Dai ni anhte na la lu sai Chyum ga hta Kasa Pawlu gaw Korinhtu mare na hpung masha ni hpe daru sharin nga ai ga na lu ga ai. Korinhtu hpung masha ni gaw Madu Yesu hpe hkap la kam sham ai tsawm ra ning rai wa sai rai ti mung shanhte a myit mang hkawm sa ai lam ni hta Madu Yesu a tsaw ra myit he shi a sharin shaga ai lam ni hpe chye na ai maka n shapraw dan lu ma ai. Dai hta jan nna, shanhte gaw ma kaji ni zawn shada da manawn masham ai akyang hpe madun nga ma ai. Bai nna ma kaji ni ginsup rai kashun hkat let ga li ga law ai lam galaw ai zawn Korinhtu hpung masha ni hta ga li ga law ai lam nga nga ai. Ndai zawn re ai akyang lai len hte hkawm sa ai hpung masha ni gaw wenyi makam masham hte hkawm sa asak hkrung ai lam hta ma chyangai naw rai nga ma ai lam hpe Kasa Pawlu tsun shaleng dan nga ai.
Dai ni anhte ni mung, shaning hku hti ga nga yang Hkristan tai ai ram ram na ai hkrai rai saga ai. Anhte a sak hkrung kanawn mazum ai lam ni hpe kayin mada yu ai shaloi
hpung masha shada da a lapran e mung, dinghku masha shada da a lapran e mung manang wa awng dang na hpe manawn masham ai myit, manang a akyu jahten mayu ai myit, arawng mala shingjawng hkat nna n ju n dawng, kashun kashe, ga li ga law ai lam ni hpe naw mu lu nga ga ai. Dai zawn re ai lam ni anhte hta naw nga dingsa gaw anhte mung makam masham wenyi lam hta ma chyangai zawn rai nga ai ni re ai lam dinglik la lu nga ga ai. Ndai shaning ningnan hta shang wa nga ai ten hta du na ra ai shaning tup hta anhte a makam masham wenyi sak hkrung ai lam hta hkalung ai ban kaw nna kunghpan n-gun jat wa ai madang de gara hku shamu shamawt rawt jat sa wa na matu yaw shada hkyen lajang sa wa yu ga.
Makam masham galu kaba wa na lam hkyen lajang ai hta shawng ningnan anhte chye ra ai gaw ya yang e anhte gara madang kaw nga nga ga ta? Dai madang kaw nna rawt jat wa hkra shai wa galai wa ai lam hpa baw nga ra a ta ngu ai ga san hpe htai ra nga ga ai. Anhte a madang gara kaw rai nga ai lam Kasa Pawlu Korinhtu masha ni hpe daru sharin ai ga kaw nna anhte nan mung Korinhtu masha ni zawn makam masham lam law law hta naw hkalung ai ni re ai lam chye lu saga ai. Dai ban kaw nna makam masham hta ginsa ngang grin ai hpung masha ni tai wa lu hkra anhte hta byin tai ra ai lam lahkawng hpe Kasa Pawlu matut nna sharin ya nga ai.
Langai ngu na hpe Kasa Pawlu ga shadawn hku tsun da ai gaw, hpung masha ni gaw Karai Kasang a yi hkauna re, ngu ai rai nga ai. Anhte Karai Kasang a yi hkauna rai nga ga yang gaw shi anhte hta gat hkai ai nli ni hpe hkap la ai ni anhte rai nga ga ai. Dai anhte hkap la tawn ai nli ni hpe tu pru wa nna asi si ai nli tum ni byin tai u ga Karai Kasang gaw yi hkauna na ga hpe hkyen lajang ai zawn anhte a myit masin kraw lawang hpe lajang ya nna anhte hta hkai da ai shi a mungga hpe asi si wa shangun nga ai. Yi hkauna gaw ja ai nsi naisai shapraw lu u ga namhpun rawng ra nga ai. Yi sun hkauna hta ga sau kaja na matu yi hkauna galaw ai wa gaw namhpun hpe law hkra shakut tam bang nga ai. Dai hte maren Karai Kasang mung masha a myit kraw lawang hta shi a mungga tu kaba wa hkra Chyoi pra ai wenyi a shamu shamawt ai bungli amyu myu hte myit masin kraw lawang hpe hpaw ya nga ai.
Dai re ai majaw, tsaw ra ai hpung masha hpunau nauna ni e, numbat langai ngu na anhte htawt na lahkawm gaw, anhte a hkum hkrang myit kraw lawang hpe Karai Kasang hpe ap ya ai lahkam re. Karai Kasang anhte a myit kraw lawang hpe jai lang nna shi a mungga hpe gat hkai u ga. Karai Kasang shi a wenyi hte anhte a myit masin hpe lajang ya nna shi a mungga tu kaba wa let asi kaja law law si shapraw shangun u ga. Karai Kasang hpe anhte a myit masin hkum hkrang ap nawng ai kyu anhte hpyi ga. Dai kyu hpyi ai hte maren Karai Kasang anhte hpe jai lang na hpe mung jin jin rai nga ga. Karai Kasang a mungga gaw anhte a myit masin hta dingtawk du ai mung nga ai. Law malawng gaw anhte hpe jaw da chyalu rai sai Chyum Mungga hku nna anhte kaw du nga ai. Dai Chyum Mungga a lachyum hpe hkan nna ka jahtuk da ai mahkawn mangoi ni kaw na mung Karai Kasang a Mungga hpe anhte hkap la lu ga ai. Chyum laika hpe hti sharin la nna Madu Yesu hte kanawn mazum rau hkawm rau sa ai gaw makam masham hta rawt kaba wa ai lam a matu nachying ahkyak ai lam langai mi rai nga ai. Dai rai nna ndai lam hta myit lawm nna shakut mayu ai hpunau nauna ni a matu du na ra ai shata kaw nna tinang hkrai Chyum Laika hti ai lamang hpe hpung woi sara wa hku nna lajang shabra na re. Anhte a hpung N-gun Awai hpawng galaw ai ten hta Chyum Laika machye machyang hta gade daram jat wa sai hpe chye lu hkra n-gun sharawt shingjawng poi woi galaw lu hkra shakut sa wa na re. Yawng shang lawm na matu ahkaw hkang nga ai hte maren yawng hpe saw shaga nngai.
Lahkam lahkawng ngu na hpe mung Kasa Pawlu gaw ga shadawn lang nna sharin da nga ai. Anhte hpung masha ni gaw Karai Kasang a nta re ngu nna tsun ai. Kasa Pawlu gaw hpung masha langai mi a hkum hkrang hpe mung hpung masha law law hpawng de ai wuhpung wuhpawng hpe mung Karai Kasang shanu nga ai nta shing n rai htingnu hte shadawn dawn re ai hpe mu lu ga ai. Ndai yang e Karai Kasang a nta ngu ai gaw Karai Kasang shanu nga ai shara ngu ai rai nga ai. Ga shadawn ndai gaw anhte a hpung hte mung seng nga ai. Rai sa, anhte a hpung gaw Karai Kasang shanu nga ai nta re. Dai rai yang kaning san ai nta wa rai nga ga ta? Kawa hte galaw nna shangu hte galup ai nta rai ni? Hpun pyen hte galaw nna hpri hpraw hte galup ai nta rai ni?
Wut hte shing n rai pilat hte galaw nna wut pa hte galup ai nta rai kun? Shinggan maga nna mu lu ai nta hkrang hpe hpa hte galaw da ai gaw dai daram ahkyak ai n re. Kaning re ai nta mi rai nga ga tim Karai Kasang anhte hte kam shanu nga ai hpe mahtang chyeju dum let kabu gara shara rai nga
Lahkam masum ngu na gaw, hpung hpe woi awn nga ai hpung woi sara, hpung komiti ningbaw ningla ni hte hpungtau ni a matu Kasa Pawlu lam madun da ai naw nga ai. Kasa Pawlu shi hkum nan hte shi a manang wa Apolo hpe Karai Kasang a shingdep singtau ni ngu yin la ai re. Hpung hpe lam woi ai ni anhte langai hte langai mung tinang a hkum hpe Karai Kasang a shingdep shingtau re ai lam yin la lu ga ai. Shingdep shingtau ni ngu ai gaw shada da arawng kashun let shingjawng hkat nga na lam n nga ai. Kasa Pawlu shi hkum nan hpe nli gat hkai ai wa hku mu la nna shi a manang wa Apolo hpe hkai da sai nli a ntsa e hka jaw ai wa hku tsun nga ai. Amu n bung hkat ai. Rai ti mung, lahkawng yan gaw galaw ra ai bungli re. Langai mi hpe galaw ai wa gaw kaga hpe galaw ai wa hta grau grit ai shing n rai grau reng ai ngu jahpoi ai shing n rai arawng mala shara n nga ai. Shan lahkawng yan hte gingdan ai shabrai hpe gaw Karai Kasang jaw na sha re. Kasa Pawlu nan tsun ai gaw,“ hkai ai wa hte hka jaw ai wa gaw maren shingdep singtau rai ma ai.“ Tu pru wa nna asi si shangun ai gaw Karai Kasang rai nga ai. Hpung amu gunhpai ai anhte ni mung tinang galaw nga ai magam bungli hpe ndai zawn chye na mai ga ai. Hpung woi wa galaw ai bungli hte Hpungtau wa galaw ai bungli, hpung komiti ni galaw ai bungli hte hpung masha amu shatsam hkrum ai ni galaw ai bungli, langai hte langai shai hkat nga ai. Rai ti mung dai bungli ni yawng gaw Karai Kasang hpe shingdep shingtau ai bungli ni hkrai re. Karai Kasang gaw anhte yawng jawm galaw ai magam bungli hpe awng dang shangun nga ai. Ndai lam hpe anhte langai hte langai chye na hkap la ga yang gaw hpung a woi awn ai lam hta n ru n ra ga li ga law rai na lam n nga ai. Shada myit hkrum mang rum let makam masham hta rawt jat galu kaba wa hkra hkawm sa wa lu na ga ai.
Dai re ai majaw tsaw ra ai hpunau nauna ni yawng hte e dai ni anhte sharin la lu sai lahkam masum hpe hpung masha da hpung woi ningshawng ni da myit masin kraw lawang hta hkam la nna 2010 ning hta kabye shang wa ga. Wenyi makam mashan hta hkalung ai ma chyangai a ban hpe lai kau da nna, shat ja sha lu nna wa ngan tai ai ngu ai makam masham hta n-gun lapying rawng nna Karai Kasang a mungdan hpe gaw gap lu ai ni tai ai madang de Karai Kasang jaw ya ai n-gun atsam hte rawt sa wa ga law.
Karai Kasang a Amyu Ni
Ningpawt Ninghpang 12:1-3
Mayat sha anhte na la sai Hkanan mung de du ai ten hta Abraham yan Sara gaw asak ugut gu masai rai tim kashu kasha n lu ma ai. Shinggyim masha a yujut hku tsun ga nga yang Sara maudung dung ai majaw shan a dinghku hpe bawsang matut sa wa na kadai nan n nga mat masalu ai. Dai zawn re ai dinghku kaw na Karai Kasang gaw shi a amyu masha shalat na matu Abraham hpe shaga sai re. Karai Kasang a chyeju san san hte sha Abraham yan Sara gaw kasha Isak hpe shangai la lu ma ai. Dai kaw nna gaw ban mi hte ban mi masha grau grau law wa nna Egutu mung e mayam tai nga ai ten hta grai law la ai amyu byin masai. Karai Kasang gaw Israela ngu ai Yaku a kashu kasha ni hpe Egutu mung e mayam yam nga ai kaw na Mawshe a lata hte mawai la sai. Karai Kasang Abraham hpe ga sadi jaw ai „Ngai nang hpe amyu kaba shatai na“ ngu ai dik wa magang sai. „Ngai nang hpe chyeju daju ngu ai chyeju hka hpawk tai shangun nna masha amyu baw shagu gaw na a jaw e gumring gumrat lu la na mara ai“ ngu ai ga sadi hpe gaw Madu Yesu mungkan masha yawng hpe lu la shangun ai hkye hkrang la ai chyeju hta dik wa sai re. Madu Yesu gaw Abraham a amyu rusai kaw nna mungkan ga de du sa sai re. Abraham Karai Kasang a ga hpe kam hpa madat mara let Karai Kasang a jinghku wa tai wa ai hte maren, Madu Yesu hpe kam sham hkap la ai ni anhte yawng hpe Karai Kasang a shayi shadang sha ni tai na ahkaw ahkang jaw mani ai (Yawhan 1:12)
Karai Kasang a amyu ni tai wa ai ngu ai gaw grai hpu la ai ahkaw ahkang langai mi rai nga ai. Abraham a shumashi shumasha ni hpe Karai Kasang gaw myihtoi ni a n-gup hte ayan shadum dum re ai gaw, „Nanhte masha amyu ni hta grau atsam marai kaba rawng nna grau mying dan hkung ai majaw ngai nanhte hpe lata la ai n rai. Nanhte gaw masha amyu kaji hte n-gun kya ai ni rai myit dai. Rai ti mung ngai nanhte hpe tsaw ra ai majaw lata la ai re“ nga ai. Dai ni anhte langai hte langai hpe mung anhte nan a kaja ai lam lama ma ai majaw n re ai sha, Madu Yesu a chyeju hte sha shi a amyu shatai la ai hkrum saga ai.
Dai ni anhte lai wa sai matsat jahku ning na labau hpe kayin yu ai shaloi, Karai Kasang gaw Israela masha ni hpe Egutu mung kaw nna Hkanan mung de woi wa ai zawn anhte hpe ru yak kyin dut amyu myu hkrum ai Myen Mung kaw nna Amerika mung de shi a n-gun rawng ai lahpum hte woi wa sai. Anhte Wunpawng sha ni mung shi a amyu ni rai saga ai. Dai re ai majaw, anhte ndai kaw du nga sai Hkristan Wunpawng sha ni hkap la hkan sa mai ai lam lahkawng hpe dai ni myit yu ga.
- Karai Kasang a anyu tai ai gaw grai manu dan ai chyeju langai mi rai nga ai. Anhte gaw Karai Kasang a tsaw ra hpe hkap la lu ai ni re. Anhte gaw madu n nga ai sagu dumsu ni zawn prang hkawm ai ni n re; kanu kawa n lu ai chyahkrai n mai ni zawn garen gari hkrum nga ga ai n rai; Kari Wa a amyu masha ni rai ga ai majaw shi a makawp maga ai chyeju a npu e myit sim myit sa, myit ngwi myit pyaw ai hte shim nga lu ga ai. Dai re ai majaw anhte gaw galoi mung chyeju shakawn let asak hkrung nga mai ga ai. Anhte chyeju dum na lam law law nga ai hta dai ni laksan chyeju dum mayu ai gaw anhte shaga ai ga a matu re. Anhte a ga gaw Karai Kasang jaw ya ai chyeju re. Anhte langai mi mung shangai ai hte rau hpa baw ga ga na ngu shawng lata la nna shangai wa ai ni n nga ai. Kade a kasha tai na ngu nna lata la nna shangai wa ai ni mung n nga ai. Karai Kasang nan anhte hpe Jinghpaw ga ga ai dinghku hta; Lhongvo ga ga ai dinghku hta, Zaiwa ga ga ai dinghku hta, Lacid ga ga ai dinghku hta, Ngoqchangh ga ga ai dinghku hta, Rawang ga ga ai dinghku hta, Lisu ga ga ai dinghku hta shangai na matu lajang da sai re. Dai re ai majaw anhte kaba wa ai shaloi kanu kawa ni hte shaga kaba wa ai ga gaw chyeju hte hpring ai tsawm htap ai, sari rawng ai ga re. Ndai lam hpe n chye n chyang ai masha ni e jahpoi asawng hkrum ai majaw tinang a ga hpe ga kaya shara n nga ai. Anhte ga ai ga hpe Karai Kasang a matu jai lang mai ai. Anhte a ga hpe sha chye nna kaga Wunpawng ga n chye ai masha ni kaw du yang shanhte ga ai ga hte anhte shanhte hpe Karai Kasang a lam tsun dan lu ai. Madu Yesu a lam sakse hkam lu ga ai. Shanhte lang nga sai laika hpe anhte chye la lu yang laili laika lam hku nna mung shanhte hpe karum shingtau lu ga ai. Tinang a ga gaw Karai Kasang jaw ya ai chyeju re ai majaw tianang a ga hpe yin la lu jang she anhte gaw Karai Kasang a man e hkum hkrang, machye machyang hte wenyi hkamja ai masha langai tai lu ga ai. Wunpawng ga a myu law law hpe chye shaga ai ni gaw chyeju law law hkam la ai ni re. Ga chye ai majaw kadai hte mung chye kanawn mazum ai hte Karai Kasang a tsaw ra myit hpe n dut n dang lu garan kachyan lu nga ai. Ngai Miwa ga de sasana hkawm yang, Wunpawng sha ni law law hpe Jinghpaw ga hte Lisu ga lang nna Madu Yesu a Mungga hpe hkaw tsun lu ai hta kaga karum shingtau ai lam anyu myu hpe galaw lu ai. Miwa ga n chye shaga tim Karai Kasang jaw ya ai ga ni hte Miwa ga na hpunau ni hte kanawn mazum lu ai gaw Karai Kasang a mauhpa chyeju rai nga ai. Anhte a hpung hta chye ga ai ga baw amyu shagu hpe manu shadan nna langai hte langai shagrin shangang hkat nga ga. Anhte Wunpawng sha ni yawng a matu common language tai nga ai Jinghpaw ga a matu Karai Kasang hpe galopi mung chyeju dum nga ga. Ndai hpe grau chye grau chyang wa lu hkra mung shakut shaja sa wa ga. Anhte lung wa ai jawng hkan Jinghpaw laika n sharin la lu saga ai majaw anhte a laika ndai hpe anhte nan maja n-gun dat nna sharin la ga. Ga ngu ai gaw jai lang taw nga yang she jat wa ai. N jai lang ai ga baw gaw yat yat mat wa nga ai.
- Anhte hta kanu kawa tai nga ai ni, anhte a ma ni hpe anhte a ga sharin ya ai lam hta machye machyang jai lang nna sharin ya ga. Ga ngu ai gaw Karai Kasang jaw ya ai chyeju kumhpa re. Ga dai hpe lang nna asak bau hpaji sharin la ra ai. Ga hta grau kunghpan magang sharin la nga ai hpaji hpe mung grau sung grau lawan ai hku sharin la lu nga ai. Anhte a ma ni Wunpawng dingku hta shangai wa ai rai tim, English ginra hta kaba wa ra ma ai. Hpaji sharin shingjawng ai ginra gaw English ga ga ai ginra re. Shanhte hpaji chye jat na matu ahkyak ai. Dai majaw shana homework galaw ai ten hta shanhte hpe English ga hku karum ra yang karum mu. English laik hti ai hta myit rawt hkra Library kaw na laika shap hti na matu n-gun jaw mu. Tinang a ga n mat mat u ga kanu kawa ni nta e shakut nna tinang a ga ga mu. Ma ni malap
Anhte Shang Lawm mai ai Sasana Bungli
Philipi 1:3-8; 4:14-20
Ya sha anhte na la lu sai Chyum ga hta Kasa Pawlu nan de da ai Hpilipi hpung masha ni, Pawlu a sasana amu hta gara hku shang lawm shakut shaja lawm ai lam hpe na lu ga ai. Kasa Pawlu hpung dai hpe nnan de hpang ai ten hta, nat shaden kau ya hkrum ai numsha langai mi a majaw Kasa ni htawng hta bang da ai hkrum ai hta kaga zingri zingrat ai hkrum ma ai (Kasa 16:23). Shing rai Kabu Gara Shiga a majaw zingri zingrat hkrum ai hpe ya hte sha kam sham wa ai hpung masha ni mu shajang ma ai. Dai majaw shanhte gaw Madu Yesu a Kabu Gara Shiga gaw gade wa manu dan ai shiga rai nga ai hpe sung sung chye na ma ai.Kasa Pawlu hte shi a manang ni gaw dai manu dan la ai Kabu Gara Shiga hpe shanhte hpang de gun sa ya ai majaw shanhte grai chyeju dum ma ai. Makam masham ningnan hpe shanhte hkap la lu ai hte rau, dai manu dan la ai Shiga hpe kaga shara de, kaga masha law law hpe garan jaw mayu ma ai. Shanhte a makau grup yin na jinghku jingyu, htingbu htingpyen ni hpe shanhte nan sakse hkam tsun dan ma ai rai nna hpung hta kam sham ai masha law htam wa ai. Rai ti mung tsan ai de nga ai masha ni hpe mung sakse hkam dan lu na grai myit rawt ma ai. Dai re ai majaw shanhte nan n sa du lu ai shara de hkaw tsun hkawm sa nga ai Kasa Pawlu hte shi a manang ni hpe karum madi shadaw ai hku nna shanhte mung dai Kabu Gara Shiga hpe garan kachyan ai amu hta shang lawm na hku daw dan ma ai. Kasa Pawlu Korinhtu mare e Kabu Gara Shiga hkaw tsun let hpung de nga ai ten hta Philipi hpung masha ni shi hpe shadaw ai gumhpraw kumhpa shagun gun rai ma ai. Dai aten na sasana sara ni shabrai hte bungli galaw ai ni n rai ma ai. Hpung masha ni jaw ai tsaw ra kumhpa hta lai nna shabri shabrai n la ma ai. Pawlu gaw janghpang chywi ai lata amu hpe galaw let
Kasa Pawlu Roma mare e htawng rawng nga ai ten hta, shi hpe karum na matu Hpilipi hpung masha ni gaw shanhte hta na kam sham ai hpunau wa Epahprodi hpe shangun dat ya ma ai. Epahprodi sa wa ai ten hta mung lata kaman hte sa ai n re ai sha hpung masha ni a shawang kumhpa hpe la sa wa ya wu ai. Hpilipi hpung masha ni hte Pawlu gaw shaning law law ndai zawn ta gindun nna sasana amu hpe gun hpai ma ai majaw shanhte a lapran e shada tsaw ra makyit mahkai ai myit grai kaba nga ai hpe anhte mu lu ga ai.
Tsaw ra ai Hpung masha hpunau nauna ni e, Kasa Pawlu hte Hpilipi hpung masha ni a matut mahkai ai labau maumwi ni kaw nna anhte mung sasana amu hta gara hku mai shang lawm na lam ni hpe sharin la lu ga ai. Dai ni na anhte a prat e Madu Yesu Hkristu a sasana bungli hta gara hku ladat shaw nna mai shang lawm na ga ta?
I Anhte hta na hpung masha marai langai ngai hpe Chyum Mungga hte sasana hpaji sharin la lu hkra jawm bau jawm karum la nna sasana amu hta ap nawng gunhpai na matu lam lajang ya lu ga ai. Hpilipi masha ni gaw shanhte a sara wa hpe nan madi shadaw ai hku nna bungli shang lawm ma ai. Anhte a hpung hta Pawlu zawn jin chyalu rai nna dum nta hpe na na kau da nna sumtsan de sasana sa galaw lu ai masha n nga ai. Dai re ai majaw dai zawn re ai ap nawng ai masha nga wa hkra anhte a hpung masha ni hta Karai Kasang a magam gun na shaga la hkrum ai ni hpe Chyum jawng kaba de dat nna hkyen lajang mai ga ai. Karai Kasang a magam hta ap nawng chye ai mahkawn shabrang ni nga wa hkra kanu kawa rai nga ai anhte gaw shanhte hpe lam hpaw ya ai hte n-gun jaw mai ga ai. Anhte a ma ni college jawng ngut ai hpang Chyum jawng matut lung na matu madi shadaw lam hpaw ya mai ga ai. Hpung masha yawng jawm shakut yang byin mai ai sha re. Ap nawng lu ai mahkawn shabrang ni nga wa hkra anhte kanu kawa rai nga ai ni anhte a ma ni hpe kaji kaw nna myit sharawt n-gun jaw mai ga ai. Ma ngai naw rai yang Karai Kasang hpe ap nawng da ai lam chye ai majaw hpung hte sasana bungli hta shang tsap ai masha law law nga ai. Ma ni hpe n-gun jaw lam madun ai shaloi mung shagwi ai hku n re ai sha Karai Kasang shanhte hpe Shi a magam hta ap nawng na matu myit jasu ya yang, shanhte dai hpe madat mara lu hkra n-gun jaw lam madun la ai hku galaw sa wa ga.
II Sasana magam hta shang tsap taw nga sai sara sarama ni hpe madi shadaw ai hku sasana magam hta anhte shang lawm lu ga ai. Buga hpung langai sha hku nna n dang galaw ai bungli rai yang, Ginwang hpung shing n gai Mung Zuphpawng Ginjaw kaw nna dat ai sasana sara ni hpe madi shadaw mai ga ai. Marai law law a matu garan jaw mai ai alu gumhpraw hte rai ti mung, marai langai mi a matu alaw wa jaw lu ai hku nna mung shang lawm mai ga ai. Sasana sara galaw nga ai magam bungli ni hta mung shang lawm mai ai shara law law nga ai. Ga shadawn laika grai ram tim kanu kawa ni matsan ai majaw jawng n lu lung ai ma ni hpe tsaw ra myit madun nna jawng lung lu hkra karum shingtau ai lam galaw mai ai. Ndai prat hta AIDS ana hte si mat wa ai kanu kawa ni a ma ni chyahkrai hkrai jawng nna kadai n karum ai majaw jawng n lu lung ai ni grai law ma ai. Dai zawn re ai ni hpe karum shingtau ai gaw Madu Yesu a tsaw ra myit hpe tatut sakse hkam ai lam rai nga ai. Sasana ginra e de da ai hpung ni kaw na shanhte hpe lam woi ai masha ni shalat la lu hkra shanhte a ma ni hpe Chyum Laika jawng shalun ya karum ai hku nna mung sasana bungli hta shang lawm lu ga ai.
Ngai naw kaji yang nu yan wa gaw kahtawng ningchyawng hkan hpung amu gun ai ni rai ma ai majaw matsan mayan re ai hku jawng lung kaba wa nngai. Dai ten hta Sasana Sarama Miss Taylor hku nna Amerika mung na Sunday School class langai mi a sasana alu hte ngai hpe madi shadaw ai majaw myit apyaw sha hte lapran tsang jawng hpe lung la lu nngai. Dai hpang lahta tsang jawng lung wa ai shaloi mung Hpung Jawng kaw na madi shadaw ai lu ai majaw myit ru myit tsang n hkrum ai sha lahta tsang hpe shangut la lu ai. Dai hpang Chyum Jawng lung wa ai ten hta mung Buga hpung kaw nna mung, Ginwang Hpung kaw nna mung madi shadaw let Chyum jawng hpe lung la lu ai re. Dai re ai majaw jawng ma ni hpe madi shadaw nna Karai Kasang a amu hta shang tsap lu hkra shakut ya ai mung sasana magam hta shang lawm n-gun dat ai lam re.
III Sasana ginra hta de da sai hpung langai ngai hte magam jawm gun ai hku nna anhte nan sasana bungli hta shang lawm lu ga ai. Ningnan de wa ai hpung hta hpung masha law law garai n nga ai hta kaga alu atan jaw na lam hpe mung naw sharin ya ra ai re ai majaw dai zawn re ai hpung ningnan ni hta bungli gun hpai nga ai tara hkaw sara sarama ni hpe shabri shabrai hte n bau lu shi ma ai. Dai hpung ni lani hte lani galu kaba wa lu hkra Karai Kasang magam gun nga ai hpung sara sarama ni hpe shabri shabrai lam hta madi shadaw lawm lu ai gaw anhte shang lawm mai ai sasana magam amyu mi rai nga ai. Dai ni Miwa mung Yunan ginwang hta nga ai Wunpawng sha ni a hpung law law hta ram ging ai shabri shabrai hte amu gunhpai ai ni n law la ma ai. Tinang a yi sun hkauna maga mi galaw nna rau ai ten hta hpung amu hta shakut lawm rai nga ai hpung law law naw nga ai. Hpung masha law law nga ai mare kahtawng hta hpung amu gun ang ai sara sarama ni a matu gaw shabrai kaji tim hpung masha ni a tsaw ra myit hte shanhte hpa sha yang hpa jaw sha ai majaw loi mi yang hkyen nga ai. Shanhte a ma ni laika hpaji jawng lung ai madang tsaw mat wa jang chyawn gaw hpung amu hpe hprai kau nna ma ni hpe hpaji shakut ya lu na matu tinang a kan bau bungli de aten grau jaw ra wa ma ai. Ndai zawn re ai shara ni hta hpung sara sarama ni hpe madi shadaw la lu ai mung sasana bungli langai mi tai lu nga ai. Kanu kawa ni hpe n lu madi shadaw yang kasha langai ngai a hpaji sharin ai hta madi shadaw ya lu ai mung sasana bungli rai nga ai.
Sasana ginra kaw na Chyum Laika jawng ni gaw Chyum Jawng sara ngu nna san san lu ai ni grai n law ma ai. Chyum Jawng hkan sharin ya ai sara, sarama ni gaw law malawng hpung sara sarama ni sha re. Ndai sara sarama ni gaw tinang a kahtawng buga hpung hta galaw ai ten hta buga hpung kaw na shanhte hpe yu karum ai. Rai tim Chyum Jawng e sharin ya nga ai ten hta shanhte shabri shabrai n lu ai hta kaga mare masha ni kaw na tsaw ra kumhpa ngu ai shatmai shatmaw ni n hkap la lu ma ai. Dai majaw Chyum Jawng e sharin ya nga ai sara ni hpe madi shadaw na matu mung bungli grai nga ai. Dai zawn re ai Chyum Jawng sara sarama ni hpe madi shadaw ai hku nna mung sasana bungli hta anhte shang tsap lawm lu ga ai. Bungli ndai gaw laning mi hta shata masum sha ra ai shara law law nga ai. Shara nkau mi hta gaw shata 9 daram shakut ya ra ai. Shanhte hpe madi shadaw ai gaw shanhte hpe hpung a magam bungli hta grau nna n-gun dat lu na matu galaw ai re ai majaw anhte gaw shanhte galaw ai bungli hta hkambum lu ai ni rai nga ga ai.
IV Anhte nan sasana ginra de du hkawm kawan n-gun jaw ai hku nna sasana bungli hta shang lawm mai ga ai. Ya aten hta anhte gaw laksan hku nna Mission Tours ni hta lawm lu na matu loi mi naw yak nga ga ai. Grau nna ndai ten hta sut hkuwa a majaw anhte nan yak hkak ai lam amyu myu hpe kadup taw nga ai ni re. Rai ti mung dingtaw sa ai Mission Tour hku n re ai sha nta buga de wa let du wa ai shara hkan na hpung ni hte matut mahkai karum shingtau n-gun jaw ai hku nna sasana magam hpe gunhpai lu ga ai. Miwa ga hku lai hkawm wa ai ten hta Wunpawng sha ni nga ai shara hta hkring na aten hpe tau hkrau lajang da nna dai yang na Wunpawng sha ni a nawku jawng hte hpung sara sarama ni hpe sa jahkrum nna shanhte a hpung hta ra ai arung arai ni hpe mari kumhpa jaw ai hku nna shanhte a sasana magam hta shang lawm lu ga ai. Ga shadawn shanhte lang ra ai tsabyi gawm ni la sa ya ai; nawku sa ai ma ni hpe shakawn mahkawn sharin ya ai; hpung masha ni lang na Chyum Laika, Mahkawn Mangoi laika ni hte sharin ai sara sarama ni lang la ai rai ni hpe kumhpa sa jaw ai lam ni hpe mung mai galaw nga ai. Dai zawn re ai hpung ni hpe anhte a hpung hte matut ya nna shanhte galaw nga ai bungli hta dang lu ai made shang lawm ai hku nna anhte marai langai hku nna mung hpung ting hku nna mung sasana bungli galaw lu ga ai. Dai zawn anhte shang lawm ai shaloi shanhte hpe sha karum lu ai n rai anhte nan a makam masham sak hkrung lam hpe mung galu kaba wa shangun nga ai.
Lai wa sai sanit, matsat ning hta ngai Kunming de du ai shaloi, dai kaw na sara manang langai mi gaw ngai hpe kahtawng langai mi kaw na hpung sara langai mi a ma a lam tsun dan ai. Dai ma gaw laika sharin grai ram ai ma re ai majaw lahta tsang jawng ngut nna
Ma dai la tawn ai Major gaw Computer Science re. Dai gaw manga ning sharin yang she janmau gup lu ai baw wa rai taw nga ai. Lahkawng ning ngu na sharin ten du jang kanu kawa ni hpa hte n lu lung shangun mat sai. Ma dai hpe college jawng ngut hkra madi shadaw karum ai masha ra taw nga ai. Dai majaw nye a sara manang wa ngai hpe karum hpyi ai. Ngai mung nta wa nna manang ni hte naw bawngban yu na ngu ngai dang lu ai made sha karum kau da nna wa nngai. Nta du ai hpang hpung sara marai masum hte bai wa sahpaw nna shabrang ma dai hpe
Tsaw ra ai hpunau nauna ni e, lahta na ladat ni gaw anhte nan mai shang lawm ai sasana bungli ladat ni hkrai rai nga ai. Anhte gaw sasana ginra de nga ai hpung ni a sara sarama ni a matu akyu hpyi dum ai lam galaw let sasana bungli hta lahkam sa wa ga. Lani hte lani shawng de lahkam ningnan htawt ai hku nna, tinang a nta na kashu kasha ni hpe Karai Kasang a magam bungli hta shang tsap na matu lam madun n-gun jaw sa wa ga. Matut nna anhte a hpung kaw nna sasana magam gun ai sara sarama ni shalat shapraw lu hkra mung, anhte a kanu mungdan hte kaga mungdan hkan nga ai sasana ginra ni hta anhte hpe Madu Karai Kasang jaw ya ai atsam marai hta hkan nna shang lawm shakut sa wa ga. Dai gaw Madu Yesu Hkristu a hpung a shatawng shada ai Kabu Gara shiga magam hpe shacyen shaja ai lam rai nga ai law.
Post a Comment