Karai Wa a lam Sharin ya ai Wa
Marku 12:28-34
Chyumlai ka hta yu ai shaloi....
Yuda nawku htung hta mying kaba ai Laika ka ai sara ni ngu ai hpung mi nga ai. Dai hpung kaw na tara sara langai mi gaw Yesu kaw du nna chyam dinglik ai lai hku ga san langai sa san wu ai. Shi san ai gaw, “Yuda masha ni hkan nang ai jep ai tara ni hta gara wa mahtang kaba htum rai ta?” ngu ai re. Yesu gaw shi hpe Yuda tara jawng ni hta bat shagu chyet tsun nga ai “Shema” kaw na hpang nna kaba htum ai tsaw ra ai tara lahkawng hpe tsun dan wu ai. Yesu tsun ai gaw, “Israela masha ni e, madat mu! Dai Madu, anhte a Karai Kasang gaw langai sha rai nga ai. Dai Madu na a Karai Kasang hpe na a myit kraw lawang mahkra hte, na a myit masin wenyi mahkra hte, na a n-gun lagaw mahkra hte, na a machye machyang mahkra hte nang tsaw ra lu na rai ndai. Na a htingbu wa hpe na a hkum hte maren nang tsaw ra lu na ndai;” nga ai. Tara sara wa gaw Yesu jaw ai mahtai hpe myit dik myit hkrum wu ai rai nna, kaga kadai mung Yesu hpe matut nna san dinglik ai lam n galaw gwi masai.
Kam sham ai masha ni a myit kraw lawang mahkra, myit masin wenyi mahkra, n-gun atsam mashkra hte machye machyang mahkra hte tsaw ra ra ai Karai Kasang gaw kaning re ai Karai Kasang re ai lam Yesu sharin ya ai kun?
1. Yesu sharin shaga hkawm nga ai ten hta nga ai masha ni a myit hta Karai Kasang gaw san seng chyoi pra htum ai Wa re ai majaw yubak mara a kata e asak hkrung nga ai masha ni hte grai tsan ai sumsing lamu e sha nga ai ngu nna chye na ai law ma ai. Karai Kasang shanhte hte shani shagu rau rai nga ai lam hpe n dum ma ai. Dai majaw Yesu gaw shanhte hpe Karai Kasang gaw yubak lu ai masha ni yawng hpe shi a shayi shadang sha ni hpe tsaw ra ai zawn tsaw ra ai lam sharin ya nga ai. Yubak kap ai ni hpe tsaw ra myit hte matsan dum lama ai myit madun nna shanhte a machyi makaw ana ahkya hpe mung shamai shatsai ya nga ai. Dai zawn tsaw ra myit hkam la ai ni hpe yubak mara hta nga shanang na matu n-gun n jaw ai sha, hpang de yubak bai hkum galaw sa nga sharin shaga nga ai. Yesu shamai ya ai masha ni hpe Karai Kasang shanhte a yubak mara dat kau ya sai lam tsun nga ai . Yuda nawku htung sara ni hte shawa masha ni e nlung hte kabai sat na matu dun sa wa ai numsha langai mi hpe Yesu gaw dai masha sat hkyen ai ni kaw na hkye shalawt la nna, “Ngai mung nang hpe n jeyang nngai. Wa u. Yubak hkum galaw sa !” ngu nna shabawn dat nga ai.
2. Yesu shi nan Karai Kasang hpe awa ngu nna shaga nga ai. Aramaic ga hta Abba ngu ai gaw ma kaji langai mi grai hkau chyap ai ladat hku kawa hpe shaga ai ga re. Ndai gaw Yesu Karai Kasang hte gade daram ni ai hku kanawn mazum ai lam hpe madun ai re. Shi kyu hpyi ai shaloi Karai Kasang hpe Abba ngu nna shaga nga ai. Getsemane sun e myit ru myit ra hte akyu hpyi ai ten hta Abba, Wa e, ngu nna hpyi ai hpe mu lu ai. Shi nan Karai Kasang hte grai ni ai hku asak hkrung kanawn mazum nga ai hte maren, shi a sape ni hpe kyu hpyi sharin ya ai shaloi mung dai zawn hpyi na matu sharin ya nga ai. Roma Laika daw kaba 8 hta Kasa Pawlu gaw, Hkristu Yesu a marang e anhte gaw Karai Kasang hpe Abba, Wa e, ngu shaga na ahkaw ahkang lu la sai lam hpe sharin ya nga ai.
3. Madu Karai Kasang gaw lam yit mat ai, yubak kap ai shi a shayi shadang sha ni hpe tsaw ra ai majaw mu la hkra hkan tam nga ai lam ga shadawn law law lang nna Madu Yesu sharin ya nga ai. Gumhpraw dingga lap shi hta na langai mi mat mat ai majaw pyeng din shatu nna ding ye ye let mu hkra tam nna mat ai gumhpraw mu la ai num zawn Karai kasang gaw mat ai ni hpe tam nga ai lam, shanhte hpe mu la yang gade kabu ai lam hpe Yesu sharin ya nga ai. Dai hte maren sagu latsa lu nna langai mi mat mat ai sagu rem wa dai mat mat ai sagu hpe mu la hkra tam shakut nna, mu jang kabu gara ai hte lahpa e hpai nna wuhpawng de hpai wa ai lam hpe shadawn let Karai Kasang mat ai ni hpe bai mu la yang gade kabu ai lam hpe Yesu sharin ya nga ai. Wa Rem Brang a maumwi hta dam mat ai kasha nta wa yang kawa gade daram kabu ai hte, ashep ashin re ai bu hpun palawng hte wa ai kasha hpe shi a shadang sha majing zawn shabu jahpun hkap la poi kaba galaw ya ai lam tsun dan let Karai Kasang yubak kap ai shayi shadang sha ni myit malai kayin wa na matu la dingda nga ai lam sharin ya nga ai.
4. Karai Kasang gaw shinggyim kanu kawa hta grau myit galu ai hte shayi shadang sha ni asak hkrung nga lu na matu ra sharawng ai hpe dan dan leng leng sharin ya nga ai. Karai kasang gaw shinggyim kanu kawa ni zawn ari jaw, dam jaw, matai htang re ai hku nna sharin shaga nga ai n rai; myit galu kalang hte n htum n wai ai tsaw ras myit lang nna sharin shaga nga ai lam madun dan nga ai. Karai Kasang a myit mang ai lam gaw masha a myit mang ai lam hta lamu hte aga zawn tsaw nga ai lam Esaia Laika 55:8 hta ka da nga ai. Dai gaw myit malai ai hte mara dat ya ai lam hte seng ai mungga rai nga ai.
Ndai zawn re ai Karai Kasang hpe nawku kam sham ai ni gaw anhte a myit masin kraw lawang kaw na katu pru ai chyeju dum ai myit hte, dai Madu anhte a Karai Kasang hpe anhte a myit kraw lawang mahkra hte, myit masin wenyi mahkra hte, atsam marasi mahkra hte, machye machyang mahkra hte tsaw ra mai nga ai.
Na a htingbu wa hpe na a hkum hte maren ngang tsaw ra lu na ndai ngu ai tara gaw masha hte masha a lapran na kanawn mazum ai tara rai nga ai. Htingbu wa ngu ai gaw kadai hpe ngu ai rai ta? Ndai ga san hpe Yesu gaw ga shadawn langai mi hku nna htai dan nga ai. Damya ni a lata hta adup ajin hkrum sha nna si malap mat hkra re ai hpaga la wa hpe htingbu wa hku karum ang ai hkinjawng wa hte Lewi masha yan gaw htingbu kaja n tai ai sha lam makau hku koi lai mat wa ai. Hpaga la wa e yu kaji matsat da ai Samari masha mahtang dai Yuda hpaga la wa hpe htingbu majing zawn yu lakawn tsi lajang nna lit la ai lam Yesu hkai dan ai. Ndai kaw madun ai gaw, na a htingbu wa gaw na a karum shingtau ai lam hpe lu la ra ai kadai wa rai ti mung na a htingbu majing re ai lam Yesu sharin ya nga ai.
Anhte a myit hta htingbu ngu ai ni gaw anhte hte ani anawn sha nga ai ni; anhte a amyu bawsang ni, anhte hte rau ga amyu sha shaga ai ni; mare langai, mungdan langai kaw sha nga ai ni re ngu myit chye ga ai. Madu Yesu sharin ya ai gaw dai zawn re ai ni nawn ai masha ni hta kaga anhte a karum shingtau ai lam hpe lu la ra ai kadai wa mung; myi man tau ai lam n nga ai; amyu baw sang ginhka ai lam n nga ai, ra kadawn ai wa shagu gaw Karai Kasang a shayi shadang sha rai nna anhte a htingbu re ai lam sharin ya nga ai. Anhte langai hte langai tinang a tsaw ra myit gade daram gyip nga ai shing n rai dam lada nga ai ngu ai hpe myit sumru yu ra ga ai. Ga shadawn ru yak hkrum nga ai Myen hpunau langai ngai hpe mu yang anhte shi a htingbu tai na ga ni? Karai Kasang a tara anhte hpe shadut nga ai rai nna myit masin ningnan hte asak hkrung mai saga ai. Dai zawn re ai htingbu myit a majaw anhte hte ga n bung; htung hking n bung, nga shara n bung ai Sasana sara, sarama ni gaw anhte kaw du sa nna Karai Kasang a kabu gara shiga karan jaw mani ai.
Madu Yesu nan kasi madun ai gaw shi a asak hpe yubak lu ai masha ni a matu gawng malai hkungga shatai let yubak kap ai ni yawng a matu htingbu majing tai nu ai. Shi a hpang hkan ai ni anhte yawng mung shi a kasi hkan nna Madu Karai Kasang hpe anhte a myit karaw lawang mahkra hte, myit masin wenyi mahkra hte, atsam marai mahkra hte, machye machyang mahkra hte tsaw ra ai hte anhte a htingbu wa hpe anhte a hkum hte maren tatut tsaw ra let asak hkrung sa wa ga.
T.B Mawshe
Tsinyam Camp
Post a Comment