Roma 6:1-11
Dai ni gaw anhte Jacksonville Jinghpaw Hkalup Hpung ni a matu labau shang ai nhtoi langai mi rai nga mali ai. Hpungtau masum a shadang sha hte hpung masha ni a dinghku ni kaw na marai masum, yawng marai kru, anhte hpung a shawng ningnan na hkalup hkam la ai pang hta lawm lu masai. Anhte yawng Madu Karai Kasang a man e kabu gara nga ga ai. Ndai ni gaw anhte a hpung hta na shawng si a asi ngu sawn la lu nga ai majaw shanhte a mying hpe ka matsing da mai nga ai. 1. Galau Sau Ying 2. Maran Htingnan Aung 3. Bawmwang Moses Dan Hkawng 4. Shadang Swan Htet 5. Nring Zau Tu Awng 6. Jinghpaw Hpawng Hkum ni rai ma ai.
Ndai marai kru gaw hpung masha ningnan ni chye ang ai lam shagu hpe bat mi tup sharin la masai rai nna Hkalup Hkam la ai lam a lachyum hpe mung sharin la masai. Shanhte sharin la ai lam hpe anhte shawng e hkalup hkam la sai ni mung bai myit dum sumru yu na matu dai ni lahte na ja chyum ga hpe lang nna anhte myit sumru yu na re.
myit yu ra na re.
- Hkalup hkam ai ngu ai gaw Madu Yesu a kasi hpe hkan nang ai lachyum rawng nga ai. Madu Yesu gaw shi asak sumshi ning daram du ai ten hta Yawdan hka kau e myit malai tara hkaw nga ai Hkalup Sara Yawhan kaw sa nna hkalup hkam la ai lam Marku 1:9-11, Mahte 3 hte Luke 3 hta ka da nga ai. Yawhan gaw du magang ra ai Karai Kasang a mungdan hta shang lu na matu shawa masha ni hpe hkyen lajang let myit malai hkalup hkam ya nga ai. Masha law law Yawhan kaw sa nna dai hkalup hpe hkam la ma ai zawn Madu Yesu mung Yawhan a lata hta hkalup hkam la wu ai. Madu Yesu a matu gaw, Karai Kasang a man e shagrit shanem nna, Karai Kasang a up hkang ai npu e shi a asak hpe ap nawng ya ai lachyum rawng nga ai.
Dai re ai majaw anhte Madu Yesu a kasi hkan nang let hkalup hkam la ai shaloi anhte gaw yubak lam hta asak hkrung ai kaw nna Karai Kasang a up hkang, lam madun ai asak hkrung lam de kayin wa sana ngu ai lachyukm rawng nga ai. Madu hte lahkam rau htawt hpang nna prat tup Madu Yesu matsun ai lam hku asak hkrung na daw dan ga sadi tawn ai kumla langai mi re ai majaw majoi mi asak aprat ram wa ai majaw manang galaw ai hku hkan galaw ai hku sha n re ai lam dum lu ga ai.
- Hkalup Hkam ai gaw, Madu Yesu sharin matsun da ai ga hpe hkan shadik ai lam rai nga ai. Mahte 28:18-20 hta Madu Yesu gaw shi a sape ni hpe “Nanhte pru sa nna, masha amyu baw shagu hpe sape shatai let, Kawa a, Kasha a, Chyoi Pra ai Wenyi a mying ningsang hta hkalup jaw nhtawm, ngai nanhte hpe hkang da mada yawng hte hpehkan shadik lu mu ga shanhte hpe sharin shaga ya mu:” ngu nna hkang da nga ai. Pentekoti shani sape ni gaw lani mi hta sha marai hkying masum hpe hkalup hkam ya ai lam chye lu ga ai (Kasa 2: 41). Ban mi a hpang ban mi nga hkrat wa ai sape ni rai nga ai kam sham ai ni gaw hkang da ai ga ndai hpe shatup let nnan kam sham wa ai masha ni hpe hkalup hkam ai lam galaw nga ai. Anhte hkalup hkam la ai gaw dai Madu Yesu a hkang da ai ga hpe shadik ai amu langai rai nga ai. Madu Yesu a hpung gaw matut nna Madu Yesu hpe hkap la kam sham wa ai ni hpe hkalup hkam ya na magam lu nga ga ai.
- Hkalup hkam la ai lam a lachyum kaga langai mi gaw, nawku hpung langai ngai hta hpung masha langai mi tai wa ai ngu ai lachyum rai nga ai. Anhte hkalup hpung hta, hkalup garai n hkam ai kam sham ai ni hte hpung kata e kaba wa ai hkalup garai n hkam shi ai ma ni hpe nawku masha jahpan hta bang ai. Rai tim shanhte gaw hkalup hpung langai ngai a tara shang hpung masha jahpan hta garai n rawng ma ai. Hpung masha langai mi gaw dai hpung kaw na shi hkam la na akyu hte shi gunhpai na lit lu nga ai. Ga shadawn nga yang hkalup hkam sai hpung masha gaw Madu Yesu a shana shat sha poi hta shang lawm na ahkaw ahkang lu ai; hpung a magam amu hta shang tsap lu na matu lata ai hkam la lu ai; hpung hte seng ai amu bawng ai hpawng hta shang lawm tsun shaga dawdan lawm lu ai. Dai hte maren shi gaw hpung a magam lit hpe mung gunhpai shakut shaja ra nga ai. Hpung hta lang ra ai ja gumhpraw a matu alu atan bang ra ai; hpung masha hte htap htuk ai arawn alai hte asak hkrung shakut sa wa ra ai. Kasi kaja ai hpung masha tai lu hkra shakut shaja sa wa ra ai. Nawku daw jau ai lam ni hta mung tinang hpe Karai Kasang jaw ya ai chyeju kumhpa hpe jai lang let shang lawm ra ai. Mahkawn chye mahkawn ai wa hpung a yu ngwi hpung hta shang lawm mai ai. Hkalup hkam ai gaw jahpan shang nna myit su myit kung ai kam sham ai masha tai wa ai ngu ai lachyum mung rawng nga ai. Hkristan dinghku kaw nna kaba wa ai ma ni a matu gaw hkum hkrang kaba wa ai, myit masin kunghpan wa ai hte wenyi makam masham lam hta, Madu Yesu hpang hkan ai hte asak hkrung na dawdan ai hpe madun na matu hkalup hkam la ma ai. Kaga Nawku htung kaw nna Madu Yesu hpe hkap la kam sham wa ai ni a matu gaw, hkum hkrang myit masin kung hpan chyalu rai na masai. Shanhte a matu gaw wenyi makam masham hta asak ningnan hpe hkap la hpang ai lachyum rawng nga ai. Hkalup hkam la sai ni yawng gaw hpung masha ni a ahkaw hkang hpe hkam sha lu nna hpung a magam hpe jawm gun hpai na lit mung lu nga mali ai.
- Hkalup Hkam ai gaw Hkristan makam masham hta lachyum grai sung ai kumla langai mi mung rai nga ai. Anhte hkalup hpung ni a hkalup hkam ai ladat gaw, hpung woi sara wa hkalup hkam la na wa hpe hkum ting hka kata de lup mat hkra dip tsing nna hka kaw na bai sharawt la ai ladat re. Bum ga e hka laing galaw yak ai kaw hkrup yang lahput daram du hkra sha sung ai laing kasha galaw tawn ai kaw hkalup hkam na masha ni hpe hkum ting madi hkra kaleng taw shangun ai mung nga ai. Ahkyak ai gaw, hkum ting hpe hka kata de lup kau lu ai rai nga ai. Ndai zawn hka hta lup ai gaw Madu Yesu hpe lup hta lup makoi kau ai hte shadawn ai kumla re. Hkalup hkam ai shaloi kam sham ai masha wa gaw Madu Yesu hte rau shi a lup makoi ai hta shang lawm sai ngu ai lachyum re. Dai zawn hka de lup ai shaloi Madu Yesu hte rau lup kau hkrum ai hte maren hka kaw na bai sharawt la ai gaw Karai Kasang Madu Yesu hpe si ai kaw na sharawt la ai hte shadawn da nga ai. Kadun ai hku tsun ga nga yang, hkalup hkam ai gaw Madu Yesu a makoi mayang ai hte hkrung rawt wa ai hpe shadawn da ai re (Roma 6:3). Yubak mara e up hkang tawn da ai anhte a sak hkrung lam dingsa hpe hka hta lup kau da nna Madu Karai Kasang jaw ya ai asak hkrung ai lam ningnan hta rawt wa nna, Madu hte rau hkawm rau sa let asak hkrung sa wa sana ngu hkam la ai kumla rai nga ai.
Ko Tha Byu ngu ai wa gaw grai n hkru n shawp ai wa hte masha sat ai wa re. Shi hpe shawa ai bunglat hka wa na gumhpraw n lu ai majaw mare masha ni shi hpe rim nna gat e mayam langai mi hku sa dut ma ai. Sasana Sara kaba a shat shadu ai wa gat e shi hpe sa mu hkrup nna Sasana Sara Kaba hpe wa tsun dan nhtawm dai wa hpe gumhpraw hte sa shaw la ma ai. Sasana Sara Kaba kaw na Madu Yesu a lam na la ai hpang myit malai ai hte hkalup hkam la nna kam sham ai masha tai wa ai hpang Kayin amyu masha ni hta shawng ningnan na Tara hkaw sara kaba tai wa sai. Kayin masha law law hpe Madu hpang de woi la lu ai wa re ai majaw dai ni Ko Tha Byu a mying hte Basein kaw Sgaw Kayin ni a Chyum Laika jawng kaba hpe gap da nga ma ai
Ndai lachyum mali (1) Yesu a kasi hkan ai (2) Yesu a hkang da ai ga hpe shatup shadik ai (3) Hkristan Hpung langai ngai a hpung masha tai let Hkristan asak hkrung ai (4) Yesu a si ai, makoi mayang ai hte hkrung rawt wa ai hpe shadawn ai makam masham a kumla re; ngu ai hpe matsing da let dai lachyum ni hte bung pre ai hku anhte asak hkrung hkawm sa shamu shamawt nhtawn anhte a kashu kasha ni hpe mung sharin achyin ya nga ga law.
Post a Comment