KORINHTU NI KAW SHAGUN DAT AI LAIKA LAHKAWNG

2 Korinhtu 1

¹ Karai Kasang myit ra ai hte maren, Hkristu Yesu a kasa, ngai Pawlu hte, hpu nau Timohti gaw, Korinhtu mare na Karai Kasang a Hpung hte Ahkaia mung ting na chyoi pra ai ni nlang hte hpe, ga shana dat ga ai. ² Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e a nga nga ma lit ga law. ³ Matsan dum chye ai Kawa hte, shangwi shapyaw na lam amyu myu a Karai Kasang, anhte a Madu Yesu Hkristu a Karai Kasang hte Kawa gaw, a nga u ga law. ⁴ Karai Kasang kaw na anhte hkum nan lu la sa gaw ai shangwi shapyaw ai lam tau yu yang, dai shangwi shapyaw ai a marang e, tsin-yam tsindam amyu myu hkrum ai ni hpe shangwi shapyaw lu hkra, anhte a tsin-yam tsindam amyu myu hta shi anhte hpe shangwi shapyaw mi ai. ⁵ Shing rai, Hkristu a nni nkri anhte hta e law htam wa ai hte maren, Hkristu a jaw e mung, anhte a shangwi shapyaw na lam, law htam wa nga ai. ⁶ Dai rai nna, anhte tsin-yam tsindam hkrum yang, nanhte a shangwi shapyaw na lam hte hkye hkrang la na lam a majaw, hkrum ga ai: shangwi shapyaw ai hkrum yang, anhte nan hkam ai nni nkri amyu hta, shakut sharang ai shachyen chye ai nanhte a shangwi shapyaw na lam a majaw sha hkrum ga ai rai nna, nanhte a matu mara anhte a myit mada ai lam ngang grin grin rai nga ai: ⁷ dai nni nkri hta nanhte lawm nga myit dai hte maren, dai shangwi shapyaw na lam hta mung lawm nang myit dai, anhte chye nga ga ai. ⁸ Kaning rai nme law, hpu nau ni e, Asi mung e anhte hkrum sa gaw ai tsin-yam tsindam a lam, nanhte n chye ai nga na, an n ra ga ai; anhte a asak lawt na n nawn lu hkra, anhte n dang lu ai nhtum nni li ai lit e anhte hpe dip kamyet ma ni ai: ⁹ dai hta n-ga, anhte gaw tinang dai n shamyet ai sha, si mat ai ni hpe hkrung sharawt ya ai Karai Kasang hpe sha shamyet shanat nga u ga, anhte nan tinang hkum hta si na daw dan gun sa ga ai. ¹⁰ Shi gaw ning san ai si lam hta na anhte hpe mawai la ma ni ai rai nna, naw mawai la na mi ai; shi anhte hpe naw mawai la na, anhte shi hpe myit mada nga ga ai rai nna, law law ni a myi man a marang e anhte lu la ai chyeju a majaw, ¹¹ law law wa anhte a lam shakawn kungdawn lu mu ga, nanhte mung shingdep shingtau let anhte a matu mara akyu hpyi ya mi. ¹² Kaning rai nme law, Karai Kasang a chyoi pra nna san seng ai myit hte, dinghta hpaji n lawm ai sha, Karai Kasang a chyeju hte, mungkan ga e anhte htinglet nga nna, nanhte hte rau grau nna dai zawn rai nga ga ai hpe, anhte a myit masin a sakse hkam ai lam ngu ai gaw, anhte a gumrawng shara rai nga ai. ¹³ Nanhte hti yu nna chye lu ma nit dai lam hta kaga, anhte nanhte kaw ka dat ga ai n re ai sha, anhte a Madu Yesu Hkristu a nhtoi e nanhte gaw, ¹⁴ anhte a gumrawng shara tai wa ai hte maren, anhte mung nanhte a gumrawng shara tai wa na rai nna, anhte a lam nanhte kau chyen mi chye na nga ai zawn, hpang chyahtum du hkra chye nga na myit dai, ngu nna ngai myit mada nga nngai. ¹⁵ Ya, ning rai myit mu nga yang, nanhte gaw lahkawng lang na chyeju lu la myit ga she, nanhte hpang de shawng sa du nna, ¹⁶ nanhte a makau hku hprang let Makedoni mung de sa nhtawm, Makedoni kaw na nanhte hpang de bai wa nna, nanhte ngai hpe Yuda mung de hkan sa dat mi ga, ngai myit da nga nngai. ¹⁷ Ya, shing rai ngai myit da nga yang, ngai gaja wa nhting nhtang re ai myit madun nngai kun? Bai, nye a ga gaw, Rai sa, rai sa, nga ai gaw, N rai, n rai, tai wa u ga, ngu nna ngai myit da ai gaw, dinghta myit hku hkan nna myit da nngai kun? ¹⁸ Gaja wa, Karai Kasang teng nga ai hte maren, anhte a ga gaw nanhte kaw, Rai sa, n rai sa, ngu ai n rai. ¹⁹ Kaning rai nme law, ngai hte Silwanu yan Timohti gaw, nanhte hpe hkaw dan yu sai Karai Kasang a Kasha Hkristu Yesu gaw, Rai sa, n rai sa, ngu ai mi n nga ai sha, shi hta e, Rai sa, ngu ai sha tai wa ai. ²⁰ Karai Kasang a ndat ga gade law nga rai ti mung, shi hta e, Rai sa, hkrai rai nga ai; dai rai nna, anhte a lata e Karai Kasang a hpung shingkang pru u ga, shi a jaw e, Amen, ngu ai mung rai nga ai. ²¹ Nanhte hte rau anhte hpe Hkristu hta e shagrin da nna, anhte hpe namman chya ya ai wa gaw, Karai Kasang hkrai rai nga ai: ²² shi gaw anhte hpe dazik shakap da nna, anhte a kraw lawang e Wenyi ngu ai masat dingsat jaw da ma ni ai. ²³ Nanhte hpe matsam dum na majaw sha, ngai Korinhtu mare de rai n sa du ai gaw, nye a myit masin hta sakse tai na, Karai Kasang hpe ngai shaga nngai. ²⁴ Ning nga tsun ai gaw, nanhte a kam sham ai hpe anhte madu nga ai n re ai sha, nanhte a kabu gara ai hta shingdep shingtau ai ni anhte rai nga ga ai; kaning rai nme law, kam sham ai hta nanhte grin grin tsap nga myit dai. 

2 Korinhtu 2

¹ Rai ti mung, ngai gaw myit yawn ai hte nanhte hpang de bai n sa na, ngu nna ngai nan myit da se ai. ² Kaning rai nme law, ngai nanhte hpe shayawn ma de yang gaw, shing rai ngai shayawn ai wa hta kaga, ngai hpe kadai kabu shangun lu na kun? ³ Dai hta kaga, nye a kabu gara ai lam gaw, nanhte nlang hte a kabu gara ai lam rai nga ai, ngu nna nanhte nlang hte hpe ngai myit kam nngai majaw, ngai sa du ai shaloi e ngai hpe kabu gara mai shangun ai ni gaw myit yawn shara n shabyin u ga she, shawng na laika nan ngai ka dat ma de ai. ⁴ Kaning rai nme law, tsin-yam tsindam, myit ru myit yak law law hte, myi prawi law law pru let ngai nanhte hpe ka dat ma de ai; nanhte hpe myit yawn shangun na n re ai sha, ngai nanhte hpe nachying naw tsaw ra nga ai hpe nanhte chye lu myit ga, ngai ka dat ma de ai. ⁵ Bai, marai langai ngai yawn shangun ai teng a yang gaw, ( nau wa n daru mayu nngai ) ngai hpe n re ai sha, nanhte nlang hpe zawn shayawn nga ai. ⁶ Nanhte hta na malaw maga dai wa hpe shing rai daru sharin ai gaw, shi a matu ram nga ai rai nna, ⁷ nachying sung ai yawn hkyen ai hta n lup mat u ga, shi hpe mara dat nna bai shangwi shapyaw nga mu. ⁸ Dai rai nna tsaw ra ai gaw shi a matu bai shagrin u ga, ngai nanhte hpe shadum ma de ai. ⁹ Dai re ai majaw mung nanhte lam shagu hta madat mara nga ai kun chye lu n ga, ka dat ai laika hte ngai nanhte hpe chyam yu ma de ai. ¹⁰ Kadai wa a mara nanhte raw dat myit yang gaw, ngai mung raw dat nngai: kaning rai nme law, ngai lama ma raw dat ni yang gaw, Satan gaw anhte hpe n dang kau u ga, nanhte a majaw, Hkristu a man e, ngai raw dat nngai; ¹¹ Satan a myit mang ai hku chyawm gaw anhte n chye ya gaw ai n rai. ¹² Dai hta kaga, Hkristu a kabu gara shi ga a lam, Troa mare de ngai sa du yang, dai Madu a marang e nye a matu chyinghka hpaw malang nga ti mung, ¹³ ngai nau Titu hte n hkrum lu ai majaw, nye a Wenyi hta ngai n ngwi n pyaw rai nga nngai rai nna, shanhte hpe shakram ngut jang, Makedoni mung de sa wa nngai. ¹⁴ Rai ti mung, anhte hpe Hkristu hta tut nawng e padang manau hta nlaw shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw, a nga u ga law. ¹⁵ Kaning rai nme law, anhte gaw hkye hkrang la hkrum ai ni hta mung, sum mat hkrum ai ni hta mung, Karai Kasang a man e Hkristu hta ngwi pyaw bat rai nga ga ai: ¹⁶ sum mat hkrum ai ni hta si na matu si hkrung si htan bat, gale hta asak lu na matu asak kaw na bat, anhte rai nga ga ai. ¹⁷ Ndai bungli shachyen na kadai wa ging ram nga a ta? Kaning rai nme law, Karai Kasang a mungga hpe pau chye ai masha law law ni zawn anhte n rai nga ai sha, san seng ai myit hte mung, Karai Kasang kaw nna mung, Karai Kasang a man e anhte Hkristu hta tsun nga ga ai. 

 

2 Korinhtu 3

¹ Anhte gaw tinang a hkum marai hpe bai dan hpang ga ai kun? dai hta n-ga, masha nkau mi zawn nanhte hpang de, shing n rai nanhte kaw na tinang marai dan ai laika anhte ra ga ai kun? ² Anhte a kraw lawang e ka da nna, masha yawng mayawng chye chyang lu ai hte hti yu lu ai anhte a laika nan, nanhte rai nga myit dai: ³ tsi hte n re ai sha, hkrung nga ai Karai Kasang a Wenyi hte, bai, lung pa hta mung n re ai sha, hkum shan a kraw lawang e ka da nga ai, anhte a lata hte lajang da ai Hkristu a laika nan nanhte rai nga myit dai gaw, dan dan leng leng rai nga ai. ⁴ Ning rai myit kam ai gaw, anhte Hkristu a marang e Karai Kasang a man e lu ga ai. ⁵ Rai ti mung, anhte gaw tinang atsam machyu nna me, anhte nan hpa hpaji daw lu ga ai n rai; anhte a ging ram ai tsam gaw Karai Kasang kaw nna rai nga ai; ⁶ ningnan ga shaka sara tai na shi anhte hpe shaging sharam ma ni ai; dai ga shaka gaw, laika hkum hta na n re ai sha, Wenyi hta na rai nga ai: kaning rai nme law, laika hkum gaw sat kau chye ai, Wenyi chyawm gaw jahkrung ya lu ai. ⁷ Dai rai nna, hkoi mat chye ai Mawshe a myi man a hpung shingkang majaw, Israela masha ni shi a myi man hpe n azi yu lu hkra, laika hkum hte lung pa hta tawk ka da ai, si hkrung si htan daw ai aya gaw, hpung shingkang hte dan pru nga ai rai yang gaw, ⁸ Wenyi hta na daw ai aya gaw, hpung shingkang hta grau nna tai na, n rai ni? ⁹ Kaning rai nme law, daw dan chye ai daw ai aya gaw hpung shingkang rawng ai rai yang gaw, ding hpring shangun ai daw ai aya gaw hpung shingkang hta grau nna law htam wa na ra ai. ¹⁰ Dai rai nna, chyahtum chyalai re ai hpung shingkang rawng ai aya a majaw, shawng na hpung shingkang rawng ai lam gaw, ning re ai hpung shingkang shapraw dan lu ai n rai. ¹¹ Kaning rai nme law, hkoi mat chye ai aya gaw hpung shingkang rawng a yang gaw, a grin nga ai aya gaw grau nna hpung shingkang rawng na ra ai. ¹² Ning re ai myit mada ai lam lu ga ai majaw, anhte grai wa nden ja ai myit madun ga ai rai nna. ¹³ hkoi mat chye ai aya jahtum hpe Israela masha ni n azi yu lu u ga, Mawshe gaw shi a myi man hpe man magap htinggrum ai zawn, anhte n galaw ga ai. ¹⁴ Shanhte a myit mang ai hku chyawm gaw shaja kau ai hkrum ma ai; kaning rai nme law, dai ni nan di hkra, dai ga shaka dingsa hti yang, myi na man magap gaw a htinggrum nga ai rai nna, dai gaw Hkristu e kun di kau nu ai hpe, shanhte kaw shapraw shadan ma nu ai n rai: ¹⁵ dai ni du hkra, galoi mung Mawshe a ga hti yang, man magap gaw shanhte a kraw lawang e a htinggrum nga ma lu ai. ¹⁶ Rai ti mung, dai Madu hpang de galoi kayin a yang gaw, dai man magap shaloi jang kun di kau ya na ru ai. ¹⁷ Dai Madu chyawm gaw dai Wenyi rai nga ai rai nna, dai Madu a Wenyi nga ai shara hkan e tanglawt mung rai nga ai. ¹⁸ Anhte nlang hte chyawm gaw myi man a man magap kun di kau nna, dai Madu a hpung shingkang hpe jamna hta mada yu let, dai Madu ngu ai Wenyi a marang e, hpung shingkang htap mi hte htap mi lu la ai hte, shing re ai hkrang bung sumla hte nan galai mat mat rai nga ga ai. 

 

2 Korinhtu 4

¹ Dai rai nna, chyeju lu la sa gaw ai hte maren, ndai ahkang aya gun hpai lu ga ai majaw, anhte n hki n sang ga ai: ² makoi magap re ai kaya kahpa hpe anhte rap di kau sa gaw ai hte, hkalem hkalau ai mung n hkan nna, Karai Kasang a mungga hpe gale galau n di ai sha, dai teng man ai lam shapraw shadan let, Karai Kasang a man e, masha yawng mayawng a myit masin kaw, anhte hkum a tsam marai anhte dan nga ga ai. ³ Anhte a kabu gara shi ga n dawng n dan nga a yang gaw, sum mat hkrum ai ni hta she n dawng n dan nga ma lu ai; ⁴ Karai Kasang a hkrang bung sumla ngu ai, Hkristu a hpung shingkang rawng ai kabu gara shi ga a nhtoi gaw, n kam n sham ai ni hta n htoi tu u ga she, ndai mungkan ga na Hpara gaw, shanhte a myit mang ai hku shakyaw shamak kau ya ma nu ai. ⁵ Kaning rai nme law, anhte gaw tinang a lam hkaw dan ga ai n re ai sha, Madu Hkristu Yesu a lam hpe mung, anhte nan Yesu a jaw e nanhte a mayam ni rai nga ga ai lam hpe mung, hkaw dan nga ga ai. ⁶ Nsin hta na nhtoi htoi na ra ai, nga nna tsun ai Karai Kasang gaw, Hkristu a myi man kaw na Karai kasang a hpung shingkang a chye chyang ai ngtoi hpe shapraw ya lu u ga she, anhte a kraw lawang e jahtoi ya ma ni ai. ⁷ Rai ti mung, dai chyahtum chyalai re ai n-gun atsam gaw nanhte kaw na n re ai sha, Karai Kasang kaw na pru nga u ga she, ndai sut gan gaw, ga di bu hta sha anhte rawng da gaw ai. ⁸ Anhte lam shagu hta tsin-yam tsindam hkrum ga ai rai ti mung, ginwan n lu ga ai n rai; myit ru myit tsang hkrum ga ai rai ti mung, myit htum ga ai n ra; ⁹ zunri zingrat hkrum ga ai rai ti mung, dam jahka kau ai hkrum ga ai n rai; ari gumpye kau ai hkrum ga ai rai ti mung, daw hten aai hkrum ga ai n rai. ¹⁰ Yesu a hkrung ai asak gaw anhte a hkum hkrang hta dan pru lu u ga, Yesu a si wa ai lam hpe anhte hkum hkrang hta tut nawng e dagraw hkawm nga ga ai. ¹¹ Kaning rai nme laww, Yesu a asak hkrung ai gaw anhte a si chye ai hkum shan hta dan pru lu n ga, anhte naw hkrung nga ai ni gaw, Yesu a jaw e tut tut si ai de ap kau ai hkrum nga ga ai. ¹² Dai rai nna, anhte hta e si hkrung si htan, nanhte hta e chyawm gaw asak hkrung ai gaw, a shachyen nga ai. ¹³ Kam sham nngai majaw ngai tsun nga nngai, nga nna ka da nga ai hte maren, dai kam ssham ai Wenyi nan anhte rawng nga ga ai majaw, anhte mung kam sham nga ga ai raai nna a tsun nga ga ai; ¹⁴ ddai Madu Yesu hpe sharawt ya ai wa gaw, Yesu hte rau anhte hpe mung sharawt ya na rai nna, nanhte hte rau dingrawng shangun na mi ai hpe, anhte chye nga ga ai. ¹⁵ Kaning rai nme law, masha law law ni a gawp e chyeju gaw jat wa ai majaw, shaakawwn kungdawn ai ga gaw Karai Kasang a hpung shingkang matu mara law htam wa u ga, yawng mayawng gaw nanhte a matu mara rai nga ai. ¹⁶ Dai rai nna anhte n hki n sang ga ai sha, anhte a shinggan na wa hten bya hkrum rai ti mung, anhte a kata de na wa gaw, lani hte lani prat bai pra wa nga ai. ¹⁷ Kaning rai nme law, dan dawng nga ai arai ni gaw ndai aprat na sha, n dan n dawng nga ai arai ni htani htana na arai rai nga ai majaw, dan dawng nga ai arai ni hpe anhte n tau yu ai sha, n dan n dawng ai arai ni hpe tau yu let, ¹⁸ ya e sha hkrum ai atsang sha rai nga ai tsin-yam tsindan gaw, nachying kaba li la htani htana hpung shingkang hpe anhte a matu mara a shacyen nga ai. 

 

2 Korinhtu 5

¹ Dinghta ga na nta ngu ai anhte a sum gaw run mat wa rai ti mung, lata hte n galaw ai nta, sumsing lamu e htani htana re ai Karai Kasang kaw na wahpang anhte lu nga ga ai gaw, anhte chye nga ga ai. ² Kaning rai nme law, ndai sum hta anhte madai nga ga ai rai nna, sumsing lamu na anhte a hkum hkrang nta hpe, dagraw lu na ndawt nga ga ai; ³ gaja wa shing rai dagraw ngut jang, anhte hpe singgu krin mu hkrup na mi ai n rai. ⁴ Ndai sum hta e naw nga nga ai ni anhte gaww, lit hpe gun hpai let a madai nga ga ai rai nna, ndai sum hpe anhte kun di kau mayu ga ai n re ai sha, si mat chyee ai gaw asak hkrung ai hta lup mayu kau ai hkrum u ga, hkum hkrang nta hpe dagraw na mahtang ra nga ga ai. ⁵ Dai chyeju nan lu la na anhte hpe shachyen ai wa gaww, Karai Kasang rai nga ai; shi gaw dai Wenyi a masat ding sat mung, anhte hpe daw da ma ni ai. ⁶ Dai re ai majaw anhte galoi mung myit kaba nga ai hte ndai hkum hkrang hta naw shanu nga yangg, dai Madu hte anhte tsan gang nga ga ai; ⁸ gaja wa anhte myit kaba nga ga ai rai nna, dai hkum hkrang hta n shanu ai sha, dai Madu kaw shanu lu u ga anhte grau nna ra nga ga ai. ⁹ Dai rai nna, shanu nga yang rai ti mung, garai n shanu nga yang rai ti mung, shi a man e ssharawng awng ai ni tai u ga, anhte myit makun nga ga ai. ¹⁰ Kaning rai nme law, dai hkum hkrang hte kaja ai rai ti mung, n kaja ai rai ti mung, galaw sa ga ai hte maren, langai hte langai hkam la shajang mu ga, anhte nga manga Hkristu a tingnyang man e dawng pru na ra ga ai. ¹¹ Dai rai nna, dai Madu a hkrit kang hpe chye ga ai majaw, anhte masha ni hpe madun shadik nga ga ai; Karai Kasang a man e chyawm gaw, anhte dan dan leng leng rai nga ga ai; nanhte a myit masin a man e mung, anhte dan leng nga ga ai, ngai nawn nga nngai. ¹² Anhte gaw nanhte a man e anhte hkum marai bai dan ga ai n re ai sha, myit masin hta n rai, myi man hta sha gumrawng ai ni hpe htan lu myit ga shee, anhte a lam gumrawng na shara, nanhte hpe jaw nga ga ai. ¹³ Kaning rai nme law, anhte myit n gring nga ga ai rai yang gaw, Karai Kasang a matu mara n gring nga ga ai; gring nga ga ai rai yang gaw, nanhte a matu mara gring nga ga ai. ¹⁴ Dai hta n-ga, marai langai wa yawng mayawng a matu mara si hkam yang, yawng mayawng si hkam sai, nga nna myit da nga ga ai majaw, Hkristu a tsaw ra ai lam gaw anhte hpe woi awn nga mi ai: ¹⁵ asak hkrung ai ni mung, tinang myit hte n re ai sha, shanhte a matu mara si hkam nna, bai rawt wa ai wa a jaw e hkrung nga mu ga, yawng -mayawng a matu mara shi si hkam sai. ¹⁶ Dai re ai majaw, ya kaw nna anhte kadai hpe mung hkum shan ahpraw hpe tau yu yang, n chye nga ga ai; Hkristu a hkum shan ahpraw hpe pyi anhte chye lu sa ga ai rai ti mung, ya kaw nna dai zawn hpa n chye ga ai. ¹⁷ Hkristu hta e marai langai ngai rai nga ai teng yang gaw, shi gaw ningnan hpan da ai wa rai nga ai; dingsa hte gaw lai mat wa sai, yu mu, dai hte gaw ningnan tai wa sai. ¹⁸ Dai lam yawng mayawng chyawm gaw Karai Kasang kaw nna rai nga ai; shi gaw anhte hpe Hkristu hta e shi hkum lala hte htinglu htinglai ya mi ai rai nna, dai htinglu htinglai ya ai ahkang aya gaw anhte hpe jaw da ma ni ai; ¹⁹ Karai Kasang gaw Hkristu hta nga let, mungkan ga hpe shi hkum lala hte htinglu htinglai ya nga ai; shanhte a mara gaw shi shanhte hpe n shagun ya mu ai rai nna, dai htinglu htinglai ya ai mungga gaw anhte hta e tawn da ya ma ni ai. ²⁰ Dai re ai majaw Karai Kasang gaw anhte a lata e shadum shahprang nga ai zawn, Hkristu a lam htinglet ya ai kasa ni anhte rai nga ga ai; Karai Kasang hte htinglu htinglai mu, ngu nna Hkristu a jaw e anhte hpyi nem ga ai. ²¹ Shi hta e Karai Kasang a ding hpring ai ni anhte tai wa u ga, shi yubak n chye ai wa hpe, anhte a matu mara yubak shatai wu ai. 

 

2 Korinhtu 6

¹ Karai Kasang a chyeju hpe n gawn n sawn nanhte n hkam la myit ga, shingdep shingtau ai ni anhte mung, shadum shahprang dat ga ai. ² Kaning rai nme law, Ang wa ai aten e ngai na a ga madat ya de ai, Hkye hkrang la ai nhtoi e ngai nang hpe karum de ai, nga nna shi tsun nga ai; yu mu, ya e pyi mai ang ai aten rai nga ai; yu mu, ya e pyi hkye hkrang la ai nhtoi rai nga ai. ³ Ndai daw ai aya gaw shanhtan nhkan n hkrum u ga, hpa lam hta mung ahtu kataw shara loi mi muk anhte n shatai ai sha, ⁴ shakut sharang ai law law hta, tsin-yam tsindam hta, kyin dut ai hta, shagyeng ai hta, ⁵ anu kayat hkrum ai hta, htawng bang ai hta, kabrawng kabrang hkrum ai hta, bungli gun hpai ai hta, a maja nga ai hta, kawsi hpang gara ai hta, ⁶ san pra ai hta, chye chyang ai hta, myit galu kaba ai hta, mai kaja ai hta, Chyoi pra ai Wenyi hta, n sawt ai tsaw ra ai myit hta, ⁷ teng man ai mungga hta, Karai Kasang a n-gun atsam hta mung; ding hpring ngu ai hpyen hking gaw hkra maga pai maga e sumraw ai hte, ⁸ hpung shingkang hkrum ai rai ti mung, n kaw n law hkrum ai rai ti mung, shatan nhkan hkrum ai rai ti mung, shagrau ai hkrum ai rai ti mung: ⁹ hkalem sha ai ni zawn rai ti mung, teng man nga ga ai ni; gade ai n dum n chye ai ni zawn rai ti mung, kajai gumhkawng hkrum ai ni; si hkrung si htan hkrum ai ni rai ti mung, yu mu, anhte a hkrung nga ga ai; ¹⁰ adup achyin hkrum ai ni zawn rai ti mung, n si n mat ai ni; yawn hkyen hkrum ai ni zawn rai ti mung, tut nawng e a kabu nga ai ni; matsan mayan re ai ni zawn rai ti mung, masha law law hpe shalu jasu chye ai ni; hpa n lu ai ni zawn rai ti mung, yawng mayawng hpe madu nga ai ni rai nga ga ai rai nna, Karai Kasang a bungli daw ai sara ni rai nga ga ai gaw, lam shagu hta anhte hkum marai dan nga ga ai. ¹¹ Korinhtu ni e, anhte a n-gup gaw nanhte a jaw e hpaw nga ma li ai, anhte a myit gaw dam lada maden wa sai. ¹² Anhte hta e nanhte chyat nga myit dai n rai; nanhte a kraw lawang gyip nga ma lit dai. ¹³ Dai zawn chyeju htang lu myit ga, nanhte a kraw lawang mung maden dat mu: tinang kasha ni hpe zawn ngai ning nga tsun nngai. ¹⁴ N kam n sham ai ni hte rau nhtan shai ai kandang hpe hkum jawm hpai mu: kaning rai nme law, ding man ai lam gaw, tara n hkungga ai lam hte hpa seng a ta? Nhtoi gaw nsin hte kaning rai kanawn lu a ta? ¹⁵ Hkristu gaw Beliala hte kaning rai hkau chyap lu ma ta? Kam sham ai wa gaw, n kam n sham ai wa hte hpa gumhtaw mi lu la na a ta? ¹⁶ Karai Kasang a naw ku ai htingnu gaw, gawngngu sumla ni hte rau kaning rai kahtep lu na a ta? Kaning rai nme law, Ngai shanhte a kata de shanu nga nna ginrun nga na hte, Shanhte a Karai Kasang ngai tai na nngai rai nna, Shanhte gaw nye a amyu tai na ma ra ai, nga nna Karai Kasang tsun dan nga ai hte maren, a hkrung nga ai Karai Kasang a naw ku ai htingnu gaw, anhte rai nga ga ai. ¹⁷ Dai rai nna, Shanhte a kaang na pru nhtawm, Kaga lak lak rai wa mu, nga nna dai Madu tsun nga ai. Awu asin re ai hpe hkum hkra mu, Shaloi ngai nanhte hpe hkap la na ma de ai. ¹⁸ Nanhte a Kawa ngai tai na nngai rai nna, Nanhte gaw nye a shadang sha ni hte shayi sha ni tai na ma rin dai, nga nna chyahtum chyalai n-gun rawng ai Madu gaw a tsun nga ai. 

 

2 Korinhtu 7

¹ Tsaw ra ai ni e, ndai ga sadi yawng hte gaw lu la gaw ai majaw, hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga. ² Anhte hpe hkap hkalum la mi: anhte kadai hpe mung n shut n hpyit yu ga ai; kadai hpe mung n shabyak ga ai; kadai hpe mung hkalem hkalau sha ga ai n rai. ³ Nanhte hpe jeyang na ngai ning nga tsun nngai n rai; kaning rai nme law, rau si rau prawn lu hkra, nanhte nan anhte a kraw lawang e a nga nga myit dai gaw, ngai shawng e tsun yu ni ai. ⁴ Nanhe a man e nachying nden ja ai myit ngai rawng nga nngai; nanhte a matu mara ngai grai gumrawng nga nngai; ngwi pyaw ai hte ngai hpring chyat nga nngai; anhte a tsin-yam tsindam shagu hta ladu lai hkra kabu gara nga nga nngai. ⁵ Kaning rai nme law, Makedoni mung de du yang pyi anhte a hkum shan hta n ngwi n pyaw rai nga ai hte, lam shagu hta tsin-yam tsindam hkrum nga ga ai; shinggan maga de gasat gala, kata maga de hkrit kang ai pra nga ga ai. ⁶ Rai ti mung, myit gyip ai ni hpe shangwi shapyaw ai Karai Kasang gaw, Titu du sa ai hte e anhte hpe shangwi shapyaw mi ai. ⁷ Shi a du sa ai hte sha n rai, nanhte a marit ai myit, nanhte a madai sharung ai hte, nye a matu nanhte nja nhpra rai nga ai gaw, anhte hpe shana ya mi yang, nanhte kaw na shi lu la ai ngwi pyaw ai hte mung, anhte ngwi pyaw nga ga ai; shing rai ngai grau nna kabu nga nngai. ⁸ Dai rai nna, nye a shagun dat ai laika hte nanhte hpe myit shayawn yang, myit tsang shara n nga nngai: rai ti mung, dai laika gaw tawng marang mi nanhte hpe shayawn nga ai, ngai dum nna myit tsang nngai; ⁹ ya chyawm gaw ngai kabu nga nngai. Nanhte hpe myit shayawn ai majaw n rai, myit malai hkra shayawn ma de ai majaw, ngai kabu nga nngai; anhte a lata hte nanhte hpa sum mat ai mung n hkrum myit ga, Karai Kasang ra ai hte maren shayawn ai hkrum myit dai. ¹⁰ Kaning rai nme law, Karai Kasang ra ai yawn hkyen ai gaw, hkye hkrang la ai hkrum hkra, n tsang ra ai myit malai ai hpe shachyen nga ai; mungkan ga a yawn hkyen ai chyawm gaw, si mat ai hpe shachyen nga ai. ¹¹ Bai, Karai Kasang ra ai hte shayawn hkrum ai lam hta nan, da hpran shakang na lam mung, mara nem na lam mung, masin rawt na lam mung, hkrit kang na lam mung, myit marit ai lam mung, nja nhpra ai lam hte mara htang na lam, gade wa shachyen jat wa ai gaw, yu yu mu: nanhte ndai amu hta mara n rawng nga myit dai gaw, lam shagu hta dan nga myit dai. ¹² Dai rai nna, nanhte hpe ka dat ma de ai gaw, shut hpyit ai wa a nhkan e n rai, shut hpyit hkam ai wa a nhkan e mung n re ai sha, anhte a matu mara nanhte a da hpran ai myit Karai Kasang a man e nanhte hpe shadan dan myit ga, ngai ka dat nngai. ¹³ Dai lam hta e anhte shangwi shapyaw ai hkam ga ai. Anhte a shangwi shapyaw ai hkam lu ga ai hta n-ga, Titu a kabu gara ai lam majaw grau nna kabu gara nga ga ai; kaning rai nme law, nanhte nlang a majaw shi a wenyi kabu awng nga ai. ¹⁴ Nanhte a lam lama ma hta ngai shi hpe gumrawng nga nngai rai yang gaw, kaya kahpa ngai n hkrum nga nngai: anhte gaw lam shagu hta nanhte kaw teng man ai ga tsun sa ga ai hte maren, Titu a man e anhte a gumrawng ai mung teng man wa sai. ¹⁵ Nanhte nlang a madat mara ai myit hte, hkrit nna gari let shi hpe hkap hkalum la myit dai hpe a dum nga ai majaw, shi nanhte hpe tsaw ra ai shawang amyit gaw, nachying galu kaba nga lu ai. ¹⁶ Nanhte hta ngai lam shagu hta myit kaba nga nngai majaw, kabu gara nga nngai law. Nanhte nlang a madat mara ai myit hte, hkrit nna gari let shi hpe hkap hkalum la myit dai hpe a dum nga ai majaw, shi nanhte hpe tsaw ra ai shawang amyit gaw, nachying galu kaba nga lu ai. 

 

2 Korinhtu 8

¹ Dai hta kaga, hpu nau ni e, Makedoni mung na hpung ni hpe Karai Kasang jaw dat ai chyeju a lam, anhte nanhte hpe shana dat ga ai: ² tsin-yam tsindam law law hta dinglik hkrum rai ti mung, shanhte a ladu lai ai kabu gara ai myit hte, shanhte a sung la ai matsan mayan ai hta, sut gan n daw n hta shapraw hkra law htam wa ma sa lu ai. ³ Kaning rai nme law, rai lu ai hte maren, rai sa, rai lu malu hta n-ga, shanhte hkrat nga ma ai hpe, ngai sakse hkam nngai; ⁴ chyoi pra ai ni hpe galaw daw na ngu ai chyeju hte lawm lu na ahkang shanhte gaw tinang myit lu ai hte anhte hpe akroi anoi hpyi nem mi ai: ⁵ anhte myit nawn ai hku n re ai sha, Karai Kasang a myit hkan yang, tinang hkum nan dai Madu hpe shawng jaw kau nna, anhte hpe mung jaw kau mi ai. ⁶ Dai rai nna, Titu gaw shawng galaw hpang ai hte maren, dai chyeju mung nanhte hta shatup u ga, anhte shi hpe shadut jahkat gaw ai. ⁷ Nanhte gaw kam sham ai hta, ga jahta ai hta, chye chyang ai hta, shakut sharang ai amyu myu hte, anhte a matu tsaw ra ai myit lam shaga hta law htam wa ai hte maren, ndai chyeju hta mung nanhte law htam wa myit ga, a dum nga mu. ⁸ Ning nga tsun ai gaw htet da ai ga tsun nngai n re ai sha, kaga ni a shakut sharang ai hpe tau yu nna nanhte a tsaw ra ai myit majing hpe chyam yu na she, tsun nga nngai. ⁹ kaning rai nme law, anhte a Madu Yesu Hkristu gaw sut su nga ai rai ti mung, nanhte a matu mara matsan mayan hkrum nna, shi a matsan mayan ai hta nanhte sut su lu na rai nga ai chyeju hpe, nanhte chye nga myit dai. - ¹⁰ Ndai lam hta nye a mung sumtu ngai madun nga nngai: kaning rai nme law, maning nna pyi galaw hpang ai hta n-ga, galaw mayu ai myit shawng madun ai ni, nanhte rai nga myit dai majaw, dai gaw nanhte a matu sut nga ma lit dai. ¹¹ Dai rai nna dai bungli hpe ya shatup nga mu: galaw mayu ai myit rawng nga sai hte maren, nanhte rai lu ai daram, shangut na lam mung, dai zawn rai nga u ga. - ¹² Kaning rai nme law, galaw mayu ai myit rawng nga a yang gaw, n sharai lu ai hte n re ai sha, sharai lu ai hku sha sharawng awng nga ai. ¹³ Ndai amu hta e kaga ni hpe ngamu ngamai shangun nna, nanhte hpe sharu shayak na maw nga nngai n re ai sha, amu shabung shapre na she myit nga nngai: ¹⁴ nanhte a paw ai gaw shanhte a taw ai hta ya e shang lu nna, shanhte a paw ai gaw nanhte a taw ai hta bai shang lu na rai nna, shabung shapre ai hku rai wa u ga, ngai myit nga nngai. ¹⁵ Shing rai, Law wa hta la ai wa jan ai n rai, loi mi hta la ai wa mung naw ra nga ai n rai, nga nna ka da nga ai hte maren dik wa na ra ai. ¹⁶ Dai hta kaga, Titu a kraw lawang e, nanhte a matu mara dai zawn tsang ai myit nan jaw da ai Karai Kasang gaw, a nga u ga. ¹⁷ Ngai shadut jahkat ai ga shi hkam la ai hta n-ga, shi hkum nachying katu nga let, tinang myit tsu rai nna nanhte hpang de pru sa wa ai. ¹⁸ Dai kabu gara shi ga nhkan e Hpung ni yawng hta shakawn hkrum ai hpu nau wa hpe mung, anhte shi hte rau shangun dat ga ai; - ¹⁹ dai hta n-ga, dai Madu a arawng sadang hte anhte a galaw mayu ai myit madun na matu, anhte a lata hte galaw daw ai, ndai chyeju hta anhte a kanawn manang tai wa u ga she, Hpung ni a lata la ai wa mung, shi rai nga ai: - ²⁰ anhte a lata hte galaw daw ai, ndai alu kaba lahkawn ai hta, kadai mung anhte hpe mara shagun shara n nga u ga, sadi nga ga ai; ²¹ kaning rai nme law, dai Madu a man e sha n rai, masha a man e mung htap htuk ai ningli madun na, anhte myit yu nga ga ai. ²² Dai hta kaga, lam shagu hta law law lang chyam yu yang, shakut sharang chye nna nanhte hpe grai wa kam sham nga ai majaw, ya e grau nna shakut sharang nga ai hpu nau wa hpe mung, dai yan hte rau anhte naw shangun dat ga ai. ²³ Titu a lam chye mayu yang, shi gaw, nye a kanawn manang hte nanhte a matu shingdep shingtau ai wa rai nga ai; anhte a hpu nau yan a lam chye mayu yang, shan gaw, Hpung ni a kasa yan hte Hkristu a arawng sadang mung rai nga ma ai. ²⁴ Dai re ai majaw, nanhte a tsaw ra ai myit hte, nanhte a jaw e anhte a gumrawng nga ai sakse, Hpung ni a man e shanhte hpe shadan dan nga mu. 

 

2 Korinhtu 9

¹ Ya, chyoi pra ai ni a matu mara galaw daw ai amu a lam, ngai nanhte hpang de ka dat shara n nga nngai. ² Kaning rai nme law nanhte a galaw mayu ai myit ngai chye nna, de a lam nanhte a jaw e gumrawng let, Ahkaia mung na ni maning kaw nna lajang jin nga ma sai, ngu nna Makedoni masha ni hpe tsun nngai: nanhte a sharawng ai myit mung, dai malaw maga hpe shadum shaawn nga ai. ³ Rai ti mung, ndai lam hta nanhte a jaw e anhte gumrawng ai ga gaw kaman lila n tai u ga hte, ngai tsun nga sai hte maren nanhte a jin nga myit ga she, hpu nau ni hpe ngai shangun dat nngai: ⁴ shing n rai, Makedoni masha nkau mi ngai hte rau sa nna nanhte n jin nga ma la ai hpe mu hkrup yang, nanhte kaya kahpa hkrum na ngai n tsun ai sha, anhte mung dai kam sham shara hta kaya kahpa hkrum na ra ga ai. ⁵ Dai re ai majaw, dai alu gaw kashun kashe la ai zawn n re ai sha, chyeju alu zawn jin magang nga u ga she, hpu nau ni gaw nanhte hpang de sa magang nna, shawng na ndat da ai, nanhte a chyeju alu hpe shagum tawn myit ga, ngu nna shanhte hpe shadut jahkat na lam ngai dum nngai. ⁶ Rai ti mung, ngai tsun nngai gaw, loi sha mi gat ai wa gaw loi sha mi dan la na ra ai; myit sharawng awng let gat ai wa gaw, myit sharawng awng let dan la na ra ai. ⁷ Langai hte langai tinang a kraw lawang e myit da ai hte maren jaw u ga: lahpawt ai myit hte n rai, jaw shangun ai majaw sha mung n re ai sha, Karai Kasang gaw kabu gara ai myit hte jaw ya ai wa hpe tsaw ra nga ai. ⁸ Dai hta kaga, Shi gat nu ai, matsan mayan ni hpe gam jaw nu ai: Shi a ding hpring ai gaw htani htana a nga nga ai, nga nna kada nga ai hte maren, ⁹ lam shagu hta e nanhte tut tut marai hkum sumhpa rawng let, mai kaja ai magam bungli amyu myu hta law htam wa myit ga, Karai Kasang gaw nanhte hte e chyeju hkum sumhpa law htam shangun lu ai. ¹⁰ Nli gat ai wa hpe nli mung, sha na matu shahpa mung shapraw ya ai wa gaw, nanhte a gat na nli hpe shapraw nna shalaw jahtam na hte, nanhte a ding hpring ai a asi hpe law wa shangun na ru ai. ¹¹ N daw n hta jaw lu hkra, lam shagu hta e nanhte sut su ai hkrum ma nit dai rai nna, dai gaw anhte a lata e, Karai Kasang hpe shakawn kungdawn na lam tai wa na ra ai. ¹² Kaning rai nme law, ndai galaw daw ai bungli gaw, chyoi pra ai ni a ra nga ai hpe shatup nga ai hta n-ga, Karai Kasang a chyeju hpe mahkawn mangoi na lam mung law htam wa nga ai: ¹³ ndai galaw daw ai lam hte nanhte hpe chyam yu ngut jang, Hkristu a kabu gara shi ga a lam hkan nang nna madat mara nga myit dai hte, n daw n hta re ai alu kumhpa, shanhte hpe mung, mahkra hpe mung, a jaw nga ai majaw, shanhte gaw Karai Kasang hpe shagrau shaa nga ma ai: ¹⁴ shanhte mung nanhte hta nachying grau ai Karai Kasang a chyeju hpe tau yu ai majaw, nanhte a matu mara akyu hpyi nga yang, nanhte hte hkrum na hpe grai marit nga ma ai. ¹⁵ Tsun n dang lu ai Karai Kasang a kumhpaw kumhpa majaw, shi hta a nga u ga law. 

 

2 Korinhtu 10

¹ Nanhte a man e myit grit ai hte, tsan gang nga yang nanhte a lam nden ja ai myit madun ai, ngai Pawlu nan, Hkristu a sumnung ai hte myit gyip ai hpe tau yu nna, nanhte hpe shadut jahkat dat ma de ai: ² anhte gaw hkum shan hking hte hkawm nga ga ai myit nna, anhte a lam nawn ya ai ni nkau mi hpe nachying nden ja ai myit madun na ngai maw nga nngai hte maren, nanhte hte rau nga yang, dai hte wa nden ja ai myit madun shara n nga u ga, ngai hpyi nem nngai. ³ Kaning rai nme law, hkum shan hta anthe hkawm nga ga ai rai ti mung, hkum shan hking hku hkan nna majan gasat nga ga ai n rai; - ⁴ anhte a majan gasat na ri nhtu ni gaw hkum shan hte n seng ai sha, hpyen dap ni hpe sharun shabya na matu, Karai Kasang a man e atsam n-gun rawng nga ai; ⁵ masha a myit mang ai hku hte, Karai Kasang a chye chyang ai lam hpe hkum da mayu ai tsaw matsaw hte hpe, anhte sharun shabya lu ai hte, Hkristu a ga madat mara na lam a npu e myit mang shagu hpe sharen da mu ai; ⁶ nanhte a madat mara ai lam gaw hkum tsup ngut jang, n madat n mara ai yawng hte hpe ari jaw na, anhte jin jin rai nga sa ga ai. ⁷ Nanhte gaw myi man sha yu matsing myit dai. Ngai gaw Hkristu hta e rai nga nngai, nga nna langai ngai myit da a yang gaw, shi nan Hkristu hta e rai nga ai hte maren, anhte mung rai nga ga ai, tinang hkum dai myit dum nga u ga. ⁸ Nanhte hpe sharun shabya na majaw n rai, nanhte hpe shadaw shalan na matu, dai Madu anhte hpe jaw da sai ahkang aya a lam ngai grai wa naw gumrawng nga ti mung, ngai hkrit kaya hkrum na nngai n rai; ⁹ dai hta kaga, nye a shagun dat ai laika ni hte nanhte hpe jahkrit na zawn nawn shara n tai u ga. ¹⁰ Kaning rai nme law, shi a laika ni gaw li la ai hte atsam rawng ai laika rai lu ai rai ti mung, shi hkum nan rau nga nga yang, shi a hkum hpung n rawng nna, shi a tsun ai ga akyu n rawng lu ai, nga nna tsun ai ni nga ma ai. ¹¹ Shing nga ai wa chyawm gaw, anhte tsan gang nga ga yang, laika ni hta rawng ai ga rai nga ai hte maren, rau nga yang mung anhte dai zawn bungli hta e rai na ga ai, a dum nga u ga. ¹² Kaning rai nme law, tinang a hkum hpe shagrau ai ni nkau mi hte hti lawm nna, anhte a hkum hpe shanhte hte shadawn yu na, anhte n gwi ga ai: shanhte gaw tinang a hkum hpe tinang dai shadawn nna, tinang a hkum hte tinang dai shabung nga ma ai majaw, myit n rawng nga ma ai. ¹³ Anhte chyawm gaw shalai nna gumrawng ga ai n re ai sha, nanhte kaw pyi du dep lu hkra rai u ga she, Karai Kasang gaw anhte hpe shadawn sharam da ai jarit hpe tau yu nna sha, gumrawng lu ga ai. ¹⁴ Nanhte kaw du dep na matu ntsa hku chyan ga ai n re ai sha, anhte Hkristu a kabu gara ai shi ga hte nanhte kaw mung du dep sa ga ai. ¹⁵ Bai anhte gaw masha kaga wa a bungli hta shang nna, shalai gumrawng ga ai n re ai sha, nanhte a kam sham ai myit kaba wa yang she, anhte a shadawn sharam da ai jarit tau yu let, nanhte a jaw e anhte grau nna kaba wa na ga ai rai nna, ¹⁶ nanhte a ginwang shinggan e dai kabu gara ai shi ga sa hkaw tsun lu nna, masha kaga wa shajin da ai yi ngam hta shang gumrawng ai hku n re ai sha, anhte myit mada nga ga ai. ¹⁷ Dai gumrawng ai wa chyawm gaw dai Madu hta gumrawng nga u ga. ¹⁸ Kaning rai nme law, tinang hkum hpe shagrau ai wa n rai, dai Madu shagrau ai wa chyu sha, ging dan ngu ai hkam la nga ai.