1 Htesaloni 5:16-18
Kasa Pawlu Htesaloni Hpung hpe de da ai shata law law garai n
na yang, shi akajawng sha Beria mare de matut hkawm wa ra mat ai. Dai kaw nna Athens de chyahkring mi Kabu Gara Shiga tsun sakse hkam ngut ai hpang Korinhtu mare de du mat wa ai re. Dai mare hta du ai nau garai n na yang Kasa Pawlu gaw Htesaloni e nga nga ta sai kam sham ai masha ni hpe laika hte matut mahkai n-gun jaw ga shana dat ai re.
Hkristan a asak hkrung ai lam hte Karai Kasang shanhte a matu myit ra ai lam hpa re ai hpe sharin ya nga ai.
Dai ni anhte gaw zingri zingrat ai lam amyu myu kaw nna lawt nna wanglu wanglang nga lu ai ten hta asak hkrung nga ga ai. Dai ahkaw ahkang gaw anhte hpe n hkrit n kang ra ai sha nawku dawjau lu shangun ai hta n-ga, nawku ai lam hpe aye n la ai sha tinang ra ai hku nga na mahkrun mung jaw nga ai. Dai zawn re ai agung alau hta hkan nga pyaw mat nna lam dam wa nga ai hpe dum ai hpunau nauna ni a matu gaw shanhte langai hte langai a matu Karai Kasang a myit ra ai gaw hpa re ai hpe chye na matu bai ahkyak nga ai. Bai nna wenyi hta galu kaba wa mayu ai hte Karai Kasang a myit ra ai lam hpe chye mayu ai ni yawng a matu mung Kasa Pawlu a lam madun ai sharin shaga ga gaw grai akyu rawng nga ai.
Kasa Pawlu kadun tawk re ai hku anhte a matu Karai Kasang myit ra ai lam hpe tsun dan sai. Dai gaw, 1. Aten shagu kabu gara nga na matu. Madu Yesu hpe hkap la lu ai ni gaw mungkan hta myit mada shara kaba dik ai asak ningnan hpe lu la ai ni re. Dai asak ningnan a shingra maka tara gaw kabu gara ai rai nga ai. Dai myit mada shara kaba hpe madu da sai majaw kam sham ai ni gaw aten shagu kabu gara mai nga ai. 2. N sim n sa akyu hpyi nga na matu. Mungkan masha ni a kaba htum ai myit mada shara hpe madu da ai wa gaw dai myit mada shara hpe dum shagu chyeju dum nga ai. Dai chyeju dum ai lam hpe kyu hpyi ai lai hte Karai Kasang hpe chye shangun nga ai. Dai hta kaga asak hkrung ai ten hta hkum hkrang a matu ra kadawn ai, myit ru myit tsang ai, shoi hpa shoi rang, machyi makaw lam law law a matu mung, kaga masha ni a ngwi pyaw hkamja lam a matu mung n sim n sa kyu hpyi taw nga na matu Karai Kasang myit ra nga ai lam Kasa Pawlu htet da nga ai. 3. Hpa lam hta mung shakawn kungdawn nga mu. Shakawn kungdawn ai lam hpe n-gup aga hku mai tsun shagrau nga ai rai tim, masha amyu baw shagu hta shakawn kungdawn ai lam hpe mahkawn mangoi hku nna shapraw dan ai grau law nga ai. Kalang lang mahkawn mangoi ai hte ka manawt ai mung lawm nga ai.
Dai ni anhte matut nna jawm myit yu na lam gaw ndai numbat masum ngu na hpe re. “Hpa lam hta mung shakawn kungdawn nga mu.” Anhte nkau mi myit yu ai gaw, ngai kabu gara myit pyaw ai ten hta shakawn kungdawn na matu n yak ai, rai ti mung ngai machyi taw nga ai ten, myit ru myit ra hkrum nga ai ten, matsan chyaren hkrum sha nga ai ten, kaw si hpang gara nga ai ten, yawn hkyen hkrum nga ai ten ni hta shakawn kungdawn na matu grai yak ai hta n-ga n mai byin ai ngu myit nga ga ai. Myit ai lam ndai hpe anhte law malawng lawan wan hkap la chye ga ai. Rai tim angwi sha bai myit yu ai shaloi hpa lam hta mung shakawn kungdawn nga mu ngu ai numhtet ga gaw mai shatup ai baw numhtet ga re ai lam dum lu ga ai. Ndai lam hta mahkawn mangoi laika gaw anhte hpe grai karum lu nga ai. Kaning re ai mahkrum madup hta rai tim shakawn kungdawn na mahkawn anhte lu ga ai. Yu ngwi mahku hte n chye mahkawn shakawn yang, mahkawn ga hpe hti ai hku nna shakawn kungdawn lu ga ai.
Lawu e ngai mahkrum madup lam masum hpe ga shadawn hte hpawn madun ai hpang, ga shadawn langai hpang langai hta mungga bung ai mahkawn numbat 3 hpe kahtap jaw na nngai.
A. Yawn Hkyen Hkrum ai ten hta shakawn Kungdawn na: Mahkawn ga langai mi hpe yu yu ga:
Mahkawn Numbat 288
1. Ya yang asak sumri dut wa, nang e nye a ningsen sim na,
Rai tim hkawhkam htingnu kata, ngwi pyaw gade ngai hkrum lu hka;
Myi man yawng let dai shi ngai hkai, Na chyeju jaw ngai lawt nngai;
Myi man yawng let dai shi ngai hkai, Na chyeju jaw nga lawt nngai.
2. Nye hkum nta hten wa run wa, galoi yang ngai n tsun chye nga,
Rai tim ngai hpe hkye la ai Wa, Htaw nga shara lajang tawn da.
3. Nye ninghtoi jan yat yang e shang, sinna bum ni dai hpe shinggang,
Ngwi pyaw laban ahkying du ra, Bungli majaw shabrai lu la.
4. Pyengdin htoi let ngai naw maja, Dai ninghtoi hpe hpyi let ala,
Yesu dai chyinghka hpaw ya jang, Nye myit masin shi kaw e shang
Kaga mahkawn numbat ni gaw: 375, 261, 13
B. Yubak a majaw myit ru myit yak hkrum ai ten hta shakawn kungdawn na mahkawn ni:
Mahkawn Numbat 97
1. Yubak jaw e myit yawn wa yang, Hkye hkrang la ai Yesu nga,
Kyu hpyi let shi kaw sit shang wa, Shi karum na ni nga na,
Yesu hpe hpyi na malap kau, Shi a ga n dum majaw,
Law law lang ru yak hkrum ga ai, Lit li la gun ga ai law.
2. Anhte ruyak ai hkrum nga yang, Nat gumlau nlang kawan
Myit hten na hpa mung n nga ai, Yesu hpe mahkra tsun dan,
Yawn hkyen hkrum ai Yesu zawn zawn, Ga ningtsa jinghku n nga,
Dai majaw shi hpe sa tsun mu, mahkra hpe karum lu na.
3. Yubak lit li la sharu yang, hki ba nang hkrum nga na rai,
Yesu tsaw ra myit naw nga nga, shi kaw hpyi nem na shang mai,
Jinghku ni nang hpe jahka yang, Yesu nang hte rau naw nga.
Na maga shi nga mayu ai, Shi lata hte mung pawn la.
Kaga mahkawn nuumbat ni gaw: 81, 82, 225
C. Yubak yin la let myit malai yang shakawn kungdawn na mahkawn ni:
Mahkawn numbat 76
1. N dang hti ai yubak, ngai lu nngai Madu; Na sai majing hte sha kashin shatsai la lu. Hkristu hpang de yubak gun sa, Dai Yubak lit n dang we ai, Dai yubak lit n dang we ai.
2. Ntsun dang ai yawn myit, ngai la sa wa ring ngai; N-gup n tsun lu tim, nang gaw chye nga ndai; Ngai hkrum ai yawng la sa ring ngai, Hkye la Madu e tau la rit. Hkye la Madu e tau la rit.
3. N-gaw nwai myit hte, nang jaw kabu ai myit; Nye singkaw zawn rai nga, lamu de ngai ni wa, Sim sa myit jaw ai Hkristu kaw, Nye ngwi pyaw myit la sa ring ngai, Nye ngwi pyaw myit la sa ring ngai.
4. Nye wenyi nang la u, Ngai dai Madu n rai; Hkye la Madu matu, ngai tai nga na nngai. Hkye la ai hkawhkam wa hpang de, Nye myit asak mahkra la sa, Nye myit asak mahkra la sa.
Kaga mahkawn numbat ni gaw: 200, 204, 125
Anhte a Mahkawn Mangoi Laika hta lahta e madun da ai mahkawn ni hta lai nna mahkrum madup shagu hta lang mai ai shakawn kungdawn ga ni rawng nga ai majaw, tsaw ra ai hpu nau ni anhte a mahkawn buk hpe anhte a wenyi shalan shabran ai lu la na matu hte wenyi n-gun atsam lu la na matu galoi mung hpa lam hta mung jai lang lu hkra shakut shaja sa wa ga. Dai gaw kam sham ai hpung masha ni a matu a dan sha mu lu ai galu kaba jat wa na lam rai nga ai. Galoi mung n-gun dat shaman ai lam n nga ai ma gaw abawng alang sha n kaba wa lu ai zawn wenyi hta galu kaba wa mayu ai ni kadai mung tinang hpe Karai Kasang jaw da sai n-gun hpe dat nna shaman shakyang ai hte galu kaba sa wa ga law.
Post a Comment