Dai ni anhte Luka (18;9-14) kaw madat la sai chyum ga hta Madu Yesu ga shadawn lang nna sharin ya ai mungga hpe na lu saga ai. Dai ga shadawn hta masha lahkawng Karai Kasang a nawku htingnu de shang nna kyu hpyi ai lam re. Dai yan lahkawng hta langai mi gaw Hparishe rai nna kaga wa gaw Kang hta ai wa re da. Madu Yesu Kabu Gara shiga hkaw hkawm nga ai ten hta Yuda masha ni hta masha hpung mali nga ai lam chye lu ai. 1. Hparishe ngu ai tara sara ni 2. Saduke ngu ai hkinjawng agyi ni 3. Essin ngu ai chyoi pra lam hkan na matu shanhte hkrai mare de nna nga ai ni hte 4. Zelot ngu ai myu tsaw hpung ni rai ma ai.
Yesu a ga shadawn hta rawng ai Hparishe wa gaw, Yuda nawku htung hta grai hkungga tawn da ai tara sara langai mi rai nga ai. Shi gaw Karai Kasang a chyum tara hpe chye ai hte maren dai tara hpe hkan shaja ai hte kaga yu maya masha ni hpe tara gara hku hkan na hpe sharin ya ai wa mung rai nga ai. Hparishe nkau mi gaw shanhte hkrai sha Karai Kasang a tara hpe shani shana myit yu let hkan sa nga ai ni re ai majaw kaga tara hpe htep lahti n hkan lu ai yu maya masha ni hpe yu nna gumrawng ai myit rawng ma ai. Tinang a hkum hpe Karai kasang a man e dingman dum ai hta kaga, tara n hkan lu ai masha ni hpe asawng asang rai jahpoi shagrit chye ma ai. Yesu sharin ai ga shadawn hta dai zawn re ai hparishe langai mi a lam mu lu ai.
Kang hta ai wa ngu ai gaw, Yesu a prat hta Romana hkawseng wa a up ai npu e mungdan a magam gun ai wa rai nga ai. Kang hta ai masha ni hpe tara hkan ai Yuda sara ni hte shawa masha ni grai n ju n dawng ma ai. Shanhte gaw mungdan up ai Roma masha ni a nchyang tai ai majaw mung, kang hte hkanse hta ai shaloi n tara ai hku adip arip re ai hku nna shatsang sha ai majaw mung shawa masha ni a ndawng n yawt ai hpe hkam sha ma ai. Madu Yesu a ga shadawn hta dai zawn shawa e n dawng ai masha langai mi a lam Yesu a ga shadawn hta mu lu ai re.
Hparishe wa hte Kang hta ai masha yan kyu hpyi na matu Karai Kasang a htingnu de shang wa yang, Hparishe wa gaw shawng de sit sa nna lamu de man yawng let lata sharawt nna Karai Kasang hpe shakawn let chyeju dum ga tsun ai. Dai chyeju dum ga hta shagrit shanem ai ga hkaw mi mung n rawng ai sha tinang a atsam hpe shagrau shaa let kaga masha ni hpe shagrit jahpoi mara shagun ai ga hkrai rai nga lu ai. Shi gaw Karai Kasang a man e hkan sa ra ai tara yawng hpe shatup lu ai hta n-ga kaga masha ni galaw nga ai yubak mara yawng hpe mung koi gam lu ai wa re ai lam Karai Kasang a man e myit tsaw myit dap ai hku tsun nga ai. Shi gaw num shaw num shut ai bungli n galaw ai, lagu lagut ai mung n nga ai, Karai Kasang a htam shi hpe mung shi lu la ai rai kaji kaba yawng a ntsa e jaw nga ai lam grang dan ai. Jahtum e shi gaw kang hta ai wa hpe yu nna ndai kang hta ai wa zawn yubak galaw ai wa mung n rai nngai ngu nna Karai Kasang a man e shi a gumrawng gumtawng ai myit hpe madun nna kyu hpyi shangut nu ai. Shi a kyu hpyi ga yawng hta shi a kaja ai lam gumhkawng dan ai hta lai nna hpa hpyi ai lam n nga lu ai.
Kang hta ai wa gaw masha ni e mara shagun hkrum ai asak hkrung da wu ai rai nna, shi nan mung Karai Kasang a man e shut hpyit mara lu ai wa re ai lam chye wu ai majaw, Karai Kasang man e kyu hpyi na matu sit shang ai shaloi lamu de pyi n mada wam ai sha, myiman ga de gum dagup nna shi a sinda hpe adup let yubak mara lu ai wa rai nga ai shi hkum nan hpe Karai Kasang e matsan dum la na matu hpyi nem wu ai. Madu Yesu tsun ai gaw ndai kyu sa hpyi ai masha yan hta Kang hta ai wa gaw Karai Kasang kaw na mara dat ya ai chyeju lu la ai hte dingman ai hku shi a sak hpe matut hkrung gaw gap sa wa na matu ahkaw ahkang lu la ai lam hpe tsun dan nga ai.
Tsaw ra ai hpunau nauna ni, anhte hpung masha ni a asak hkrung ai lam hta shut hpyit lam dam ai hpang myit malai bai lu nna mara yin la ai ni hpe gara hku hkap la nga ga ai kun? Hpung masha ni a myit mang ai lam myu masum hpe mu lu ga ai. Shawng na lam gaw, matut nna jeyang mayu ai myit. Myit n dai hta n tsen ai hte n kam lu ai myit mung lawm nga ai. Mara yin la ai wa hpe n hkap la lu ai. Teng sha myit malai ai n rai, hpung kaw na amyat htuk mayu nna she re ngu amyu myu hku jeyang mayu ai myit nga chye ai. Kalang lang dai mara yin la ai wa gaw shi galaw ai mara a ari hpe gingdan hkra garai n hkam sha shi ai. Dai majaw n mai hkap la ai ngu nna myit ai lam mung nga ai. Myit ai lam nkau mi gaw dai daram sawng ai shut hpyit mara lu ai wa hpe gaw shaden kau ra ai ngu ai myit mung nga ai. Shawng de Yesu a prat hta mung dai ni na nawku htung nkau mi hta mung masha la shaw ai num hpe nlung hte kabai sat kau na tara nga malu ai. Tinang a hkum hpe tara hkan shatup nga ai ni ngu myit la, rai dum nga ai masha ni hta n-gun kya, shut hpyit ai masha ni hpe aloi sha mara n dat ya lu ai lam byin chye ai. Bai nna yubak lu ai ni galaw ai yawn hkyen hpe hkam sha ai ni nkau mi mung ging dan hkra matai n lu htang yang myit n dik ai ni nga ma ai. Masha sat nna htawng hkrat ai ni shaning law law htawng nrawng ra ai sha shalawt ai hkrum yang, masha n kau mi a myit hta up hkang ai ni hpe pawt sindawng mara shagun ai ni nga ma ai. Hkristan Hpung hta mung ndai zawn re ai myit hpe masha nkau mi hta mu lu nga ai.
Myit mang ai lam lahkawng ngu na gaw, yubak mara galaw ai hpe atang shalang sha hku mu ai myit mang lam re. Masha nkau mi gaw yubak ngu ai ga gaw hpa lachyum n nga ai. Masha yawng gaw chye shut ai. Shut ai hpe gaw mai sharai kau ai. Hpaji law law chye jang yubak mara ngu ai hkoi mat na re. Shut ai galaw ai hpang she jaw ai hpe chye lata ai ngu nna lam amyu myu hku mara shaprai kau shakut ai myit mung nga ai. Dai myit hku rai yang yubak mara ngu ai gaw law law aye kaba ai baw n rai. Yubak mara hpe grau lawan malap kau lu yang grau mai ai ngu myit ai lam rai nga ai. Hpung masha ni hta mung kalang lang dai zawn re ai myit rawng ai n kau nga chye ai. Yubak galaw ai hta pyaw taw nga ai majaw, masha kaga ni a yubak yin la ai lam hpe mung hpa ahkyak ai lam n re ai hku myit kau chye ai. Myit mang ai lam ndai hpe hkan ai masha ni hta yat yat sha Karai Kasang hte tsan gang mat wa ai lam byin chye ai. Tinang galaw ai mara hpe atang sha myit ai hte maren kaga ni a shut hpyit ai hpe mung aloi sha yu shalai kau ya lu ai. Myit ndai rawng ai ni a matu gaw mara yin la ai lam n galaw ra ai ngu myit ma ai. Shut hpyit ai amu hta shanang nna asak hkrung timung hpa tsun na lam n nga ai ngu myit ya chye ma ai. Ndai ga na ma kanu kawa law law gaw kasha ni a asat lawat hpe dai hku atang sha yu shalai nga ma ai majaw kasha ni a prat hta arawn alai hte seng nna mang hkang law law hkrum sha ai hpe mu lu ga ai.
Masum ngu na myit mang ai lam gaw Madu Yesu a myit mang ai lam re. Madu Yesu gaw yubak mara hpe atang sha hpa n ra ai, galaw mayu ai hku galaw mu ngu ai myit n rawng ai. Yubak mara a ari hpe shi hkam la ai hta kaga shut hpyit ai hku asak n hkrung ai sha mai kaja ai hku asak hkrung gaw gap sa wa na matu myit ra nga ai. Rai ti mung shi gaw yubak lu ai wa hpe jeyang shamyit kau na myit mung n rawng nga ai. De a malai, yubak lu ai ni hpe mai kaja ai asak hkrung lam de woi lakawn wa nga ai. Kang hta ai wa a kyu hpyi ga hta mara yin la ai hte Karai Kasang a matsan dum lama ai chyeju hpe hpyi ai hte maren dai chyeju hpe lu la ai lam tsun dan nga ai. Kang hta ai wa gaw Hparishe wa hta grau nna Karai Kasang a dingman ai lam hpe lu la let nta de wa nu ai ngu ai a lachyum gaw, Kang hta ai wa gaw yubak mara hta bai n shanang ai sha dingman ai asak hpe bai gaw gap la na ahkaw ahkang lu la nu ai ngu ai rai nga ai.
Yesu a prat hta kalang mi Laika ka ai sara ni hte hparishe nkau mi gaw shut hpyit ai amu galaw nga ai kaw na rim la hkrum ai num langai mi hpe Yesu hpang de dun sa wa nna, “jep ai tara hkan yang gaw num ndai hpe ya jang nlung hte kabai sat kau ra ai. Nang gaw gara hku jeyang nta?” ngu sa san ma ai. (Yawham 8:1-12) Yesu gaw shanhte hpe “mai sa, nanhte hta na mara n galaw yu ai wa shawng shi hpe nlung hte kabai u ngu” tsun nhtawm gum nna ga e ka mahkyet nga ai. Shi baw sharawt nna bai mada yu yang dai numsha hta lai nna kaga kadai mung n nga sai hpe mu mada wu ai. Shaloi shi dai numsha hpe “nang hpe kadai mung n je yang ma ni?” ngu san yang, “Kadai mung n je yang ma ai” ngu tsun dan wu ai. Yesu gaw shi hpe “Ngai mung nang hpe n je yang na nngai; wa nu, yubak bai hkum galaw sa” ngu nna shabawn dat wu ai.
Dai re ai majaw hpunau nauna ni e, anhte a hpung hta mara yin la ai lam hte mara raw dat hkat nna Madu Karai Kasang a man e asak ningnan gaw gap lu na lam hpe marit nga ga ai. Anhte a hpunau ni hta na dai zawn mara yin la ai ni hpe Karai Kasang gaw Madu Yesu hta mara dat ya nna asak ning nan gaw gap lu ai chyeju jaw ya nga ai hte maren anhte langai hte langai mung Madu Yesu a myit rawng let shada da hkap la shagrin shangang hkat ga. Hpung masha yawng gaw Madu Yesu a hkum daw hkum chyen ni rai nga ga ai hte maren, anhte hpe hten za shangun ai yubak mara hpe koi gam nna, shut hpyit ai kaw na kayin wa ai hpu nau ni yawng hpe hkap la ai hte shanhte a asak ningnan gaw gap ai hta n-gun jaw karum shingtau let rau myit hkrum mang rum let Karai Kasang a mungdan hpe gaw gap sa wa ga law.
Post a Comment