Yawhan Laika 4:1- 30,39-42
Anhte na la lu sai Chyum maumwi hta, Madu Yesu hte shi a sape ni Yuda mung kaw nna Galile mung de hkawm sa wa ai lam chye lu ga ai. Shanhte gaw kaga Yuda masha ni a len n hkam ai sha Yuda mung kaw nna adingtawk sha Samari mung hpe lai di nna Galile mung de lung wa ma ai. Kaga Yuda masha ni gaw Yawdan hka sinpraw hkran hku nna kawai sa kawai wa rai ma ai. Hpa majaw nga yang, Yuda masha ni gaw Samari masha ni hpe n san n seng ai amyu ni ngu shadu ai hte shanhte hte kanawn mazum ai lam n galaw ma ai. Samari masha ni gaw ning rai Yuda masha ni e yu kaji ai hkrum sha ai tsa ning hku nna rai wa sai. Samari masha ni a kaji kawoi ni gaw Yuda masha hte maigan masha kayau ai dinghku ni kaw na shaprat tawn ai ni rai ma ai. Yuda masha ni hpe BC 722 ning hta Assuri mung dan e bawng rim mat wa ai ten hta, matsan mayan re ai Yuda masha ni hpe ngam kau da ma ai. Dai ngam kau da hkrum ai Yuda masha ni gaw Assuri hkawhkam e kaga mungdan kaw na htawt nga shangun ai maigan masha ni hte dinghku de ma ai. Shanhte a kashu kasha ni gaw Samari amyu a kaji kawoi ni tai wa ma ai. Dai zawn re ai amyu rai ma ai majaw Yuda jet ni gaw shanhte hpe yu matsat, yu kaji ma ai.
Yesu a prat hta na Yuda masha ni du hkra dai zawn amyu ginhka let yu kaji hkat ai lam galaw nga ma ai. Yesu hte hkrum ai Samari numsha gaw Yesu hpe mung kaga Yuda masha ni zawn galaw na shadu let Yesu hpyi ai ntsin hpe n jaw ra hkra ndang hpang wa ai hpe mu lu ai. Yesu chyawm gaw dai numsha a ntsen ai ga ni hpe n htan ya ai sha, shi hpe hkye hkrang la ai chyeju lu la hkra ga san ga htai ladat hpe lang nna matut shaga wu ai. Dai numsha gaw Yesu shi hpe galoi mung bai n hpang gara chye ai asak jahkrung ya lu ai ntsin jaw lu ai lam hpe na ai shaloi, Yesu hpe dai ntsin jaw na matu hpyi wu ai. Yesu gaw shi hpe shi a madu wa hpe wa shaga woi sa na matu tsun wu yang dai numsha gaw shi a lam hpe magap da mayu ai majaw shi madu wa n lu ai lam tsun wu ai. Yesu gaw dai numsha galaw lai wa sai lam ni hpe chye wu ai hte maren shi galaw lai wa sai hte maren teng man ai hku shadan dan wu ai. Shaloi dai numsha gaw shi hte shaga nga ai la wa gaw yu maya masha n re ai lam hpe chye nna Yesu hpe „Nang gaw myihtoi re ai hpe ngai dum se ai“ ngu tsun wu ai. Hpang jahtum e numsha dai gaw Samari masha ni la dingda nga ai Meshia a lam tsun pru wa ai shaloi, Yesu gaw shi hkum nan dai Meshia re ai lam tsun dan wu ai rai nna, numsha dai gaw mau kahpra ai hte, shi a ntsin di bu hpe hka htung e tawn kau da nna mare de wa nna mare masha ni hpe Yesu hpang de sa madat yu na matu kagat mat wa ai.
Dai ten hta mare de malu masha sa mari ai sape ni wa nna Yesu kadai hte shaga nga ai hpe wa mu yang shanhte a myit hta ntsen ai ga san amyu myu myit pru wa ma ai. Rai tim Yesu hpe shanhte a ntsen ai lam n shadan dan gwi ma ai. Yesu mahtang shanhte hpe Karai Kasang a Kabu Gara Shiga ngu ai hkye hkrang la ai lam hpe hkaw tsun na ginra gade daram law htam nga ai hte amu hpe gade daram tin tin galaw ra nga ti mung galaw na masha n law la nga ai lam hpe mam myin taw nga ai yi hte ga shadawn la nna sharin ya wu ai.
Samari numsha mung mare na masha law law hpe hka htung de woi sa wa ai rai nna Yesu gaw shanhte yawng hpe Karai Kasang a hkye hkrang la ai lam hkaw dan lu wu ai. Mare masha ni mung shi a ga a majaw kam sham ma ai rai nna Yesu hte shi a sape ni hpe shanhte hte rau mare e matut nga na matu saw shaga ma ai. Yesu hte shi a sape ni dai yang e lahkawng ya nga nna Galile mung de bai matut luing wa ma ai.
Mungga ndai kaw nna dai ni anhte sharin hkam la na lam kaba masum hpe myit sumru yu ga.
1. Dai ni anhte asak hkrung nga ai mung dan shara shagu hta masha amyu langai hte langai yu kaji hkat nna n ju n dawng hkat ai lam hte majan byin hkat ai lam law law naw nga ai. Amerika mung kaw shaning tsa ning hku nna shada amyu n garan, myit man n lata ai sha kanawn mazum nga matu lam amyu myu hku shakut lai wa sai. Dai ni gaw mungdan a tara hta nan ka bang da nna bungli ginra kaw nna dut lu dut sha ginra shagu hte kanawn mazum ai lam shagu hta amyu n ginhka, myiman n lata hkra shakut shaja sa wa nga sai. Rai tim shara law law hta tara n hkan ai sha masha a myit machyu nna masha shada sari sadang maren re ai hku n hkap la ai arawn alai ni hpe naw hkam sha lu nga ga ai. Hkristan hpung hta nan pyi dai zawn ginhka ginrang re ai lam ni naw nga chye ai. Chyum laika kaw nna anhte sharin la lu ai gaw, Karai Kasang gaw shinggyim masha yawng mayawng a hpan wa ningsang re ai hte shi a man e myi man lata ai ngu ai n nga ai. Shi gaw mungkan masha yawng hpe tsaw ra ai hte shi a hkye hkrang la ai chyeju hpe jaw ya nga ai. Ndai lam hpe dan leng htum ai hku tatut madun ai gaw Madu Yesu a arawn alai kanawn mazum ai lam hta rai nga ai. Madu Yesu gaw kaga Yuda masha ni e yu kaji da ai, sai kau shinggan kau ai masha ni hpe Yuda masha ni hte maren sari sadang rawng ai masha hku hkap la nna shanhte hte rau kanawn mazum ai hte Kabu Gara Shiga hpe garan kachyan jaw nga ai. Madu Yesu gaw anhte yawng hpe Karai Kasang a tsaw ra myit a magam hpe kasi kamang madun let anhte a arawn alai shi a arawn alai hte bung pre wa hkra lam woi nga ai. Anhte shi a sape ni a matu kaja ai arawn alai ndai hta hkawmsa lu na matu n loi nga ai. Kasa Petru gaw Yesu hte masum ning daram rau hkawm ra sa let Yesu kaw na sharin la sai wa re. Rai ti mung shi gaw Roma hpyen du Korneli hpang de sa nna Kabu Gara Shiga hkaw tsun lu hkra Karai Kasang shi hpe shingran hte Karai Kasang a man e n san n seng ai masha ngu ai n nga ai lam; maigan masha ni hpe Yuda masha ni hte madang maren hku kanawn mazum ra ai lam hpe naw madun ra ai hpe Kasa Laika daw kaba shi hte shi langai hta hti lu nga ga ai. Anhte hpe mung naw kaji ai ten hta kanu kawa ni e shing n rai makyin jinghku langai ngai e masha amyu ginhka let myi man lata chye na matu myit kraw lawang hta dawk sharin da ai lam nga chye ai. Petru hpe shingran hte sharin ai zawn anhte hpe mung Karai Kasang gaw anhte a mahkrum madup hta shi a mungga hte sharin ya nna myit masin ningnan galai ya lu nga ai. Anhte Amerika mung e nga sai ni a matu Karai Kasang jaw ya ai myit masin ningnan hte hpan shapraw ai arawn alai ningnan hpe tin tin anhte lu dagraw hkra shajin lajang nga ga. Tinang a masha ni hpe mung kaga amyu masha ni hpe mung sari sadang bung ai arawn alai hte kanawn mazum chye na machye machyang anhte lawan ra saga ai. „Na a htingbu wa hpe na a hkum hte maren tsaw ra lu na ndai“ ngu ai tara hpe tatut hkan sa na ten du sai.
2. Samari numsha hte shi a mare masha manang ni chye la hkap la ai hte maren anhte langai hte langai mung Madu Yesu hpe hkap la kam sham ai gaw Meshia hpe hkap la ai rai nga ai. Madu Yesu jaw ya ai asak jaw lu ai ntsin hpe anhte lu nga ga yang dai htani htana asak gaw anhte hta rawng ai sha n ga, anhte nan mung dai asak a lam sakse hkam ai ni tai nna, masha law law hpe asak hka hpawk de sa lu la na matu matsun lu ai ni anhte tai na ga ai. Anhte a dum nta masha ni hte anhte a makau grupyin na masha yawng hpe asak hka hpawk rai nga ai Madu Yesu hte rau jinghku hku ya lu ga ai. Asak madu hte rau hkawm rau sa ai nta dinghku gaw myit sim myit sa nna myit pyaw myit dik ai dinghku rai na ra ai. Dai nta masha ni gaw Madu hte grau nna bung pre ai arawn alai hte hkawmsa mayu ai myit law htam wa nna kaga masha ni hte kanawn mazum ai lam hta masha yawng hpe sari sadang maren sha hte kanawn mazum lu ai chyeju hkap la lu wa na re. Dai chyeju lu la ai ni gaw Wunpawng sha shada da n ju n dawng hkat ai arawn alai kaw na mung, mungdan masha shada da a lapran n ju n dawng ai mamggang ana kaw na mung, mungkan masha amyu baw ni a lapran n ju n dawng majan byin ai dagam dala kaw na mung lawt lu nna, myit hkrum mang rum let shada da hkap la hkat lu hkra mahku mara galaw ya lu ai masha ni tai lu na mara ai. Ndai zawn Madu Yesu hta galu kaba wa ai lam gaw anhte kam sham ai ni yawng sharawng awng ra marit nga ai lam langai mi rai nga mali
3. Anhte a makau grup yin e kaga amyu masha law law nga ai hpe anhte chye nga ga ai. Rai ti mung shanhte hpe Karai Kasang a Kabu Gara Shiga garan ya na matu anhte n myit dum ai ten law law nga lai wa sai. Ngai naw kaji yang Balawng kahtawng law law hkan du hkawm yu ai. Sam kahtawng ni mung makau grup yin e anga nga ai. Rai ti mung shanhte hpang de dingtawng sa nna Kabu Gara Shiga garan ya ai ngu ai hpe myit pyi n myit dum yu ai. Anhte gara kaw wa kaba w tim makau grup yin hkan anhte hte ga n hkrum ai amyu law law nga ai hpe hkrum kadup yu na ga ai. Dai ni yawng gaw Karai Kasang e hpan da ai shinggyim masha ni hkrai re. Karai Kasang anhte hpe tsaw ra ai hte maren shanhte hpe mung tsaw ra ai. Shanhte hkye hkrang la ai chyeju lu la na matu Karai Kasang ra sharawng ai. Dai hta jan nna Karai Kasang gaw shi hpe shawng chye ai, shi a chyeju hpe hkam la lu sai, shi hpe shawng kam sham sai ni gaw shi hpe garai n chye ai ni a man e shi a sakse ni tai na matu myit mada nga ai re. Anhte nkau mi gaw ga baw law law chye shaga ai. Nkau mi gaw kaba wa ai hte n sharin ra ai sha makau grup yin a majaw ga baw myu lahkawng masum chye saga ai. Myen mung e kaba wa ai Wunpawng sha ni gaw asak 8, 9 ning du ai hte rau n law htum ga baw myu lahkawng hpe shaga sai. Dai ga ni hpe lang nna Madu a sakse ni anhte tai lu ga ai. Anhte a buga de sa nna Kabu Gara Shiga sa hkaw tsun ai sasana sara ni gaw anhte ga de du jang she anhte a ga hpe hkaw shagu sharin la ra ma ai. Shanhte dai zawn shakut nna anhte hpe Karai Kasang a lam sharin ya ai majaw dai ni anhte hkye hkrang la ai chyeju hpe lu la saga ai. Dai ni mungkan ga mungdan law law hta Kabu Gara Shiga hpe la dingda nga ai ni law law nga ma ai. Anhte mung anhte n ga yu ai ga ni hpe sharin la nna sakse hkam mai ai ten du sai. Dai ni Singapore, Malaysia, Indonesia hte Philippines e nga ai Hkristan masha law law gaw kaga mungdan de sasana bungli hpe gunhpai let ap nawng nga ai ni law law nga wa sai. Ya anhte nga ai Amerika mung hta mung mungkan shara magup de na masha sa htawt nga wa sai rai nna, ndai ga e sha sasana bungli galaw timung ga baw amyu myu lang nnai hkaw tsun mai ai ten rai sai. Madu Yesu sape ni hpe tsun ai ga „Mam shu la na amu law la nga ai, rai tim dan na masha n law nga ai. Dai majaw yi madu rai nga ai Karai Wa kaw man dan na masha law law shangun dat na matu hpyi mu“ nga ai gaw ya e mung teng nga ai. Tsaw ra ai hpunau nauna ni anhte a myit masin kraw lawang hpe Karai Kasang a magam bungli a matu hpaw malang tawn ga. Madu anhte hpe tawn da ai shara hta nga let shi a magm hpe shachyen shaja sa wa nga ga law.
Post a Comment