YAWHAN A SHINGRAN LAIKA

Shingran 1

¹ Da ndai gaw, ahkying ladaw gade n na yang, byin wa na ra ai lam ni hpe, Hkristu a shangun ma ni e madun dan na matu, Karai Kasang gaw dai madu hpe jaw dat ai, Yesu Hkristu a shingran ga rai nga ai; dai Madu gaw shagun dat nna shi a lamu Kasa a lata hte shi a shangun ma Yawhan hpe dai shingran ga shadan dan wu ai: ² Yawhan mung Karai Kasang a mungga hte, Yesu Hkristu hte seng ai sakse a lam mu mamu hte hpe sakse hkam ya wu ai. ³ Ahkying ladaw ni wa magang ra ai majaw, ndai ga hpe hti dan ai wa hte, ndai myihtoi ga hte hpe madat mara nna dai hta ka da mada hpe hkan galaw ai ni gaw, a lu ma ai. ⁴ Ngai Yawhan gaw, Asi a mung e nga ai Hpung sanit hte hpe, ga shana dat nngai: ndai aprat e, moi na aprat e a nga nga nna, htawm hpang e du na ra ai wa kaw nna mung; shi a tingnyang man e nga ai wenyi sanit kaw nna mung; ⁵ kangka re ai sakse wa, si mat ai ni hta na kasha alat, dinghta ga na hkawhkam ni hpe up ai Madu Yesu Hkristu kaw nna mung, chyeju hte ngwi pyaw ai gaw nanhte hta a nga nga ma lit ga, Anhte hpe tsaw ra nna, shi hkum nan a asai hte anhte a yubak kaw na anhte hpe raw dat mi ai hte, ⁶ shi a Kawa Karai Kasang a matu anhte hpe mungdan amyu hte hkinjawng amyu shatai ai wa kaw, hpung shingkang hte daru magam ahkang gaw, htani htana e a nga nga u ga law. Amen. ⁷ Yu mu, shi gaw sumwi hte du sa wa nna, myi yawng mayawng mung, shi hpe galun gaw ai ni mung, shi hpe hkap mu na ma ra ai rai nna, dinghta ga na amyu nlang hte gaw, shi a majaw sharung shayawt na ma ra ai. Rai sa, Amen. ⁸ Ngai gaw Alhpa mung rai nga nngai, Omega mung rai nga nngai, nga nna ndai aprat e, moi na aprat e a nga nga ai hte, htawm hpang du na ra ai wa, Chyahtum chyalai n-gun rawng ai Madu Karai Kasang gaw tsun nga ai. ⁹ Yesu a nni nkri hta mung, mungdan hta mung, hkam sharang ai hta mung nanhte a kanawn manang rai nga ai, nanhte a hpu nau wa, ngai Yawhan gaw, Karai Kasang a mungga hte Yesu a sakse majaw, Patmu ngu ai tsunlawng hta nga nga nngai. ¹⁰ Dai Madu a nhtoi hta e Wenyi hta ngai nawng mat wa ai rai nna, Nang mu ai hte maren laika hta ka la nhtawm, Ehpesu, Samurna, Pergamu, Htuatira, Sardi, Hpiladehpi hte Ladoki mare ni hta nga ai, ¹¹ Hpung sanit hpang de shagun dat u, nga nna nye a shingdu de pahtau zawn ngoi ai nsen kaba ngai na nngai. ¹² Dai ngai hte shaga ai nsen hpe mu lu hkra ngai kayin yu nngai. ¹³ Shing rai kayin yu yang, ja pyengdin sanit hte dai pyengdin ni a kaang e masha Kasha zawn san ai wa langai mi ngai mu nngai: dai wa gaw lahkre du ai palawng galu bu hpun nna, sinda hta aja shingkyit kyit nga ai. ¹⁴ Shi a baw hte kara gaw, hpraw ai sagu mun hte hkyen zawn hpraw nga ai; shi a myi gaw wan shinglet zawn tu nga ai; ¹⁵ shi a lagaw yan gaw, wan htung hta jen kau sai magri jet zawn san nga ai; shi a nsen gaw, hka law law kadu ai nsen zawn wu nga ai. ¹⁶ Shi a hkra lata hta shagan sanit lang da wu ai; shi a n-gup hta na nshan lahkawng dai ai ntawng nhtu pru nga ai; shi a myi man gaw htoi kang ai jan zawn tu ala nga ai. ¹⁷ Dai wa hpe mu jang, shi a lagaw nhpang e si ai wa zawn ngai kadawng taw mat nngai. Shi gaw shi a hkra lata nye a ntsa e mara ya nna, Hkum hkrit et, ngai gaw ningshawng wa mung, jahtum wa mung, rai nga ai hte, ¹⁸ a hkrung nga ai wa mung, ngai rai nga nngai: ngai si ni ai rai ti mung, yu u, htani htana prat dingsa e ngai a hkrung nga nngai: si hkrung si htan mungdan a sumsaw hte, katsan ga na sumsaw ngai lang nngai. ¹⁹ Dai re ai majaw, nang mu lu sai hpe mung, ya nga nga ai hpe mung, htawn hpang e du na ra ai lam hte hpe mung, ka da u: ²⁰ nye a hkra lata hta nang mu lu ai shagan sanit hte, aja pyengdin sanit ni a mau htum ai lam, ka da u; dai shagan sanit gaw, Hpung sanit ni a kasa ni rai nga ma ai, dai pyengdin sanit mung, Hpung sanit rai nga ai. 

Shingran 2

¹ Ehpesu mare na Hpung a kasa hpe ning ngu ka dat u: Hkra lata hta dai shagan sanit lang da nna, aja pyendin sanit ni a kaang e hkawm sa ai wa ning nga nga ai: ² Na a arawn alai, na a amu bungli hte na a hkam sharang ai hpe mung, n hkru n hkra re ai masha hpe nang n hkam lu ndai mung, kasa n re ai kasa hpyi hpun ai ni hpe nang san dinglik yu nna, shanhte a masu ai hpe shadan kau ya lu ndai mung, ngai chye nga nngai. ³ Nang shakut sharang nga nna, nye a amying nsang a matu mara tsin-yam tsindam hkam ai hte, nang n hki n ba nga ndai. ⁴ Rai ti mung, shawng na tsaw ra ai lam hpe nang kau da ndai majaw, nang hta mara shagun shara ngai mu nngai. ⁵ Dai re ai majaw, nang garai n hkrat yang na shara hpe bai dum u; myit malai lu u, shawng na arawn alai bai hkan u: shing n rai yang, ngai nang kaw du nna, nang myit malai n lu yang gaw, na a pyengdin hpe de a shara na sit kau ya na de ai. ⁶ Rai ti mung, ngai n dawng n yawt ai Nikola a sape ni a arawn alai hpe, nang mung n dawng n yawt nga ndai majaw, akyu langai mi nang lu ndai. ⁷ Wenyi gaw Hpung ni hpe kaning nga tsun ai gaw, na tu ai wa gaw na la u ga. Dang lu ai wa hpe, Karai Kasang a Hparadisu e tu ai asak hkrung ai hpun a asi sha lu na ahkang, ngai jaw na we ai. ⁸ Bai, Samurna mare na Hpung a kasa hpe ning ngu ka dat u: Si sai rai ti mung a hkrung nga ai ningshawng wa hte jahtum rai nga ai wa gaw, ning nga nga ai: ⁹ Nang hkrum ai zingri zingrat hte matsan mayan hpe ngai chye nga nngai; rai ti mung, nang sut su nga ndai: Yuda masha ngu ai, rai ti mung, Yuda masha n teng ai sha, Satan a naw ku jawng ngu ai ni a shatan nhkan ai hpe, ngai chye nga nngai. ¹⁰ Nang hkrum magang ra ai nni nkri hpe hkum hkrit et; yu u nanhte hpe chyam yu na, Nat gaw nanhte hta na nkau mi hpe htawng hta sharen da nna, nanhte nhtoi shi ya tup zingri zingrat ai hkrum na ma rin dai. Si hkra maju jung nga u, shaloi ngai nang hpe asak janmau jaw na de ai. ¹¹ Wenyi gaw Hpung ni hpe kaning nga tsun ai gaw, na tu ai wa gaw na la u ga. Lahkawng lang ngu na si ai lam gaw, dang lu ai wa hpe hkra lu na n rai. ¹² Bai, Pergamu mare na Hpung a kasa hpe ning ngu ka dat u: Nshan lahkawng dai ai ntawng nhtu lang ai wa gaw, ning nga nga ai: ¹³ Nang de nga ai shara ngai chye nga nngai; Satan a tingnyang dung nga ai shara e nang de nga ndai. Nye a mying nsang hpe nang manoi nga ndai rai nna, Satan de nga ai shara e ngu ai, nanhte a kaang e, nye a kangka re ai sakse wa Antipa sat kau hkrum ai nhtoi hte hta pyi, nye a makam masham lam hpe nang n nyet kau ndai. ¹⁴ Rai ti mung, sumla ni hpe nawng ya ai hkungga sha na hte hpye ai amu galaw na lam ngu ai myit kataw shara hpe, Israela kashu kasha ni a man e tawn da na, Balak hpe hpaji daw ya ai Balam a sharin shaga ai lam hta hkan nang ai ni nkau mi, na a hpung hta lawm nga ma ai majaw, nang hpe mara shagun shara loi mi, ngai mu nngai. ¹⁵ Nikola a sape ni sharin shaga ai lam hta dai hte maren, hkan nang ai ni nkau mi mung, nang hta lawm nga ma ai. ¹⁶ Dai re ai majaw myit malai lu u; shing n rai yang, ngai nang kaw alawan du nna, nye a n-gup nna pru ai ntawng nhtu hte shanhte hpe gasat na we ai. ¹⁷ Wenyi gaw Hpung ni hpe kaning nga tsun ai gaw, na tu ai wa gaw na la u ga. Dang lu ai wa hpe, makoi da ai manna hpe mung, ahpraw nsan ai lung din hpe mung, ngai jaw na nngai: dai lung din hta amying ningnan ka da nga ai rai nna, dai hpe lu la ai wa hta kaga, kadai mung dai amying hpe n chye ya lu ai. ¹⁸ Bai, Htuatira mare na Hpung a kasa hpe ning ngu ka dat u: Wan shinglet zawn tu ala ai myi hte, magri jet zawn san ai lagaw tu ai Karai Kasang a Kasha gaw, ning nga nga ai: ¹⁹ Na a arawn alai, tsaw ra ai myit, makam masham, amu gun hpai ai hte shakut sharang ai hpe mung, na a hpang jahtum na amu bungli gaw shawng na hta grau law nga ai hpe mung, ngai chye nga nngai. ²⁰ Rai ti mung, tinang dai myihtoi num nga ai, dai numsha Yezebela gaw, nang hta naw nga lu ai majaw, nang hpe mara shagun shara ngai mu nngai: shi gaw nye a shangun ma ni hpe, hpye ai amu galaw na hte sumla ni hpe nawng ya ai hkungga sha na lam sharin ya nna, shanhte hpe shut shangun mu ai. ²¹ Ngai shi hpe myit malai lu na aten jaw da rai ti mung, shi a hpye ai amu a lam hta na myit malai n lu hkraw nga ai. ²² Yu u, ngai shi hpe yup ra hta kabai tawn na we ai; shi hte rau num shaw la shaw ai amu galaw ai ni hpe mung, shi a arawn alai hta na myit n malai ma yang gaw, tsin-yam tsindam kaba hta, ngai kabai tawn na ma we ai. ²³ Shi a kashu kasha ni hpe si lam hte ngai sat kau na we ai: shaloi, nhkyun hte kraw lawang hpe sawk yu ai wa ngai rai nga nngai gaw, Hpung ni yawng chye lu na ma ra ai: nanhte hta na langai hte langai hte hpe, tinang ni a amu hte maren ngai htang jaw na ma de ai. ²⁴ Dai hta kaga, masha ni shamying dam ai, Satan a sung htum ai lam hpe n chye n chyap ma ai hte, dai sharin shaga ai lam hpe n hkan nang ai, Htuatira mare hta naw ngam nga ai ni nanhte hpe ngai tsun ma de ai gaw, Ngai nanhte hta lit kaga naw n shajat na ni ai: ²⁵ rai ti mung, nanhte lu ai made gaw, ngai du ai du hkra a manat nga mu. ²⁶ Dang lu ai wa hte, prat htum hkra nye a arawn alai hkan nang ai wa hpe, masha mungdan ni a ntsa e up ai ahkang ngai jaw na we ai: ²⁷ shi gaw shanhte hpe hpri sumdoi hte up nna, di bu sama a di bu ni hpe zawn a grawp kau ai, shanhte hkrum na ma ra ai: ning re ai ahkang nye Wa kaw na ngai lu la ai rai nna, ²⁸ dai ninghtoi gintawng ngai shi hpe jaw na we ai. ²⁹ Wenyi gaw Hpung ni hpe kaning nga tsun ai gaw, na tu ai wa gaw na lu u ga. 

 

Shingran 3

¹ Bai, Sardi mare na Hpung a kasa hpe ning nga ka dat u: Karai Kasang a wenyi sanit hte, shagan sanit hpe lang ai wa gaw, ning nga nga ai: Na a arawn alai ngai chye nga nngai: nang gaw asak hkrung ai wa ngu ti mung, nang chyasi rai na ndai. ² A maja nga u, naw ngam nga ai si magang wa nga ai hte hpe shadaw shangang ya u: kaning rai nme law, nye a Karai Kasang a man e na a amu bungli hkum tsup nga ai hpe, ngai n mu ya de ai. ³ Dai re ai majaw, nang kaning rai hkam la lu ai hte, na la lu ai lam hpe bai dum u; dai hta hkan nang nga nna, myit malai lu u. Nang n maja nga taw gaw, lagu lagut zawn ngai du na ring ngai; gara aten e ngai nang kaw du sa na ring ngai mung, nang n chye na ndai. ⁴ Rai ti mung, tinang a hpun palawng hpe awu asin n shakap ai amying nkau mi, Sardi hpung hta lawm nga lit dai: shanhte gaw ging dan nga ma ai majaw, hpraw ai bu hpun let, ngai hte rau hkawm sa lu na ma ra ai. ⁵ Dang lu ai wa gaw, ning re ai hpun palawng ahpraw bu hpun lu na ra ai; shi a amying hpe dai asak laika hta na ngai gaja wa shaprai kau ya na n rai: dai wa a amying hpe nye Wa a man e mung, shi a lamu kasa ni a man e mung, ngai shadan ya na we ai. ⁶ Wenyi gaw Hpung ni hpe kaning nga tsun ai gaw, na tu ai wa gaw na la u ga. ⁷ Bai, Hpiladehpi mare na Hpung a kasa hpe ning ngu ka dat u: Chyoi pra ai wa, teng man ai wa, Dawi a sumsaw lang ai wa, kadai n la da lu hkra hpaw da nna, kadai n hpaw lu hkra la da ai wa, ning nga nga ai: ⁸ Na a arawn alai ngai chye nga nngai; - yu u, kadai mung n la da lu ai chyinghka na a man e ngai hpaw malang da se ai; - nang n-gun loi mi rawng ndai, nye a mungga hpe nang hkan nang nit dai, nye a amying nsang hpe mung nang n nyet kau nit dai, ngai chye nga nngai. ⁹ Yu u, Yuda masha ngu ai, rai ti mung n teng ai sha, masu nga ma ai, Satan a naw ku jawng hta na nkau mi hpe ngai ap ya na de ai; yu u, na a lagaw nhpang e ngai shanhte hpe sa naw dingnyawm shagun na ma we ai rai nna, ngai nang hpe tsaw ra nga ai gaw, shanhte chye lu na ma ra ai. ¹⁰ Ngai hte seng ai shakut sharang ai lam a mungga hpe nang hkan nang ndai majaw, ga ntsa e nga ai ni hpe chyam dinglik yu na matu, dinghta ga hproi hkra du na ra ai chyam dinglik yu ai nhtoi hta na, ngai nang hpe makawp maga na de ai. ¹¹ Ngai alawan du na ring ngai; na a janmau hpe kadai mung n la kau ya u ga, nang lu ai made hpe a sin nga u. ¹² Dang lu ai wa hpe, nye a Karai Kasang a naw ku Htingnu hta daw nu ngai shatai na we ai: shi galoi mung dai kaw na hpang de pru na n rai; nye a Karai Kasang a mying nsang hpe mung, nye a Karai Kasang kaw na pru nna, sumsing lamu na yu hkrat wa ai Yerusalem mare ningnan ngu ai, nye a Karai Kasang a mare amying hpe mung, ngai hkum nan a amying hpe mung, dai wa a ntsa e ngai ka shakap ya na we ai. ¹³ Wenyi gaw Hpung ni hpe kaning nga tsun ai gaw, na tu ai wa gaw na la u ga. ¹⁴ Bai, Ladoki mare na Hpung a kasa hpe ning ngu ka dat u: Kangka re ai hte teng man ai sakse wa, Karai Kasang hpan tawn da ai a npawt nhpang, Amen ngu ai wa, ning nga nga ai: ¹⁵ Na a arawn alai ngai chye nga nngai; nang katsi ai mung n rai, kahtet ai mung n rai nga ndai, Nang katsi ai, shing n rai kahtet ai, mai rai nga ndai. ¹⁶ Ya gaw, nang kahtet ai mung n rai, katsi ai mung n rai, lum nai rai nga ndai majaw, nye a n-gup hta na ngai nang hpe nhpat kau magang sa de ai. ¹⁷ Kaning rai nme law, Ngai gaw sut su nga nngai, ngai hta sut ring gan chying sa li ai, ngai hpa n ra ni ai, nga ninglen, tsin yam tsindam hkrum ai wa, chyaren garen ai wa, matsan mayan, myi kyaw ai hte singgu krin re ai wa, nang rai na ndai hpe, nang n chye n hka! ¹⁸ Dai re ai majaw, nang sut su u ga, wan mang hta jen kau sai ja jet hpe mung, na a singgu krin re ai kaya hpa masha man e n-dawng lit ga, nang lawai na matu hpraw ai hpun palawng mung, na a myi mu lu lit ga, chye na matu myi tsi mung, ngai kaw na mari la lu na, ngai nang hpe hpaji daw ya de ai. ¹⁹ Ngai tsaw matsaw kadai hpe mung, ngai mara madun nna daru sharin ga nngai. Dai re ai majaw, dum hprang let nga u, myit malai lu u. ²⁰ Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai ti mung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai. ²¹ Ngai dang lu nna, nye Wa a tingyang e shi hte rau dung nga lu ai zawn, dang lu ai wa gaw, nye a tingyang e ngai hte rau dung nga lu na ahkang, ngai jaw na we ai. ²² Wenyi gaw Hpung ni hpe kaning nga tsun ai gaw, na tu ai wa gaw na la u ga, nga nna tsun nga ai. 

 

Shingran 4

¹ Dai hte byin ngut jang, ngai mu nngai gaw, yu u, sumsing lamu e chyinghka hpaw malang nga ai rai nna, ngai na hkrup ai shawng na nsen gaw, pahtau zawn ngoi nga ai hte, Nang de lung rit, htawm hpang e byin na ra ai lam hte hpe ngai nang hpe madun dan de ga, nga nna ngai hte ga tsun nga ai. ² Dai hte tsun ngut ai shaloi jang, wenyi hta ngai nawng mat wa nngai; shaloi, yu u, sumsing lamu hta e tingnyang dung nga ai rai nna, dai tingnyang hta marai langai mi dung nga ai. ³ Dung nga ai wa a ahpraw asam gaw, nagahtoi hte patemya lung seng zawn san nga ai rai nna, dai tingnyang grup yin e gaw, mya lung seng nsan ai n-goilatum jung nga ai. ⁴ Dai tingnyang grup yin e tingnyang hkun mali naw nga nga ai: dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai. ⁵ Dai tingnyang kaw na myi hprap gala ai, mahku ngoi ai nsen hte mu ngoi ai gaw, pru nga ai. Dai tingnyang a man e mung, Karai Kasang a wenyi sanit ngu ai, wan pyengdin sanit tu nga ai: ⁶ bai, dai tingnyang man e pat seng nsan ai nawng ing nga ai; dai tingnyang a kata e mung, grup yin e mung, shingdu aman grup ting myi tu ai dusat amyu mali nga nga ma ai. ⁷ Langai ngu na dusat amyu gaw, hkanghkyi hte bung nga ai; lahkawng ngu na dusat amyu gaw,dumsu kasha hte bung nga ai; masum ngu na dusat amyu gaw, shinggyim masha a myi man man nga ai; mali ngu na dusat amyu gaw, pyen nga ai langda hte bung nga ai. ⁸ Dai dusat amyu mali gaw singkaw kru hpra hpra tu nna, hkum grup e mung, kata e mung, myi hkrai pri rai nga ai: shanhte gaw shani shana n sim n sa, ning nga, Moi na aprat e, ya na aprat e, htawm hpang na aprat e dinggrin a nga nga ai, Chyahtum chyalai n-gun rawng ai Madu Karai Kasang gaw, chyoi pra, chyoi pra, chyoi pra a rai nga ai law, nga nna tsun nga ma ai. ⁹ Dai dusat amyu mali gaw, tingnyang hta dung ai htani htana prat dingsa a hkrung nga ai wa kaw, hpung shingkang, arawng sadang hte chyeju jaw ma ai shaloi e, ¹⁰ dai salang hkun mali mung, tingnyang hta dung nga ai wa a man e dingnyawm nna, htani htana prat dingsa a hkrung nga ai wa hpe naw ku let, dai tingnyang man e tinang ni a ja janmau ni hpe raw tawn da nna, ¹¹ Anhte a Madu Karai Kasang e, nga yawng nga pra hte hpe nang hpan tawn da nna, dai hte gaw na a myit ra ai hku jaw e tai ma ai hte hpan tawn da hkrum ma ai majaw, nang gaw hpung shingkang, arawng sadang hte hpung dagu lu la na ging dan nga ndai law, nga nna shakawn na ma ai. 

 

Shingran 5

¹ Bai, tingnyang hta dung nga ai wa a hkra lata hta, kata e mung ntsa e mung ka da nna, dazik sanit hte shakap da sai laika shabawn hpe ngai mu nngai. ² Shaloi, n-gun ja ai lamu kasa gaw, Dai laika hpaw na hte de a dazik hpe gaw kau na, kadai ging dan nga a ta? nga nna nsen kaba hte jahtau tsun ai, ngai mu nngai. ³ Rai ti mung, sumsing lamu lahta tang, ginding aga ntsa, aga a lawu tsang hte hta, dai laika hpaw nna dai hpe yu lu na, kadai n dang di lu ma ai. ⁴ Dai laika hpaw nna dai hpe yu ging ai wa langai mi muk n mu tam ai majaw, ngai grai wa hkrap nngai. ⁵ Dai rai nna, salang ni hta na langai mi gaw, Hkum hkrap et; yu u, Yuda amyu hta na hkanghkyi ngu ai Dawi a aru madung gaw, dai laika hte de a dazik sanit hpe hpaw lu hkra dang kau nu ai, nga nna ngai hpe tsun dan nngai. ⁶ Shaloi, dai tingnyang hte dusat amyu mali a kaang e mung, dai salang ni a kaang e mung, sat kau hkrum sai nsan ai Sagu Kasha langai mi tsap nga ai hpe, ngai mu nngai; dai Sagu Kasha gaw nrung sanit hte myi sanit tu nga ai; dai myi sanit gaw, dinghta ga ting hproi hkra shangun dat ai, Karai Kasang a wenyi sanit rai nga ai. ⁷ Shaloi dai Sagu Kasha sa nna, tingnyang hta dung nga ai wa a hkra lata na dai laika hpe la wu ai. ⁸ Dai laika hpe lu la ai shaloi jang, dai dusat amyu mali hte salang hkun mali gaw, dai Sagu Kasha a man e dingnyawm ma ai; shanhte langai hte langai tingse hte chyoi pra ai ni a akyu hpyi ai ga ngu ai manam pyaw ai baw hte hpring chyat nga ai ja gawm lang nga ma ai: ⁹ shanhte gaw, Nang sat kau hkrum ndai hte, baw lakung shagu hta na mung, ga amyu shagu hta na mung, amyu baw shagu hta na mung, masha mungdan shagu hta na mung, Karai Kasang a matu na a asai hte masha hpe mari la nit dai rai nna, ¹⁰ anhte a Karai Kasang a matu mara shanhte hpe hkawhkam mungdan hte hkinjawng amyu shatai nu ai hte, shanhte gaw ga ntsa e up nga ma ai majaw, nang gaw dai laika hpe la nna, de a dazik ni hpe gaw kau na, ging dan nga ndai law, nga nna mahkawn mangoi ga ningnan hte mahkawn mangoi nga ma ai. ¹¹ Dai shaloi ngai yu yang, tingnyang grup yin e, lamu kasa ga daga hte, dusat amyu mali hte salang ni a nsen hpe ngai na nngai: dai ni gaw mun mi lang mun mi, hkying mi lang hkying mi law nga ma ai rai nna, ¹² shanhte gaw, Sat kau hkrum ai Sagu Kasha gaw, hpung dagu, sut gan, hpaji byeng-ya, n-gun lagaw, arawng sadang, hpung shingkang hte shakawn kungdawn ai hpe hkam la na, ging dan nga ai law, nga nna nsen kaba hte tsun shakawn nga ma ai. ¹³ Dai hta n-ga, lamu lahta tang na mung, ginding aga ntsa na mung, aga lawu tsang na mung, nammukdara kata na mung, de a shara magup hkan e rawng nga ma ai hpan tawn da ai arai yawng mayawng hte gaw, Tingnyang hta dung nga ai wa hte, dai Sagu Kasha gaw, htani htana prat dingsa, shakawn kungdawn ai, arawng sadang, hpung shingkang hte daru magam, a nga nga u ga law, nga nna shanhte tsun ma ai mung, ngai na nngai. ¹⁴ Shaloi dai dusat amyu mali gaw, Amen, nga ma ai; salang ni mung dingnyawm nna naw ku ma ai. 

 

Shingran 6

¹ Dai Sagu Kasha gaw, dazik sanit hta na langai mi hpaw dat ai shaloi, ngai hkan yu yang, dusat amyu mali hta na langai mi, mu ngoi ai nsen zawn nga ai hte, Sa rit, nga nna tsun ai gaw, ngai na nngai. ² Shaloi yu u, gumra ahpraw langai mi ngai mu nngai, dai hta jawn ai wa gaw ndan lang nga ai; ja janmau mung shi hpe shagup ya wu ai rai nna, dang kau let dang kau na matu nlaw pru sa wa ai. ³ Bai, lahkawng ngu na dazik hpe hpaw dat wu yang, lahkawng ngu na dusat amyu gaw, Sa rit, nga nna tsun ai, ngai na nngai. ⁴ Shaloi gumra kaga, ahkyeng nsan ai gumra, pru wa ai: dai hta jawn ai wa gaw, ga ningtsa na angwi apyaw nga ai lam dawm kau na hte, masha shada da sat hkat shangun na, ahkang lu wu ai rai nna, nhtu kaba mung shi hpe jahpye ya wu ai. ⁵ Bai, masum ngu na dazik hpe hpaw dat wu yang, masum ngu na dusat amyu gaw, Sa rit, nga nna tsun ai, ngai na nngai. Shaloi ngai yu yang, yu u, gumra achyang nga nga ai; dai hta jawn ai wa gaw shi a lata hta joi lang nga ai rai nna, ⁶ dusat amyu mali a kaang nna, Hkaulan mam bye mi na gumhpraw lap mi, muk-yaw mam bye masum na gumhpraw lap mi, ging nga ai; dai tsanlun sau hte tsabyi jahku hpe chyawm gaw, hkum jahten kau et, nga nna nsen tsun pru ai gaw, ngai na nngai. ⁷ Bai, mali ngu na dazik hpe hpaw dat wu yang, mali ngu na dusat amyu a nsen gaw, Sa rit, nga nna tsun ai, ngai na nngai. ⁸ Shaloi ngai yu yang, yu u, atsit nsan ai gumra nga nga ai rai nna, dai hta jawn ai wa a amying gaw, Si du rai nga ai; katsan ga mung dai wa kaw hkan nang nga ai. Ri nhtu hte, hku hku ai hte, ana ahkya hte ga ningtsa na matse labye zingri ai hte sat kau na matu, lamu ga daw mali hta na daw mi a ntsa e up ai ahkang, shanhte lu la ma ai. ⁹ Bai, manga ngu na dazik he hpaw dat wu yang, Karai Kasang a mungga a majaw mung, tinang hkan nang ai sakse lam a majaw mung, sat kau hkrum ai ni a tsu ni hpe, dai tawn hkungri npu e, ngai mu nngai. ¹⁰ Shanhte gaw, Chyoi pra ai hte teng man ai Madu e, dinghta ga e nga ai ni a ntsa e anhte a asai matai htang na, nang gaten du hkra tara n dara ai nga nga na n ta? nga nna nsen kaba hte a jahtau nga ma ai. ¹¹ Dai ni langai hte langai hpe hpraw ai hpun palawng galu jahpun nna, shanhte zawn sat kau hkrum na ma ra ai, tinang ni a kanawn manang ni hte kahpu kanau ni hkum tsup wa lu ai nhtoi du hkra, chyahkring mi naw sim sa nga lu na rai myit dai, nga nna shanhte hpe tsun dan mu ai. ¹² Bai, kru ngu na dazik hpe hpaw dat wu yang, ngai mu nngai gaw, nnang nawn kaba a nawn wa ai; ajan gaw amun chyang hte da ai sumpan zawn asin amang nsan mat nna, shata hkum ting mung asai zawn san mat wa ai; ¹³ lakum hpun hpe nbung kaba e ahpawt yang, de a n myin ai asi hpe sharun kau ai zawn, sumsing lamu na shagan ni gaw, ga ningtsa de run hkrat mat wa ma ai; ¹⁴ sumsing lamu gaw katsu kau ai laika zawn htawt kau ai hkrum nna, bum ni hte tsunlawng ni nlang hte mung, tinang a shara kaw nna sit kau ai hkrum ma ai. ¹⁵ Mungkan ga na hkawhkam hkawseng ni, daru magam rawng ai ni, hpyen bu hpyen gyi ni, sahti kunmi ni, n-gun lagaw ja ai ni mung, mayam ni hte shanglawt ni nlang hte mung, ga na ginlawng hku ni hte bum ga na lunghkrung ni hta tinang nang gawp makoi nga let, ¹⁶ bum ni hte lunghkrung ni hpe shaga nna, Anhte a ntsa e hkrat bun mi; tingnyang hta dung ai wa a myi man hte, Sagu Kasha a pawt bu ai hta na anhte hpe magap maga la mi; ¹⁷ shan a pawt bu ai nhtoi kaba du wa ra hka kadai wa mi tsap lu na a ta? nga ma ai. 

 

Shingran 7

¹ Dai hpang lamu kasa mali gaw, lamu ga a njut mali hta tsap nga nna, ga ntsa e mung, nammukdara ntsa e mung, hpun magup a ntsa e mung, nbung n bung lu u ga, ga man mali maga de na nbung ni hpe manat shadang da nga ma ai gaw, ngai mu nngai. ² Bai, jan praw maga de na pru lung wa nna, a hkrung nga ai Karai Kasang a dazik lang ai lamu kasa kaga hpe, ngai mu nngai. Shi gaw, Anhte a Karai Kasang a shangun ma ni hpe lahtan e dazik garai n shakap kap gaw, aga hpe mung, nammukdara hpe mung, hpun ni hpe mung hkum zingri myit, ³ nga nna lamu ga hte nammukdara hpe zingri na ahkang lu ai lamu kasa mali hpe, nsen kaba hte jahtau wu ai. ⁴ Shaloi dazik shakap hkam la ai ni hpe hti ai nambat ngai na nngai; Israela kashu kasha amyu yawng hta na sen mi mun mali e hkying mali dazik shakap ai hkam la ma sai: ⁵ Yuda amyu hta na mun mi hkying lahkawng, Rubin amyu hta na mun mi hkying lahkawng, Gad amyu hta na mun mi hkying lahkawng, ⁶ Ashu amyu hta na mun mi hkying lahkawng, Naphtali amyu hta na mun mi hkying lahkawng, Manashe amyu hta na mun mi hkying lahkawng, ⁷ Simun amyu hta na mun mi hkying lahkawng, Lewi amyu hta na mun mi hkying lahkawng, Yishahka amyu hta na mun mi hkying lahkawng, ⁸ Zebulun amyu hta na mun mi hkying lahkawng, Yosep amyu hta na mun mi hkying lahkawng, Ben-yamin amyu hta na mun mi hkying lahkawng, dazik shakap ai hkam la ma sai. ⁹ Dai hpang, yu u, masha mungdan shagu hta na mung, baw lakung shagu hta na mung, amyu baw shagu hta na mung, ga amyu shagu hta na mung, kadai n dang hti lu ai wunawng wuwa kaba ngai mu nngai; dai ni gaw hpraw ai hpun palawng bu hpun nna, tinang a lata hta namhtan hpun lakung lang let, dai tingnyang a man e mung, Sagu Kasha a man e mung tsap nga nna. ¹⁰ Tingnyang hta dung nga ai anhte a Karai Kasang hte Sagu Kasha gaw, hkye hkrang la ai lam rai nga ai law, nga nna nsen kaba hte jahtau ma ai. ¹¹ Bai, dai tingnyang hte salang ni hte dusat amyu mali a grup yin e, lamu kasa ni nlang hte gaw kawan tsap nga ma ai; shaloi shanhte dai tingnyang nhpang e myi man dagup nna, Karai Kasang hpe naw ku let, ¹² Amen: Shakawn kungdawn ai, hpung shingkang, hpaji byeng-ya, mahkawn shagrau ai, arawng sadang, hpung dagu hte n-gun lagaw gaw, htani htana prat dingsa e, anhte a Karai Kasang kaw a nga nga u ga law, Amen, nga nna tsun ma ai. ¹³ Shaloi salang ni hta na langai mi, Hpun palawng ahpraw bu hpun ai, ndai ni gaw, kadai ni rai nga ma ta? kanang nna pru wa ma ta? nga nna ngai hpe hkap san nngai. ¹⁴ Ngai gaw, Nye a Madu e, nang chye nga ndai, ngu nna shi hpe htan we ai. Shaloi shi gaw, Dai ni gaw, dai ru tsang kaba kata na hkrang pru wa nna tinang a hpun palawng hpe Sagu Kasha a asai hta hkrut ja hpraw la ai ni rai nga ma ai. ¹⁵ Dai re ai majaw, shanhte gaw Karai Kasang a tingnyang man e ningngai nga lu ma ai hte, shi a naw ku Htingnu hta shani shana shi hpe daw jau nga ma ai: tingnyang hta dung ai wa mung, shanhte a ntsa e shi a sum hpyan ka-up na ra ai. ¹⁶ Shanhte gaw hpang de galoi mung kawsi hpang gara n hkrum na ma sai; jan shingna mung, hpa kahtet ai mung, shanhte hpe hkra lu na n rai: ¹⁷ kaning rai nme law, tingnyang kaang e nga ai Sagu Kasha gaw, shanhte a sagu rem ai wa tai na ra ai rai nna, asak hka hpawk du hkra shanhte hpe lam woi madun na ra ai: Karai Kasang mung, shanhte a myi hta na myi prawi yawng tsai hkra katsut kau ya na ra ai. 

 

Shingran 8

¹ Bai, sanit ngu na dazik hpe hpaw dat wu yang, sumsing lamu e ahkying chyen mi daram, atsin sha rai nga ai. ² Shaloi Karai Kasang a man e a tsap nga ai lamu kasa sanit hpe ngai mu nngai; shanhte hpe pahtau sanit ya mu ai. ³ Bai, manam pyaw ai baw nat ai n-gawt lang ai lamu kasa kaga, dai tawn hkungri makau e sa tsap nga ai; dai tingnyang man e nga ai aja hkungri ntsa e, chyoi pra ai ni yawng hte a akyu hpyi ai ga hte rau nawng jau u ga nga manam pyaw ai baw law law dai wa hpe ya wu ai. ⁴ Shaloi, dai lamu kasa a lata hta na, manam pyaw ai baw a wan hkut gaw, chyoi pra ai ni a akyu hpyi ai ga hte rau, Karai Kasang a man de mawng lung wa ai. ⁵ Bai, dai lamu kasa gaw dai n-gawt hpe la nna, tawn hkungri na wan jahpring la ngut jang, mungkan ga ntsa de dai hpe jahkrat dat wu ai: shaloi mu ngoi ai, wu kadu ai nsen, myi hprap kala ai hte nnang nawn byin pru wa ai. ⁶ Shaloi jang, pahtau sanit lang ai lamu kasa sanit gaw, pahtau dum na hkyen nga ma ai. ⁷ Ya, shawng na wa pahtau dum dat wu ai: shaloi asai kayau ai sin hte awan htu wa ai; dai hpe ga ningtsa de jahkrat dat yang, dinghta ga daw masum hta na daw mi hkru mat wa ai; nam maling hpun ni mung htam masum hta na htam mi hkru mat wa ai; tsit lali ai tsingdu yawng gaw hkru mat wa ai. ⁸ Bai, lahkawng ngu na lamu kasa pahtau dum dat wu ai: shaloi, wan hkru ai nsan ai bum kaba hpe nammukdara de jahkrat dat wu ai: dai rai nna nammukdara daw masum hta na daw mi, asai tai mat wa ai; ⁹ nammukdara na hkrung ai baw, htam masum hta na htam mi mung si mat wa ai; shanghpaw li ni mung, htam masum hta na htam mi grawp mat wa ai. ¹⁰ Bai, masum ngu na lamu kasa pahtau dum dat wu ai: shaloi shanan zawn htoi tu ai shagan kaba lamu de na di hkrat wa nna, hka nu ni htam masum hta na htam mi hte hka npun ni a ntsa e hkrat taw nga ai: ¹¹ dai shagan a amying gaw, lashi pila lap ngu ai rai nga ai; hka htam masum hta na htam mi lashi pila lap tai mat wa ai; dai hka hpawng ni grai hka mat wa nna, dai hka lu ai a majaw masha law law wa si mat wa ai. ¹² Bai, mali ngu na lamu kasa pahtau dum dat wu ai: shaloi lamu a nhtoi hkum ni hta na htam masum hta na htam mi sin mak mat nna, shani daw masum hta na daw mi nhtoi n htoi lu na hte, shana mung dai hte maren rai mat wa na matu, ajan gaw, daw masum hta na daw mi, shata gaw daw masum hta na daw mi, shagan ni mung htam masum hta na htam mi grawp nip mat wa ai. ¹³ Bai, ngai yu nga yang, langda langai mi lamu a kaang hpatwat e pyen yawn nga nna, Naw dum na ra ai lamu kasa masum a pahtau nsen majaw, dinghta ga e nga nga ai ni a matu, dingnye, dingnye, dingnye, hkrai rai nga ai, nga nna nsen kaba hte jahtau nga ai gaw, ngai na nngai. 

 

Shingran 9

¹ Bai, manga ngu na lamu kasa pahtau dum dat wu ai: shaloi, lamu de na ga ningtsa de di hkrat mat sai shagan langai mi ngai mu nngai: shi hpe dai sung htum ai shara na nhkun a sumsaw ap ya wu ai. ² Shaloi, dai sung htum ai shara na nhkun hpe shi hpaw dat wu ai rai nna, wan htung kaba a wan hkut zawn, dai nhkun hta na wan hkut mawng lung wa ai hte, dai nhkun a wan hkut majaw, ajan hte lamu ganghkau lapran e nsin sin wa ai. ³ Dai wan hkut hta na mung, ga ningtsa de dinggam-yam pru wa nna, ga na n-gaw-gawk lu ai ahkang zawn, dai ni hpe mung ahkang jaw mu ai. ⁴ Dai ni gaw, ga ningtsa na tsingdu hpe mung, tsit lali ai baw magup hpe mung, hpun magup hpe mung, naw madat da nna, tinang a lahtan hta Karai Kasang a dazik n kap ai masha ni hpe sha zingri mu ga, shanhte hpe jep dat wu ai: ⁵ rai ti mung, dazik n hkam la ai ni hpe si hkra di na ahkang gaw, shanhte n lu ma ai; shata manga tup zingri na ahkang sha lu ma ai: dai masha ni hkrum ai tsin-yam tsindam gaw, n-gaw-gawk e na ai zawn machyi ai tsin-yam tsindam rai nga ai. ⁶ Dai ntoi hte hta masha ni gaw si nhpang tam ti mung n mu na mu ai; nachying si mayu ma ti mung, si hkrung si htan gaw, shanhte kaw na hprawng mat na ra ai. ⁷ Dai dinggam-yaw ni a hkum hkrang gaw, hpyen gasat na matu byau tawn ai gumra hte bung nga ai; shanhte a baw hta ja janmau nsan ai gup nga ai; dai ni a myi man gaw masha a myi man zawn san nga ai. ⁸ Dai ni a kara gaw, numsha ni a kara zawn san ai tu nga ai, dai ni a wa gaw, hkanghkyi wa zawn rai nga ai. ⁹ Dai ni a sinda magap gaw, hpri sinda magap zawn rai nga ai; dai ni a singkaw wu ngoi ai gaw, hpyen gasat htim ai gumra leng law law a wu ai nsen zawn, wu ngoi nga ai. ¹⁰ Dai ni a nmai gaw n-gaw-gawk a palen tu ai nmai hte bung nga ai; masha ni hpe shata manga tup zingri na ahkang tinang a nmai ni hta rawng nga ma lu ai. ¹¹ Dai ni a hkawhkam gaw sung htum ai shara na ngarai a kasa rai nga ai; shi a amying gaw, Hebre ga hte Abadon; bai, Heleni ga hte shi a amying Apolion rai nga ai. ¹² Shawng na dingnye gaw lai mat wa sai; yu u, ya hpang de dingnye amyu lahkawng naw du na ra ai. ¹³ Bai, kru ngu na lamu kasa pahtau dum dat wu ai: shaloi, Karai Kasang a man e nga ai aja hkungri a nrung ni hta na nsen langai mi pru nna. ¹⁴ Uhprat hka nu kaba makau e sharen da ai lamu kasa mali hpe raw dat u, nga nna pahtau lang ai kru ngu na lamu kasa hpe tsun ai gaw, ngai na nngai. ¹⁵ Dai rai nna, shinggyim masha ni hpe htam masum hta na htam mi sat kau na nga, ahkying, nhtoi, shata, shaning a matu hkyen tawn da ai lamu kasa mali hpe, raw dat wu ai. ¹⁶ Gumra jawn ai luk suk ni gaw mun lahkawng lang mun mi, law nga ma ai; shanthe a nambat hpe ngai na nngai. ¹⁷ Bai, dai shingran hta ning re ai gumra ni hte, dai ni hta jawn ai ni hpe ngai mu nngai; shanhte gaw wan, wakintu hte kan nsan ai sinda magap dagap ma ai: gumra ni a baw gaw hkanghkyi baw zawn san nna, n-gup hta na wan numli, wan hkut hte kan pru nga ai. ¹⁸ Dai ni a n-gup hta na pru ai wan numli, wan hkut hte kan ngu ai tsin-yam masum a majaw, shinggyim masha htam masum hta na htam mi si mat ai hkrum ma ai. ¹⁹ Kaning rai nme law, dai gumra ni a nmai gaw lapu zawn san ai hte, baw tu nna, dai hte achye chye lu ai majaw, dai ni a atsam gaw n-gup hte nmai hta rawng ma lu ai. ²⁰ Rai ti mung, ndai tsin-yam tsindam hta na lawt lu nna, naw ngam nga ai shinggyim masha ni gaw, ji nat hpe mung, myi n mu, na n na lu ai hte n chye hkawm ai, aja, gumhpraw, magri, nlung hte hpun sumla ni hpe mung, n naw n ku ai nga na hpe, tinang lata a amu bungli hta na myit malai n lu ma ai: ²¹ masha sat ai amu hta na mung, mandan lakle amu hta na mung, num shut hpyit ai amu hta na mung, lagu lagut re ai amu hta na mung, shanhte myit malai n lu ma ai. 

 

Shingran 10

¹ Bai, sumwi lawai nna, sumsing lamu de na yu hkrat wa ai n-gun ja ai lamu kasa kaga hpe ngai mu nngai; shi a baw hta n-goilatum jung nga ai, shi a myi man gaw jan zawn htoi tu nga ai, shi a lagaw yan wan shadaw zawn rai nga ai: ² shi a lata hta hpaw nga ai laika shabawn kaji lang da wu ai; shi a hkra lagaw hpe nammukdara ntsa e, pai lagaw hpe hkarang ntsa e kabye da nna, ³ hkanghkyi shabam ai zawn, nsen kaba hte jahtau dat wu ai; shi jahtau dat wu yang, dai mu ngoi ai mahku sanit tinang a nsen shapraw ma ai. ⁴ Dai mu ngoi ai mahku sanit tinang a nsen shapraw dat ma yang, ngai ka da na maw nga nngai; shaloi, Dai mu ngoi ai mahku sanit shapraw ai lam hpe dazik shakap u, dai hte hpe hkum ka da et, nga nna sumsing lamu de na tsun pru ai nsen ngai na nngai. ⁵ Dai shaloi, nammukdara ntsa hte hkarang ntsa e tsap nga ai, ngai mu ai lamu kasa gaw, shi a hkra lata lamu de ladawn nna, ⁶ sumsing lamu hte dai hta e nga ai, ginding aga hte dai hta e nga ai, nammukdara hte dai hta e rawng ai hte hpe hpan tawn da nna htani htana prat dingsa a hkrung nga ai wa hpe gang nna dagam wu ai gaw, Ahkying ladaw ngu ai n nga na sai; ⁷ sanit ngu na lamu kasa a pahtau dum shangoi ai nhtoi hte hta, Karai Kasang gaw shi a shangun ma ni ngu ai myihtoi ni hpe tsun da ai kabu gara shi ga hte maren, shi a sung htum ai lam dik wa na sai, nga ai. ⁸ Dai hta n-ga, lamu de na ngai na yu ai nsen ngai hpe bai tsun ai gaw, Nammukdara hte hkarang ntsa e tsap nga ai lamu kasa a lata e hpaw nga ai laika hpe sa la su, nga ai. ⁹ Shaloi dai lamu kasa kaw ngai sa nna, Dai laika shabawn kaji ngai hpe jaw rit, ngu we ai. Shi gaw, La nna sha kau u; dai gaw na a kan hta hka na ra ai, rai ti mung, n-gup e gaw, lagat jahku zawn dwi na ra ai, nga nna ngai e tsun ai. ¹⁰ Shaloi dai laika shabawn kaji hpe lamu kasa a lata na ngai la nna sha dat we ai: dai gaw nye a n-gup hta lagat jahku zawn dwi li ai: rai ti mung, dai hpe sha ngut jang, nye a kan hka mat li ai. ¹¹ Bai shanhte gaw, Amyu baw law law, masha mungdan law law, ga amyu law law hte hkawhkam law law a lam, myihtoi ga nang bai tsun lu na ndai, nga nna ngai hpe tsun mi ai. 

 

Shingran 11

¹ Bai, ri lan zawn re ai maiaw nren langai mi ngai hpe ya nna, marai langai mi, Rawt u, Karai Kasang a naw ku Htingnu hpe mung, tawn hkungri hpe mung, dai yang e naw ku ai ni hpe mung, shadawn yu u. ² Dai Htingnu a shinggan wing hpe chyawm gaw, shinggan kau da u, dai hpe hkum shadawn et; dai gaw maigan amyu ni hpe ap ya kau ngut sai rai nna, shanhte gaw dai chyoi pra ai mare hpe shata mali shi lahkawng tup kabye dip na ma ra ai. ³ Bai, nye a sakse yan lahkawng hpe ngai ahkang jaw na ma we ai rai nna, shan gaw lachyit nba bu hpun let, nhtoi hkying mi ni tsa e kru shi ya tup, myihtoi htoi na ma ra ai. ⁴ Dai yan gaw, lamu ga Madu a man e jung tawn da nga ai tsanlun hpun lahkawng hte pyengdin shadun lahkawng rai nga ma ai. ⁵ Masha langai ngai shan hpe zingri mayu yang, shan a n-gup hta na wan pru nna, hpyen ni hpe hkru kau na mu ai; marai langai ngai mung shan hpe zingri mayu yang, shing re ai hte sat kau ai shi hkrum lu na ra ai. ⁶ Shan a myihtoi htoi ai nhtoi hte hta marang n htu lu u ga, lamu hpe pat kau na ahkang shan lu ma ai; hka nu ni hte hka htung ni hpe sai shatai na hte, galoi galaw mayu yang, shan gaw ga ningtsa hpe ana ahkya amyu myu hte tsin-yam dat na ahkang mung, lu ma ai. ⁷ Shan lahkawng tinang a sakse ga hkam ngut jang, sung htum ai shara de na lung wa ai matse labye gaw, shan hpe gasat nna dang kau na hte, shan hpe sat kau na ra ai. ⁸ Ga malai hku Sodom hte Egutu ngu shamying ai, wudang hta shan a Madu jen da hkrum ai mare kaba a nmaw lam hta, shan a moi mang taw nga ai. ⁹ Shaloi masha amyu baw hta na ni mung, baw lakung hte hta na ni mung, ga amyu myu hta na ni mung, masha mungdan ni hta na ni mung, shan a moi mang hpe masum ya e chyingdaw mi tup sa hpu yu nna, dai yan a moi mang hpe lup makoi kau na n hkraw ma ai. ¹⁰ Ga ningtsa e nga ai ni gaw shan a majaw kabu gara rai nna pyaw pyaw nga ma ai; shanhte shada da mung kumhpaw kumhpa galai jaw chyai na ma ra ai: kaning rai nme law, dai myihtoi yan gaw ga ningtsa e nga ai ni hpe grai sharu shatsang ma sai, nga ai. ¹¹ Ya dai nhtoi masum ya e chyingdaw mi lai jang, Karai Kasang kaw nna jahkrung ai nsoi nsa shan hta shang wa nna, shan gaw jan rai rawt tsap nga ma ai; shan hpe mu mada ai ni gaw, nachying hkrit gari nga ma ai. ¹² Bai shan gaw, Nang de lung wa ma rit, nga nna lamu de na shan hpe shaga ai nsen kaba na mu ai; dai re ai majaw shan gaw sumsing lamu de sumwi hte lung wa ma ai rai nna, shan a hpyen ni shan hpe hkan mu dat ma ai. ¹³ Dai ahkying hta e nnang nawn kaba anawn wa nna, dai mare daw shi hta daw mi ru hkrat mat wa ai; dai nnang nawn hta si lawm mat ai masha ni a amying hkying sanit rai nga ai: naw ngam nga ai ni chyawm gaw hkrit kamyin nga ma ai rai nna, sumsing lamu a Karai Kasang hpe shagrau shakawn nga ma ai. ¹⁴ Lahkawng ngu na dingnye gaw lai mat wa sai; yu mu, masum ngu na dingnye gaw alawan du na ra ai. ¹⁵ Bai, sanit ngu na lamu kasa gaw pahtau dum dat wu ai: shaloi sumsing lamu hta e nsen kaba ni pru wa ai gaw,Mungkan ga na mungdan gaw, anhte a Madu a mungdan hte shi a Hkristu a mungdan tai wa sai rai nna, shi gaw htani htana prat dingsa hkawhkam aya hta up nga na sai law, nga nna shakawn nga ma ai. ¹⁶ Shaloi, Karai Kasang a man e, tinang a tingnyang ni hta dung nga ma ai salang hkun mali gaw, shanhte a myi man dagup let Karai Kasang hpe naw ku nna, ¹⁷ Ya aprat e, moi na aprat e dinggrin a nga nga ai Chyahtum chyalai n-gun rawng ai Madu Karai Kasang e, nang gaw, na a daru magam ahkang dagraw nna a up nga ndai majaw, anhte nang hpe shakawn kungdawn ga ai: ¹⁸ masha amyu ni n-yun bu nna, na a sindawng pawt ai dan pru ra ai; si ai ni hpe tara dara nna, na a shangun ma myihtoi ni hpe mung na a chyoi pra ai ni hpe mung, na a mying nsang hpe hkrit hkungga ai kaji kaba ni hpe mung, shabrai htang jaw na hte, lamu ga jahten shabyak kau ai ni hpe bai jahten shabyak kau na nhtoi du ra ai law, nga nna shakawn nga ma ai. ¹⁹ Shaloi sumsing lamu hta e Karai Kasang a naw ku Htingnu hpaw malang nna, shi a Htingnu kata e, shi a ga shaka hte seng ai sumpu dan pru nga ai; shaloi jang, myihprap kala ai, nsen kadu ai, mu ngoi ai, nnang nawn hte sin marang kaba byin wa ai. 

 

Shingran 12

¹ Bai sumsing lamu kata e mauhpa amu kaba dan pru ai gaw: ajan lawai nna, shata kabye ai hte, shagan shi lahkawng kap ai janmau gup re ai numsha langai mi dan pru ai: ² shi gaw na-um nasin rai nna, shangai na matu shinggyim machyi ai majaw, grai jahtau hkrap nga ai. ³ Bai, mauhpa amu kaga sumsing lamu kata e dan pru ai gaw: yu u, hkyeng ai baren numraw kaba dan pru ai; shi gaw baw sanit hte nrung shi tu nna, shi a baw ni hta ja lagup sanit gup nga ai. ⁴ Shi a nmai gaw lamu shagan htam masum hta na htam mi magawn la nna, ga de jahkrat dat wu ai: kasha shangai magang ai num shangai ngut jang, shi a kasha hpe sha kau na nga, baren numraw gaw dai num a man e la tsap nga ai. ⁵ Shaloi dai numsha gaw, amyu baw shagu hpe hpri sumdoi hte up na ra ai shadang lasha shangai wu ai: shi a kasha hpe Karai Kasang a man de mung, shi a tingnyang man de mung, gare shalun la wu ai. ⁶ Dai numsha gaw, nam mali de hprawng mat wa ai; dai yang e nhtoi hkying mi ni tsa e kru shi ya tup shi hpe bau mu ga, Karai Kasang gaw shi a matu nga shara lajang da ya wu ai. ⁷ Bai, sumsing lamu kata e majan gasat nga ai; Mihkaela hte shi a ali ama ni gaw, dai baren numraw hte gasat nga ma ai; dai baren numraw hte shi a ali ama ni mung, gasat nga ma ai rai ti mung, ⁸ shanhte n dang lu ma ai rai nna, sumsing lamu kata e shanhte a matu nga shara naw n nga ma sa lu ai. ⁹ Shaloi, mungkan ga ting hpe hkalem kau ai, Nat hte Satan ngu ai, moi na lapu rai nga ai baren numraw kaba gaw, jahkrat kau ai hkrum wu ai: shi gaw, le ga de jahkrat kau hkrum ai rai nna, shi a ali ama ni mung shi hte rau jahkrat kau ai hkrum ma ai. ¹⁰ Shaloi sumsing lamu kata na nsen kaba gaw, Ya gaw anhte a Karai Kasang a hkye hkrang la ai lam, hpung dagu hte mungdan mung, shi a Hkristu a ahkang aya mung, rai wa sai: kaning rai nme law, anhte a Karai Kasang a man e, anhte a hpu nau ni hpe shani shana mara shagun ai, jahte tam wa gaw, jahkrat kau ai hkrum nu ai. ¹¹ Shanhte gaw, Sagu Kasha a asai majaw mung, tinang sakse hkam ai mungga a majaw mung, shi hpe dang kau lu mu ai rai nna, si ai du hkra tinang a asak hpe n lahpawt ma ai. ¹² Dai re ai majaw, sumsing lamu ni hte dai hte hta rawng nga ai ni e, kabu gara nga mu: ginding aga hte nammukdara chyawm gaw dingnye lu ma ai: kaning rai nme law, Nat gaw, shi a nhtoi loi mi sha ngam sai chye wu ai majaw, n-yun bu let nanhte hpang de yu wa sai, nga nna tsun ma ai hpe, ngai na nngai. ¹³ Dai baren numraw gaw ga de jahkrat kau hkrum ai chye wu jang, shadang lasha shangai ai num hpe zingri zingrat wu ai. ¹⁴ Dai num gaw lapu kaw na lawt lu nna, nam mali na shi a shara de pyen wa lu nhtawm, dai yang e prat mi, prat lahkawng hte prat kaang hkup bau lanu ai hkrum lu hkra, dai langda kaba a singkaw lahkawng maga, shi hpe jaw dat wu ai. ¹⁵ Dai num hpe hka hpungla hte shayawng kau na nga, lapu gaw shi a n-gup hta nna hka nu na hka zawn, dai numsha hpang de shalawi dat wu ai. ¹⁶ Lamu ga chyawm gaw dai numsha hpe karum ya wu ai; aga gaw shi a n-gup mahka wa nna, dai baren numraw a n-gup hta na shalawi dat ai hka nu hpe mayu kau ya wu ai. ¹⁷ Dai baren numraw mung dai numsha a lam sindawng kahtet bu nna, Karai Kasang a hkang da ai ga hkan nang ai hte, Yesu a sakse ga lang ai ni ngu ai, shi a amyu matu gale ni hpe gasat kau na pru wa nna, ¹⁸ shi gaw nammukdara a zaibru jang e tsap nga ai. Dai baren numraw mung dai numsha a lam sindawng kahtet bu nna, Karai Kasang a hkang da ai ga hkan nang ai hte, Yesu a sakse ga lang ai ni ngu ai, shi a amyu matu gale ni hpe gasat kau na pru wa nna, 

 

Shingran 13

¹ Shaloi nammukdara hta na dawng pru ai matse labye langai mi ngai mu nngai; dai gaw nrung shi hte baw sanit tu nga ai; de a nrung ni hta ja lagup shi gup nna, shi a baw ni hta arawng jahpoi ai amying kap nga ai. ² Dai ngai mu ai matse labye gaw rawng gawk hte bung nna, shi a lagaw tsap lagaw zawn, shi a n-gup hkanghkyi n-gup zawn rai nga ai: baren numraw gaw, shi a hpung dagu hte shi a tingnyang mung, kaba la ai ahkang aya mung, dai matse labye hpe ap ya wu ai. ³ Shi a baw langai mi gaw, si hkra adup kau sai zawn rai nga ai, ngai mu nngai; rai ti mung, shi hpe jasi kau ai nma bai mai wa nna, mungkan ting dai matse labye a lam mau mahka nga ai hte, ⁴ dai matse labye hpe ahkang aya ap ya ai baren numraw hpe naw ku ma ai; shanhte dai matse labye hpe mung naw ku nna, Ndai matse labye hte kadai wa bung nga a ta? kadai wa shi hpe gasat lu na a ta? nga shajang ma ai. ⁵ Ga kaba hte shatan nhkan tsun chye ai n-gup shi hpe jaw da sai rai nna, shata mali shi lahkawng tup amu galaw na ahkang shi hpe ap ya nu ai. ⁶ Shaloi Karai Kasang hpe shatan nhkan ai ga tsun na shi a n-gup shi hpaw nna, Karai Kasang a mying nsang hpe mung, shi a naw ku ai sum hpe mung, sumsing lamu kata e de nga ai ni hpe mung, shatan nhkan nga ai. ⁷ ( Chyoi pra ai ni hpe gasat dang kau na ahkang mung, shi hpe jaw wu ai ) ; baw lakung shagu, amyu baw shagu, ga baw amyu shagu hte mungdan shagu a ntsa e up na ahkang mung shi hpe jaw wu ai. ⁸ Sat kau hkrum sai Sagu Kasha a asak laika hta, ginding aga garai n pra kaw nna amying n ka lawm ai mungkan masha nlang hte gaw, dai matse labye hpe naw ku na ma ra ai. ⁹ Na tu wa gaw na la u ga. ¹⁰ Masha wa hpe sharen ai wa gaw, sharen da ai hkrum na ra ai; nhtu hte sat ga ai wa mung, nhtu hte si na ra ai. Ndai lam hta chyoi pra ai ni a shakut sharang shara hte makam masham lam dan pru nga ai. ¹¹ Bai, aga kata de na pru lung wa ai matse labye kaga ngai mu nngai: shi gaw sagu kasha a nrung hte bung ai nrung lahkawng tu nna, baren numraw zawn ga tsun nga ai. ¹² Shi gaw shawng na matse labye a ahkang aya nlang, de a man e dagraw lang nna, jasi ai nma mai ngut sai shawng na matse labye hpe, dinghta ga hte dai hta nga ai ni hpe, naw ku shangun mu ai. ¹³ Dai hta kaga, shi gaw masha ni a man e lamu de nna ga ningtsa de wan pyi jahkrat lu hkra, lamik kumla kaba galaw dan nga ai. ¹⁴ Shawng na matse labye a man e galaw lu ai lamik kumla ni hte ga ningtsa de nga ai ni hpe shi hkalem kau wu ai rai nna, nhtu hkang nma hkrum ti mung, naw hkrung nga ai matse labye a hkrang sumla galaw na, ga ningtsa nga ai ni hpe tsun dat wu ai. ¹⁵ Dai matse labye a hkrang sumla ga tsun lu na matu, dai matse labye a hkrang sumla hta nsoi nsa ban bang na ahkang hte, dai matse labye a hkrang sumla hpe n naw n ku ai nga manga hte hpe sat kau na ahkang mung, shi hpe jaw wu ai. ¹⁶ Dai hta kaga, kaji kaba, sahti kunmi, matsan mayan ni, shanglawt ni hte mayam ni nga manga hte gaw, tinang a hkra lata hta, shing n rai, tinang a lahtan hta, masat dingsat shakap shangun na hte, ¹⁷ dai matse labye a amying, shing n rai, de a amying a nambat ngu ai masat dingsat, n kap ai wa kadai mung, arai mari na hte dut na ahkang n lu na lam, shabyin dat wu ai. ¹⁸ Nang e hpaji byeng-ya rawng nga ai; zai byeng-ya rawng ai wa gaw dai matse labye a nambat sawn chye u ga; dai nambat gaw masha langai mi a nambat rai nga ai; shi a nambat gaw kru tsa e kru shi kru rai nga ai. 

 

Shingran 14

¹ Bai, yu u, dai Sagu Kasha gaw Ziun bum ntsa e tsap nga ai hpe ngai mu nngai; shi a amying hte shi Kawa a amying tinang a lahtan hta ka kap ai masha sen mi mun mali e hkying mali mung, shi hte rau tsap nga ma ai. ² Bai,sumsing lamu kata nna hka rum law law kadu ai nsen hte, mu ngoi kaba a nsen zawn wu ai nsen hpe, ngai na nngai; ngai na ai nsen gaw, tingse dum ai ni tinang a tingse ni hpe dum dat yang na nsen zawn rai nga ai. ³ Shanhte gaw, dai tingyang man e mung, dusat amyu mali hte salang ni a man e mung, mahkawn ga ningnan zawn mahkawn mangoi nga ma ai: ga ningtsa na mari la hkrum sai ni, ngu ai, masha sen mi mun mali e hkying mali hta kaga, dai mahkawn ga hpe kadai mung n sharin la lu ma ai. ⁴ Dai ni gaw numsha hte awu asin n rai yu ai ni rai nga ma ai; shanhte gaw hkawn jet zawn rai nga ma ai; shanhte gaw Sagu Kasha sa wa ai shara shagu de hkan nang ai ni rai nga ma ai; dai ni gaw, Karai Kasang a matu mung, Sagu Kasha a matu mung, shawng si ai asi tai mu ga nga, shinggyim masha ni hta na mari la ai ni rai nga ma ai: ⁵ shanhte a n-gup hta masu magaw n rawng ma lu ai; shanhte hta hpa mara mung n kap ma lu ai. ⁶ Bai, dinghta ga ntsa e nga ai ni hte, amyu baw shagu, baw lakung shagu, ga amyu shagu hte masha mungdan shagu hpe, htani htana a kabu gara shi ga hkaw dan lu ai lamu kasa kaga gaw, sumsing lamu hpatwat e pyen nga ai hpe, ngai mu nngai: ⁷ shi gaw, Karai Kasang hpe hkrit hkungga mu, shi a hpung shingkang shagrau mu; shi a tara dara ai ahkying du ra ai: sumsing lamu hte ginding aga, nammukdara hte hka hpawk ni hpe hpan tawn da ai wa hpe naw ku nga mu, nga nna nsen kaba hte hkaw tsun nga ai. ⁸ Bai, lahkawng ngu na lamu kasa kaga gaw hkan sa nna, Masha amyu shagu hpe hpye ai amu ngu ai pawt shabu ai tsabyi jahku lu shangun ai, galu kaba ai Babelon mare gaw, kadawng daw mat sai, kadawng daw mat sai, nga nna tsun ai. ⁹ Bai, masum ngu na lamu kasa kaga gaw, shan kaw hkan nang nna, Dai matse labye hte shi a hkrang sumla hpe naw ku nna, tinang a lahtan hta, shing n rai, tinang a lata hta, masat dingsat hkam la ai wa kadai rai ti mung, ¹⁰ Karai Kasang a sindawng kahtet ngu ai gawm hta hpaw bang tawn ai pawt bu ai tsabyi jahku jet lu lu na ra ai; dai hta n-ga shi gaw chyoi pra ai lamu kasa ni a man e mung, dai Sagu Kasha a man e mung, wan hte kan kayau ai hta nni hkri zingri ai hkrum na ra ai: ¹¹ shanhte hpe nni nkri zingri ai hta na wan hkut gaw, htani htana prat dingsa a mawng lung nga ai; dai matse labye hte shi a hkrang sumla hpe naw ku ai ni hte, shi a amying a masat dingsat hkam la ai wa gaw, shani shana n ban n sa lu ma ai, nga nna nsen kaba hte tsun nga ai. ¹² Karai Kasang a hkang da ai ga hte Yesu a makam masham lam hkan nang ai ni ngu ai, chyoi pra ai ni a shakut sharang shara gaw, ndai lam hta dan pru nga ai. ¹³ Dai shaloi, Ya kaw nna dai Madu hta si wa ai ni gaw, a lu ma ai, ngu nna ka da u, nga ai nsen gaw sumsing lamu de na, ngai na nngai: dai Wenyi mung, Rai sa, shanhte a amu bungli a akyu gaw, shanhte kaw hkan nang nga ai majaw, tinang a magam bungli hta na, shanhte ban sa ai hkrum mu ga, nga ai. ¹⁴ Bai, yu mu, sumwi ahpraw ngai mu nngai; dai sumwi ntsa e masha kasha hte bung ai wa dung nga ai; shi a baw hta aja janmau gup nna, shi a lata hta dai ai nhkyau lang da wu ai. ¹⁵ Bai, lamu kasa kaga gaw dai naw ku Htingnu kaw na pru nna, Ga ningtsa e man myin krawp wa sai; mam dan na aten du ra ai majaw mam dan na matu na a nhkyau hpe dan shangun dat u, nga nna sumwi ntsa e dung ai wa hpe nsen kaba hte jahtau wu ai; ¹⁶ shaloi sumwi ntsa e dung nga ai wa gaw, ga ningtsa de shi a nhkyau kabai dat wu ai rai nna, aga gaw dan ngut mat nga ai. ¹⁷ Bai, sumsing lamu na naw ku Htingnu kaw nna lamu kasa kaga pru wa ai; shi mung dai ai nhkyau lang da wu ai. ¹⁸ Bai, wan hpe up ai ahkang lu ai lamu kasa kaga gaw, tawn hkungri de na pru nna, dai ai ahkyau lang ai wa hpe nsen kaba hte jahtau let, Na a dai ai nhkyau dat dat nna, aga na tsabyi ru a asi sumbaw hpe gadoi shingkyin la u; de a tsabyi si myin sai, ngu wu ai. ¹⁹ Shaloi dai lamu kasa gaw ga ningtsa de shi a nhkyau kabai dat nna, aga na tsabyi ru a asi hpe shingkyin la nhtawm, Karai Kasang a pawt bu ngu ai tsabyi htumbyen kaba hta, ru bang da wu ai. ²⁰ Dai tsabyi htumbyen hpe mare shinggan e kabye shup nna, dai hta na pru ai asai gaw, gumra runghtung dep hkra tung nna, stadia hkying mi kru tsa du hkra lawi wa ai. 

 

Shingran 15

¹ Bai, sumsing lamu hta e galu kaba nna amu ging ai mauhpa amu kaga hpe ngai mu nngai; ari zinli sanit lang ai lamu kasa sanit rai nga ma ai: dai ari zinli ni gaw jahtum na ari rai nga ai; kaning rai nme law, Karai Kasang a pawt bu ai gaw dai hte hte ngut wa na ra ai. ² Bai, wan hte kayau ai pat nawng zawn re ai, ngai mu nngai: dai matse labye hte shi a hkrang sumla kaw na mung, shi amying a nambat kaw na mung, dang pru wa ai ni gaw, Karai Kasang a tingse lang let, dai pat nawng makau e tsap nga ma ai. ³ Shanhte gaw Karai Kasang a shangun ma Mawshe a mahkawn ga hte, Sagu Kasha a mahkawn ga hpe mahkawn mangoi lat, Chyahtum chyalai n-gun rawng ai Madu Karai Kasang e, na a magam bungli gaw kaba htum ai hte mauhpa rai nga ai: Ju majat prat janat na Hkawhkam wa e, na a magam lam ni gaw ding hpring ai hte teng man ai hkrai rai nga ai; ⁴ Madu e, nang hpe n hkrit ai hte, na a amying nsang hpe n shagrau ai gaw kadai wa rai na a ta? Nang chyu sha chyoi pra nga ndai; na a ding hpring ai lam ni dan hkung nga ai majaw, masha amyu baw shagu na a man e sa naw ku na ma ra ai law, nga nna tsun ma ai. ⁵ Dai hte a hpang e, sumsing lamu na sakse sum a naw ku Htingnu hpaw nga ai hpe ngai mu nngai: ⁶ dai Htingnu kaw na ari zinli sanit lang ai lamu kasa sanit pru sa ma ai; shanhte gaw htoi tu san pra ai lung seng mawn sumli nna, tinang a sinda e aja shingkyit kyit nga ma ai. ⁷ Bai, dai dusat amyu mali hta na langai mi gaw, htani htana prat dingsa a hkrung nga ai Karai Kasang a sindawng kahtet ai hte hpring chyat re ai gawm sanit, dai lamu kasa sanit hte hpe ya mu ai. ⁸ Shaloi dai naw ku Htingnu gaw Karai Kasang a hpung shingkang hte shi a atsam majaw wan hkut hpring ing nna, dai lamu kasa sanit a ari zinli garai n htum htum gaw, dai naw ku Htingnu kata de kadai mung n shang lu ai. 

 

Shingran 16

¹ Bai, dai lamu kasa sanit hte hpe, Pru sa wa mu, Karai Kasang a sindawng kahtet rawng ai gawm sanit hpe ga ningtsa de ru bun dat mu, nga nna dai naw ku Htingnu kaw na pru ai nsen kaba, ngai na nngai. ² Shaloi shawng na wa pru sa nna, shi a gawm ga ningtsa de re bun dat wu ai: dai gaw, matse labye a masat dingsat kap ai hte shi a hkrang sumla naw ku ai masha ni hta, matsat shabat re ai aju machyi ai hpye shanam ai ana byin wa ai. ³ Bai, hpang na wa shi a gawm nammukdara hta ru bun dat wu ai: dai gaw masha chyasi a asai zawn tai wa nna, nammukdara kata e rawng ai nsoi nsa hkrung mahkrung hte gaw si mat ma ai. ⁴ Bai, masum ngu na wa shi a gawm hka nu ni hte hka hpawk ni hta ru bun dat wu ai: dai gaw asai tai mat ai. ⁵ Shaloi hka sin ai lamu kasa gaw, Ya aprat e, moi na aprat e, dinggrin a nga nga ai Chyoi pra ai wa e, ning rai jeyang nga ndai majaw, nang gaw ding hpring nga ndai law; ⁶ kaning rai nme law, chyoi pra ai ni a asai hte myihtoi ni a asai shanhte ru kau ma ai rai nna, nang shanhte hpe asai bai lu shangun mu ai; dai gaw shanhte hkrum ging ai hku rai nga ai, nga nna tsun ai, ngai na nngai. ⁷ Bai, dai tawn hkungri na mung, Rai sa, Chyahtum chyalai n-gun rawng ai Madu Karai Kasang e, na a jeyang ai lam ni gaw teng man ai hte ding hpring nga lit dai law, nga nna tsun ai, ngai na nngai. ⁸ Bai, mali ngu na wa shi a gawm ajan hta ru bun dat wu ai: shaloi jan gaw masha ni hpe wan hte jahkat na ahkang lu la wu ai. ⁹ Dai rai nna masha ni gaw kahtet kang la ai hte jahkat kau ai hkrum nna, ndai ari zinli ni hpe up byeng ai Karai Kasang a amying nsang hpe matsa shatan ma ai; dai hte wa hkrum ma ti mung, shi a hpung shingkang shagrau na gaw, shanhte myit malai n lu ma ai. ¹⁰ Bai, manga ngu na wa shi a gawm dai matse labye a tingnyang ntsa de ru bun dat wu ai: shaloi shi a mungdan nsin chyip rai mat wa nna, mung masha ni gaw aju machyi la ai majaw, tinang a shinglet kawa udik nga ma ai: ¹¹ Shing rai aju machyi ai hte hpye shanam ai ana majaw, shanhte gaw, sumsing lamu na Karai Kasang hpe matsa shatan ma ai; dai hte wa hkrum ma ti mung, tinang a arawn alai hta na myit malai n lu ma ai. ¹² Bai, kru ngu na wa, shi a gawm Uhprat hka nu kaba hta ru bun dat wu ai: dai rai nna, jan praw mung na hkawhkam ni sa wa na lam hku na matu, dai hka nu gaw hkyet mat wa ai. ¹³ Shaloi, baren numraw a n-gup hta na mung, matse labye a n-gup hta na mung, masu ai myihtoi a n-gup hta na mung, shu zawn n san n seng ai wenyi masum pru wa ai hpe, ngai mu nngai: ¹⁴ dai ni gaw lamik kumla galaw dan nna, Chyahtum chyalai n-gun rawng ai Karai Kasang a nhtoi kaba shani na majan gasat na matu, mungkan ting na hkawhkam ni hpe jahpawng la na pru sa wa ai nat a wenyi ni rai nga ma ai. - ¹⁵ Yu u, lagu lagut zawn ngai du ring ngai. Masha a man e singgu krin n hkawm na hte, tinang a kaya hpa n dawng lu ga, a maja nga let tinang a labu palawng sin nga ai wa gaw, a lu ai. - ¹⁶ Dai nat wenyi ni gaw hkawhkam ni hpe, Hebre ga hte Hara Magedon ngu ai shara de jahpawng da mu ai. ¹⁷ Bai, sanit ngu na wa shi a gawm nbung hta ru gat dat wu ai: shaloi, Ngut mat sai, nga nna naw ku Htingnu kata tingnyang kaw na nsen kaba pru wa ai: ¹⁸ Dai hta kaga, myihprap kala ai, nsen kadu ai hte mu ngoi ai byin wa ai; nnang nawn kaba mung byin wa ai; ga ningtsa e masha nnan lat kaw nna dai zawn kaba ai hte ja la ai nnang nawn gaw, galoi mung n byin yu ai. ¹⁹ Dai rai nna, dai galu kaba ai mare gaw masum brang ga mat wa ai; masha amyu ni a mare ni mung kadawng daw mat shajang ma ai: Babelon mare kaba hpe mung, Karai Kasang a sindawng kahtet ai pawt bu ngu ai tsabyi jahku a gawm lu shangun na, shi a man e dai mare hpe matsing da nga ai. ²⁰ Tsunlawng ni yawng hprawng mat nna, bum ni mung n nga mat ma ai. ²¹ Shaloi lamu de na joi mali tsa daram li ai sin kaba gaw masha ni a ntsa e htu bun nna, dai sin a ari majaw masha ni gaw Karai Kasang hpe matsa shatan ma ai: dai ari zinli gaw nachying yak kaba ai ari rai nga ai. 

 

Shingran 17

¹ Dai shaloi gawm sanit lang ai lamu kasa sanit hta na langai mi gaw, Sa sa, nang de sa rit, hka law law a ntsa e dung nga ai shawa num kaba hpe daw ai lam, ngai nang hpe madun dan de ga: ² ga ningtsa hkawhkam ni gaw shi hte hpye ai amu galaw nna, mungkan ga e nga ai ni gaw, shi a hpye ai amu a tsabyi jahku hte nang ma ma sai, nga nna ngai hpe tsun ai. ³ Shaloi shi ngai hpe wenyi hte nam mali de woi nawng mat wa ai rai nna, baw sanit hte nrung shi tu nna, matsa shatan ai amying hkrai pri re ai hkyeng kabrim ai matse labye a ntsa e dung nga ai numsha hpe, ngai mu nngai. ⁴ Dai numsha gaw hkyeng mang ai hte hkyeng kabrim ai hpun palawng bu hpun nna, aja, lung seng, pale hte mawn sumli nga ai; shi hpye ai amu a n san n seng ai hte, matsat shabat lam hpring chyat re ai aja gawm, shi a lata hta lang da wu ai: ⁵ shi a lahtan e, Ga ningtsa na shawa num ni hte matsat shabat lam ni a Kanu, galu kaba ai Babelon, nga nna sung htum ai hte seng ai amying ka da nga ai. ⁶ Bai, dai numsha gaw chyoi pra ai ni a asai hte mung, Yesu a sakse ni a asai hte mung, nang nga ai hpe, ngai mu nngai. Shi hpe mu yang mau kaba hte ngai mau mahka mat nnai. ⁷ Dai rai nna, dai lamu kasa gaw, Hpa majaw nang mau mahka nga n ta? Dai sumsha a sung htum ai lam mung, baw sanit, nrung shi tu nna shi hpe gun ai matse labye a sung htum ai lam mung, ngai nang hpe tsun dan de ga. ⁸ Nang mu ai matse labye gaw, shawng de nga yu sai, ya gaw n nga ai, rai ti mung sung htum ai shara kaw na lung wa magang ra ai rai nna, hten byak ai de sa wa na ra ai. Gingding aga nnan lat kaw nna tinang a amying asak laika hta n ka lawm ai. ga ningtsa e nga ai masha ni gaw, dai matse labye a nga yu sai hte ya n nga ai, bai nga na ra ai lam ni hpe mu lu ai shaloi, mau mahka na ma ra ai. ⁹ Ndai yang e hpaji rawng ai nyan lawn nga ai. Baw sanit gaw, dai numsha dung ai bum sanit rai nga ai: ¹⁰ hkawhkam sanit mung rai nga ai: manga gaw hkrat sai, langai mi gaw ya nga nga ai, ngam ai langai mi gaw garai n du ai; dai wa du ai shaloi aten loi sha mi nga lu na ra ai: ¹¹ shawng de nga yu nna ya n nga ai matse labye mung, dai hte maren rai na ra ai; dai wa gaw matsat ngu na wa rai nga ai, rai ti mung, dai sanit hta lawm nga ai; shi gaw hten byak ai de sa wa na ra ai. ¹² Bai, nang mu ai nrung shi gaw, mungdan garai n hkam la lu ai hkawhkam shi rai nga ma ai: shanhte gaw dai matse labye hte rau hkawhkam aya ngu ai hpe ahkying mi ting hkam la ma ai. ¹³ Dai ni gaw myit langai sha rawng nna, dai matse labye hpe tinang a hpung dagu hte ahkang aya ap ya ma ai. ¹⁴ Dai ni gaw, dai Sagu Kasha hte hpyen gasat na ma ai rai nna, dai Sagu Kasha gaw shanhte hpe dang kau na ra ai: kaning rai nme law, shi gaw madu ni a Madu, hkawhkam ni a Hkawhkam rai nga ai: shi hte rau nga ai ni mung, shaga da ai ni, lata la ai ni, kangka re ai ni, rai nga ma ai, nga nna ngai hpe tsun ai. ¹⁵ Bai, dai wa gaw, Shawa num dung nga ai hka nu ni gaw, masha baw amyu ni, wunawng wuwa ni, masha mungdan ni hte ga amyu ni, rai nga ma ai. ¹⁶ Bai, nang mu ai nrung shi hte dai matse labye gaw, dai shawa num hpe n dawng n yawt na ma ra ai rai nna, shi hpe katsi katsang hte singgu krin shatai kau nhtawm, shi a shan hpe sha kau nna, krawp mat hkra wan hte nat kau na ma ra ai. ¹⁷ Kaning rai nme law, Karai Kasang a myit hku shadik na hte, shanhte myit langai sha rawng lu na, Karai Kasang a mungga dik wa ai nhtoi du hkra, tinang a mungdan dai matse labye hpe ap ya mu ga nga, Karai Kasang gaw shanhte a kraw lawang hta hpaji daw bang ya mu ai. ¹⁸ Nang mu lu ai numsha mung mungkan hkawhkam ni hpe madu lu ai mare kaba rai nga ai nga nna ngai hpe tsun ai. 

 

Shingran 18

¹ Dai hte a hpang e lamu kasa kaga gaw sumsing lamu de na yu wa ai, ngai mu nngai; shi gaw ahkang aya kaba lu nna, lamu ga gaw shi a hpung shingkang hte htoi ala nga ai. ² Dai wa gaw, Galu kaba ai Babelon gaw kadawng daw mat sai, kadawng daw mat sai; dai shara gaw, nat tsasam ni a de nga ai shara, n san n seng ai wenyi shagu a shingwung shara hte n san n seng ai matsat shabat re ai u amyu myu a shingbyi shara, tai mat sai. ³ Kaning rai nme law, shi a hpye ai amu ngu ai tsabyi jahku hte masha amyu baw shagu kadawng daw mat ma sai: ga ningtsa hkawhkam ni mung shi hte rau hpye ai amu galaw nna, shi a hpung dagu hte sawse lawklek ai lam a majaw, mungkan ga na hpaga ni sut su wa ma sai, nga nna ja ai nsen hte jahtau wu ai. ⁴ Bai, sumsing lamu de na nsen kaga gaw, Nye a amyu masha ni e, dai mare a yubak hta nanhte n lawm myit ga mung, de a ari zinli n hkrum myit ga mung, shi kaw na pru wa mu: ⁵ kaning rai nme law, shi a yubak lamu dep hkra law wa ai rai nna, Karai Kasang gaw shi a n ding n hpring ai lam ni hpe matsing da nu ai. ⁶ Shi di ai hte maren shi hpe di htang mu; shi galaw ai lam hte maren htam lahkawng bai htang mu: shi hpaw ai gawm hta shi hpe htam lahkawng bai hpaw jaw mu. ⁷ Shi tinang hkum shareng nna sawse lawklek kaba wa ai made, zingri zingrat ai hte sharung shayawt ai, shi hpe htang jaw mu: kaning rai nme law, shi gaw, Ngai hkawhkam jan hkaw dung nga nngai; ngai gaida jan n rai: galoi mung sharung shayawt ai ngai n hkrum na nngai, nga nna kraw kata e tsun nga ai. ⁸ Dai re ai majaw, shi hkrum na ra ai ari zinli ngu ai, si hkrung si htan, sharung shayawt ai hte hku hku ai gaw, lani jan sha du nna, wan hte krawp hkra nat kau ai hkrum na ra ai: kaning rai nme law, shi hpe daw dan ai Madu Karai Kasang gaw, n-gun atsam kaba rawng nga ai. ⁹ Shi hte hpye ai amu galaw nna, sawse lawklek ai ga ningtsa hkawhkam ni gaw, dai mare hkru ai wan hkut mu ma ai shaloi, shi hkrum ai ari hpe hkrit nna tsan tsan e tsap nga let, ¹⁰ Galu kaba ai mare, atsam rawng ai mare, Babelon e, dingnye lu n hka, dingnye lu n hka! ahkying mi hta sha nang hpe daw dan ai lam du sa hka gaw! nga nna shi a majaw hkrap ngu hkrap ngoi ai hte sharung shayawt let tsun na ma ra ai. ¹¹ Ga ningtsa na hpaga ni mung shi a majaw hkrap ngu hkrap ngoi ai hte sharung shayawt nga ma ai: kaning rai nme law, ya kaw nna kadai mung shanhte a gun rai mari lu sa na n rai: ¹² gun rai ngu ai gaw, ja arai, gumhpraw arai, lung seng, pale, lachyit sumpan, zingnyung, lai nba, hkyeng kabrim ai nba: manam pyaw ai hpun amyu myu, magwi kawng arai amyu myu, manu rawng ai hpun arai, magri arai, hpri arai, lung hpraw arai amyu myu; ¹³ maza hpun, shatmai tsi, manam pyaw ai baw, mura, lawban, tsabyi jahku, asau, muk shadung, hkaulan mam, dumsu, sagu, gumra, gumra leng, masha hkum hte masha a myit masin hpe, ngu ai rai nga ai. ¹⁴ Na a myit masin ra sharawng ai namsi namsaw gaw hkoi mat ma sai; hpum sau ai hte tsawm htap ai arai nlang hte mung nang jasum kau nit dai rai nna, hpang de kadai mung dai hte bai mu lu sa na n rai. ¹⁵ Dai gun rai dut nna dai mare a majaw lu su ai hpaga ni mung shi hkrum ai ari hpe hkrit nna, tsan tsan e tsap nga let, Lachyit sumpan, zingnyung hte hkyeng kabrim ai hpun palawng bu hpun nna, aja, lung seng, pale mawn sumli ai galu kaba ai mare gaw, dingnye lu a hka, dingnye lu a hka! ¹⁶ ahkying mi hta sha dai hte wa law ai sut gan jahkoi kau ai hkrum sa hka gaw! nga nna hkrap ngu hkrap ngoi ai hte sharung shayawt let tsun na ma ra ai. ¹⁷ Shanghpaw li agyi ni yawng, shanghpaw li hta ga hkawm ga sa ai ni yawng, shanghpaw li ma ni hte nammukdara a majaw asak bau lu ai ni yawng hte gaw, tsan tsan e tsap nga nna dai mare hkru ai wan hkut hpe yu let, ¹⁸ Dai galu kaba ai mare hte bung ai gaw, gara mare rai nga a ta? nga nna jahtau ma ai. ¹⁹ Shanhte gaw tinang a baw hta dap hte bun nna, Dai galu kaba ai mare gaw dingnye lu a hka, dingnye lu a hka! nammukdara hta shanghpaw li shayawng lu ai ni yawng hte gaw, dai mare a sut gan kaba ai a majaw sut su wa ma sai: ahkying mi hta sha shi a katsi katsang rai mat sa hka gaw, nga nna hkrap ngu hkrap ngoi ai hte sharung shayawt let jahtau ma ai. ²⁰ Sumsing lamu hte chyoi pra ai ni, kasa ni hte myihtoi ni e, dai mare a majaw kabu gara nga mu: kaning rai nme law, nanhte a matu matai htang na lam, Karai Kasang gaw shi a ntsa e daw dan nu ai, nga nna tsun ai, ngai na nngai. ²¹ Dai hpang n-gun ja ai lamu kasa langai mi htumrin lung kaba nsan ai nlung kawaw la nna, nammukdara kata de kabai bang kau dat let, Ndai hkrat shang wa ai zawn, galu kaba ai Babelon mare mung kabai bang kau ai hkrum na ra ai! htawm hpang galoi mung shi hpe bai mu lu na n rai. ²² Tingse dum ai sni, laka ka ai ni, sumpyi dum ai ni hte pahke dum ai ni a nsen, nang hta htawm hpang galoi mung ngoi lu na n rai; hpa hpaji maka lam hta rai ti mung, hpaji maka rawng ai masha, nang hta htawm hpang galoi mung paw pru lu na n rai; htumrin rin ai nsen mung, nang hta htawm hpang galoi mung na lu na n rai; ²³ pyengdin a ahtoi mung, nang hta htawm hpang galoi mung htoi tu lu na n rai; la nnan hte num ningnan a nsen mung, nang hta htawm hpang galoi mung na lu na n rai; kaning rai nme law, na a hpaga ni gaw, ga ningtsa na daru magam rawng ai ni, rai wa ma sai; na a mandan lakle amu hte masha amyu baw shagu ni hkalem kau ai hkrum ma sai. ²⁴ Myihtoi ni a asai, chyoi pra ai ni a asai hte ga ningtsa e sat kau hkrum mahkrum ni a asai, dai mare kata e mu hkrup lu sai, nga nna tsun ai. 

 

Shingran 19

¹ Dai hte a hpang e sumsing lamu kata e wunawng wuwa law law a wu ai nsen kaba gaw, Haleluya: Hkye hkrang la ai lam, hpung shingkang hte hpung dagu gaw anhte a Karai Kasang hte seng nga ai: ² shi a tara dara ai lam ni teng man ai hte ding hpring nga lu ai; hpye ai amu hte ga ningtsa ting hpe shut hpyit shangun ai shawa num kaba hpe shi daw dan nna, shi a shangun ma ni a asai matai, dai num a ntsa e bai htang ya nu ai law, nga nna tsun ai, ngai na nngai. ³ Bai lang mi shanhte gaw, Haleluya: dai mare a wan hkut gaw, htani htana prat dingsa a mawng lung nga ai, nga ma ai. ⁴ Shaloi dai salang hkun mali hte dai dusat amyu mali hte gaw, dingnyawm dagup nna, tingnyang hta dung nga ai Karai Kasang hpe naw ku let, Amen, Haleluya, nga ma ai. ⁵ Bai dai tingnyang kaw na nsen pru ai gaw, Karai Kasang a shangun ma ni ngu ai, shi hpe hkrit kamyin ai kaji kaba yawng hte e, anhte a Karai Kasang hpe shakawn kungdawn mu law, nga nna tsun ai. ⁶ Bai wunawng wuwa law law a nsen zawn, hka law law kadu ai a nsen zawn, mu ngoi kaba ai a nsen zawn, Haleluya: Chyahtum chyalai n-gun rawng ai Madu anhte a Karai Kasang gaw, a up nga ai. ⁷ Anhte kabu gara nga ai hte sharawng awng nga ga, shi a hpung shingkang hpe shagrau nga ga: kaning rai nme law, dai Sagu Kasha a hkungran ai poi du ra ai hte, shi a num ningnan jan gaw shi hkum hpe mawn sumli ngut sai rai nna, ⁸ hpraw tu ai hte san seng ai lachyit nba hte tinang hkum hpe mawm sumli na ahkang shi lu la nu ai: shing re ai lachyit nba gaw chyoi pra ai ni a ding hpring ai a amu bungli rai nga ai law, nga nna tsun ai gaw ngai na nngai: ⁹ Bai, dai lamu kasa gaw, Dai Sagu Kasha a hkungran ai poi de shaga la hkrum ai ni gaw, a lu ma ai, ngu nna ka da u, nga nna mung, Ndai ga gaw Karai Kasang a teng man ai mungga rai nga ai, nga nna mung, ngai hpe tsun nngai. ¹⁰ Shaloi, ngai shi hpe naw ku na nga, shi a lagaw nhpang e dingnyawm dagup nngai. Shi gaw, Shing hkum rai et; ngai gaw Yesu a sakse ga gun hpai ai na a mung, na a kahpu kanau ni a mung, shangun ma manang shada she rai nngai: Karai Kasang hpe naw ku u: kaning rai nme law, Yesu a lam sakse hkam ai gaw, myihtoi htoi ai wenyi a myit hku rai nga ai, nga nna ngai hpe ginhtim tsun ai. ¹¹ Bai, sumsing lamu hpaw malang nga ai hpe, ngai mu nngai, shaloi, yu mu, gumra ahpraw dan pru nna, dai hta jawn ai wa gaw, Kangka hte Teng man ngu ai wa rai nga ai; shi gaw ding hpring ai hku tara dara ai hte majan gasat nga ai. ¹² Shi a myi gaw wan shinglet rai nga ai; shi a baw hta ja kagup law law gup nga ai; shi hta kaga kadai n chye ya lu ai amying ka kap nga lu ai. ¹³ Asai lapri bun ai hpun palawng shi bu hpun nna, shi a amying gaw, Karai Kasang a Mungga, nga nna mying nga ai. ¹⁴ Sumsing lamu na luksuk ni mung, gumra ahpraw jawn nna san seng hpraw tu ai lachyit nba bu hpun let, shi hpang e hkan nang ma ai. ¹⁵ Masha amyu baw ni hpe kahtam na matu, shi a n-gup hta na dai ai ntawng nhtu pru nga ai; shanhte hpe mung hpri sumdoi hte shi up na ra ai: Chyahtum chyalai n-gun rawng ai Karai Kasang a sindawng kahtet ai pawt bu ngu ai tsabyi htumbyen hta shi kabye shup nga ai. ¹⁶ Shi a hpun palawng hte magyi hta, Hkawhkam ni a Hkawhkam, Madu ni a Madu, nga ai amying ka kap nga ai. ¹⁷ Bai, lamu kasa langai mi jan kata e tsap nga ai hpe, ngai mu nngai; shi gaw ntsa malen pyen ai u ni mahkra hpe, Sa ma rit, hkawhkam ni a ashan, hpyen bu ni a ashan, share shagan ni a ashan, gumra hte gumra jawn ai ni a ashan, ¹⁸ shanglawt hte mayam ni e, masha kaji kaba mahkra ni a ashan sha lu na matu, Karai Kasang a poi kaba de zup hpawng ma rit, nga nna nsen kaba hte jahtau wu ai. ¹⁹ Dai rai nna, dai matse labye mung, ga ningtsa na hkawhkam ni hte shanhte a luksuk ni mung, dai gumra jawn ai wa hte shi a luksuk ni hpe majan gasat na matu zup hpawng nga ma ai gaw, ngai mu nngai. ²⁰ Shaloi dai matse labye rim la ai hkrum wu ai; dai matse labye a masat dingsat hkam la nna, de a hkrang sumla naw ku ai ni hpe hkalem kau na matu, matse labye a man e lamik kumla galaw dan ai masu ai myihtoi mung, shi hte rau rim la ai hkrum wu ai: shan lahkawng gaw, kan hte hkru nga ai wan nawng kata de, chyahkrung jahkrat bang kau ai hkrum ma ai: ²¹ ngam nga ai ni gaw gumra jawn ai wa a n-gun hta na pru ai ntawng nhtu hte sat kau hkrum ma ai rai nna, u ni mahkra gaw shanhte a shan hte hkru hkru kat kat rai nga ma ai. 

 

Shingran 20

¹ Bai, lamu kasa langai mi gaw, sung htum ai shara na sumsaw hte hpri sin-yu kaba shi a lata hta lang let, lamu de na yu hkrat wa ai hpe, ngai mu nngai. ² Shi gaw Nat hte Satan rai nga ai, moi na lapu ngu ai baren numraw hpe rim la nna, shaning hkying mi du hkra, sharen da na matu, gyit hkang da wu ai: ³ dai shaning hkying mi garai n lai ai laman e, masha amyu baw ni hpe n hkalem kau lu u ga, dai sung htum ai shara kata de shi hpe jahkrat bang da nna, dai shara hpe la da ai hte, de a ntsa e dazik shakap da wu ai: dai shaning hkying mi lai jang, ladaw mi sha shi hpe naw raw dat na rai nga ai. ⁴ Bai, magam tingnyang ni ngai mu nngai; dai tingnyang ni hta dung nga ai ni gaw tara dara na ahkang lu ma ai: dai hta kaga, Yesu a lam sakse hkam ai majaw mung, Karai Kasang a mungga majaw mung htau sat kau hkrum ai ni hte, dai matse labye hpe mung, shi a hkrang sumla hpe mung n naw n ku ai hte, shi a masat dingsat hpe tinang a lahtan hte lata hta n hkam la ai ni a tsu ni hpe, ngai mu nngai: shanhte gaw hkrung nga let, shaning hkying mi tup Hkristu hte rau up nga ma ai: ⁵ ngam nga ai masha chyasi ni chyawm gaw, dai shaning hkying mi garai n htum ai laman e bai n hkrung lu ma ai. Dai gaw shawng na ngu ai bai hkrung rawt wa ai lam rai nga ai. ⁶ Shawng na ngu ai bai hkrung rawt wa ai lam hta shang lawm lu ai wa gaw, a lu ai wa, chyoi pra ai wa, rai nga ai: lahkawng lang na si ai lam gaw, shanhte a ntsa e ahkang n lu nga ai: shanhte gaw Karai Kasang a hkinjawng ni, Hkristu a hkinjawng ni, rai na ma ra ai rai nna, dai shaning hkying mi tup Hkristu hte rau up nga lu na ma ra ai. ⁷ Dai shaning hkying mi lai jang, Satan gaw htawng hta na raw dat ai hkrum nna, ⁸ lamu ga njut mali na Goga hte Magoga ngu ai masha amyu baw ni hpe hkalem la nna, majan gasat na matu jahpawng la na, pru sa wa na ra ai: shanhte a nambat gaw nammukdara zaibru daram law nga ai. ⁹ Dai ni gaw lamu ga pang pat lung wa nna, chyoi pra ai ni a dap hte, dai tsaw ra ai mare hpe, wang nga ma ai: shaloi sumsing lamu de na wan hkrat nna, shanhte hpe hkru kau mu ai. ¹⁰ Shanhte hpe hkalem la ai Nat mung, wan hte kan grung ai nawng hta jahkrat bang kau ai hkrum wu ai; dai yang e, dai matse labye hte, dai masu ai myihtoi mung, rawng nga ma ai rai nna, shanhte gaw shani shana nni nkri hkrum let, htani htana prat dingsa a rawng nga lu na ma ra ai. ¹¹ Bai, galu kaba ai tingnyang ahpraw mung, dai hta e dung nga ai wa hpe mung, ngai mu nngai; shi a myi man kaw na aga hte lamu gaw hkoi mat wa nna, dai aya a matu nga shara n nga mat ai. ¹² Si mat wa ai ni mung kaji kaba, dai tingnyang a man e tsap nga ma ai hpe, ngai mu nngai; shaloi laika ni hpe hpaw tawn nga ai: asak laika ngu ai laika kaga hpe mung hpaw tawn nga ai: si mat wa sai ni gaw, tinang a arawn alai hte maren, laika ni hta ka da ai hku hkan nna, tara daw dan ai hkrum ma ai. ¹³ Shaloi nammukdara gaw tinang hta rawng ai, masha chyasi ni hpe bai ya wu ai; si hkrung si htan hte katsan ga mung, tinang ni hta rawng ai chyasi ni hpe bai ya mu ai; masha langai hte langai gaw tinang a arawn alai hte maren, tara daw dan ai hkrum ma ai. ¹⁴ Shaloi si hkrung si htan hte katsan ga gaw, dai wan nawng hta jahkrat bang kau ai hkrum ma ai: dai wan nawng gaw lahkawng lang na si lam rai nga ai. ¹⁵ Asak laika hta amying n lawm ai wa kadai mung, dai wan nawng hta jahkrat bang kau ai hkrum nga ai. 

 

Shingran 21

¹ Shaloi, sumsing lamu ningnan, ginding aga ningnan, ngai mu nngai; shawng na lamu hte shawng na aga gaw lai mat wa sai: nammukdara mung dai kaw nna n nga sai. ² Shaloi chyoi pra ai mare ngu ai Yerusalem ningnan gaw, la ningnan a matu mawn sumli ai num ningnan zawn, lajang shachyip ngut nna, Karai Kasang a man sumsing lamu de na yu hkrat wa ai, ngai mu nngai. ³ Bai, dai tingnyang kata na nsen kaba gaw, Yu mu, Karai Kasang a sum gaw shinggyim masha ni hte rau rai nga ai rai nna, shi shanhte hte rau hpawng de nga na hte, shanhte gaw shi a amyu ni tai na ma ra ai: Karai Kasang gaw shi hkum nan shanhte hte rau nga nga nna, shanhte a Karai Kasang tai na ra ai: ⁴ shi gaw shanhte a myi hta na myi prawi pru mapru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai: shawng na lam nga manga hte gaw lai mat wa sai, nga nna tsun ai, ngai na nngai. ⁵ Dai tingnyang hta dung nga ai wa mung, Yu u, arai yawng mayawng hpe ngai ningnan bai gaw da nngai, nga nna tsun ai. Bai, shi gaw, Ka da u; ndai ga gaw kangka re ai ga, teng man ai ga, rai nga ai, nga nna tsun ai. ⁶ Dai hta kaga shi gaw, Dai hte gaw ngut mat sai; ngai gaw Alhpa hte Omega, apawt ningshawng mung, ahpang jahtum mung, rai nga nngai: hpang gara ai wa hpe asak hka hpawk na ntsin, manu jahpu n hpyi ai sha, ngai jaw na we ai. ⁷ Dang lu ai wa gaw ndai hte a sali wunli hkam la lu na ra ai rai nna, ngai gaw shi a Karai Kasang tai na hte, shi gaw nye a kasha tai na ra ai. ⁸ Hkrit ai myit rawng ai ni, n kam n sham ai ni, matsat shabat re ai ni, masha sat ai ni, hpye ai amu galaw ai ni, mandan lakle galaw ai ni, sumla naw ku ai ni hte masu magaw ga tsun ai ni yawng hte gaw, wan hte kan grung ai nawng hta ari hkrum lu na ma ra ai: dai gaw lahkawng lang na si lam rai nga ai, nga nna ngai hpe tsun ai. ⁹ Shaloi, hpang jahtum na ari zinli hte hpring chyat re ai gawm sanit lang ai lamu kasa sanit hta na langai mi sa du nna, ngai hte ga tsun ai gaw, Sa rit, dai Sagu Kasha a madu jan ngu ai num ningnan, ngai nang hpe madun dan de ga, nga ai. ¹⁰ Shaloi shi ngai hpe wenyi hta woi nawng mat wa ai hte, galu kaba, tsaw la ai bum ningtsa de woi du nna, Karai Kasang a hpung shingkang dan hkung ai hte, Karai Kasang a man sumsing lamu de na yu hkrat wa ai chyoi pra ai mare Yerusalem, ngai hpe madun dan nngai. ¹¹ Dai mare a htoi tu ala ai gaw, pat zawn san seng nna, hpu la ai nagahtoi lung seng hte bung nga ai: ¹² de a bunghku gaw galu kaba ai hte tsaw la nga ai: mare chyinghka shi lahkawng hpaw nga ai rai nna, dai chyinghka ni a ntsa e lamu kasa shi lahkawng sin nga ma ai: dai hta n-ga, Israela a kashu kasha amyu shi lahkawng ni a amying mung dai hte ka kap nga ai. ¹³ Sinpraw maga de mare chyinghka masum, dingdung maga de mare chyinghka masum, dingda maga de mare chyinghka masum, sinna maga de mare chyinghka masum, hpaw nga ai. ¹⁴ Dai mare a bunghku gaw npawt shi lahkawng hte gaw da nga ai rai nna, dai ni a ntsa e Sagu Kasha a kasa shi lahkawng ni a amying shingteng shi lahkawng kap nga ai. ¹⁵ Ngai hte ga tsun ai wa gaw, mare hpe mung, mare chyinghka ni hpe mung, de a bunghku hpe mung, shadawn na matu aja maiaw nren lang nga ai. ¹⁶ Dai mare gaw njut mali rai nga nna, de a dingdung maga hte nda maga maren rai nga ai: shaloi dai maiaw nren hte dai mare hpe shadawn wu yang, mai hkying mi sanit tsa manga shi daram rai nga ai: de a dingdung maga, nda maga hte tsaw de maren rai nga ai. ¹⁷ Bai, dai bunghku hpe shadawn wu yang, masha shadawn ai hte bung ai, lamu kasa a shadawn ai lam gaw, dawng latsa e mali shi mali rai nga ai. ¹⁸ Dai mare a bunghku gaw, nagahtoi lung seng rai nga ai; dai mare gaw san seng ai pat hte bung ai ja jet rai nga ai. ¹⁹ Dai mare a bunghku npawt ni gaw lung seng amyu myu hte mawn da nga ai: shawng na npawt gaw nagahtoi, lahkawng ngu na gaw nila, masum ngu na gaw mahoya, mali ngu na gaw mya, ²⁰ manga ngu na gaw chyaung, kru ngu na gaw patemya, sanit ngu na gaw seng mut, matsat ngu na gaw myek-yoi, jahku ngu na gaw utahpaya, shi ngu na gaw mahoya tsit, shi langai ngu na gaw wakintu, shi lahkawng ngu na gaw htitun nila rai nga ai. ²¹ Dai mare chyinghka shi lahkawng mung pale shi lahkawng rai nga ai; mare chyinghka langai hte langai, pale langai ngai rai nga ai: dai mare a nmaw lam gaw pat zawn tu san ai ja jet rai nga ai. ²² Dai mare kata e naw ku Htingnu ngai n mu nngai: kaning rai nme law, Chyahtum chyalai n-gun rawng ai Madu Karai Kasang hte Sagu Kasha gaw, dai mare a naw ku Htingnu rai nga ai. ²³ Dai mare e htoi ya na matu ajan mung, shata mung, n ra nga ai: Karai Kasang a hpung shingkang dai mare hpe jahtoi ya nna, Sagu Kasha gaw de a pyengdin rai nga ai. ²⁴ Masha amyu ni dai mare a nhtoi hte hkawm sa lu na ma ra ai; ga ningtsa na hkawhkam ni mung, dai mare de tinang a hpung shingkang shashawn na ma ra ai. ²⁵ Dai mare chyinghka ni hpe shani e galoi n la da yu ai; dai yang e shana mung n nga ai. ²⁶ Masha amyu baw ni a hpung shingkang hte arawng sadang hpe, dai mare de shanhte shashawn na ma ra ai. ²⁷ Awu asin re ai hpa mung, matsat shabat hte masu magaw lam hkan ai wa gaw, dai mare de galoi mung shang lu na n rai: Sagu Kasha a asak laika hta amying lawm ai ni chyu sha shang lu na ma ai. 

 

Shingran 22

¹ Bai, Karai Kasang hte Sagu Kasha a tingnyang kaw na pru nna, dai mare a nmaw lam kaang hku lawi wa ai pat zawn htoi san ai asak hka nu mung, shi ngai hpe madun nngai. ² Dai hka nu a hkingau maga mi hte maga mi de, asi amyu shi lahkawng si ai asak jahkrung ai hpun tu nga ai rai nna, de a asi mung shata shagu si nga ai; dai hpun a lap ni mung, masha amyu ni a ana shamai shatsai na matu rai nga ai. ³ Dagam dala ngu ai hpa mung htawm hpang n nga na ra ai; Karai Kasang hte Sagu Kasha a tingnyang gaw, dai mare kata e a nga nga na ra ai rai nna, shi a shangun ma ni shi hpe daw jau na ma ra ai: ⁴ shanhte gaw shi a myi man hpe a yu nga lu na ma ra ai rai nna, shanhte a lahtan ni hta shi a amying nsang kap na ra ai. ⁵ Htawm hpang e shana mung n nga na ra ai; pyengdin a ahtoi mung, jan a nhtoi mung shanhte n ra ma ai: kaning rai nme law, dai Madu Karai Kasang gaw shanhte hpe ahtoi jaw na wu ai; dai hta n-ga, shanhte gaw htani htana prat dingsa up nga lu na ma ra ai. ⁶ Bai shi gaw, Ndai ga gaw kangka re ai ga, teng man ai ga rai nga ai: myihtoi ni a wenyi ni hpe up ai Madu Karai Kasang gaw, ahkying ladaw gade n na yang byin wa na ra ai lam ni hpe, shi a shangun ma ni kaw madun dan na matu, shi a lamu Kasa shangun dat nu ai. ⁷ Yu u, ngai alawan du na ring ngai: Ndai laika hta rawng ai myihtoi ga hpe hkan nang nga ai wa gaw, a lu ai, nga nna ngai hpe tsun nngai. ⁸ Ngai, Yawhan gaw, ndai lam ni hpe na lu ai hte mu lu ai wa, rai nga nngai. Ndai hte hpe na lu ai hte mu lu ngut jang, ndai lam ni ngai hpe madun dan ai lamu Kasa a lagaw nhpang e naw ku na, ngai dingnyawm dagup nngai. ⁹ Shi gaw, Shing hkum rai et; ngai gaw, na a mung, na a kahpu kanau myihtoi ni hte ndai laika a mungga hkan nang nga ai ni a mung, shangun ma manang shada she rai nngai: Karai Kasang hpe naw ku u, nga nna ngai hpe ginhtim tsun ai. ¹⁰ Bai shi gaw, Ndai laika hta rawng ai myihtoi ga hpe dazik hkum shakap et; kaning rai nme law, ahkying ladaw ni wa magang ra ai. ¹¹ N ding n hpring ai wa gaw, n ding n hpring ai hku naw hkan nga u ga; n san n seng ai wa gaw, n san n seng naw rai nga u ga; ding hpring ai wa gaw, ding hpring ai hku naw shachyen nga u ga; chyoi pra ai wa gaw, naw chyoi pra ngu u ga. ¹² Yu u, ngai alawan du na ring ngai; langai hte langai hpe tinang a amu hte maren bai htang jaw na, ging dan ai shabrai ngai lang da we ai. ¹³ Ngai gaw Alhpa hte Omega, ningshawng wa hte jahtum wa, apawt ningshawng mung, ahpang jahtum mung, ngai rai nga nngai. ¹⁴ Asak jahkrung ai hpun hpang de du lu na hte, mare kata de chyinghka hku shang lu na ahkang lu la hkra, tinang a hpun palawng hkrut kau ai ni gaw, a lu ma ai. ¹⁵ Shinggan e gaw, gwi nre ai ni, mandan lakle galaw ai ni, hpye ai amu galaw ai ni, masha sat ai ni, sumla naw ku ai ni hte masu magaw lam sharawng awng let hkan galaw ai ni yawng hte nga ma ai, nga nna ngai hpe tsun nngai. ¹⁶ Ngai Yesu gaw, Hpung ni a matu, lam ndai hte nanhte hpe sakse hkam ya mu ga, ngu nna nye a lamu Kasa shangun dat nngai. Ngai gaw Dawi a aru madung hte lakung rai nga nngai; htoi tu ai ninghtoi gintawng mung, ngai rai nga nngai; ¹⁷ Dai Wenyi hte Num ningnan gaw, Sa rit, nga ma ai; na la ai wa mung, Sa rit, ngu u ga. Hpang gara ai wa gaw sa ru ga; lu mayu ai wa kadai mung, manu jahpu n hkrat ai sha, asak ntsin lu la u ga. ¹⁸ Ndai laika hta rawng ai myihtoi ga na lu ai ni yawng hte hpe ngai sakse hkam dat nngai gaw, Ndai ga hte hta kahtap jat ai wa kadai hpe mung, ndai laika hta ka da ai ari zinli ni, Karai Kasang shi a ntsa e kahtap jaw na ra ai: ¹⁹ ndai laika hta rawng ai myihtoi ga hta na shaw kau ai wa kadai hpe mung, ndai laika hta ka da ai asak jahkrung ai hpun hte chyoi pra ai mare kaw na, shi hte seng ai wunli wun-gau hpe, Karai Kasang shaw kau ya na ra ai. ²⁰ Ndai lam hte hpe sakse hkam ya ai wa gaw, Rai sa; ngai alawan du na ring ngai, nga ai. Amen: Madu Yesu e, Yu wa rit law. ²¹ Madu Yesu Hkristu a chyeju gaw, chyoi pra ai ni hte rau a nga nga u ga law. Amen.