm, Yawdan hka wora hkran na Yuda mung a ga jarit de sa du ai. ² Masha wunawng wuwa kaba shi kaw hkan nang ma ai rai nna, shi dai yang e shanhte hpe shamai shatsai ya mu ai. ³ Shaloi Hparishe ni shi kaw sa du nna, shi hpe chyam dinglik yu let, Hpa mara hpe mung hkan nna, tinang a madu jan hpe shabawn kau na, mai nga a ta? ngu yu mu ai. ⁴ Shi gaw, Shawng nnan e hpan da ai wa gaw, lasha yan numsha hpe hpan da mu ai rai nna, ⁵ De a majaw lasha gaw shi a kanu yan kawa hpe kau da nhtawm, madu jan hte kanawn nna, shan lahkawng gaw hkum shan langai sha tai lu na ma ra ai, nga nna shi tsun ai ga hpe nanhte n hti yu myit ni? ⁶ Dai majaw shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu nna htan wu ai. ⁷ Bai shanhte gaw, Dai rai taw, jahka ai laika jaw nna, shi hpe shabawn kau lu na,nga nna, hpa majaw Mawshe hkang da nga a hka? ngu mu ai. ⁸ Shi gaw, nanhte a myit ja nga ma lit dai majaw, tinang a madu jang hpe shabawn kau na ahkang, Mawshe jaw myit dai; rai ti mung, shawng npawt kaw nna shing n nga ai. ⁹ Nanhte hpe ngai tsun ma de ga, Hpye ai lam hta kaga, tinang a madu jan hpe shabawn kau nhtawm,num kaga hpe hkungran la ai wa kadai mung, num shaw ai wa tai nga ai, ngu nna shanhte hpe tsun wu ai. ¹⁰ Dai rai nna sape ni gaw, tinang a madu jan hte madu wa a lam dai hku rai nga yang gaw n hkungran yang mahtang grau mai nga ai. ¹¹ Shaloi shi shanhte hpe tsun mu ai gaw, Masha mahkra dai ga hpe hkam nga lu ma ai. n rai; hkam nga lu na chyeju lu la ai ni sha, hkam nga lu ma ai. ¹² Kaning rai nme law, masha nkau mi gaw kanu a hkritung nna la chyasi tai nga ma ai; la chyasi nkau mi gaw, masha a lata hte la chyasi tai mat ma ai; la chyasi nkau mi gaw, sumsing lamu a mungdan majaw tinang a hkum hpe chyasi kau mu ai: dai ga hpe hkam lu ai wa, hkum nga u ga, ngu mu ai. ¹³ Shaloi, ma kaji ni a ntsa e lata mara da nna, akyu hpyi ya mu ga, shi hpang de shanhte hpe woi sa mu ai: sape ni mahtang shanhte hpe hkap daru kau mu ai. ¹⁴ Yesu chyawm gaw, Ma ni hpe ngai hpang de sa na ahkang jaw nna shanhte hpe hkum ban shadang myit; kaning rai nme law, sumsing lamu a mungdan gaw dai zawn re ai ni a mungdan rai nga ai, ngu mu ai. ¹⁵ Shaloi shanhte a ntsa e shi lata mara da nhtawm, dai shara na pru mat wa ai. ¹⁶ De a hpang e, yu mu, marai langai mi shi kaw sa du nna, Sara e, n htum nwai asak lu la hkra, kaja ai hpa baw ngai mai galaw na rai ta? ngu yu wu ai. ¹⁷ Shi gaw, Kaja ai ngu mai ai lam, nang hpa rai ngai hpe san yu n ta? Kaja ai wa langai mi nga nga ai: nang nan asak hkrung ai de shang mayu n yang gaw, jep ai tara hpe hkan nang nga u, ngu nna shi hpe tsun wu ai. ¹⁸ Dai wa gaw, Gara tara hpe mahtang rai ta? ngu wu ai. Yesu gaw, Masha hkum sat, masha num hkum shaw, hkum lagu, n teng n man ai sakse hkum hkam; ¹⁹ nnu yan nwa hpe hkungga lara di u; na a htingbu wa hpe na a hkum hte maren tsaw ra nga u, ngu wu ai. ²⁰ Dai shabrang wa gaw, Dai yawng mayawng hte hpe ngai hkan shatup se ai: hpa mahtang ngai naw ra nga n ta? ngu nna shi hpe tsun wu ai. ²¹ Shaloi Yesu gaw,Nang ding hpring mayu nga n yang gaw, wa su, na a arai ni hpe dut kau nna, matsan mayan nihpe karan jaw u ; shing rai jang, sumsing lamu ntsa e nang sut gan lu na rin dai: ngai kaw mung sa hkan nang rit, ngu nna shi hpe tsun wu ai. ²² Dai shabrang wa gaw dai ga na jang, myit yawn la let byawn hprang rai mat wa ai: kaning rai nme law, shi arai law law lu su ai wa rai nga ai. ²³ Dai rai nna Yesu gaw shi a sape ni hpe, Ngai nanhte hpe teng teng tsun ma de ga, sut su ai wa gaw, sumsing lamu a mungdan hta nachying wa shang yak nga ai. ²⁴ Bai, ngai nanhte hpe tsun ma de ga, Sut gan lu ai wa gaw Karai Kasang a mungdan hta shang loi ai hta, gawla-u gaw samyit na hku gale na grau loi nga ai, ngu nna tsun wu ai. ²⁵ Sape ni dai ga na ma yang, nachying myit mau mat ai hte Dai rai taw gaw, kadai wa mi hkye hkrang la ai kaw du lu na a ta? nga ma ai. ²⁶ Yesu mahtang shanhte hpe mada yu nna, Dai amu hpe masha gaw dang di lu ai n rai; Karai Kasang mahtang gaw, yawng mayawng dang di lu ai, ngu mu ai. ²⁷ Shaloi Petru htan nna, Yu u, anhte gaw arai yawng mayawng hpe kau da nna,nang kaw hkan nang sa ga ai; dai rai nna anhte hpa lu la na rai nga ga ta? ngu wu ai. ²⁸ Yesu gaw, Nanhte hpe ngai teng teng tsun ma de ga, dai Masha Kasha gaw shi a arawng sadang a tingnyang hta e dung nga yang, bai shagai wa ai aten hta e ngai kaw hkan nang nga ai ni, nanhte mung, tingnyang shi lahkawng hta dung lawm na marin dai rai nna, Israela a amyu shi lahkawng hpe tara dara lu na maru ai. ²⁹ Nye amying a matu mara, nta, kahpu kanau, kajan, kanu kawa, kashu kasha hte yi hkauna hte hpe kau da ai wa kadai rai ti mung, htam law law wa lu la nna, htani htana asak a sali wunli hkam la na ru ai. ³⁰ Rai ti mung shawng na ni law law wa hpang hkrat na ma ra ai; hpang hkrat ai ni mahtang shawng na ma ra ai. 

 

Mahte 20

¹ Kaning rai nme law sumsing lamu a mungdan gaw, tsabyi sun hta amu galaw ai masha saw bang na, jahpawt jau jau e pru sa wa ai nta madu hte bung nga ai. ² Dai wa gaw, lani mi hta gumhpraw lap mi jaw sa na, ngu nna amu galaw ai ni hte bawng jahkut nhtawm, tsabyi sun de shanhte hpe shangun dat mu ai. ³ Bai ahkying masum hta daram shi pru sa nna, gat hkan e kaman tsap nga ai masha kaga hpe mu hkrup yang, shi gaw, ⁴ Nanhte mung dai sun de sa wa ma su ; ging ram ai hte maren ngai nanhte hpe jaw na ma de ai, ngu nna shanhte hpe tsun mu ai. Shaloi shanhte sa wa ma ai. ⁵ Bai ahkying kru hte ahkying jahku hta e daram, shi pru sa nna dai hte maren di mu ai. ⁶ Ya ahkying shi langai hta daram, bai pru sa yang, tsap ngaai masha kaga hpe shi mu hkrup nna, Nanhte hpa rai nme, nang e shani tup kaman sha tsap nga myit ta? ngu nna shanhte hpe san mu ai. ⁷ Shanhte gaw, Kadai mung anhte hpe n saw mi ai, ngu mu ai. Shi gaw, Nanhte mung dai sun de sa wa ma su, ngu mu ai. ⁸ Ya shana de rai jang, dai sun madu gaw, Amu galaw ai ni hpe shaga la nhtawm, hpang jahtum shang ai ni kaw nna, shawng nnan shang ai ni gu hkra shabrai jaw u, ngu nna shi a hpareng wa hpe tsun da wu ai. ⁹ Shaloi ahkying shi langai e shang ai ni sa nna, gumhpraw lap lap gu hkra lu la ma ai. ¹⁰ Shawng shang ai ni du yang, shanhte grau nna lu la na ga ai, nga nna myit ma ti mung, shanhte mung gumhpraw lap lap sha lu la shajang ma ai. ¹¹ Shing rai lu la ma ai hpang shanhte gaw, ¹² Hpang jahtum shang ai ndai ni gaw hkying mi sha chyang ma ti mung, dai ni tup lit gun hpai ai hte anhte jan ja hkrum sha ai ni hte maren, nang shanhte hpe di mu ai, ngu nna nta madu hpe angun aput mu ai. ¹³ Shi mahtang shanhte hta na langai mi hpe, Jinghku wa e, ngai nang hpe maw sha de ai n rai: gumhpraw lap mi jaw na ngu nna, nang ngai hte bawng hkut nit dai, n rai ni? ¹⁴ Nang hte seng ai hpe la wa su: hpang shang ai wa hpe nang hte maren jaw na ngai ra nngai. ¹⁵ Nye arai hpe ngai di mayu ai hte maren,n mai di a ni? Ngai mai kaja nga nngai majaw, na a myi akrawn nga lit ni? ngu nna htan wu ai. ¹⁶ Dai hte maren, hpang hkrat ai ni, shawng na ma ra ai; shawng nga ai ni mahtang,hpang hkrat na ma ra ai, ngu wu ai. ¹⁷ Bai, Yesu gaw Yerusalem de lung wa magang nga yang, dai sape shi lahkawng hte hpe hkrai sha shi shaga la nna, lam hkan e shanhte hpe tsun mu ai gaw, ¹⁸ Yu mu, Anhte Yerusalem mare de lung wa nga ga ai: dai Masha Kasha gaw hkinjawng agyi ni hte laika ka ai sara ni a lata hta ap kau ai hkrum na ra ai rai nna, shanhte shi hpe si na lam daw dan na hte, ¹⁹ asawng asang, anu kayat ai hte wudang hta jen da hkrum na matu, maigan amyu ni a lata de ap kau na ma ra ai; masum ya nhtoi hta e, bai sharawt la ai hkrum na ra ai, ngu mu ai. ²⁰ Dai shaloi e, Zebedi a kasha yan a kanu gaw, shi kasha yan hte rau, shi kaw sit sa nna naw ku let shi hpe lama ma hpyi wu ai. ²¹ Shi gaw, Nang hpa mi ra nga n ta? ngu wu ai. Dai num gaw, Ndai ngai sha yan gaw, na a mungdan hta e na hkra maga de langai mi, pai maga de langai mi, dung nga lu na ahkang jaw u, ngu wu ai. ²² Yesu gaw, Nanhte hpa hpyi nga ai hpe, nanhte n chye myit dai; ngai lu magang nga ai gawm hpe, nanhte lu lu na rai nga myit ni? ngu nna htan wu ai. Shanhte gaw, Anhte rai lu na ga ai, ngu mu ai. ²³ Bai shi gaw, Nye a gawm hpe nanhte gaja wa lu na rai nga myit dai; rai ti mung, nye a hkra maga pai maga de dung nga lu na, ngai ahkang n jaw lu nngai: dai gaw, nye a Wa lajang da ya ai ni a matu mara sha rai nga ai, ngu nna shanhte hpe tsun wu ai. ²⁴Ya, dai ga hpe kaga sape shi na mu yang, shanhte dai shan nau hpe myit yu kahtet mu ai. ²⁵ Yesu mahtang shanhte hpe shaga la nna, Maigan amyu ni a du ni gaw, shanhte a ntsa e reng nga ma ai hte daru magan re ai ni gaw shanhte a ntsa e ahkang lu ma ai hpe, nanhte chye nga myit dai. ²⁶ Nanhte hta chyawm gaw, shing rai na nrai: nanhte hta grau mayu ai wa kadai rai ti mung, nanhte a ali ama tai u ga : ²⁷ nanhte hta baw tai mayu ai wa kadai rai ti mung,nanhte a mayam tai u ga: ²⁸ kaning rai nme law, dai Masha Kasha wa pyi,shangun ma hpe yam sha na nga du sa ai n rai; shangun ma a amu hpe galaw daw ya na hte, masha law law a matu mara, shi a asak hpe gawng malai jahpu shatai ya na nga nna du sa ai, ngu mu ai. ²⁹ Ya Yerihko mare na shanhte pru wa ma yang, masha wunawng wuwa kaba shi kaw hkan nang ma ai. ³⁰ Shaloi, yu mu, myi kyaw ai masha lahkawng, dai lam makau e dung nga ma ai rai nna, Yesu lai sa wa ai hpe na ma yang, shan gaw, Dawi a Kasha, Madu e, an hpe matsan dum la mi law, ngu nna jahtau mu ai. ³¹ Shawa masha ni gaw, shan atsin sha nga mat mu ga, jet kau mu ai. Shan mahtang, Dawi a Kasha ,Madu e, an hpe matsan dum la mi law, ngu nna grau jahtau mu ai. ³² Shaloi Yesu tsap da nna shan hpe shaga la ai hte, Ngai nan a matu hpa di ya na, nan ra nga myit ta? ngu wu ai. ³³ Shan gaw, Madu e, an a myi hpaw wa ma li ga,ngu mu ai. ³⁴ Shaloi Yesu shan hpe matsan dum nna, shan a myi hpe ahtawk ya mu ai; shaloi jang, shan myi mu wa nna, shi kaw hkan nang ma ai. 

 

Mahte 21

¹ Ya, shanhte gaw Yerusalem de ni wa nna, Tsanlun bum hta htawng ai Bethpage kahtawng de du ma yang Yesu gaw sape lahkawng shangun dat nna, ² Nan a shawng de na kahtawng de shang ma su; shaloi e dun tawn da ai lawze kanu hte de a kasha hpe nan mu na myit dai: dai yan hpe raw nhtawm, ngai hpang de dun wa ma rit. ³ Masha langai ngai nan hpe lama ma tsun a yang gaw, nan mahtang, Dai Madu ndai yan hpe ra ai da, ngu nna htan mu ; shaloi jang, dai yan hpe dat dat na ra ai, ngu nna shan hpe tsun dat mu ai. ⁴ Dai lam chyawm gaw, myihtoi wa a ga dik wa u ga majaw byin wa ai. ⁵ Shi gaw, Ziun shayi sha hpe ning ngu mu : Yu u, na a Hkawhkam wa gaw, Sumnung ai myit rawng nna, lawze a ntsa e, Rai sa, lawze kanu a kasha ntsa e jawn let, nang kaw du ra ai, nga ai. ⁶ Dai sape yan mahtang sa nhtawm, Yesu shan hpe hkang dat mu ai hte maren galaw ma ai rai nna, dai lawze kanu hte kasha hpe dun wa ma ai; ⁷ dai yan a ntsa e shanhte hpun nba mara nna, de a ntsa e shi jawn wu ai. ⁸ Dai masha wunawng na malaw maga na ni, tinang a hpun nba ni hpe dai lam hta e nep ma ai; kaga hte gaw, hpun na lakung lakying kran la nna, dai lam hkan e nep ma ai. ⁹ Shi a shawng e sa wa ai hte, hpang de hkan nang ai masha wunawng ni gaw jahtau ma ai rai nna, Dawi a Kasha kaw, Hawsanna, rai wa u ga; Madu a amying ningsang hte du sa ai wa gaw, a nga ai law : Tasw Htum ai shara e, Hawsanna, rai wa u ga, nga ma ai. ¹⁰ Ya, Yerusalem hta shang bang wa yang, mare ting kabring kabrawng rai wa nna, Ndai wa gaw, kadai rai nga a ta? nga ma ai. ¹¹ Shawa masha ni mahtang, Ndai wa gaw, Galile mung Nazaret mare na, Yesu ngu ai myihtoi wa rai nga ai, nga shajang ma ai. ¹² Dai hpang Yesu gaw naw ku Htingnu de shang nna, dai Htingnu kata e rai dut rai mari ai ni hpe shaden kau mu ai rai nna, gumhpraw byan ya ai ni a ku ni hte, hkrudu dut ai ni a punghkum ni hpe, kanawng kadawng kau ya nhtawm, ¹³ Nye a nta hpe akyu hpyi ai nta ngu na mu ai, nga nna ka da nga ti mung, nanhte gaw dai hpe damya lungpu shatai myit dai, ngu nna shanhte hpe tsun mu ai. ¹⁴ Myi kyaw ai ni hte lagaw hten ai ni gaw, dai Htingnu kata de shi kaw du ma ai rai nna, shi shanhte hpe shamai shatsai wu ai. ¹⁵ Hkinjawng agyi ni hte laika ka ai sara ni chyawm gaw, shi galaw ai mauhpa amu hte, Dawi a Kasha kaw, Hawsanna rai wa u ga, nga nna Htingnu kata hta jahtau ai ma ni hpe mu mu yang, shanhte myit yu kahtet ma ai rai nna, Ndai ni tsun ai ga hpe nang na da nu ni? ngu nna shi hpe san mu ai. ¹⁶ Yesu gaw, Ngai na nga nngai, ma chyangai hte chyu chyu ai ni a n-gup hta mahkawn mangoi ai ga hpe nang shangut da nu ai,nga nna rawng ai ga hpe, nanhte galoi n hti yu myit ni? ngu nna shanhte hpe tsun mu ai. ¹⁷ Shaloi shi shanhte hpe kau da nna, dai mare na pru wa nhtawm, Behtani kahtawng de sadu ai hte dai yang e shana shalai kau wu ai. ¹⁸ Ya, hpang jahpawt e,dai mare de bai wa yang, shi kawsi nga ai. ¹⁹ Shaloi lam makau e tu ai maihpang hpun langai mi mu wu yang, dai de shi sa nna, dai hta e alap sha mu wu ai majaw, shi gaw, Ya kaw nna prat dingsa e, nang hta asi n si n ga, ngu nna tsun ai: maihpang hpun gaw dai ahkring sha e hkraw kyip mat wa ai. ²⁰ Sape ni mahtang dai hpe mu jang, mau mat ma ai rai nna, Dai maihpang hpun gaw kaning rai nme, ahkring sha hkraw kyipmat wa a hka? ngu mu ai. ²¹ Yesu gaw, Nanhte hpe ngai teng teng tsun ma de ga, Nanhte kam sham ai myit rawng nna, kam shut ai hpa mung n lawm yang gaw, ndai maihpang hpun hta byin wa ai hta n-ga,nanhte galaw lu na hte, ndai bum hpe, Nang baw mat nna, nawng hta e htawt bang mat u, ngu nna nanhte tsun mu yang gaw, dai byin na ra ai. ²² Dai hta kaga, kam sham ai myit hte nanhte hpyi mahpyi mahkra hpe, nanhte lu la lu na ma ru ai, ngu nna shanhte hpe htan wu ai. ²³ Bai, shi gaw naw ku Htingnu hta wa shang nna, sharin shaga nga a yang, hkinjawng agyi ni hte mung masha ni a agyi salang ni shi kaw sit sa nna, Nang gaw hpa ahkang hte, ndai hte hpe galaw nga n ta? ndai ahkang nang hpe kadai jaw a ta? ngu mu ai. ²⁴ Yesu gaw, Ngai mung, ga langai mi nanhte hpe san yu ma de ga; de a lam nanhte htan myit yang gaw, hpa ahkang hte ndai hte hpe ngai galaw nga nngai gaw, nanhte hpe tsun dan na ma de ai: ²⁵ Yawhan a baptisma lam gaw gade nna rai a ta? lamu de na, rai ni? shing n rai, masha hta na rai ni? ngu nna shanhte hpe htan wu ai. Shanhte mahtang shada da bawng nna, Lamu de na re ai, anhte ngu gaw yang, Dai rai yang nanhte hpa rai shi hpe n kam myit ta? nga nna shi anhte hpe htan na ra ai: ²⁶ bai, Masha hta na re ai, ngu yang, mung masha ni hpe anhte hkrit shara nga ga ai; kaning rai nme law, Yawhan myihtoi rai nga ai hpe, nlang hte gaw kam nga ma ai, nga shajang ma ai. ²⁷ Dai rai nna shanhte Yesu hpe, Anhte n chye gaw ai, ngu nna htan mu ai. Shi mung, Ndai ni hpe hpa ahkang hte galaw nngai gaw, ngai mung nanhte hpe n tsun dan na nngai, ngu nna shanhte hpe tsun wu ai. ²⁸ Rai ti mung, nanhte kaning ngu myit da myit ta? Masha langai mi shadang sha lahkawng lu ai: kasha alat hpang de shi sa nna. Sha e, dai ni tsabyi sun de bungli sa galaw su, ngu wu yang, ²⁹ shi gaw, Sa na nngai, Madu e, nga ai rai ti mung, n sa mat ai. ³⁰ Bai, kasha shadoi kaw shi sa nna, dai hte maren tsun wu ai. Shi mahtang, Ngai n sa na nngai, nga ai rai ti mung, myit malai bai lu nna sa ai. ³¹ Dai yan hta na kadai wa mahtang kawa a myit hkan shatsup lu a ta? ngu nna san wu ai. Shanhte gaw, Kasha shadoi mahtang rai nga ai, ngu mu ai.Yesu gaw, Ngai nanhte hpe teng teng tsun ma de ai gaw, Kang hta ai ni hte shawa num ni, nanhte a shawng e, Karai Kasang a mungdan hta shang shang rai ma ai. ³² Kaning rai nme law, Yawhan gaw ding hpring ai lam hpe hkan let, nanhte kaw du sai rai ti mung, nanhte shi hpe n kam mu ai; kang hta ai ni hte shawa num ni chyawm gaw, shi hpe kam sham ma ai: nanhte mahtang dai hpe mu myit ti mung, shi hpe kam sham na matu, myit malai bai lu na myit dai n rai. ³³ Ga shadawn kaga hpe naw madat la mu ; Nta madu langai mi tsabyi sun hkai sharam da nna, de a grup yin e nhpan kum da ai hte, dai hta e tsabyi htung htu da nna, langchyi gap da nhtawm, sun galaw ai masha hpe shap ya nna, kaga mung de sa nga mat ai. ³⁴ Ya, asi ngai ai aten du jang, shi a asi sa la mu ga, sun galaw ai ni hpang de, shi a mayam ni hpe shagun dat mu ai. ³⁵ Sun galaw ai ni mahtang shi a mayam ni hpe rim la nna, langai mi hpe anu kayat, langai mi hpe sat kau wu ai hte, langai mi hpe nlung kabai wu ai. ³⁶ Bai, shawng na hta grau law hkra mayam kaga hpe shi shangun dat mu ti mung, shanhte gaw shawng na hte maren dai ni hpe di da mu ai. ³⁷ Dai hpang shi gaw, Ngai sha hpe mahtang shanhte hkungga na ma ai, nga nna shi a kasha hpe shanhte hpang de shangun dat wu ai. ³⁸ Sun galaw ai ni mahtang dai kasha hpe hkap mu jang, Ndai wa gaw, sali wunli dagraw na wa rai nga ai; sa ma rit, shi hpe sat kau ga, shi a sali wunli anhte la kau ya gaw, nga nna shada da dup la ma ai: ³⁹ shing rai shanhte shi hpe rim la nna, sun shinggan de shapraw nhtawm, sat kau mu ai. ⁴⁰ Dai rai nna, sun madu wa bai du wa yang, ndai sun galaw ai ni hpe, kaning di na wu ta? ngu nna san wu ai. ⁴¹ Shanhte gaw, Shi dai nkru ai ni hpe, n hkru ai hku jahten kau na mu ai rai nna, aten ram jang shi hpe asi jaw lu ai masha kaga hpe, dai sun htawt shap ya na ru ai, ngu nna shi hpe htan mu ai. ⁴² Yesu shanhte hpe tsun mu ai gaw, Wahpang gaw ai ni lata kau ai nlung gaw, Ningjut jahtum na nlung tai wa sai: Dai gaw, Madu a majaw byin wa sai rai nna, Anhte a man e mauhpa amu rai nga ai, nga ai ga hpe, dai laika hta nanhte lang mi pyi n hti yu myit ni? ⁴³ Dai rai nna,ngai nanhte hpe tsun ma de ga, Karai Kasang a mungdan gaw, nanhte kaw na shaw lakau nna, de a asi shapraw lu na amyu hpe jaw kau na ru ai. ⁴⁴ ( Dai nlung hta hkrat ai wa gaw, daw hten na ra ai; gade a ntsa e mung dai nlung hkrat bun yang gaw dai wa ayun ayaw mani mat na ra ai ), ngu wu ai. ⁴⁵ Hkinjawng agyi ni hte Hparishe ni chyawm gaw, shi a ga shadawn ni hpe na mu yang, shi shanhte a lam tsun nga ai gaw, shanhte chye na mu ai. ⁴⁶ Shi hpe rim la na shanhte tam ma ti mung, shawa masha ni hpe hkrit da mu ai: kaning rai nme law, shi myihtoi rai nga ai hpe mung masha ni kam da mu ai. 

 

Mahte 22

¹ Bai, Yesu ga shadawn gawng nna, shanhte hpe kahtap tsun mu ai gaw, ² Sumsing lamu a mungdan gaw, kasha a matu hkungran ai poi shachyip ai hkawhkam hte bung nga ai: ³ dai poi de shaga da sai ni hpe bai shaga la na, nga nna shi a mayam ni hpe shangun dat ti mung, shanhte n sa hkraw ma ai. ⁴ Bai mayam kaga hpe shi shangun dat nna, Yu mu, nye a poi gaw jin jin rai sai; nye a usu ni hte kawn da ai yam nga ni hpe sat kau ngut sai; yawng mayawng jin jin rai sai: hkungran ai poi de sa ma rit, ngu nna shaga da sai ni hpe sa tsun mu, ngu dat wu ai. ⁵ Shanhte gaw dai ga hpe hpa n na nawn mu ai rai nna, langai ngai gaw tinang a hkauna de, kaga gaw tinang a rai dut ai de sa mat wa ma ai. ⁶ Naw nga ai ni mahtang gaw,shi a mayam ni hpe rim la nna, aroi arip di nhtawm, sat kau mu ai ⁷ Hkawhkam wa chyawm gaw masin pawt bu nga ai rai nna, shi a luksuk ni hpe shangun dat nhtawm,masha sat ai ni hpe jahten kau mu ai hte shanhte a mare hpe nat kau ya wu ai. ⁸ Dai hpang shi a mayam ni hpe, Nye a hkungran ai poi jin jin rai sai, rai ti mung,shaga da ai ni ging dan nga ma ai n rai: ⁹ dai majaw lam mashe shagu hkan e pru sa nna, mu hkrup ai ni kadai hpe mung, dai hkungran ai poi de sa shaga la ma su,ngu nna tsun wu ai. ¹⁰ Dai rai nna, dai mayam ni gaw nmaw lam de pru sa nna, mu hkrup ai yawng hte hpe, n kaja ai ni rai timung, kaja ai ni rai ti mung, jahpawng tawn la mu ai rai nna, dai poi hta dung nga ai ni hpring chyat rai nga ai. ¹¹ Ya, hkawhkam wa gaw dung nga ai ni hpe kawan yu na, shang wa yang, hkungran ai hpun palawng n bu hpun ai la langai mi hpe,shi mu hkrup wu ai. ¹² Dai rai nna shi gaw, Jinghku wa e, hkungran ai hpun palawng n bu hpun ai mi, nang kaning rai nang e shang lu n ta? ngu wu ai: shi chyawm gaw atsin sha rai nga ai. ¹³ Shaloi dai hkawhkam wa gaw shi a ali ama ni hpe, Shi a lagaw lata hpe gyit hkang nna, shinggan de na nsin de jahkrat bang kau mu, ngu wu ai: dai yang e hkrap ngu hkrap ngoi ai hte wa udik ai rai nga ai. ¹⁴ Kaning rai nme law, shaga la hkrum ai ni law nga ma ti mung, lata la hkrum ai ni mahtang n law ma ai, ngu wu ai. ¹⁵ Dai hpang Hparishe ni pru nna, shi tsun ai ga hta gin di mara shagun lu na lam, bawng da ma ai. ¹⁶ Shaloi shanhte gaw, tinang a sape ni hte Herodi ngu ai ni hpe shi hpang de shangun dat mu ai rai nna, Sara e, nang teng man nga ndai hte, Karai Kasang a lam hpe teng teng sharin shaga nga ndai rai nna, masha a myi man hpe n tau yu ai sha, kadai hpe mung nang n agam nga ndai gaw, anhte chye nga ga ai: ¹⁷ dai rai nna, nang myit ai hku anhte hpe tsun dan mi: Kehta hkawhkam hpe hkansi mai bang nga a ni? n mai bang a ni? ngu mu ai. ¹⁸ Yesu mahtang shanhte a n hkru ai myit hpe hten ya da mu ai rai nna, Sawt ai ni e, nanhte hpa rai ngai hpe chyam yu nga myit ta? dai hkansi dingsen ngai hpe dan yu mi, ngu mu ai. ¹⁹ Shaloi shanhte gumhpraw lap mi, shi kaw la pru ma ai. ²⁰ Dai rai nna shi gaw, Gade a sumla hte masat laika kap nga a ta? ngu nna san mu yang, shanhte gaw, ²¹ Kehta a sumla hte masat rai nga ai, ngu mu ai. Shaloi shi gaw,Dai rai yang gaw, Kehta hte seng ai hpe gaw, Kehta hpe ya mu; Karai Kasang hte seng ai hpe mung, Karai Kasang hpe ya mu, ngu nna shanhte hpe tsun mu ai. ²² Dai ga na la jang, shanhte mau mat ma ai rai nna, shi kaw na pru nhtawm wa mat ma ai. ²³ Ya, bai hkrung rawt wa na lam n nga ai, nga nna tsun ai Saduke ni dai shani e shi hpang de sit sa wa nna, ²⁴ Sara e, masha langai ngai kasha garai n kap ai si mat ti mung shi a kanau gaw karat hpe kahkyin la lu na rai nna, kahpu a matu htinggaw shachyaw u ga, nga nna Mawshe htet da mi ai. ²⁵ Ning re ai yan nau ni marai sanit anhte hte rau nga nga ma ai: shawng na wa gaw hkungran nna si mat sai; matu mara shi n kap nga ai rai nna, kanau wa gaw gaida hpe hta wu ai: ²⁶ dai hte maren, hpang na wa mung, masum ngu na wa mung dai sanit du hkra shi hpe hta da mu ai. ²⁷ Mahkra a hpang jahtum e dai numsha mung si mat wa ai. ²⁸ Dai rai nna bai hkrung rawt ai hta, dai marai sanit hta na, gade a madu jan mahtang shi rai na ra ta? kaning rai nme law, mahkra shi hpe hta ma nu ai, ngu nna san mu ai. ²⁹ Yesu htan let shanhte hpe tsun mu ai gaw, Dai Chyum laika hte Karai Kasang a nsam hpe nanhte n chye da mu ai majaw, nanhte lam dam mat ma nit dai: ³⁰ kaning rai nme law, bai hkrung rawt ai hta e, shanhte gaw, num la num ya ai n rai na ma ai: shanhte gaw sumsing lamu hta e, lamu kasa ni zawn rai nga ma ai. ³¹ Dai hta kaga, Ngai gaw Abraham a Karai Kasang, Isak a Karai Kasang, Yaku a Karai Kasang rai nga nngai, nga nna si ai ni kaw na bai rawt wa ai lam, Karai Kasang nanhte hpe tsun dan ai ga gaw, nanhte n hti yu myit ni? ³² Karai Kasang chyawm gaw, si nga ai ni a Karai kasang rai nga ai n rai, a hkrung nga ai ni a Karai Kasang she rai nga ai, nga ai. ³³ Shawa masha ni dai ga na ma yang, shi a sharin shaga ai lam majaw, mau mat ma ai. ³⁴ Ya, Yesu gaw Saduke ni jasim kau mu ai hpe Hparishe ni na ma yang shanhte mung lang lata sha zup hpawng ma ai rai nna, ³⁵ shanhte hta na tara sara langai mi shi hpe chyam yu nna, ³⁶ Sara e, dai jep ai tara hta na grau kaba nga ai nga nna hkang da ai ga gaw, gara mahtang rai nga a ta? ngu nna san wu ai. ³⁷ Yesu gaw, Dai Madu, na a Karai Kasang hpe, na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na ndai, ³⁸ nga nna hkang da ai ga gaw, grau kaba ai hte shawng na ga mung, rai nga ai. ³⁹ Hpang na ga mung dai hte bung nga nna, Na a htingbu wa hpe, na a hkum hte maren nang tsaw ra lu na ndai, nga nna rawng nga ai. ⁴⁰ Ndai hkang da ai ga lahkawng yan gaw, dai jep ai tara mahkra hte, myihtoi ni a ga madung rai nga ai, ngu wu ai. ⁴¹ Ya Hparishe ni zup hpawng nga ma yang Yesu shanhte hpe, ⁴² Nanhte gaw Hkristu a lam kaning ngu myit nga myit ta? shi gaw gade a Kasha rai nga a ta?ngu nna san wu ai. ⁴³ Shanhte gaw, Dawi a Kasha rai nga ai, ngu mu ai. Bai, shi gaw, Dai rai yang gaw, Dawi mahtang wenyi hta e shi hpe Madu nga nna, kaning rai nga lu a ta? ⁴⁴ Kaning rai nme law, shi gaw, Dai Madu nye a Madu hpe tsun wu ai gaw: Na a gumlau ni hpe, na a lagaw npu e ngai tawn da ai du hkra, Nye a hkra maga de naw a dung nga u, nga nna tsun nga ai. ⁴⁵ Shing nga Dawi gaw shi hpe Madu nga ai rai yang gaw, shi a kasha kaning rai nme rai na rai nga a ta? ngu nna shanhte hpe tsun wu ai. ⁴⁶ Kadai wa mung, ga hkaw mi pyi shi hpe n htan lu mu ai hte, dai shani kaw nna htawm hpang de kadai wa mung shi hpe hpa ga pyi n san wam mu ai. 

 

Mahte 23

¹ Dai shaloi Yesu shawa masha ni hte shi a sape ni hpe tsun wu ai gaw, ² Laika ka ai sara ni hte Hparishe ni gaw Mawshe a tingnyang hta e dung nga ma ai. ³ Dai re ai majaw shanhte a tsun matsun hpe hkan galaw nna shatup nga mu; rai ti mung, shanhte a arawn alai hte maren hkum galaw nga myit: kaning rai nme law, shanhte tsun da nhtawm e, tinang dai n hkan galaw ma ai. ⁴ Li la ai lit hpe shanhte baw la nna, masha ni a lahpa hta e mara da ya nhtawm e shanhte gaw tinang a layung hte sha pyi, dai hpe n shamawt mayu ma ai. ⁵ Shanhte galaw ai amu bungli mahkra hpe, masha ni mu lu mu ga, galaw ma ai: tinang a lakhpoi ni hpe shanhte kaba wa di mu ai hte, tinang a banbyau ni hpe mung myin jahkram mu ai rai nna, ⁶ poi hkan na grau reng ai dung shara ni hte, tara jawng ni hta grau reng ai tingnyang ni, gat hkan e hkungga lara shachyen ai hte, ⁷ masha ni,Rabai e, ngu nna shamying na hpe, shanhte sharawng la ma ai. ⁸ Nanhte mahtang gaw, Rabai, ngu nna shamying na hpe hkum ra myit: nanhte a Sara gaw langai sha rai nga ai rai nna, nanhte yawng kahpu kanau ni rai nga myit dai. ⁹ Nanhte gaw, ga ntsa e kadai hpe mung, Wa e, hkum nga myit: nanhte a Nwa gaw sumsing lamu na Wa hkrai rai nga ai. ¹⁰ Bai, Agyi wa nga nna shamying na hpe hkum ra myit: nanhte a Agyi wa gaw Hkristu ngu ai wa sha rai nga ai. ¹¹ Nanhte hta na grau mayu ai wa gaw, nanhte a ali ama tai u ga. ¹² Kadai rai ti mung tinang hkum hpe shagrau ai wa gaw, grit mat wa na ra ai: tinang hkum hpe shagrit ai wa chyawm gaw, grau wa lu na ra ai. ¹⁴ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw masha ni a man e, sumsing lamu a mungdan lam hpe pat da mu ai: nanhte nan n shang myit dai hte, shang wa ai ni, shang na pyi, n hkraw myit dai. ¹⁵ Hpyi hpun ai laika ka ai sara ni hte Hparishe ni e, nanhte dingnye lumyit dai: sape langai mi shatai la na, nga nna nanhte gaw namukdara hte hkarang lam grup grup kahkrang hkawm myit dai rai ti mung, shi hpe shatai la ngut yang, nanhte hta htam lahkawng grau hkra, ngarai mung na kasha tai shangun mu ai. ¹⁶ Lam madun ai myi kyaw ni e, nanhte dingnye lu myit dai: Kadai rai ti mung, naw ku Htingnu hpe dagam yang hpa n re ai, nga myit ti mung, dai Htingnu a aja hpe dagam ai wa gaw hka kap na rai nga ai, nga nna nanhte tsun nga myit dai. ¹⁷ Mana ai hte myi kyaw ai ni e, dai aja hpe shachyoi shapra ai Htingnu hte dai aja yan gaw, gara mahtang grau kaba ngu a ta? ¹⁸ Bai lam mi gaw, Kadai rai ti mung, dai hkungri hpe dagam yang, hpa n re ai, nga myit ti mung, hkungri ntsa na kumhpa hpe dagam ai wa gaw, hka kap na rai nga ai, nga nna nanhte tsun nga myit dai. ¹⁹ Myi kyaw ai ni e, dai kumhpa hpe shachyoi shapra ai hkungri hte dai kumhpa gaw, gara mahtang grau kaba nga a ta? ²⁰ Dai re ai majaw, dai hkungri hpe dagam ai wa gaw, dai hte de a ntsa na yawng hte hpe dagam nu ai rai nga ai. ²¹ Dai Htingnu hpe dagam ai wa mung, dai hte dai hta e shanu nga ai wa hpe mung dagam nu ai, rai nga ai. ²² Sumsing lamu hpe dagam ai wa mung, Karai Kasang a tingnyang hte dai hta e dung nga ai wa hpe dagam nu ai, rai nga ai. ²³ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw shingtawn pan, pansoi, hpakkyi tum re ai ni hta na, htam shi hta htam mi lahkawn la ninglen, dai jep ai tara hta lawm ai grau akyu rawng ai,ding hpring ai, matsan dum chye ai hte kam sham ai lam hte hpe nanhte lai kau da myit dai: shawng de na hpe mung galaw lu nna, hpang de na hpe mung n lai kau taw gaw, mai nga ai. ²⁴ Lam madun ai myi kyaw ai ni e, nanhte machyi hpe sai kau nhtawm e, gawla-u hpe bai mayu kau myit dai. ²⁵ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw dai gawm hte ngawt hpe shinggan maga de jaseng mu ai mung, kata maga de kashun kashe hte n tara ai hte hpring chyat rai nga ai. ²⁶ Myi kyaw ai Hparishe e, dai gawm hte n-gawt a shinggan maga de seng wa lu n ga, de a kata maga de shawng e jaseng u. ²⁷ Hpyi hpun ai laika ka ai sara ni hte Hparishe ni e, nanhte dingnye lu myit dai: nanhte gaw ahpraw chya ai lup ni hte bung nga myit dai: dai ni gaw shinggan de tsawm dam ti mung,kata de gaw, mang a nra hte nseng ai baw amyu myu hte hpring chyat rai nga ai. ²⁸ Dai hte maren nanhte gaw,shinggan de e masha ni a man e ding man ai ni zawn rai nga myit ti mung, kata de gaw sawt ai hte tara lai ai amu hkrai hpring chyat nga myit dai. ²⁹ Hpyi hpun ai laika ka ai sara ni hte, Hparishe ni e, nanhte dingnye lu myit dai; nanhte gaw myihtoi ni a lup ni hpe gaw da mu ai hte ding hpring ai ni a lup jarawp ni hpe mawn ya nhtawm, ³⁰ Anhte gaw ji woi ni a lakhtak e pra ga taw gaw, myihtoi ni a asai hpe shapraw na, shanhte hta lawm na ga ai n rai, nga nna nanhte tsun myit dai. ³¹ Shing nga ti mung myihtoi ni hpe sat kau ai ni a kashu kasha ni nanhte rai nga myit dai gaw, nanhte nan sakse hkam nga myit dai. ³² Dai rai nna nanhte mung nji nwa ni a hpunda hpe dep hkra di mu law. ³³ Lapu ni e pu htum a amyu e, Ngarai mung a ari hta na, nanhte kaning rai lawt lu na myit ta? ³⁴ Dai rai nna, yu mu, myihtoi ni, hpaji rawng ai ni hte, laika ka ai sara ni hpe, ngai nanhte hpang de shangun dat ma we ai rai nna, shanhte hta na nkau mi hpe nanhte sat kau nna wudang hta jen da na hte,nkau mi hpe nanhte a tara jawng ni hta anu kayat di nna, mare mi hte mare mi de zingri zingrat di na ma ru ai: ³⁵ Shing rai, ding hpring ai wa Abela a asai kaw nna, dai naw ku Htingnu hte tawn hkungri a lapran e nanhte sat kau ai. Barahkia kasha Zakari a asai du hkra, ga ntsa e ru kau ai, ding hpring ai asai yawng mayawng gaw, nanhte a ntsa e galu na ra ai. ³⁶ Ngai nanhte hpe teng teng tsun ma de ai gaw, ndai lam nlang hte gaw, ndai amyu a ntsa e du na ra ai. ³⁷ Yerusalem e, Yerusalem e, myihtoi ni hpe sat kau kau rai nna, nang hpang de shangun dat ai ni hpe nlung hte a kabai sat sat re ai mare e!- u kanu gaw, u hkai ni hpe singkaw npu e jahpawng da ai zawn, na a nshu nsha ni hpe ngai gade lang jahpawng da mayu ti mung nanhte n hkarw nga myit dai. ³⁸ Yu mu, nanhte a nta gaw a katsi katsang kram nga ai. Kaning rai nme law nga yang, ngai nanhte hpe tsun ma de ga, Dai Madu a amying hte du sa ai wa gaw a nga ai law, nga nna nanhte nan n tsun tsun gaw, ya kaw nna nanhte ngai hpe n mu lu na ma nit dai, ngu mu ai. 

 

Mahte 24

¹ Ya, Yesu gaw dai naw ku Htingnu kaw na pru nhtawm hkawm sa wa let, dai naw ku Htingnu na nta ni, shi hpe madun dan na, shi a sape ni sit sa ma ai. ² Shi mahtang shanhte hpe, Ndai yawng hpe nanhte mada mu ai, n rai ni? Ngai nanhte hpe teng teng tsun ma de ga, Dai hpe e n run n hpya ai sha nlung langai mi a ntsa e langai mi muk n mara hkra rai mat na ra ai, ngu nna shanhte hpe tsun wu ai. ³ Shaloi, Tsanlun bum ntsa e dung nga yang, shi a sape ni hkrai shi kaw sit sa nna, Dai hte gaw galoi ai me byin wa na ra ta? nang bai du na hte mungkan ga a htum wa na kumla gaw, hpa kumla rai na ra ta? anhte hpe tsun dan mi, ngu mu ai. ⁴ Yesu gaw, Kadai mung, nanhte hpe n hkalem lu myit ga, sadi nga mu. ⁵ Kaning rai nme law, masha law law wa nye a amying hte paw pru nna, Ngai gaw Hkristu rai nga nngai, nga nna law law hpe lam shadam kau na ma ru ai. ⁶ Hpyen gasat ai hte majan law wa na shi ga nanhte na lu na ma ru ai; rai ti mung, nanhte myit n ru myit ga, sadi dung nga mu: kaning rai nme law, dai re ai ni gaw, byin lu na raai rai ti mung, dai jahtum ai gaw garai n rai nga ai. ⁷ Bai amyu mi hte amyu mi,mung mi hte mung mi shada da gumlau hkat na ma ra ai: hku hku ai hte nnang nawn,shara kaga kaga hta e byin wa na ra ai: ⁸ dai yawng chyawm gaw, kyin dut ngu ai a npawt nhpang rai nga ai. ⁹ Dai ban e, shanhte gaw ru tsang ai de nanhte hpe ap ya nna, sat kau na ma rin dai; nye amying a majaw amyu baw shagu nanhte hpe n dawng n wawm na myit dai. ¹⁰ Dai shaloi e, masha law law myit kataw wa nna, shada da ap kau ai hte, shada da n dawng n wawm na ma ra ai. ¹¹ Masu ai myihtoi law law mung paw pru nna, law law hpe lam shadam na mu ai. ¹² Tara tawt lai ai amu law wa na majaw, masha law law a tsaw ra ai myit kawp mat na ra ai: ¹³ rai ti mung, jahtum du hkra shakut sharang ai wa gaw, hkye hkrang la ai hkrum na ra ai. ¹⁴ Dai mungdan a kabu gara shi ga gaw, masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai. ¹⁵ Dai rai nna, myihtoi Daniela tsun dan ai jahten shabya ai a matsat shabat gaw,dai chyoi pra ai shara e jung nga ai hpe nanhte mu myit yang gaw, laika hti nga ai wa gaw, myit yu nga u ga; - ¹⁶ dai shaloi e Yuda mung hta e nga ai ni gaw, bum lang de hprawng mu ga; ¹⁷ nta ntsa e nga ai wa gaw shi a nta na arai hpe shang la na, hkum yu wa u ga; ¹⁸ hkauna pa e nga ai wa mung, shi a hpun nba wa la na, hkum nhtang wa u ga. ¹⁹ Dai nhtoi hte hta na-um nasin re ai ni hte chyu chyu ai ma chyangai lu ai ni gaw, nachying yak na ma ra ai. ²⁰ Dai rai nna, nanhte a hprawng na gaw, kashung ta hte laban nhtoi hta e n byin wa u ga, akyu hpyi nga mu: ²¹ kaning rai nme law, mungkan ga nnan lat kaw nna ya du hkra n byin yu ai hte hpang de mung n byin lu na ru tsang kaba gaw, dai shaloi e byin pru na ra ai. ²² Dai nhtoi ni hpe n shagying kau yang gaw, gade a hkum shan mung n lawt lu na ra ai; rai ti mung, lata la ai ni a matu mara, dai nhtoi ni gaw gying wa na ra ai. ²³ Dai shaloi e masha langai ngai, Yu mu, nang e, shing n rai, ndai yang e Hkristu nga nga ai, nga nna nanhte hpe tsun myit yang gaw, nanhte hkum kam myit. ²⁴ Kaning rai nme law, masu ai Hkristu hte rai ti mung, masu ai myihtoi hte rai ti mung paw pru nna, lata la sai ni hpe pyi shadam lu yang, shadam kau lu hkra lamik kumla hte mauhpa amu kaba madun dan na ra ai. ²⁵ Yu mu, ngai nanhte hpe tsun hkap da ni ai. ²⁶ Dai rai nna shanhte gaw, Yu mu, nam mali hkan e shi rai nga ai, nga nna tsun ma ti mung, nanhte hkum sa pru myit; bai, gawk kata hkan e shi rai nga ai, nga ma ti mung, hkum kam myit. ²⁷ Kaning rai nme law, myihprap gaw sinpraw maga de gala nna, sinna maga du hkra htoi pru ai hte maren, dai Masha Kasha a bai du ai gaw rai na ra ai. ²⁸ Mang taw ai shara hkan e, lang da ni mung hpawng nga na ma ra ai. ²⁹ Bai, dai nhtoi ni a ru tsang ai hpang jang jan gaw nip mat wa nna, shata mung n htoi mat na ra ai; shagan ni mung, lamu de na di hkrat mat nna, sumsing lamu a atsam ni gaw gari wa na ma ra ai. ³⁰ Dai shaloi e Masha Kasha a kumla gaw,sumsing lamu hta e dan pru na ra ai; shaloi jang ga ningtsa na amyu baw shagu ni sharung shayawt let dai Masha Kasha gaw daru magam hte hpung shingkang kaba hte nawng lamu a sumwi hta du sa ai hpe, mu lu na ma ra ai. ³¹ Shi a lamu kasa ni hpe, pahtau kaba hte shi shangun dat nna, shanhte gaw nbung mali maga na, lamu htum ai de nna lamu htum ai du hkra, shi a lata la sai ni hpe jahpawng la na ma ru ai. ³² Shing rai dai maihpang hpun a ga shadawn hpe matsing da mu: de a lakung lakying ni majawm wa nna, lap prut wa ai shaloi, nlum ta ni wa ra ai hpe nanhte chye nga myit dai. ³³ Dai hte maren nanhte gaw, dai byin wa ai lam yawng hte hpe mu myit dai shaloi, Shi gaw chyinghka lam makau de ni wa ra ai hpe, nanhte chye na nga mu. ³⁴ Nanhte hpe ngai teng teng tsun ma de ai gaw, Ya pra nga ai ndai amyu masha ni garai n lai mat ma yang, dai lam yawng mayawng hte byin mat na ra ai. ³⁵ Sumsing lamu hte ginding aga lai mat wa ti mung, nye a ga gaw n lai mat na li ai. ³⁶ Rai ti mung, dai shani hte ahkying hpe chyawm gaw kadai mung n chye lu ai: lamu kasa ni hte Kasha pyi, dai hpe n chye lu ai. Wa hkrai sha dai hpe chye lu ai. ³⁷ Bai, Noa a ban e rai nga ai hte maren, Masha Kasha a bai sa du ai hta e, rai wa na ra ai. ³⁸ Kaning rai nme law, dai sha-u garai n ing yang na masha ni gaw Noa shanghpaw li kata de shang wa ai nhtoi du hkra, lu lu sha sha, num la num ya rai nga ma ai rai nna, dai sha-u ing wa ai hte nlang hte hpe magawn mat wa ai du hkra, ³⁹ shanhte n dum shami nga nga ma ai hte maren, dai Masha Kasha a bai sa du ai hta mung rai wa na ra ai. ⁴⁰ Dai shaloi e marai lahkawng hkauna pa hta e rau nga ma ai rai nna, langai mi gaw woi la ai hkrum ai hte langai mi gaw hti nga mat lu na ra ai: ⁴¹ numsha lahkawng htumrin hta rau rin nga ma ai rai nna, langai mi gaw woi la ai hkrum nna, langai mi gaw, hti nga mat lu na ra ai. ⁴² Dai rai nna, nanhte a Madu gaw gara shani e du wa na hpe nanhte n chye myit dai majaw, a maja nga mu. ⁴³ Rai ti mung nta madu gaw, lagut sa na ahkying ladaw hpe chye lu taw gaw, shi a nta hpe n tawk waw u ga, shi a maja nga na ra ai nanhte dum mu. ⁴⁴ Dai rai nna nanhte mung chyip chyip rai nga mu: kaning rai nme law, nanhte n dum n mi re ai ahkying hta e, dai Masha Kasha du wa na ra ai. ⁴⁵ Dai hta kaga, dai Madu gaw shi a nta masha ni a ntsa e san tawn da nna, aten du jang shanhte hpe lusha karan jaw lu na, sadi ai hte myit su ai mayam gaw, kadai wa rai nga a ta? ⁴⁶ Shi a madu bai du yu yang, shing rai a galaw nga hkrup ai mayam gaw, a nga ai. ⁴⁷ Nanhte hpe ngai teng teng tsun ma de ga, Dai madu gaw shi a arai mahkra a ntsa e, shi hpe san tawn da na wu ai. ⁴⁸ Dai n shawp ai mayam chyawm gaw, Nye a Madu gaw wa na naw na la nga ai, nga nna shi a kraw kata e a tsun nga ai hte, ⁴⁹ shi a manang mayam ni hpe anu ajin di nhtawm chyaru nang ai ni hte rau lu rau sha, rai nga yang, ⁵⁰ dai mayam a madu gaw, shi n yu n mada ai nhtoi hte, n na n chye ai ahkying hta e, bai du wa na ra ai rai nna, ⁵¹ shi hpe katawng daw kau nhtawm, shi a daw hpe hpyi hpun ai ni hte rau tawn da na ru ai: dai yang e hkrap ngu hkrap ngoi ai hte wa udik ai rai na ra ai. 

 

Mahte 25

¹ Dai shaloi e sumsing lamu a mungdan gaw, tinang a pyengdin lang nna, la nnan hpe hkap bawp la na pru sa wa ai mahkawn shi hte bung na ra ai. ² Shanhte hta na manga gaw myit n su ma ai; manga mahtang gaw, myit su nga ma ai. ³ Kaning rai nme law, myit n su ai ni shanhte a pyengdin lang ma yang tinang a matu sau n lang ma ai: ⁴ myit su ai ni mahtang, tinang a pyengdin hte rau, tau ni hta, sau mung lang nga ma ai. ⁵ Ya la nnan gaw naw la nga ai majaw, shanhte nlang yup shamawi rai nna yup pyaw nga ma ai. ⁶ Yup tung hpawa e chyawm gaw, Yu mu, la nnan wa du ra ai! shi hpe hkap bawp la na pru mu, nga nna garu nga ai. ⁷ Shaloi jang dai mahkawn ni nlang rawt nna, tinang a pyengdin hpe lajang ma ai. ⁸ Myit n su ai ni mahtang, Anhte a pyengdin si mat wa ai majaw, nanhte a sau hta na karan jaw mi, ngu nna myit su ai ni hpe hpyi mu ai. ⁹ Myit su ai ni mahtang htan nna, Anhte hte nanhte a matu n law dam nhten: dut ai ni kaw sa nna, nanhte a matu mari la na grau mai ai, ngu mu ai. ¹⁰ Shanhte mari la na sa wa ai laman e, la nnan sa du wa ai hte, chyip chyip rai nga ai ni gaw, hkungran ai poi de shi hte rau shang lu ma ai rai nna, dai chyinghka la nga la ai. ¹¹ Dai hpang mahkawn kaga ni mung du nna, Madu e, Madu e, anhte hpe hpaw la mi, ngu nna hpyi mu ai. ¹² Shi mahtang htan nna, Nanhte hpe ngai teng teng tsun ma de ga, ngai nanhte hpe n chye ma de ai, ngu wu ai. ¹³ Dai rai nna, dai shani rai ti mung, dai ahkying rai ti mung, nanhte n chye myit dai majaw, a maja nga mu. ¹⁴ Ga shadawn gaw, lang mi na masha langai mi bu hkawm na maw ai rai nna, mayam ni hpe shaga la nhtawm, shi a arai ni shanhte hpe ap ya da mu ai: ¹⁵ langai mi hpe gumhpraw joi manga, langai mi hpe lahkawng, langai mi hpe joi mi di nna, langai hte langai hpe tinang a atsam hte maren ap ya da nhtawm e, hkawm sa mat wa ai. ¹⁶ Shaloi jang gumhpraw joi manga lu la ai wa gaw pru sa nna, dai hte hpaga ga wu yang, kaga gumhpraw joi manga myat la nu ai. ¹⁷ Lahkawng lu la ai wa mung dai hte maren ga nna, lahkawng myat la nu ai. ¹⁸ Joi mi arang ai wa mahtang pru sa nhtawm, nhkun htu nna, shi a madu a gunhpraw hpe lup da wu ai. ¹⁹ Ya tawng marang na wa jang, dai mayam ni a madu bai wa nna, shanhte hpe ga jahpan la mu ai. ²⁰ Gumhpraw joi manga arang ai wa gaw, kaga joi manga lang let, sa du nna, Madu e, gumhpraw joi manga nang ngai hpe arang shapraw ya da ndai; yu u, kaga joi manga ngai myat la lu nngai, ngu wu ai. ²¹ Dai rai nna shi a madu, Ara, kaja ai hte sadi dung ai mayam e: arai loi sha hta nang kangka rai nit dai; arai law law a ntsa e ngai nang hpe san tawn da na de ai: na madu a kabu gara ai hta shang lawm u, ngu nna shi hpe tsun wu ai. ²² Gumhpraw joi lahkawng lu ai wa mung sa du nna,Madu e, joi lahkawng nang ngai hpe ap da ndai; yu u, kaga joi lahkawng ngai myat la lu nngai, ngu wu ai. ²³ Dai rai nna shi a madu gaw, Ara, kaja ai hte sadi dung ai mayam e: arai loi sha hta nang kangka rai nit dai: arai law law a ntsa e ngai nang hpe san tawn da na de ai: na a madu a kabu gara ai hta nang shang law mu, ngu nna shi hpe tsun wu ai. ²⁴ Joi mi arang ai wa chyawm gaw sa du nna, Madu e, maji la ai wa nang rai nga ndai hte, nang n gat ai shara na nang dan la nna, nang n ayai ai shara na nang magawn la ndai hpe ngai chye nga nngai: ²⁵ dai rai nna hkrit ai hte ngai sa nna, na a gumhpraw hpe ga hta e lup da se ai: yu u, na a arai naw nga nga lit dai, ngu wu ai. ²⁶ Shi a madu gaw, N hkru ai hte lagawn ai mayam e: n gat ai shara na ngai dan la ai hte, n ayai ai shara na ngai magawn la ai hpe nang chye nga ndai: ²⁷ dai majaw nye a gumhpraw hpe boi ai shara hta nang tawn da lu na rai ndai; ngai bai wa yang she, nye a arang hte atu hpe bai la lu na we ai. ²⁸ Dai rai nna shi a gumhpraw joi hpe la kau nna, joi shi lu ai wa hpe jaw mu: ²⁹ lu ai wa kadai hpe mung, naw jaw nna shi law htam wa na ra ai : n lu ai wa kaw na chyawm gaw, shi lu malu hpe pyi naw shaw la na ru ai. ³⁰ Dai n hkaw ai mayam hpe gaw shinggan na nsin sin ai de shaden kau mu: dai shara e hkrap ngu hkrap ngoi ai hte wa udik ai rai na ra ai, ngu nna jeyang nu ai. ³¹ Dai Masha Kasha gaw shi a hpung shingkang dan hkung let, lamu kasa ni nlang hte rau sa du ai shaloi, shi a hpung shingkang a tingnyang ntsa e shi dung nna, ³² amyu baw shagu hpe shi a man e jahpawng tawn da nhtawm, sagu rem wa gaw sagu ni hte bainam ni hpe karan ginhka da ai zawn, shanhte hpe karan ginhka da nna, ³³ sagu ni hpe hkra maga de bainam ni hpe pai maga de tawn da na ma ru ai. ³⁴ Shaloi e dai Hkawhkam wa gaw shi a hkra maga de nga ai ni hpe Nye a Wa kaw na shaman ya lu la ai ni e, sa ma rit; ginding aga nnan lat kaw nna nanhte a matu lajang tawn da ai mungdan ngu ai sali wunli hpe hkam la mu: ³⁵ kaning rai nme law, ngai kawsi jang nanhte ngai hpe sha na jaw myit dai: ngai hpang gara jang,nanhte ngai hpe lu na jaw myit dai: ngai manam tai hkawm yang, nanhte ngai hpe daw myit dai: ³⁶ singgu krin rai jang, nanhte ngai hpe jahpun myit dai: machyi hkrum jang, nanhte ngai hpe yu lajang myit dai: htawng rawng nga yang, nanhte ngai hpe kawan yu myit dai, ngu na mu ai. ³⁷ Shaloi ding hpring ai ni gaw,Madu e, nang kawsi ai hpe anhte galoi mu nna, galaw jaw ga ta? hpang gara ai hpe anhte galoi mu nna, lu na jaw ga ta? ³⁸ Nang manam tai hkawm ai hpe anhte galoi mu nna, daw ga ta? singgu krin rai nga ai hpe anhte galoi mu nna, jahpun ga ta? ³⁹ Nang machyi hkrum ai hte htawng rawng nga ai hpe, anhte galoi mu nna, nang hpe kawan yu ga ta? ngu nna shi hpe htan na ma ai. ⁴⁰ Dai rai nna hkawhkam wa gaw, Nanhte hpe ngai teng teng tsun ma de ga, Ndai ngai nau ni hta na kaji htum ai wa hpe nanhte galaw ai gaw, nanhte ngai hpe galaw ma nit dai, rai nga ai, ngu nna shanhte hpe htan na mu ai. ⁴¹ Bai, pai maga de nga ai ni hpe, Dagam dala hkrum ai ni e, ngai hte hka wa nna nat gumlau hte shi a salung sala ni a matu lajang da ai n htum n mat ai wan de shang wa mu: ⁴² kaning rai nme law, ngai kawsi yang, nanhte ngai hpe sha na n jaw myit dai; hpang gara yang, nanhte ngai hpe la na n jaw myit dai: ⁴³ ngai manam tai hkawm yang, nanhte ngai hpe n daw myit dai; singgu krin rai jang, nanhte ngai hpe n jahpun myit dai: machyi hkrum ai hte htawng rawng nga yang, nanhte ngai hpe n yu lajang myit dai, ngu na mu ai. ⁴⁴ Shaloi shanhte mung, Madu e, nang kawsi ai, hpang gara ai, manam tai hkawm ai,singgu krin re ai, machyi hkrum ai hte htawng e nga ai hpe, anhte galoi mu nna,nang hpe n galaw daw ga ta? ngu nna htan na mu ai. ⁴⁵ Dai rai nna, Ngai nanhte hpe teng teng tsun ma de ga, Ndai ni hta na kaji htum ai wa hpe nanhte n galaw myit dai majaw, ngai hpe n galaw myit dai rai nga ai, ngu nna shanhte hpe htan na mu ai. ⁴⁶ Shaloi shanhte gaw n htum n wai ari de shang wa na ma ra ai; ding hpring ai ni mahtang n htum n wai asak de shang lu na ma ra ai, ngu wu ai. 

 

Mahte 26

¹ Ya Yesu dai ga yawng mayawng hte hpe tsun ngut jang, shi a sape ni hpe shi kahtap tsun wu ai gaw. ² Ni ni lai jang dai Shalai wa ai poi du na ra ai,nanhte chye nga myit dai rai nna, Masha Kasha hpe wudang hta e jen da na matu, ap kau ai hkrum na ra ai, ngu wu ai. ³ Dai shaloi e hkinjawng agyi ni hte mung masha ni a salang ni gaw, Kayapa ngu ai hkinjawng agyi a nta npan e zup hpawng ma ai rai nna, ⁴ Yesu hpe hkalem rim la lu na hte sat kau lu na lam, bawng nga ma ai: ⁵ rai ti mung, Mung masha ni n kabrawng wa mu ga, poi a laman e n rai u ga, nga nna shanhte hkan da ma ai. ⁶ Ya Yesu gaw Behtani kahtawng na, manggang kap ai Simun a nta e rai nga ai shaloi, ⁷ nachying hpu ai mura rawng ai lunghpraw gawm lang ai numsha langai mi, shi shat sha na hkrawn taw nga yang, shi hpang de sa nna shi a baw hta e ru bun wu ai. ⁸ Sape ni dai hpe mu jang, myit yu kahtet wa nna, Ndai hpe hpa rai nme lahpawt lama di kau wu ta? ⁹ Dai hpe manu kaba hte dut la nna, matsan mayan ni hpe karan jaw lu na wu ai, nga ma ai. ¹⁰ Yesu mahtang dai chye nna, Dai numsha hpe nanhte hpa rai nme shatsang nga myit ta? Shi gaw, ngai hta kaja ai hku galaw nu ai: ¹¹ matsan mayang ni nanhte hte rau tut tut a nga nga ma ti mung, ngai chyawm gaw nanhte hte tut tut nga nga lu na n rai. ¹² Ndai mura hpe nye a hkum hta shi ru bun ai gaw, ngai hpe lup makoi na matu lajang da ai rai nga ai. ¹³ Nanhte hpe ngai teng teng tsun ma de ai gaw, Ndai kabu gara shi ga hpe mungkan ga ting shara shagu hkan e hkaw dan nga yang, ndai numsha a masat dingsat tai na matu, shi galaw ai amu ngu nna hkai dan na ma ru ai, ngu nna shanhte hpe tsun mu ai. ¹⁴ Dai shaloi, sape shi lahkawng hta lawm ai, Yuda Iskarut ngu ai wa langai mi,hkinjawng agyi ni kaw pru sa nna, ¹⁵ Ngai nanhte a lata hta e shi hpe ap ya jang, ngai hpe gade jaw na myit ta? ngu wu ai. Dai rai nna shanhte gaw gumhpraw lap sumshi, shi e shen ya mu ai. ¹⁶ Dai kaw nna shi hpe ap ya na mai ang ai ginwan shi tam nga ai. ¹⁷ Ya dai Azuma poi nnan shani e, sape ni gaw Yesu hpang de sit sa nna,Dai Shalai wa ai poi hpe sha na, gara shara hta e na a matu shachyip na, nang tsaw nga n ta? ngu mu ai. ¹⁸ Shi gaw, Dai mare hta na wa langai mi kaw sa nna, Sara tsun dat mi ai gaw, Nye a ahkying ni wa sai: na a nta e nye a sape ni hte rau,dai Shalai wa ai poi hpe ngai sha na nngai, ngu nna shi hpe tsun mu, ngu dat wu ai. ¹⁹ Shaloi sape ni gaw, Yesu hkang dat mu ai hte maren galaw nna, dai Shalai wa ai poi hpe shachyip da mu ai. ²⁰ Ya nrim rim rai jang, dai sape shi lahkawng hte rau shi hkrawn taw nga ai rai nna, ²¹ shanhte shat sha nga ma yang shi gaw, Ndai nanhte hpe teng teng tsun ma de ga, Nanhte hta na langai mi ngai hpe ap kau na ring ngai, ngu wu ai. ²² Shanhte mahtang nachying myit yawn nna, langai hte langai, Madu e, ngai rai na n ni? nga nna shi hpe tsun mu ai. ²³ Shi gaw htan let, Dai hka wan hta ngai hte rau lata manaw ai wa gaw, ngai hpe ap kau na ring ngai: ²⁴ ka da nga ai hte maren, dai Masha Kasha gaw sa wa na ra ai; rai ti mung, dai Masha Kasha hpe ap kau ai wa gaw dingnye lu na ra ai! dai masha n shangai taw gaw, shi a matu grau kaja nga ai, ngu wu ai. ²⁵ Shiloi shi hpe ap kau na Yuda mung htan nna, Rabai e, ngai rai nga n ni? ngu nna san yang, Yesu gaw, Nang tsun ai hte maren rai nga ai, ngu nna shi hpe tsun wu ai. ²⁶ Ya shanhte shat sha nga ma yang, Yesu gaw muk la shaman ya nna ahkyep alep di nhtawm, sape ni hpe jaw let, La sha mu; dai gaw nye a hkum rai nga li ai, ngu wu ai. ²⁷ Bai, gawm hpe mung shi la nna, shakawn kungdawn ngut jang shanhte hpe, Nanhte yawng dai hta na lu mu; ²⁸ dai gaw, yubak hpe raw dat kau myit ga, law law a matu ru kau ya ai, dai ga shaka hte seng ai, nye a asai rai nga li ai: ²⁹ nanhte hpe ngai tsun ma de ai gaw, Nye Wa a mungdan hta e, nanhte hte rau tsabyi nnan hpe ngai lu lu na nhtoi du hkra, ndai tsabyi ru a asi hta na ngai bai lu lu na n rai, ngu nna shanhte hpe gam jaw mu ai. ³⁰ Dai hpang mahkawn mangoi ngut jang, shanhte gaw Tsanlun bum de pru sa wa ma ai. ³¹ Shaloi e Yesu shanhte hpe tsun mu ai gaw, Ndai shana e, nanhte nlang nye a lam myit kataw na ma rin dai; kaning rai nme law, Dai sagu rem ai wa hpe ngai anu sat nna, sagu hpung na sagu ni gaw, bra mat na ma ra ai, nga nna ka da nga ai: ³² rai ti mung, ngai bai hkrung sharawt ai hkrum ai hpang e, Galile mung de, nanhte a shawng e ngai sa wa magang na nngai, ngu mu ai. ³³ Shaloi Petru htan nna, Nlang hte gaw na a lam myit kataw mat ma ti mung, ngai chyawm gaw galoi kataw lu na n rai, ngu nna shi hpe tsun wu ai. ³⁴ Yesu mahtang, Nang hpe ngai teng teng tsun de ga, dai na u garai n goi yang, nang ngai hpe masum lang nyet kau na rin dai, ngu nna shi hpe tsun wu ai. ³⁵ Petru gaw, Nang hte rau ngai si ti mung, nang hpe n nyet kau lu na nngai, ngu nna shi hpe htan wu ai.Sape ni nlang dai hte maren tsun nang ma ai. ³⁶ Dai hpang Yesu gaw shanhte hte rau, Getsemane ngu ai shara de du ai rai nna,sape ni hpe, Ngai akyu hpyi na wora de sa nga yang, nang e naw dung nga ma la, ngu wu ai. ³⁷ Shaloi Petru hte Zebedi a kasha yan hpe shi shaga woi nhtawm,yawn hkyen hkrum nna, myit ru myit tsang grai rai nga ai. ³⁸ Dai rai nna, shi shanhte hpe, Nye a myit masin si hkra yawn hkyen kaba hkrum nga li ai: ngai hte rau a maja nga na nang e naw nga nga mu, ngu mu ai. ³⁹ Shaloi dai yang na shi loi mi lai sa nhtawm, ga de myi man gum dagup let akyu hpyi nna, Wa e, ndai gawm hpe ngai kaw na shalai kau lu yang gaw, shalai kau ya e; rai ti mung, nye a myit n rai, na a myit she rai u ga, ngu nna tsun wu ai. ⁴⁰ Bai, sape ni kaw shi nhtang wa nna, shanhte yup pyaw nga ma ai hpe mu mu ai; dai rai nna Petru hpe,Ataw, hkying mi sha muk ngai hte rau n maja nga lu myit ni? ⁴¹ agung alau ai kaw n du myit ga, maja nga ai hte akyu hpyi nga mu: wenyi gaw let nga ai, hkum shan mahtang n-gun kya nga ai, ngu mu ai. ⁴² Lang mi bai bat nna, Wa e ngai dai hpe n lu ai sha, ngai kaw na n shalai kau lu yang gaw, na a myit dik lit ga law, ngu nna akyu hpyi nga ai. ⁴³ Bai nhtang wa yang shanhte a myi yup sha- mawi ai majaw, shanhte yup pyaw nga ma ai hpe wa mu mu ai. ⁴⁴ Bai shi shanhte hpe kau da nhtawm, shawng na ga hte maren masum lang ningdaw hpyi wu ai. ⁴⁵ Dai hpang sape ni kaw shi bai nhtang wa nna, Nanhte gaw naw yup pyaw nga nna asan apan rai nga myit hka! yu mu, dai ahkying ni wa magang nga ai rai nna, dai Masha Kasha gaw yubak kap ai ni a lata hta e, ap kau ai hkrum na ra ai. ⁴⁶ Rawt mu, anhte sa wa sa ga: yu mu, ngai hpe ap kau na wa gaw ni wa ra ai, ngu nna shanhte hpe tsun mu ai. ⁴⁷ Shi ga naw tsun nga yang, yu mu, sape shi lahkawng hta lawm ai Yuda gaw sa wa nna, hkinjawng agyi ni hte, mung masha ni a salang ni kaw na pru ai, nhtu hte dawhkrawng lang ai shawa hpawng kaba, shi gaw hkan nang nga ma ai. ⁴⁸ Shi hpe ap kau na wa chyawm gaw, Ngai pup ai wa gaw, dai wa rai nga ai: shi hpe rim la mu, ngu nna shanhte hpe kumla jaw da ma nu ai: ⁴⁹ Shaloi shi Yesu kaw hkre rai sa nna,Rabai e, a nga n ga, ngu nna shi hpe pup wu ai. ⁵⁰ Yesu mahtang, Jinghku wa e,nang sa ang ai amu hpe di u, ngu nna hkap tsun wu ai. Shaloi shanhte gaw Yesu hpe lata hte gang rim la mu ai. ⁵¹ Dai rai nna, Yesu hte rau nga ai ni hta na marai langai mi shi a nhtu shaw nhtawm, hkinjawng agyi a mayam hpe kahtam nna, shi a na di mat lu ai. ⁵² Shaloi Yesu gaw, Na a nhtu hpe de a shara e bang da u; nhtu hpe shaw ai ni yawng mayawng hte gaw, nhtu hte hten bya hkrum na ma ra ai: ⁵³ nye Wa hpe hpyi na ahkang ngai lu nna, shi gaw ya e pyi lamu kasa dap shi lahkawng n-ga, ngai hpang de shangun lu na, nang n nawn nga n ni? ⁵⁴ Shing rai yang, ndai lam byin wa lu na ra ai, nga nna laika tsun ai ga gaw, kaning rai dik wa lu na a ta? ngu nna shi hpe tsun wu ai. ⁵⁵ Dai ahkying hta e, Yesu gaw shawa masha ni hpe, Damya hpe rim la ai zawn, ngai hpe rim la na, nanhte nhtu dawhkrawng hte rai pru sa wa ma rin ni? Sharin shaga nga let naw ku Htingnu hta e, ngai shani shagu dung nga ti mung, nanhte ngai hpe n rim la ma nit dai: ⁵⁶ ndai lam yawng hte chyawm gaw, myihtoi ni a laika ni dik wa mu ga majaw byin wa sai, ngu mu ai. Shaloi jang, sape ni nlang shi hpe kau da nna hprawng mat wa ma ai. ⁵⁷ Yesu hpe rim la ai ni gaw, laika ka ai sara ni hte salang ni zup hpawng nga ai shara e, hkinjawng agyi Kayapa hpang de, shi hpe woi shang mu ai. ⁵⁸ Petru chyawm gaw, hkinjawng agyi a wing du hkra shi a hpang e tsan tsan e hkan nang nna,dai hta e shang nhtawm, dai amu htum na hpe yu yu na, ali ama ni hte rau dung nga ai. ⁵⁹ Shaloi hkinjawng agyi ni hte, salang hpawng ting gaw, Yesu hpe sat kau lu hkra, shi a lam masu ai sakse tam nga nna, masu ai sakse hkam na ni law law wa dawng pru ma ti mung, shanhte mara n mu mu ai. ⁶⁰ Hpang jahtum e marai lahkawng pru sa nna, ⁶¹ Ndai wa gaw, Karai Kasang a naw ku Htingnu hpe ngai run kau nna, masum ya na laman e dai hpe bai de lu na we ai, nga nna shi tsun sai, ngu mu ai. ⁶² Shaloi hkinjawng agyi wa gan rawt nna, Nang hkaw mi muk n htan nga n ni? shanhte na a lam kaning re ai sakse hkam lu nga ma hka? ngu nna shi hpe tsun wu ai. ⁶³ Yesu mahtang atsin sha nga nga ai. Bai, hkinjawng agyi wa gaw, Karai Kasang a Kasha, ngu ai Hkristu gaw, nang rai nga ndai kun, anhte hpe tsun dan n ga, ngu nna a hkrung nga ai Karai Kasang hta ngai nang hpe dagam da de ai, ngu nna shi hpe tsun wu ai. ⁶⁴ Yesu gaw, Nang tsun ai hte maren rai nga ai: dai hta n-ga ngai nanhte hpe tsun ma de ga, Dai Masha Kasha gaw, Daru Magam a hkra maga e dung nga nna lamu na sumwi ni hta sa du ai hpe nanhte mu na ma rin dai, ngu nna shi hpe tsun wu ai. ⁶⁵ Shaloi hkinjawng agyi wa gaw,shi a hpun palawng gang je kau nna, Shi gaw shatan nhkan ga tsun nu ai anhte hpa sakse mi naw ra nga ga ta? yu mu, nanhte nan dai shatan nhkan ga hpe na ma nu ai: ⁶⁶ nanhte hpa nawn da mu ta? ngu mu ai. Shanhte htan let, Shi gaw si ging ai wa rai nga ai, nga ma ai. ⁶⁷ Shaloi shanhte gaw shi a myi man hpe mayen mahtaw bun ai hte shi hpe htwi mu ai: ⁶⁸ nkau mi shi hpe kahpret nna, Hkristu e nang hpe bye ai kadai rai nga a ta? myihtoi ga hte tsun dan mi, nga ma ai. ⁶⁹ Petru chyawm gaw dai wing kata de dung nga ai: shaloi nchyang numsha langai mi shi kaw sa nna, Nang mung Galile masha Yesu hte rau nga ga ndai, ngu wu ai. ⁷⁰ Shi mahtang mahkra a man e nyet kau nna, Nang tsun ai ga ngai n chye nngai, ngu wu ai. ⁷¹ Bai nta jan de pru wa yang, num kaga shi hpe mu nna, dai yang na ni hpe, Ndai wa mung Nazaret na Yesu hte rau rai nga ai, ngu mu ai. ⁷² Bai, matsa mawa let, shi nyet kau nna, Dai wa hpe ngai n chye nngai, ngu wu ai. ⁷³ Dai hpang gade n na yang, dai yang e tsap nga ai ni gaw sit sa wa nna, Gaja wa nang mung, shanhte hta lawm nga ndai: na a ga mung nang hpe shadan da ndai, ngu nna Petru hpe tsun mu ai. ⁷⁴ Dai rai nna, shi dagam nna matsa mawa ga hte, Dai wa hpe ngai n chye nngai, ngu mu ai: shaloi jang, u goi sai. ⁷⁵ Dai rai nna, Petru gaw,U garai n goi yang, nang ngai hpe masum lang nyet kau na rin dai, nga nna Yesu tsun ai ga hpe dum dat wu ai: shaloi shi gaw shinggan de pru nna ja ja hkrap nga ai. 

 

Mahte 27

¹ Jahpawt du jang, hkinjawng agyi ni hte, mung masha ni a salang ni nlang hte gaw, Yesu hpe sat kau na lam bawng hkut nga ma sai: ² dai rai nna, shanhte shi hpe gyit nhtawm, Pilat munggyi hpang de sa ap kau mu ai. ³ Ya shi hpe ap kau ai Yuda gaw, Yesu daw dan hkrum ai hpe mu chye jang shi myit malai lu nna, gumhpraw lap sumshi hpe hkinjawng agyi ni hte salang ni hpang de bai la sa nna, Ngai ding man ai asai hpe ap kau we ai majaw, yubak kap ni ai, ngu mu ai. ⁴ Shanhte gaw, Dai anhte hte hpa seng nga a ta? nang hkrum yu u ngu mu ai. ⁵ Shaloi dai gumhpraw hpe, naw ku Htingnu hta e shi kabai tawn da nna, pru mat wa nhtawm, shi dai nan dau si mat ai. ⁶ Hkinjawng agyi ni chyawm gaw, dai gumhpraw hpe la nna, Dai gaw asai jahpu rai nga ai majaw, alu sut dek hta e bang tawn da na htung n nga ai, nga ma ai. ⁷ Shanhte bawng hkut la nhtawm, di bu sama a ga dachyawk hpe, dai hte mari la nna, tsasam masha ni a matu lup wa shatai mu ai. ⁸ Dai majaw ya du hkra Sai ga dachyawk, ngu nna dai ga hpe tsun shalai da mu ai. ⁹ Shaloi nna, Dai Madu ngai hpe hkang da ai hte maren, Israela kashu kasha ni nkau mi, manu tawng sai wa a jahpu ngu na gumhpraw lap sumshi hpe shanhte sawn la nna, ¹⁰ di bu sama a ga dachyawk amatu ya kau mu ai, nga nna myihtoi Yeremia tsun ai ga dik ang wa sai. ¹¹ Ya, Yesu gaw dai munggyi a man e tsap nga ai: munggyi mung, Nang Yuda ni a hkawhkam rai nga n ni? ngu nna shi hpe san wu ai: Yesu gaw, Nang tsun ai hte maren rai nga nngai, ngu wu ai. ¹² Rai ti mung, hkinjawng agyi ni hte salang ni shi hpe mara shagun yang, shi hpa mung n htan wu ai. ¹³ Shaloi Pilat gaw, Shanhte gade wa na a lam sakse hkam ma ai hpe nang n na n ni? ngu nna shi hpe tsun wu ni. ¹⁴ Shi mahtang ga hkaw mi muk n htan wu ai: dai rai nna, munggyi gaw ja ja wa a mau nga ai. ¹⁵ Dai poi hta e, shawa masha ni ra ai hku hkan nna,bawng dung ai masha langai ngai hpe shanhte a matu dat ya na, munggyi a ahtung rai ga ai. ¹⁶ Dai shaloi e Baraba ngu ai, kajai gumhkawng ai bawng dung ai wa langai mi nga nga ai. ¹⁷ Dai rai nna shanhte zup hpawng nga ma yang, Pilat gaw, Nanhte a matu dat ya na, kadai mahtang hpe tsaw myit ta? Baraba hpe rai myit ni? shing n rai, Hkristu ngu ai Yesu hpe rai myit ni? ngu nna shanhte hpe san mu ai: ¹⁸ Kaning rai nme law, manawn masham majaw, shanhte shi hpe ap kau mu ai hpe, shi chye nga ai ¹⁹ Ya, dai tara tingnyang hta e shi naw dung nga yang, shi a madu jan shi kaw shangun nna, Dai ding hpring ai wa hpe hpa mung hkum di u; dai ni pyi, yup mang hta e shi a majaw, ngai nni nkri law law wa hkrum nngai, ngu nna htet dat wu ai. ²⁰ Hkinjawng agyi ni hte salang ni chyawm gaw, Baraba hpe hpyi nna, Yesu hpe sat kau na, ngu nna shawa masha ni hpe shadut mu ai. ²¹ Shaloi munggyi gaw shanhte hpe htan nna, Ndai yan hta na, nanhte a matu dat ya na, gara mahtang hpe nanhte tsaw myit ta? ngu mu ai. Shanhte gaw,Baraba hpe tsaw ga ai, ngu nna htan mu ai. ²² Bai Pilat gaw, Dai rai yang gaw, Hkristu ngu ai Yesu hpe ngai kaning di na we ta? ngu nna shanhte hpe tsun mu ai. Shanhte nlang, Wudang hta jen da u ga, ngu mu ai. ²³ Bai shi gaw, Shing rai taw gaw, shi n hkru ai, hpa wa galaw hkrup sa ta? ngu mu ai. Shanhte chyawm gaw, Wudang hta jen da u ga, nga nna grau jahtau bu ma ai. ²⁴ Pilat mahtang gaw, hpa hku mung n dang lu ai hte kabrawng kabrang byin wa ai hpe mu mu yang, ntsin la nna, shawa masha ni a man e lata hpe kashin let, Ndai wa a asai hta na ngai lawt nga n ga: nanhte nan myit yu nga mu, ngu wu ai. ²⁵ Dai rai nna dai masha nlang hte gaw, Shi a asai anhte a ntsa e mung,anhte a shu sha ni a ntsa e mung mara nga ma li ga, nga nna htan ma ai. ²⁶ Shaloi jang, shi Baraba hpe shanhte e dat ya mu ai: Yesu hpe mahtang shi kayat nna, wudang hta jen da ai hkrum u ga, ap kau dat wu ai. ²⁷ Shaloi, dai munggyi a hpyen ma ni gaw, Yesu hpe htingnu nhku de woi wa nna, dai hpyen dap na nlang hte hpe, shi a man e jahpawng tawn mu ai. ²⁸ Shanhte shi a hpun palawng raw kau nna, ahkyeng nsan ai nba lawai ya mu ai: ²⁹ Ju kagup mung shanhte hkri la nhtawm, shi a baw hta shagup ya mu ai rai nna, shi a hkra lata e kumba yan mi jum shangun nna, shi a man e lahput hput di let, shi hpe asawng nna, Yuda ni a hkawhkam e, nang a lu nit ga law! ngu mu ai; ³⁰ bai,shi hpe mayen mahtaw bun nhtawm, dai kumba yan hpe shanhte la nna, shi a baw hpe kayat ya mu ai. ³¹ Shi hpe asawng asang di ngut jang, dai nba hpe shanhte raw kau nna, shi a hpun palawng hpe jahpun nhtawm, wudang hta e jen da na, shapraw sa wa mu ai. ³² Shanhte pru sa wa ma yang, Simun mying ai Kureni masha langai mi hpe shanhte mu hkrup nna, Yesu a wudang hpai ya u ga, shi hpe shadip mu ai. ³³ Ya, Golgohta ngu ai, Pungkum mying ai shara de du jang, hka ai tsi hte hpaw ai tsabyi jahku lu u ga, shanhte shi hpe jaw mu ti mung, ³⁴ dai hpe chyim yu nhtawm, shi n kam lu wu ai. ³⁵ Shi hpe wudang hta e jen da ngut jang, shanhte hpaida da ai hte shi a hpun palawng hpe jawm karan la mu ai: ³⁶ dai yang e mung shanhte dung nga nna shi hpe sin da mu ai. ³⁷ Shi a baw ntsa e Ndai wa gaw, Yuda ni a khawhkam, Yesu rai nga ai, ngu nna shi a mara madun ai laika hpe shanhte ka shakap da mu ai. ³⁸ Shaloi e, shi hte rau damya lahkawng hpe, hkra maga de langai mi, pai maga de langai mi, wudang hta e jen da mu ai. ³⁹ Lam e lai sa wa ai ni mung, shi hpe shatan nhkan di nna, tinang a baw hpe kanga let, ⁴⁰ Naw ku Htingnu hpe run kau nna, masum ya na laman e bai de lu na nga ai wa e,na a hkum hpe nan hkye la u: nang Karai Kasang a Kasha rai n yang gaw, wudang hta na yu hkrat wa u, ngu mu ai. ⁴¹ Hkinjawng agyi ni, laika ka ai sara ni hte salang ni mung, dai hte maren shi hte asawng asang di nna, ⁴² Masha kaga hpe shi hkye la ga ai: tinang hkum hpe nan n hkye la lu a hka.Shi gaw Israela hkaw hkam rai nga ai; ya wudang hta na yu wa u ga, shaloi anhte shi hpe kam sham na ga ai. ⁴³ Shi gaw Karai Kasang hta hpa nga ai; shi hta awng nga yang gaw, ya shi hpe mawai la u ga: kaning rai nme law, Ngai gaw Karai Kasang a Kasha rai nga nngai, shi nga ai, nga ma ai. ⁴⁴ Shi hte rau wudang hta jen da hkrum ai damya yan mung dai hte maren shi hpe aroi arip di mu ai. ⁴⁵ Ya, ahkying kru kaw nna, ahkying jahku du hkra, mung ting hta e nsin chyip rai mat ai. ⁴⁶ Ahkying jahku e daram Yesu gaw nsen kaba hte, Elo-i, Elo-i lema sabakhtani? nga nna jahtau wu ai: dai gaw, Nye a Karai Wa e, nye a Karai Wa e, hpa rai nang ngai hpe kau da nga n ta? nga ai,rai lu ai. ⁴⁷ Dai makau e tsap nga ai ni nkau mi dai hpe na mu yang, shi Elia hpe shaga nga ai, nga ma ai. ⁴⁸ Shaloi jang shanhte hta na marai langai mi gat sa nna, hka kamu la nhtawm, ntsin hkri jahpring nna, dai hpe kumba yan hta shakap nhtawm, shi hpe hkyen jaw wu ai. ⁴⁹ Kaga ni mahtang, Nga nga nu ga; Elia shi hpe sa hkye la na ru ai kun,anhte yu yu ga, ngu mu ai. ( Bai, kaga wa langai mi, ri hte shi a garep e galun ya wu ai rai nna, ntsin hte asai pru wa ai. ) ⁵⁰ Bai Yesu gaw nsen kaba wa hte jahtau let, shi a wenyi jahti mat lu ai. ⁵¹ Shaloi, yu mu,naw ku Htingnu na nba grang ntsa de nna hkren, kaang brang ga mat ai; ginding aga mung ashun awam wa nna, lunghkrung ni ga mat wa ma ai; ⁵² lup ni mung hpaw mahka wa nna, dai hta e yup nga ai chyoi pra ai ni a hkum tsawp law law wa rawt wa nna, ⁵³ shi bai hkrung rawt wa ai hpang lup ni hta na pru wa shajang nhtawm, dai chyoi pra ai mare de shang wa nna, masha law law hte hpe tinang nang a hkum shadan dan mu ai. ⁵⁴ Ya hpyen latsa up ai bu hte shi hte rau Yesu hpe sin nga ai ni, dai nnang nawn hte byin mabyin ni hpe mu mu yang shanhte hkrit kahpra nna, Gaja wa, ndai wa gaw Karai Kasang a Kasha nan rai nga ai,nga ma ai. ⁵⁵ Galile mung na Yesu kaw hkan nang wa ai hte shi hpe galaw daw ai numsha law law mung, dai shara e nga ma ai rai nna, tsan tsan yang nna a yu nga ma ai: ⁵⁶ dai hte hta Magdala Mari, Yaku hte Yosep a kanu Mari, Zebedi a kasha yan nu ni, nang nga ma ai. ⁵⁷ Ya, shana du yang, Aramahti a mare na, Yosep mying ai sut su ai wa langai mi sa du ai; shi hkum nan Yesu a sape rai nga ai. ⁵⁸ Dai wa gaw Pilat hpang de shang nna, Yesu a hkum tsawp hpe hpyi wu ai, Shaloi dai hpe ya dat na ahkang jaw da wu ai. ⁵⁹ Dai rai nna, dai hkum tsawp hpe Yosep la nhtawm, lachyit sumpan hte kayawp ahkyen nna, ⁶⁰ nlung hta krawk ai, shi a lup nnan hta e bang tawn da wu ai: nlung kaba mung, dai lup a mahka e shi galau pat da nna, wa mat ai. ⁶¹ Dai yang e Magdala Mari yan kaga Mari nga nga nna, dai lup tawtap e dung nga ma ai. ⁶² Dai shachyip ai nhtoi lai ai hpang shani e, hkinjawng agyi ni hte Hparishe ni Pilat hpang de sa zup hpawng nna, ⁶³ Madu e, ndai hkalem ai wa gaw naw hkrung nga yang, Masun ya nhtoi hta e, ngai bai hkrung rawt wa na nngai, nga nna shi tsun ai hpe anhte dum sa gaw ai. ⁶⁴ Dai majaw shi a sape ni shi hpe sa lagu la nhtawm, Si mat ai ni kaw na bai hkrung rawt wa sai, nga nna shawa masha nihpe n tsun lu hkra, masum ya nhtoi ting dai lup hpe sin nga mu ga, hkang da u: shing n rai, shawng na shut ai lam hta, hpang na mahtang gaw grau yak wa na ra ai,ngu mu ai. ⁶⁵ Pilat mahtang, Nanhte sin langa lu myit dai; sa wa ma sit: nanhte rai lu ai hte maren, malawm magawm di mu,ngu nna shanhte hpe tsun dat mu ai. ⁶⁶ Dai rai nna shanhte sa wa nna dai nlung hpe dazik dawk ai hte lup hpe malawm magawm di mu ai rai nna, sin langa ni mung shanhte hte rau rai nga ma ai. 

 

Mahte 28

¹ Ya dai laban nhtoi lai magang wa nna, bat mi a shawng shani nhtoi hprim hpram rai wa jang, Magdala Mari hte kaga Mari yan gaw, dai lup hpe yu yu na kawan sa ma ai. ² Shaloi, yu mu, nnang nawn kaba nawn wa ai: kaning rai nme law,dai Madu a lamu kasa langai mi, lamu de na yu hkrat wa nna dai nlung hpe sa galau kau nhtawm, dai hta e dung nga ai. ³ Shi a ahpraw asam myihprap zawn rai nga nna, shi a hpun palawng hkyen zawn hpraw nga lu ai. ⁴ Shi hpe hkrit kajawng ai majaw, sin ai ni gari kawa rai nna, si ai masha zawn htan mat ma ai. ⁵ Dai lamu kasa mahtang, numsha yan hpe tsun mu ai gaw, Nan hkum hkrit myit; wudang hta jen da sai Yesu hpe, nan tam nga myit dai hpe ngai chye nga nngai: ⁶ shi nang e nga ai n rai; shi tsun dan sai hte maren bai hkrung rawt wa sai: sa ma rit; shi taw nga sai shara hpe sa yu ma ru. ⁷ Bai, alawan pru wa nhtawm, Si ai ni kaw na shi bai hkrung rawt wa sai, ngu nna shi a sape ni hpe tsun dan mu: yu mu, nanhte a shawng e, Galile mung de shi sa wa na ra ai; dai yang e nanhte shi hte hkrum na ma rin dai: yu mu, ngai nan hpe tsun dan ma de ai, ngu mu ai. ⁸ Shaloi shan gaw hkrit kahpra ai hte kabu gara ai myit kaba hte dai lup de na alawan wa nhtawm, shi a sape ni hpe shana ya na, gat wa ma ai. ⁹ Shaloi, yu mu, Yesu shan hpe tau la nna, Ngwi pyaw nga myit ga, ngu mu ai: shan gaw shi a lagaw hpe sa ginshum let shi hpe naw ku ma ai. ¹⁰ Bai Yesu gaw, Hkum hkrit myit; Galile mungde wa jahkrum mu ga, nye a hpu nau ni hpe sa tsun dan mu; dai yang e, ngai hte hkrum na ma ra ai, ngu mu ai. ¹¹ Ya shan sa wa nga ma yang, yu mu, sin langa ni hta na nkau mi, mare de shang nna, dai byin mahbyin nlang hte hpe hkinjawng agyi ni hpe shana ya mu ai. ¹² Shaloi shanhte salang ni hte zup hpawng nna bawng hkut ngut yang, shanhte gaw hpyen ma ni hpe gumhpraw law law wa jaw nhtawm, ¹³ Shana aten e, anhte yup nga yang, shi a sape ni shi hpe sa lagu la kau mu ai, nanhte ngu mu. ¹⁴ Munggyi gaw dai lam hpe na la dam yang, nanhte ru tsang n hkrum myit ga, anhte shi hpe shalen na gaw ai, ngu dat mu ai. ¹⁵ Shing rai shanhte dai gumhpraw hpe la nna, sharin dat ai hte maren di da mu ai: dai rai nna, ga dai gaw, Yuda masha ni hta, dai ni du hkra kajai gara pri rai wa sai. ¹⁶ Dai sape shi langai chyawm gaw, Yesu shanhte hpe hkang da ai Galile mung na bum de, lung mat wa ma ai. ¹⁷ Shi hpe mu mu yang, shanhte naw ku ma ai; nkau mi mahtang kam shut nga ma ai. ¹⁸ Shing rai Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte, ngai hpe ap ya ni ai. ¹⁹ Dai majaw nanhte pru sa nna, masha amyu baw shagu hpe sape shatai let, Kawa a, Kasha a, chyoi pra ai Wenyi a amying nsang hta, shanhte hpe baptisma jaw nhtawm, ²⁰ ngai nanhte hpe hkang da mada yawng hte hpe hkan shadik lu mu ga, shanhte hpe sharin shaga ya mu: dai hta kaga, yu mu, lamu ga aprat htum hkra, ngai nanhte hte rau dinggrin a nga nga na nngai law, ngu nna shanhte hpe matsun dat mu ai.