Mahte Laika 6:1-4
Hpung sara law law hkaw ga, ga baw ndai hpe dang lu ai daram koi nga ma ai. Hpung sara ni alu hte seng nna hkaw tsun yang shanhte a shabrai shagreng mayu nna hkaw nga ma ai ngu chye na shut kau na hpe tsang ma ai majaw ga baw ndai hpe n hkaw tsun gwi ma ai. Ngai dingla wa gaw shabrai hpe madung tawn nna Karai Kasang a amu hpe gun hpai nga ai n re ai lam hpung masha ni chye nga ai majaw alu jaw ai lam hte seng nna n hkrit n tsang ai sha dan dan leng leng hkaw tsun na nngai.
Na la lu sai Chyum ga hta Madu Yesu Alu jaw ai lam hte seng nna sharin ya nga ai. Alu jaw ai wa a myit hta makau grup yin na manaw manang ni shing n rai shawa daw tsa ni e shakawn kungdawn ai hpe lu la na hpe madung shatai nna alu atan jaw ai gaw lam yit ai lam re ai hpe tsun nga ai. Kaja wa sha shi myit mada ai hte maren manaw manang ni hte shawa masha ni e shagrau ai hkrum jang Karai Kasang kaw na shaman chyeju hpe ala nga na shi malap mali di kau sai. Alu jaw yang arawng mala lu na matu jaw ai n rai u ga sadi nga na matu Madu Yesu ning nga sharin ya sai.
Madu Yesu tsun ai gaw, “Alu jaw ai ngu ai gaw Karai Kasang hte na a lapran e galaw ai amu re. Dai majaw masha kaga kadai n mu tim Karai Kasang hpe tsaw ra chyeju dum ai myit hte nang jaw ai kumhpa gaw Karai Kasang hkap la ai hte shaman ya nga ai. Ndai kaw Hebre ga malai hte tsun da ai gaw “Na a hkra lata galaw ai amu hpe pai lata n chye u ga” nga ai re. Lachyum gaw kaga masha gade a man e mung hkum ndau, hkum “kyaw nya” ngu ai re. Nang myit mang galaw sa wa ai lam yawng hpe chye ya nga ai Karai Kasang gaw nang hpe shaman ya na re ngu ai ga sadi rai nga ai. Myen Mung e anhtre a hpunau nkau mi gat hkan e alu hta hkawm ai shaloi, ja gawm, gumhpraw gawm kaba hpai hkawm nna hkan hta ai hta kaga alu bang ai ni gumhpraw bang dat shagu shanhte hpai hkawm ai bau hpe dum dat dat rai nga ai. Alu law law bang na matu masha a myit hpe sharawt ya ai lam rai nga ai. Madu Yesu a hpang hkan ai ni hpe ndai hku myit sharawt nna alu bang shangun na n-gun n jaw da nga ai. Rai tim Hkristan hpung nkau mi hta ndai zawn re ai lam ni hpe naw lang ai hpe chye lu ga ai. Kalang lang Hkristan hpaga seng ni gaw hpung hpe gun rai ningnan lama ma jaw nna hpung hku nna dai gun rai ni hpe “lelan pit” (manu shingjawng dut ai lai) hte dut ai lam galaw ai. Alu law htum jaw ai wa ngu ai mying ra ai masha nkau mi gaw dinghku masha ni hte shawng bawngban ai lam n nga ai sha dut ai shara kaw n dang n la re ai hka tsun bang nna rai mari wa ai mung nga ai. Dai hku galaw ai majaw hpung gaw gumhpraw lu na re rai tim mari ai masha ni a dinghku hta gaw n ru n ra ga li ga law ai lam byin chye nga ai. Masha a man e arawng lu na matu alu bang ai lam gaw shaman chyeju n lu la ai hta kaga dinghku hten bya ai lam byin chye nga ai. Dai majaw hpung masha nkau mi gaw alu hpe mying n chye shangun ai sha bang ai ni nga ai. Masha langai ngai hpe karum ai shaloi dai karum hkap la ai wa hpe alu jaw ai wa kadai re ai n chye shangun ai sha alu jaw ai ni nga ma ai. Ndai zawn galaw na shara hte aten nga ai. Anhte sasana amu galaw nga ai ten hta anhte nan mung ndai hku galaw yu sai.
Rai ti mung hpung kunhting wa gaw hpung hta shang wa pru wa ai gumhpraw hte alu jaw na sadi jaw da ai masha ni a matu ka matsing da ai lam gaw kaja ai alai langai mi rai nga ai. Karai Kasang hpe ap nawng ai alu gumhpraw hpe sadi dung ai hte hkrak jai lang lu na matu kunhting hte jahpan jep ni a amu rai nga ai. Ndai zawn rai nna hpung masha a mying hte ka matsing da ai jahpan ni hpe gaw kunhting wa hta lai nna kaga kadai mung n chye ra ai. Ndai zawn mying hte ka matsing ai gaw arawng mala ai hte n seng ai, kangka ai kunhting amu hte sha seng nga ai.
Madu Yesu gaw anhte hpe n-ging n dan ai yaw shada ai lam hte alu n jaw na matu sharin da sai. Dai rai yang dai ni anhte a hpung ni hta kaning re ai mai kaja ai lam ni a majaw alu bung nga ga ni?
1. Karai Kasang hpe chyeju dum ai majaw, anhte a alu gumhpraw hpe chyeju dum hkrungga hku anhte sak jaw ga ai. Chyeju dum hkungga gaw ladaw ladang n nga ai. Tinang a myit hta shajin lu ai daram hpe mai jaw nga ai. Teng sha nga yang anhte lu malu yawng gaw Karai Kasang jaw ya ai hkrai re. Anhte mungkan ga ntsa e asak hkrung nga ai ten hta jai lang na matu jaw tawn ai re. Anhte ndai mungkan ga kaw na tawt lai mat wa ai ten hta ja gumhpraw hkyep mi mung n la wa lu ga ai. Anhte lu malu gaw Karai Kasang a rai nga ai majaw Karai Kasang a mungdan hte seng nna jai lang ra ai lam hta kabu gara shang lawm mai nga ai. Kalang lang htam shi sha n rai htam jahku shi, htam latsa du hkra jaw ai ni mung nga ma ai. Pastor Rick Warren gaw shi woi awn nga ai hpung kaw nna shabrai n la ai hta lai nna, shi a laika dut ai gumhpraw kaw na htam law law hpe mungkan sasana amu hta jai lang ai lam sakse hkam nga ai. Kasa Pawlu Korinhtu masha ni hpe sharin shaga ai gaw, lahpawt ai myit hte n rai, shagwi hkrum nna kanung ai myit hte jaw ai mung nrai, kabu gara ai myit hte jaw ai ni hpe Karai Kasang tsaw ra sharawng awng nga ai” ngu nna tsun sharin da nga ai. Atsawm sha myit yu yang, anhte hpe hkye hkrang la ai chyeju nachying kaba nga ai re ai majaw anhte a jaw ya mayu ai chyeju dum myit mung kaba ang nga ai re. Chyeju dum ai myit kaba magang anhte a jaw jau mayu ai myit hte jaw jau ai kumhpa ni mung kaba na rai nga ai.
2. Hpung woi sara ni hpe bau na matu alu jaw ai. Hpung sara/sarama ni gaw kaga masha ni zawn tinang a sak bau bungli hpe n galaw ai sha hpung hta e Karai Kasang a magam bungli hpe aten tup gun hpai nga ma ai. Rai ti mung shanhte gaw kaga masha ni zawn lu ra sha ra bu ra hpun ra ai hta kaga kashu kasha ni hpe jawng lung shangun ra ma ai. Dai majaw hpung amu gun ai ni hpe ram ging ai shabrai jaw na gaw hpung masha ni a lit rai nga ai. Lit ndai hpe gun hpai ai hta hpung shagu gaw tinang hte htuk ai ladat hpe shaw nga ma ai. Myen Mung e bum ga hkan gaw sara ni hpe hpung masha ni kaw na mam lahkawn jaw ai, shat maw shat mai hte ashu shan hpe lu ai ten hta hkan nna sara ni a dinghku hte garan kachyan sha ma ai. Nkau mi gaw yi sun hkau na kaw na shu la lu ai rai ni hpe dut kau nna gumhpraw hte sawn ya ai mung nga ai. Mare kaba na hpung ni nkau mi gaw hpung masha ni hta htam shi alu hpe shata shagu kahkyin nna sara a shabrai shatai nga ai. Ladat ndai gaw Ga Shaka Dingsa hta Israela masha ni shanhte a hkinjawng amyu rai nga ai Lewi masha ni hpe bau maka ai ladat hte bung nga ai. Lewi masha ni gaw Israela amyu lakung shi lahkawng hta lamu ga n lu garan la ai ni rai ma ai. Kaga amyu lakung shi langai gaw galaw lu galaw sha na lamu ga lu garan la ai rai nna dai lamu ga na pru ai nsi naisi, dusat yam nga ni kaw na htam shi hta na htam mi hpe shanhte a matu Karai Kasang a man e hkinjawng tai ya nga ai Lewi amyu lakung ni hpe jaw nna bau maka na matu Karai Kasang shanhte hpe matsun da ai re. Hkristan hpung sara ni gaw Lewi amyu ni zawn wan nat hkungga nawng ai hkinjawng amu hpe n galaw ma ai rai ti mung, aten tup hpung hte seng ai nawku dawjau ai, kawan katsan ai, chyum laika sharin ya ai, kyu hpyi woi ai, shalan shabran ai, shadum jahprang ai, karum shingtau ai bungli ni hpe gun hpai nga ma ai majaw shanhte a hkum hkrang hte seng ai ra ai lam shagu hpe hpung hku nna yu lajang na lit lu nga ai. Hpung masha shagu htam shi alu hpe man man jaw lu yang, hpung masha htinggaw shi rai yang hpung amu gun htinggaw mi hpe lu bau maka lu ai re. Htam shi alu chye jaw ai hpung gaw hpung woi ni a matu shabrai galoi mung n tsang ra ma ai. Dai majaw anhte yawng hpe karum lu ai ladat langai mi re. Htam shi jaw ai ladat hpe Karai Kasang matsun ai shaloi shi a shaman chyeju ga sadi mung jaw da nga ai. Dai zawn htam shi alu bang ai lam hta hkan sa ai ni hpe Karai Kasang gaw “lamu hkuwawt ni hpaw malang nna shaman chyeju ru bun ya na n ru bun ya na shi hpe chyam yu mu” ngu nna shangun ga jaw da nga ai. Chyam yu ai masha law law a sakse hkam ai lam hpe mung anhte ayan ana yu nga ga ai. Ndai lam galaw nga sai ni gaw alu myit dai. Rai n galaw ai ni mung galaw hpang wa yu ga.
3. Hpung hta ra ai magam bungli lam shagu hpe galaw gunhpai sa wa na matu alu jaw ga ai. Hpung hta anhte rau jawm galaw ai magam ni yawng hpe awng dang lu hkra manu jahpu hkat nna galaw ra ga ai. Ga Shadawn, anhte n-gun awai hpawng hpe shinggan de sa galaw yang hpung masha ni n du n dep ai kaw hpung kaw nna gumhpraw jai lang let jahkrum shatsup nga ga ai. Sharin ya ai sara/sarama ni hpe kumhpaw kumhpa jaw ai kaw mung hpung a gumhpraw jai lang nga ga ai. Hpungtau ni gunhpai nga ai magam bungli ni hta mung jai lang ra ai lam ni nga ai. Ga Shadawn kaga mung ga de na masha ningnan du wa yang hkap hkalum ai kumhpaw kumhpa ni a matu mung hpung kaw na alu jai lang let hkap hkalum la nga ga ai. Karum shingtau ra ai amu ni pru wa yang mung anhte shinggyin da ai alu hpe lang nna karum shingtau nga ga ai. Sumtsan buga de ra ahkyak wa yang mung alu gumhpraw hte anhte hparan nga ga ai. Nawku jawng hte seng nna hpung madu ni hpe kumhpaw kumhpa shatai na matu mung alu hpe jai lang nga ga ai. Anhte jaw ai alu ni gaw kaman lachyum n pru ai jai kau ai n re ai sha, hpung a galu kaba wa na lam hta jai lang nga ga ai hpe chye nga ga ai majaw, alu jaw ai lam hta myit sharawng ai hte n-gun mi alu shakut sa wa mai ga ai.
4. Sasana bungli a matu anhte alu jaw ga ai. Hkristan hpung a asak hkrung ai a myit mada yaw shada ai lam madung gaw kabu gara shiga hkaw tsun ai sasana magam gun hpai na matu rai nga ai. Amerika ga na Hkalup Hpung masha ni yaw shada ai lam ndai hpe hkan shatup ai majaw Sara Kaba Adoniram hte Ann Judson hpe Myen Mung de shangun dat ma ai. Shi a hpang e Jinghpaw masha ni hpang de Sara Kaba Robert a dinghku, Sara Kaba Ola Hansan htinggaw ni hte kaga sasana sara/sarama law law hpe shangun dat ma ai. Dai sasana sara/sarama ni Kabu Gara shiga sa hkaw dan ai majaw dai ni anhte Jinghpaw ni Karai Kasang a shayi shadang sha ni tai nga ga ai. Dai ni mungkan shara magup hta Karai Kasang a Kabu Gara shiga hpe garai n na ai hte Madu Yesu hpe garai n chye ai masha law law naw nga nga ai. Anhte wunpawng sha ni hta pyi Miwa Mung, Myen Mung, Thai Mung, India Mung hkan Kabu Gara shiga hpe naw la dingda nga ai masha law law naw nga ma ai. Dai Karai Kasang a tsaw ra myit hpe hkaw tsun hkai dan let asak hkrung ai sat lawat hte kasi madun let sakse hkam hkawm na lit gaw dai ni anhte a lata hta du taw nga sai. Ndai amu hpe byin lu hkra masha hkum hku mung, alu atan hku nna mung anhte hkyen lajang let galaw sa wa ra saga ai. Ndai gaw Hkristan a asak hkrung ai lam hta ahkyak htum ai amu langai mi re. Sasana n galaw ai hpung gaw yat yat sha n-gun yawm let htum mat lu ai. Sasana magam hta myit rawt shakut shaja ai hpung gaw n-gun lapying grau rawng wa ai hte galoi mung shamu shamawt let ahkrung nga ai hpung tai nga ai.
Jahtum e bai shinggyin tsun ga nga yang, anhte alu jaw ai gaw: 1. Hpung a sasana amu hpe awng dang hkra galaw gun hpai sa wa lu na matu. 2. Hpung kata e shachyen nga ai magam bungli ni hpe awng dang hkra lu galaw shangut na matu. 3. Hpung hpe woi awn nga ai hpung sara ni hpe bau na matu. 4. Karai Kasang a man e chyeju dum kumhpa nawng ya na matu anhte alu jaw ga ai. Ndai lam ni yawng gaw mai kaja ai amu ni rai nga ai hte maren myit kraw lawang kata kaw nna kabu gara ai myit hte Karai Kasang a magam rai nga ai jaw jau nawng ya ai lam hta shakut shaja sa wa ga law.
Post a Comment