NN. 1:26,
I Kor: 3:16
Bai KK gaw, Anhte gaw, anhte a hkrang sumla hte anhte a asam hte bung ai, shinggyim masha hpan ga:
1:27 Shing rai KK gaw shi a hkrang sumla hte maren shinggyim masha hpe hpan da wu ai: shi a hkrang sumla hte maren, KK gaw shi hpe hpan da wu ai: shinggyim lasha hte shinggyim numsha hpe shi hpan da wu ai.
NN laika na hpan da ai maumwi hpe yu ai shaloi, KK gaw, mungkan ga hpe hpan da nhtawm, dai kaw nga ai hkrung mahkrung, ru maru, du maru yawng hpe hpan tawn da ai lam hpe mu lu ai,
raitim, hpan da ai lam kaw na shinggyim masha hpe hpan ai lam gaw kaga arai ni hpe hpan ai hte n bung ai hpe mu lu ai. 1:26 hpe yu ai shaloi, “anhte gaw”, nga ga si lang da nga ai, ndai hpe yu ai shaloi, mungkan n nan hpan ai shaloi kaw na Kawa, Kasha, Chyoi pra ai wenyi gaw nga nga sai lam hpe chye lu ai. Jinhghpaw ga hta anhte ngu ai gaw, marai masum a lahta de rai jang she tsun ai ga re. Dai hta shinggyim masha hpe shanhte a hkrang sumla hte asam bung ai hku hpan da ai hpe mu lu ai. (Image and Likeness) hkrang mung bung ai, n sam mung bung ai hku hpan da ai. Ndai hpe yu ai shaloi, anhte hpe KK hte maren hku hpan ai n re, KK a lawu kaw hpan da ai. Kaga hpan da ai arai ni a lahta kaw hpan da ai. Ngut jang, nsoi nsa, hte wenyi jaw bang da sai re.
Bai masha langai hte langai mung, kaji kaba, kadun kalu, ahpraw, achyang n mung ai hku hpan da nga ai. Dai hta sha n ga, myi man n sam, langai hte langai a nsen ni du hkra n bung ai hku hpan da ai re. ya dai ni ndai kaw du sa ai, hpung masha ni hpe yu dat ai shaloi mung, langai hte langai n bung ai hpe mu lu ai. Ya dai ni mungkan ntsa hta masha wan hkying kaba nga nga ai raitim, langai hte langai nsam, nsen ni n bung nga ai.
Dai nbung hkat ai hpe yu nna, ya na prat hta masha langai a profile ni hpe finger print hte kyem da ai. E.g INC card ni hkan e,
Ya prat hta IT prat rai nga ai hte maren, masha ni gaw, ti nang a information ni, data ni hpe kaga masha ni n mai hpaw, n mai hti, n mai yu la na matu, password ni/ code ni hte pat da ai hpe chye lu ai, raitim, dai hpe n lu lu hkra hack galaw nna lagu yu nga ai computer hacker ni mung nga nga ai hpe chye lu ai. Computer kaw na Numbat ni, key ni kade hte password jaw nna, pat da tim, hacker ni hku nna lu hpaw, lu yu, lu lagu ai hpe mu lu nga ai.
Dai majaw, hpaji ninghkring ni gaw KK hpan da ai hta masha langai hte langai a n bung hkat ai, finger print hpe lang nna, finger print hte computer password jaw da ai hpe mu lu nga ai re.
Anthe a lata maka ndai kaji mi kaw sha langai hte langai KK gaw n bung ai hku hpan da ya nga ai.
Ratim, manu mana manu dan ai data, information ni hpe lu lagu na matu, dai madu wa a, lata hpe daw la nna, dai lata daw hpe la nna, finger print password hpe mai hpaw, mai lagu la ai hpe chye lu ai.
Dai majaw, IT hpaji ninghkring ni gaw, shinggyim masha a myidum hpe bai lang nga ai lam hpe chye lu ai, ndai anhte a myi dum mung langai hte langai n bung nga ai hpe chye lu ai hku re. Tinang madu wa a myi hte yu jang, sha hpaw wa ai hku, kaga masha a myi hte yu jang, n mai hpaw na hku galaw da nga ai hpe mu lu ai.
Ndai zawn KK gaw anhte hpe langai hte langai nga shara n bung ai, apraw n sam, nsen, maka n bung ai hku hpan da ai lam a yaw shada lam gaw, KK a arawng sadang, amying ningsang hpe shakawn shagrau, shadan shadawng na matu rai nga ai.
Anhte shingyim masha ni hpe Function amyu myu hte hpan da ai raitim, dai hku function amyu myu hte hpan da ai lam a Aim gaw langai sha rai nga ai.
Ya anhte jinghpaw wunpawng amyu sha ni a mung masa lam hta yu dat ai shaloi mung, KIO/KIA, KNO, (NDA, KDA) hte kaga amyu sha ni a matu shakut nga ai wuhpung wuhpawng law law nga ai hku re, dai ni yawng mung langai hte langai galaw ai lam n bung ai, raitim, shanhte ni yawng a yaw shada ai lam, bandung gaw langai sha re, amyu sha lawt lu na matu glaw ai lam sha rai nga ai.
Ndai camp kaw
Ya dai ni anhte ndai kaw mung, KCF/JLH nga nna hpaw ninghtan da ai, dai lam ni mung, hpung magam lam, hku nna, KK a lam shadan shatawng na, JLH ni gaw amyu sha lam hku nna KK a lam shadan shatawng na hpaw ai, shakut ai lam ni re, sr. tuja , sr naw ja ni english laika sharin ya nga ai lam ni mung laika hpaji hku nna, KK a lam shadan shatawng na matu galaw nga ai lam ni rai nga ai hku re,
Dai majaw KK gaw anhte hpe n bung ai hku hpan da ai lam gaw, shi a mying ning sang, shi a hpung shingkang hpe shadan shatawng na matu rai nga ai.
Bai, I Kor 3:16-17 hpe yu ai shaloi,
Nanhte gaw KK a nawku htingnu rai nga nna, KK a wenyi gaw nanhte hta e rawng nga ma lit dai hpe, nanhte n chye nga myit ni? Marai langai ngai KK a nawku htingnu hpe sharun shabya nga yang gaw, KK dai wa hpe sharun shabya kau na ru ai; kaning rai nme law, KK a nawku htingnu gaw chyoi pra nga ai; nanhte mung dai zawn rai nga myit dai.
KK gaw anhte hpe hpan da ai shaloi, n soi nsa, hte wenyi jaw bang da ya sai re, dai majaw KK a wenyi gaw anhte hta e rawng nga ai hpe Kasa pawlu tsun nga ai.
Anhte a hkum hkrang gaw anhte hte sha n seng nga ai, KK hte mung seng nga ai re, dai majaw KK a nawku htingnu rai nga ai, KK a wenyi rawng nga ai anhte a hkum hkrang hpe awu asin, n mai galaw ai. jahte sharun ai lam n mai galaw nga ai, malu masha hku nna, (malu masha ngu jang, alak mi hku nna sang lang dan gaw n ra na sai yawng chye nga na re) arawn alai, akyang lailen hku nna mung tinang a hkum hpe machyi na hku, hten run na hku, ana ahkya kap na hku n mai galaw nga ai. KK a nawku htingnu rai nga ai anhte a hkum hkrang hpe jahten sharun yang, KK mung anhte hpe sharun shabya kau na re hpe kasa pawlu tsun nga ai re.
Ngai chyumjawng kaw bungli galaw ai shaloi, jawng up wa la tsun tsun re ga naw dum ai hku re, kade ahkyak ai bungli raitim, hpawt de n ngut n mai sha n rai jang, nhtoi hkyen n yup ai sha hkum galaw ngai tsun tsun re, dai hku raitim, hpang de asak kaba wa ai shaloi, tinang a hkum hpe hkra wa ai baw re nga tsun tsun re hku re.
Langai mi gaw, Putao , machyang baw kaw na hpung up u sa, Rev. N-gawk Yaw tsun ai ga re, jahpawt yup rawt ai hte myi man hkum myit mu nga ai hku re, yawm dik minutes 15 daram na ai hpang she myit ra ai nga tsun ai hpe dum ai hku re, ya shi asak 100 ning jan wa tim, myi set n set ai sha chyum laika lu hti ai hpe mu lu ai hku re, e ndai zawn re ai ni hpe ti nang a hkum hkrang hpe nhten hkra, hkam ja hkra nga na matu, sadi ra ai lam ni re ai hpe mu lu ai,
Dai majaw anhte gaw, KK a hkrang, n sam hpe daraw ai ni, gun ai ni rai nga ai majaw, anhte langai hkra gaw KK a Hpung shinggang arawng sadang, amying ningsang hpe shadan shatawng ai ni, hkaw tsun ai ni, sakse ni rai ra nga ai law.
KK a wenyi shanu ai anhte a hkum hkrang hpe awu asin, jahten jarun ai lam n mai galaw nga ai.
Post a Comment