Galati

Galati 1

^1-2Masha kaw na n rai, masha a ahkang majaw mung n re ai sha, Yesu Hkristu hte si mat ai ni kaw na shi hpe sharawt la ai Kawa Karai Kasang a ahkang majaw kasa rai nga ai ngai Pawlu hte, ngai hte rau nga ai hpu nau ni nlang hte gaw, Galati mung na Hpung ni kaw ga shana dat ga ai. ³ Anthe a Wa Karai Kasang hte Madu Yesu Hkristu kaw na chyeju hte ngwi pyaw ai gaw, nanhte hta e a nga nga ma lit ga law. ⁴ Dai Madu gaw, anhte a Kawa Karai Kasang a myit ra ai hte maren, ya e rai nga ai n hkru ai mungkan ga na anhte hpe mawai la u ga, anhte a yubak a matu mara shi hkum hpe nan ap kau ya wu ai. ⁵ Dai Kawa Karai Kasang kaw, htani htana prat dingsa e hpung shingkang a nga nga u ga law. Amen. ⁶ Hkristu a chyeju hta nanthe hpe shaga la ai wa kaw na nde wa alawan hka wa nna, kabu gara shi ga kaga hpang de hkan nang myit dai majaw, ngai amau nga nngai. ⁷ Dai kabu gara shi ga kaga chyawm gaw, kabu gara shi ga mai ngu na n re ai sha, Hkristu a kabu gara shi ga hpe shabyak mayu nna, nanhte hpe sharu shatsang nga ai ni nkau mi rai nga ma ai. ⁸ Rai ti mung, anhte nanhte hpe hkaw tsun dan ai kabu gara shi ga hta kaga, anhte mung, sumsing lamu na lamu kasa mung, nanhte hpe hkaw tsun dan a yang gaw, shi dagam dala hkrum u ga. ⁹ Nanhte hkam la ma nit dai kabu gara shi ga hta kaga, marai langai ngai nanhte hpe hkaw tsun dan a yang gaw, shi dagam dala hkrum u ga, ngu nna shawng e anthe tsun ga ai hte maren, ya e ngai bai naw tsun nga nngai. ¹⁰ Kaning rai nme law, ning nga tsun ai gaw, masha myi man pa na ngai ra nga nngai kun? Masha ra ai hku ngai naw hkan nang nga yang gaw, Hkristu a ali ama ngai rai na nngai n rai. ¹¹ Dai hta kaga, hpu nau ni e, ngai hkaw dan yu ai kabu gara shi ga gaw, masha myit ai lam hte maren n rai nga ai gaw, ngai nanhte hpe shadum shahprang ma de ai. ¹² Kaning rai nme law, masha kaw na ngai dai hpe hkam la nngai n rai; sharin achyin ya ai hte mung ngai n hkam la ai sha, Yesu Hkristu a shingran ga hte nan hkam la nngai. ¹³ Yuda htung hta naw nga ai shaloi e, nye a arawn alai a lam nanhte na yu ma nit dai; Karai Kasang a Hpung hpe nachying ladu lai hkra ngai zingri zingrat nga nna, dai hpe akrin atsai di kau ma we ai. ¹⁴ Nye a ji woi ni a matsun maroi ga a lam nachying nja nhpra rai nga nngai majaw, nye a amyu na rau ram manang ni law law hte, Yuda htung hta e ngai grau nna kaba wa nngai. ^15-16Rai ti mung, dai Kasha a kabu gara shi ga hpe maigan amyu ni hpe hkaw tsun dan u ga, nye nu a hkritung nna pyi ngai hpe san tawn da ai Karai Kasang gaw, shi a chyeju majaw ngai hpe shaga la nna shi Kasha a lam ngai hta shapraw dan na ra nga ai shaloi jang, ngai hkum shan yan asai hpe bawng yu nngai n rai. ¹⁷ Dai hta kaga nye a shawng e kasa tai ai ni hte sa hkrum na, ngai Yerusalem de n lung wa ai sha, Arabi mung de sa nhtawm, Damasku mare de bai wa nngai. ¹⁸ Dai hpang masum ning lai yang she Kehpa hte jahkrum na, ngai Yerusalem de lung wa nngai rai nna, shi manga ya tup shi hte rau a nga nga nngai. ¹⁹ Dai Madu a kanau Yaku hta kaga, Kasa galè hpe ngai n mu nngai. ²⁰ Nanhte hpe ngai ka dat ai hta, masu magaw ga n lawm nga ai ngu nna, yu mu, Karai Kasang a man e ngai tsun nga nngai. ²¹ Dai hpang e Suri hte Kiliki ginwang hkan e ngai sa du nngai. ^22-24Hkristu hta e nga ai, Yuda mung na Hpung ni chyawm gaw, nye a myi man hpe rai n chye n dum ma ai rai nna, Shawng e anhte hpe zingri zingrat ai wa gaw, tinang nan shawng e akrin atsai di kau ai makam masham lam hpe, ya e hkaw tsun nga ai da, nga nna na la ai hte sha, nye a lam Karai Kasang hpe shakawn kungdawn nga ma ai. 

Galati 2

¹ Dai hpang e shi mali ning lai yang she, Titu hpe mung shalawm let, ngai Barnaba hte rau Yerusalem de bai lung wa nngai. ² Shingran ga hte maren ngai lung wa nngai rai nna, ngai galaw yu sai amu hte, ya e galaw nga ai amu gaw, kaman lila n rai dam nthen ngu nna, maigan amyu ni hpe ngai hkaw tsun dan ai kabu gara shi ga hpe, shanhte a man e mung, arawng lu ai ni a man e kaga lak mung, hkai dan dat ma de ai. ³ Rai ti mung ngai hte rau rai nga ai Heleni masha Titu hpe pyi, matu gadoi hkam na n shangun mu ai. ⁴ Lagyim shashawn ai masu ai hpu nau ni a majaw, dai lam ngai galaw nngai n rai; Hkristu Yesu hta e nanhte lu la ai lawt wa ai lam hpe kinyu yu nna, anhte hpe mayam shayam na shanthe shang wa ma ai; ⁵ rai ti mung, dai kabu gara shi ga a teng man ai lam nanhte hta a grin nga lu u ga, shanhte a lawu e ahkying langai mi pyi anhte taw nga ga ai n rai. ⁶ Arawng lu ai nsan ai ni chyawm gaw, kaning re ai ni rai ma ai kun, ngai hte seng ga ai; Karai Kasang gaw masha a myi man n tau yu ga nga ai:- dai arawng lu ai nsan ai ni gaw, ngai hpe hpa mi mung n sharin set ya mi ai hta n-ga, ⁷ matu gadoi hkam ai ni hpe dai kabu gara shi ga hkaw dan na ahkang, Petru lu la ai hte maren, matu gadoi n hkam ai ni hpe hkaw dan na ahkang, ngai nan lu la ni ai gaw, shanhte mu ma ai. ⁸ Kaning rai nme law, matu gadoi hkam ai ni a matu mara Petru hpe kasa aya dang da ai wa gaw, maigan amyu ni a matu mara ngai hpe mung kasa aya dang da ni ai. ⁹ Shing rai ngai hpe jaw da ai chyeju mu ma ai shaloi, dawhpum ngu ging na nsan ai Yaku, Kehpa hte Yawhan hte gaw, shanhte nan matu gadoi ai ni hpang de sa na ma ai rai nna, anhte gaw maigan amyu ni hpang de sa u ga, kanawn manang ngu ai hkra lata gaw ngai hte Barnaba an hpe jaw mi ai. ¹⁰ Matsan mayan ni hpe anhte dum na shanthe ra ma ai hte, ngai nan dai lam hta grai shakut sharang mayu nga nngai. ¹¹ Dai hpang e Kepha gaw Antioki mare de sa du ai shaloi, shi hta mara kap nga ai majaw, ngai shi hpe nan daru jet kau we ai. ¹² Kaning rai nme law, manang nkau mi gaw Yaku kaw na garai n du ma yang, shi gaw maigan masha ni hte rau shat sha nga ai; dai ni du ma yang, matu gadoi hkam ai ni hpe hkrit kang ai majaw, shi nan maigan ni hte hka nna tsan gang mat wa ai. ¹³ Yuda gale ni mung shi hte rau dai hte maren hpyi hpun nga ma ai rai nna, Barnaba pyi shanthe a hpyi hpun ai hta sawm mat magang wa nga ai. ¹⁴ Ya shanhte gaw dai kabu gara shi ga a teng man ai lam hte maren n hkawm nga ma ai gaw, ngai mu ma we ai shaloi, shanhte mahkra a man e Kehpa hpe ngai tsun we ai gaw, Nang gaw Yuda masha rai nga ninglen, Yuda masha zawn n rai, maigan masha ni gaw Yuda ni a hking hkan na, nang kaning rai galaw shangun na n ta? ¹⁵ Anhte gaw Yuda amyu jet rai nga nna, maigan masha ni zawn yubak kap ai ni n rai nga ga ti mung, ¹⁶ masha gaw jep ai tara a magam amu hte n rai. Hkristu Yesu a makam masham hta sha ding hpring lu ai gaw, anhte chye nga ga ai majaw, jep ai tara a magam bungli hte n rai, Hkristu hta kam sham ai hte anhte ding hpring lu u ga, anhte pyi Hkristu Yesu hta e kam sham sa ga ai: kaning rai nme law, jep ai tara a magam bungli hte kadai mung ding hpring ai kaw n du lu ma ai. ¹⁷ Ya, Hkristu hta ding hpring ai lu la hkra anhte tam nga let, anhte hkum nan yubak kap ai ni rai nga ga ai, anhte mu hkrup sa ga yang gaw, Hkristu gaw yubak a ali ama tai nga ai kun? Shing n rai law. ¹⁸ Kaning rai nme law, shawng e ngai sharun shabya kau ai lam hpe, ngai bai shagrin nga yang gaw, ngai tawt lai ai masha tai na nngai. ¹⁹ Dai hta kaga, ngai gaw Karai Kasang hta e hkrung nga n ga, dai jep ai tara hte seng ai hta, jep ai tara a gawp e ngai si nga nngai. ²⁰ Ngai gaw Hkristu hte rau wudang hta jen da ai hkrum nngai. Ngai hkum nan naw hkrung nga nngai n rai, Hkristu gaw ngai hta e a hkrung nga ai: ya e dai hkum shan hta ngai hkrung nga nngai gaw, ngai hpe tsaw ra nna, nye a matu mara shi hkum dai shi ap kau ai Karai Kasang a Kasha a makam masham hta sha ngai hkrung nga nngai. ²¹ Karai Kasang a chyeju hpe ngai gang kau nngai n rai: kaning rai nme law, ding hpring ai gaw jep ai tara hta lu la a yang gaw, Hkristu gaw kaman lila sha si hkam kau nu ai. 

 

Galati 3

¹ Angawk angak re ai Galati masha ni e, wudang hta jen da ai Yesu Hkristu hpe nanhte a myi man e dem shakap dan sai mi, nanhte hpe gade e hkalau kau myit ta? ² Dai Wenyi hpe gaw jep ai tara a magam bungli hte nanhte lu la myit dai rai kun? shing n rai, dai makam masham a lam na la ai majaw rai kun? Dai lam langai sha nanhte a n-gup na ngai chye la ma yu nngai. ³ Nanhte ndai hte wa angawk angak nga myit ni? Dai Wenyi hta hpa nna galaw hpang myit htawm e, hkum shan hta hpa nna ya shangut na myit ni? ⁴ Ning san ai nni nkri hpe nanhte kaman sha hkam kau ma nu ni? gaja wa, dai gaw kaman lila mahkoi rai nga ai kun. ⁵ Dai hta n-ga, nanhte hpe dai Wenyi shun di ya nna, nanhte a kaang e lamik kumla galaw ai wa gaw, jep ai tara a magam bungli hte, shing n rai, dai makam masham a lam na la ai majaw, shabyin lu ai rai kun? ⁶ Dai hte maren, Abraham gaw Karai Kasang hpe kam sham wu ai rai nna, dai hpe ding hpring ai rai nga ai, shi a matu ngu ya wu ai. ⁷ Dai re ai majaw, makam masham hte seng ai ni gaw Abraham a kashu kasha ni rai nga ma ai, chye nga mu. ⁸ Karai Kasang gaw makam masham hte sha maigan masha ni hpe ding hpring shangun na ma ru ai, nga ai Chyum laika gaw chye da hkrup sai majaw, Abraham hpe ning nga ai kabu gara shi ga gaw, Amyu baw shagu gaw na a gawp e gumring gumrat hkrum na ma ra ai, nga nna shawng e tsun magang nu ai. ⁹ Dai rai nna, makam masham hte seng ai ni gaw, kam sham ai myit rawng ai Abraham hte rau gumring gumrat hkrum lu na ma ra ai. ¹⁰ Dai hta kaga, jep ai tara a magam bungli hta hpa ai ni kadai rai ti mung, dagam dala a npu e rai nga ma ai: kaning rai nme law, Tara laika hta ka da mada hte maren galaw na n shatup nga ai wa kadai rai ti mung, dagam dala hkrum na ma ra ai, nga nna ka da nga sai. ¹¹ Dai hta n-ga, Ding hpring ai wa gaw kam sham ai hte hkrung nga lu na ra ai, nga nna ka da nga ai majaw, jep ai tara hte Karai Kasang a man e kadai mung ding hpring lu na n re ai gaw, dan dan leng leng rai nga ai. ¹² Dai jep ai tara mahtang gaw, makam masham hte n seng ai rai nna, De a lam hte hpe hkan shatup ai wa gaw, dai hta e hkrung nga lu na ra ai, nga ai. ¹³ Hpun hta e jen da hkrum ai wa kadai rai ti mung dagam dala hkrum ai wa rai nga ai, nga nna ka da nga ai hte maren, Hkristu gaw anhte a matu mara dagam dala hkrum ai wa tai wa ai majaw jep ai tara a dagam dala kaw na anhte hpe hkrang shaw la mi ai: ¹⁴ shing rai Yesu Hkristu a marang e, Abraham a gumring gumrat chyeju gaw maigan masha ni hta byin wa lu na hte, anhte mung dai Wenyi a ga ndat hpe makam masham hte lu la na rai nga ga ai. ¹⁵ Hpu nau ni e, masha myit ai hku hkan nna ngai tsun n ga: Masha e gaw da ngut sai ga madat jahpan hpe pyi, kadai mung lai kau lu ai n rai, kadai mung dai hta set jat lu ai n rai. ¹⁶ Ya, dai ga ndat ni gaw Abraham hte shi a aru arat hpe tsun da nu ai. Aru arat ni nga ai gaw, law law wa hpe shaang ai zawn, shi tsun nga ai n rai: Na a aru arat ngu ai langai wa hpe sha shi tsun nga ai rai nna, dai gaw Hkristu rai nga ai. ¹⁷ Dai rai nna ngai tsun nngai gaw, Karai Kasang gaw da ngut sai ga shaka a hpang, mali tsa sumshi ning e du ai jep ai tara gaw, dai ga shaka hpe n shabai lu ai hte, dai ga ndat hpe mung lai kau lu ai, n rai. ¹⁸ Kaning rai nme law, dai sali wunli gaw jep ai tara hte seng a yang gaw, ga ndat hte seng nga ai n rai; Karai Kasang chyawm gaw, dai hpe ga ndat hte Abraham hpe jaw da nu ai. ¹⁹ Dai rai yang gaw, dai jep ai tara gaw hpa akyu nga a ta? dai ga ndat hta ang ai aru arat du ai du hkra, dai gaw shut hpyit nga ai a majaw set kahtap da nga ai: dai gaw htinglu ya ai wa a lata hte lamu kasa hta na san tawn da ai rai nga ai. ²⁰ Htinglu ya ai wa mahtang gaw, langai sha hte n seng ai sha, Karai Kasang chyawm gaw langai sha rai nga ai. ²¹ Dai rai nna jep ai tara gaw Karai Kasang a ga ndat hte nhtan shai nga a ni? Shing n rai law; kaning rai nme law, hkrung ai asak jaw lu ai jep ai tara jaw da sai rai yang gaw, ding hpring ai gaw, gaja wa, jep ai tara hta e rai na ra ai. ²² Ya chyawm gaw, Yesu Hkristu hta e rai nga ai makam masham hte seng ai ga ndat gaw, kam sham ai ni hpe jaw ya lu mu ga, Chyum laika gaw yawng mayawng hte hpe yubak a npu e rawng da nu ai. ²³ Dai makam masham garai n du yang, anhte jep ai tara a npu e sharen da ai hkrum ga ai rai nna, htawm hpang de paw pru na ra ai makam masham a matu mara, rawng da mi ai. ²⁴ Dai rai nna, anhte gaw makam masham hte ding hpring wa u ga, anhte hpe Hkristu hpang de shangun dat na, jep ai tara gaw anhte a sharin ai sara tai wa sai. ²⁵ Dai makam masham ya du sai majaw, sharin ai sara a npu e anhte naw rai nga ga ai n rai. ²⁶ Kaning rai nme law, Hkristu Yesu hta e kam sham nga myit dai majaw, nanhte nlang hte gaw, Karai Kasang a kashu kasha ni rai nga myit dai. ²⁷ Hkristu hta e baptisma hkam ai ni yawng hte gaw, Hkristu hpe bu hpun sumraw nga myit dai. ²⁸ Nanhte yawng mayawng gaw Hkristu hta e langai sha rai nga myit dai majaw, Yuda wa ngu na mi n nga, Heleni wa ngu na mi n nga; mayam ngu na mung n nga, shanglawt ngu na mung n nga; lash, numsha ngu na mi mung n nga lu ai. ²⁹ Ya nanhte Hkristu hte seng nga myit yang gaw, nanhte Abraham a aru arat rai nga myit dai hte, dai ga ndat nga ai hte maren, sali wunli hkam la ai ni rai nga myit dai. 

 

Galati 4

¹ Bai ngai tsun nngai gaw, sali wunli hkam ang ai ma gaw, arai yawng mayawng a madu rai nga ti mung, ma naw rai nga a yang, mayam wa hte hpa n shai nga ai: ² kawa madat da ai nhtoi du hkra, bau sin ai wa hte, nta up ai wa a npu e, shi naw rawng nga ai. ³ Dai hte maren, anhte ma naw rai nga ga yang, mungkan ga a hkang ai tara npu e anhte naw yam nga ga ai. ⁴ Rai ti mung, aten ladaw gu jang, dai jep ai tara npu e rai nga ai ni hpe hkrang shaw la nna, anhte kasha yin la ai chyeju hkam la lu u ga, ⁵ numsha hta shangai wa nna, jep ai tara npu e prat wa ai, shi a Kasha hpe nan, Karai Kasang gaw shangun dat wu ai. ⁶ Ya nanhte gaw kashu kasha rai nga myit dai majaw, Karai Kasang gaw, Aba Wa e, nga nna shaga chye nga ai, shi a Kasha a Wenyi hpe anhte a kraw lawang de shangun dat nu ai. ⁷ Dai rai nna nang gaw, mayam naw rai nga ndai n rai, kasha nan rai nga nit dai: kasha nan rai nga nit yang gaw, Karai Kasang a marang e sali wunli hkam la ai wa mung, nang rai nga ndai. ⁸ Rai ti mung, dai aten e nanhte Karai Kasang hpe n chye nga myit dai majaw, hking madung hku yu yang. Hpara n mai ngu ai ni a npu e, nanhte yam nga myit dai. ⁹ Ya chyawm nanhte gaw Karai Kasang hpe chye nga ai hta n-ga, Karai Kasang gaw nanhte hpe chye sa yang me, n-gun kya ai hte matsan mayan re ai hkang ai tara hpang de, nanhte hpa rai bai nhtang nna, de a mayam bai tai mayu nga myit hka? ¹⁰ Nanhte gaw nhtoi, shata, aten ladaw hte shaning hte hpe matsing nga myit dai. ¹¹ Ngai gaw nanhte kaw kaman lila sha shakut sharang kau nga nngai nhten, ngu nna nanhte a lam ngai myit tsang nga nngai. ¹² Hpu nau ni e, nanhte zawn ngai rai nga nngai majaw, nanhte mung ngai zawn rai nga mu, ngu nna ngai nanhte hpe hpyi nem ma de ai. ¹³ Nanhte ngai hpe hpa n shut n hpyit yu myit dai: dai hta n-ga, shawng nnan e dai kabu gara shi ga nanhte hpe hkaw dan ma de yang, ngai hkum hkrang machyi makaw hkrum ai majaw hkring nna hkaw dan ma de ai gaw, nanhte chye nga myit dai; ¹⁴ Nye a hkum shan a majaw nanhte hta nkaw n law shara tai nga rai ti mung, nanhte ngai hpe matsat kau ai hte ban kau mi ai n re ai sha, Karai Kasang a lamu kasa hpe zawn, gaja wa, Yesu Hkristu hpe zawn, ngai hpe hkap hkalum la mi ai. ¹⁵ Dai rai yang gaw, nanhte tinang hkum shaa ai gaw ya kanang rai nga ma lit ta? Kaning rai nme law, nanhte gaw tinang a myi malawk la nna, ngai hpe jaw lu taw gaw, jaw na pyi gwi myit dai hpe, ngai nanhte a lam sakes hkam nga nngai. ¹⁶ Ya chyawm ngai gaw nanhte hpe dai teng man ai lam tsun dan ma de ai majaw, nanhte a hpyen wa tai wa ni ai kun? ¹⁷ Shanhte gaw nanhte a lam tsang ma ti mung, mai kaja ai hku tsang ma ai n rai; nanhte gaw shanhte a lam tsang nga myit ga, shanhte gaw nanhte hpe hkum shadang mayu da myit dai. ¹⁸ Ngai nanhte hte rau nga nga yang sha, kaja ai lam hpe myit tsang mai na n rai; galoi rai ti mung kaja ai lam hpe myit tsang nga na, mai kaja nga ai. ¹⁹ Nye a ma kaji ni e, Hkristu a shing-yan nanhte hta hkum wa ai du hkra, shangai wa ai shinggyim machyi hpe ngai nanhte a matu naw hkam nga nngai. ²⁰ Nanhte a lam ngai myit law la nga nngai majaw, ya nanhte hte rau nga nga lu nna, nye a nsen galai lu na hpe, ngai ra nga nngai. ²¹ Jep ai tara npu e nga mayu ai ni e, dai jep ai tara hpe nanhte n chye na nga myit ni? ngai hpe tsun dan mi. ²² Kaning rai nme law, ka da nga ai hte maren, Abraham gaw shadang sha lahkawng lu nga ai; langai mi gaw shingnan num a kasha rai nga ai, langai mi gaw numdung num a kasha rai nga ai. ²³ Shingnan num a kasha gaw, masha a hkum shan hte shangai wa sai; numdung num a kasha chyawm gaw, ga ndat hte maren shangai wa sai. ²⁴ Ya dai lam hte gaw ga shadawn rai nga ai; dai num lahkawng gaw dai ga shaka lahkawng hte bung nga ai: langai mi gaw Sina bum kaw na rai nga ai rai nna, mayam tai na matu kasha shangai dat wu ai, Hagara rai nga ai: ²⁵ dai Hagara gaw, Arabi mung na Sina bum rai nga ai: shi gaw ya e dè nga ai Yerusalem hte bung nga ai; kaning rai nme law, shi gaw shi a kashu kasha ni hte nawng, mayam rai nga ma ai. ²⁶ Ntsa de rai nga ai Yerusalem chyawm gaw, numdung num rai nga ai rai nna, anhte a kanu mung rai nga ma li ai. ²⁷ Kaning rai nme law, Kasha n shangai ai maudung num e, kabu gara nga u; Shinggyim machyi n hkrum ai num e, garu nna kabu jahtau nga u: Gram nga ai num gaw, la lu ai num hta kashu kasha grau nna lu nga ai, nga nna ka da nga ai. ²⁸ Anhte chyawm gaw, hpu nau ni e, Isak hte maren ga ndat a kashu kasha ni rai nga ga ai. ²⁹ Shawng nnan e dai hkum shan hte sha shangai ai wa gaw, dai Wenyi hte shangai ai wa hpe zingri zingrat wu ai hte maren, ya e mung byin nga ai. ³⁰ Rai ti mung, Chyum laika gaw kaning nga tsun a ta? nga yang, Shingnan num hte shi a kasha hpe shapraw kau mu: kaning rai nme law, shingnan num a kasha gaw, numdung num a kasha hte rau sali wunli hpe jawm madu lu na n rai, nga nna tsun nga ai. ³¹ Dai rai nna, hpu nau ni e, anhte gaw shingnan num a kasha ni n rai, numdung num a kasha ni rai nga ga ai. 

 

Galati 5

¹ Anhte shanglawt tai na matu, Hkristu gaw anhte hpe shalawt dat mi ai: dai re ai majaw a grin nga nna, dai mayam a kandang npu e bai hkum ahkang nga myit. ² Yu mu, nanhte matu gadoi hkam myit yang gaw, Hkristu gaw nanhte a matu mara hpa akyu n nga ai, ngu nna ngai Pawlu nan nanhte hpe tsun dan ma de ai. ³ Dai hta n-ga, matu gadoi hkam ai wa gaw, jep ai tara nlang hte hpe shatup la na ra ai, ngu nna matu gadoi hkam ai masha yawng hte hpe, ngai sakse bai hkam nga nngai. ⁴ Jep ai tara hta ding hpring mayu ai ni, nanhte gaw Hkristu hte daw hka wa ma nit dai; nanhte chyeju hta na hkrat mat wa ma nit dai. ⁵ Anhte mahtang gaw, ding hpring ai lu la na myit mada ai lam hpe, dai Wenyi a jaw e kam sham ai hte a la nga ga ai. ⁶ Kaning rai nme law, Hkristu hta e matu gadoi hkam ai lam rai ti mung, matu gadoi n hkam ai lam rai ti mung, hpa akyu n nga ai rai nna, tsaw ra myit hte shachyen ai makam masham hkrai sha, akyu rawng nga ai. ⁷ Nanhte atsawm sha kagat yu ma nit dai: dai teng man ai lam hpe n madat myit ga, nanhte hpe kadai hkum shadang myit ta? ⁸ Ya nanhte myit jung ai lam gaw, nanhte hpe shaga la ai wa kaw na pru wa sai n rai. ⁹ Matsi loi mi gaw muk tawng ting hpe shawawm dat wu ai. ¹⁰ Nanhte myit kaga ga n rawng nga myit dai, ngu nna dai Madu hta nanhte a lam ngai myit da nga nngai: nanhte hpe sharu shatsang ai wa gaw, kadai rai ti mung, tinang mara a jeyang ai hkrum na ra ai. ¹¹ Ya chyawm gaw, hpu nau ni e, matu gadoi hkam ai lam ngai naw hkaw nga yang gaw, hpa majaw zingri zingrat ai naw hkrum nga nngai kun? shing rai hkaw tsun yang gaw, wudang a shatan nhkan shara hpe yeng kau nga sai. ¹² Nanhte hpe myit shalaw ai ni gaw, tinang dai tinang a gadoi dut kau mu ga, ngai ra nga nngai. ¹³ Kaning rai nme law, hpu nau ni e, shanglawt ahkang lu la myit ga, nanhte hpe shaga da ma nit dai: rai ti mung, shanglawt ahkang hpe hkum shan a ginshan hkum shatai mu; tsaw ra ai myit hte shada da yam nga mu. ¹⁴ Na a htingbu wa hpe tinang hkum hte maren tsaw ra nga u, nga ai ga langai sha hta, dai jep ai tara ting dik wa sai. ¹⁵ Shing n rai, nanhte shada da kawa nna sha hkat myit yang gaw, nanhte shada da n shamyit kau myit ga, sadi nga mu. ¹⁶ Da ndai ngai tsun nngai gaw, Wenyi hte hkawm nga mu; shaloi hkum shan a marin ai lam hpe nanhte shadik na myit dai n rai. ¹⁷ Kaning rai nme law, hkum shan gaw Wenyi hte nhtan shai nna marin nga ai; Wenyi mung hkum shan hte nhtan shai nna marin nga ai: nanhte galaw mayu ai n galaw lu myit ga, dai lahkawng gaw shada da nhtan shai hkat nga ma ai. ¹⁸ Dai Wenyi e nanhte hpe lakawn la myit yang gaw, nanhte dai jep ai tara a npu e rai nga myit dai n rai. ^19-21Hkum shan a bungli gaw dan dan leng leng rai nga ai rai nna, dai hte gaw: hpye ai amu, n san n seng ai amu, ngang ai amu, gawng-ngu sumla naw ai lam, Mandan lakle amu, n dawng n yawt ai, ga law ga la ai, manawn masham ai, pawt sindawng ai, shai wa bra wa ai lam, daw hka wa ai lam, hpung karan wa ai lam, nsu nnawn ai, chyaru nang ai, sawse lawklek ai hte bung ai lam rai nga ma ai; shing rai galaw ai ni gaw, Karai Kasang a mungdan a sali wunli hkam la lu na n rai, nga nna shawng e tsun dan ni ai hte maren, ya mung nanhte hpe tsun shadum nga nngai. ^22-23Wenyi a asi chyawm gaw tsaw ra ai kabu gara ai, ngwi pyaw ai, myit galu kaba ai, matsan dum ai, mai kaja ai, kangka ai, myit nem ai hte tinang myit hpe hkang lu na rai nga ai: dai lam hte hpe hkum lu na tara mi n nga ai. ²⁴ Hkristu Yesu hte seng ai ni chyawm gaw, tinang a hkum shan myit mung, myit kayut ai hte marin marit ai hte nawng, wudang hta jen da ma nu ai. ²⁵ Anhte dai Wenyi hte hkrung nga ga yang gaw, dai Wenyi hte mung hkawm nga ga. ²⁶ Anhte kaman lila grang nga nna, shada da jahte tam ai hte, shada da manawn masham ai, hkum rai nga ga. 

 

Galati 6

¹ Hpu nau ni e, masha langai ngai n dum shami e yubak galaw hkrup a yang gaw, Wenyi rawng ai ni nanhte gaw, shing re ai wa hpe shingdi ai myit hte shadaw shalan rai nga mu: nang mung agung alau n hkrum u ga, tinang dai sadi nga u. ² Nanhte shada da a lit hpe gun hpai shingtau nna, Hkristu a tara hpe shatup nga mu. ³ Hpa garai n re ai wa gaw, ngai mung langai ngai rai nga nngai, nga nna rai dum a yang gaw, tinang dai tinang hkum hpe hkalem kau wu ai. ⁴ Langai hte langai gaw tinang a bungli hpe dinglik yu u ga; shaloi shi gaw masha kaga hta n rai, tinang hta sha gumrawng shara rai na ra ai; ⁵ kaning rai nme law, langai hte langai gaw tinang a lit gun hpai shajang na rai nga ai. ⁶ Dai mungga hpe sharin achyin la ai wa gaw, sharin achyin ya ai wa hpe mai kaja ai yawng mayawng hte karan kachyan nga u ga. ⁷ Lam hkum dam myit; Karai Kasang hpe n sawn n sang di lu na n rai: masha gaw gat hkai ai hte maren, dan la na ra ai. ⁸ Tinang hkum shan hta gat hkai ai wa gaw, hkum shan hta na hten byak ai dan la na ra ai; Wenyi hta e gat hkai ai wa chyawm gaw, Wenyi hta na htani htana asak dan la na ra ai. ⁹ Kaja ai amu galaw na, anhte n hki n sang nga ga: kaning rai nme law, anhte myit n yaw ga yang gaw, aten ladaw du jang, anhte dan la na ra ga ai. ¹⁰ Dai re ai majaw, aten ladaw naw pra nga yang, anhte masha nlang hte hpe mai kaja ai amu galaw nga ga, rai ti mung, makam masham a dinghku na ni hpe, grau nna galaw nga ga. ¹¹ Gade wa kaba ai laika hkum hte ngai nanhte hpe nye a lata hte ka da nngai gaw, yu yu mu. ¹² Hkum shan a ahpraw nsam hpe tau yu ai ni kadai mung, Hkristu Yesu a wudang a majaw zingri zingrat ai n hkrum mu ga, nanhte hpe matu gadoi hkam na, adip arip di myit dai. ¹³ Kaning rai nme law, matu gadoi hkam ai ni nan, dai jep ai tara hpe shatup ma ai n rai; rai ti mung, nanhte a hkum shan hta gumrawng gumtawng lu hkra, nanhte matu gadoi hkam na hpe, shanhte ra ma ai. ¹⁴ Ngai chyawm gaw, anhte a Madu Yesu Hkristu a wudang hta kaga, gumrawng gumtawng shara n nga u ga: dai hta e mungkan ga gaw nye a matu jen sat kau ai hkrum nna, ngai mung mungkan ga a matu dai hta e jen sat kau ai hkrum ni ai. ¹⁵ Kaning rai nme law, matu gadoi hkam ai lam rai ti mung, matu gadoi n hkam ai lam rai ti mung, hpa akyu n nga ai: hpan da ai hkum ningnan chyu sha, akyu rai nga ai. ¹⁶ Ndai arawn alai hkan nang ai ni yawng mayawng a ntsa e mung, Karai Kasang a Israela amyu majing a ntsa e mung, ngwi pyaw ai hte matsan dum ai gaw, a nga nga u ga law. ¹⁷ Ya kaw nna kadai mung ngai hpe hkum sharu shatsang ma nu ga: kaning rai nme law, Yesu a nma hkang nye a hkum shing-yan hta ngai gun hkawm nga nngai. ¹⁸ Hpu nau ni e, anhte a Madu Yesu Hkristu a chyeju gaw, nanhte a Wenyi hte rau a nga nga u ga law. Amen.